އިންސާފް (5)

ލީޝާމެން ގެއަށް ވަންއިރު ކިޔާން އިނީ ސިޓިންގރޫމްގައި ޓީވީބަލާށެވެ. ސީމާ އެގޭގަ މަޑުނުކޮށް އޭނާގެ ގެއަށް ދިޔައީ ކިޔާން އިނީމައެވެ. އެހެންނޫންނަމަ އޭނާ ލީޝާ އެކަނި ކޮށްފައެއް ނުދާނެއެވެ.

އެރެއެވެ.ލީޝާގެ ލޮލަކަށް ނިންޖެއްނައެވެ. ކިޔާން ވިސްނައިދޭން ވަރަށް މަސައްކަތްކުރިއެވެ. ހަވީރު އެދިމާވިކަމަކީ ލީޝާ ބިރުގަނެފައި ހުންނާތީ ވާ ކަމެއްކަމުގައި ބުންޏެވެ. އެހެންނަމަވެސް ލީޝާގެ ހިތުން ބިރު ފިލާގެންނެއްނުދިޔައެވެ.

ދަންވަރު 2 ޖަހަނީއެވެ. ކިޔާން އޮތީ ގަދަނިދީގެއެވެ. ކުއްލިއަކަށް ފާހާނާގެ ދޮރުހުޅުވިޖެއެވެ. ލީޝާ އެދިމާއަށް ބަލައިލިއެވެ. ފާހާނާގެ ދޮރުމަތީ ހުއްޓި އެހުރީ ހަމަ އެމީހާއެވެ. ލީޝާ ކިޔާން އަށް ގޮވަންފެށިއެވެ.ނަމަވެސް ކިޔާން އަކަށް ނުހޭލެވުނެވެ.
“ކިޔާން އަކަށް ނުހޭލެވޭނެ ކިތަންމެ ވަރަކަށް ގޮވިޔަސް” އެމީހާ ކުރިޔަށް ހިނގައިގަންނަމުން ބުންޏެވެ.
އެބިރުވެރި މީހާ އެނދާއި ދާދި ކައިރިޔަށް އަތުވެއްޖެއެވެ. އެމީހާ ކިޔާންގެ މޫނާ ދިމާއަށް އަތް ގެންދާން ފަށައިފިއެވެ.
“ނޫން.. އޭނާއަށް ކަމެއް ނުކުރާތި.. ކުރާކަމެއް މަށަށް ކުރޭ..” ލީޝާ ބިރުން ހުރިނަމަވެސް ވަރަށް ހިތްވަރުކޮށްލާފަ ބުންޏެވެ.
“އެހެން ވިއްޔާ ލީޝާ މަގޭ ބުނާ ގޮތަކަށް ކަންތައް ކުރަން ވަޢުދުވޭ.. އޭރުން ކިޔާން ދޫކޮށްލެވޭނީ.. ” އެމީހާގެ އަތް ކިޔާންއާ އިތުރަށް ކައިރިކޮށްލިއެވެ.
“އާން.. ކޮށްދޭނަން.. އޭނާއަށް ކަމެއް ނުކުރާތި.. ” ލީޝާ ބޭނުންވީ ކޮންމެގޮތަކުން ވިޔަސް އޭނާގެ ފިރިމީހާ ސަލާމަތް ކުރުމެވެ.
“ތިޔަވީ ވަޢުދާ ހިލާފް ނުވާތި” އެމީހާ އެހެން ބުނިތަނާ ފާހާނާގެ ދޮރުލެއްޕިއަޖެއެވެ. އެމީހާވެސް މިހާރު ފެންނާކަށް ނެތެވެ. ލީޝާ ކިޔާންއަށް ގޮވަން ފެށުމުން ކިޔާންއަށް ހޭލެވިއްޖެއެވެ. ލީޝާ ކަންތައްވީގޮތުގެ ވާހަކަ ކިޔައިދިނެވެ. ކިޔާންވެސް ބިރުގަންނަން ފަށައިފިއެވެ. އެހެންނަމަވެސް ލީޝާ ހަމައަކަށް އެޅުވުމަށް އެކަން ނުދައްކާވޭތޯ ބެލިއެވެ.
ބިރުވެރިކަމުގެ ތެރޭގައި ލީޝާ އުޅެމުންގެންދިޔައެވެ. ނަމަވެސް އިންސާނަކަށް ކެތް ކުރެވޭނީވެސް ވަކިވަރަކަށްތާއެވެ. ލީޝާއަށް ދިމާވަމުން މިދާ ބިރުވެރި ކަންތައްގަނޑުގެ ވާހަކަ ފުރަތަމަ ފަހަރަށް ސީމާއާ ހިއްސާ ކުރިއެވެ. ސިމާގެ ހިޔާލަކަށް ވީ ފަންޑިތަވެރިއެއްގެ އެހީ ހޯދުމެވެ. ލީޝާއާއި ކިޔާން ދުރުކުރުވަން މީހަކު މަސައްކަތް ކުރަނީ ކަމަށް ވެދާނެތީއެވެ.
“ފަންޑިތަވެރިޔެކޭ” ކިޔާން ނުރުހުން ފާޅުކުރިއެވެ.
“ތީ އަހަރެން ޤަބޫލުކުރާ ކަންތައްތަކެއް ނޫން. އަހަރެމެން ދެމީހުން ދުރުކުރަން މަސައްކަތް ކުރާނެ މީހަކު އުޅެފާނެ ކަމަކަށް އަހަރެން ޤަބޫލެއް ނުކުރަން. ލީޝާ ނުވާނެ ތިކަހަލަ ކަމެއްގެ ތެރެއަށް ވަދެގެންނެއް” ފަންޑިތަވެރިއެއްގެ އެހީ ހޯދުމަށް ކިޔާން އަކަށް އެއްގޮތަކަށްވެސް ޤަބޫލެއް ނުވެވުނެވެ. ފަންޑިތަވެރިކަމުގެ ތެރެއަށް ވަނުމުން އެކަންތައްގަނޑު އިތުރަށް ގޯސްވެދާނެކަމަށް އޭނާއަށް ހީވަނީއެވެ.

ލީޝާ ކިޔާންގެ އެދުމުގެ މަތިން ފަންޑިތަހެދުމުގެ ހިޔާލު ދޫކޮށްލިއެވެ. އެހެންނަމަވެސް ލީޝާ ހުރީ ވަރުގަދަ އަޒުމަކާއެކުގައެވެ. ކިތަންމެ ބޮޑު ބިރުވެރިކަމަކާއި ކުރިމަތިލާން ޖެހުނުކަމުގައި ވިޔަސް ވެހެއެވެ ލީޝާ އެކަނި އެކަމާ ކުރިމަތިލުމަށް ނިންމިއެވެ. އެމީހާ އެއެދޭ ކަންތައް ކޮށްދިނުމަށް އޭނާއަށް އެވަނީ ވަޢުދުވެވިފައެވެ. ހަމައެކަނި އެންމެ ކަމަކަށްޓަކައެވެ. ކިޔާންއަށް ޓަކައެވެ. އޭނާގެ ފުރާނަ ފަދައިން ލޯބިވާ ފިރިމީހާގެ ފުރާނައަށް ނުރައްކާވެދާނެތީއެވެ.

ހަފްތާއެއްފަހެވެ. ލީޝާ އޮތީ ޖޯލިފަތީގައެވެ. ލީޝާ އާއި ޖެހިގެން އިން ޖޯލީގައި މީހަކު އޮތްހެން ހީވާން ފަށައިފިއެވެ. އެއޮތީ ދެވަނަ މީހެއްނޫނެވެ. ހަމަ އެ ބިރުވެރި މީހާއެވެ. ލީޝާ ގަތް ބިރުން އިންތަނުން ހިރިލާންވެސް ނުކުރެނެވެ.
“އަހަރެން ބުނާކަންތައް ކުރަން ތައްޔާރުތަ؟” އެމީހާ ދުރު ބަލަހައްޓައިގެން ހުރެގެން ބުންޏެވެ.
“އާން…..” ލީޝާ އަށް އޭނާގެ އެސުވާލަށް ޖަވާބު ދެވުނީ ވަރަށް އުދަގުލުންނެވެ. ބިރުން ތުރުތުރު އަޅަނީއެވެ.
“އެހެންވިއްޔާ މާދަމާ އިރުއޮއްސުމުން އަތިރިމައްޗަށް އާދޭ” މިހެން ބުނިކަމެއް ނޭނގެއެވެ. އެމީހާ ގެެއްލިއްޖެއެވެ.
އަނެއް ދުވަހުގެ ހަވީރެވެ. ލީޝާ އެއިނީ އަތިރިމަތީގައެވެ. ދެން ވާނެ ގޮތަކާއި ދޭތެރޭ ފިކުރު ކޮށްލަ ކޮށްލައެވެ. ކިތަންމެ ބިރުންހުރިނަމަވެސް އޭނާ ހިތްވަރުކުރާނެއެވެ.
އުޑުމަތިން އިރުއޮއްސުމުގެ އަލާމަތްތަށް ފެންނަން ފަށައިފިއެވެ. ލީޝާގެ ހާސްކަަންވެސް އިތުރުވާން ފަށައިފިއެވެ. މުޅި މީހާ ތުރުތުރު އަޅާވަރުން ހީވަނީ ރޫޅިދާނެ ހެންނެވެ.

އިރުއޮއްސިއްޖެއެވެ. ވަގުތު އައިސް ކުޑަތަންވީއެވެ. ކުއްލިއަކަށް ކާޅުތަކެއް އެއްފަހަރާ ގޮވައިގެންފިއެވެ. ލީޝާ އަށް ވުރެން ކުޑަ ތަންކޮޅެއް ދުރުގައި އެހުރީ އެމީހާއެވެ. އެމީހާ ކައިރިވާން ފަށައިފިއެވެ.
“އަހަރެން ލީޝާއަކަށް އެއްވެސް ކަމެއް ނުކުރާނަން” އެމީހާ ލީޝާގެ ކުރިމައްޗައް އައިސް ހުއްޓުނެވެ.
“އަހަރެންގެ ފަރާތުން ކަލޭ ބޭނުން ވެގެން ތި އުޅެނީ ކޮންކަމެއް؟؟” ލީޝާ ވަރަށް ހިތްވަރު ކޮށްލާފަ ސުވާލުކޮށްލިއެވެ…… (ނުނިމޭ)