ނޭނގިހިތޭ ތި އަތުލީ 34

އިރުކޮޅެއްގެ ހަމަހިމޭން ކަމަށްފަހު ރަފާ ވާހަކަ ދައްކަން ފެށިއެވެ. އެއީ މައުވަންގެ ދަރިއެއް ނޫންކަމާއި އަދި މައުވަން އޭނަ އާއި އިނީ ކީއްވެގެންކަން ހާމަކުރިއެވެ. އިވިގެންދިޔަ ވާހަކަތަކުން ތަނުގައި ތިބި އެއްމެން ތިބީ ހައިރާންވެ ބަސްހުއްޓިފައެވެ. އަކްޔަން ހުރީ  އޭނަ ދެކެ އެވަރަށް ލޯބިވާ އޭނައަށްޓަކައި ޤުރުބާންވި ބޭބެ އާއި ދޭތެރޭ ކަންތައް ކުރެވުނު ގޮތުން ދެރަވެ ލަދުވެސް ގަނެފައެވެ. ރަފާ އެއްމެންގެ ކިބައިން މާފަށްއެދި ގެއިން ނުކުމެގެން ދިޔައެވެ.

ރަފާ ނިކުމެގެން ދިއުމާއެކު މައުވަން ދިޔައީ އޭނަގެ ކޮޓަރިއަށެވެ. މިވަގުތު އިތުރު ވާހަކައެއް ދެއްކުމުގެ ޝައުގުވެރިކަމެއް އޭނަގެ ނެތެވެ. އަދި ވާހަކައެއް ދެއްކުމުގެ ފުރުސަތު އިތުރުމީހަކަށް ދޭކަށްވެސް ބޭނުމެއްނުވިއެވެ. ސިޓިން ރޫމްގައި ބާކީ ތިބި އެކަކުވެސް އަނގައިން ބުނެނުލާ ތިބީ އިވުނު ވާހަކަތަކާ ދޭތެރޭ ވިސްނާށެވެ.

މައުވަން ކޮޓަރިއަށް ގޮސް ބަންލާފައި ކޮޓަރި ދޮރުޖަހާފައި ގޮސް އެނދުގައި އިށީނެވެ. ކަކުލުގައި އުޅޮބޮށި ވިންދައިގެން ދެއަތްތިލައިން ބޮލުގައި ހިފަހަށްޓައިގެން އިނީ އެކި އެކި ޚިޔާލުތަކަށް ގެއްލިފައެވެ. ރަފާގެ ސަބަބުން އޭނަގެ ދިރިއުޅުން ހަލާކުވެ ނިމުނީއެވެ. މަލާކް ދެކެ ލޯބިވާކަން އިހްސާސްވިއިރު މަލާކްވެސް ފަސްދީފިއެވެ. އެއީ އޭނަ އުޅެމުން ދިޔަ ގޮތުގެ ނަތީޖާކަމަށް މައުވަންއަށް ޤަބޫލްކުރެވުނެވެ.

މަލާކްއިނީ ގޭގައި ކޮފީއެއް ބޯލާށެވެ. އޭރު ސިޓިންރޫމްގައި ތިބި ޝަރީފް އާއި އަމީނާ ތިބީ ޓީވީން ދައްކަމުންދިޔަ ޕްރޮގްރާމެއްބަލާށެވެ. މިހާރު މަލާކްގެ އެއްމެ ބޮޑު ހިތްހަމަޖެހުމަކީ އެއީއެވެ. ބަދަހިވަމުންދާ އާނަގެ މަންމަ އާއި ބައްޕަ ގުޅުމެވެ. އޭނަގެ އުމްމީދަކީ ލަސްތަކެއްނުވެ އެގުޅުން ރަސްމީވުމެވެ. އެދެމީހުން އެކުގައި ފެންނަ ކޮންމެ ވަގުތަކު މަލާކްގެ ތުންފަތުގައި ނުފިލާ ހިނިތުންވުމެއް ހުރެއެވެ. ކުޑައިރު އެހެން ކުދީންގެ މަންމަ އާއި ބައްޕަ އެކުގައި އުޅޭމަންޒަރު ތަކަކީ މަލާކް ބަލާފޫހި ނުވި މަންޒަރުތަކެކެވެ. އެނަސީބު ކޮންމެސް ދުވަހަކުން އޭނައަށްވެސް ލިބޭތޯ އަބަދުވެސް އުއްމީދުކުރިއެވެ.

މަލާކް އިނީ އާދައިގެ މަތިން ހޮސްޕިޓަލްގެ ކެންޓީންގައެވެ. ކުރިމަތީގައި އޮރެންޖް ޖޫސްތައްޓެން ހުއްޓެވެ. ނަމަވެސް އޭނަގެ ޝައުގު ހުރީ ކެންޓީން ތެރޭގައި ތިބި މީހުންނަށެވެ. ބޭނުންވަނީ އެއްމެ ފަރާތެއް ދެކެލުމެވެ. ކޮންމެ ދުވަހަކުވެސް ކެންޓީނަން އައިސް ފަރާތް ފަރާތަށް ނަޒަރު ހިންގެނީ މައުވަންގެ ރީތި ސޫރަ އެއްފަހަރު ނަމަވެސް ފެނޭތޯއެވެ. ނަމަވެސް މައުވަން ނުފެންނަތާ މިހާރު ހަފުތާއެއް ވެގެން ދިޔައީއެވެ. ކޮންމެ ދުވަހަކު ކެންޓީނަން މަލާކް އަންނަނީ ފެންނާނެ ކަމުގެ އުމްމީދުގައެވެ. މާޔޫސް ވުންނޫން އިތުރު ކަމެއްނުވެއެވެ. އިރުކޮޅަކާ ފޯންވެސް ބަލާލެވެނީ މެސެޖެއްނަމަވެސް އޮންނާނެކަމަށް ހީކޮށެވެ. ހޮސްޕިޓަލަށް ނާންނަ ތަނުގައި މަލާކަށް މެސެޖެއްވެސް ކޮށްނުލައެވެ. މައުވަން މިވަރަށް ހަނދާންވާންވީ ސަބަބެއް މަލާކަށް ނޭނގެއެވެ. ނުފެނެ ގިނަދުވަސްވާވަރަކަށް ދެކެން ބޭނުންވާލެ ބޮޑުވަނީއެވެ. ކިތައްމެ ފަހަރަކު ގުޅަން ވެސް ހިތަށް އަރައެވެ. އެކަމަކު ފަސްޖެހެވެނީއެވެ. އެއްމެފަހުން މަލާކް ޤަބޫލު ކުރިގޮތުގައި މައުވަން އެއްކޮށް މަލާކްމަތިން ހަނދާންނެތުނީއެވެ. އަދި އޮފީހަށްވެސް ނާންނަނީ ރަފާއަށް ވަގުތު ދިނުމުގެ  ގޮތުންނެވެ. މި ދުވަސްވަރު ރަފާއަށް އެއްމެބޭނުންވާނީ މައުވަންގެ އަޅާލުންވިއްޔާއެވެ. މަސްހުނި ހިޔާލްތަކެއްގައި މަލާކްހުއްޓައި އެތަނަން އައީ ނިއަމްއެވެ. “މީހެއްގެ އިންތިޒާރުގަތަ….؟” ގޮނޑި ދަމާލާފަ އިށީންނަމުން ނިއަމް އެހީ ހިނިތުންވުމާއެކުގައެވެ. “އިންތިޒާރުގަ އިނަސް ކުރާނެކަމެއް ނެތެއްނު…މިހާރު ތިއިނީ އިށީދެގެންނެއްނު…” މަލާކްވެސް މަޖާ ވެލާފައި ޖަވާބު ދިނެވެ. ނިއަމް އެކި އެކި ވާހަކަ ދައްކަމުން ދެއެވެ. މަލާކް އިންނަން ޖެހެނީ ގިނަވަގުތު އަޑުއަހާށެވެ. ހަގީގަތުގައި އަޑު އަހަނީކީވެސް ނޫނެވެ. އަޑު އިވެނީއެވެ. މަލާކްގެ ހިތާ ސިކުނޑީގައި އެބުރެމުން މައުވަންގެ ހިޔާލްތަކެވެ. ކިތައްމެ ފަހަރަކު މައުވަން ޑިއުޓީއަށް ނާންނަނީ ކީއްވެތޯ ނިއަމްއާއި ސުވާލު ކޮށްލަން ހިތަށްއަރައެވެ. އެކަމަކު އޭރުން ނިއަމްގެ ހިތަށްއަރާނެ އެއްޗަކާދޭތެރޭ ވިސްނާލާފައި ފަސްޖެހެވެނީއެވެ.

އަކްޔަން ހަވީރު ބޭރަށްދާން ނުކުތްއިރު ބޭރުގައި ހުންނަ ކޮފީ މޭޒުދޮށުގައި ހިޔާލަކަށް ގެއްލިފަ އިން މައުވަން ފެނުނެވެ. އެޔާއެކު އަކްޔަންގެ މިސްރާބު އެދިމާލަށް ބަދަލުކޮށްލިއެވެ. އެހިސާބަށް ގޮސް އަކްޔަން މައުވަންއަށް ގޮވާލިއެވެ. މައުވަން ދިޔައީ ކުޑަކޮށް ސިހިގެންނެވެ. އޭނަ ހިޔާލެއްގައި އިނުމުން އަކްޔަން އައިކަން ނޭނގުނީއެވެ. ” ދޮންބޭ ކޮންކަމަކަށް ގެއްލިފަތިއިނީ….” އަކްޔަން އެހިއެވެ. “ކަމަކަށް ގެއްލިފަތަމިއިނީ….މިހަމަ ފިނަކޮށްލަން އިނީނު…” ހަމަޖެހޭގޮތް ދައްކަމުން މައުވަން އިއްވާލިއެވެ. “ދޮންބެ މިހާރު އަބަދު ގޭގެ އެންނު ތި އިންނަނީ….ޑިއުޓީއަށްވެސް ނުދާތާ މިހާރު ހަފުތާއެއްވީ….ރަނގަޅަށް ކަނީކީނޫން…މޫނުމަތިން ފްރެޝްކަމެއް ފެންނަނީކީ ނޫން….ދޮންބެ އާދިމާލަށް ބަލާލީމަވެސް ހީވަނީ އެތައް ދުވަހެއް ވަންދެން ބަލިވެ އުޅެފަ ހުރި މީހެއްހެން…. މަންމަ އާއި ބައްޕަ ވެސް މިހާރު ދޮންބެ އާދޭތެރޭ ވިސްނާ ވިސްނާ ފިކުރު ބޮޑުވެފަ އެތިބެނީ….. ހިނގާބަލަ ބޭރަށް ނުކުމެލާ ހަދާލަން އޭރަށް ހަމަޔަކަށް އެޅިދާނެ” އަކްޔަން އެއްފަށްޗަކަށް އަމުނާލިއެވެ. މައުވަން ވަކި އެއްޗެއް ނުބުނެ ފަޑު ހިނިތުން ވުމަކުން ފުއްދާލިއެވެ. ” ނޫނީ ދޮންބެގެ ތި ފިކުރުތަށް އަހަންނާ ހިއްސާކޮށްލަބަލަ…ކޮންމެސް ވަރެއްގެ ހަމަޖެހުމެއް އޭރަށް ދޮންބެއަށް ލިބިދާނެ…” އެތަނުގައި އިށީންނަމުން އަކްޔަން ބުނެލިއެވެ. ” ދެންކީކޭތަ ވަކި ބުނާނީ” ނިތްކުރިން ފެށިގެން ތިރިއަށް ކަރާ ހިސާބަށް މައުވަން އަތްތިލަ ހިންގާލިއެވެ. “އަހަންނަން ފެންނަނީ ދެން ނިމެދިޔަ ކަންތައްތައް ފިލާވަޅެއްގެ ގޮތުގައި ހަނދާނުގައި ބަހައްޓައިގެން އަލުން ދިރިއުޅުމައިގެން ކުރިއަށް ދާން… ކޮންމެ ގޮތެއް ވިއަސް ވީކަމެއް ނުވާކަމަކަށް ނުހެދޭނެ…” އަކްޔަން ބެލީ މައުވަންއަށް ވިސްނަދެވޭތޯއެވެ. “އަސްލު ދޮންބެ ތި ކޮށްދިން ކަންތައްތަކަށް ވަރަށް ބޮޑަށް ތެންކްޔޫ…އަހަރެން ބޭނުން ދޮންބެ ކިބައިން މާފަށް އެދެންވެސް… އައިއެމް ސޮރީ …” އަކްޔަންގެ ވާހަކަ އެހިސާބަށް ދާއިރަށް މައުވަން ބަލާލީ ސުވާލުގެ ނަޒަރަކުންނެވެ. “އަހަރެންހުރީ ދޮންބެ ދެކެ ވަރަށް ހިތްހަމަ ނުޖެހިފަ…ދޮންބެ މަލާކްއާއި ދޭތެރޭ ކަންތައް ކުރަމުން ދިޔަގޮތުން…އަދި އަހަންނަކަށް ނޭނގުނު ދޮންބެ އަހަންނަންޓަކާ އެހާބޮޑު ކަންތައްގަނޑެއްގެތެރޭ އުޅުނުއިރުވެސް” އަކްޔަން ތަފުސީލްދިނެވެ. “އެއީ އެވަރުކަމެއްނޫން… ކޮންމެސް ކަމެއްވެގެންނު ދޮންބެ ތިކިޔަނީ” ހިނިތުންވުމެއް ދެމުން މައުވަން ބުނެލިއެވެ.  “ދެން ދޮންބެ ކޮންގޮތަކަށްތަ ތި ވިސްނަނީ… މި ބުނީ ކައިރި މުސްތަޤްބަލެއްގައި އަލުން ކައިވެންޏެއް ކުރަން ވިސްނަންހޭ…” އަނެއްކާވެސް އަކްޔަން ސުވާލުކޮށްލިއެވެ.  ދެން ދިޔައީ ހިމޭން ވަގުތު ކޮޅެކެވެ. އަކްޔަންވެސް ނިންމައިގެންހުރީ ދެން އެ ސުވާލުގެ ޖަވާބު ނުލިބޭނެކަމަށެވެ. “ވަރަށް އަވަހަށް އިރާދަ ކުރެއްވިއްޔާ ” މައުވަން ޖަވާބު އިއްވާލުމަށްފަހު ތެދުވެ ހިނގައިގަތެވެ. އިތުރު ސުވާލެއް ކުރުމަށް ފުރުސަތު ދޭން ބޭނުން ނެތީ ކަންނޭނގެއެވެ. މައުވަންގޮސް ގެއްލެންދެން އަކްޔަން އިނީ ބަލަހައްޓައިގެންނެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.