އެރޭ ލިބުނު ފިނިފެންމާ – 6

އެއްކަމެއް ރާއިން އަށް ޔަގީނެވެ. ނާލީ އަށް ވަރަށް ބޮޑު ކަމެއް ދިމާވެއްޖެއެވެ. އެހެންނޫނީ ނާލީ އަށް ރާއިން އާ އެގޮތަށް ވާހަކަ ދައްކާކަށް ނުކެރޭނެއެވެ.
ރާއިން ނާލީ ގޮވައިގެން ގޮސް މަޑުކުރީ ގެއެއްގެ ދޮރު މައްޗަށެވެ. ނާލީ އެއްފަހަރު އެގެއަށް އަނެއްފަހަރު ރާއިންގެ މޫނަށް ބަލާލިއެވެ.
” ހާސްނުވޭ މިއީ އަހަރެންގެ ރައްޓެއްސެއްގެ އެޕާޓްމެންޓް އެއް. އޭނަ ވީ ދުވަސްކޮޅަކަށް ރާއްޖެއިން ބޭރަށްގޮސް. އަހަރެންގެ ގެއަށް ދާން ނާލީ ޖެހިލުންވާނެތީ މިތަނަށް މިއައީ ” ރާއިން ވާހަކަ ދެއްކިގޮތުން ރާއިންގެ ފަރާތުން އެއްވެސް ކަމެއް ދިމާނުވާނެކަމަށް ނާލީ ނިންމިއެވެ.
ރާއިން ނާލީ ގޮވައިގެން އެގޭގެ ދެވަނަ ބުރީގަ ހުރި އެޕާޓްމެންޓް އަށް ވަނެވެ. އާދައިގެ ވަރެއްގެ ސިޓިންގރޫމް އެކެވެ. ރާއިން ނާލީގެ އަތުގަ ހިފާ ސޯފާގަ އިށީނުމަށް އެދުނެވެ. އެއަށްފަހު ރާއިންވެސް ނާލީ ކައިރި އިށީނެވެ.
ރާއިން ފުރަތަމަ ވެސް ވީ ކީއްތޯ ދައްކަން ބޭނުންވަނީ ކޮން ވާހަކައެއްތޯ އޮޅުންފިލުވުމަށް ސުވާލުކުރިއެވެ. އެއާ އެކު ނާލީ އަކަށް ހިތްވަރެއް ނުކުރެވުނެވެ. އެރީތި ދެލޮލުން ހިފެހެއްޓުމެއްނެތި ކަރުނަ ފައިބަމުން ދިޔައެވެ. ރާއިން އެހާ ލޯބިވާ ކުއްޖަކުގެ ލޮލުން އެގޮތަށް ކަރުނަ ފައިބާތަން ފެނުމާއެކު ރާއިންގެ ހިތަށް ބުނެދޭން ނޭނގޭ ވޭންދެނިވި އިހުސާސް ތަކެއް ކުރެވެން ފެށިއެވެ.
ނާލީގެ ދެއަތުގަ ހިފާ ކުޑަކަކޫ ޖަހާލައިގެން ނާލީ ކުރިމަތީ ރާއިން އިށީނދެ ނާލީ ހުއްޓުވޭތޯ މަސައްކަތް ކުރިއެވެ.
” ޕްލީޒް ނާލީ. ނުރޮއި ވެގެންއުޅޭ ގޮތެއް ކިޔާދީބަ. ނާލީ ތިގޮތަށް ރޯތަން ދެކޭކަށް އަހަންނަކަށް ފަސޭހައެއްނޫން. އަހަންނަށް އިނގޭ އަހަރެންނާ ނާލީ އާ ދެމެދު އެއްވެސް ގުޅުމެއް ނުވާކަން. އެކަމަކު ވެސް އަހަރެން ނާލީ ދެކެ ވަރަށް ބޮޑައް ލޯބިވޭ. ނާލީއަށް އެހީތެރިވާން އަހަރެން ކޮންމެ ކަމެއްވެސް ކުރަން މިހުރީ ތައްޔާރަށް ” ރާއިންގެ އޯގާތެރި ބަސްތަކުން ނާލީ އަށް އިތުރު ހިތްވަރެއް ލިބުނު ކަހަލައެވެ.
ފެށުނީއްސުރެ ނިޔަލަށް ނާލީ އަށް ދިމާވެގެން އުޅޭ ކަންތަކުގެ ވާހަކަ ނާލީ ކިޔާދިނެވެ. ރާއިން އަށް ދަތްކުނޑި ވިކާލެވުނީ ނާފިޒު އެގޮތަށް ނާލީ އާ ގާތްވާން މަސައްކަތް ކުރި ވާހަކަ ނާލީ ކިޔާދިނުމުންނެވެ.
” އެނާފިޒުގެ ދުވަސް ދުއްވާލާނަން އަހަރެން ” ރާއިން ރުޅިގަދަވި ވަރުން ނާލީ ރާއިން ހިފެހެއްޓިއެވެ.
” ރާއިން އަހަންނަށް އިނގޭ ރާއިން އާ އަހަރެންނާ އެއްވެސް ގުޅުމެއް ނެތްކަންވެސް. އެކަން އެނގިހުރެވެސް އަހަރެން ރާއިންގެ ފަރާތުން އެހީތެރިކަމަށް މިއެދެނީ ” ނާލީ އަށް ވާހަކަ ދައްކަން އުނދަގޫވިއެވެ.
” ނާލީ އަހަރެން މިހުރީ ނާލީއަށް ހުރިހާ ގޮތަކުންވެސް އެހީތެރިވާން ތައްޔާރަށް. އަހަރެންގެ ފަރާތުން ކޮށްދެވެން އޮތް ކޮންމެ ކަމެއް އަހަރެން ކޮށްދޭނަން ” ރާއިން ވާހަކަ ދެއްކީ ކެރިހުރެއެވެ.
ލޯބީގެ ގޮތުންވެސް ގުޅުމެއް ނުވާ އިރު ކުއްލި ގޮތަކަށް ރާއިންގެ ފަރާތުން ނާލީ ބޭނުންވާ ކަމަށް އެދެން ނާލީ ޖެހިލުންވިއެވެ. އެހެންވިޔަސް އިތުރު އެއްވެސް ގޮތެއް މިވަގުތަކަށް ނާލީއަކަށް ނުވެސް ނެތެވެ. ނާލީ އިންތަނުން ތެދުވެ ދެލޯ ފޮހެލުމަށްފަހު ރާއިން އަށް ފުރަގަސްދީގެން ހުއްޓުނެވެ.
އެއަށްފަހު ނާލީ ވާހަކަ ދެއްކިއެވެ.
” ރާއިން އަހަރެންނާ ކައިވެނި ކޮށްފާނަންތަ ވީ އެންމެ އަވަހަކަށް ” ނާލީ އެފަދަ ކަމަކަށް އެދިފާނެ ކަމަށް ފަހަރެއްގަވެސް ރާއިން ހީ ނުކުރެއެވެ. ރާއިން އަށް ދެލޯ ބޮޑުކޮށްގެން ނާލީ އާ ދިމާލަށް ބަލަން ހުރެވުނީއެވެ. ކުރެވުނީ ކުއް ހީއެއްކަމަށް ހީކޮށް ރާއިން ނާލީގެ ކުރިމައްޗަށް އަރާ ނާލީގެ އަތުގަ ހިފާ ދެވަނަ ފަހަރަށް އެހިއެވެ. ނާލީ ދެވަނަ ފަހަރަށް ތަކުރާރު ކުރުމުން ރާއިން އަށް ގަބޫލު ކުރެވުނެވެ.
އެކަމަކު ކައިވެންޔަކީ ކުއްލިއަކަށް ކުރެވޭނެ ކަމެއް ނޫނެވެ. ރާއިން ގެ ހުރިހާ ވެސް މީހަކީ ހަމައެކަނި ރާއިންގެ މަންމަ އާ ހަމައެކަނި ހުރި އެއްބަނޑު އެއްބަފާ ދައްތަ އެވެ. އެހެންވިޔަސް ރާއިން ކުރާ ކަމަކަށް ރާއިންގެ މަންމަ ދެކޮޅު ނަހަދާނެ ކަން ރާއިން އަށް އިނގެއެވެ.
” ނާލީ އަހަރެންވެސް ބޭނުން ނާލީ އާ ކައިވެނި ކުރަން. އެކަމަކު އޭގެ ކުރިން އަހަރެން ޖެހޭނެ އަހަރެން މަންމަ ކައިރި އަހަން. ނާލީ ގެއަށް ލާފަ ގޮސް އަހަރެން މަންމަ ގާތުން އަހާނަން. ” ގެއަށް ދާ ވާހަކަ އިވުމާއެކު ނާލީ ފިނިވެގެން ދިޔައެވެ.
” ނޫން ނޫން އަހަރެން އެގެއަކަށް ދެން ނުދާނަން. ނުދާނަން. ” ނާލީ ބިރުންގޮސް ތުރު ތުރު އަޅަން ފެށިއެވެ.
” އެންމެ ރަނގަޅު.. ނާލީ މިގޭގަ މަޑުކުރޭ. އަހަރެން އަންނާނަން ގެއަށް ގޮސްފަ ” ރާއިން ދިއުމުގެ ކުރިން ނުޝޫ އަށް ގުޅައިގެން ނާލީ ހުރި ގެއަށް ގެނައެވެ. ނުޝޫ އަށް ވެސް ވެގެން އުޅޭގޮތް އެނގުމުން ނާލީ އެއްގޮތަކަށްވެސް އެގެއަށް ފޮނުވާކަށް ބޭނުމެއް ނުވިއެވެ.
****************************
ކުއްލި ގޮތަކަށް މަންމަ އާ އެކަހަލަ ވާހަކައެއް ދައްކަން ޖެހުމުން ރާއިން ކުޑަކޮށް ޖެހިލުންވިއެވެ. ރާއިން ގެއަށް އައިއިރު މަންމަ އުޅެނީ ބަދިގެ ތެރޭ ކުޑަ ކަމެއްގައެވެ. ރާއިން ވަންތަން ފެނުމުން އާރިފާ ގޮވާލިއެވެ.
” ދަރިފުޅާ ހާދަ ނުގަޑިއެއްގަ.. މިއަދު އޮފީހަށްވެސް ނުދާ ދުވަހެއްތަ؟ ”
” މަންމާ އަހަރެން މިހުރީ ޗުއްޓީގައެއްނު. މަންމަ އަބަދު ހަނދާން ނެތޭނެ ” ރާއިން ކާމޭޒު ދޮށުގަ އިށީނދެ އިންގޮތުން އާރިފާ އަށް ރާއިން އުޅެނީ އެއްޗެއް ބުނަންކަން އެނގުނެވެ.
” ދަރިފުޅު ތިއިންނަނީ ވާހަކައެއް ބުނަން ބޭނުންވެފަތަ. މަންމައަށް ހާދަ ހީވެއޭ ” ވަރަށް ހިތްވަރު ކުރުމަށްފަހު ރާއިން ކައިވެނި ކުރަން އުޅޭ ވާހަކަ މަންމަ ގާތު ބުންޏެވެ.
” ކީކޭ. އެއީ އަނެއްކާ ކޮން ކުއްޖެއް. މަންމަ އަށް އިނގޭ ކުއްޖެއްތަ؟ ” އާރިފާ އަކީ އަބަދުވެސް ސަމާސާ މިޒާޖެއްގެ މީހަކަށްވާތީ ރާއިން އާ ވާހަކަ ދެއްކީ މަޖ މޫޑެއްގައެވެ.
” މަންމާ އެއީ ވަރަށް ނިކަމެތި ކުއްޖެއް. އަޅާލާނެ އެއްވެސް މީހަކު ނެތް. ހަމައެކަނި ހުރީ ބޮޑުބޭބެ އެއް. އެކަމަކު އެބޭބެ ވެސް ވަނީ ނާލީ ވަރަށް ކުޑައިރުން ފެށިގެން އެހެން މީހަކަށް އެއްކޮށް ދީފަ ” ރާއިން ނާލީގެ ހުރިހާ ވާހަކައެއް މަންމަ އަށް ތަފްސީލުކޮށް ކިޔާ ދިނެވެ.
” އެކަމަކު ހާދަ ވިޔާނުދާ އަންހެނެކޭ ތިބުނާ ހާނިސާ އަކީ. އެވަރުން އެކުއްޖާ ނުބެލި ނަމަ މާ ރަނގަޅުވީހެއްނު ” ރާއިން އުއްމީދު ކުރާ ފަދަ ޖަވާބެއް މަންމަގެ ފަރާތުން ލިބުމުން ރާއިން ވަރަށް އުފާވިއެވެ.
” މަންމަ ހާދަ ރަނގަޅޭ. ތީ ހަމަ ބެސްޓް މަންމަ އިނގޭ ” ރާއިން އުޅުނުގޮތުން ހާނިސާ ގާތަށް ހިނިއައެވެ.
ރާއިން ނުކުމެގެން ދަމުން މަންމަ ގާތު ދައްތަ ގާތު ބުނުމަށް އެދުނެވެ.
އެއްމަސްފަސް
” އައްދޯތް ނާފިޒު އަހަންނަށް ތިހެން ނުހަދަބަލަ. ކީއްވެތަ އަހަންނަށް ތިހެން ތިހަދަނީ. ކޮބާތަ އަހަރެންގެ ކުށަކީ ” ހާނިސާ އޮތީ އެނދުމައްޗަށް ވެއްޓިފައެވެ. ހާނިސާގެ އިސްތަށިގަނޑު ވަނީ ނާފިޒުގެ އެއްއަތުގެ ތެރޭ އޮޅާ ލެވިފައެވެ. އަނެއް އަތުން އަނގަމަތީ މޫނުގެ ދެފަރާތުން ވާގޮތަށް ހިފަހައްޓައިގެން ހުރުމުން ހާނިސާ އަށް ވާހަކަ ދެއްކެނީވެސް އެހާ އުނދަގުލުންނެވެ.
” ކޮބާހޭ ކުށަކީ. އަހަރެން ބުނިން ދޯ އޭރުވެސް ނާލީ އެއްބަސް ކުރުވަން. އެކަމަކު ކަލެއަށް އެކަން ކުރެވުނުތަ. ނުކުރެވުނު. އެންމެ ފަހުން އެ އަންހެން ކުއްޖާ މިގެއިންވެސް ފިލައިގެން ދިޔައީ. އަނެއްކޮޅުން އެއުޅެނީ އެހެން މީހަކާ އިނދެގެން. މަށައް އެ ނާލީ އިނދެގެން އުޅެނީ ކާކާކަން އިނގޭ ދުވަހަކުން އެމީހެއްގެ ދުވަސް ދުއްވާލާނަން ” އެހެން ބުނުމާއެކު ހާނިސާ ކޮއްޕާލިއެވެ. ދިޔަ ބާރުމިނުގަ ހާނިސާ އެނުދުން ބޭރަށް ވެއްޓުނެވެ.
” މަންމާ ” ހާނިސާ އަށް އަޑުގެ ނެތްތަނަށް ހަޅޭއްލަވައިގަނެވުނެވެ. އެކަމަކު އެއަޑު އަހާނެ މީހަކު ނެތެވެ. އެންމެ ކުޑަމިނުން ނާލީ ދިޔަފަހުން ގޭގެ ހުރިހާ ކަމެއް ކުރަންޖެހެނީވެސް ހާނިސާ އަށެވެ. ނާލީގެ ހުރި ހީވާގި ކަމާ ރަނގަޅުކަން ހާނިސާ އަށް އެންމެ ބޮޑައް ފާހަގަ ކުރެވެނީ އަދިއެވެ.
” މިހާރުވެސް ބުނެފިއްޔާ ހާނިސާ ވަރިކޮށްދީފާނަން. ހާނިސާ ނެތަސް އަދި މީހުން ހުސްވީކީ ނޫނެއްނު. އެކަމަކު ވެސް އެނާލީގެ ބޭނުން ކޮށްނުލާ ހަމަ އަހަރެން ހިތްހަމަ އެއް ނުޖެހޭނެ ” ހާނިސާ އަށް ފާޑެއްގެ ހިތްވަރެއް ލިބުނު ކަހަލައެވެ.
” އިނގެއޭ އަންހެނުން ހުސްނުވާކަން. އެހެން ނޫންނަމަ ދެ އަނބިން ތިއްބަވެސް ނާލީ ފަކީރު ފަހަތަކުން ނޫޅޭނެ. އަހަރެންގެ ފަރާތުން ކޮން ލޯތްބެއް ނުލިބެގެންތަ ފަޒީލާ އާ ކައިވެނި ކުރީ. އެކައިވެންޔަށް އަހަރެން ގަބޫލު ވީ ވެސް ނާފިޒު ދެކެ ވާ ލޯތްބަށްޓަކާ. އެކަމަކު ނާފިޒު އެވަރުވެސް ނުދަނޭ ” ހާނިސާގެ އަނގަމަތީ ޖެހި ޖެހީނުން ހާނިސާ ދައްކަމުން ދިޔަ ވާހަކަ ހުއްޓުވާލިއެވެ.
” ހުއްޓާލާ. ކަލެއާ ހެދި މިހާރު މަހަކަށްވުރެ ގިނަ ދުވަސްވިއްޔޭ ފަޒީލާ ކައިރިއަށްވެސް ނުދާތާ. އެކަމަކު އަދި ވާހަކަ ދައްކައެއްނު އެބަ ފާޑަކަށް. ކަލެއަށް ރަނގަޅަކަށް އަހަރެން މާލެ އައިސްފިއްޔާ މިހުންނަނީ ގެއިންވެސް ނުނުކުމެ ”
” އަހަންނަށް ރަނގަޅަކަށްނޫން. އަމިއްލަ ފައިދާއަށް. ރަނގަޅަށްވިއްޔާ މިހާރު ފަޒީލާ ކައިރި ބުނެގެން އުޅޭނީ ކޮންމެވެސް ވިޔަފާރި ކަމެއްގަ ރަށުން ބޭރުގަ އުޅޭ ވާހަކަ ”
މިހާރަކަށް އައިސް ހާނިސާ ނާފިޒު އަށް ދޫ ނުކޮށް ޒުވާބު ކުރެއެވެ. އެކަމަކު އޭގެ ސަބަބުންވެސް އިތުރު އަނިޔާއެއް ލިބުން ފިޔަވާ އެއްކަމެއްވެސް ނުވެއެވެ. ނާފިޒު ބޭނުންވަނީ ކޮންމެ ގޮތަކުންވެސް ނާލީ ވީތަނެއް ބެލުމަށެވެ.
******************************
ކޮންމެވެސް ވަރަކަށް ވާރޭ ވެހެމުން ދިޔަ ދުވަހެކެވެ. ނާލީ އަކީ ކައިވެނީގެ ފަހުންވެސް ފަތިހާ ތެދުވެ ގޭތެރޭގެ ހުރިހާ ކަމެއް ކުރާ ކުއްޖެކެވެ. އެކަމުގެ ސަބަބުން ރާއިންގެ މަންމައާ ދައްތަވެސް ނާލީ ދެކެ ވަރަށް ލޯބިވެއެވެ.
އެހެން ދުވަސް ދުވަހާ ހިލާފަށް ފަތިސްވެ އަލިވިލުނު އިރުވެސް ނާލީއަކަށް ނުހޭލެވުނެވެ. ރާއިން އަށް ހޭލެވުނު އިރު ނާލީ ކައިރީގަ އޮތުމުން ނާލީ އަށް ޖެއްސުން ކޮއްލާ ހިތްވިއެވެ. ނާލީ ގައިމަތީ އޮތް ރަޖާގެ ތެރެއަށް ރާއިން ވަދެ ނާލީގެ ތުނި ހަށިގަނޑުގާ ބައްދާލިއެވެ. ދެފަރާތަށް މޫނު އަނބުރާލުމަށްފަހު ނާލީ އަނެއްކާވެސް ހަމަޖެހިގެން ނިދާލިއެވެ.
މިހާރު ނާލީ އަށް އޮވެވުނީ ރާއިން އާ ދިމާލަށް ވާގޮތަށެވެ. ރާއިންގެ ހޫނު ތުންފަތް ނާލީގެ ފިނި ފިނި ތުންފަތުގާ ޖައްސާލުމާއެކު ނާލީއަށް ހޭލެވުނެވެ.
” ރާއިން ” ނާލީ އުޅުނީ އަވަހަށް ތެދުވާށެވެ. އެކަމަކު ރާއިންގެ މޫޑު ހުރީ ނާލީ ފޮނުވާލާ ގޮތަކަށް ނޫނެވެ.
” އަޅޭ ނުވެސް ހޭލެވުނު.. ރާއިން ދޫކޮށްލަބަ. ޕްލީޒް..”
” ނޫނޭ އެހާ ފަސޭހައިން ސަލާމަތެއް ނުވާނެ ދެން މިއަދަކު. ” ރާއިން ނާލީ ލައިގެން ހުރި ނައިޓީގެ ދަށަށް އަތްލާ ނާލީގެ ބަނޑުގާ ފިރުމާލިއެވެ. ބޭއިހުތިޔާރުގާ ނާލީއަށް ލޯމަރާލެވުނެވެ.
ނާލީއަށް ބަދިގެ އަށް އާދެވުނު އިރު ރާއިންގެ ދައްތަ ހުރީ ސައިހަދާށެވެ. ނަލީ ވަރަށް ދެރަވެ ހުރެ ބުނެލިއެވެ.
” ސޮރީ ދައްތާ ވަރަށް ބޮޑައް. އަހަންނަށް ނުހޭލެވުނީ ” ނާލީ ގެ މައުސޫމު ކަމުން ރާއިންގެ ދައްތަ އަށް ހެވުނެވެ.
” އޯކޭ އޭ އަޅާނުލާ. ތީ ދެން އެވަރުގެ ކަމެއް ނޫނެއްނު. އެހެންނޫނަސް ނާލީ އަކީ މިގޭ ނޯކަރެއްނޫނޭ ” ރާއިންގެ ދައްތަ އަކީ މާގިނަ އެއްކޮށް ވާހަކަ ދައްކާ އުޅޭ މީހެއްނޫނެވެ. އަބަދުވެސް ހުންނާނީ ވަރަށް މަޑުންނެވެ.
އޭރު ރާއިންވެސް އޮފީހަށް ދާން ތައްޔާރުވެގެން އައިސްފިއެވެ.
” އަނހަ ދައްތަ ތަ މިއަދު ސައިހެދީ. އަނެއްކާ މީ ބޮޑު ދުވަހެއްތަ ” ރާއިން ބުނީ ކީކޭ ކަން އިނގޭތީ ރާއިންގެ ދައްތަ ބަދިގެއިން ނުކުމެގެން ދިޔައެވެ. ނާލީ އަށް ރާއިން ބުނީ ކީކޭކަން ނޭނގޭތީ އެކަމާ ސުވާލު ކުރިއެވެ.
” ދައްތަބޭ މިއަދު އަންނަނީހެން ހީވަނީ ” ނާލީ މިގެއަށް މިއައި ކުޑަ ދުވަސްކޮޅު ތެރޭވެސް އަދި އެއްފަހަރުވެސް ދައްތަގެ ފިރިމީހާ އެއް ނާދެއެވެ. އާރިފާ ބުނިގޮތުން ވިއްޔާ އެއީ ވަރަށް މަދުން ގެއަށް އައިސް އުޅޭ މީހެކެވެ. އާރިފާ އެހެންނޫނަސް އެމީހަކާ އެހާ ގަޔާވާހެނެއް ނާލީއަކަށް ހިއެއް ނުވެއެވެ.
( ނުނިމޭ )