ކުރިން އެނގުނުނަމަ (އެކާވީސްވަނަ ބައި)

ޒީކް ދޮރުގައި ޓަކި ޖަހާލަމުން ދޮރު ހުޅުވާލިއެވެ. ހަމައެކަނި ސޯޓްބުރިއެއް ލައިގެންހުރި އަލްޔަން ފެނުމުން ހުއްޓުން އަރާގޮތްވިއެވެ. އަލްޔަންގެ ވަރުގަދަ ހަށިގަނޑާއި މަސްއަރާލާފައިވާ މުލައްދަނޑި ފެނުމުން ބުނަން އައި އެތިވެސް ހަނދާން ނެތުނު ކަހަލައެވެ.

“ޒީކް ކަމަކުތަ؟” އަލްޔަން ޓީސާޓް ގަޔަށް މަހާލިއެވެ.

“މާމަ އެބަހޯދާ. . . އަދިވެސް ނިދި ހަމަ ނުވަނީތަ؟ ގެއަށް އައީއްސުރެ ނިދަނީ ވިއްޔަ ތިޔަ” ޒީކް ހަމަޖެހިލަމުން ބުނެލިއެވެ.

“ހިނގާ” އަލްޔަން   ޒީކްގެ ކައިރިއަށް ހުއްޓެމުން ބުނެލިއެވެ. ދެމީހުން އެކުގައި ހިނގާފައިގޮސް ގޭގެ ބިއްދަށް ފަރާތަށް ނިކުތްއިރު ހަފީޒާ ޖޯލިފަތީގައި އޮށޯވެލައިގެން އޮތެވެ.

“ޒީކް ދޭބަލަ އަލްޔަން ގޮވައިގެން ހިނގާލަން… ފޫހިވާނެއެއްނު އަބަދު ގޭގަ ހުންނަން” ޒީކްއާއި އަލްޔަން އެތަނަށް ނިކުތުމުން ހަފީޒާ ބުނެލިއެވެ. ޒީކްއަށް މާމައާއި ދިމާއަށް ބަލާލެވުނީ ދާން ބޭނުން ނުވާތީއެވެ. ނަމަވެސް ޒީކްގެ މޫނުމަތީގައިވާ އަސަރުތައް ހަފީޒާއަށް ދެނެގަނެވުނު ހެނެއް ހިޔެއްނުވިއެވެ. މާމައާ ދެކޮޅު ހެދުމަކީ ޒީކް ދުވަހަކުވެސް ކޮށްފައިވާ ކަމަކަށް ނުވާތީ އަލްޔަންއާއެކުގައި ހިނގައިގަތީ މަޖުބޫރުވެފައިވާ މީހަކު ފަދައިންނެވެ.

ހަވީރުވަގުތުކަމުން މަގުތަކުމަތީގައި ހަވީރު ފިންޏަން ހިނގާލަން ނިކުމެ އުޅޭ ކުދިންތައް މަގުތައް މަތިން ފެންނަމުންދިޔައެވެ. ޒުވާން ޖިންސުއްލަތީފުންގެ ކަޅިއުކުންތައް އަލްޔަންއަށް އަމާޒުވަމުންދިޔައެވެ. ފިރިހެންކުދިންގެ ނަޒަރުތައް ޒީކްއަށް އަމާޒުވަމުންދިޔައިރު އަލްޔަންއާމެދު ހަސަދަވެރިކަމުގެ ހުޅު އެކުދިންގެ ހިތްތަކުގައި ރޯވަމުންދިޔައެވެ. ޒީކްއާ ނުހަނު ކައިރީގައި ހުރެގެން ހިނިތުންވަމުން ވާހަކަ ދައްކަމުންދިޔައިރު އެފަދަ ފުރުސަތެއް ލިބޭނެނަމައޭ ބައެއް ކުދިންގެ ހިތަށް އަރަމުންދިޔައެވެ. މަޑު ހިނގުމެއްގައި ހިނގަމުންދިޔަ އަލްޔަންއާއި ޒީކް ހުއްޓުނީ އަތިރިމައްޗަށް ނުކުމެވުމުންނެވެ. ޖެހެމުންދިޔަ ފިނިފިނި ވައިރޯޅިން ހިތްތަކަށްފިނިކަން ލިއްބައިދެމުންދިޔައެވެ. ދިއްގާގަހުގެ އޮފިގަނޑެއްގެ މަތީގައި ޒީކްއަރާ ހަމަޖެހިލައިގެން އިށީނެވެ.

“ޒީކް އެބަ އަންނަން އެކޮޅަށް ގޮސްލާފަ. މިތާގަ އިންނާނަން ދޯ” އަލްޔަން އެހެން ބުނެލުމުން ޒީކް ބޯ ޖަހާލައިފިއެވެ.

ރުއާން ސައިކަލުގައި ދުއްވަމުންދިޔައީ ދިއްދޫގެ މަގުތަކުމަތީގައެވެ. ފަހަތުގައި އިން ރަހްމަތްތެރިޔާ ކިޔައިދެމުން ދިޔަ މަގުތަކުން ފަރުވާތެރިކަމާއެކީ ދުއްވަމުންދިޔައީ މަޑުމަޑުންނެވެ. އެތައް ދުވަހަކަށްފަހު އުފަން ފަސްގަނޑަށް އާދެވުމުން ކުރެވުނީ ވަރަށް ތަފާތު އިހްސާސެކެވެ. އާއިލާއާ އެއްފަސްގަޑެއްގައި މަޑުކޮށްލުމުގެ ފުރުސަތު ލިބުނު ކަމަށްޓަކައި ހިތާހިތުން ދުއާކުރެއެވެ. ރުއާންގެ މިދަތުރުގެ އެންމެ ބޮޑު އެއް މަގުސަދުކަމުގައިވަނީ އޭނާގެ ހިތުގައި މިއަދާ ހަމައަށް އައިއިރު އުފެދިފައިވާ ސުވާލުތަކުގެ ޖަވާބުހޯދުމެވެ.

“ރުއާން ކީއްކުރަންތަ އަޅެ މިރަށަށް ތިއައީ؟ ބުނެލައިގެން އުޅެބަލަ” އަހްމަދު އަހާލިއެވެ.

“ވަގުތު ޖެހުނީމަ އެނގޭނޭ. އެހެން ނޫނަސް އަދި ނުބުނެވިފައެއް ނެތެއްނު މިރަށަށް އައިފަހުން ގިނައިރުތަކެއް ވީކީ ނޫން ވިއްޔާ” ރުއާން މަޑުމަޑުން ބުނެލުމަށްފަހު އަހްމަދުމެންގޭ ކައިރިއަށް ސައިކަލް މަޑުކޮށްފިއެވެ.

އިޔާން ކޮޓަރިތެރޭގައި އިނީ ފޫހިވެފައެވެ. ކުރާނެ މާބޮޑު ކަމެއް ނެތުމުން ދުވަސް ހީވަނީ ވަރަށް ދިގުވެފައިވާހެނެވެ. ލެޕްޓޮޕް ހުޅުވާލައިގެން އާލިން ހަވާލުކުރި މަސައްކަތެއް ފަށައިގެން އުޅެއުޅެވެސް ކުރިއަށްދާގޮތް ނުވުމުން އެނދުމަތީގައި އޮށޯތީއެވެ.

“އިޔާން ދަރިފުޅާ” މިސައިބާ އެތެރެއަށް ވަންނަމުން ގޮވާލިއެވެ.

“މަންމާ ކަމަކުތަ؟” އިޔާން ތެދުވެ އެނދުގައި އިށީންނަމުން ޖަވާބުދިނެވެ.

“ދަރިފުޅަށް ކޮން ޑިޒައިނެއްތަ މިތަނުން ރީތީ” ކައިވެނީގެ ހެދުން ފަހާނެ ގޮތުގެ ނަމޫނާތަކެއް ހިފައިގެން އައިސް އިޔާންއަށް ދައްކާލިއެވެ.

“މިއަދު ކޮންކަމެއް ކޮށްލާ ދުވަހެއްތަ؟” އިޔާން މިސައިބާގެ އަތުގައިވާ ގަނޑުތަކަށް ބަލާލަމުން ބުނެލިއެވެ.

“އާލް އަންނަން ވާއިރަށް ހުރިހާ ކަމެއް ތައްޔާރުކުރަން ކަމަށް” މިސައިބާގެ އަޑުގައިވަނީ އުފާވެރިކަމެވެ.

“އާލް މެރީ ކުރަނީތަ؟ އަޅެ އަންގާވެސް ނުލާ. މަންމަވެސް ނުބުނަމެއްނު. ކޮބާތަ އެނަސީބުވެރިޔަކީ؟” އިޔާން އަވަސް އަވަހަށް އަހާލިއެވެ.

“އާލް ނުބުނޭތަ؟ އެހެން ވިއްޔާ މަންމަވެސް ނުބުނާނަން” މިސައިބާ ބުނެލިއެވެ.

“ތި ދެން އެއްވެސް ގޮތެއް ނޫނެއްނު މަންމާ” އިޔާން އެހެން ބުނެލީ ހިތްހަމަނުޖެހިފައެވެ.

“އިޔާން މި ހެދުން ރީތިތަ؟” މިސައިބާ އެތަނުން އޭނާއަށް އެންމެ ކަމުދިޔަ ހެދުމުގެ ނަމޫނާ ދައްކާލިއެވެ.

“ޔެސް މޮމް.. މިހެދުން ވަރަށް ރީތި.. ގޯލްޑް އެންޑް ވައިޓްވީމަ ވަރަށް ގުޅޭ” އިޔާން ރަނގަޅަށް ބަލާލަމުން ބުނެލިއެވެ.

“އާލް އަންނަނީ ކޮންއިރަކުންތަ؟” މިސައިބާ ހިނގައިގަތުން އިޔާން އަހާލިއެވެ.

“ނޭނގެ ބުނާކަށް. ހަމަ ޔަގީނުންވެސް ޔުނިވަސިޓީގެ ކިޔެވުން ފެށެން ވާއިރަށް އަންނާނެ” މިސައިބާ އެހެން ބުނުމަށްފަހު ހިނގައްޖެއެވެ.

“ހާދަ ދުވަހަކަށް އިންތިޒާރުކުރަން ޖެހޭނެއޭ އާލްގެ ހޮވުން ބަލާލަން. ދެން އާލްވެސް އަހަރެން ހާދަ ދުރުކޮށްލައިފިޔޭ މިހާރު. އެހާ ބޮޑު ކަމެއް ނިންމަން އުޅޭއިރުވެސް އަންގާވެސް ނުލާ” އިޔާން އެކަނި އިނދެ ވާހަކަ ދެއްކިއެވެ.

އިރުއޮށްސެމުން ދިޔަވަގުތެވެ. އުޑުމަތީގައިވާ ރަތްވިލާތަކުން މުޅިމާހައުލަށް ރަތްކުލަ ވެރިވެފައިވާ ކަހަލައެވެ. ޒީކް އަދިވެސް އިނީ ގަހުގައި އިށީދެލިގޮތަށް ގޮފިގަނޑުގައި ލެނގިލައިގެން ދެލޯމަރާލައިގެން ނެވެ. ވަގުތުތައް ފާއިތުވަމުންދާ އަވަސް މިންވަރު އެއްގޮތަކަށްވެސް އިހްސާސްނުވާ ކަހަލައެވެ. ޖެހެމުންދާ ފިނިވައިން އިހްސާސްވަމުންދިޔަ ފިނިކަމުން ހަށިގަނޑަށް ވަމުންދިޔަ އަރާމުން ދެލޯ ހުޅުވާލަންވެސް ބޭނުން ނުވެފައި އިންކަހަލައެވެ.

“ޒީކް” އަލްޔަން ގަހާ އަރާ ހަމަވަމުން ގޮވާލިއެވެ.

“އޯވް! ހާދަ ލަސްވެއްޖޭ ދޯ” ދެލޯ މަޑުމަޑުން ހުޅުވާލަމުން މާހައުލަށް ވެރިވަމުންދިޔަ އަނދިރިކަން ފެނުނު ހިނދު ޒީކްއަށް ބުނެލެވުނެވެ.

“ހޫމް… ދެން ވެސް ހިނގާ އަވަހަށް ގެއަށް ދާން. މާމަ މިހާރުވެސް ލަސްވެފަ ހުންނާނީ” އަލްޔަން ޒީކް ގަހުން ފޭބުމުން ބުނެލިއެވެ.

ރޭގަނޑުގެ ހަމަހިމޭން ވަގުތެވެ. މާހައުލަށް ވެރިވެފައިވީ ހަމަހިމޭންކަމާއެކު ފަނިފަކުސާތަކުގެ ގޮވުމުގެ އަޑުނޫނީ ނީވެއެވެ. އެހަމަހިމޭން ވަގުތުގައިވެސް ރުއާންގެ ނިދިވަނީ އޭނާއާ މާދުރަށް ގޮސްފައެވެ. ފުން ވިސްނުމެއްގެ ތެރެއަށް ގެއްލިފައި ރުއާން އޮތް އިރު ވިސްނަމުންދިޔައީ އާއިލާގެ މީހުން ފެނުމުން ވާނެ ގޮތަކާ ދޭތެރޭގައެވެ. އޭނާގެ މަންމަ ފެނުމުން މަންމަ ގައިގާ ބައްދާލަން ބޭނުންވެއެވެ. އެއުނގުގައި ބޯއަޅާލައިގެން ނިދާލަން ބޭނުންވެއެވެ. މަންމަގެ އަތުން ލެވުމުން ކާން ބޭނުންވެއެވެ.

ރުއާންއަށް ނިދުނީ ކޮންއިރަކު ކަމެއްވެސް ނޭގެއެވެ. އަރައިގެންއައި އިރާއެކު އަހްމަދު އައިސް ރުއާން ހޭލައްވައިލައިފިއެވެ. އުނދަގޫކޮށްގެން ނުތެދުވުމުން އެންމެ ފަހުން އެނދުން ވައްޓާލުމުން ރުއާން ތެދުވީ ރުޅިއައިސްގެންނެވެ.

“އަޅެ ހާދަ އަރާމު ނިދިކޮޅެކޭ ތިނަގާލީ” ރުއާން އަހްމަދާ ދިމާއަށް ބާލީސް ހޫރުވާލަމުން ބުނެލިއެވެ.

“ތީ މީހުން ޗުއްޓީ ހޭދަކުރަން އައިސް އުޅޭ ގޮތްތަ؟ އަބަދު ނިދައިގެން އެންޖޯއި ކުރާނި ކޮންއިރަކު؟ ހިނގާބަލަ ރަށުތެރޭގަ ބުރެއް ޖަހާލަންދާން. ބިޓެއްވެސް ފެނިދާނެއެއްނު” އަހްމަދު ބުނެލިއެވެ.

“އެންމެ ރަނގަޅޭ މިނިކުންނަކީ ރެޑީ ވެލައިގެން” ރުއާން ފާހާނާއާ ދިމާއަށް ހިނގައިގަންނަމުން ބުނެލިއެވެ.

ހެނދުނުގެ ވަގުތުކަމުން ޒީކް އުޅުނީ ސައިހެދުމުގެ މަސައްކަތުގައި އަވަދިނެތިއެވެ. އަލްޔަން އައިސް ބަދިގެ ދޮރުމައްޗަށް އެރި ވަގުތަކީ ޒީކް ސައިހަދާ ނިންމާލުމަށްފަހު ބަދިގޭން ނިކުންނަން އައި ވަގުތަށް ވުމުން އަލްޔަންގެ ގައިގައި ޖެހިފައި ޒީކް ނުވެއްޓުނީ ކިރިއާއެވެ. އަލްޔަންގެ ހުށިޔާރުކަމާއެކު ޒީކްގެ ގައިގާ ނުހިފެހެއްޓިނަމަ ޒީކް ވެއްޓުނީސްކަން ކަށަވަރެވެ. ޒީކްގެ އުނގަޑުގައި އަލްޔަންގެ އަތްއަޅުވާލާފައި ވީއިރު ޒީކްގެ މޫނުވަނީ އަލްޔަންގެ މޭމަތީގައި ޖެހިފިތިފައެވެ. އެފަދަ ފުރުސަތަކަށް އެދިއެދި ހުންނަ އަލްޔަން ޒީކްގެ ގައިން ދޫކޮށްލަން ހިޔާލުކުރާ ހެނެއްވެސް ހިޔެއްނުވެއެވެ.

“ޒީކް” ހަފީޒާގެ ބާރުއަޑާއެކު ދެމީހުން ސިއްސައިގެން ދިޔައީ ވަރަށް ބޮޑަށެވެ. އަދި އެއަށްވުރެ އަވަހަށް ދެމީހުންނަށް ދުރަށް ޖެހިލެވުނެވެ. އިތުރަށް އެއްވެސް އެއްޗެކޭ ބުނުމަކާއި ނުލައި ހަފީޒާ ބަދިގެތެރެއަށް ވަދެއްޖެއެވެ. ޒީކްއަށް މާމަ ހުރީ ހިތްހަމަނުޖެހިފައިކަން އެނގުނެވެ. ނަމަވެސް މާމައަށް ފެނުނީ ހަގީގަތެއް ނޫނޭ ބުނެދޭން ބޭނުންވިއެވެ. އެކަމަކު ހަފީޒާ އަޑުއަހާނެ ބާވައެވެ.

“އާދޭ އަލްޔަން ސައިބޯން” ޒީކް އެހެން ބުނެލަމުން ބަދިގެތެރެއަށް ވަދެއްޖެއެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.