އިންސާފް (6)

“އަހަރެންގެ ފަރާތުން ކަލޭ ބޭނުންވެގެން ތިއުޅެނީ ކޮންކަމެއް” ލީޝާ ވަރަށް ހިތްވަރު ކޮށްލާފައި ސުވާލު ކޮށްލިއެވެ.
“އަހަރެން ބޭނުންވަނީ ލީޝާ އަހަރެންނަށް އިންސާފު ހޯދައިދިނުން. އަހަރެންނަކީ މަރާލެވިފައިވާ އަންހެން ކުއްޖަކީން. މިއަދާ ހަމައަށްވެސް މީހުންނަށް މިކަންވަނީ ސިއްރުވެފަ. މިއަދު މި ބޮޑު ސިއްރު ހާމަކޮށްދޭން ބޭނުންވަނީ ލީޝާ އަށް.”
ލީޝާއަށް އެދައްކާ ވާހަކަތައް އޮޅުމެއްނުފިލިއެވެ އެތަކެއް ސުވާލުތަކެއް ސިކުުނޑިއަށް ޖަމާވަމުންދިޔައެވެ. އެ މަރާ ލީޝާއާ ހުރީ ކޮންގުޅުމެއް ހެއްޔެވެ.؟؟
“ފުރަތަމަ އަހަރެން ދައްކާ ވާހަކަތައް އަޑުއަހާ.. އޭރުން ހިތުގަ ތިވާ ހުރިހާ ސުވާލުތަކަކަށް ޖަވާބު ލިބޭނެ” އެމީހާ ލީޝާައާ ދިމާއަށް ވަރަށް ފުންކޮށް ބަލާލިއެވެ.
ކުއްލިއަކަށް މުޅިތަން އަލިވެއްޖެއެވެ. މިހާރު އެތާގައި އެހުރީ ބިރުވެރި ސޫރައެއް ނޫނެވެ. ރީތި ޒުވާން އަންހެން ކުއްޖެކެވެ.
“އަހަރެންނަކީ ރީން. އަހަރެންނަކީ ފުވައްމުލަކަށް އުފަން ފުވައްމުލަކު ކުއްޖެއް” ފުރަތަމަ އޭނާ ތައާރަފް ވެލިއެވެ.
“އެއީ މީގެ ފަސް އަހަރު ކުރި. އަހަރެންގެ އުމުރުން އޭރު 18 އަހަރު. އަހަރެންނަކީ އަހަރެންގެ މައިން ބަފައިންނަށް ލިބުނު ހަމައެކަނި ދަރިފުޅު”
ލީޝާ އަށް ރީންގެ ވާހަކައަށް ޝައުޤުވެރިވެވުނެވެ.
“އަހަރެން އޭރު އުޅެނީ ރަށުގެ ޒުވާނަކާ ލޯބީގެ ގޮތުން ގުޅިގެން. ދެމީހުންވެސް އެކަކު އަނެކަކު ދެކެ އިންތިހާއަށް ލޯބިވޭ. ހަމަ އެދުވަސްވަރު އެރަށަށް އައިސް އުޅުނު ޒުވާނެއް. އޭނާ އަށް އަހަރެން ފެނި އަހަރެންދެކެ ލޯބިވެވިއްޖެކަމަށް ބުނި. އަދި ރައްޓެހިވުމަށް އެދުނު. އަހަރެން އެކަން ކުރެވެން ނެތް ކަމަށް ބުނިން. ކުއްޖަކާ ރައްޓެހިވެގެން އުޅޭވާހަކަ ވަރަށް ސާފްކޮށް ކިޔާދިނިން. އޭނާ އެކަން ޤަބޫލުކުރުވެސްމެ. އަދި އޭނާގެ އެކުވެރިޔެއްގެ ގޮތުގައި ހުރެދިނުމަށް އެދުނު. އަހަރެން އެކަމަކާ ދެކޮޅެއް ނުހަދަން. ދެމީހުންގެ އެކުވެރިކަން ބަދަހިވަމުން ދިޔަ.. އޭނާ އަކީ މީހުންނާ ގުޅޭ މަޖާ މިޒާޖެއްގެ މީހެއް… އެކަމަކު….” ރީން މިހާވަރަށް ކިޔާދިނުމަށްފަހު ލީޝާއާ ދިމާއަށް ބަލާލިއެވެ.
ލީޝާ އިނީ ގަނެފައި ހުރި ބިރު ކޮންމެވެސް ވަރަކަށް ފިލާފައެވެ. އަނެއްކާވެސް ރީން ވާހަކަ ކުރިޔަށްގެންދަން ފެށިއެވެ.
“އެއްރެޔަކު 10 ޖަހާ އެހާކަށްހާއިރު އެ އެކުވެރިޔާ އަހަރެންނަށް ގުޅި. އޭނާ އެދުނީ އަތިރި މައްޗަށް އައިސްދިނުމަށް. އޭނާ ބުނިގޮތުގައި އޭނާ އެކުވެރިންތަކަކާއި އެކު މަސްފިހަނީ. އޭނާ އާދޭސް ކުރުމުން އަހަރެން އެތަނަށް ދިޔުމަށް އެއްބަސްވިން.. އިރުކޮޅެއް ނުވެ އަހަރެން ބަލާ އޭނަ އަތުވެއްޖެ..އަހަރެން އޭނައާއެކު ދިޔައިރު އެތަނުން އެއްވެސް މީހަކު ފެންނާކަށް ނެތް. .އެއްވެސް މީހަކު ފެންނަން ނެތުމުން އަހަރެން އެކަމާ ސުވާލުކުރުމުން ބުނީ އަހަރެން އެތަނަށް ނުގޮސްދާނެތީ ބުނި އެއްޗެއް ކަމަށް. އަހަރެން އުޅުނީ އެތަނުގައި ނުހުރެ އަވަހަށް ގެއަށް ދިޔުމަށް.. ނަމަވެސް……….”
ރީންގެ އަޑާއި ރާގު ބަދަލުވާން ފަށައިފިއެވެ. ރީން ހުރީ ދުރު ބަލަހައްޓައިގެންނެވެ. އޭނާގެ ލޮލަށް ކަރުނަތައް ގިނަވާން ފެށިއެވެ. އިރުކޮޅެއްގެ ހަމަހިމޭން ކަމަކަށްފަހު އަނެއްކާވެސް ވާހަކަ ކުރިޔަށްގެންދަން ފެށިއެވެ.
“އޭނަ އަހަރެންގެ އަތުގައި ހިފާ ހުއްޓުވި. ގެއަށްދާކަށް އަދި ނުވާކަމަށް ބުނި. އަދި އަހަރެންގެ ފުރަގަހުން ބައްދާލި. އަހަރެންދެކެ އިންތިހާއަށް ލޯބިވާކަމަށް ބުނަމުން . އޭނާގެ އަތުތެރެއިން ސަލާމަތްވާން ވަރަށް މަސައްކަތްކުރިން. އަހަރެންނަކީ ހަމައެކަނި އޭނާގެ މީހެއްކަމުގައި ބުނަމުންދިޔަ. އަހަރެންގެ ލޯބިވެރިޔާއަށް ބޭވަފާތެރިވާން ބޭނުން ނުވާކަމާ އޭނަދެކެ އަހަރެން ލޯބިވާވަރު ކިޔާދިނިން. ކުއްލިއަކަށް އޭނަ ހަޅޭއްލަވައިގެން. މީގެ ކުރިން ދުވަހަކުވެސް އަހަރެންނާ ދިމާއަށް މިހާ ބާރަށް އެއްވެސް މީހަކު ހަޅޭއްލަވާފައެއް ނެތް. އަހަރެން އެހެން އެއްވެސް މީހަކަށް ލިބުނަ ނުދޭނެކަމަށް ބުނި… އޭނަ އަހަރެން ވަލުތެރެއަށްގެންދަންފެށި. އަހަރެން ވަރަށް ގަދަ ހެދިން. ނަމަވެސް އޭނަ އެއަށް ވުރެން ބާރުގަދަ. ވަލުތެރެއަށް ވެއްދުމަށްފަހު ބިންމައްޗަށް އަހަރެން ވައްޓާލި. ދެން އަހަރެންނާއި ކުރިމަތިލާން ޖެހުނީ ދުވަހަކުވެސް އަހަރެން ކުރިމަތިލާންޖެހިދާނެކަމަށް ހީކުރި ކަންތައްތަކެއް ނޫން. އޭނާ އަހަރެންގެ ހަށިގަނޑު މައްޗަށް ވެރިވާން ފެށި.. އަހަރެންގެ އިއްޒަތުން ނަފްްސް ގެއްލިގެން ދިޔައީ.. ކައިވެނީގެ ހަދިޔާއަކަށް ފިރިމީހާ އަށް ދިނުމަށް މިޔޮއްހުރިހާ ދުވަހު ރައްކާކުރި ހަދިޔާވެސް އޭނަ ލޫޓުވާލީ.”
ރީންގެ ލޮލުން ހޯސްލާފައި ކަރުނަތައް ފައިބަމުން ދިޔައެވެ. ލީޝާއަކަށް ވެސް ކަރުނަތަކެއ ނުހިފެއްޓުނެވެ. އެވާހަކަތަކުން ލީޝާ އަށް ވަރަށް އަސަރު ކުރަމުން ދިޔައެވެ.
“އޭނާގެ ލޯބި ޤަބޫލު ކުރިނަމަ މިހެން ނުވީސް ކަމަށް ބުނަމުންދިޔަ. ދެންވެސް އޭނާގެ ލޯބި ގަބޫލުކޮށް އޭނައާ އެކު އުޅުމަށް އެދެމުން ދިޔަ. ނަމަވެސް އަހަރެން ކުރިޔެކޭ އެެއްގޮތައް އިންކާރު ކުރިން. އޭނަ އެކަންތައް ކުރިގޮތުން ހިތުގައި ނަފްރަތުނޫން އެހެން އެއްވެސް އެއްވެސް އެއްޗެއް ނެތްކަމުގައި ބުނިން. އެންމެފަހުން އޭނަ އަހަރެންގެ ބޮލުގައި ދަނޑިބުރިޔަކުން ޖެހި. ވަގުތުން އަހަރެން ވެއްޓުނު. ބޮލުން ލޭތައްފައިބަމުން ދިޔަ. އޭނަ އަހަރެން އެތަނަށް ދޫކޮށްލާފަ ހިގައްޖެ. އަހަރެން ފިރުކެމުން ވަލުތެރެއިން ނުކުމެވޭތޯ ބެލިން. މާ ގިނަ އިރުތަކެއް ނުވެ ސައިކަލެއްގެ އަލި އަހަރެންގެ މޫނަށް އެޅުނު. ސަލާމަތައް އެދި ގޮވަން ފެށިން. ސައިކަލުގަ އިންމީހާ އަހަރެން ކައިރިޔަށް އައިސް މަޑުކޮށްލި. އަހަރެން ހީކުރީ އަހަރެން ސަލާމަތް ކުރަން އައި މީހެއް ކަމަށް. ނަމަވެސް އެއީ ހަމަ އޭނަ. އޭނަ އަތުގަ އޮތް ފުޅިއަކުން އަހަރެން ގަޔަށް ދިޔާ އެއްޗެއް އުކަންފެށި. ދުވި ވަހުން އެއީ ޕެޓްރޯލުކަން އެގުނު. އަހަރެންނަށް ސަލާމަތް ނުވެވޭނެކަން ޔަޤީންވީ އޭނާގެ އަތުގައި އޮއް އަލިފާން ފޮށިން އަލިފާން ދަނޑިއެއް ރޯކޮށްލުމުން. އޭނަ އަހަރެންގެގައިގަ ރޯކޮށްލުމަށް ފަހު ދުރުގައި ބަލަން ހުރީ. އަހަރެން ދިރި ހުއްޓަ އޭނަ އަހަރެން އަންދާލީ”
ރީންގެ ވާހަކަ މެދުކަނޑާލިއެވެ. ފުންނޭވާއެއް ލުމަށްފަހު ލީޝާ ދިމާއަށް ބަލާލިއެވެ.އޭރު ލީޝާގެ ލޮލުން ހިފެހެއްޓުމެއްނެތި ކަރުނަތައް ފައިބައެވެ. މިއީ އޭނާ އެހާ ރަހުމުކުޑަ އިންސާނެއްގެ ވާހަކަ އެހި ފުރަތަމަފަހަރެވެ.
“އޭނަ، އަހަރެން އަނދާ އަޅިއަށް ވަންދެން ހުރި. އެއަށްފަހު އެތަނަށް ފަސްއަޅާއަހަރެން ފޮރުވާލި. ހެކިތައް ފޮރުވާލުމަށް ކުރެވެންހުރި ހުރިހާކަމެއް ކުރި. އަހަރެންނަށް ވީނުވީއެއް އެއްވެސް މީހަކަށް ނޭގުނު. އަހަރެންނާމެދު ކަންތައް ވީގޮތް އެގޭނެ އެއްވެސް އިންސާނެއް ނެތް.” ރީންގެ ވާހަކަ ނިންމާލިއެވެ.
“ރީން އަހަރެންނަށް ތިވާހަކަތައް ކިޔައިދޭންޖެހުނީ ކީއްވެ؟ އަހަރެން ރީން އަށް އިންސާފް ހޯދައިދޭން މަސައްކަތް ކުރާނަން. ރީން އަށް ތިގޮތަށް ހެދި ރަހުމުކުޑަ އިންސާނަކީ ކާކު ކަން ބުނެދީފާނަންތަ؟”
ލީޝާ މިހެން ބުނުމުން ރީން ވަރަށް ފުންކޮށް ލީޝާއަށް ބަލާަލިއެވެ.
“އެއީ…އެއީ ކިޔާން… ލީޝާގެ ފިރިމީހާ”
ރީންގެ އެބުނި އެއްޗަކުން ލީޝާ ހުއްޓުން އެރިއެވެ. މުޅި ދުނިޔެވެސް ހުއްޓުނު ކަހަލައެވެ. އޭނާއަށް ބުނާނެ އެއްޗެއް ނޭގުނެވެ. ކިޔާން އަކީ އެހާ ރަހުމުކުޑަ އިންސާނެއް ހެއްޔެވެ..؟
“ލީޝާއަށް ޤަބޫލު ކުރަން އުދަގޫ ވާނެކަންވެސް އެނގޭ. އެކަމަކު މިއީ ކަން ހިނގި ގޮތް..ލީޝާ އަހަރެންނަށް އެހީތެރިވެދީ ”
ލީޝާއަށް ރޮވެންފެށުނެވެ. ލީޝާ ،ރީން އަން ފުރަގަސްދެމުން ކުރިޔަށް ހިނގައިގަތެވެ. އޭނާ ގޮސް ލޯމަތިން ގެއްލެންދެން ރީން ބަލަހައްޓައިގެން ހުއްޓެވެ.
ލީޝާ އެދިޔަގޮތައް ދިޔައީ ގެއަށެވެ. އޭރު ކިޔާން އިނީ ލީޝާ ނައިސްގެން ލަސްވެފައެވެ.
“ކޮންތާކަށް ގޮސްލާފަ ތި އައީ.. އަހަރެން މި އިންނަނީ ލީޝާ އައިމަ ނޫނީ ބޭރަށްވެސް ނުނިކުންނަން ވެގެން.”
ކިޔާން ލީޝާގެ ކޮނޑުގައި ހިފައި ގަޔާ ކައިރި ކޮށްލަމުން ބުންޏެވެ. ލީޝާ އަތުން ކިޔާން ދުރަށް ކޮށްޕާލިއެވެ.
“އަހަރެން ގައިގަ އަތް ނުލާތި! އަހަރެން ހިޔެއް ނުކުރަން ކިޔާން ތީ އެހާ ރަހުމް ކުޑަ މީހެއްކަމަކަށް.” ލީޝާ ރުޅިވެރިކަމާއެކު އަޑުގައި ހުރި ބާރެއްލާފަ ހަޅޭއްލަވައިގަތެވެ.
“ކީކޭތަ ތިކިޔަނީ.. ލީޝާ މޮޔަވީތަ. މަށަކަށް ނޭނގެ ލީޝާ ތިކިޔާ އެއްޗެއް. އަހަރެން ރަހުމު ކުޑަކަމުން ކުރީ ކީއްތަ”” ލީޝާއަށް އެއްވެސް ކަމެއް އެގިދާނެ ކަމަކަށް އޭނަ ޤަބޫލެއް ނުކުރެއެވެ. އެހެންވެ ލީޝާ ހަމައަކަށް އެޅުވޭތޯ އޭނާ މަސައްކަތް ކުރިއެވެ.
“ނޭނގެއޭ މި ކިޔާ އެއްޗެއް. ކުށެެއްނެތް އަންހެން ކުއްޖެއްގެ އިއްފަތް ފޭރިގަނެ އޭނަ ދިރި ހުއްޓަ އަންދާލީ މީ ކިޔާން ކުރި ކަމެއް ނޫންތަ….” ލީޝާ މިހެން ބުނުމުން ކިޔާން އަށް ބަދަލުތަކެއް އަތުވެއްޖެއެވެ.
“ތިއީ ކާކު ދެއްކި ވާހަކަ އެއް. ލީޝާ އަށް ހީވޭތަ އަހަރެން އެކަހަލަ ކަމެއް ކޮށްފާނެހެން.” ކިޔާން އަށް މިހެން ބުނެވުނު ކަމެއް ނޭގެއެވެ. ރީން އެތަނަށް ފާޅުވިއެވެ.
” ކިޔާން އޮޅުވާލަން މަސައްކަތް ނުކުރޭ. މިއީ އެ ރީން” ރީން ކިޔާންއާ ދިމާއަށް އަންނަމުން ބުންޏެވެ.
“ތީ ކާކު މަށެއް ނުދަންނަން”
ކިޔާން މިހެން ބުނުމާއެކު ރީންގެ ސިފަ ބަދަލުވާން ފެށިއެވެ. މިހާރު އެހުރީ ލީޝާއަށް ފެންނަމުން ދިޔަ ބިރުވެރި ސިފައެވެ. ކިޔާން ބިރުން ފަހަތަށް ޖެހުނެވެ. ކިޔާން އެ ހުރިހާ ކަމަކަށް އެއްބަސްވީ ދެން ސަލާމަތްވާނެކަމުގެ އެއްވެސް ގޮތެއް ނެތްކަން ޔަޤީންވީމައެވެ.
ލީޝާ ވަގުތުން ފުލުހުންނަށް ގުޅިއެވެ. އޭނާގެ ފިރިމީހާ ކަމުގައިވިޔަސް އޭނާގެ އެ އަނިޔާވެރިކަމުގެ ހައްޤު އަދަބު ލިބެންޖެހޭނެއެވެ. އޭނަ އެމަރާލީ ކުށެއްނެތް އަންހެން ކުއްޖެކެވެ. އެ އަންހެން ކުއްޖާއަށް އިންސާފް ލިބެން ޖެހޭނެއެވެ. އެއްވެސް އިންސާނަކަށް އަނެއް އިންސާނެއްގެ ފުރާނަ ދުއްވާލުމުގެ ހައްޤު ލިިބިގެންނެއް ނުވެއެވެ.
އޭގެ ކުޑަވަގުތު ކޮޅެއް ފަހުން ފުލުހުން އައިސް ކިޔާން ގެންގޮސްފިއެވެ. ލީޝާ ރީންއާ ދިމާއަށް ބަލާލިއެވެ. ރީން ޝުކުރުވެރިކަމާއެކު ހިނިތުންވެލިއެވެ.
(ނިމުނީ)