އެހެނަސް… ވާނަން އެކުގައި… (ޓްރެއިލަރ)

ކޮޓަރީގެ އެއްފަރާތުގައި ބަހައްޓާފައިވާ ތުއްތު ދަރިފުޅުގެ އެނދަށް ނަޒަރު ހުއްޓާއިލައިގެން އިން ޒާންގެ ދެ ލޮލުގައި ވަނީ ކަރުނައިގެ މުތީތަކެވެ. އެ ހިތުގައި އަޅަމުން ދިޔަ ވޭނުން މޭ ފިއްސަމުން ދިޔަފަދައެވެ. ބޮލުގެ އިސްތަށިގަނޑު ވަނީ ހޭވިފައެވެ. ދެ ލޮލުގައި ރަތްކަމެއް ވާއިރު ހީވަނީ ދުޅަވެފައި ވާހެންނެވެ. ތުއްތު ދަރިފުޅުގެ އެނދާ ދިމާލުއެއްކަނަށް ވާގޮތަށް އެލުފާވެވިފައިވާ ފިނިފެންމާ ފެނުމާއެކު ޒާން އަށް ދެލޯ މަރާ ބާރުކޮށްލެވުނެވެ. ކޮޓަރިތެރޭގައި ވަނީ މަޑު މަޑު މީރުވަހެއް ހިފާލާފައި ނަމަވެސް އެ ކޮޓަރިތެރޭން އެއްވެސް ކަހަލަ ދިރުމެއް ނުފެނެއެވެ. އެނދުގެ ބެޑްޝީޓް ބޮނޑި ވެފަ ވާއިރު ޑްރެސިން ޓޭބަލް މަތީގައި ބަހައްޓާފައި ހުރިއެއްވެސް އެއްޗެއްގައި ވެސް ތަރުތީބު ކަމެއް ނެތެވެ.

ބެލްކަނީގެ ރެއިލިންގައި އަތް އަޅުވާލައިގެން ހުރި އަންހެން ކުއްޖާގެ ނަޒަރު ހުއްޓިފައި ހުރީ ތިރިއަށެވެ. އޭރު އެ އަންހެން ކުއްޖާގެ ކޯތާފަތުން ތިރިއަށް ކަރުނައި ރޮނގެއް ފައިބަމުން ދިޔައެވެ. އަތުން ރެއިލިންގެ ދަގަނޑު ތަކަށް ބާރު ކުރަމުން ދިޔައެވެ. ތުންފަތުގައި ދަތް އަޅާލުމާއެކު ނިކަން އަވަހަށް އެތެރެއަށް ދެމިގަތީ ތިރީގައި ހުރި މީހަކު މައްޗަށް ބަލާލުމުންނެވެ.

ކިޔާރާގެ ވަކިވެދިޔުން ޒާން އަށް ވަނީ ފުން އަސަރުތަކެއް ކުރުވާފައެވެ. ކިޔާރާގެ ހަނދާން ތަކުން އޭނާގެ މޭ ފިއްސަމުން ދިޔައެވެ. ތުއްތު ދަރިފުޅަށް ވީ ގޮތް ނޭނގި ޒާން ގެ ހިތް ވަނީ ކުދި ކުދި ވެފައެވެ. މީ ކޮންފަދަ އިމްތިހާނެއް ހެއްޔެވެ؟ ކެތް ކުރުން ނޫން ގޮތެއް ނެތީ ހެއްޔެވެ؟ މީ އޭނާގެ ކޮން ކުށެއްގެ ސަޒާ ހެއްޔެވެ؟.

ނޯޓް… މި ވާހަަކަ އަކީ ކުރިން ހިމީ ގެނެސްދިން ވާހަކަ ވާނަން އެކުގައި ގެ ދެވަނަ ސީޒަން އެވެ. އެ ވާހަކައާއި މި ވާހަކައާއި ވާނީ ވަރަށް ބޮޑަށް ގުޅިފައެވެ. މި ވާހަކައަކީ އަމިއްލަ ހިޔާލަކަށް ލިޔަމުން ގެންދާ ވާހަކަ އެކެވެ. އެއްވެސް ހާލަތެއްގައި ހިނގާފާނޭ ނުވަތަ ހިނގާނޭ ކަމަށް ލަފާ ކޮށް ލިޔާ ވާހަކަ އެއް ނޫނެވެ. ހުރިހާ ކުދިންނަށް ވެސް މި ވާހަކަ ވެސް ކަމުދާނެ ކަމަށް އުންމީދު ކުރަމެވެ.