ބުނެދޭށޭ ރުހެމޭ 63

“އަހަރެންގެ މަންމަ… މަންމަވެސް ނިޔާވީތަ؟” ހައިޒަލް ނޭވާލުމެއްނެތި އަވަސްގޮތަކަށް ސުވާލުކުރިއެވެ. އޭނައަށް އިނގިފައިވާގޮތުން އޭނަ އެއްލާލައިފައި މަންމަ ފިލީއެވެ. އަލްހާން އޭނައަށް ބުނެދިން ގޮތަކީ އެއީއެވެ. އޭނަގެ ދޮންބެ އަލްހާން އޭނަގެ މައިންބަފައިންގެ މަރުގެ ހަބަރު މިހާތަނަށްވެސް ސިއްރުކުރީ އޭނައަށް ލިބިދާނެ ހިތާމައަކަށް ވިސްނާފައިކަމަށް ހިތް އޭނަައަށް ވިސްނައިދިނަސް ހައިޒަލްގެ ހިތުގައި ސުވާލު އުފެދުނީ ސަބަބެއްނެތިއެއްނޫނެވެ. އެހެންވާނަމަ އޭނަގެ މަންމައާއި ބެހޭގޮތުން އަލްހާން އެހާބޮޑު ދޮގެއް ހެދީ ކީއްވެގެން ހެއްޔެވެ؟

“ހޫމް.. އަޒްހާން އަންކަލްއާއި ހައިލާ އާންޓްގެ ހަށިގަނޑު އައިޑެންޓިިފައިވެސް ނުކުރެވޭވަރަށް ފިހިފައި އޮތީ… ޔޫވަރ ދަ އޮންލީ ވަން ހޫ ސަވައިވްޑް…” ޒިވާން ވާހަކަދެއްކިއިރު ލޯތެމޭގޮތްވީ ހައިޒަލް ހިތަށް ކުރާނޭ އަސަރުކޮންމެވެސް ވަރަކަށް އިހުސާސް ކުރެވިފައެވެ. ޒިވާންއަށް އެހާ ތަފްސީލުކޮށް އެވާހަކަތައް އިނގުނީ ބައްޕަ އަފްޒަލްގެ ފަރާތުންނެވެ. އަފްޒަލްއާއި އަޒްހާނަކީ ވިޔަފާރީގެ ގާތް ދެއެކުވެރިންނެވެ.

ހައިޒަލް އިސްޖަހާލައިގެން އިނދެފައި ނޭފަތް ދަމާލިއެވެ. އެލޮލުން އެންމެ ކަރުނަތިއްކެއް ނަޔަސް އެހިތަށްވެފައިވާވަރުވީ ހާމައަށެވެ. ހުރިހާކަމެއް ހާމަވެގެންދިޔައިރު މަންމައާއި ބައްޕަވަނީ އޭނަ ގޮވާލިޔަސް އަޑުނީވޭހާ ދުރުގައެވެ. މިހުރިހާ ދުވަހު އޭނައާއި ވަކިވެފައިވާކަމަށް ހިތް ބުނަމުންދާ ފަރާތަކީ ދޮންބެއެއްނޫނެވެ. އޭނަގެ އުފަން ބައްޕައެވެ. މަންމަގެ ގުރުބާނީގެ އަގުވަޒަންކުރުމުގެ ބަދަލުގައި އޭނައަށް ނޭނގުމެއްގައި ހުރެ މަންމަ ކުށްވެރިކުރެވުނީއެވެ. މަންމަ ބޮލުގައި އިލްޒާމްއަޅުވާ ނަފްރަތުގެ އޮށް ހިތުގެ ތެރޭގައި އިންދުނީއެވެ. ކަށްވަޅުގައި އޮތް މަންމަގެ މައްޗަށް އަލްހާން އޭނަގެ ހިތް ނުބައި ކުރުވީއެވެ.

ހައިޒަލްގެ ދުނިޔެ ފުޑުފުޑުވެގެންދިޔަ ހަގީގަތާއިއެކުވެސް ދުނިޔެއާއި ކުރިމަތިލާން އަޒުމްކަނޑައެޅިއެވެ. ވަގުތު ފާއިތުވެފައިވާއިރު މިއަދު އޮތީ ދުނިޔެދޫކޮށްފައިވާ ފުރާނަތަކަށް ހެޔޮދުއާކޮށްދީ އެމީހުންގެ ހައްްޤުތައް ހޯދައިދިނުމަށް މަސައްކަތްކުރުމެވެ. މަންމައާއި ބައްޕައާއިއެކު ހަޤީގަތް ވެލީގެދާނުގައި ވަޅުލެވިގެންދިޔުމަށް އޭނަ ދުލެއްނުކުރާނެއެވެ. މަންމައާއި ބައްޕަގެ މަރަކީ ބައެއްގެ އަތެއްނެތި ހިނގާދިޔަކަމެއްކަމަކަށް ހައިޒަލް ޤަބޫލެއްނުކުރެއެވެ. މަރުހޫމް ދެފުރާނައަށް އޭނަ އިންސާފުހޯދައިދޭނެއެވެ. އަޒްހާންއާއި ހައިލާގެ ހަމައެކަނި ނިޝާނުގެ ގޮތުގައި ދުނިޔެއާއި ކުރިމަތިލައިގެންނެެވެ.

*** *** *** *** *** ***

އިރުއޮއްސެމުންދިޔައިރު އުޑުމަތި އޮތީ ރަތްކުލައިގައެވެ. އުދަރެހާއި ދިމާލުން އެ ކުލަ ވަކީން ގަދަވެ ކަނޑަށް ލޭފައިބަމުންދާފަދައެވެ. ދޫނިތައް އޭގެ ހާލިތަކަށް މިސްރާބުޖަހަންމުންދިޔަ ވަގުތުކޮޅުު މަޔާންއާއި ހައިޒަލް ތިބީ ހައިޒަލްގެ ކާރުގެ ތެރޭގައެވެ. އުދަރެސް ރަންގުކުލަމުންދިޔަ ކުލަތަކަށް ނަޒަރު ހުއްޓާލައިގެން ހައިޒަލް އިންއިރު މަޔާން ހިމޭންވެފައި އިނީ ހައިޒަލްގެ ފަރާތުން ބަހެއް އިވޭނޭކަމަށެވެ.

“ޔާން.. ދެއަރ އަރ މައި ޕޭރެންޓްސް…” ހައިޒަލް ބޭރަށް ފެންނަމުންދިޔަ މަންޒަރަށް ނަޒަރު ހުއްޓާލައިގެން އިނދެފައި ބުނެލުމާއިއެކު މަޔާންއަށް ހައިޒަލްއާއި ދިމާލަށް ބަލާލެވުނީ ތަފާތު ނަޒަރަކުންނެވެ.

“އޭ.އެޗް.ފިނޭންޝިއަލްއަކީ ބައްޕަ އުފެއްދި ކުންފުންޏެއް… އެ ލެޓަރސްތަކުން ރިފްރެޒެންޓްކުރަނީ އަހަރެމެންގެ ކުޑަ އާއިލާ… އޭ އަޒްހާން… އެޗް… ހައިލާ.. ހައިޒަލް… ބައްޕަ ނިޔާވުމާއިއެކު ޑޭޑް އެ ކޮމްޕެނީއާއި ހަވާލުވީ… ދޭއަރ ބްރަދަރސް.. ޑޭޑްއަކީ އަސްލު އަހަރެންގެ އަންކަލް… ދޮންތައަކީ ކަޒިން ސިސްޓަރ… ” އަވިއައިނަކުން ހައިޒަލްގެ ލޯނިވާކޮށްލައިފައިވާއިރު އިރުގެ އަލިން އެމޫނަށް ވެރިކޮށްލައިފައި ރަންކުލައިގައި އެ މޫނު ފެންނަނީ ހިތްތައް ޒަހަމްކޮށްލާހާ ފުރިހަމަކޮށެވެ. ތުންފަތްމަތީ ހިނިތުންވުމުގެ އަސަރެއްނުވާއިރު ހިތާމައިގެ ތަސްވީރެއްފަދައެވެ.

“މަންމައާއި ބައްޕަ ދުނިޔޭދޫކުރީ އަހަރެން ސަލާމަތްކުރަން އުޅެނިކޮށް… މިހުރިހާދުވަހު އެހެން ބަޔަކަށް މަންމައާއި ބައްޕަ ކިޔައިގެން އުޅުނުއިރު އަހަރެންނަށް ނޭނގުނު… އެކަމަކު އަހަންނަށް ހުރިހާކަމެއް އިނގެންހުރީމަ ނައިޓްމެއަރސްގެ ގޮތުގައި މިވީހާތަނަށްވެސް އެހަނދާންތައް އުނދަގޫކުރީ… އައި ފީލް ހޮޕްލެސް… ހަޤީގަތުގައި މަންމައާއި ބައްޕަގެ މާގިނަ ހަނދާންތަކެއް އަހަންނާއިއެކުއެއް ނެތް… އަހަންނަށް ހުރިހާކަމެއް މިއިނގުނީ މާލަހުން… މިއަދު ކުރެވޭނޭކަމަކަށް އޮތީ އެމީހުންނަށް އިންސާފުހޯދައިދިނުން… ޔާން… ޕްލީޒް… އަހަރެންގެ މަންމައާއި ބައްޕަަައަށް އިންސާފުހޯދައިދީ… އަހަރެންގެ ހިތް ބުނޭ އެމީހުންނަށް އެހެން ހެދި މީހަކު ހުންނާނެއޭ…” ހައިޒަލް މަޔާންއާއި ދިމާލަށް ބަލާލިވަގުތުކޮޅު މަޔާން ބޯޖަހާލިއެވެ.

“ބޭނުމެއްނޫން ޑޭޑްގެ މައްޗަށް ހިތް ގޯސްކުރާކަށް… އެކަމް އަހަންނަށް ހަގީގަތް އިނގިގެން ސުވާލުކުރީމަވެސް ޑޭޑް ހެދީ ދޮގު… ކަށްވަޅުގައި އޮތް މަންމަގެ ބޮލުގައިވެސް ތުހުމަތު އެޅުވީ… މިވީހާތަނަށްވެސް އަހަރެންގެ ދިރިއުޅުން ބައްޓަންކުރަމުން އައީ އެމީހުން ބޭނުންވާގޮތަށް… އަނދިރީގައި ބަހައްޓައިގެން މިހިސާބަށް ގެނެސްފައި ލޯބިވެސް ފޭރިގަތީ… މަންމަގެ ލޯބި ނުލިބުނިތާ އަހަންނަށް ހަޔާތުގެ ބައިވެރިއެއްގެ ލޯބިވެސް ނުލިބުނު… ނައިނާގެ ފުރާނައިން ބިރުދައްކައިގެން އަހަންނަށް ޝަލީންއާއި ކައިވެނިކުރަން މަޖުބޫރުކުރީ… މުޅި ދުނިޔެވެސް ދެކޭނީ އަހަންނަކީ ލޯބި ހޯދަން ހަނގުރާމަކުރަން ނުކެރުނު ފިޑިއެއްގެ ގޮތުގައި… އެއްފަރާތުގައި އަހަރެންގެ ބައްޕަ އަނެއްފަރާތުގައި ނައިނާގެ ފުރާނަ.. އަހަރެންނަށް ދެކޮޅު ހަދަން ކެރޭނެތަ؟ ހަގީގީ ލޯބިވާނަމަ ލޯބިވާފަރާތުގެ ހަށިގަނޑުގައި ޒަހަމެއް ލެވޭތަން ދެކޭކަށް ބޭނުމެއްނުވާނެ… ނައިނާ ގެނބިގެން އުޅުނުތަން ފެނުމުން އަހަންނަށް ވީގޮތެއްވެސް ނޭނގެ… އެވަގުތު ނައިނާގެ ސަލާމަތާއިމެދު ކަންބޮޑުވީވަރުން ވަގުތުން އެއްބަސްވެވުނީ… އަހަރެންގެ ދުނިޔެއަކީ އެއީ… ހެޔޮހާލުގައި ނައިނާ ހުންނަތަން ދެކެމަށްވުރެ އަހަރެން ބޭނުންވާ ކަމެއްނުވާނެ…” ހިތުގެ ހާލަތު އެހެންމީހެއްގެ ކުރިމަތީ ހާމަކުރުމަކީ ހައިޒަލް މިހާތަނަށްވެސް ކުރިކަމެއްނޫނެވެ. ނަމަވެސް ފިރިހެނަކަށްވިޔަސް އޭނައަށް ކެތްކުރެވޭނީ ވަކި ދަރަޖައަކަށެވެ. ލޯބީގެ ދުނިޔެ އޭނާއަށް ދެއްކީ އަޙުވައެވެ. އޭނަގެ ބޭނުންވީ ދެފަރާތުގެ ލޯބިންވެސް ތަގުދީރު އޭނަ ވަކިކުރީއެވެ.

“މިހާރު ބޭނުން މި ދުނިޔެއިން ދުރަށް އައިސް އަހަރެންގެ ލޯބިވާ މީހުން ހޯދަން… ޔާން އަހަންނަށް އެހީވެދެއްޗޭ…” ހައިޒަލް މަޔާންއާއި ދިމާލަށް ބަލާލަމުން ހިނިތުންވެލަން މަސައްކަތްކުރިއެވެ. އޭރު ހައިޒަލްމެން ތިބި ކާރާއި ޖެހިގެން ޕާރކްކޮށްފައި އޮތް ކާރުގައި އިން މިކްޔާލް އިނީ އޭނައަށް އިވުނު ވާހަކަތަކުން ބަސްހުސްވެފައެވެ. އެދެމެދުގައިވާ ދުރުކަން ނައްތާލަން ބޭނުންވެއޭ ބުނެ މިތަނަށް ގެނައިނަމަވެސް އެފަދަ ވާހަކަތަކެއް އިވިދާނޭކަމަކަށް ހިޔެއްނުކުރެއެވެ. އެއިން ކޮންމެ ވާހަކައަކުން ދިރުއުޅުމަކީ ހައިޒަލްއަށް ކިހާ ހިތި ކަމެއްކަން ހާމަވެގެންހިނގައްޖެއެވެ. އޭނައަށް މިހުރިހާ ދުވަހު ލޯމައްޗަށް ފެނުުނު މަންޒަރުތަކަކީ ހައިޒަލް ލޯ މައްޗަށް ދައްކުވާލި ހަގީގަތެއްނެތް ތަސްވީރުތަކެކެވެ. ހިތާމަތައް ވަންހަނާކުރަން ހައިޒަލް ކުޅަދާނަކަމުން އޭނަގެ ލޯމައްޗަށްވެސް އޮޅުވާލެވުނީއެވެ.

މަޑުމަޑުން ރަތްވިލާގެ ކުލަތައް ފުހެމުންދިޔަ މަންޒަރަށް ބަލަހައްޓައިގެން ހައިޒަލް އިނދެ ހިނިތުންވެލިއެވެ. ނަމަވެސް އެހިތްދިޔައީ ހިތާމައިގެ ކަނޑަކަށް ގެނބި ޢަރަޤުވަމުންނެވެ. ބައެއްފަހަރު ހިތާމައަކީ ތިމާއަށް ހިތްވަރުދީ ކުރިއަށްދާން ހިތްވަރުދޭ ބައިވެރިއެކެވެ. ކުރިއަށް ފިޔަވަޅުތައް ނެގުމަށް މަގުފަހިކޮށްދޭ މަދަދުގާރެކެވެ. ހިތާމައިގެ ސަބަބުން ހިތްވަރުއެލުވައިލައިގެން ތިބެން ދުނިޔެ ތަނެއް ނުދެއެވެ. މިވަގުތީ މަންޒިލްގައި އޮތީ އިމްތިހާންތަކަށް ކެތްތެރިވެ އުއްމީދުތައް ހާސިލްކުރަން މަސައްކަތްކުރުމެވެ.

*** *** *** *** *** ***

ހައިޒަލް އަލްހާންގެ ކެބިންއަށް ވަދެލިއިރު އަލްހާން އިންނެވީ އިޝާރުއާއި އައްމާރުއާއި އެކު ކޮންމެވެސް ވާހަކައެއްގައެވެ. ހައިޒަލް ވަނުމާއިއެކު އެންމެންގެ ކަޅި ހައިޒަލްއާއި ދިމާލަށް ދަތުރުކުރިއެވެ. އަލްހާން ހައިޒަލް ގާތު ފަހުން އައުމަށް އެދެމުން އޭނަ ދައްކަވަމުންދިޔަ ވާހަކަަގައި އަލުން މަސްއޫލުވިއެވެ.

“އަލްހާން ކަލޭގެ ނުވާ ފިރިހެންދަރިދޯ…” ހައިޒަލް ދޮރުން ނިކުތްތަން ބަލަން އިނދެފައި އައްމާރު ބުނެލެއްވިއިރު އެބަސްތައް ކިތަންމެ ރީއްޗަކަށްވެސް ހައިޒަލް އިވުނެވެ. އެެއާއިއެކު ކެބިން ކުރިމަތީ މަޑުކޮށްލެވުނީ އައްމާރަށް އަލްހާން ދެއްވާ ރައްދެއް އަޑުއަހާލަން ބޭނުންވީވަރުންނެވެ.

“ތިއީ ދެން ކޮން ވާހަކައެއް…” އަލްހާންގެ އަޑުން ފާޅުވީ އެދެމެދުގައި ދެކެވެންފެށި ވާހަކައާއި ގަޔާނުވާކަމުގެ އަސަރެވެ.

“އަލްހާން ކިތަންމެ ނުވާކަމަށް ހެދިޔަސް ކަލޭގެ ގަހުގެ ކޭލެއްނޫންކަން ބަލާލައިފައިވެސް އިނގެޔޭ… އަޒްހާންއާއި ތަފާތެއްނެތްވިއްޔަ… ކަލޭގެ އުޅުން ލިބުނުކަމީ ނަސީބު… ދެން ރަނގަޅުތާ ނަމެއްގައި ފިރިހެން ދަރިއެއްވެސް ލިބުނީނު…” ކޮފީތަށިން ކޯވަރެއް އެތެރެކޮށްލަމުން އައްމާރު ހީނގަތެވެ. އޭރު އަލްހާންގެ މޫނަށް ވެރިވެގެންދިޔަ ކުލަވަރާއިއެކު އިޝާރު އައްމާރުގެ އަތުގައި ހިފަހައްޓާލެއްވިއެވެ. ހައިޒަލް ކަންފަތް ހުޅުވާލައިގެން ހުރެފައި ދުރަށް ހިނގައިގަތެވެ. ކުޑަ ވަގުތުކޮޅަކަށް މަޑުކޮށްލިނަމަވެސް ހައިޒަލްއަށް ނުހަނު ބޮޑުކަމެއް އިނގުނީއެވެ. ނަމަވެސް އަދި ވަގުތު ނުޖެހޭތީ އެކަން އެގޮތަށްވުމަށް މެދުވެރިނުވީއެވެ.

*** *** *** *** *** ***

ބަނަވިލާތަކުން އުޑުމަތި ބައްދާލައިފައިވާއިރު ދުނިޔެމަތި އޮތީ އަނދިރިކޮށެވެ. އިރުކޮޅެއްކުރިން ވާރޭ ހުއްޓާލިޔަސް ޖެހެމުންދިޔަ ބާރުވަޔަކަށް ބަދަލެއްނާދެއެވެ. މާސިންގާ ކަނޑުވެސް ރުޅިވެރިކަމާއިއެކު ކެކެމުންދިޔައެވެ. ކަނޑުން ނަގަމުންއަންނަ ހޮޅިރާޅުތައް އައިސް ގާތަކުގެ މައްޗަށް މުގުރާލާ އަޑުން ހިމޭންކަން ނަގާލައިފައިވެއެވެ.

“މާދަމާ ރަސްމީކޮށް އަހަރެން މިކޭސްއާއި ހަވާލުވާނަން އޭގެ ފަހުން މިކަން މިހާރު މިއޮއްހެން ސިއްރެއްގެ ގޮތުގައެއްނޯންނާނެ… މިހާރުވެސް ބޭރުތެރެއަށް ހަބަރުނުދާކަމެއް ނޭނގެ… އަހަރެމެންގެ ތެރޭވެސް އެބައުޅޭ ވަކިބަޔަކަށް މަސައްކަތްކޮށްދޭ އަތްތަކެއް… މިކޭސްގައި އަހަންނާއި އައިޒާންގެ އިތުރުން އިތުުރުބަޔަކުވެސް ހަރަކާތްތެރިވާނެ… އަހަރެން ސީދާ ހައިއަށް މައުލޫމާތު ދެމުންދާނަން…” ކަނޑުން ނަގައިމުން އައި ބިޔާ ރާޅުތަށް ބިންދާލާއިރު އުފެދެމުންދާ ބާނިތައް ނަޒަރު ހުއްޓާލައިގެން އިނދެ މަޔާން ވާހަކަދެއްކީ އޭނަގެ ގާތުގައި ބެންޗްގައި އިށީދެލައިގެން އިން ހައިޒަލްއާއިއެވެ.

“ދެން ކިހިނެތް ކަންތައް ކުރިއަށްދާނީ…” ނިއްކުރިމަތީ އިނގިލި އަޅާ އޮއްބާލުމަށްފަހު ދެފަރާތަކަށް އިނގިލި ހިންގާލަމުން ހައިޒަލް ސުވާލުކުރިއެވެ.

“އަހަރެމެންނަށް މިހާރުވެސް އެއް ސަސްޕެކްޓްވަނީ ހޯދިފައި… އެކަމަކު ސާބިތު ދަރަޖައަކަށް އެކަން ޔަގީންވުމަށްޓަކައި އިތުރު ހެކިތައް ހޯދަންއެބަޖެހޭ… އެހެންނޫނަސް އަހަރެންގެ ހިތެއް ނުބުނޭ މިއީ އެކަކު އެކަނިކުރިކަމެކޭ… މި ހާދިސާއާއި އެއްފަދަ އެހެން ހާދިސާތަކުގައިހެން އަހަރެން މިބަލަނީ އަދިވެސް އިތުރު ބައިވެރިން ތިބެދާނޭކަމަށް… ދެން.. އަހަރެން އެދެން އަހަރެމެންގެ މެދުގައި ބަދަލުކުރެވޭވާހަކަތައް ތިންވަނަ ފަރާތަކާއި ހަމަޔަށް ނުދިޔުމަށް… މިކްޔާލްގެ އިތުރުން އެހެން ފަރާތަކަށް… އަދި އަމިއްލައަށް އެއްވެސް ކަމެއް ނުނިންމުމަށް.. ބަދަލުހިފުމުގެ ރޫހުގައި ކަމެއްނުކުރުމަށް… ކުށްވެރިންނަށް އަދަބުދިނުމަކީ ކަމާއިބެހޭ ފަރާތުގެ އަތްމަތީ އޮތްކަމެއް….” މަޔާން ވާހަކަދެއްކީ ކުރީގެ ބައެއް ހާދިސާތަކުގެ ވާހަކަތަކާއި ގުޅުވާލަމުންނެވެ. އަދި އައްމާރުގެ ވާހަކަތައް ކިޔައިދިނުމުގެ ކުރިން ހައިޒަލްއަށް ނަސޭހަތްތެރިވިއެވެ. އެފަދަ ހާލަތެއްގައި ހަމައިން ނެއްޓިގެންގޮސް އަމިއްލަ އަތުން ގޯސްހެދޭތަން އަންނާނޭކަން މަޔާން ދަނެއެވެ.

އޭ.އެޗް.ފިނޭންޝިއަލްއާއި ސިލްކްއާއި ދެމެދު އޮތް ވާދަވެރިކަމާއިއެކު އައްމާރު އެފަދަ ކަމެއްކުރަން ޖެހުނުކަމަށް ވިސްނުނު ސަބަބާއި އަދި ރުހާމްގެ ފަރާތުން އިވުނު ވާހަކަތައް މަޔާން ތަފްސީލުކޮށް ކިޔައިދެވުނުއިރު ހައިޒަލްގެ އަތްމުށްކެވުނެވެ. އެދެލޮލުގެ ތެރޭ އަނދަންފެށި ހުޅުކޮޅާއިއެކު މޫނުމަތިން ރުޅިވެރިކަން ފާޅުވިއެވެ.

އޭނަ ޔޫއެސްއިން އައިފަހުން އައްމާރު އޭނައާއި ދިމާލަށް ބަލާގޮތް ތަފާތުވެފައިވާކަން ހައިޒަލްއަށް ފާހަގަކުރެވެއެވެ. ބްލޫސްގެ ފްލޯޓިން ހޮޓެލްގެ އެއްބަސްވުމުގައި ސޮއެކުރުމުގެ ހަފްލާ އޮތްރޭ އައްމާރުގެ ނަޒަރު މުޅިންހެން ހުއްޓިފައިހުރީ އޭނާއަށެވެ. އެދެލޮލުން ފެނުނީ ރުޅިވެރިކަމާއިއެކު އުނދަގޫވެފައި ހުރިކަމުގެ އަސަރުތަކެވެ. ސަބަބު އޭނާއަށް އިނގުނީ އަދި ކިރިޔާއެވެ. އޭނަ އަޒްހާންއާއި ވައްތަރުވީމައެވެ. އޭނަ ބައްޕައާއި ވައްތަރުކަމަށް ކޮންމެ މީހަކުވެސް ބުނަނީ އަޒްހާންއާއި ގުޅުވާފައެވެ. އަޒްހާންގެ ވަސްދުނިޔެއިން ފުހެލުމަށްފަހު އައްމާރު މިހާރު އެހުރީ އަލްހާން ގާތުގައި ވިއްދާފައެވެ. އަމިއްލަ މަޤްސަދެއްގައި އައްމާރު ބައްޕަ ވާވައްދަނީއެވެ. ބަދަލުހިފުމުގެ ރޫހު އަދިއަދަށްދާންދެންވެސް އައްމާރުގެ ހިތުގައި އޮތީއެވެ. ބްލޫސްއަކީ ސިލްކުގެ އެކުވެރިއެއްނޫނެވެ. އައްމާރު ނަޒަރުގައި އެއީ ވާދަވެރިއެކެވެ.

“ޝަލީ އޯކޭވެއްޖެތަ؟” އެދެމެދުގައި ބަދަލުކުރެވުނު ވާހަކަތަކަށްފަހު ހައިޒަލް ވާހަކަދެއްކިއެވެ. ޖަވާބެއްގެ ގޮތުގައި މަޔާން ބޯހޫރާލިއިރު އެ މޫނުގައިވީ މާޔޫސްކަމެވެ.

“ޝަލީއަށް ޓައިމް ބޭނުންވާނެ.. މިހާރު އަމިއްލަައަށްވެސް ވިސްނޭ ޝަލީއާއިމެދު ކަންތައްކުރެވުނީ ކިހާ ހާރޝްކޮށްކަން… އެހެންވެ ޝަލީއަށް ޓައިމްދޭން މިހުރީ… ޝަލީ ކުޑަކޮށް ސްޓަބަންވާނެ…” މަޔާންގެ މޫނުމައްޗަށް ވެރިވިކުލަވަރުންވެސް އެއީ މަޔާން ބޭނުންވާގޮތް ނޫންކަން އިނގުނެވެ.

“ހައި ޓޭކް ކެއަރ އޮފް ހާރ.. ހައިއަށް ޓްރަސްޓްކުރަން… އަހަންނާއި ޝަލީގެ ވާހަކަ ބާއްވާފައި ބުނެބަލަ.. އަދިވެސް ނުވޭތަ ނައިނާއަށް ހަގީގަތް ކިޔައިދޭކަށް… ތިދެމީހުންގެ ގުޅުން ހަމަ ތިހެން ނިންމާލާނީތަ؟ ފުރަތަމަ ޖުމްލަތައް ބުނެލިއިރު އެމޫނުމަތިން ފާޅުވިއަސަރުތައް އެ ހިނިތުންވުމުން ފޮރުވާލަމުން މަޔާން ގާތްގޮތަކަށް އަހާލިއެވެ.

“ހުރިހާކަމެއް ނުނިމެނީސް ކިޔައިދޭން ބޭނުމެއްނޫން… ނައިގެ އެހުންނަ ޖެހިލުންކުޑަ ކެރެކްޓަރއާއިއެކު ހުރިހާކަމަކަށް އިންވޯލްވާން އުޅޭނެ… ނައިނާ މިކަމުގެ ތެރެއަށް ވައްދާކަށް ބޭނުމެއްނޫން… މިދުވަސްކޮޅު އަހަރެމެން ދެމީހުންގެ ގުޅުން މީހަކަށް ނޭނގުނިއްޔާ ރަނގަޅުވާނީ.. ދެން އަހަރެމެން ވަކިކުރެވޭނޭ މީހަކު ނާންނާނެ… އަހަރެންގެ ހައްޤު ހޯދަން އަހަރެން ތެދުވާނަން…” ހައިޒަލްގެ ތުންފަތްމައްޗަށް ވެރިވި ހިނިތުންވުމާއިއެކު ބުނެލިއެވެ. މަޖުބޫރުކުރުވައިގެންނާއި ބިރުދައްކައިގެން އޭނަ ލައްވާ ކަންތައްކުރުވި ދުވަސްތައް މާޒީވެ ދިޔައީއެވެ. ހަނދާންތަކާއެކު ކުރީގެ ހައިޒަލް އެނބުރިއައިރު އޭނަގެ އުސޫލްތަކަށްވެސް ބަދަލުއަތުވެއްޖެއެވެ. އޭނަ ކޮންމެފަދަ ގޮތަކަށްވެސް މިފަހަރު ނައިނާ ހާސިލް ކުރާނެއެެވެ. އަލްހާންއަކަށްވެސް ދެން އޭނަ ނުހުއްޓުވޭނެއެވެ. ހަގީގަތް ސިއްރުކޮށްގެން އޭނަގެ މައްޗަށް ބާރުފޯރުވައިގެން އަލްހާން ލައްކަ ދުވަހު އުޅެފިއެވެ. ބައްޕަގެ ހައިސިއްޔަތުން އޭނަ އަދިވެސް އަލްހާންއަށް އިހުތިރާމްކުރުމަކީ މުޅީން އެހެންކަމެކެވެ. އެކަމަކު ދެން އޭނަގެ ދިރިއުޅުމަށް އެއްވެސް މީހަކަށް ބާރުފޯރުވާ ގޮތެއް ނުނިންމޭނެއެވެ. ދިރިއުޅުމުގެ ހުންގާން ދެން އޮންނަންޖެހޭނީ އޭނަގެ އަތުގައެވެ.

އޭނަ މިވަގުތަށް ހިމޭންވެލައިގެން މިހުރީ އޭނައަށް ހަޤީގަތް އިނގުނުކަން އެއްވެސް މީހަކަށް އަންގަން ބޭނުންނުވާތީއެވެ. އަދި ދުވަސްކޮޅަކު ހަނދާންނެތްކަމުގެ އެކްްޓްކޮށްލައިގެން އޭނައަށް ހެޔޮއެދޭ ފަރާތްތަކާއި އޭނަގެ ފަރާތުން ފައިދާ ނަގަން އުޅޭ ފަރާތްތައް ދެނެގަންނަން ޒިވާން ދިން ހިޔާލަކީ ދެވަނަނެތްފަދަ މޮޅު ހިޔާލެކެވެ.

“ޝަލީއާއިމެދު ހާސްނުވޭ.. ޝީ ވިލް ބީ ސޭފް އިން މައި ހޭންޑްސް… އަހަރެންވެސް ޓްރައިކުރާނަން ޝަލީއާއި ޓޯކްކުރެވޭތޯ…” އެވަގުތު މަޔާން ދުރަށް ހުއްޓާލައިފައި ނަޒަރު ހައިޒަލްގެ މޫނަށް ބަދަލުކޮށްލިއިރު ހިނދުކޮޅަކަށްނަމަވެސް ޔާން އޭނަގެ ވުޖޫދަށް އައީހެން ހައިޒަލްއަށް ހީވިއެވެ. ބައެއްފަހަރު މަޔާންގެ މޫނުން އޭނައަށް ޔާންގެ ސިފަ ފެނެއެވެ. އޭނަ ހަނދާންތަކުން އެންމެ ބޮޑަށް ހަނދާންހުންނަ ފަރާތަކީ ޔާންއެވެ. އަދިވެސް މަންމައާއި ބައްޕަގެ މާގިނަ ހަނދާންތަކެއް ހައިޒަލްގެ ސިކުނޑިއަކަށް ނާދެއެވެ. ނަމަވެސް މަންމައާއި ބައްޕަގެ ސިފަ ހަނދާންހުރެއެވެ.

މަޔާން އެދުނީ ޝަލީންއާއި އެވާހަކަ ނުދެއްކުމަށެވެ. ޝަލީންއަށް އަމިއްލަ ނިންމުމެއް ނިންމަން ވަގުތު ދިނުމަށެވެ. ޝަލީން އޭނަގެ ގާތަށް އަންނާނޭކަމަށް މަޔާން އުއްމީދުކުރެއެވެ. އެދެހިތުގައި ލޯބިވާއިރު އަދި އެދެހިތް ގުޅޭނެއެވެ. މަޔާންގެ ދުއާއަކީ އެއީއެވެ.

*** *** *** *** *** ***

“1998ވަނަ އަަހަރު ހިނގާދިޔަ އޭ.އެޗް.އިންޑަސްޓްރީޒް އަލިފާނުގެ ހާދިސާގެ މައްސަލަ އަލުން ބަލަން ފަށައިފި… 21 އަހަރު ފަހުން މިމައްސަލަ ބަލަން ފެށީ މިހާދިސާގައި ޝައްކުކުރެވޭ ބައެއް ކަންތައްތައް ހުރުމުންކަމަށް މައުލޫމާތު ލިބޭ…” އެމް.އެޗް ޗެނަލްގެ މެންދުރު ހަބަރު ގެނެސްދެމުންދިޔައިރު ހަބަރުގެ ތެރެއިން މަޔާންގެ އިންޓަރވިއުއެއް ދައްކަމުންދިޔައެވެ. އެތައް ނޫސްވެރިންތަކެއްގެ ކުރިމަތީ ހުރެ ކޭސްއާއި ހަވާލުވެގެންހުރި ފަރާތުގެ ހައިސިއްޔަތުން މަޔާން ވާހަކަދައްކަމުންދިޔައެވެ.

ކަންފަތުގައި ފޯނު ޖައްސަވާލައްވައިގެން ރޯޒްވުޑް މޭޒްގެ ކުރިމަތީ ކުރާލިކަޑުއްވަމުން ގެންދެވި އައްމާރުގެ ނަޒަރުވަނީ ކެބިންގެ ފާރުގައި ހަރުކޮށްލެވިފައިވާ ޓީވީއަށް ހުއްޓިއެވެ. އެ މޫނުމަތިން ފާޅުވަމުންދާ ރުޅިވެރިކަމާއިއެކު ގޭނިގެންދާހާ ބާރަށް ދަތްކާރުވައިލައްވައިގެން ހުންނެވިިއިރު ފޯނުގައި ހިފަހައްޓަވައިގެން ހުންނެވިއަތަށް ބާރުވަމުންދިޔައެވެ.

“ބޮޑު އަގުދީފައި އަަހަރެން ކަލޭމެން ބަހައްޓާފައި ތިތިބެނީ މަށަށްލިބޭ ލާރިގިނަވެގެންތަ؟ އޭނ… އެފިރިހެނާ ހުރެފައެއްނޫންދޯ މިކަންބަލަން އެފެށީކީ… ކިހިނެތްވެފައި ކަލޭމެން ތިބީ… އަހަންނަށް މިހާރު ހަބަރުތައް ލިބެންޖެހެނީ ޓީވީ ޗެނަލްތަކުންތަ؟ އޭނ…” އެކޮޅުން ފޯނު ނެގުމާއިއެކު އައްމާރު ހަޅޭލަވައިގެންނެވީ އަޑުއަހަން ހުންނަ މީހެއްގެ ކަންފަތުގެ ތޫރި ފަޅައިގެންދާހާ ބާރަށެެވެ. އެކޮޅުން ދައްކާ ވާހަކަ އަޑުއެހުމެއްނެތި ކަންފަތުން ފޯނު ދުރުކޮށްލިގޮތަށް ފާރުގައި ހަރުކޮށްފައިވާ ޓީވީއާއި ދިމާލަށް އައްމާރު ފޯނު ހޫރާލެއްވިއެވެ. ފޯނު ޓީވީގެ ސްކްރީންގައި ޖެހިފައި ބިންމައްޗަށް ފައިބައިގެންދިޔައީ ސްކްރީންގައި އެތައް ކޫރުމެއް އަޅުވާލައިފައެވެ. އެވަރުންވެސް އައްމާރުގެ ރުޅި ފިނިވެލައްވާ ގޮތެއްނުވިއެވެ. މޭޒުމަތީ ބައިންދާފައިވާ ބިއްލޫރި ނޭމް ޕްލޭޓްއިން ޖަހާ ޓީވީގެ ސްކްރީން ތަޅާލިއެވެ.

“އައްމާރު ކިހިނެތްވެގެންތަ މިއުޅެނީ… ކުއްލިއަކަށް…” އެވަގުތު ކެބިންއަށް ވަތް އަލްހާން ވާހަކަދެއްކިއިރު ހުއްޓުމެއް އައީ ބިންމަތީގައި ދޫލައެޅިފައިވާ ބިއްލޫރިކޮޅުތަކަށް ނަޒަރު ހުއްޓިފައެވެ. އޭރު އައްމާރު ހުންނެވީ އުޅަބުށި މޭޒުގައި ވިއްދަވާލައްވައިގެން ދެއަތުން އިސްތަށިގަނޑުގައި ހިފާ ބާރުކޮށްލައްވައިގެންނެވެ.

“މަގޭ އަތުން މަރުވާނޭގޮތެއް ނޭނގިގެން…” އައްމާރު އިސްއުފުލާލައްވާ ބަލާލިއިރު އެ ވަރުގަދަ ބުމަވަނީ ގޮށްޖެހިފައެވެ.

“ހުވާމިބުނީ މަގޭ އަތުން މީހަކު މަރުވަންޏާ އޭނަ މަރުވާނެ… މަގޭ ވަރު ނޭނގިގެން އެއުޅެނީ… މިޙުރާންގޮތަށް މައިތިރިކޮށްލަންވީ…” ރުޅިންގޮސް އައްމާރުގެ ހަށިގަނޑުގައި ތުރުތުރުލުމެއް އުފެދުނެވެ.

“އައްމާރު މައިތިރިވެބަލަ… ކުރިންވެސް ކޭސް ނަގައެއްނު.. ވަކި ހިސާބަކުން ދޫކޮށްލަންދޯ ޖެހެނީ މިފަހަރުވެސް އެވަރުވާނީ… ކަމެއް އިނގިގެންނެެއް ނޫން އެއުޅެނީ… އައްމާރާއި ދެކޮޅަށް ތެދުވަން ފަސޭހައެއްނުވާނެކަން ނޭނގޭމީހަކު ނުހުންނާނެ… ތެޅިފޮޅިގަނެގެން ނިކުންނަ ނަތީޖާ ރަނގަޅެއްނުވާނެ…” ހިމޭންވެފައިވާ އަލްހާންއަށް ނަޒަރެއްދެމުން އިޝާރު އައްމާރުގެ ރުޅި ފިނިކުރަން ވާހަކަދެއްކިއެވެ. އޭރު އަލްހާން ބަހެއް ބުނުމެއްނެތިވެސް ހުރީ ހިޔާލަކަށް ގެއްލިފައެވެ. ހައިޒަލްއަށް ހައިލާއަކީ ކާކުކަން އިނގުނު ހިސާބުން އެހިތުގެ ތެރޭ ބިރުވެރިކަމެއް އުފެދިއްޖެއެވެ. ކިތަންމެ ބޭނުންނުވިޔަސް އޭނައަށް މިހާރު ތާއަބަދުހެން އެކަމާއިމެދު ވިސްނަން ޖެހިފައިވެއެވެ. ހައިޒަލްގެ ކަންފަތައް އިތުރު އަޑުތަކެއް ފޯރާ ދުވަހެއްވާނީ އެދެެމެދުގައި ހަނގުރާމައެއް ފެށޭނޭ ދުވަހަށެވެ. މިކޭސް އަލުން ނެގުމަކީ ނުބައި ފާލެކެވެ. ހައިޒަލްއާއި އަޒްހާންގެ ގުޅުން މުޅިދުނިޔެއަށް ފާޅުވެގެންދާނެއެވެ. ހަގީގަތް ފާޅުވުމާއިއެކު އޭނަގެ ހައްޔަރުގެ ދަށުން ހައިޒަލް ވީއްލިގެންދާނެއެވެ. މިހާރުވެސް ހައިޒަލް ހިމޭނުންހުރިނަމަވެސް އެހިތުގައި އޭނަގެ ހިތުގައި ދެކޮޅުވެެރިކަން އުފެދިފައި އޮންނާނޭކަމީ ޝައްކެއް އޮތްކަމެއްނޫނެވެ.

*** *** *** *** *** ***

އިރުގެ ހޫނުން ދުނިޔެ މާލަމުންދިޔައިރު ޖެހެމުންދާ ފިނިވައިރޯޅިތަކުން ފަޒާގައިވާ އުދާސްކަން ކުޑަކޮށްދެމުންދިޔައެވެ. ރެސްޓޯރެންޓްގެ ޓެރެސްމަތީ ހާމަ ވައިގެ ތެރޭ މަޔާންއާއި އައިޒާން ތިިބިއިރު ދެ ޒުވާނުން އިންތިޒާރުކުރަމުންދިޔައީ މޭޒުކައިރީގައި އިން ޒިޔާމް ވާހަކަދައްކާނޭ ވަގުތަކަށެވެ. ޒިޔާމް އިސްޖަހާލައިގެން އިންއިރު އެދެޒުވާނުންގެ ނަޒަރުތައް ޒިޔާމްގެ މޫނަށް ހުއްޓެމުންދިޔައެވެ.

“އިނގޭތަ އަހަރެން ތިކޭސްގައި މަސައްކަތްކުރަންފެށީ ހާދަ ބޭނުންވެގެނޭ… އެތައްބައެއްގެ މަރު.. އެކަމަކު އަހަންނަށް ލިބުނީ ކޯއްޗެއް… ހުރި ވަޒީފާގަނޑުންވެސް ދަށްވީ… ހުރިހާކަމެއް އޮޅުން ބޮޅުންކުރިމީހުން އެތިބީ މަތީ މަޤާމްތައް މިލްކުކޮށްގެން… ހޫނުކަން އިނގުމަށްފަހު އިތުރަށް އަލިފާނާއި ކުޅޭކަށް ނެތީން… އޭރުން ހަލާކަށް ވެއްޓޭނީ އަހަރެން… މަޔާން ބުނަން.. އަމިއްލަ އަތުން ކައްވަޅު ކޮންނަން ނޫޅޭ…” ޒިޔާމް އެއްނޭވާއިން ބުނެލުމަށްފަހު ގޮނޑި ދުރުކޮށްލައިފައި ދާން ހިނގައިގަތެވެ.

“އާރގް…” މަޔާން ވަގުތުން އަނގަޔަށް ވައްތަރެއް ޖައްސާލައިފައިވާ ގޮނޑިތެރެެއަށް ވެއްޓިގަނެ އަތާއި ފަޔާއި ތަޅުވައިގަތެވެ.

“ބްރޯ އިޓް ވޯންޓް ބީ އީޒީ…” އައިޒާން އިނީ ވަރުބަލިވެ ކަރުއެލުވައިލައިގެންނެވެ. މަޔާން ކޭސް ނެގިފަހުން އަދި އަލިމަގެއް ނުފެންނެއެވެ. އެމީހުންނާއި އެއްބާރުލުން ދޭނޭ ބަޔަކު ނުފެނުނުއިރު ފުރަތަމަވެސް މިފެނުނީ މިކަން ފަސޭހަނުވާކަމުގެ ކޮޅުމައްޗެވެ.

“ގިވްއަޕްއަކީ އަަހަރެންގެ ޑިކްޝަނަރީގައި އޮންނަބަހެއްނޫން… ތެދުފޮރުވައިގެން ކިހާ ދުވަހަކު ތިބެވޭތޯ ބަލާނަން… ޒާން އައްމާރު ޓްރެކްކުރެވޭނޭގޮތެއް އޮތްތޯ ބަލާ… އޭނަ ދާތަންތަނާއި ބައްދަލުކުރާމީހުން ހުރިހާ މައުލޫމާތެެއް އަހަރެން ބޭނުން… އޭނަގެ ޓްރާންސްފަރ ރިކޯޑްސް.. އިންސިޑެންޓް ހިނގުމުގެ ކުރިން ފެށިގެން…” މަޔާން ވިސްނުމެއްގައި އިނދެގެން ކިޔާލިއެވެ. ހަގީގަތާއި ހަމަޔަށް ވާސިލްވާން އޮތް ރާސްތާ އުނދަގުލަސް މަޔާން ހުރީ އެހާ ފަސޭހައިން ބަލިގަބޫލުކުރާގޮތަކަށް ނޫނެވެ. އައްމާރުގެ ހިޔަންޏަށް ފާރަވެރިވާންޖެހުނަސް އޭނަ އެކަންވެސް ކުރާނެއެވެ.

*** *** *** *** *** ***

ނައިނާ ބްލޫސްއާއި ދުރަށްދާން ނިންމައިގެން ހުއްޓަސް ފަހުވަގުތު އެގޮތަކަށް ކަންތަކެއްނުކުރެވުނެވެ. ވަކިހިސާބަކުން އޭނަގެ ވަރުގަދަ އަޒުމްގުޑާލީއެވެ. އޭނަގެ ހިތްވެސް އޭނައާއި ދެކޮޅުހެދީއެވެ. މިފަހަރުވެސް ހިތާއިދެކޮޅަށް ތެދުވަން ނައިނާ ނުކުޅެދުނީއެވެ. ބްލޫސްއާއި ވަކިވާން ނިންމައިގެން ހުރެފައިވެސް އަލުން ވަޒީފާއަށް ނިކުންނަން ފެށީ ހައިޒަލްއާއި ދުރަށް ދާނޭ ހިތްވަރު ނުލިބިގެންނެވެ. ހައިޒަލްގެ ސޫރައަކީ ނައިނާ ހިތަށް އަނިޔާދޭ ހަންޖަރަކަށްވިޔަސް ނައިނާއަށް ފަރުވާލެއްނެތެވެ. އެ ސޫރަ ނުދެކި އުމުރުގެ ބާކީބައި ހޭދަކުރާކަށް ހިތެއް ނޭނދުނެވެ. ނަމަވެސް ހައިޒަލްއާއި ވީހާވެސް ދުރުން އުޅެން ނައިނާ ނިންމިއެވެ. އޭނަގެ ހިތް މަގާމުން ދޫވެގެންދާން އޭނައަށް ފުރުސަތެއް ނުދެވޭނެއެވެ. ދުވަސްތައް ފާއިތުވެ އޭނައާއި ހައިޒަލްގެ ދިރިއުޅުމަށް އެހާ ބޮޑު ބަދަލެއް އައިރު އޭނައަށް މިވަނީ ހަޤީގަތް ޤަބޫލުކުރަންޖެހިފައެވެ.

*** *** *** *** *** ***

ކޮނުނުހެން ފަސްގިނަވާނެއޭ ބުނާ އުސޫލުން އޭ.އެޗް.ފިނޭންޝިއަލްގެ ކޭސްއާއިއެކު މަޔާންގެ ކުރިމަތީ އައްމާރުގެ އެތައްކަމެއް ފެންމަތިވެގެންދިޔައެވެ. ހުރިހާކަމެއް ހާމަވަމުންދިޔައީ ފުލުފުލުގައެވެ. ހައްތަހާވެސް ނުފޫޒު ބޭނުންކޮށްގެން އައްމާރު ހިންދާލައިފައިވާ މައްސަލަތަކެވެ. ނުހައްޤުން ކުށެއް ނެތް ފަރާތްތަކަށް އަދަބުލިބިގެން ނިމިފައިވާ މައްސަލަތަކެވެ. މަޔާން ސިއްރިއްޔާތުގައި އެ މައްސަލަތަކުގެ ފުނަށް ފީނަން ފެށީ އެއްވެސް ފަރާތަކަށް އަންގާލުމެއްނެތިއެވެ. އައްމާރު ހައްޔަރުކުރެވޭވަރަށް ހެކި ލިބިފައިވީނަމަވެސް މަޔާން ކެތްތެރިވެލީ އޭ.އެޗްގެ ކޭސްއަށް އެދެވޭވަަރަށް ހެކިތައް ނުލިބޭތީ އައްމާރު އެކަމުން ބޯ ދަމައިގަންނާނޭކަން ޔަގީންވާތީއެވެ. އޭނަ އައްމާރުގެ ބޮލަށް މަޅިގަނޑު މަހާލާނީ ކަރަށް ވާންވާވަރަށެވެ. ދެވަނަ ފަހަރަށް ބޯދަމައިގަންނަން ނުކެެރޭ ގޮތަށެވެ.

*** *** *** *** *** ***

މިރޭ މާލެއިން ކަރަންޓް ކެނޑިފައިވުމުން މަގުތަކުގައިވަނީ ކައްވަޅުފަދަ އަނދިރިކަމާއި ހިމޭންކަމެވެ. ދުއްވާ އެއްޗެހީގެ ހިލަމެއްވެސް ނެތި ބޮޑެތި މަގުތައް ފަޅުވެފައިވެއެވެ. ބްލޫސްގެ އިމާރާތުގައިވާ އިމަރޖެންސީ ލައިޓްއިން މުޅި އިމާރާތަށް މަޑު އަލިކަމެއް ވެރިވެފައިވާއިރު ހިސާބަކަށް މަގުމައްޗަށްވެސް އެ އަލިކަން ފޯރާފައިވެއެވެ.

ރޭގަނޑުގެ ޝިފްޓާއި ހަވާލުވެގެން ހުރި ނައިނާ ކެބިންގައި އިނދެފައި ބޭރަށް ނިކުމެލީ މާބޮޑަށް ހޫނުވާން ފެށުމުންނެވެ. ރޭގަނޑުގެ ވަގުތުކަމުން ކޯރިޑޯވެސް އޮތީ ހުސްކޮށެވެ. މުޅި ކޯރިޑޯގައިވެސް ވަނީ އެންމެ ހުދު ބޮތްކެއްގެ ފަޑު އަލިކަމެވެ. ހުޅުވާލެވިފައިވާ ބެލްކަނިން ވަންނަމުންދިޔަ ރޯޅިތަކުން ކޯރިޑޯތެރެ ފިނިކުރަމުންދިޔައިރު ނައިނާގެ ފިޔަވަޅުތައް ބެހެއްޓީ ބެލްކަންޏާއި ދިމާލަށެވެ. ފިނިފިނި ވަައިރޯޅިތަކާއި ދުވަހުގެ ވަރުބަލިކަމާއި ނުތަނަވަސްކަން ހަވާލުކުރަމުން ނައިނާ ލޯމަރާލަމުން ރެއިލިންގައި ދެއަތުން ހިފާލިއެވެ. ކުޑަވަގުތުކޮޅަކު އެހެން ހުރެފައި ފިޔަވަޅުތަކުގެ އަޑުއިވިގެން ނައިނާ ލޯހުޅުވާ ބަލާލިއިރު ނައިނާއާއި ދާދިގާތުގައި ކަޔާން ހުއްޓިލީއެވެ. ނައިނާ ހިނިތުންވުންވެލިއިރު ކަޔާންގެ ނައިނާގެ މޫނަށް ބަލާލި ނަޒަރު އެހެން ރޭތަކާއި ތަފާތެވެ.

“ހަނދުވެސް ހާދަ ރީއްޗޭ މިރޭ…” ކަޔާން ބުނެލިއިރު ފަލަކުގައި ވިދަމުންދާ ހަނދުގެ ބަދަލުގައި އޭނާގެ ނަޒަރު ހުއްޓިފައިވާ ނައިނާގެ މޫނަށެވެ. ކަޔާންއަށް ފަލަކުގައިވާ ހަނދަކީ ނައިނާ ފަދައެވެ. ކަޔާން ބުނެލުމާއިއެކު ތަރިތައް ބަބުޅަމުންދިޔަ އުޑަށް ނަޒަރު ސީދާކޮށްލައިގެން ހުރެފައި ނައިނާ އިސްތިރިކޮށްލަމުން ބަލާލިއެވެ.

“ނައިނާ މިރޭ ބޭނުން ވާހަކައެއް ބުނަން…” ކަޔާން އަޑުން ހިސާބެއްގެ ޖެހިލުންވުމެއް ފާޅުވިއެވެ. އޭރު ނައިނާ ކަޔާންގެ މޫނަށް ބަލާލަމުން އެއްބުމައަރުވާލީ ކުރިއަށްދާށޭ ބުނާފަދަ ގޮތަކަށެވެ.

“ކަމޯން.. ކަޔާން… ކުރިންވެސް ކެން މަށާއި ޓޯކްކުރަންދޯ… މިރޭ ކިހިނެތްވެގެން ތިއުޅެނީ…” ކަޔާންގެ ޖެހިލުންވުން ފާހަގަކުރެވިފައި ނައިނާ ލުއިލުއިކޮށް ހީލިއެވެ. އެވަގުތު ކަޔާން ނައިނާގެ މޫނަށް ބަލާލަމުން ލޯމަރާބާރުކޮށްލިއެވެ. އިރުކޮޅެއްފަހުން ލޯހުޅުވާލިގޮތަށް ނައިނާއާއި ގާތަށް ފިޔަވަޅެއް އަޅާލިއެވެ.

“ނައި… އަހަންނަށް އިނގޭ ނައި ލޯބިވަނީ ހައިޒަލްދެކެކަން… ހައިޒަލްގެ ސަބަބުން ނައި ސަފަރކުރާކަންވެސް އިނގޭ… ހީޒް ޔުއަރ ފަސްޓް ލަވް… ހަނދާންނައްތާލަންވެސް އުނދަގޫވާނެ… އެކަމް ހީޒް މެރިޑް… ވަރަށް އަވަހަށް ބައްޕައަކަށްވެސް ވާނެ… ނައިނާއަށްވެސް އިނގެއެއްނު… ދެން ނައި ހަމަ ތިހެން ހައިޒަލްގެ އިންތިޒާރުގައި ހުންނާނީތަ؟” ކަޔާންގެ ވާހަކަތަކާއިއެކު ނައިނާގެ މޫނުމަތީގައިވީ ހިނިތުންވުން ވަގުތުން ފޭދިގެންދިޔައެވެ. އެއީ އޭނައަށްވެސް ޖަވާބު ނޭނގޭ ސުވާލެކެވެ. މާސިންގާ ކަނޑުގެ ފުންމިން ނޭނގޭފަދައިން އޭނަގެ ދިރިއުޅުން އޮޔާއި ވަޔާއިއެކު ދާނޭ މިސްރާބެއް ނޭނގެއެވެ. އޭނަ މިހުރީ ވަޔާއި އޮޔާއިއެކު އޭނަ ގެންދާ މަންޒިލަކަށް އޭނަގެ ހަޔާތް ދީލައިލައިގެންނެވެ. ދިރިއުޅުމުގައި އޭނާ ނިންމާނޭ ނިންމުންތަކެއް ނެެތެވެ.

“ނައި ހައިޒަލްއަށް އިންތިޒާރުކުރުމަކީ މިހާރު ބޭކާރުކަމެއް… ދިރިއުޅުމައިގެން ކުރިއަށްދިޔުމުގެ ފުރުސަތު ނައިނާއަށް އޮންނަންވާނެ…” ކަޔާން ވާހަކަދެއްކިއިރު ނައިނާ ތުންފަތުގައި ދަތްއަޅާލަމުން ދެލޯމަރާލިގޮތުން އެ ވާހަކަތައް އަޑުއަހަން ބޭނުންނުވާކަން ހާމަވިއެވެ. ކިތަންމެ މީހަކަށްވެސް ހުދު އޭނައަށްވެސް އެހެން ބުނެ އަމިއްލަ ހިތަށް ވިސްނައިދެވިދާނެއެވެ. ނަމަވެސް އޭނާގެ ހަށީގައި ނޭވާ ހިނގާހާ ހިނދަކު ހައިޒަލްއަށް އިންތިޒާރުކުރުން ހުއްޓައެއްނުލެވޭނެއެވެ.

“ނައި… ޕްލީޒް ބީ މައިން… އައި ލަވް ޔޫ… ހައިޒަލްގެ ލޯބި ހަނދާންނައްތާލާވަރަށް ލޯބިދޭނަން…” އެއީ ކޮންމެ ކުއްޖެއްވެސް އަހާލަން ބޭނުންވާނޭ ލަފްޒުތަކަށްވިޔަސް ނައިނާއަށް އެ ބަސްތައް އަޑުއިވުނީ ހޮނުގުގުރިއެއް ފަދައިންނެވެ. އޭނަގެ ކަންފަތްދަށުގައި ގުގުރިއެއް ޖެހިފަދައެވެ. ދެލޯބޮޑުކޮށް ލެވިގެންދިޔައިރު ސިހިފައި ފަހަތަށް ފިޔަވަޅެއް އަޅާލެވުނީއެވެ. އެވަގުތު ކޯރިޑޯއިން ހިނގާލައިފައި އައި ހައިޒަލްއަށް ސާފުކޮށް އެޖުމްލަތައް އަޑުއިވުނެވެ. ހައިޒަލްގެ ފިޔަވަޅުތައް ބިމަށް ތަތްވިއިރު ފާރަށް ލެގިލެވުނީ ގައިން ވަރުދޫވެދާނެހެން ހީވެގެންނެވެ. އެޖުމްލަތަކުން އޭނަގެ ހުރިހާ އުފަލެއް އަނދާއަޅިއަށް ހަދާލިއިރު ހައިޒަލްއަށް ބޯހޫރާލެވުނެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.