“ހިތް” ލޭ ކޮށެވިފައި……17

ހަނާ ދިޔުމުން ރިޝްފާވެސް ކޮޓަރިއަށް ދިޔައީ ކޮންމެވެސް ވަރަކަށް ނިދިއައިސްފައި ހުރީތީއެވެ. އެތެރެއަށް ވަދެ ދޮރު ލައްޕާލުމަށްފަހު ގޮސް އެނދަށް އެރި ރިޝްފާގެ ކަންފަތުގައި މަޑު މިޔުޒިކެއްގެ އަޑު ޖެހުނެވެ. ނޭނގޭ ހިތް ލަންބުވާފަދަ މިއުޒިކްގެ އެ އަޑު އަންނަނީ ކޮޓަރި ބެލްކަންޏާއި ދިމާލުންނެވެ. ރިޝްފާއަށް އެނދުން ތެދުވެގެން ގޮސް ބެލްކަނީގެ ދޮރު ކަހާލުމަށްފަހު ބޭރަަށް ނިކުމެ ވަށައިގެން ނަޒަރު ހިންގާލެވުނެވެ. އެވަގުތު ޖެހިގެން ހުރި ގޭގެ ބެލްކަނީގައި ގިޓައެއް ހިފައިގެން ހުރި ރީތި ޒުވާނާ ރިޝްފާގެ ލޮލުގައި އަޅައިގަތެވެ.

ހަމަ އެ ޒުވާނާއެވެ. އޭނާގެ ރޭގަނޑުގެ ނިދި ވަގަށް ނަގައިގެން އުޅޭ އަޅި ކުލައިގެ ކަޅީގެ ވެރިޔާއެވެ. ކޮންފަދަ ބޮޑު އިއްތިފާޤެއް ހެއްޔެވެ؟ އެ ޒުވާނާއާއި އެހާ ގާތުގައި އުޅެވުނު އިރުވެސް މީގެ ކުރިއަކުން ރިޝްފާގެ ލޮލުގައި އެ ރީތި ޒުވާނާ އަޅައިގަނެފައެއް ނުވެއެވެ.

ރިޝްފާއަށް ކަޅި ޖަހާވެސް ނުމެލާ އެ ރީތި ސޫރައަށް ބަލަހައްޓައިގެން ހުރެވުނީއެވެ. އޭނާއަށް ހޭވެރިކަންވީ އެ ޒުވާނާ އަތުން ހަނައަޅާލިތަން ފެނުމުންނެވެ. ރިޝްފާއަށް ކުރެވުނު ކަންތައް އިޙްސާސް ވުމުން ގަތް ލަދުން އަވަހަށް އެތެރެއަށް ވަންނަން އުޅެނިކޮށް އެ ޒުވާނާގެ ފިރިހެންވަންތަ އަޑުން ރިޝްފާގެ ނަމުން މުޚާތަބުކޮށް އިހަށް މަޑުކޮށްބަލާށޭ ބުންޏެވެ. ރިޝްފާއަށް ހުރި ފިޔަވަޅު މައްޗަށް ހުއްޓި ފަހަތަށް އެނބުރި ބަލައިލެވުނުއިރު އޭނާގެ މޫނުމަތިން އުފާވެރިކަމާއި އެއްވަރަށް ހައިރާންކަންވެސް ފައުޅު ވަމުން ދިޔައެވެ. ވާނީވެސް އެހެންތާއެވެ. އެ ސޫރަ ދުށުމަށް އޭނާގެ ދެލޯ އެދެމުންދިޔަ ސޫރައާއި ބައްދަލްވި މިއީ އަދި ދެވަނަ ފަހަރެވެ. އެ ދުވަހު ރަސްފަންނުގެ އެ ބައި ބޯ މާޙައުލުން އޭނާއަށް އެ ޒުވާނާ ފެނުނު ހިނދުން ފެށިގެން ހިތުގައި އެ ރީތި ސޫރަ ބިންވަޅު ނެގިފައި ވިޔަސް އެ ޒުވާނާއަށް އޭނާއާއި ދިމާއަށް ރިޝްފާ ސިއްރުސިއްރުން ބެލިކަން ނުވެސް އިނގޭނެއެވެ. ވީއިރު ރިޝްފާގެ ނަމަށް ދަންދެން އެ ޒުވާނާއަށް އެނގުމަކީ ހަމަ އަސްލުވެސް ހައިރާން ވާނެ ކަމެއް ނޫން ހެއްޔެވެ؟

“ވަރަށް ހައިރާން ވެއްޖެ ދޯ އަހަންނަށް ރިޝްފާގެ ނަން އެނގުނީމަ…. އަހަންނަށް ރިޝްފާ ވަރަށް ކަމުދޭ…. އެހެންވެ ރިޝްފާއާ ބެހޭ މަޢުލޫމާތު ހޯދިން….. ރިޝްފާ މަސައްކަތް ކުރަނީ ބީ އެމް އެލް ގަ އެންނު…… އިފް ޔޫ ޑޯންޓް މައިންޑް އަހަރެން ވާހަކަ ދައްކާލަން ތިބަޔަށް ދިޔަސް ހެޔޮތަ؟”

އެ ޒުވާނާގެ ދުލުގައި އޮތް ޖުމްލަ ރަނގަޅަށް ފުރިހަމަވެސް ނުވަނީސް ރިޝްފާއަށް އާނ އެކޭ ބުނާ ފަދައަކުން ބޯ ޖަހާލެވުނީ އޭނާގެ އަމިއްލަ އިޚްތިޔާރުން ބޭރުންނެވެ. އެހެން ނޫންނަމަ ކިތަންމެ ބޭނުންވިޔަސް ކޮންތާކުން އައި ކާކު ކަމެއްވެސް ނޭނގި އެހާ ފަސޭހައިން އެއްބަސް ވޭވޭނީ ކޮންފަދައަކުން ހެއްޔެވެ؟

އެއްވެސް އުނދަގޫ ކަމަކާއި ނުލާ އެ ޒުވާނާ ބެލްކަނި ހުރަސް ކޮށްފައި އައިސް ރިޝްފާގެ ގާތަށް ހުއްޓި ދެޖީބަށް އަތް ޖަހާލިއެވެ. އެވަގުތު ފަޒާގެ ތެރެއިން އައި ފިނިފިނި ވައި ރޯޅިތަކުން ރިޝްފާގެ ހަށިގަނޑުގައި ފިރުމަން ފެށިއެވެ. މިއޮއް ހުރިހާއިރު އެފަދަ އެއްވެސް އިޙްސާސެއް ނުކުރެވެއެވެ. ނަމަވެސް ކުއްލިއަކަށް ވަށައިގެންވާ މާޙައުލުގައި ތެތް ފިނިކަމެއް ފެތުރިގެން ދިޔައެވެ. ހަމަ ދެންމެއަކު ބޯކޮށް ވާރޭވެހިފައި ހުއްޓާލާފައިވާ ފަދައަކުންނެވެ.

“އެ އެޕާޓްމެންޓްގަތަ އުޅެނީވެސް… އެހެން މިއަހާލީ މީގެ ކުރިން ދުވަހަކުވެސް އެބައިން ބެލްކަންޏަށް ނިކުންނާތީވެސް ނުފެންނާތީ.. ”

ނަމަވެސް އެ އެއްވެސް ކަމަކަށް މާބޮޑު ފަރުވާލެއް ދެވޭ ވަރަށްވުރެ ރިޝްފާގެ ހިތަށް ވަމުންދިޔަ ގޮތް ނޭނގޭ ގޮތްތަކަކުން ކައިރީގައިހުރި ޒުވާނާއާއި ބެހޭގޮތުން އެނގެން ބޭނުންވިލެއް ބޮޑުކަމުން ވަރަށް ހިތްވަރު ކޮށްފައި ސުވާލު ކޮށްލިއެވެ.

“ހޫމްމް…. އަދި ހަފްތާއެއްވަރު ވާނީ މިތަނަށް ބަދަލު ވީފަހުން… ”

ރިޝްފާގެ ސުވާލަށް ޖަވާބު ދިންއިރު އެ ޒުވާނާގެ ނަޒަރު ފަޅިސިކުންތަކަށްވެސް ރިޝްފާއާއި ވަކި ނުވެއެވެ. ދެމީހުން އެތައް އިރަކު އެގޮތުގައި ވާހަކަ ދައްކަން ތިބެފައި އެދެމީހުންގެ ފުރަތަމަ ބައްދަލްވުން ނިންމާލީ މާދަމާރޭވެސް ހަމަ އެގަޑީގައި އެތަނުން ބައްދަލް ވުމަަށް ގަޑި ކިޔާފައެވެ. ރިޝްފާ އެތެރެއަށް ވަދެ ދޮރުލެއްޕުމުން ޒޭންވެސް އޭނާގެ ބަޔަށް ދާން ކަމަށް ހަދާލާފައި އަލިގުޅައަކަށް ވެގެން ވަކި ހިސާބަކަށް މައްޗަށް އަރައިގެން ގޮސް ގެއްލުނެވެ. ރިޝްފާއަށް ނިދެންދެންވެސް އޭނާގެ ހިތުގައި ޒޭން ރަސްކަން ކުުރަމުން ދިޔައިރު, ދުލުގައިވެސް ވީ އެނަމެވެ.

*****

އަނެއްދުވަހުގެ މެންދުރުގެ ވަގުތެވެ.

“ހިނގާ މިރޭ ދެމީހުން ހުޅުމާލެއަށްދާން އެސޮރު ބަލާ…… ގޮސް އެ މަންމަނު ކައިރިންވެސް މާޢާފަށް އެދޭނީ…. ދެން އެވަރުންވެސް ކައިލާން އަންނަން ޤަބޫލު ނުވެއްޖިއްޔާ ރޮއި އާދޭސް ކޮށްލަނިކޮށް އެ ހިތް މަޑުވެދާނެ….. ”

ކައިގެން ނިކުމެ ގޮނޑިސެޓުގައި އިށީނދެ ހަމަޖެހިލުމަށްފަހު ދުފާ ބިލެއްގަނޑު އަނގައަށް ލުމަށްފަހު ރޭވުންތެރި ކަމާއިއެކު ހަސަން މަނިކު ވާހަކަ ދެއްކިއެވެ. ނަމަވެސް ޖަޒްލީގެ ކިބައިން މަޢާފަށް އެދުމަކީ ސަކީނާއަށް ހަޖަމް ކުރަން އުނދަގޫ ކަމެކެވެ. ނަމަވެސް ލޯބިވާ ދަރިފުޅު އެގޮތުންވެސް އަނބުރާ ލިބޭނީވިއްޔާ ލޯމަރާ ބަހައްޓާފައި ޖެހޭނީ އެކަންވެސް ކުރާށެވެ.

*****

ދެ ނަމްބަރ ޖެޓީ ކައިރިއަށް ޓެކްސީ މަޑުކޮށްލުމުން ކައިލާން ޓެކްސީއިން ފޭބުމަށްފަހު ކާރުގެ ޑިއްކީއިން ފޮށި ނަގައިގެން ގެންގޮސް ބޯޓަށް އެރުވިއެވެ. އެއަށްފަހު ޖަޒްލީގެ އަތުގައި ހިފައިގެން ގޮސް އޭނާ ބޯޓަށް އަރާފައި ޖަޒްލީ އެރުވިއެވެ. ދަނީ ކޮން ރަށަކަށް ކަމެއް ނޭނގުނަސް ރޭގައި ވަރަށް އާދޭސް ކުރިފަހުން ދަނީ ރާއްޖެތެރޭ ރަށަކަށްކަން ކައިލާންގެ ފަރާތުން އެނގުމުންވެސް ޖަޒްލީ ހުރީ ވަރަށް އުފާވެފައެވެ. މާލޭ ދިރިއުޅުމަށްވުރެ ކިތަންމެހާވެސް ހިތްފަސޭހަ ވާނެތީއެވެ. އޭނާގެ އުފަން ރަށާއި, މަންމަމެންނާއިއެކު އުޅުނު ކުޑަކުޑަ އެހެނަސް އުފާވެރި ހަނދާންތަކުން ފުރިފައިވާ ގެ ދޫކޮށްލާފައި މާލެ އައި ހިތްދަތި ދުވަސް ޖަޒްލީގެ ހިތުން އަދިވެސް ފިލައިގެން ނުދެއެވެ.

އެކި ރަށްރަށަށްދާ މީހުން ތޮއްޖެހިފައިވާ އެ ބޯޓުގެ ގެ ގަނޑު މަތިން އެމީހުންނަށް ލިބުނު ތަންކޮޅުގައި ކައިލާން ތަންމަތި ފަތުރާލާފައި ދެމީހުން އިށީނެވެ. ޖަޒްލީގެ މޫނުމަތީގައިވާ އުފާވެރި ބެބުޅުން ތަކުން ކައިލާންގެ ހިތްފުރިފައި ވިއެވެ. އެމީހުންގެ އެއްފަރާތުގައި ތިބީ މުސްކުޅި ދެމަފިރިންނެވެ. އަނެއް ފަރާތުގައިވެސް ތިބީ އެމީހުންނާއި ދާދި އެއް އުމުރެއްގެ އަންހެނަކާއި، ފިރިހެނެކެވެ. ބަލާ ބެލުމަށް ހީވަނީ އެއީވެސް ދެމަފިރިން ހެންނެވެ.

މާގިނައިރު ތަކެއް ނުވެ ބޯޓު ފަޅުން ނެރެ މާސިންގާ ކަނޑާއި ދިމާއަށް މިސްރާބު ޖެހިއެވެ. ދުވަހަކީ ވައިގަދަ ދުވަހެއް ކަމުން ކަނޑުވެސް ދުރުން ބަލާލަން މަޑުހެން ހީވިއެއް ކަމަކު ވަރަށް ގަދައެވެ. ރުޅިގަދަވެ, ހުޅިނަގާފައިވާ ރާޅުތައް ފަޅަމުން ދިޔައިރު ބޯޓުވެސް ހީވަނީ ނަގަނަގާފައި ޖަހަމުން ދިޔަހެންނެވެ. ޖަޒްލީއަށް މާ ގިނަ އިރަކު ކެތެއް ނުކޮށްލެވުނެވެ. ބޯޓު ދެކޮޅަށް ހެލެމުން ދިޔުމުގެ ސަބަބުން އޭނާގެ ބޯ ސަކަރާތް ވާގޮތް ވިއެވެ. އެހެންވެ ކައިލާން ބޯދަށަށް ބާލީހެއް ލާފައި ޖަޒްލީ ބޭއްވިއެވެ. ޖެހެމުން ދިޔަ ފިނިފިނި ވައިރޯޅި ތަކުން ޖަޒްލީ ފިނިބޮޑުވެގެން މުޅި ހަށިގަނޑުން ހީބިހި ނަގަމުން ދިޔައެވެ. ޖަޒްލީގެ އަތުގައި ހިފަހައްޓާލައިގެން އިން ކައިލާންއަށް އެކަން އިޙްސާސް ވިއެވެ. އެހެންވެ އެމީހުންނާއި ދިމާއަށް އިން ސަތަރި ގަނޑު ވައްޓާލާފައި ޖަޒްލީގެ ގައިމަތިން ރަޖާ އަޅައި ނިވައި ކޮށްލަ ދިނެވެ.

“އެހެންވީމަ އަހަރެންގެ އަންހެނުންނަކީ ކަނޑު މައްޗަށް ވަރަށް ބަލި މީހެއްދޯ….. ”

މޭ ނުބައިކުރާތީ ޖަޒްލީ އަނގަމަތީގައި އަތް އަޅައިގެން އޮތީމައި ކައިލާން އޭނާއާއި ދިމާކޮށްލީ ލާނެތް ގޮތަކަށް ހީލާފައެވެ. ދެން ކައިލާންއޭ ކިޔައި ކައިލާންގެ އަތުގައި މަޑުމަޑުން ޖަހާލުމަށްފަހު ޖަޒްލީ ކުށްތަޅާލިއެވެ. ކައިލާން ގާތަށް ހިނިއައެވެ. އަނބިމީހާގެ ކޮންމެ ހަރަކާތަކުން އޭނާގެ ހިތަށް ބުނެދޭންވެސް ނޭންގޭހާ ހިތްހަމަ ޖެހުން ލިބެމުން ދިޔައެވެ. ކައިވެނީގެ މަތިވެރި ގުޅުމުން ދެހިތް ގުޅުނީމައި ހިތްތަކަށް ލިބިގެންދާ ފޮނި މީރުކަން ކައިލާންއަށް އިޙްސާސް ކުރެވެމުން ދިޔައެވެ.

އިރުކޮޅެއްފަހުން ޖަޒްލީއަށް އޮތީ ނިދިފައެވެ. އޭރު އިރުއޮއްސި ހަތަރު ފަރާތުން އަނދިރިވެފައި ވާއިރު އުޑުމަތިން ރަތް ވިލާތައް ކޮންމެވެސް ވަރަކަށް ފައުޅުވަމުން ދިޔައެވެ. ޖަޒްލީ ބަނޑުމަތީގައި ބާއްވާލާފައި އަތުގައި އަތް އަޅާލައިގެން ކައިލާން އިނީ ޖަޒްލީގެ ރީތި މޫނަށް ބަލަހައްޓައިގެންނެވެ. އިރުއިރުކޮޅާއި ވަޔާއި ޖަޒްލީގެ މޫނަށް އެޅެމުންދިޔަ އިސްތަށިތައް ރީތި ކޮށްލާ ދެއެވެ. ކައިލާން އުޅޭ ގޮތުން ހީވަނީ ވައިރޯޅިއެއްވެސް ޖަޒްލީގެ ހަށިގަނޑުގައި ބީހުމަށް ނޭދޭ ހެންނެވެ. އެ މަންޒަރު ފެންނަ ކޮންމެ އަންހެން ކުއްޖެއްގެ ހިތުގައި ޖަޒްލީއަށްޓަކައި ހަސަދައިގެ ހުޅު ރޯވާނެކަން ގައިމެވެ.

******

ހަސަން މަނިކުއާއި ސަކީނާ ހުޅުމާލޭ ފެރީ ޓާމިނަލް އިން ނިކުތް ގޮތަށް ކައިލާންމެން ގެއަށް ދިޔުމަށް ޓެކްސީއަކަށް އެރިއެވެ. ދިހަވަރަކަށް މިނެޓަށްފަހު ޓެކްސީގޮސް އެމީހުންދިން އެޑްރެހަށް މަޑު ކޮށްލުމުން ދެމަފިރިން ޓެކްސީއިން ފޭބުމަށްފަހު ކުރިމަތީގައި ހުރި އެޕާޓްމެންޓްގެ ފުރަތަމަ ފަންގި ފިލާއަށް އަރައި ބެލް އެޅިއެވެ.

ހާސްވެފައި ހުރި ސަކީނާގެ ދެއަތް ހީވަނީ ގަނޑުފެން ކޮޅެއް ހެންނެވެ. ހަސަން މަނިކުވެސް ޖެހިލުން ވެފައި ހުރެ އަނެއްކާވެސް ބެލް އަޅައިލިއެވެ. ކައިލާން މިހާރު އެ ދެމީހުން ކުރެ އެކަކުވެސް ދެކެން ބޭނުން ނުވާނެކަން އެނގޭތީއެވެ. މައިން ބަފައިންނަށް ވެ ތިބި އެމީހުންނަށް ކުރެވުނު ޢަމަލުތަކަކުން ވަނީ ދަރިންގެ ކުރިމަތީގައި އަގު ވެއްޓި ބޭނުން ނެތް ބަޔަކަށް ވެފައެވެ.

******

ކޮޓަރީގައި ދެކޮޅު ދެކޮޅަށް ހިނގާލަ ހިނގާލަހުރި ރުހާންގެ ހިތް ވަނީ އޭނާއަށް ކަންތައް ކުރެވުނު ގޮތުން ހަމަނުޖެހުމެއްގެ ތެރޭގައެވެ. މަންމަމެން ކައިލާންގެ އެޑްރެސް ހޯދައިގެން މިރޭ ކައިލާންއާއި ބައްދަލް ކުރަން ދާން އުޅޭކަން އެނގުނީމައިވެސް އޭނާ ކައިލާންމެން ހަވީރު ރާއްޖެތެރެއަށް ދާން ފުރާވާހަކަ ހަމަ ގަސްތުގައި ނުބުނީއެވެ. އެމީހުންނަށް ލަނޑެއް ދޭކަށް ނޫނެވެ. އެކަމަކު ކައިލާންއާއި ޖަޒްލީގެ އުފަލަށްޓަކައި އެހެން ކަންތައް ކުރެވުނީއެވެ. އެމީހުން ހަވީރު ފުރާކަން މަންމައަށް އެނގުނު ނަމަ ޔަޤީނުންވެސް ފުރުމުގެ ކުރިން ކައިލާންއާއި ބައްދަލް ކުރަން ދިޔައީހެވެ. އަދި މަންމައަށް ވެގެން ވާނަމަ އެދަތުރުވެސް ދިޔަނުދީ ކޮންމެވެސް ބަހަނާއެއް ދައްކައިގެން ހުއްޓުވީހެވެ. ކައިލާންމެންގެ އައު ކައިވެނީގެ އުފާވެރި ވަގުތުތައް އެފަދަ ގޮތަކަށް އެމީހުންގެ އަތުން ބީވެގެން ދިޔުމަކަަށް ރުހާން ނޭދެއެވެ. އެހެންވެ ރުހާން އޭނާގެ ހިތަށް ވިސްނައިދިނީ ލޯބިވާ ކޮއްކޮގެ ޙައްޤުގައި އެމީހުން ހަނީމޫން ދަތުރު ނިންމާލާފައި އަންނަންދެން ހަމަ އެނގޭކަމަށްވެސް ނުހަދާ ހުރުމަށެވެ.

****

“އޭ….. ޖަޒްލީ…. ތެދުވޭ ބަތްކޮޅެއް ކާލައިގެން އޮންނަން…. އަދި އެ ރަށަށް ދެވޭނީ މާދަމާ މެންދުރެއް ހާއިރަށް”

ކައިލާން ޖަޒްލީ ބޮލުގައި ފިރުމާލުމަށްފަހު ކާން ނަގަންވެގެން ގޮވާލިއެވެ. ޖަޒްލީ ކުޑަކޮށް ދެލޯ ފުހެލާފައި ތެދުވެ ހަމަޖެހިލިއެވެ. ރޭގަނޑުގެ ކެއުމަށް ބޯޓުގައި ތައްޔާރު ކޮށްފައި ހުރީ ގަރުދިޔަ އާއި ބަތެވެ. ތޮޅި މިރުހާއިއެކު ލުނބޯހުތް ފިތާލައިގެން ކައިލާންއާއިއެކު ޖަޒްލީވެސް ބަތްކޮޅެއް ކާލިއެވެ. ކައިނިމިގެން ދެމީހުން އިރުކޮޅަކު ވާހަކަ ދައްކާލަން ތިބެފައި ކައިލާން ދިޔައީ ފާޚާނައަށެވެ. ކައިލާން ދިޔަތަން ފެނުމުން ވަގުތު ބަލާފައި އަނެއް ފަރާތުގައި އޮތް މީހަކު އައިސް ޖަޒްލީގެ ގާތުގައި އިށީނދެ ހަމަޖެހިލާފައި ކިހިނެތްހޭ އަހާލިއެވެ. ނުދަންނަ އެ ޒުވާނާ ޖަޒްލީއާއި ދިމާއަށް ބަލަމުން ދިޔަ ގޮތުން ޖަޒްލީއަށް އުނދަގޫ ވަމުން ދިޔައެވެ. އޭނާއަށް ބެލެމުން ދިޔައީ ކައިލާން އާދޭތޯއެވެ.

ޖަޒްލީގެ ޖެހިލުންވެފައިވާ ހިތަށް އިތުރަށް ބިރުވެރިކަން ވަނީ ބޯޓުގައި ދިއްލާފައި ހުރި ބޮކިތައް ނިއްވާލުމުންނެވެ. އެ ޒުވާނާ ވާހަކަ ދައްކަން މަސައްކަތް ކޮށްކޮށް ޖަޒްލީ އަނގައިން ނުބުނުމުންވެސް އެއްގޮތަކަށް ދާ ޚިޔާލެއް ނުކުރިއެވެ. ޖެހިގެން އެއްފަރާތުގައި ތިބި މުސްކުޅި ދެމަފިރިން ތިބީ ނިދާފައެވެ. އަނެއް ފަރާތުގައި އޮތް އަންހެން ކުއްޖާ ނިދާފައި އޮތް އިރު ފިރިހެން ކުއްޖާހުރީ ތަންކޮޅެއް ދުރުގައި ފޯނެއްގައެވެ. އެންމެ ފަހުން އެ ޒުވާނާ ޖަޒްލީގެ އުނގުގައި އޮތް އޭނާގެ އަތުގައިވެސް ހިފީއެވެ. ޖަޒްލީ އެ އަތް ފޮޅުވާލަން މަސައްކަތް ކުރަމުން ދިޔައިރު އޭނާއަށް ރޮވެމުން ދިޔައެވެ. އެ މަންޒަރު ފެނި އައިސްފައިހުރި ރުޅިން ކައިލާންގެ ލޮލުން ހީވަނީ އަލިފާންކަނިވެސް ބުރާހެންނެވެ.

*****

އެނދުގައި އޮށޯވެލައިގެން އޮތް ރިޝްފާއަށް އިރުކޮޅަކާ ގަޑި ބަލައިލެވެއެވެ. އަދިވެސް ބާރަ ޖަހަން ވަގުތު ހުރުމާއެކީ އެނދުގެ ހެޑްބޯޑުމަތީ އޮތް ވާހަކަފޮތް ނަގައި ކިޔަން ހުޅުވާލިއެވެ. ނަމަވެސް އެއްގޮތަކަށް އޭގައި ލިޔެފައި އޮތް އެއްޗަކަށް ސަމާލުކަން ދެވޭ ގޮތެއް ނުވިއެވެ. މިއަދު އޮފީހުގަ މާ ބުރަކޮށް ދިޔައީމައި ހަށިގަނޑަށް ވަރުބަލިކަން އިޙްސާސް ކުރެވެމުން ދިޔައެވެ. ނަމަވެސް ޒޭން އާއި ބައްދަލް ކޮށްލާފައި ނޫނީ ނިދާކަށް އޭނާ ބޭނުމެއް ނުވެއެވެ. އެހެންވެ ހަމަ ނެތް ހިތްވަރު ލައިގެން ނުނިދާ އޮވެވޭތޯ މަސައްކަތް ކުރަމުން ދިޔަ ރިޝްފާގެ ލޮލަށް ނިދި ސަވާރުވެ ހުވަފެނީ ޢާލަމަށް ދަތުރު ކުރިއެވެ.

އޭގެ ފަސްވަރަކަށް މިނެޓް ފަހުން ޒޭން އައިސް ރިޝްފާ ކޮޓަރި ބެލްކަންޏަށް ތިރިކޮށްލިއެވެ. ބެލްކަނީގެ ދޮރު ލައްޕާފައި ހުއްޓަސް ދޮރު ނުހުޅުވައި އެތެރެއަށް ވަނުމަކީ އެފަދަ މަޚްލޫޤަކަށް އެއްވެސް އުނދަގޫ ކަމެއް ނޫނެވެ. ނަމަވެސް ރިޝްފާއަށް އެމަންޒަރު ފެނި ހެޔަށް ގޮތްވުމަކީ ޒޭން ބޭނުންވާ ގޮތެއް ނޫނެވެ. އެހެންވެ ދޮރުހުރީ އެތެރެއިން ތަޅުނުލާކަން އެނގޭތީ ޒޭން ލޮލުން އައްޔެއް ފޮނުވާލާފައި ދޮރު ކަހާލުމަށްފަހު އެތެރެއަށް ވަނީ ރިޝްފާ ދެކިލުމަށް މިއަދު ހަތަރުދަމު އޭނާ ކުރަމުން އައި ދިގު އިންތިޒާރަށް ނިމުން ގެންނަމުންނެވެ. ނަމަވެސް ނިދާފައި އޮތް ރިޝްފާ ފެނުމުން އޭނާގެ މޫނުމަތި ބަނަވެގެން ދިޔައީ ކަޅުފޮއިރެއެއް ފަދައިންނެވެ. މިވަގުތު އެ މޫނު ފެނިއްޖެނަމަ ރިޝްފާ ދުނިޔެއިންވެސް މޮޔަވެދާނެއެވެ.

***ނުނިމޭ***

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.