ލޯތްބެއްގެ ފެށުން 22

މެޝިންތަކުގެ އަޑު ގަދަ ވިހެން ހީވިއެވެ. އޭރު ނޭވާ ނުލެވިގެން ރުމޭނިއާ ތެޅި ފޮޅެއެވެ. ޑޮކްޓަރާ ނަރުހުން ބާރުބާރަށް އައިސް އާއިލާ އެންމެން ޖަމާވިއިރުވެސް ޝިފާ ހުރީ ހުއްޓުން އަރާފައެވެ. އަޑުއަހަން ބޭނުން ނުވާ ވާހަކަ ތަކެއް އަޑު އިވުނީއެވެ. ހިތުގެ އެތި ކޮޅުތައް އެކި ތަނަށް ބުރައިގެން ދިޔަ ކަހަލައެވެ. ދިރިއުޅުމެއް ބިނާކުރަން ރޭނި އުސް އިމާރާތް ބިމާ ހަމަވިކަހަލައެވެ. ރިތި އައްސޭރިއެއް ހޯދުމަށް ދަތުރުކުރަމުން ގޮސް ކަނޑަށް ބެހުނުކަހަލައެވެ. ވައިގަދަ ދުވަހަކު ސަލަމަތާ ރައްކާތެރިކަން ހޯދަމުން ދިޔަ ކުޑަކުޑަ ފަތެއް ޖައްވުތެރެއަށް ދޫވިފަދައެވެ. ލޮލުގެ ފެނުމުން މަޙުރޫމު ވެފައިވާ މީހަކު ހިނގާލާފައި ދަމުން ކޯރަކައް ވެއްޓި ޤަރަޣު ވުމެކޭ އެއްފަދައެވެ.

***************

އެންމެން އެނދުކައިރީ ރޯން ހުރި އިރު ޝިފާ ބޭރަށް ޖެހެމުން ޖެހެމުން ގޮސް ބޭރުގައި ހުރި ގޮނޑިއެއްގައި  މަޑުކޮށްލިއެވެ. އަދިވެސް އޭނަގެ ހިތުގެ ތެޅުމެއް ނުހުއްޓެއެވެ. ލޯކުރިމަތިން ސިފަވީ ރުމޭނިޔާގެ އެންމެ ފަހުގެ ބަސްތަކެވެ. އެވޭންދެނިވި ހަގީގަތް ގަބޫލުކުރުމަށް ޝިފާގެ ޒަމީރު އެއްބަސްވާކަށް ބޭނުމެއް ނުވެއެވެ. މިވަގުތު އޭގެން އެއްވެސް ވާހަކައެއް ހިތައް ގެންނާކަށްވެސް ބޭނުމެއް ނުވެއެވެ. ހިތުގައި ކަނޑީގެ އެއްހާސް އެތިފަހަރު އެއްފަހަރާ އެޅުނުކަހަލައެވެ. ޝޮކެއް ޖެހިފައިވާ މީހަކު ފަދައިން ކަރުނައަކީ މިވަގުތު ލޮލާ ރުޅި އެއްޗަކަށް ވިއެވެ.

އެތައް އިރަކު ހޮސްޕިޓަލްގައި އުޅުމަށްފަހު ޝިފާ ބޭރަށް ނުކުތީ ގެއަށް ދިއުމަށެވެ. ޒައިކް ކައިރީ ބުނީ ބޮލުގައި ރިހޭ ވާހަކައެވެ. ޔަމާން އޭނާ ގެއަށް ގެނެސްދޭން ކުރުނުކޮށް ކިޔުމުން އެކަމަށް އެއްބަސްވީ ޒައިކުވެސް އެދުމުންނެވެ. ކާރުގައި ހުރިއިރުވެސް އެހެން ކަމަކަށް ވިސްނުން ހިނގޭވަރެއް ނުވިއެވެ.

” ލޯބިވާ މީހެއްގެ އުފަލައްޓަކައި އަމިއްލަ އުފާ ގުރުބާން ކުރުމަކީ ލޯތްބައްޓަކައި ގުރުބާންވުންތަ؟ ” އެއްވެސް އަސަރެއް ނެތްގޮތަކަށް  ޝިފާ ޔަމާން އަށް ބަލާލިއެވެ.

” ހޫމް. އެކަމަކު ގުރުބާން ވެވުނު ފަރާތައް އެކަން ގަބޫލު ކުރެވެންޏާ ” ޔަމާން ގެ އަޑުއިވުމުން ޝިފާ އަށް މޭގައި އަތް އަޅާލެވުނެވެ.

” އަހަރެން ނިންމައިފިން ޒައިކް އެންމެ ލޯބިވާ ކުއްޖާ އޭނަގެ ހަޔާތައް ގެންނަން ” ޝިފާ ދެއްކި ވާހަކައަކުން ޔަމާން އަށް ކުއްލިއަކަށް ކާރުގެ ބުރެކި ޖައްސާލެވުނެވެ. ” ވަޓް ” އޭ ކިޔާލުމަށްފަހު ނިއްކުރިމައްޗައް ރޫތައް ގިނަވިއެވެ. އޭނާއަށް ޝިފާ މިކިޔާ އެއްޗެއް ނޭނގުނެވެ. އާންޓުގެ މަރާއެކު ޝިފާގެ ވިސްނުން ހުއްޓުނީކީ ނޫންބާއެވެ.

” ޝިފާ އާރ ޔޫ އޯކޭ. ޒައިކް އަށް އެއަންހެން ކުއްޖާ ހޯދަ ދީފަ ދެން ޝިފާއަށް ވާނީ ކިހިނެއް. މިހާރު ތި ގުޅުން ރަނގަޅު ވެފަ ހުއްޓަ ކޮން ސަކަރާތެއް ޖަހަން ތިއުޅެނީ ” ޔަމާން ނުރުހުމައެކު ވާހަކަ ދެއްކިއެވެ. ޝިފާ އެދައްކަނީ ކޮންއަންހެން ކުއްޖެއްގެ ވާހަކަ ކަން ނޭގުނަސް ޝިފާ އާއިއެކު އޭނާ ހުރިކަން އަންގައި ދިނުމަށްޓަކައި ވާހަކަ ދެއްކިއެވެ.

” އެހެން ވިއަސް ރުމޭނިއާ އާންޓް މަރުވުމުގެ ކުރިން އަހަރެން ކައިރިން އެދުނީ ލިވީ ހޯދުމަށް ، އަދި އާންޓުއަށް ޒައިކް އެދުވަހަކުން މާފުދިނުމަށް އެދުނީ ”

” ވަޓް ”

” ޕްލީޒް ޔަމާން މިވަގުތު އެހުރިހާ ވާހަކައެއް ނުދެއްކޭނެ. ބޭނުމީ އެކަނި ވެލަން ” ގެއަށް އާދެވުމުން އެތެރެއަށް ވަނުމަށް ޝިފާ ހިނގައިގަތީ މީގެން އެއްވެސް ވާހަކައެއް ޒައިކް ކަންފަތައް ނުފޯރުވުމަށް ބުނެފައެވެ.

ކޮޓަރިއަށް ވަނުމަށްފަހު ދޮރު ލައްޕާ ތަޅުލިއެވެ. އަދި އެނދުގައި އޮށޯވެލުމަށްފަހު ބާލިހުގައި ވަރަށް ބާރަށް ބައްދާލިއެވެ. އެއްވެސް ހިފެހެއްޓުމެއްނެތި ލޮލުން ކަރުނަ އަންނަން ފެށީ އެންމެ ލޯބިވާ ފަރާތް ގެއްލެން ގިނަދުވަސް ތަކެއް ނެތުމުންނެވެ. އެހިތުގައި ފުންވެފައިވާ ފުރިހަމަ ލޯބި ފަނޑުނުވާނެއެވެ. ޒައިކް ފަރާތުން ލިބުނު ފުން ލޯބި ނުފޮހެވޭނެއެވެ. އެހެނަސް މިހާ ދުވަސްވީއިރުވެސް ޒައިކް އަށް އޭނަދެކެ ލޯބިނުވެވުނެވެ. އެކަން އަމިއްލައަށް ބުނި ވަގުތުވެސް މިހާ ދެރައެއް ނުވެއެވެ. އޭނާ ޒައިކުގެ ހިތް ހާސިލުކުރުމަށް ކުރި ހުރިހާ މަސައްކަތެއް ބޭކާރު ވާނެއެވެ.

މިހާރު މިޖެހުނީ އޭނަ އެންމެ ލޯބިވާ ފަރާތް އެހެން މީހަކަށް ދޭށެވެ. ކިތަންމެ ބޭނުން ނުވިކަމުގައި ވިޔަސް އެހަގީގަތާ ކުރިމަތި ލާން ޖެހުނީއެވެ. ޒައިކް އުފަލުން ހުރިނަމަ އޭނަވެސް އުފާވާނެއެވެ. ޒައިކު ދެރަވާކަމެއް ނަމަ އޭނާވެސް އެކަމަކާ ދެރަވެއެވެ. ދެން ހަޔާތުގެ ބާކީ ދުވަސްތައް އެހަނދާން ތަކާއެކު އުޅެވިދާނެއެވެ. އެ ލޯބީގެ ވަގުތުތައް ހަނދާން ކުރުމުގައެވެ. އެކަރުނަތައް ހުއްޓޭކަށް ޝިފާ ބޭނުމެއް ނުވިއެވެ. ބޭނުންވަނީ  ހިތް ފުރޭވަރަށް ރޯލުމަށެވެ. ކަރުނައިގެ ކޯރެއް ފަދައިން އޭނާގެ ލޮލުން ކަރުނަތައް ދެމެމުން ދިޔައެވެ. މިކަހަލަ ގޮތެއް ވެދާނެ ކަމަށް ދުވަހަކުވެސް ހީ ނުކުރެވެއެވެ. އޭނާގެ ހަނދާނަށް އައީ ރުމޭ އާންޓް ދެއްކި ވާހަކަ ތަކެވެ.

********************

ޒައިކް އާ އޭނަގެ އާއިލާ މީހުން ކޮޓަރި ބޭރުގައި މަޑުކޮށްގެން ހުއްޓެވެ . އާންޓު ވަކިން އޭނާއާ ބައްދަލު ކުރަން ބުނިއިރުވެސް މިކަހަލަ ވާހަކައެއް އަޑު އިވިދާނެކަމަށް ހީވެސް ނުކުރެވެއެވެ. ނޭވާލާން ފަސޭހައަށް މާސްކު އަޅައިފައި ވެއެވެ. ކިތަންމެ ދެރަވިއަސް ހިތްވަރު ކުރިއެވެ.

އެ އަތުގައި ހިފާލަމުން ފިރުމާލީމެވެ. އަދި ހިތްވަރުކުރުމަށް ބުނަމުން ރަނގަޅުވާނެކަމަށް ބުނީމެވެ.

” އައި ޑޯންޓް ވޯންޓް ޓު….ޓު ގެޓް ފަ…ފައިން. އިޓްސް ޓައިމް …..ފޯރ މީ ޓު ގޯ…” ކެއްސަމުން އުނދަގޫ ގޮތަކަށް ރުމޭނިއާ ވާހަކަ ދައްކަމުން ދިޔައެވެ. ” ޕްރޮމިސް މީ ވަން ތިންގް ޝިފާ …އަހަރެންގެ އެންމެ ފަހުން މި އެދޭ ކަންތައް ކޮއްދީބަލަ ” އުންމީދު ނެއް މީހަކު ފަދައިން ވާހަކަ ދައްކަމުން ދިޔައިރު އެދެ ލޮލުންވެސް އެކަން ފާޅުވާން އެބަ ހުއްޓެވެ. ދުނިޔޭގައި ދިރި ހުންނާނެ އެންމެ ފަހު ވަގުތު ތައް ގުނާމީހަކު ކުރާނީވެސް ކޮން އުންމީދެއް ހެއްޔެވެ. އެންމެ ފަހުގެ ވަސިއްޔަތް ކުރާމީހަކު ފަދައިން ކަންތައް ކުރިއެވެ.

” ތި ގޮތައް ވާހަކަ ނުދައްކަފާނަންތަ؟ ހުރިހާ ކަމެއްވެސް ރަނގަޅުވާނެ އަދި ” އެ މޫނު މަތީގައި ފިރުމާލަމުން ޝިފާ ވާހަކަ ދެއްކިއެވެ.

” ޕްލީޒް ޝިފާ ، އިތުރައް ކީމޯ ތެރަޕީ ނަގާކަށް ބޭނުމެއް ނޫން. އެންމެ ބޮޑު ހިތްހަމަ ޖެހުމެއް ލިބުނީ އިސްލާމްދީނުގެ ހިދާޔަތް ލިބުމުން. އެކަމަށް ޝުކުރުވެރިވަން. އެއްކަމަކަށް އެއްބަސް ވެދީ. އޭރުން މަރުވާއިރު ހިތައް ހަމަޖެހުން ލިބޭނެ ” ކުޑަކޮށް ރޯލަމުން ޝިފާ އަތުގައި ހިފަހައްޓާލިއެވެ. އެއަތުގެ ތުރުތުރު ލުން އޭނާއަށްވެސް ފާހަގަ ވިއެވެ.

” އޯކޭ. ވަޓް އިޒް ޔުއާރ ވިޝް؟ ” ހައިރާންކަމާއެކު އޭނާއަށް އަހާލެވުނެވެ. ޒައިކް އާ އޭނަގެ އާއިލާ ހުއްޓައި އޭނާ ކައިރީ މިކަހަލަ ވާހަކައެއް ދެއްކުމުގެ މާނަ އަކީ ކޮބާބާއެވެ.

” ލިވް…ލިވީ ” އެހާ ހަމަ އަށް ބުނެވުނު އިރު އަހަރެންގެ ދެލޯ ބޮޑު ކޮށްލަން ޖެހުނެވެ. މިކަހަލަ ގަޑިއެއްގައި ލިވީގެ ވާހަކަ ދައްކަންވީ ކީއްވެބާއެވެ. ނުބައި ގޮތެއް ވިއެވެ.

” ލިވީ ” އެނަންވެސް ކިޔާލެވުނީ ހައިރާން ކަމާއެކުއެވެ.

” އޭނަ ހޯދާ. ލިވީ އަކީ ޒައިކްގެ ދަރިފުޅުގެ މަންމަ. ޒައިކް އަކަށް ނޭނގޭނެ ލިވީ ބަނޑުބޮޑު ކަމެއް ދިޔައިރަކު. އަހަރެންގެ ދަރިފުޅާ ޒައިކް ކައިވެނި ނުކުރުމުން އެކަމާ ރުޅިއައިސްގެން އުޅެނިކޮށް ދަރިފުޅު ސުއިސައިޑް ކުރީ. އެކަން ބަލާގަންނާކަށް ފަސޭހައެއް ނުވި. ބޭނުންވީ ޒައިކް ދިރިއުޅުން މަތިން އިތުރައް ފޫހިކުރަން. ލިވީ ގެނައީ އަހަރެން. އޭނަގެ އެކަކުވެސް ދުނިޔޭގައި ނެއްކަން އިނގުމުން އޭނަ ބޭނުން ވަރަށް ރުފިޔާ ދީގެން ކޮލެޖައް ވައްދާ ޒައިކް އާ ގުޅެން ބުނިން. އަދި ޒައިކް އޭނަ ދެކެ އިންތިހާއަށް ލޯބިވެ ކައިވެންޏާ ހަމައަށް ދިއުމުން ލިވީއަށް މަޖުބޫރު ކުރުވިން ޒައިކް ދޫކޮށް ދިއުމަށް. އެކަމަކު ލިވީ ވަނީ ޒައިކް ދެކެ އިންތިހާއަށް ލޯބިވެފަ. ނުދާންވެގެން ވަރަށް ވަރު ދެއްކި. އެކަމަކު ލިވީ އެކަންތައް ކުރަން އަހަންނާއެކު ސޮއިކުރި އެގްރިމެންޓް ޒައިކް އަށް ދައްކާނަމޭ ބުނުމުން އަހަންނަށްވެސް ނޭނގި ދިޔައީ ފުރަތަމަ. އޭރު އޭނަވަނީ ޒައިކް އާ ކައިވެނިކުރަން އިސްލާމްވެސް ވެފަ. ވަރަށް އުނދަގުލުން އޭނަގެ ގާތް ރަޙުމަތްތެރިއަކު މެދުވެރިކޮށް އަށްވަރަކަށް މަސްދުވަހުން ލިވީ ހޯދުނީ. އޭރު ހުރީ ވިހަން ތައްޔާރުވެފައި. ވަރަށް ދެރަވި އެދުވަހު އަލުން ޒައިކް ކައިރިއަށް އައުމަށް އެދުނިން. އަހަންނަކަށް ނޭނގުނު އެއްގޮތަކަށްވެސް ލިވީ ބަނޑުބޮޑުކަމެއް. އަހަރެންގެ ހިތައް ރަޙުމު ވަން. އެތުއްތު ތުއްތު މޫނު ދެކިލުމަށް ކެއްމަދުވި. ކޮންމެ ދުވަހަކު ލިވީ ގެ ހާލު ބަލަން ގުޅަން. ކުރެވުނު ބޮޑު ގޯސް ހިތައް އަރާ ކޮންމެ ފަހަރަކު ދެރަވޭ . އިސްލާހުވެ ތައުބާ ވީން. ”

” ބޭނުންވާ ހުރިހާ އެއްޗެއް ހޯދުމަށްފަހު ފޮނުވަމުން ދިޔައީ. އަހަންނަށް ކުރެވުނު ކަންތައް ރަނގަޅުކުރަން ނިންމައިގެން ހުރީ. ވިހެއީމަ ދަރިފުޅާ ލިވީ ގޮވައިގެން ޒައިކް ކައިރިއަށް އައުމަށް ހިތުގައި ވި. ދުރުވެފައިވާ ދެމީހަކު ކައިރި ކުރުމަކީވެސް އަހަރެންގެ ޒިންމާއެއް ކަމައް ބެލީ. އެހެންވެ ވިހެއުމަށް ދީފައިވާ ދުވަހުގެ ކުރިން އަހަރެން ކެނެޑާއަށް ދިޔައިން. އޭރު ދަރިފުޅު ވިހެއުމަށްފަހު ލިވީ ފިލައިފި. އޭނަގެ އެކުވެރިޔާވެސް ނުފެނުނު. ހޮސްޕިޓަލްގެ ފަރާތުން އެނގުނީ ލިވީ ވިހެއި ފިރިހެން ކުއްޖާ ބަޔަކަށް ދިންކަން. އެހެން ބަޔަކު އެކުއްޖާ އެޑޮޕްޓް ކުރީ. އަހަރެންނަކަށް މީގެން އެއްވެސް ވާހަކައެއް ޒައިކް ކައިރީ އަދިވެސް ބުނާކަށް ނުކެރޭ. ޕްލީޒް ޝިފާ އޭނަ ވީތާކުން ހޯދަދީ. އޭނަގެ އެކުވެރިޔާ އުޅޭ ތަނުގެ މައުލޫމާތު އަހަރެންކެ ވަކީލަށް ވާނީ ކިޔައިދީފަ އޭނަކައިރީ އަހައިގެން އޮޅުން ފިލުވާ ”

އެހިޔާލު ތަކުން ނުކުމެވުނީ ކޮޓަރި ދޮރު ހުޅުވާލުމަށްފަހު ޒައިކް ވަނުމުންނެވެ. އޭނާގެ ހިތުގައި އަދި ސިކުނޑީގައި އެނބުރެމުން އޮޅެމުން ދިޔަ ހިޔާލުތަކުން ދުރުވުމަށް މަސައްކަތް ފެށިއެވެ. ޒައިކުގެ ހާލަތައް ވިސްނާލަން ބޭނުން ވިއެވެ. އެއްވެސް ކަމެއް އަދިވެސް ބަދަލެއް ނުވެއެވެ. ޒައިކު އަދިވެސް އެއީ އޭނާ އެންމެ ލޯބިވާ ފަރާތެވެ.

ނުނިމޭ

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.