ތަޤްދީރު (19)

އެއްފައްޗަކަށް އޭނާ ބުނަންބޭނުންވާ ހުރިހައި އެއްޗެއް ބުނުމަށްފަހު ލިވްޔާއަށް ވާހަކަދައްކާނޭ ފުރުސަތެއްވެސް ދިނުމެއްނެތި ހީނާ މަލްހާގެ ކޮޓަރިއާއި ދިމާއަށް ހިނގައިގަތެވެ. ބުނާނެ އެއްޗެއް ނޭނގި ހުއްޓުން އަރައިފައި ލިވްޔާއަށް ހުރެވުނީއެވެ.

ހީނާ ދިޔަދިމާއަށް ލިވްޔާ ބަލައިލިއެވެ. ފުންނޭވާއެއްލަމުން ކާކޮޓަރިއަށް ވަނުމެއްވެސްނެތި އޭނާ އޭނާގެ ކޮޓަރިއާއިނދިމާއަށް ހިނގައިގަތީ ވީފޫއްސެއްގެ ބޮޑުކަމުންނެވެ. އޭނާގެ އުޅުމަށް ގޮތްފާޑުކިޔަން ހީނާ އެއީ ކާކު ހެއްޔެވެ؟ އޭނާގެ މައިންބަފައިން ނުކުރިކަމެއް އެހެންމީހަކުވެސް ކުރާކަށް ނުޖެހެއެވެ. ކުޑަހިނދުކޮޅެއްގެެ ތެރޭގައި އޭނާގެ ސިކުނޑިން ހީނާ ކީހުރިހައި އެއްޗެއް ފުހެވިގެން ދިޔައެވެ. ކޮޓަރިއަށްވަދެ އެނދުމައްޗަށް ވެއްޓިގަންނަމުން ރާއިދަށް މެސެޖްކޮށްލުމަށްފަހު ލިވްޔާ ދެލޯމަރައިލީ ނިދައިލުމުގެ ބޭނުމުގައެވެ.

** ** **

ދަންވަރުގެ ހަމަހިމޭންވަގުތެވެ. ނުނިދިފައި އެނދުމަތީގައި ދެފަރާތަށް ފުރޮޅިލައި ފުރޮޅިލައި މަލްހާ އޮތީ ބޭރުން އިވެމުންދިޔަ އަޑުތަކަށް ސަމާލުވެގެންނެވެ. އެއަޑުތައް އަހަން ކިތަންމެ ބޭނުންނޫނަސް އެހެނީއެވެ. ހިތަށް ތަދުވިނަމަވެސްއެވެ. މަލްހާއަށް ދެލޯ މަރައިބާރުކޮށްލެވުނެވެ.

ސިޓިންގްރޫމްގައިތިބެ ހީސަކަރާތްޖަހަމުންދިޔަ ރާއިދާއި ލިވްޔާގެ އަޑު ކިތަންމެހައި ރީތިކޮށްވެސް ނުނިދިފައިއޮތް މަލްހާއަށް އިވެމުންދިޔައެވެ. އެއާއެކު އޭނާއަށް ހިންދިރުވައިލެވުނެވެ. އެއުފާ އޭނާވެސް ބޭނުންވެއެވެ. އެހެނަސް ކުރާނީ ފަހެ ކީއްހެއްޔެވެ؟ އެގޮތަށް އޭނާގެ ހަޔާތް ބަރުބާދުކޮށްލުމަށްފަހު ލިވްޔާއަށް އުޅެންކެރޭތީވެސް މަލްހާ ހައިރާންވެއެވެ.

އެކިކަހަލަ ނޭދެވޭ ޚިޔާލުތަކުން ސިކުނޑި ތޮއްޖެހެން ފެށުމުން މަލްހާ ނިތުގައި އަތްބާވައިލަމުން ހަމަޖެހެން މަސައްކަތްކުރަމުންދިޔައެވެ. ނަމަވެސް ދެލޯފުރި ހޫނު ކަރުނަތިކިތައް ބަންޑުންވާންފެށީ އޭނާގެ އިޚުތިޔާރުން ބޭރުގައެވެ. ކެތްކުރެވޭނެ އެންމެ މައްޗަކަށް ކެތްކުރަން އޭނާ ބޭނުންވެއެވެ. އޭނާގެ ލޯބިވާ ދަރިފުޅުގެ ހައްގުގައެެވެ.

ގަދަކަމުން ލޮލުން އޮހޮރެމުންދިޔަ ކަރުނަތައް ފުހެލުމަށްފަހު މަލްހާ ބާލީސްދަށުގައި އޮތް ފޯނުނަގައި ބަލައިލިއެވެ. އަދި އަންލޮކް ކޮށްލަމުން ފޯނުން ގުރުއާން ޖަހަންފެށީ އެހިތަށް ހަމަޖެހުމެއްހޯދައި ދިނުމުގެ ބޭނުމުގައެވެ. ކަންތައްވީވެސް މަލްހާ ބޭނުންވިގޮތަށެވެ. އިވެންފެށި ކީރިތި ޤުރުއާނުގެ މާތް ކަލިމަތަކާއެކު ހުރިހައި ނޭދެވޭ ޚިޔާކުތަކެއް އެސިކުނޑިން ނުކުމެގެންދިޔައީ އޭނާ ހީވެސްނުކުރާހައި އަވަހަށެވެ. ހަމަޖެހުމުގެ ނޭވައެއްލަމުން މަލްހާއަށް ދެލޯމަރައިލެވުނެވެ. އޭރު ލުއި ހިނިތުންވުމެއް އެތުންފަތްމަތީގައި ރަސްކަންކުރަމުން ދިޔައެވެ.

** ** **

އޮފީސް ނިންމައިލުމަށްފަހު ޔާނިކް ގެއަށްދިޔަ މަގުމަތީގައި ޝަމްއަލްމެންގޭ ކައިރިއަށް މަޑުކޮށްލީ ގެއަށް ދިއުމުގެ ކުރިން އީނާލްގެ ހާލު ބަލައިލުމުގެ ގޮތުންނެވެ. ބެލް ޖަހައިލަމުން އޭނާ ގޭގެ ދޮރުމަތީގައި މަޑުކޮށްލިއެވެ. ގޭގައި އުޅޭ ޚާދިމަކު ދޮރުހުޅުވައިލުމުން ހިނިތުންވެލަމުން ޔާނިކް އެތެރެއަަށް ވަނުމަށްފަހު އީނާލް ކޮބައިތޯ އަހައިލިއެވެ. އެމީހާގެ ފަރާތުން ގޭގެ ފުރަގަހުގައިއޮތް ބަގީޗާގައި އީނާލް އިންކަން އިނގުމުން މަޑު ހިނގުމެއްގައި ޔާނިކް އެދިމާއަށް މިސްރާބުޖެހިއެެވެ.

ގޭގެ ފުރަގަހުގައިހުރި ދޮރުން ނުކުތުމާއެކު ދުވާލި މާމަލުގެ މީރުވަހުން ޔާނިކްއަށް ދެލޯމަރައިލަމުން ނޭފަތްއެތެރެއަށް ދަމައިލެވުނެވެ. ހިތްހަމަޖެހިފައި ލައިގެންހުރި ފަޓުލޫނުގެ ދެޖީބަށް އަތްޖަހައިލަމުން ޔާނިކް ހިނގައިގަތެވެ. ބަގީޗާގައި ހަދައިފައިވާ ކުޑަ ސިމެންތި ގޮނޑިއެއްގައި އިނށީދެލައިގެން މަލަކުން ވަސްބަލަން އީނާލް އިނެވެ. އޭނާއިނީ ޔާނިކާއި ފުރަގަސްވާގޮތަށްކަމުން ފަހަތުން އައި ޔާނިކްއެއް އީނާލަކަށް ނުފެނެއެވެ. މަޑުހިނގުމެއްގައި އައި ޔާނިކް ކުޑަކުޑަކޮށް ގުދުވެލަމުން އީނާލް ސިއްސުވައިލިއެވެ. ސިހިފައި ފަހަތްބަލައިލި އީނާލްގެ ލޮލުން ފައިބަމުންދިޔަ ކަރުނަތަކުން ޔާނިކްގެ ހިތްގުޑައިލިއެވެ. އޭނާގެ ކޮއްކޮ ރޮއްވައިލީ ކާކުހެއްޔެވެ؟ ވަގުތުން ޔާނިކްގެ ބުމަގޮށްޖެހި އެމޫނުމަތީގައިވި ހިނިތުންވުން ފިލައިގެން ދިޔައެވެ.

ސިއްސައިގެން ދިޔަވަރުން ލޮލުން ފައިބަމުންދިޔަ ކަރުނަތައް ފުހެލަންވެސް އީނާލް ހަނދާންނެތުނީއެވެ. ފާޑަކަށް އޭނާއާއި ދިމާއަށް ބަލަންހުރި ޔާނިކްފެނުމުން އަވަސް އަވަހަށް އީނާލް ކަރުނަތައް ފުހެލަމުން ހިނިތުންވެލިއެވެ.

“ދޮންބެ. ކޮންއިރަކު އައީ؟ ކީއްވެ ކޮޅަށް ތިހުރީ؟ އިނށީދޭ.” ޔާނިކްއާއި ދިމާއަށް ބަލައިލަމުން އޭނާގެ ގާތުގައި ހުސްކޮށްހުރި ޖާގަ ދައްކައިލުމަށްފަހު އީނާލް ބުނެލިއެވެ.

“ކިހިނެއްވީ ނާލް؟ ކީއްވެ ތިރޮނީ؟ މީހަކު އެއްޗެކޭ ބުނީތަ؟” އީނާލްގެ ސުވާލުތަކަށް ޖަވާބުދިނުން ޔާނިކްއަށް އެހައި މުހިންމުކަމަށް ނުވިއެވެ. އެއަށްވުރެ ބޮޑަށް އޭނާހުރީ އީނާލް ރޯތަންފެނުމުން ކަންބޮޑުވެފައެވެ. އީނާލް ގާތުގައި އިނށީދެލަމުން ޔާނިކް އީނާލްގެ ކޮލުގައި ލޯތްބާއެކި ފިރުމައިލިއެވެ. އޭރުވެސް ކަރުނައިގެ އަސަރު އެކޯތާފަތްމަތިން ކޮންމެވެސް ވަރަކަށް ފާޅުވަމުންދިޔައެވެ.

“ނޫން.” ހަމައެކަނި އެހެންބުނެލަމުން އީނާލް އަތުގައިއޮތް މަލުން ވަސްބަލައިލިއެވެ. އިރުކޮޅަކު އީނާލްގެ މޫނަށް ބަލަން އިނުމަށްފަހު ޔާނިކް އަނެއްކާވެސް އެސުވާލުތައް ތަކުރާރުކޮށްލިއެވެ.

“މަލް. މަލް އުޅޭ ހާލާމެދު ވިސްނައިލައިފައި އަޅުގަނޑަށް ކެތްނުވީ.” އީނާލްގެ ދުލުން މަލްހާގެ ނަން އިވުމާއެކު ތެޅިގަންނަމުން ކިހިނެއްވީހޭ ޔާނިކްއަށް އަހައިލެވުނެވެ. ކިތަންމެ ރަނގަޅަކަށްވެސް ޔާނިކްއަށްވީގޮތް އީނާލްއަށް ފެނުނެވެ. ސުވާލުގެ ނަޒަރަކުން ޔާނިކްގެ މޫނަށް ބަލައިލުމަށްފަހު އީނާލް ދުރަށް ނަޒަރު ހުއްޓައިލިއެވެ.

“ނާލް ބުނެބަލަ. މަލްއަށް ކިހިނެއްތަވީ؟” ހާސްވެފައި ޔާނިކް އަހައިލިއެވެ. އޮފީހުގައިވެސް މަލްހާ އިންނަގޮތްފެނި އެހިތަށް ހާދަހައި ތަދެއްވެއެވެ. ނަމަވެސް އޭނާ ވަކިކުރާނީވެސް ކީއްހެއްޔެވެ؟

ފުންނަޒަރަކުން ޔާނިކްގެ މޫނަށް ބަލައިލަމުން އީނާލް ކުރިންދުވަހު މަލްހާއާއި ދިމާވެގެން އޭނާ ކިޔައިދިން ހުރިހައި ވާހަކައެއް ޔާނިކްއަށް ކިޔައިދިނެވެ. އޭނާއަށްވެސްވީ ހަމަ އެހެންމީހުނަަށް ވާވަރެވެ. ނަމަވެސް ކުޑަހިނދުކޮޅަކަށްފަހު ޔާނިކްގެ އަތް މުށްކެވިގެންދިޔައެވެ. ރުޅިއައިސް ރަތްވެފައި އޭނާ ދަތްކުނޑިވިކައިގަތެވެ.

“ކީކޭ ދެން ކިޔާނީ؟ ދަރިއަކު ލިބުނީމަވެސް އެވައްތަރަށްވިއްޔަ އުޅެންވަނީ؟ މަލްގެ ކޮންކުށެއްތައޮތީ؟ އޭނާއަށް އެހެންހަދަން ހެޔޮވެސްނުވާނެ. މަލް ކިހައި ދެރަވާނެ. ކިހައި ކަރުނައެއް އަޅާނެ. އެވެސް އެކަނިމައި އެކަނި. އައި ވިޝް.. އައި ވިޝް އައި ކުޑް މޭކް ހާރ ހެޕީ. ފޯއެވަރ..” އީނާލްގެ ވާހަކަތަކުން އަމިއްލަ ދުނިޔެއަކަށް ގެނބިގެންދިޔަ ޔާނިކް ކުޑަހިނދުކޮޅަކަށް އޭނާ ގާތުގައި އީނާލް އިންކަންވެސް ހަނދާންނެތިގެން ދިޔައެވެ. ޔާނިކްގެ ދެލޮލުން އޮހޮރެމުންދިޔަ ކަރުނަތައް ހިމަރޮނގެއްހެން އެކޯތާފަތުގައި ބޮސްދީފައި ތިރިއަށް ފައިބަމުންދިޔަ މަންޒަރުބަލަން އީނާލަށް އިނދެވުނީ ބަސްހުއްޓިފައެވެ. ޔާނިކްގެ ފަރާތުން ފެންނަމުންދިޔަ އަމަލުތަކުން އޭނާ މުޅިން ހައިރާންވެއްޖެއެވެ. މަލްހާއަށްޓަކައި ޔާނިކް އެހައި ދެރަވަނީ ކީއްވެހެއްޔެވެ؟ ޔާނިކްއަކީ ދުވަހަކުވެސް އަންހެންޖުއްޖެއްގެ ވާހަކައަކަށް އެހައި ޝައުގުވެރިވި މީހެއްނޫނެވެ. ދެން ކުއްލިއަކަށް ކީއްވެބާވައެވެ؟ މަލްހާ އެއީ ޔާނިކްގެ ކާކު.. އެހިސާބަށް ވިސްނައިލެވުނުތަނާ އީނާލްގެ ބޮލުގައި ހީވީ މީހަކު ބާރު އެތިފަހަރަކުން ޖެހިހެންނެވެ. މަލްހާއާއި މަގުމަތިން ދިމާވި އެންމެ ފުރަތަމަރޭގައި ޔާނިކްގެ އަމަލުތައްހުރިގޮތް އީނާލްގެ ދެލޯކުރިމަތިން ސިފަވިކަހަލައެވެ. އެރޭ ރޮއިރޮއިފައި ޔާނިކް ދެއްކި ވާހަކަތައް އޭނާގެ ކަންފަތްބުޑުގައި ގުގުމައިގަތެވެ. އެއްޗެއް ވިސްނުނުފަދައިން ދެލޯބޮޑުކޮށްލަމުން އީނާލް ޔާނިކްއާއި ދިމާއަށް ބަލައިލިއެވެ.

“މަލް އެއީ މީހެއްގެ އަންބެއް. ކުއްޖެއްގެ މަންމައެއް.. އަނެއްކާ ދޮންބެ ލޯބިވާ ކުއްޖަކީ މަލް ބާ؟” އީނާލްއަށް ވިސްނައިލެވުނެވެ. އެރޭގައި އޭނާގެ ހައްގަކަށް އެއަންހެންކުއްޖާާ ނުވާނޭ ކިޔައިފައި ޔާނިކް ބުނި ބަސްތަކަކީ އެއީއެވެ. ދެފަރާތަށް ބޯހޫރުވައިލަމުން އީނާލް ޔާނިކްއާއި ދިމާއަށް އަނެއްކާވެސް ނަޒަރު ހުއްޓައިލިއެވެ.

“ދޮންބެ ލޯބިވާ ކުއްޖަކީ މަލް ދޯ؟” ފާޑަކަށް ޔާނިކްއާއި ދިމާއަށް ބަލަންއިނދެ އީނާލް އަހައިލިއެވެ. އީނާލްގެ ސުވާލުން ޔާނިކްއަށް ހަމަބިމަށް އާދެވުނުފަދައެވެ. ސިހިފައި ދެލޯބޮޑުކޮށްލަމުން އީނާލްގެ މޫނަށް ބަލައިލީ މީހަކު ވަށްކަމެއްކުރަން އުޅުމުން އަތުލައިގަތް އުސޫލުންނެވެ. ހިންދިރުވައިލަމުން ޔާނިކް ދުރަށް ބަލަންފެށީ ދޭނެ ޖަވާބެއް ނޭނގުމުންނެވެ.

ޔާނިކްގެ މޫނަށް އަރައިފޭބި ކުލަވަރު އީނާލްއަށް ނިކަން ރަނގަޅަށް ފެނުނެވެ. ހަމައެކަނި އެކުލަވަރުންވެސް އޭނާއަށް ހީވީ ރަނގަޅަށްކަން އީނާލަށް ޔަގީންވިއެވެ. އެހެނަސް އޭނާ ބޭނުންވީ ސީދާ ޔާނިކްގެ ދުލުން އެހަގީގަތް އަޑުއަހާށެވެ. ޔާނިކްއަކީ ދުވަހަކުވެސް ދޮގިހެދިމީހެއްނޫންކަމުން މިފަހަރުވެސް ތެދަށް ބުނުންނޫން އެހެންގޮތެއް އޭނާއަށް ނެތްކަން އީނާލަށް ވިސްނުނެވެ.

“ދޮންބޭ. އަޅުގަނޑުގެ މިސުވާލަށް ތެދުތެދަށް ޖަވާބުދީބަލަ.” ޔާނިކްގެ އަތުގައިހިފައި ތަޅުވައިލަމުން އީނާލް އާދޭހުގެ ރާގަކަށް ބުނެލިއެވެ. ނަމަވެސް ޔާނިކް ހަމައެއިންގޮތަށް އިނީއެވެ. ދޭނެ ވަކި ޖަވާބެއް ނުވިސްނިފައެވެ.

“ދޮންބެ ނުބުންޏަަސް މިހާރު އަޅުގަނޑަށް ޔަގީންވެއްޖެ ދޮންބެގެ ހިތުގަ ޚާއްސަ މަގާމެއް ދެވިފައި އޮތް ކުއްޖަކީ މަލްކަން. އެހެއްނު.” ޔަގީންވި ނަމަވެސް އީނާލް ބޭނުންވަނީ ޔާނިކްގެ ދުލުން އެހެންބުނާއަޑު އަހާށެވެ.

“ހޫމް. މަލް.. މަލް އެންމެ ފުރަތަމަ ފެނުނު ދުވަހުން ފެށިގެންވެސް ދޮންބެއަށް ލޯބިވެވުނު. އޭރު ނޭނގެ އެއީ މީހެއްގެ އަންބެއްކަމެއް. އެކަމަކު.. އެކަން އިނގުނުދުވަހުން ފެށިގެން މަލްއާ ދުރުވާން ދޮންބެ މަސައްކަތްކުރިން. ކާމިޔާބު ނުވިނަމަވެސް އެހަޔާތާއި ވީހައިވެސް ދުރުންއުޅޭން ދޮންބެ ބޭނުންވީ. މިހިތަށް ތަދުވޭ މަލް އެއުޅޭހާލު އިނގުނީމަ. ހިތަށް އަރާ އެކަމުގައި ދޮންބެއަށް އެހީއެއްވެވޭނެ ނަމައޭ. އަބަދު ދެރަވެފަ ހުންނަތަން ފެންނަނީ. މަލް އެގޮތަށް ފެންނާތީ ދޮންބެގެ މިހިތަށްވެސް ހަމަޖެހުމެއް ނުލިބޭ. ހާދަ ދުޢާއެއް ކުރަމޭ އެނިކަމެތި އަންހެންކުއްޖާއަަށް އަބަދުވެސް ހެޔޮގޮތްވުމަށްއެދި. އިންޝާ ﷲ ދޮންބެގެ ދުޢާތަށް ﷲ އިޖާބަކޮށްދެއްވާނެ. އައި ޖަސްޓް ވޯންޓް ސީ ހާރ ހެޕީ.” އެއްފަރާތަކަށް ނަޒަރު ހުއްޓައިގެންއިނދެ ޔާނިކް ބުނެލިއެވެ. ކުރުނުކޮށް އީނާލް އާދޭސްކުރަންފެށުމުން ހަގީގަތް ހާމަނުކޮށް ޔާނިކްގެ ހިތަށް ކެތްނުވީއެވެ. ލައްކަދުވަހު އެލޯބި މުޅި ދުނިޔެއަށް ސިއްރުކޮށްގެން އޭނާ ކެތްކޮށްފިއެވެ. ދެންއިތުރަށް އެހަށިގަނޑުގައި އެހިތްވަރުހުރިހެެނެއް ހިއެއްނުވެއެވެ. ހިތުގެ އުދާސްތައް އެހެންމީހަކާއި ހިއްސާކޮށްލެވުމުން ޔާނިކްއަށް ބަޔާންކުރަންދަތި ހަމަޖެހުމެއް ލިބުނެވެ.

ޔާނިކްގެ ވާހަކަތައް ކަނުލައި އަޑުއަހަން އީނާލްއިނީ ބުނާނެ އެއްޗެއް ނޭނގިފައެވެ. އޭނާގެ ދޮންބެ ހާދަހައި ކެތްތެރިއެވެ. އެކެތްތެރިކަމުގެ ފޮނިކަން ދޮންބެއަށް ކޮންމެވެސް ދުވަހުން ﷲ ދެއްވާނެއެވެ.

“ﷲ ގެ އިރާދަފުޅުން ދޮންބެގެ ކޮންމެ ދުޢާއެއްވެސް އިޖާބަވާނެ. ކެތްތެރިކަމާއެކު އެކަލާނގެއަށް އަދިވެސް ދުޢާކުރޭ.” ހިނިތުންވެލަމުން ޔާނިކްގެ ކޮނޑުގައި އަތުން މަޑުމަޑުން ޖަހައިލަމުން އީނާލް ހިތްވަރުދިނެވެ. ކޮންމެވެސް އެއްދުވަހަކުން ދޮންބެގެ އެލޯބި ކާމިޔާބުވާތަން ދެކެން އޭނާގެ ހިތްވެސް އެދެއެވެ. އޭނާގެ ލޯބިވާ ދޮންބެއަށްޓަކައި އޭނާވެސް ދުޢާކުރާނެއެވެ.

** ** **

އޮފީސް ނިންމައިލުމަށްފަހު މަލްހާ ގެއަށްދާން ނުކުތެވެ. މަގުގެ އެއްފަރާތުން މަލްހާ ހިނގަމުންދިޔައިރު އޭނާއާއި ދިމާއަށް ބައެއްމީހުންގެ ނަޒަރުތައް ހުއްޓެމުންދިޔައެވެ. މިހާރު އެއީ ކޮންމެ ދުވަހެއްގެވެސް އާދައެވެ. ލިވްޔާ ދެވަނަފަހަރަށް މާލެ އައުމަށްފަހު އެންމެ ދުވަހަކުވެސް ރާއިދް އޭނާ ގޮވައިގެން އަދި ބަލައިވެސް އޮފީހަކަށް ނާދެއެވެ. ހިތަށް ތަދުވިއެއްކަމަކު މަލްހާ ޝަކުވާއެއް ނުކުރެއެވެ. ކެތްތެރިވެލައިގެން އެކަމާވެސް ކުރިމަތިލީއެވެ. މަލްހާއަށް ނޭނގުނެއްކަމަކު ކޮންމެ ދުވަހަކު މަލްހާ ގެއަށްދާ މަންޒަރުބަލަން ޔާނިކް ހުރެއެވެ. ކިތަންމެ ދުވަހަކު މަލްހާގެ ގާތުގައި އޭނާއާއި އެއްކޮށް ކާރުގައި ގެއަށް ދިއުމަށް ބުނަން އެހިތް އެދެއެވެ. އެހެނަސް މަލްހާ ވިސްނާނެ އެއްޗެއް ނޭނގޭތީ އަހަންނުކެރިފައި ޔާނިކްއަަށް ހުރެވެނީއެވެ. ކޮންމެގޮތެއްވިއަސް ހެޔޮކަމަށް މިއަދު މަލްހާގެ ގާތުގައި އޭނާއާއި އެއްކޮށް އައުމަށް ބުނަން ޔާނިކް ނިންމީ އިތުރަށް އެމަންޒަރުބަލަން އޭނާއަށް ކެތްނުވުމުންނެވެ.

ކުއްލިއަކަށް އޭނާގެ ގާތަށް އައިސް މަޑުކޮށްލި ކާރަށް މަލްހާ ބަލައިލީ ހައިރާންކަމާއެކުއެވެ. އެއީ ޔާނިކްގެ ކާރުކަން އެނގުމުން އޭނާގެ ހައިރާންކަން އިތުރުވިއެވެ. ކާރުގެ ކުރީ ޝީޓްގެ ދޮރު ހުޅުވައިލަމުން ޔާނިކް އެތަނަށް ފޭބިއެވެ. އަދި އިސްޖަހައިލަމުން ސަލާމް ގޮވައިލިއެވެ. މަލްހާވެސް އިސްޖަހައިލަމުން ސަލާމް ބަލައިގަތެވެ.

“އޫމް. ކޮންމެ ދުވަހަކު އެކަނި ހިނގައިފައި އެހައިދުރަށްދާތީ ހިތަށް އެރީ މިއަދު މަލްހާ ގާތުގައި އަހަރެން ޑްރޮޕްކޮށްދީފަނޭ ބުނަން. ޔޫ އަރ މައި ޕީއޭ. ސޯ އައި ވޯންޓް މޭކް ޝުއަރ ވެދަރ ޔޫ ރީޗް ހޯމް ސޭފްލީ އޯ ނޮޓް. ހިނގާ އަހަރެންނާއެކު. މިއަދަށްފަހު ކޮންމެ ދުވަހަކުވެސް އަހަރެން ޑްރޮޕްކޮށްދޭނަން. އެންޑް ބަލައިވެސް ދާނަން. އެހައި ދުރަށް އެކަނި ތިހެން ހިނގައިފައި ދާނެކަމެއްނެތް.” ސީރިއަސް ރާގަކަށް ޔާނިކް ވާހަކަދަައްކައި ނިންމައިލިއިރު އޭނާގެ ހިތް ތެޅިފޮޅެމުންދިޔައީ މަލްހާ ދޭނެ ޖަވާބެއް ނޭނގޭތީއެވެ.

“އެކަމަކު ސަރ. އަޅުގަނޑު.. އޫމް. އިޓްސް އޯކޭ. ސަރ ނުޖެހޭނެ ކޮންމެ ދުވަހަކު ތިބުރަ އުފުލާކަށް.” ތުންފަތުގައި ދައިގަންނަމުން ހާސްވެފައި އަވަސް އަވަހަށް މަލްހާ ބުނެލިއެވެ. އެއްވެސް މީހަކަށް ބުރައަކަށްވާކަށް އޭނާ ބޭނުމެއް ނުވެއެވެ. އޭނާގެ އަމިއްލަ ހާލަށް އޭނާއަށް އުޅެވޭނެއެވެ.

“ހެހެ. ކާކު ބުނީ އަހަރެންނަށް ބުރައަކަށްވާނޭ. ތިހެން ހީނުކުރޭ. މިއީ އަހަރެން ހެޔޮހިތުން ބުނާއެއްޗެއް. މިމާލެއަކީ އެހައި ސޭފްތަނެއްނޫން އަންހެންކުއްޖަކު ތިހެން އެކަނި ދާކަށް. އެހެންވެ އަހަރެން އެހެންމިބުނީ. ދެން ހިނގާ އަވަހަށް. ޔޫ ކޭން ސިޓް ފަހަތުގަ. އަހަރެން ހުންނާނީ ކުރީގަ. އޯކޭ އެއްނު. ޕްލީޒް ޑޯންޓް ސޭ ނޯ.” މަގުގެ ދެފަރާތަށް ބަލައިލަމުން ޔާނިކް ބުނެލިއެވެ. އިރުކޮޅަކު ވިސްނަންހުރުމަށްފަހު މަލްހާ ބޯޖަހައިލިއެވެ. ޔާނިކް އެބުނީވެސް ތެދެކެވެ. މަގުމަތިން އޭނާއާއި ފޮށޭމީހުންވެސް ވަކި މަދެއްނޫނެވެ. މަލްހާ ބޯޖަހައިލުމާއެކު ހިނިތުންވެލަމުން ޔާނިކް ކާރުގެ ފަހަތު ދޮރު ހުޅުވައިލައި ދިނެވެ. މަޑުހިނގުމެއްގައިގޮސް މަލްހާ ކާރަށް އަރައި ހަމަޖެހުމުން ދޮރު ލައްޕައިލުމަށްފަހު ޔާނިކްގޮސް ކުރިއަށް އެރުމާއެކު ޑްރައިވަރު ކާރު ދުއްވައިލިއެވެ.

މަލްހާ އޭނާއާއި އެކުގައި އައުމަށް އެއްބަސްވުމުން ޔާނިކް ވަރަށް ހިތްހަމަޖެހުނެވެ. ޝީޓްގައި ލެގިލަމުން ދެލޯމަރައިލުމަށްފަހު ޔާނިކް ހިނިތުންވެލިއެވެ. މަލްހާއަށްޓަކައި އޭނާ ކޮންމެފަދަ ކަމެއްވެސް ކުރަންތައްޔާރެވެ.

މަލްހާއިނީ ޔާނިކްގެ އަމަލުތައް މިއަދު ހުރިގޮތުން ހައިރާންވެފައެވެ. އެހެންނާ ދުވަހަކުވެސް އެހައި ގާތްކޮށް ޔާނިކް އޭނާއަކާ ވާހަކައެއް ނުދައްކައެވެ. ކުއްލިއަކަށް ކިހިނެއްވީބާވައެވެ؟ މަލްހާއަކަށް ނުވިސްނުނެވެ. ނަމަވެސް ޔާނިކްގެ މިހިތްހެޔޮކަމަށް އޭނާ ޝުކުރުވެރިވެއެވެ.

ރެސްޓޯރެންޓްއެއްގެ ކުރިމަތިން ކާރު ހުރަސްކުރިވަގުތު އެތަނުން ނުކުމެ ސައިކަލާ ދިމާއަށް ހިނގަައިގަތް ލިވްޔާ އާއި ރާއިދް މަލްހާގެ ލޮލުގައި އަޅައިގަތެވެ. އެހިތަށް ހީވީ ތޫނު ޚަންޖަރެއް ހަރައިލިހެންނެވެ. މިއަދު އޭނާގެ މަގާމުގައި އެހުރީ ލިވްޔާއެވެ. އެހައި ފަސޭހައިން ރާއިދް އޭނާގެ މަތިން ހަމަ ހަނދާންނައްތައިލީ ހެއްޔެވެ؟ ލޮލަށް ޖަމާވަމުންދިޔަ ކަރުނަތައް ގަދަކަމުން މަލްހާ ދިރުވައިލީ ހިލޭ މީހެއްގެ ކުރިމަތީގައި ކަރުނައަޅައި ރޯން ބޭނުންނުވާތީއެވެ. އެއީ ދުވަހަކުވެސް އޭނާ ކުރިކަމެއް ނޫނެވެ. ތުންފަތުގައި ދަތްއަޅައިލަމުން ހުރިހައި ހިތާމައެއް ހިންދައިލަން އޭނާ މަަސައްކަތްކުރަމުން ދިޔައެވެ.

ގޭގެ ދޮރުމައްޗަށް ކާރު މަޑުކޮށްލުމާއެކު މަލްހާ ޔާނިކްއަށް ޝުކުރުވެރިވަމުން ކާރުން ފެއިބުމަށްޓަކައި ދޮރުހުޅުވައިލިއެވެ. “މާދަން ހެނދުނު ބަލައި އަންނާނަން. ބީ ރެޑީ.” ފަހަތަށް އެނބުރި ބަލައިލުމެއްނެތި އެހެން ބުންޏެއްކަމަކު އެއަޑުގައިހުރި އޯގާތެރިކަން މަލްހާއަށް އިހުސާސުވިއެވެ. ލައްބައޭބުނެ ހިނިތުންވެލަމުން މަލްހާ ކާރުން ފެއިބުމާއެކު ޑްރައިވަރ ކާރު ދުއްވައިލިއެވެ.

ލޯމައްޗަށް ކާރު ގެއްލެންދެން ބަލަންހުރުމަށްފަހު ކޮނޑުގައި އޮތްދަބަހުގައި ބާރަށް ހިފަހައްޓައިލަމުން މަލްހާ ގެއަށް ވަންނަން ހިނގައިގަތީ މާޔޫސް ވެފައިވާ ހިތަކާއެކުއެވެ.

ކޮޓަރީގައި ނިދިފައިއޮތް ޒީވާންގެ މޫނަށް އިރުކޮޅަކު ބަލަންހުރެފައި މަލްހާ ފާޚާނާއަށްވަދެ ފެންވަރައިލުމަށްފަހު ނުކުމެ ނަމާދުކޮށްލިއެވެ. އަދި ވީހައިވެސް ގިނަ ވަގުތެއް ގުރުއާން ކިޔެވުމުގައި އޭނާ ހޭދަކުރީ އެހިތަށް ހަމަޖެހުމެއް ލިބޭތޯއެވެ.

ގޭތެރެއަށް ފެތުރިފައިވާ ހަމަހިމޭންކަން ނަގައިލީ ގެއަށް ވަދެގެންއައި ލިވްޔާ އާއި ރާއިދްގެ ހުނުމުގެ އަޑުންނެވެ. އެއަޑަށް ގުރުއާން ކިޔަވަންއިން މަލްހާ ހުއްޓައިލުމަށްފަހު ކޮޓަރީގެ ދޮރާއި ދިމާއަށް ބަލައިލިއެވެ. އޭނާގެ ދުނިޔެ ހަލާކުކޮށްލުމަށްފަހު އެމީހުންގެ ދުނިޔޭގައި އެދެމީހުން ހީސަކަރާތްޖަހައި އުފާކުރަނީއެވެ. މަލްހާގެ ލޮލުން ކަރުނަ ހިލުނެވެ. އޭނާއަށް އިތުރަށް އެމަންޒަރުތައް ބަލާކަށް ކެތެއްނުވާނެއެވެ. ކެތްތެރިވެވޭތޯ އޭނާ ވަރަށް މަސައްކަތް ކޮށްފިއެވެ. އޭނާއަކީ ވެސް އިންސާނެއްވިއްޔާއެވެ. ޗާބީ ދީފައިވާ ބުދެއްނޫނެވެ. ކެތްވާނީވެސް ވަކިވަރަކަށެވެ.

ދެލޮލުން އޮހޮރެމުންދިޔަ ކަރުނަތައް އަތުގެ ނުފުށުން ފުހެލަމުން މަލްހާ ޚަތިމް ލައްޕައިލުމަށްފަހު ކޮޓަރިން ނުކުންނަން ހިނގައިގަތެވެ. މަޑުމަޑުން ދޮރުހުޅުވައިލަމުން ކޮޓަރިން ނުކުމެ ސިޓިންގް ރޫމާއި ދިމާއަށް އޭނާ ހިނގައިގަތީ އެދެމީހުންކުރާކަމެއް ބަލައިލުމުގެ ބޭނުމުގައެވެ.

ސޯފާގައި އެކަކު އަނެކަކުގެ ގައިގައި ބައްދައިލައިގެންތިބި ރާއިދާއި ލިވްޔާ މަލްހާ ފެނިލުމާއެކު ފަރުވާކުޑަ ގޮތަކަށް އޭނާ އާއި ދިމާއަށް ބަލައިލިއެވެ. އަޅައިވެސްނުލާ ރާއިދްގެ ކޮނޑުގައި ލިވްޔާ ބޯއަޅައިލައިގެންއޮތްގޮތުން މަލްހާގެ ރުޅިގަނޑު ކެކިގަތެވެ. އޭނާގެ ގޭގައި އޭނާގެ ފިރިމީހާގެ ގައިގައި އެގޮތަށް ބައްދައިގެން ހުންނަންވެސް އެއަންހެންކުއްޖާ ލަދުނުގަންނަނީ ހެއްޔެވެ؟

ލޯއަޅައިލަމުން އޭނާއާއި ދިމާއަށް ބަލައިލި މަލްހާ ފެނުމާއެކު މޫނަށް ވައްތަރެއް ޖައްސައިލަމުން ލިވްޔާ ރާއިދާއި ދުރުވެލިއެވެ. އެއާއެކު ސުވާލުގެ ނަޒަރަކުން ރާއިދް ލިވްޔާގެ މޫނަށް ބަލައިލިއެވެ. އިޝާރާތުން މަލްހާހުރިގޮތް ލިވްޔާ ރާއިދަށް ދައްކައިލިއެވެ. ހިތްހަމަނުޖެހިފައި ރާއިދް މަލްހާ އާއި ދިމާއަށް ބަލައިލިއެވެ.

“ކިހިނެއްވެފަތަ މިތާ ތިހުންނަނީ؟” ރާއިދްގެ އަޑު ގޭގައި ގުގުމައިގެން ދިޔައެވެ. “ކިހިނެއްވީ؟ މިއީ އަހަރެންވެސް އުޅޭތަން. އަހަރެން ހުއްޓަކަސް ތިދެމީހުން ބޭނުންކަމެއް ކުރެވިދާނު.” މިއަދު ރާއިދަށް އެންމެ ތަންފުކެއްވެސް ދޫކުރާން މަލްހާ ބޭނުންނުވާފަދައެވެ. އޭނާއަށް ވާވަރަށް އެދެމީހުންގެ ޑްރާމާ ބަލަން ކެތްކުރެވިއްޖެއެވެ.

“ދޭ ކޮޓަރިއަށް.” އިންތަނުން ތެދުވަމުން އެމީހުންގެ ކޮޓަރިއާއި ދިމާއަށް އިޝާރާތް ކޮށްލައިފައި ރާއިދް އަމުރުކޮށްލިއެވެ. “ނުދާނަން. އަހަރެން މިތާނގަ ހުރިއްޔާ ކީއްތަވަނީ؟” ހަރަށް ބަނދެލަމުން ހިތްވަރުކޮށްފައި މަލްހާ ބުނެލިއެވެ. މަލްހާ ވާހަކަދައްކަމުންދިޔަގޮތުން އިރެއް އިރަކަށް ރާއިދްގެ ރުޅިގަނޑު ގަދަވަމުންދިޔައެވެ.

“ކިހައިދެރަކަމެއް. ކަލޭ މިހާރު އަހަރެންގެ ކުރިމަތީގައި ޒުވާބުކުރަންވެސް ފެށީތަ؟” މަލްހާ އާއި ދިމާއަށް ލޯއަޅައިގެންހުރެ ރާއިދް އަހައިލިއެވެ. އެސުވާލަކަށް މަލްހާ ވަކިޖަވާބެއް ނުދެއެވެ. ރާއިދްގެ ރުޅި ހައްތަހައިގަދަވަމުން ދިޔައެވެ. “ކީއްވެ އެއްޗެކޭ ނުބުނީ؟ ކަލޭ ލަދެއް ނުގަނޭތަ ކަލޭގެ ފިރިމީހާ ކުރިމަތީގައި ޒުވާބުކުރާކަށް؟” މަލްހާ އެއްޗެކޭ ނުބުނުމުން އަނެއްކާވެސް ރާއިދް ބުނެލިއެވެ.

“ހެހެ. އަހަރެން ކުރިމަތީގައި އަހަރެންގެ ކޮއްކޮއާއެކު ތިހެންއުޅޭން ރާއިދް ލަދުނުގަންނައިރު އަހަރެން ކޮންލަދެއްތަ ގަންނަންވީ؟ އެހެނޫނަސް އަހަރެންނަކަށް އިހުސާސެއްނުވޭ މިހާރުތީ އަހަރެންގެ ފިރިމީހާ ކަމަކަށް. ޒީވާންގެ ބަައްޕަ ކަމަކަށް. ނަމެއްގަ ހުރީމަ ނިމުނީކީ ނޫނޭ. ކޮބާ ފިރިމީހާ އަނބިމީހާއަށް އަދާކޮށްދޭންޖެހޭ ޙައްގުތައް؟ އެހައްގުތައް އަދާކޮށްދީފަބުނޭ ތިއީ އަހަރެންގެ ފިރިމީހާއޭ. އެއިރުން މިގޮތަށް ވާހަކަދައްކަން ލަދުގަނެފާނެ.” ކުޑަކޮށްވެސް ހިތްވަރު އެލުވައިލާކަށް މަލްހާ ބޭނުމެއްނުވިއެވެ.

މަލްހާގެ ޖުމުލަތަކާއެކު ރާއިދް ހަމައިންނެއްޓިއެވެ. ބާރުހިނގުމެއްގައި އައިސް މަލްހާ އާއި އަރައި ހަމަކުރަމުން އޭނާގެ އަނގައިގައި ހިފައި ބާރަށް ފިތައިލިއެވެ. “ޚަބަރުދާރު. ކަލޭގެ ކަންތައް މާމައްޗަށް ތިދަނީ މިހާރު. ކަލެއަކަށް ނުބެހެވޭނެ އަހަރެން އުޅޭ ގޮތަކާ. އަޑުއިވިއްޖެ.” ބާރަށް މަލްހާގެ އަނގައަށް ފިތައިލަމުން ރާއިދް ހަޅޭލަވައިގަތެވެ. ވީތަދުން މަލްހާގެ ލޮލުން ކަރުނަ ހިލުނެވެ.

ގަދަކަމުން ރާއިދްގެ އަތް މަލްހާ ފޮޅުވައިލިއެވެ. “ލައްކަ ދުވަހު އެއްޗެކޭ ނުބުނެ އަހަރެން ކެތްކޮށްފިން. އެކަމަކު ރާއިދް ހެދިހައިގޮތެއް ހެދިގެން އަހަރެން ނުހުންނާނަން.” ތުންފަތުގައި އަތުން ފިރުމައިލަމުން މަލްހާ ރުޅިއައިސްފައި ބުނެލިއެވެ. “ރަނގަޅު. ހުންނާނެކަމެއްވެސް ނެތް. އަހަރެން ބޭނުމެއްވެސް ނޫން ތިކަހަލަ މީހަކާއެކު އުޅޭކަށް. އެހެންވީމަ އެންމެ ރަނގަޅުވާނީވެސް އެގޮތް.” ފަޓުލޫނުގެ ދެޖީބަށް އަތްޖަހައިލަމުން މަލާމާތުގެ ހިނިތުންވުމަކާއެކު ރާއިދް ބުނެލިއެވެ. ބުނެލިޖުމުލައިގެ ފޮރުވިފައިވާ މާނަ މަލްހާއަށް ވިސްނުނުފަދައެވެ. މުޅިމީހާ އެއްކޮށް ގަނޑުވިކަހަލައެވެ. ދެލޯބޮޑުކޮށްލަމުން ގަބޫލުނުކުރެވިފައި މަލްހާ ރާއިދާއި ދިމާއަށް ބަލައިލިއެވެ. “ތިބުނީ؟” ކަންބޮޑުވެފައި މަލްހާއަށް އަހައިލެވުނީ ތުރުތުރުއަޅާ އަޑަކުންނެވެ. “ނުވިސްނުނުތަ؟.. މިބުނީ.. މަލްހާ ތިހުރީ ވަރިކޮށްފައޭ. މިއަދުންފެށިގެންތީ އަހަރެންގެ އަންބެއްނޫނޭ.” ފަހަތުގައިހުރި ލިވްޔާއަށް ބަލައިލަމުން ހިނިތުންވެލުމަށްފަހު މަލްހާއާއި ނަޒަރު ސީދާކޮށްލަމުން ރާއިދް ބުނެލިއެވެ. އެޖުމުލަތަކާއެކު މަލްހާއަށްހީވީ އޭނާގެ ވަށައިގެންވި މާހައުލު އެނބުރިގަތްހެންނެވެ. މީހަކު ބާރު އެތިފަހަރެއް އޭނާގެ ކޯތާފަތްމަތީގައި ޖެހިކަހަލަ އިހުސާސެއް ވެގެންދިޔައެވެ. ތޫނު ޚަންޖަރެއް އެހިތަށް ހަރައި ޗިސްކޮށްލިނަމަވެސް އެވަގުތު ހިތަށްވީތަދަށްވުރެ ކުޑަވާނެކަން ޔަގީނެވެ.