ނޭނގި ހިތޭ ތި އަތުލީ 14

“އަހަރެންވެސް ނުބަލަމެއްނު ލުބާ ގޮވައިގެން އޭނަގެ ކޮޓަރިއަށް ވަދެ މައުވަން ކުރާކަންތަކެއް. އަނެއްކޮޅުން އެކި ފަހަރު އެކި އަންހެން ކުދިން ގޮވައިގެން ސައިކަލަށް ލައިގެން ގޮސް ދާތަނަކާ ކުރާކަމަކާވެސް ނުބަލަމެއްނު.” ހަމަޖެހިލާފައި މަލާކް ބުނެލިއެވެ. އެޔާއެކު މަލާކް ގޮސްވަނީ ފާޚާނާއަށެވެ. މައުވަންއަށް ހުރިގޮތަށް ހުރެވުނީއެވެ.

“މީހަކު ދެކެ ލޯބިވުން އެއީ މައްސަލައެއްތަ؟” ނިއަމް ސުވާލު ކުރީ މައުވަން އާއެވެ. ދެމީހުންތިބީ ނިއަމްގެ ކެބިން ތެރޭގައެވެ. “ހާދަ އެހެން ކަހަލަ ސުވާލެއް” މައުވަން އެހިއެވެ. ނިއަމް ބުނެލީ ކޮންމެސް ޖަވާބެއް ދިނުމަށެވެ. “އެއީ މައްސަލައެއްނޫން ދޯ. އެކަމަކު ކޮންމެ ކޮންމެ މީހެއްގާތު އެވާހަކަ ހާމަކުރުން އެއީ މައްސަލައެއް” މައުވަން ޖަވާބު ދިނެވެ. “ތިބުނީ” މައުވަން ބުނި އެއްޗެއް ނިއަމްއަށް ސާފެއްނުވިއެވެ. ” މިބުނީ. މިސާލަކަށް ނިއަމްއަށް ލޯބި ވެވުނީއޯ މަގޭ ވަރަށް ލޯބިވާކުއްޖެއް ދެކެ. އެ ހާލަތުގަ އެލޯބި ހާމަކުރާކަށް ނުވާނެ މަދެކޭގޮތުގަ. އިފް ނޮޓް އޭގެ ސަބަބުން އަހަރުންދެމީހުންގެ ރިލޭޝަން ރުއިން ވާނީ. މައުވަން ތަފްސީލްކޮށްދިނެވެ.ދެން ދިޔައީ ހިމޭންކަމުގެ ވަގުތު ކޮޅެކެވެ. ނިއަމް އުޅުނީ ލައިހާގެ ވާހަކަ ބުނާށެވެ. މައުވަން އެބުނި އެއްޗަކުން އަނެއްކާވެސް ނިއަމް ފަސްޖެހުނެވެ. މައުވަން އެހީ ނިއަމްއަށް ލޯބި ވެވިގެން އުޅެނީ ކާކާތޯއެވެ. ފަހުން ބުނާނެކަމަށް ބުނެ ނިއަމް މައުޟޫބަދަލު ކޮށްލީއެވެ.

މައުވަންއާއި ލުބާގެ ގުޅުން ދިޔައީ ހީނަރު ވަމުންނެވެ. ލުބާ ގުޅިއަސް މައުވަން ފޯން ނަގަނީ މަދުފަހަރެކެވެ. މިކަމުގެ ސަބަބުން ލުބާ ދިޔައީ ރުޅިގަދަ ވަމުންނެވެ. އެކަމުގެވަރު ލުބާ ބާލަނީ މަލާކްއަށެވެ. “ކަލޭ މައުވަންއަށް ކީއްކޮއްގެންތަ ތިއުޅެނީ؟ ލުބާ ވާހަކަ ދެއްކީ ކޮޓަރިން ނުކުތް މަލާކްއާއެވެ. އާދައިގެ މަތިން މަލާކް ރައްދެއް ދޭކަށް ގަސްދެއްނުކުރެއެވެ. އޭނަ ދިޔައީ ސިޑިން ފައިބާށެވެ. “ކަލޭ ކޮންމެ ކަމެއްކުރިއަސް މައުވަން ކަލޭ ވަރިކުރާނެ. އޭނަ ނޫޅެ ކަލޭކަހަލަ ގަމާރަކާ އިދެގެން ލައިފް ގެ ދުވަސްތައް ބޭކާރު ކުރާކަށް” ލުބާ ކުރިއަށް ގެންދިޔައެވެ. އެވަގަތު ސިޑިންމައްޗަށް އެރި މައުވަންއަށް ލުބާގެ އަޑު ކިތައްމެ ރަނގަޅަކަށްވެސް އިވުނެވެ. “ލުބާ. ތި އަނގަ މައިތިރިކޮށްގެން ހުރޭ” އަޑުހަރުކޮށް މައުވަން ބުނެލިއެވެ. ލުބާ ބުނެލީ އަޑު މަޑުނުކުރާނެކަމަށެވެ. އޭނަގެ ކޯލްތަކަށް ޖަވާބު ދޭނަމަ މިހެންނުވާނެކަމަށް އިތުރަށް ބުނެލިއެވެ. މައުވަން އެންގީ ޖަވާބު ދޭން ބޭނުންވި އިރަކުން ފޯންނަގާނެ ކަމަށެވެ. މައުވަން އަދި ލުބާވެސް އަޑު ދިޔައީ ބާރުވަމުންނެވެ. ” ތި ދެމީހުން ޒުވާބުކުރަން ރޫމަށް ވަންނަން ވީނު. ނޫނީ ބައްޕައަށްވެސް އަޑުއިވިދާނެ” އެހެން ބުނެލާފައި އެދެމީހުންނަން ހިނިތުންވުމެއް ދެމުން މަލާކް ދިޔައީއެވެ.

“އަދިވެސް ދަރިފުޅު ބުނި ކުއްޖާނުގެންނަމެއްނު؟” ޑިއުޓީ ނިންމާފައި ގެއަށް ވަތް އަކްޔަންއާއި ނަސީމާ ވާހަކަދެއްކިއެވެ.”މަންމާ. އަދި ނެތެއްނު ތިކަން ނުވެފައެއް” ކަރުގައޮތް ޓައީއަށް ދޫކޮށްލަމުން މައުވަން ވެއްޓިގަތީ ސޯފާއަށެވެ. ” ނޫނޭ ދަރިފުޅާ އެކަން ކުރަން އުޅޭ. އޭރުން ދަރިފުޅުގެ މަންމައަށް ހަމަނިދި ލިބޭވަރުވާނީ” ކޮޓަރިން ނިކުމުގެން އައި މަޒްހަރު ވާހަކައިގައި ބައިވެރިވެއެވެ. ” މަންމަވެސް އަދި ބައްޕަވެސް ޤަބޫލް ވާނެކަމަށް  އުއްމީދުކުރަން ” އިސްޖަހައިގެން އިދެ އަކްޔަން ބުނެލިއެވެ.  “ރަނގަޅު އަޚުލާގެއް ހުރިކަމަށްވާނަމަ އެނިމުނީ ދަރިފުޅާ” މަޒްހަރު ބުނެލިއެވެ. “އެއީ ….އެއީ…” އަކްޔަން ފަސްޖެހުނެވެ. “ދަރިފުޅާ ކޮން އެއީ އެއީ ތިކިޔަނީ” ނަސީމާ ހުރީ ކެތްމަދުވެފައެވެ. “އެއީ ވާހަކަ ނުދެއްކޭ ކުއްޖެއް… އަލާ ކިޔަނީ. އަހަރެން ވަރަށް ލޯ…” އަކްޔަންގެ ޖުމްލަ ފުރިހަމަ ނުވަނީސް ޖެހުނީ ހުއްޓާލާށެވެ. “މި މާލެއިން އަކްޔަންއަށް ތިނޫން ކުއްޖެއް ނުފެނުނީތަ؟ ހަމަމިހާރު ތިކަން ހުއްޓާލާ. އަކްޔަން ޖެހޭނީ އަހަރެން ދައްކާ މީހަކާ އިންނަން.ދަރީންގެ ކަންތަކާ ފަރުވާ ކުޑަކުރާތީ ކަންތައްތައް ވާގޮތް މަޒްހަރަށް އެބަ ފެނެއެއްނު. ނޭނގެ މިހާރު ލައިހާ އުޅޭނީ ކޮންފަދަ މީހަކާ ކަމެއް” ނަސީމާ އެއްފަށްޗަކަށް އަމުނާލިއެވެ. މަޒްހަރު ވަކި އެއްޗެއް ނުބުނެއެވެ. ވާހަކަ ދެއްކުމަށް އަކްޔަން ހުޅުވާލި އަނގަ ލައްޕާލީ މަޒްހަރު އެތަނުން ދިއުމަށް އިޝާރާތް ކުރީމައެވެ.

މައުވަން ބްރޭކްގަޑީގައި ކޮންސަލްޓޭޝަން ރޫމްއިން ނިކުތީ އާދައިގެ މަތިން ކެންޓީނަން ދާށެވެ. އެވަގުތު އޭނައަށް ފެނުނީ މަލާކް ރޫމުން ޒާދު އާއެކު މަލާކް ނިކުތް ތަނެވެ. މަލާކަށްވެސް މައުވަން ފެނުނެވެ. އެކަމަކު ފެނުނު ކަމަކަށް ނުހަދައެވެ. އެދެމީހުންވެސް ދިޔައީ ކެންޓީނަށެވެ.

“މިހާރަކަށް އައިސް ކިހިނެތް ވެފަތަ ތިހުންނަނީ. އަބަދު ފާޑަކަށް ނެގިމަޑުވެފަ” ނިއަމް ސުވާލު ކުރީ މައުވަން އާއެވެ. އެވަގަތު އެމީހުން އޯޑަރު ކުރިއެއްޗެހި ހިފައިގެން ވެއިޓަރ އައެވެ. މައުވަން ބުނެލީ ކަމެއް ނުވާކަމުގައެވެ. އޭރުވެސް މައުވަން އަށް ބެލެނީ ޒާދު އާއެކު ކާން އިން މަލާކްއަށެވެ. ޒާދު ވާހަކަ ދައްކަމުން ދިޔައިރު މަލާކްއިނީ ހީލަ ހީލައެވެ. ބައެއްފަހަރު އަނގަމަތީ އަތްއަޅާލައެވެ. މައުވަންއަށް އެތާއިންނަން އުދަނގޫވިއެވެ. ނިއަމް ކާރީ ކުޑަކަމެއް ދިމާވެއްޖޭބުނެ ނިކުމެގެން ދިޔައީއެވެ.

ޑިއުޓީ ނިންމާފައި ގެއަށް ދާން މައުވަން އާއި މަލާކްއަށް ނިކުމެވުނީ އެއްފަހަރާއެވެ. މަލާކް ހޮސްޕިޓަލްގެ ގޯތިތެރެއިން ނިކުތް އިރު މައުވަން އިނީ ސައިކަލު މަތީ އޭނަގެ އިންތިޒާރުގައެވެ. “ސައިކަލަށް އަރަންވީނު. އަހަރެން ގެންގޮސްދީފާނަން” މައުވަން ބުނެލިއެވެ. “ނޫން. އޯކޭ.. ހިނގާލާފަ ދެވިދާނެ” ހީލަމުން މަލާކް ބުނެލިއެވެ. އިތުރު އެއްޗެއް ބުނަން ބޭނުންވިއެއްކަމަކު މައުވަންގެ ދޫ ހަރަކާތެއް ނުކުރިއެވެ. ސައިކަލުގައި އަތުން ޖަހާލުމަށްފަހު މައުވަން ސައިކަލު ދުއްވާލިއެވެ.

“ކީއްވެތަ ސައިކަލަށް ނޭރީ” މަލާކް އައިސް ކޮޓަރިއަށް ވަނުމާއެކު މައުވަން އަހާލިއެވެ. “ކަމެއްނުވޭ” މަލާކްގެ ޖަވާބުކުރެވެ. “ކަމެއް ނުވަންޏާ އަހަރެންގެ ސައިކަލު ފަހަތަށް އަރައިގެން ގެއަށް އާދެވުނީސްތާ” މައުވަން ބުނެލިއެވެ. މަލާކް ޚިޔާރު ކުރީ ހިމޭންކަމެވެ. ދެންއިވުނީ ރާޖް އައިސް ކާންއައުމަށް ގޮވާލިއަޑެވެ.

“ބައްޕާ ވިޔަފާރި ކަންތައްތައް ކިހިނެއްތަ” ތަށްޓަށް ކާއެއްޗެހި އަޅަމުން މައުވަން އަހާލިއެވެ. މަޒްހަރު ބުނެލީ ރަނގަޅުކަމަށެވެ. އަކްޔަން އިނީ އަނގައިން ނުބުނެއެވެ. ކުރީ ދުވަހުގެ ކަންތަކާ އޭނަ އިނީ ހިތްހަމަ ނުޖެހިފައެވެ. “ބައްޕާ މި ވީކްއެންޑްގަ ރިސޯޓަށް ޖައްސާލަންކަމަށް މިއުޅެނީ” މައުވަން ބުނެލިއެވެ. “ކޮންބައެއް” ނަސްރީނާ ބޭނުންވީ ދަނީ މަލާކް އާއި އެކީ ތޯ ބަލާށެވެ. “ބޮޑުދައިތާ. ދެން މިހާރު ދާނީ ވައިފް އާއި އެއްކޮށެއްނު” މައުވަން ބުނެލިއެވެ. މައުވަންގެ ޖުމްލައާއެކު މަލާކް ދިރުވާލި ކާއެތިކޮޅު ކަރުގައި ތާށިވެ ކޮށިއެރިއެވެ. ވީގޮތް މައުވަންއަށް އިނގުނެވެ. އަދި އަޑި އަޑިން އޭނަ ހީލިއެވެ.

ކޮޓަރިއަށްގޮސް މަލާކް ރިސޯޓަށް ދިއުމާ ގުޅޭ ގޮތުން މައުވަންއާއި ސުވާލު ކުރާނެކަމަށް އޭނަ ހީކުރިއެވެ. އެކަމަކު މަލާކް އެކަމެއް ނުކުރިއެވެ. އާދައިގެ މަތިން ޖައްސާލީ ސޯފާގައެވެ. އިނީ ފޯނާއި ކުޅޭށެވެ. މަލާކްގެ އެ ހިމޭން ކަމުން މިހާރަކަށް އައިސް މައުވަންއަށް އުނދަގޫ ވަނީކީއްވެ ކަމެއް ނޭނގެއެވެ. ބޭނުން ވަނީ މަލާކް އާއި ވާހަކަ ދައްކާށެވެ. އަބަދު މަލާކް ފެންނަ ހިސާބުގައި ހުންނާށެވެ. އަމުދުން އެހެން ފިރިހެނަކާ މަލާކް ވާހަކަ ދައްކަނިކޮށް ފެނިންޖެނަމަ މައުވަން އެ އަންނަ ރުޅި ކޮންޓްރޯލް ކުރަން އުނދަގުލެވެ. އެހެން އެވަނީ ކީއްވެ ކަމެއް މައުވަންއަށް އަދި ނޭނގެއެވެ. ހަޤީޤަތަކީ މައުވަންއަށް ނޭނގި މަލާކް މައުވަންގެ ހިތް އަތުލައިފިކަމެވެ.

“ފްރައިޑޭ މޯނިންގ އެއިޓްގަ ފުރަން ރެޑީވަށްޗޭ” މަލާކް ސުވާލެއް ނުކުރާނެކަން އެނގުމުން މައުވަން ބުނެލިއެވެ. “ކީއްވެ ކުށްލިއަކަށް ރިސޯޓަށް ދާން ތިއުޅެނީ” މަލާކް އަހާލިއެވެ. އޭރުވެސް އޭނަގެން ދިޔައީ ފޯން ސްކްރޯލް ކުރަމުންނެވެ. “ކަމެއްނުވޭ. ހަމަ ހިތަށްއެރީ ދާން. ކުރީދުވަހުވެސް ބައްޕަ ހަނީމޫން ވާހަކަ ދެއްކިއެއްނު. އޭރުން ބައްޕަ ހިތްހަމަޖެހޭނެތްނު” ބުނާނެ އެއްޗެއް ނޭނގުމުން މައުވަން ކަނޑާލީ މަޒްހަރުގެ ބޮލަށެވެ. “ނެކްސްޓް ވީކަށް ހަދަންވީނު. މި ވީކްއެންޑް ވަރަށް ބިޒީ” މަލާކް ބުނެލީ މައުވަން އުއްމީދު ކުރިއެއްޗެއް ނޫނެވެ. “ބިޒީވާން ކޮންކަމެއް އޮތީ؟” މައުވަން ކޮށްލީ ސުވާލެކެވެ. “ބައިވަރު ކަންތައް” މަލާކް ތަފްސީލެއް ދޭކަށް ނޫޅުނެވެ. “އަހަރެން ބުކިންވެސް ހައްދައިފިން” ދަތުރު ކެންސަލް ކުރަން ބޭނުން ނުވާތީވެ މައުވަން ބަހަނާއެއް ދައްކާލިއެވެ. “އެބޮތް ގޮތެއް. ދެމީހުން އެއްކޮށް ގެއިން ނިކުންނާނީ. މައުވަން ދާނީ ރިސޯޓަށް. އަހަރެން ދާނީ ޒާދުމެން ގެއަށް. އެގޭގެ އުޅެނީ އޭނަ ޔާއި އޭނަގެ އަންހެން ކޮއްކޮ އާއި އެކަނި. ވީކެންޑް ނިމެންދެން އެގޭގަ ހުރެފާނަން. އޭރުން ބައްޕަ މެންނަކަން ނޭނގޭނެތްނު” ވިސްނާލަށް އިދެފައި މަލާކް ބުނެލިއެވެ. މަލާކް ބުނެލީ މިވަގުތަށް މައުވަން މަލާކް އެއްމެ ފޮނުވަން ބޭނުން ނުވާތަނުގެ ވާހަކައެވެ. “ފަޅާ އަރައި ފިއްޔާޔޯ” އެގެއަށް ފޮނުވަން ބޭނުން ނުވާކަން ހާމަކުރުމުގެ ބަދަލުގައި ކޮށްލީ ސުވާލެކެވެ. “އެހެއްވިއްޔާ ލުބާ ކާރިއަށް ދާއިރުވެސް ފަޅާއަރައި ފިއްޔާ ހަނދާނެގޮތް ހޯދާފަތާ އޮންނާނީ. އެގޮތަށް ހެދީމަ ނިމުނީނު” މަލާކް ބުނެލިއެވެ. މަލާކް މައުވަން ދައްކާ ވާހަކައަށް ރައްދެން ދެނީ މަދު ފަހަރަކުއެވެ. އެދޭ ފަހަރަކު ވިއްޔާ މައުވަން ޖެހެނީ ހިމޭންވާށެވެ. އިރުކޮޅަކުން މައުވަންގެ ފޯނަން އައީ މެސެޖެކެވެ. އޭގައިވަނީ މަޒްހަރު އާއި ނަސީމާވެސް ރިސޯޓަށް ދާނެ ކަމުގައެވެ. މައުވަން އުފާވިއެވެ. ވަގުތުން މަލާކަށް އެ ޚަބަރު ދިނެވެ. ދެން އިތުރު ގޮތެއް ނެތުމުން މަލާކަށް ޖެހުނީ ދާށެވެ.

ރިސޯޓަށް ގޮސް ސައިބޮއެގެން ހިނގާލަށް ދާން މައުވަން އެދުނެވެ. މަލާކް އިންކާރު ނުކުރީ މަޒްހަރުމެން އެތާ ތިބީމައެވެ. ހިނގާލަށް ދިއެއް ކަމަކު އަންނަން ވަންދެން މަލާކް އުޅުނީ ފޯންގައެވެ. އޭނަ ނިންމަން ޖެހިފައި ހުރި އެކިކަންތަކުގައި އެކި މީހުންނަން ގުޅައިގެން ހަމަޖައްސަނީއެވެ. މެންދުރު ނަމާދު ވަގުތު ޖެހުމުން އައީ ކޮޓަރި އަށެވެ. އޭރު މައުވަން ހުރީ ހިތްހަމަ ނުޖެހިފައެވެ. “ތީދެން ބޮޑުވަރު ދޯ” މައުވަން ބުނެލިއެވެ. “ކޮބާ” މަލާކަށް ނޭނގުނެވެ. “ބޭރަށް ނިކުތީސް ސުރެ ވަންނަން ވަންދެން ތިހުރީ ފޯނުގަ” މައުވަން ބުނެލިއެވެ. މަލާކް ބުނެލީ ކުރިންވެސް އޭނަ ބިޒީވާހަކަ ބުނިކަމުގައެވެ. “އަހަރެންވެސް އޮބެއް ސުވާލެއް. ކޮބާތަ އަސްލު މައުވަންގެ މައްސަލައަކީ ” މަލާކް އެހިއެވެ. މައުވަންއަށް ބުނާނެ އެއްޗެއް ނޭނގުނެވެ. “މައްސަލައަކީ ތީ މީހެއްގެ އަތްބެކަން މަލާކް ހަނދާން ނެތޭތީ” ކޮންމެސް އެއްޗެއް ބުނުމުގެ ގޮތުން މައުވަން ބުނެލިއެވެ. “ހަނދާންހުރޭ” މަލާކްގެ އާއްމު އުސޫލުން ކުރުޖަވާބެއް ދިނެވެ.ދެން ފެނުނީ ބަންލާފައި ދޮރު ޖަހާފައި މައުވަން ނިކުމެގެން ދިޔަތަނެވެ.