ތަޤްދީރު (20)

އެޖުމުލަތަކާއެކު މަލްހާއަށްހީވީ އޭނާގެ ވަށައިގެންވި މާހައުލު އެނބުރިގަތްހެންނެވެ. މީހަކު ބާރު އެތިފަހަރެއް އޭނާގެ ކޯތާފަތްމަތީގައި ޖެހިކަހަލަ އިހުސާސެއް ވެގެންދިޔައެވެ. ތޫނު ޚަންޖަރެއް އެހިތަށް ހަރައި ޗިސްކޮށްލިނަމަވެސް އެވަގުތު ހިތަށްވީތަދަށްވުރެ ކުޑަވާނެކަން ޔަގީނެވެ.

“ނޫން. ނޫން ރާދު ނޫން. އަހަރެންނަށް ތިހެންނުހަދާ. އެއްފަހަރުވެސް އަހަރުމެންގެ ދަރިފުޅާ ދޭތެރޭގަ ވިސްނައިލަބަލަ. ޕްލީޒް ރާދު ނޫން.” މަލްހާއަށް ރޮއިގަނެވުނީ ކުއްލިއަކަށެވެ. އެހިތުގައި އަޅަމުންދިޔަ ވޭން އެތަނުގައިތިބި އެކަކަށްވެސް ހަމަ އިހުސާސުނުވަނީ ހެއްޔެވެ؟

“އޯ ޕްލީޒް ޝަޓްއަޕް. އަހަރެންނަކަށް ތިއިން އެކަކުވެސް މުހިއްމެއްނޫން. މަލްހާ ބޭނުމީއާމުން ދަރިވެސް މަލްހާއަށް. އޭނާ ގޮވައިގެން ވީހައިވެސް އަވަހަށް މިގެއިން ނުކުތީއާމުން އަހަރެންނަށް ރަނގަޅީ. އަޑުއިވިއްޖެ.” ފަރުވާކުޑަ ރާގަކަށް ރާއިދް ބުނެލިގޮތުން މަލްހާ ހުއްޓުންއެރިއެވެ. އޭނާ ހީކުރީ އޭނާދެކެ ލޯބިނުވި ނަމަވެސް ރާއިދް ޒީވާންދެކެ ލޯބިވާނެ ކަމަށެވެ. އެހެނަސް ކަންތައްވަމުން މިދަނީ އޭނާ ހީކުރިގޮތާ މުޅިން ޚިލާފަށެވެ. ހައިރާންކަމާއެކު ރާއިދްގެ މޫނަށް ބަލަންހުރި މަލްހާގެ ލޮލުން ހުއްޓުމެއްނެތި ކަރުނަފައިބަމުން ދިޔައެވެ. އޭނާގެ ރާއިދް އެހައި ހިތްހަރުމީހަކަށްވީ ކޮންއިރަކުހެއްޔެވެ؟

“ރާދު ޕްލީޒް އަހަރެންނަށް ތިހެން ނުހަދާ. އަހަރެން.. އަހަރެން މިގެއިން ނުކުމެގެން ކޮންތާކަށްދާނީ؟ ހެޔޮނުވާނެ އަހަރެން މިގެއިން ނުނެރޭ. އަހަރެމެންގެ ދަރިފުޅަށްޓަކާ އަހަރެން މިގޭގައި ބަހައްޓައިދީ.” ރާއިދްގެ ފައިބުޑަށް ވެއްޓިގަންނަމުން މަލްހާ އާދޭސްކުރަންފެށިއެވެ. ހަޔާތުގައި މިފަދަ ދުވަހެއްދެކެން ޖެހިދާނެކަމަށް އޭނާ ހުވަފެނުގައިވެސް ހިއެއްނުކުރެއެވެ. މިތަނަކީ އޭނާގެ ގެދޮރުހުރި ތަނެއްވެސްނޫނެވެ. ވީއިރު އެގެއިން ނުކުމެގެން ޒީވާން ގޮވައިގެން އޭނާ ދާނީވެސް ވަކިކޮންތަނަކަށް ހެއްޔެވެ؟ ރާއިދް އެހެންބުނާއިރު އެވަރުވެސް ނުވިސްނެނީހެއްޔެވެ؟

“ވަރިހަމައޭ. އަހަރެން ބޭނުމެއްނޫން ކަލެއާ އެއްފުރާޅެއްގެ ދަށުގައި އުޅޭކަށް. ވަރިކުރީމައި ދެން މިގޭގައި ހުރުމުގެ ބޭނުމެއްނެތް. އަޑުއިވިއްޖެތަ؟” ކުޑަކޮށް ގުދުވެލަމުން މަލްހާ ދުރަށް ކޮށްޕައިލުމަށްފަހު ރުންކުރު ގޮތަކަށް ރާއިދް ބުނެލިއެވެ.

ވެއްޓުނުގޮތުން މަލްހާގެ އުނަގަނޑަށް ތަދެއްއަރައިގެން ދިޔައެވެ. އެހެނަސް ހިތްވަރުކޮށްފައި މަލްހާ ތެދުވިއެވެ. ރޮވިފައި ރާއިދް ގާތުގައި އަނެއްކާވެސް އާދޭސްކުރަންފެށީ އޭނާ ގެއިން ނެރެނުލުމަށެވެ. އޭނާއަށް އެހެން ނުހެދުމަށެވެ. އެހެނަސް އެހަރު ހިތުގެ ވެރިޔާއަށް އެއިން ކަމަކުން އަސަރުކުރިހެނެއް ހިއެއްނުވެއެވެ. އަޅައިކަހައިވެސްނުލައި އެހުރިގޮތަށް ހުރީއެވެ.

އެއްލިކަޅިއަކުން ތަންކޮޅެއްދުރުގައި ހުއްޓިހުރި ލިވްޔާ ފެނުމުން މަލްހާާ އެދިމާއަށް ދުއްވައިގަތެވެ. އޭނާއާއި ދިމާއަށްއައި މަލްހާ ފެނުމުން ލިވްޔާ ކުޑަކޮށް ހާސްވިނަމަވެސް އެހުރިތަނުގައި ހުރީއެވެ. “ލިވީ ޕްލީޒް ރާދުގާތުގައި ބުނެބަލަ ދޮންތައަށް އެހެން ނުހަދާށޭ. ޕްލީޒް. ދޮންތަ ދަރިފުޅު ގޮވައިގެން ކޮންތަނަކަށްތަ ދާނީ؟ ލިވީ ބުނީމަ ރާދު ފަހަރެއްގަ ގަބޫލުކޮށްފާނެ.” ދެއަތްޖޯޑުކޮށްލަމުން މަލްހާ ބުނެލިގޮތުން ލިވްޔާ މަލާމާތުގެ ފާޑަކަށް ހީލިއެވެ.

ވިސްނަނީކަމަށް ހެދިގެން އިރުކޮޅަކު ހުރުމަށްފަހު ކުޑަކޮށް މަލްހާއާއި ލިވްޔާ ގާތްވެލިއެވެ. “ހަނދާންވޭތަ އަހަރެންވެސް ހަމަތިހެން ދޮންތަ ގާތު އާދޭސްކުރިން އަހަރެން މިގެއިން ނުނެރުމަށް. އެކަމަކު ދޮންތައަކަށް އެދުވަހަކު އެއަޑެއް ނީވުނެއްނު. ދެން މިއަދު އަހަރެން ކީކުރަން އެހީވާންވީ؟ ހީކޮށްލާ ތީއެދުވަހު އަހަރެންނަށް އެހެން ހެދިކަމުގެ ބަދަލޭ.” މަލްހާގެ ކަންފަތާއި ގާތްވެލަމުން ވައިއަޑުން މަލާމާތުގެ ރާގަކަށް އެހެންބުނެލުމަށްފަހު ލިވްޔާ ހީލިއެވެ. ބުނާނެއެއްޗެއް ނޭނގިފައި މަލްހާއަށް ހުރެވުނީއެވެ. އޭނާގެ ކޮއްކޮ އޭނާއަށް އެވަރަށް ނަފުރަތުކުރަނީހެއްޔެވެ؟

ލިވްޔާގެ ބަސްތަކާއެކު ހިފަހައްޓައިގެންހުރި މަލްހާގެ ރުޅިގަނޑު ކޮންޓްރޯލުން ނެއްޓިއެވެ. ލޯއަޅައިލަމުން މަލްހާ ލިވްޔާގެ މޫނަށް ބަލައިލުމަށްފަހު އޭނާގެ ކޯތާފަތްމަތީގައި ބާރަށް ޖެހިއެވެ. މަލްހާގެ ފަރާތުން އެފަދަ ކަމެއް ފެނިދާނެކަމަށް ތައްޔާރުނުވެހުރި ލިވްޔާއަށް ކޯތާފަތުގައި އަތްއަޅައިލަމުން ކުޑަކޮށް ހަޅޭލަވައިގަނެވުނެވެ. ރާއިދަށްވެސް ސިހިފައި އެދިމާއަށް ހިނގައިގަނެވުނެވެ. އެހެނަސް މަލްހާގެ ބާރުހަޅޭކާއިއެކު ހުރިތަނުގައި އޭނާއަށް މަޑުޖެހިލެވުނީ ކީއްވެކަމެއް އޭނާއަކަށްވެސް ނޭނގެއެވެ.

“ލަދުކުޑަ ކުއްޖާ. އަހަރެންގެ މުޅި ދިރިއުޅުން ބަރުބާދުކޮށްލާފަ ކަލޭ ތިހުރީ. އަހަރެން ދުވަހަކުވެސް ކަލެއަކަށް މައާފެއް ނުކުރާނަން. ހަނދާންކުރާތި. އަހަރެންނާ އަހަރެންގެ ދަރިފުޅު ނިކަމެތިކޮށްލާފަ ކަލޭމެން ދެމީހުންނަކަށް ދުވަހަކުވެސް އުފަލަކުން ނުއުޅެވޭނެ. އަހަރެންނަށް ތިދިން ހިތާމައިގެ ބަދަލު ކޮންމެވެސް ދުވަހަކުން ކޮންމެވެސް ސިފައެއްގައި ކަލޭމެން ދެމީހުންނަށް ލިބޭނެ. މިހާރުން ފެށިގެން ވަގުތު ގުނަންފަށާ. އެދުވަހަކުން ކަލޭމެންނަށް އިހުސާސުވާނެ އަހަރެންނަށް ތިދެވުނު އަނިޔާ. ﷲ އިރާދަފުޅުން މިހާލުގައިވެސް އަހަރެން ކެތްތެރިވާނަން. އަހަރެންގެ ހިތެއް ކަލޭމެންނަކަށް ދުވަހަކުވެސް ހެވެއްނުވާނެ. ދުވަހަކުވެސް ނުވާނެ.” ފަހުޖުމުލަތަކާއެކު އަނެއްކާވެސް މަލްހާއަށް ރޮވުނެވެ. ކާކޮޓަރީ ދޮރުމަތީގައި މިހުރިހައި މަންޒަރެއް ބަލަންހުރި ހީނާއަށް މަލްހާގެ ކޮންމެ ޖުމުލައަކަށް އާމީން ކިޔައިލެވުނީ އެދެމީހުންދެެކެ އައިސްފައިވާ ރުޅިއެއްގެ ބޮޑުކަމުންނެވެ.

ރާއިދާއި ލިވްޔާއަށް މަލްހާގެ ވާހަކަތަކުން މާބޮޑު އަސަރެއް ނުކުރެއެވެ. ހިތާމައިގެ ހިޔަންޏެއް ދުވަހަކުވެސް އެދިރިއުޅުމަށް އެޅިފައިނުވާ މީހަކަށް އޭގެ ހިތިކަމެއް މީހަކު ބުނެލާ ބަހަކުންނެއް އިހުސާސެއް ނުވާނެއްނޫންހެއްޔެވެ؟ ފަރުވާކުޑަގޮތަކަށް ހަޅޭލަވައިގަތުމަށްފަހު އޭނާގެ ކޮޓަރިއާއި ދިމާއަށް ހިނގައިގަތް މަލްހާއަށް ބަލަން ދެމީހުންވެސް ތިބީއެވެ.

ހަތަރު އުދަރެސް ފެނުޖެހިފައިވާ މީހަކުފަދައިން ހިނގައިފައިގޮސް މަލްހާ ކޮޓަރިއަށް ވަތްއިރު ކުޑަކޮށް ހުޅުވިފައިވާ ދޮރުގެ ފުރަގަހުގައި ރޮވިފައި ޒީވާން ހުއްޓެވެ. އެކުޑަކުޑަ މައުސޫމް ދެލޮލުން އޮހޮރެމުންދިޔަ ކަރުނަތައް ފެނުމުން މަލްހާގެ ހިތް ނުހުއްޓުނީ ހަމަކިރިޔާއެވެ. އޭނާއަށް ކިތަންމެބޮޑު ހިތާމައެއް ލިބުނަސް އޭނާގެ ލޯބިވާ ދަރިފުޅުގެ ލޮލުން އެންމެ ކަރުނަތިއްކެއް އޮހޮރޭތަންބަލާކަށްވެސް އޭނާއަކަށް ކެތެއްނުވާނެއެވެ.

ވައިއަޑުން ދަރިފުޅާއޭ ބުނެލަމުން ގުދުވެލައިފައި މަލްހާ ޒީވާން އުރައިލަމުން އެތުއްތު މޫނުގައި ލޯބިން ބޮސްދިނެވެ. އަދި ތަކުރާރުކޮށް އޭނާއަށް މައާފުކޮށްދިނުމަށް އެދެމުންދިޔައެވެ. މަލްހާގެ ކަރުގައި އޭނަގެ ކުޑަދެއަތް ވަށައިލަމުން ޒީވާން ބައްދައިލީ ލޯތްބާއެކުއެވެ. މީހަކު ނުބުންޏަސް އެކުޑަ ހިތަށްވެސް އޭނާގެ މަންމަ އުފުލަމުންދިޔަ ހިތާމަތަކާއި ބުރަތައް އިހުސާސުވާފަދައެވެ. އިރުކޮޅަކު ބައްދައިލައިގެން ހުރުމަށްފަހު ޒީވާން ދުރުވެލަމުން ލޯތްބާއެކު މަލްހާގެ ލޮލުން އޮހޮރެމުންދިޔަ ކަރުނަތައް ފުހެލަދިނެވެ. މިއަދު އެހިތުގައި އޭނާގެ ބައްޕައާމެދުގައިވީ ހަމައެކަނި ޝަކުވާއެވެ. ޒީވާންގެ މިއަމަލުން މަލްހާއަށް އިތުރަށް ރޮއިގަނެވުނީއެވެ. ދަރިފުޅާއޭ ކިޔައި އަނެއްކާވެސް ޒީވާންގެ ގައިގައި އޮޅުލައިގަންނަމުން މަލްހާ ގިސްލަގިސްލާފައި ރޮމުންދިޔައެެވެ.

ކުއްލިއަކަށް އިވެންފެށި ގޭގެ ބެލްގެއަޑުން މަލްހާ ހިސާބަކަށް ހައިރާންވި ނަމަވެސް އެކަމަށް މާބޮޑު ސަމާލުކަމެއްނުދީ ޒީވާން ތިރީގައި ބެހެއްޓުމަށްފަހު މަޑުހިނގުނެއްގައިގޮސް އަލަމާރި ބިތްދޮށުގައިހުރި ފޮށި ނެގިއެވެ. އަދި ކުޑަކޮށް ފޮށި ފޮޅައިލަމުން އަލަމާރި ހުޅުވައިލުމަށްފަހު އޭނާގެ އަންނައުނުތަކާއި ޒީވާންގެ އަންނައުނުތައް އަޅައި ފޮށި ފުރައިލިއެވެ. ދުރުގައި މަލްހާގެ ކޮންމެ އަމަލަކަށް ފަރުވާތެރިކަމާއެކު ބަލަން ޒީވާން ހުއްޓެވެ. އޭރުވެސް އެދެލޮލުން ކަރުނަ ނުހިކެއެވެ. މަންމައަކު ރޯމަންޒަރުބަލަން ކެތްވާނީ ކޮންހިތަކަށް ހެއްޔެވެ؟

ބޭނުންވާ ހުރިހައި ސާމާނެއް އަޅައިނިންމައިލި އިރުވެސް އޭނާ ދާނެ ތަނެއް މަލްހާއަކަށް ނުވިސްނުނެވެ. އެންމެހިނދުކޮޅަކުވެސް އެގޭގައި މަޑުކުރަން ބޭނުންނުވުމުން މަލްހާ އެތަނުން ދާންނިންމިއެއްކަމަކު އޭނާ ދާނީވެސް ވަކިކޮންތާކަށް ހެއްޔެވެ؟ ދެލޯމަރައިލަމުން މަލްހާ ފުންނޭވާއެއްލީ ހަމަޖެހިލުމަށެވެ. އަލަމާރީގެ ދޮރުފަތް ލައްޕައިލުމުގެ ކުރިން މަލްހާ ހިތްދަތިގޮތަކަށް އެއްފަރާތުގައިހުރި ރާއިދްގެ އަންނައުނުތަކަށް ބަަލައިލިއެވެ. އިރުކޮޅަކު އެހެން ހުރުމަށްފަހު ހިތްމަތީގައި އަތްއަޅައިބާރުކޮށްލަމުން މަލްހާ އަލަމާރީގެ ދޮރުލައްޕައިލިއެެވެ. އެވަގުތު ދޮރުގައި ޓަކި ޖަހައިލަމުން ހީނާ ދޮރުހުޅުވައިލިއެވެ. ގަދަކަމުން ހިނިތުންވެލަމުން މަލްހާ ހީނާއާއި ދިމާއަށް އެނބުރުނީ ކިހިނެއްވީތޯ އަހައިލާ އުސޫލުންނެވެ.

“ކޮއްކޮ ހޯދަން މީހަކު އައިސް އެބަހުރި.” ސިޓިންގް ރޫމާއި ދިމާއަށް އަތުން އިޝާރާތްކޮށްލަމުން ހީނާ މަޑުމައިތިރި ރާގަކަށް ބުނެލިއެވެ. އެއާއެކު މަލްހާގެ ދެބުމަގޮށްޖެހިގެން ދިޔައެވެެ. މިގަޑީގައި އޭނާ ހޯދަން އަންނާނީ ކާކުހެއްޔެވެ؟ ވަކި އެއްޗެކޭ ނުބުނެ ބޯޖަހައިލަމުން މަލްހާ ކޮޓަރިން ނުކުންނަން ހިނގައިގަތީ ޓިޝޫކޮޅަކުން އޭނާގެ މޫނުމަތި ފުހެލަމުންނެވެ.

ޒީވާން ގާތުގައި ހީނާ މަޑުކޮށްލުމުން އެކަމަށް ޝުކުރުވެެރިވެފައި މަލްހާ ސިޓިންގް ރޫމާއި ދިމާއަށް ހިނގައިގަތެވެ. ސޯފާއެއްގައި އިނށީދެލައިގެންއިން އީނާލް އާއި ޝަމްއަލް ފެނުމުން މަލްހާ ވަރަށް ހައިރާންވިއެވެ. މިއޮއްފަދަގަޑީގައި އީނާލް އައުމުން މަލްހާގެހިތަށް ކޮންމެވެސް ވަރެއްގެ ހަމަޖެހުމެއް ލިބިގެންދިޔައެވެ.

“މަލް އާރ ޔޫ އޯކޭ؟” ކަންބޮޑުވެފައި މަލްހާ އާއި ދިމާއަށް ހިނގައިގަންނަމުން އީނާލް އަހައިލީ މަލްހާ ހުރިހާލު ފެނުމުންނެވެ. “ނާލް. މިގަޑީގަ. ކަމަކުތަ؟” އީނާލްގެ ސުވާލަށް ޖަވާބުދިނުމެއްނެތި މަލްހާވެސް ކޮށްލީ ސުވާލެކެވެ. މަޑުހިނގުމެއްގައި އައި އީނާލް މަލްހާގެ ގައިގައި ލޯތްބާއެކުގައި ބައްދައިލިއެވެ. އަދި ދުރުވެލަމުން ރާއިދްގެ މޫނަށް ބަލައިލުމަށްފަހު އެނބުރި މަލްހާއާއި ދިމާއަށް ބަލައިލަމުން އީނާލް ބޯޖަހައިލިއެވެ. ކޮންކަމެއްހޭ މަލްހާ އަހައިލީ މަޑުމަޑުންނެވެ.

“އަހަރެން މިއައީ މަލް ބަލާ. ހިނގާ އަހަރެންނާއެކު ދާން. އެއްތަނެއްގަ ނުހުރެވުނަސް އަހަރެންގެ ގޭގައި މަލްއަށް ހުރެވޭނެ. އެކަކު މަލްއާއެކު ނުވިޔަސް އިންޝާ ﷲ އަހަރެން އަބަދުވެސް މަލްއާ އެކުގައި ވާނަން. އަހަރެން ހުއްޓަ ވަންނާނެތަނެއްނެތި މަލް މަގުމަތިވާކަށް ނުޖެހޭނެ.” އިރުކޮޅެއްގެ ހަމަހިމޭންކަމަށްފަހު އީނާލް އެހެންބުނެލީ ޝަމްއަލްއަށް ބަލައިލަމުންނެވެ. ހިނިތުންވެހުރެ ޝަމްއަލް ބޯޖަހައިލީ އީނާލްގެ ކޮންމެ ނިންމުމަކަށް އެއްބަސްވަމޭ ބުނާއުސޫލުންނެވެ.

އީނާލްގެ ހުށައެޅުމަށް ދޭނެ ޖަވާބެއް މަލްހާއަކަށް ނުވިސްނުނެވެ. އިސްޖަހައިލަމުން ދެއަތްދެއަތާ މޮޑެންފެށީ އެކަމާ ވިސްނާފަދައިންނެވެ.

“ތިހައިވަރަށް ވިސްނާނެކަމެއްނެތް. ހިނގާ އަހަރުމެންނާއެކު. އިންޝާ ﷲ ދެރަގޮތެއް މެދުވެރިވިއަކަ ނުދޭނަން. ވެދާނު މިރޭ މިތަނަށް މިއާދެވުނީވެސް އެހެންވެކަން. ގޭގަަައި ހުރެގެން އީން ކަންބޮޑުވެފަ އަހަރެންގާތު އާދޭސްކުރަނީ މަލްގެ ހާލު ބަލާލަން މިގެއަށް ގެނެސްދޭށޭ ކިޔާފަ. ނަސީބެއްނު އާދެވުނުކަން. މިތަނުގައި ދެކެވުނު ހުރިހައި ވާހަކައެއްވެސް އަޑުއިވުނު. ހުރިހައިއިރު ދޮރުމަތީގައި އަހަރެމެންނަށް ތިބެވުނީ އިވުނު ވާހަކަތަކުން ހަދާނެގޮތް ހުސްވެފަ. މިއީ އަހަރެންނާ އީންގެ ނިންމުމެއް. އެއީ މަލްއަށް ހެޔޮއެދޭ އެކުވެރިއެއް. އެހެންވީމަ މިއީ މަލްއަށް ލެއްވި ހެޔޮރަޙުމަތެއްކަމަށް ބަލައި އަހަރެމެންނާއެކު ހިނގާ.” އިސްޖަހައިގެން ހުރެ ޝަމްއަލް އޯގާތެރިކަމާއެކު މަލްހާއަށް ވިސްނައިދޭން މަސައްކަތްކުރިއެވެ. އީނާލްގެ ކޮންމެ ގާތް މީހަކީ އޭނާގެވެސް ގާތްމީހެކެވެ.

ަﷲ އަށް ޙަމްދުކޮށްލަމުން ޝުކުރުވެރިކަމުގެ ނަޒަރަކުން މަލްހާ އީނާލަށް ބަލައިލިއެވެ. އީނާލަކީ ހަގީގަތުގައިވެސް މަލްހާއަށް ލެއްވި ހެޔޮރަޙުމަތެކެވެ. މަލްހާގެ ކޮނޑުގައި ފިރުމަމުން އެދެލޮން އޮހޮރެން ތައްޔާރަށްހުރި ކަރުނަތައް އީނާލް ފުހެލައިދިނެވެ. އެއީ އޭނާގެ ދޮންބެގެ ލޯތްބެވެ. އެހިތުގެ ހަމަޖެހުމެވެ. ކޮންމެ ހާލެއްގައިވެސް މަލްހާ ރައްކާތެރިކޮށްދޭން އީނާލް ބޭނުންވެއެވެ. އޭނާގެ ދޮންބެއަށްޓަކައެވެ. އެދެމީހުންގެ ޒަމާންވީ އެކުވެރިކަމަށްޓަކައެވެ.

ފުންނޭވާއެއްލަމުން މަޑުހިނގުމެއްގައި މަލްހާ އޭނާގެ ކޮޓަރިއަށް ދިޔައެވެ. އަދި އެނދުކައިރީގައިހުރި ފޮށިނަގަމުން ހީނާއާއި ވަދާޢީ ސަލާމް ކޮށްލިއެވެ. ރޮވިފައި ހީނާވެސް މަލްހާގެ ގައިގައި ބައްދައިލިއެވެ. “ކޮންމެ ތަނަކު ކޮންމެ ހާލެއްގައި އުޅުނު ނަމަވެސް މާތް ﷲ ކޮއްކޮއަށް އަބަދުވެސް ހެޔޮގޮތް މިންވަރުކުރައްވާށި. ދެރަނުވޭ. އެކަލާނގެ ނިންމަވާނީ އަބަދުވެސް އެންމެ ރަނގަޅުގޮތަށް. ކޮއްކޮއަށްޓަކައި މިއަށްވުރެ މާހެޔޮގޮތެއް ރޭވިފައިއޮތީ ކަންނޭނގެ. އެހެންވީމަ ހިތްވަރާއެކު މިދުނިޔެއާ ކުރިމަތިލާ. މާތް ﷲ އިރާދަފުޅުން ހުރިހައިކަމެއްވެސް ރަނގަޅުވާނެ. ދައްތަގެ ހެޔޮދުޢާތައް އަބަދުވެސް ކޮއްކޮއާއެކުގައިވާނެ.” މަލްހާއަށް ހީނާ ވިސްނައިދިނީ ލޯތްބާއެކުގައެވެ. ހީނާގެ ކޮންމެ ވާހަކައަކަށް ބޯޖަހަމުން މަލްހާ އެއްބަސްވަމުންދިޔައެވެ. ﷲ އަށް ވަކީލުކޮށްލުމަށްފަހު ކޮންމެކަމަކާއިވެސް އޭނާ ކުރިމަތިލާނެއެވެ. އެކަލާނގެއަށް އޭނާ އިތުބާރުކުރެއެވެ. އަބަދުވެސް ކުރާނެއެވެ.

ޒީވާން އުރައިލައިގެން ފޮށި އެއްއަތުން ދަމަމުން ނުކުތް މަލްހާ ފެނުމާއެކު ޝަމްއަލްގޮސް ފޮށީގައި ހިފިއެވެ. އެއާއެކު މަލްހާގެ އަނެއްފަރާތުން އީނާލް މަލްހާގެ ކޮނޑުގައި ހިފަހައްޓައިލަމުން ހިނގައިގަތެވެ. ނަމަވެސް ވަކިހިސާބަކުން މަޑުޖެހިލަމުން ފަހަތަށް އެނބުރި އޭނާ ރާއިދްގެ މޫނަށް ބަލައިލިއެވެ. އެއްފަރާތުގައި ލިވްޔާއާއިއެކު ހުއްޓިލައިގެން އެހުރިހައި މަންޒަރެއްބަލަން އޭނާހުރީ އަނގައިން ބަހެއްވެސް ބުނުމެއްނެތިއެވެ.

“އަހަރެން ހީކުރީ ރާއިދްތީ ވަރަށް ހެޔޮވިސްނޭ ރަނގަޅު މީހެއްކަމަށް. އޭރު ރާއިދް އުޅުނުގޮތުން ހަގީގަތުގައިވެސް އަހަރެންނަށް ހީވި ރާއިދް މަލްދެކެ ވަރަށް ލޯބިވެއޭ. އެކަމަކު. ރާއިދްތީ ބޭރުފުށުގެ ރީތިކަމަށް ލޯބިކުރާ މީހެއްކަން މިއަދު އެނގިއްޖެ. އެހެއްނު. ހީނުކުރައްޗޭ ރާއިދް މަލް ދޫކޮށްލީމަ އޭނާދެކެ ލޯބިވާނެ މީހެއްނުވާނޭ. ތިއީ ކުށްހީއެއް. ﷲ އިރާދަފުޅުން ރާއިދްއަށްވުރެ ބޮޑަށް މަލްދެކެ ލޯބިވާނެ އަދި ރާއިދްއަށްވުރެ މާރަނގަޅު ހެޔޮލަފާ ޞާލިހް ފިރިއެއް އަހަރެންގެ މަލްއަށް ލިބޭނެ. އެދުވަހަކުން ރާއިދް ރޯނެ. އެނބުރި މަލްގެ ލޯތްބަށް ސަލާންޖަހަންވެސް އަންނާނެ. އެކަމަކު ވަގުތު އޮންނާނީ ފާއިތުވެފަ. މާބޮޑަށްވެސް ފާއިތުވެފަ. އަހަރެން ބުނީތީވެސް ރާއިދް ބަލަންހުންނައްޗޭ. ދަނީ ދެން. ތިދެމީހުންގެ ތިދެމީހުންގެ އުފާވެރިދިރިއުޅުމަށް މަރުޙަބާ. އިރާދަކުރެއްވިއްޔާ މަލްއެއްދެން ނާންނާނެ ތިދެމީހުނަށް އުނދަގޫ ކުރާކަށް.” އޭނާ ދައްކަންބޭނުންވި ވާހަކަތައް ދައްކައި ނިންމައިލުމަށްފަހު އީނާލް މަލްހާ ގޮވައިގެން ޝަމްއަލްގެ ފަހަތުން އެގެއިން ނުކުންނަން ހިނގައިގަތެވެ. ހައިރާންކަމާއެކު އީނާލްއާއި ދިމާއަށް ބަލަން މަލްހާއަށް ހުރެވުނީއެވެ. ބުނާނެ އެއްޗެއް އެސިކުނޑިއަކަށް ނައެވެ. އެއަށްވުރެ ބޮޑަށް މަލްހާގެ ސިކުނޑިވަނީ ހާސްވެފައެވެ. އެންމެފަހު ފަހަރަށް މަލްހާ ކުޑަކޮށް އެނބުރިލަމުން ފެންކަޅިވެފައި ރާއިދާއި ދިމާއަށް ބަލައިލިއެވެ. އެހެނަސް އޭނާއާއި ދިމާއަށް އަމާޒުވެފައިވި ރާއިދްގެ ފަރުވާކުޑަ ބެލުން ފެނުމުން ދެލޯބަރައި ބާރުކޮށްލަމުން މަލްހާ އެގެއިން ނުކުތެވެ.

“ތޭންކް ގޯޑް ޝީ ލެފްޓް.” ސޯފާއަށް ވެއްޓިގަންނަމުން އުފާވެލައިފައި ލިވްޔާ ބުނެލިއެވެ. “ހެހެ ޔާ. ދެން އަހަރުމެންނަށް ހަމަޖެހިގެން އުޅެވިދާނެ. އޭނަގެ އުނދަގުލެއް ދެން ނުޖެހޭނު.” ލިވްޔާ ގާތުގައި އިނށީދެލަމުން އެހަށިގަނޑުގައި ކުޑަކޮށް ބައްދައިލުމަށްފަހު ރާއިދް ބުނެލިއެވެ.

“އަހަރެން ހިއެއްނުސްކުރަން ރާދު އަސްލު އޭނަ ވަރިކޮށްފާނެ ކަމަކަށް. އައި ވޯސް ޝޮކްޑް.” ރާއިދްގެ މޫނުގައި ލޯބިން ފިރުމައިލަމުން ހިތްހަމަޖެހިފައި ލިވްޔާ ބުނެލިގޮތުން ރާއިދް ހިނިތުންވެލިއެވެ. “ލިވީ އަބަދުވެސް ޝަކުވާކުރަމެއްނު ހަމައެކަނި ލިވީގެ މީހަކަށް އަހަރެން ނުވެގެން. ސޯ ހިއަރ އައި އެމް. އޮންލީ ޔުއާރސް. އެހެންނޫނަސް އޭނައާއި އިނދެގެންހުރެ އަހަރެމެން ކިހިނެއް މެރީ ކުރާނީ ދޯ. ސޯ އައި ކްލިއާރޑް ދަ ވޭ. ހެޕީތަ މައި ޕްރިންސެސް؟” ލިވްޔާގެ މޫނުގައި ބޮސްދެމުން ލޯބީގެ ރާގަކަށް ރާއިދް އަހައިލިއެވެ. “މާ ބޮޑަށްވެސް. ހެހެ.” ދެމީހުންގެ ހުނުމުގެއަޑު ސިޓިންގްރޫމް ތެރެއަށް ފެތުރިގެންދިޔައެވެ. މަލްހާ އެދިރިއުޅުމުން ފޮނުވައިލެވުމުން އެމީހުންތިބީ ހިތްހަމަޖެހިފައެވެ.

** ** **

އީނާލް މަލްހާ ގޮވައިގެންއައީ ޝަމްއަލްގެ ގެއަށެވެ. ޝަމްއަލްގެ މައިންބަފައިން މަލްހާއަށް މަރުހަބާކީ ލޯތްބާއެކީއެވެ. އެތައް ހިތްވަރެއް ކޮންމެ މީހެއްގެ ފަރާތުން މަލްހާއަށް ލިބެމުންދިޔައެވެ.

ފާއިޒާގެ ފަރާތުން ލިބެމުންދިޔަ ލޯތްބާއި އޯގާތެރިކަމުގެ ސަބަބުން މަލްހާ އާބިދާމަތިން ހަނދާންވާން ފެށިއެވެ. މަންމަގެ ލޯތްބާއި ކުލުނަށް އެހިތްއެދި ރޮމުންދިޔައެވެ. މިފަދަ ހިތްދަތި ވަގުތުތަކުގައި ކޮންމެމީހަކުވެސް އެންމެ ހަނދާންވަނީ އެމީހެއްގެ މައިމީހާ މަތިންނެވެ. އަތުގައިއޮތް ފޯނަށް މަލްހާއަށް ބަލައިލެވުނެވެ. ރަށަށް ދިޔައީއްސުރެ އާބިދާއާއި ސަލީމްކުރެ އެކަކުވެސް އޭނާއަށް ގުޅައިލައިފައެއް ނުވެއެވެ. ހިތުގައި ޝަކުވާ އުފެދުނު ނަމަވެސް އާބިދާއަށް ގުޅައިލަން މަލްހާ ބޭނުންވިއެވެ.

މަތީބައިގައި ހުސްކޮށްހުރި ކޮޓަރިއަށް އީނާލް މަލްހާ ގޮވައިގެން ދިޔައެވެ. އޭރު ޝަމްއަލްވަނީ މަލްހާގެ ފަށި އެކޮޓިރިއަށް ގެންގޮސްފައެވެ.

“ދެން ކަންކަމާ ދޭތެރޭ ވިސްނުންހުއްޓައިލުމަށްފަހުދޭ ފެންވަރައި ތާޒާވެލައިގެން ކާން އަންނަން. އަހަރެން އަންނާނަން އެއިރަށްވާއިރަށް ޒީވާންއަށް އެއްޗެއް ކާންދީފަ.” ހިނިތުންވެލަމުން އީނާލް ބުނެލިއެވެ. “ނާލް. އަހަރެންނަކަށް ނޭނގެ ނާލްގެ މިއިހުސާންތެރިކަމަށް ޝުކުރުވެރިވާނެ ގޮތެއްވެސް. އަހަރެން..” މަލްހާގެ ޖުމުލަ ފުރިހަމަކުރިއަކަ އީނާލް ނުދިނެވެ.

“އަހަރެން ހާދަ ދުރެއްތިކޮށްލީ. މަލް ބުނީމެއްނު މަލް އަހަރެންދެކެނީ ކޮއްކޮއެއް ގޮތަށޭ. ދެން ކީއްވެ ތިހައި ދުރުކޮށްލީ ކުއްލިއަކަށް.” ދެރަވެފައި އީނާލް ބުނެލިގޮތުން އެހެންބުނެވުނަތީ މަލްހާވެސް ދެރަވިއެވެ. “ސޮރީ ނާލް. އަހަރެން އެހެންބުނި އެއްޗެއްނޫން.” ވަގުތުން މަލްހާ މައާފަށް އެދުނެވެ. ހިނިތުންވެލަމުން ކަމެއްނޫނޭ ބުނުމަށްފަހު މަލްހާ ތާޒާވެލަން ފުރުސަތުދެމުން އީނާލް ކޮޓަރިން ނުކުތެވެ. އެއާއެކު އެނދުގެ އެއްފަރާތުގައި އިނށީދެލަމުން މަލްހާ ފޯނަށް ބަލައިލުމަށްފަހު އާބިދާގެ ނަމްބަރަށް ގުޅައިލިއެވެ. އަވަސްވެފައިވާ ހިތަކާއެކު މަލްހާ އިންތިޒާރުކުރަމުންދިޔައީ އާބިދާ ފޯނު ނަގާނެ ވަގުތަކަށެވެ.

“މަންމާ.” އާބިދާ ފޯނުނެގުމާއެކު އުފާވެލައިފައި މަލްހާ ގޮވައިލިއެވެ. “ހޫން. ކިހިނެއްވީ؟” ރުންކުރު ފާޑަކަށް އާބިދާ ބުނެލިގޮތުން މަލްހާގެ މޫނުމަތީގައިވި ހިނުތުންވުމާއި އުފާވެރިކަން ފިލައިގެންދިޔައެވެ. “މަންމާ ހެޔޮނުވާނެ އަހަރެންނާ ތިހެން ވާހަކަ ނުދައްކަބަލަ. އަހަރެންގެ ކޮންކުށެއްތަ އޮތީ؟” ހިތުޖެހިފައި މަލްހާ އަހައިލިއެވެ. “ނޭނގެ އަހަރެންނަކަށް.” ދެންވެސް އާބިދާ ދިނީ ރުންކުރު ޖަވާބެކެވެ. ފުންނޭވާއެއްލަމުން މަލްހާ ހަމަޖެހެން މަސައްކަތްކުރަމުން ދިޔައެވެ.

“މަންމާ. ރާދު. ރާދު.. އަހަރެން.. އަހަރެން ވަރިކޮށްފި.” އާބިދާގެ ފަރާތުން ކުޑަނަމަވެސް އޯގާތެރިކަމެއް ލިބޭނެކަމުގެ އުއްމީދުގައި ވަރަށް ހިތްވަރުކޮށްފައި މަލްހާ ބުނެލިއެވެ. އެއާއެކު އިރުކޮޅެއްގެ ހިމޭންކަމެއް އެދެމެދަށް އައެވެ. މިފަހަރު އާބިދާ ލޯބިން މަލްހާއާއި ވާހަކަދައްކާނެކަމަށް އޭނާ ހީކުރިއެވެ. އެހެނަަސް ކަންތައްވީ އޭނާ ހީކުރިގޮތާ މުޅިން ޚިލާފަށެވެ.

“އެހެންނުވާނީ ކަލެއަށް މީހަކު ބުނާގޮތް ނުހެދެންޏާ. އަހަރެން ކިހައި ވަރަކަށް ވިސްނައިދިނިން. އެކަމަކު ކަލެއަކަށް އަޑެއްނީވުނުވިއްޔަ. އެހެން..” އާބިދާގެ ވާހަކަ އެހިސާބަށް ދިޔަަތަނާ ކެތްނުވެގެން މަލްހާ ފޯނުކަނޑައިލިއެވެ. ވާވަރަށް އާބިދާގެ ރުޅިވެރި ބަސްތަކާ އޭނާއަށް ކުރިމަތިލެވިއްޖެއެވެ. އެއިން އެކަކުގެ ހިތުގައިވެސް އޭނާއާމެދުގައި ކުލުނެއް ނުވަނީހެއްޔެވެ؟ އާާބިދާއާއި ސަލީމްގެ ނުރުހުން ހައްގުވާން އޭނާކުރީވެސް ފަހެ ކޮންކުށެއްހެއްޔެވެ؟ މަލްހާއަކަށް ނުވިސްނުނެވެ.

ދެލޯމަރައިލަމުން ހަމަޖެހިލުމަށްފަހު މަލްހާ އިންތަނުން ތެދުވިއެވެ. އަދި ލަސްފިޔަވަޅުތަކެއްގައިގޮސް ކުޑަދޮރުކައިރީގަައި ހުއްޓިލިއެވެ. އެސްފިޔަތައް އުފުލައިލަމުން ކަޅުސާލެއް އޮޅައިލައިގެންވި އުޑާދިމާއަށް މަލްހާ ބަލައިލިއެވެ. ކުދި ޖަވާހިރުތަކެއްފަދައިން ވިދައި ބަބުޅަމުންދިޔަ ތަރިތަކަށް މަލްހާގެ ނަޒަރު ހުއްޓުނެވެ. އެވަގުތު ޢަލީ ބިން އަބީ ޠާލިބް ރަޟިޔަ ﷲ ޢަންހު ވިދާޅުވެފައިވާ ބަސްފުޅެއް މަލްހާގެ ހަނދާނަށް އައެވެ. “ޑޯންޓް ލެޓް ޔުއަރ ޑިފިކަލިޓީސް ފިލް ޔޫ ވިތް އެންޒައިޓީ.. އާރފްޓާރއޯލް އިޓް އިޒް އޮންލީ އިން ދި ޑާރކެސްޓް ނައިޓްސް ދެޓް ސްޓާރސް ޝައިން މޯ ބްރައިޓްލީ..” އެހެން ހިތަށް އެރުމާއެކު މަލްހާއަށް ދެލޯމަރައިލެވުނެވެ. އެބަސްކޮޅުން ހިތްވަރު ލިބިގަންނަމުން މަލްހާ ލުއި ގޮތަކަށް ހިނިތުންވެލީ އޭގެ ފޮރުވިފައިވާ މާނަ ވިސްނުނުފަދައިންނެވެ.