ސިއްރުން މިހިތާ ކުޅެނީހޭ (ސައުވީސްވަނަބައި)

ނަޒީހް މެންގެއަށް ދެވުމުން ނަޝްވާ ފުންނޭވާއެއް ބޭރުކޮށްލިއެވެ. އެއަށްފަހު މަޑުމަޑުން އެތެރެއަށް ހިނގައިގަތެވެ. ސިޓިންގްރޫމްއަށް ވަންނަ ދޮރު ކުޑަކޮށް ހުޅުވިފައި ހުރުމުން ނަޝްވާ ގޮސް ތަޅުގައި ހިފާލިއެވެ. ނަމަވެސް ބަޔަކު ވާހަކަ ދައްކާއަޑަށް ހުއްޓުންއެރިއެވެ. ނަޝްވާ ދޮރާއި ކަންފަތް ކައިރިކޮށްލީ ކިޔާއެއްޗެހި ބޮޑަށް ސާފު ވޭތޯއެވެ. ނަޝްވާގެ ދެލޯބޮޑުވެ ދެލޮލަށް ކަރުނަ ޖަމާވެގެން ދިޔައީ ނަޒީހް ދައްކަމުން ދިޔަ ވާހަކައެއްގެ ސަބަބުންނެވެ.

***********************************

ނަޒީހް އިނީ ގްރޫޕެއް ހަދައިގެން ކެރަން ކުޅޭށެވެ. “ހަގީގަތަށް ބުނަންޏާ މިހާރު އަހަރެންނަކަށް ނަޝްވާގެ ބޭނުމެއް ނެތް. އޭނާއާ ވީހާވެސް ދުރުން ދެން އުޅޭނީ” ނަޒީހް ހިނިގަނޑެއް ޖަހާލިއެވެ. އެއަށްފަހު ކުއްލިއަކަށް އެމޫނުމައްޗަށް ރުޅިވެރިކަން ވެރިވިއެވެ. “މިހާރު އަހަރެން ބޭނުން ކަންތައް މިވަނީ. އެ ގެ ދިނީމަ މިކްޔަން އެކަމާ ހިތާމަ ކުރާނެ އުމުރު ދުވަހު. އެ އަހަރެން ބޭނުންވާ ގޮތަކީވެސް. އޭރުން އަހަރެންގެ ކޮއްކޮއަށް އިންސާފު ހޯދާދެވޭނީ”

“އަސްލު ކިހިނެކޭ ވީ ނަޒީހް ކޮއްކޮއަށް” އެތަނުން އެކަކު އަހާލިއެވެ. “އަމިއްލެއިން ދަންޖެހިގެން މަރުވެފަ އޮއްވައޯ ފެނުނީ” އެތަނުން އެހެންމީހަކު ބުނެލިއެވެ. “އަހަރެންގެ ކޮއްކޮ ޖަނާ ކިހާ އާދޭހެއް ކުރި އެމިކްޔަން ކައިރި އޭނާއާ ރައްޓެހިވާން. އެކަމް ދިމާލަށް ނޫނެކޭ ބުނީ. އަހަރެންގެ ކޮއްކޮ ކިހާދެރަވާނެ. އަހަރެންގެ ކޮއްކޮ އެވަރުންވެސް އުއްމީދު ކަނޑާނުލައި އެ މިކްޔަންގެ ފަހަތުން އުޅުނީ. އެއްމެ ފަހުން އެމިކްޔަން އަހަރެންގެ ކޮއްކޮ ކައިރި ބުނީ ލޯތްބެއް ނުވަމޭ. ތިހެން އުޅޭ މީހުންދެކެ ނަފްރަތުކުރަމޭ. އަހަރެންނާ ދުރުގައި އުޅޭށޭ. އަހަރެންގެ ކޮއްކޮ ހުރީ އެލޯބީގައި ދީވާނާވެފަ. އެފަކީރަށް މިކްޔަންގެ ލޯބިނުލިބުމުން އެކަމަށް ކެތްކުރުންވީ އުނދަގޫކަމަކަށް. އޭނާ އަމިއްލެޔަށް މަރުވީ އެމިކްޔަންއާ ހެދި. އަހަރެން ބޭނުން އަހަރެންގެ ކޮއްކޮއަށް ނޫނެކޭ ބުނީމައި އޭގެ ބަދަލު މިކްޔަންއަށް ދޭން.” އަޑުއަހަން ހުރި ނަޝްވާ އަނގަމަތީ އަތްއަޅާލިއެވެ. އެކަމުގައި މިކްޔަންގެ ކުށަކީ ކޮބާހެއްޔެވެ. މިކްޔަން ލޯބި ނުވާތީ ނޫނެކޭ ބުނީނޫންހެއްޔެވެ. ޖަނާ ވަކިވެ ދިޔުމުން ނަޒީހް ދެރަވާނެކަން އިނގެއެވެ. ނަމަވެސް އޭގައި މިކްޔަންގެ ކުށެއްނެތެވެ. ސުބުހާނަﷲ އެވެ. އެއްވެސް ކުށެއްނެތި އަހަރެންނަށް މިކްޔަންއާ ދޭތެރޭ މިކުރެވުނީ ކީއްހެއްޔެވެ.

“ހަހަ. އެކަންވެސް ވަރަށް އަވަހަށް ފުރިހަމަވާނެ. ބުނަންތަ ވަރަށް މަޖާ ވާހަކައެއް. އަހަރެން އަތުގައި ނުވެސް ނެތް މިކްޔަންއާ ނަޝްވާގެ ފޮޓޮއެއް. އެރޭ ފޮޓޯ ނަގަން ހަދާލިތަނާ މަންމަ ގުޅަން ފެށީ. އަވަހަށް ބިޒީކޮށްލާފައި ދެވަނަ ފަހަރަށް ފޮޓޯ ނަގަން ހަދާލިއިރަށް މިކްޔަން ނަޝްވާ ދުރުކޮށްލާފި. ހުވާމިބުނީ. މަހާދަ ނެއްޓިއޭ. އަހަރެން މިކްޔަންއަށް ފޮނުވީ ފޭކް ފޮޓޮއެއް. އެފޮޓޯ މިކްޔަން ރަގަޅަށް ބެލިނަމަ އިގޭނެ އެއަކީ އެދެމީހުން ނޫންކަން. އެކަމް އެވެސް ބޮލެއް. ނުވެސް ބަލައި ގަބޫލުކޮށްގެން ހުރީ”

“ދެން ކިހިނެއް އެގެ އިންކަން އިނގުނީ؟ އަހަރެމެންވެސް ނުދެނެހުރިން މިކްޔަންގެ ގެއެއް ހުންނަކަމެއް”

“ހަހަ ތި އަނެއްވާހަކަ. އަސްލު އަހަރެން އުޅުނީ ފައިސާ ހޯދަން. މަ ފޮޓޯ އެޑިޓް ކުރަން މަ ރައްޓެއްސެއްގެ ރަށަށް ދިޔައީ. އޭނާ ވަރަށް މޮޅުވާނެ އެކަހަލަ ކަންކަމަށް އެހެންވެ. އަހަރެންގެ ނަސީބް ރަނގަޅުކަމުން މިކްޔަންގެ ބައްޕަ ނާސިހް އާދިމާވީ. އެގޮލާ އުޅުނީ މޭގައި ރިއްސާތީ. ދެން އަހަރެން އޭނާ އެގެއަށް ގެންގޮސްދިނީ. ދެން އެ ނާސިހް އަނގަގަދަކަމުން ބުނެލާފި އެގޭގެ ވާހަކަ. މި މިކްޔަންގެ މާމަގެ ގެއޭ. އޭނާގެ މާމަގެ ފަހުގެ ވަސިއްޔަތޭ. އެހެންވެ އަހަރެންގެ މައިންޑް ޗޭންޖްވީ. އެގެ ވިއްކާލީމަ ނާސިހްމެން އޭނާ ގޭންވެސް ނެރެލާކަށް ފަހެއް ނުޖެހޭނެ. އޭރުން މިކްޔަން ޖެހޭނީ އަބަދުރޯން” ނަޒީހް ރުޅިވެރިކަންމަތީ ބުނެލިއެވެ.

“ދެން މިކަމުގެ ތެރެއަށް ކީއްވެ ނަޝްވާ ވެއްދީ” އެތަނުން މީހަކު އަނެއްކާވެސް އަހާލިއެވެ. ނަޒީހް ހިނިގަނޑެއް ޖަހާލިއެވެ. “ދެން އިނގެޔެއްނު ދޯ ނަޝްވާގެ ގޮތް. ފިރިހެނުން ސެޓްކުރަން އެވަރެއް ނުހުންނާނެ. އަހަރެން އެހެންވެ އޭނާއާ ރައްޓެހިވީވެސް. އަދި ރުޅިއަރުވަން ފަހުން ފަހުން އައިސް އިންނަންއުޅޭށޭ ވެސް ކިޔޭ. ބޯގޮވާވަރުވެފަ ހުރީ. އޭނާ މިހުރިހާ ކަމެއް ކުރަން އެއްބަސްވީވެސް އަހަރެން އިންނާނެކަމަށް އެއްބަސްވީމަ. އެކަމް އެ ގަޅިއަކަށް ނޭނގޭ އަހަރެން ނީންނާނެކަމެއް. އެހެންނޫނަސް އަހަރެންގެ އަންބަކު ވެސް ހުރޭ. ލޯބިދަރިފުޅެއް ވެސް.” ނަޝްވާ އަށް ގިސްލެވެން ފެށުނެވެ. އަޑުބޭރުވެދާނެތީ އަނގަމަތީ އަތްއަޅައިގެން ދުއްވާގަތެވެ.

“ނަޒީހް” ނަޒީހް ސިއްސައިގެން ދިޔައީ ފަހަތުން އޭނާގެ މަންމަ ފާތުމަ ރުޅިވެރިކަމާއެކީ ގޮވާލުމުންނެވެ. ވަގުތުން ނަޒީހް ކައިރީގައި ހުރި ގްރޫޕްވެސް އިސްދަށަށް ޖަހާލުމަށްފަހު ނިކުމެގެން ދިޔައެވެ. ނަޒީހްއަށް މީހަކު ފޫކޮޅަށް ކައްޓެއް ހެރިހެން ތެދުވެވުނެވެ. “ތީ ކޮންކަމެއް. އަހަރެން ކިތައްފަހަރު ބުނާނީ އެކަމުގައި މިކްޔަންގެ ކުށެއް ނެތޭ.” ފާތުމަ ހަޅޭލަވާގަތެވެ. “މަންމަ ތިގޮތަށް ދެކުނަސް އަހަރެން ނުދެކެން ތިގޮތަކަށް. އެ ސުންޕާގަނޑާ ހެދި ޖަނާ ވަކިވެގެން ދިޔައީ. ޖަނާ މަރުވުމުން އަހަރެން ހާދަ ދެރަވިއޭ މަންމާ” ނަޒީހްގެ އަޑު ކުރަކިވެގެން ދިޔައެވެ.

“ދެން މަންމަ އަށް ކިހާވަރެއް ވާނެ. މިމަންމަގެ ހުރި ހަމައެކަނި އަންހެން ދަރިއޭ ޖަނާއަކީ. އަހަރެންނަށްވެސް ކެތްކުރަން އުނދަގޫ. އެކަމް ޖަނާ އަމިއްލަޔަށް މަރުވީ އޭނާ ހޭބަލިވެފައި ހުރުމުން. ނަޒީހް ދަރިފުޅު ހަމަހޭގައި ހުރެފައި ވިސްނާލަބަލަ މިކަމުގައި މިކްޔަން ގެ ކުށަކީ ކޮބާ. އޭނާ ލޯބިނުވާތީ އެއްބަސް ނުވީ. ދަރިފުޅާ ވެދިޔަކަމެއް އެވީ. އެކަމެއް ބަދަލެއް ނުކުރެވޭނެ. ޖަނާ އަހަރެމެންނާ ވަކިވެގެން ދިޔައީ ހަމަ ޖަނާގެ ކުށުން.” ފާތުމަ ނަޒީހްގެ ކޮނޑުގައި ޖަހާދެމުން ވިސްނާދިނެވެ.

******

ދެލޯހުޅުވާލި ޔާނާ ތެދުވެ މޯޅިއަކަށް ދެމިލާފައި ކައިރީގައި އޮތް މިކްޔަން އަށް ބަލާލީ ހިނިތުންވެލާފައެވެ. މިކްޔަންގެ ތުންފަތުގައި ޔާނާ މަޑުމަޑުން ބޮސްދިނެވެ. އެއަށްފަހު ތެދުވެ ބްލޭންކެޓް ގައިގައި އޮޅާލަމުން ފާހާނައަށް ވަނީ ހޮސްޕިޓަލްއަށް ދިޔުމަށް ތައްޔާރުވުމަށެވެ.

“ޔަން ޔަން” މިކްޔަން ލޯހުޅުވާލީ ޔާނާ ގޮވާލުމުންނެވެ. ޔާނާ ޝޯލް އަޅާފައި ހުރުމުން މިކްޔަން ލޯބޮޑުކޮށްލިއެވެ. “އަނެއްކާ؟ ކޮންތާކަށް؟”

“މިދަނީ ލާރާ ކައިރިއަށް ވަރަށް އަވަހަށް އަންނާނަން. ޔަން ޖެހޭނެ އަހަރެން އަންނަން ވާއިރަށް އަހަރެންނަށް ނޫޑްލިސް ކައްކަދޭން. ވަރަށް ކާހިތްވެފަ”

“އެކީއްވެ އަހަރެން”

“ދެން ފުރަތަމަ ފަހަރަށޭ މިބުނީވެސް އިނގޭ ދެން ޕްލީޒް” ޔާނާ އާދޭސް ކޮށްލިއެވެ. “ފައިން ބޭބް. އެކަމް ދެން މިރޭ ނުދޭބަލަ. މިއަދު އެއްކޮށް އެކީ އެހާ ލޯބިން އުޅެފަ”

“އެއްކަލަ ޔަން. އަންނާނަމޭ ވަރަށް އަވަހަށް.” ޔާނާ ނިކުމެގެން ދިޔުމުން މިކްޔަން އަމިއްލަ ބޮލުގައި ހިފަހައްޓާލިއެވެ. ޔާނާ ކުރިމަތީ ހަމަޖެހިލައިގެން ހުއްޓަސް އެތެރެއިން އޭނާގެ ބޯދަނީ ހާސްވަމުންނެވެ. މާދެން އެލިޔުމުގައި ސޮއިކޮށްފަ ދޭންވީއެވެ. މިކްޔަންގެ ލޮލުން ކަރުނަ ނިރާލީ މިކަމުން ސަލާމަތްވުމަށް އެއްވެސް ކަމެއްވެސް ނުކުރެވޭނެތީއެވެ. އެހެން އިރުކޮޅަކު ހުރުމަށްފަހު ތެދުވެ ފާހާނަޔަށް ވަދެލީ ނޫޑްލިސް ހެދުމަށް އަވަހަށް ބަދިގެއަށް ދިޔުމަށެވެ.

*****

ދުވަމުން ދިޔަ ނަޝްވާ ގޮސް ހުއްޓުނީ އަތިރިމަތީގައެވެ. މަދުން ނަމަވެސް މީހުން ހުރި ނަމަވެސް ނަޝްވާއަށް އެކަމަށް ފަރުވާލެއް ނެތްފަދައެވެ. އިރުކޮޅަކު ހިތްހަމަޖެހެންދެން ރޯލުމަށްފަހު ފޯނު ނަގައި އައުމަށް އެދި ޒިޔާންއަށް މެސެޖެއްކޮށްލީ ކީކޭ ހިތަށް އަރައިގެންކަމެއް ނޭގެއެވެ.

ޒިޔާންއަށް އާދެވުނީ އޭގެ ތިރީސް މިނެޓްފަހުންނެވެ. އުޅެނީ މާލޭގައި ކަމުން ހުޅުމާލެއަށް އައުމަށް ވަގުތު ނަގާނޭނޫންހެއްޔެވެ. ރުކެއްގައި ލެނގިލައިގެން ރޮވިފައި ހުރި ނަޝްވާ ފެނި ޒިޔާންއަށް އެތަނަށް ދެވުން ގޮތެއްވެސް ނޭގުނެވެ. ޒިޔާން ގޮސް ނަޝްވާގެ ކޮނޑުގައި އަތްބޭއްވުމަށްފަހު ނަޝްވާއޭ ކިޔާފަ ގޮވާލިއެވެ. ނަޝްވާއަށް އެއަކީ ޒިޔާންކަން އިނގުމުން އެނބުރި ޒިޔާން ގައިގައި ބައްދާލިއެވެ. “ޒިޔާ. އަހަރެންނަށް ވަރަށްބޮޑު ކުށެއް ކުރެވިއްޖެ ވަރަށް ބޮޑު. މިކްޔަންގެ އެއްވެސް ކުށެއްނެތި އަހަރެން މިކްޔަންގެ ދިރިއުޅުމާ ކުޅެލީ. އަހަރެން ދެން ކިހިނެއް ހަދާނީ. ކޮންމެވެސް ގޮތަކުން އެ ލިޔުންތަކުގައި މިކްޔަން ސޮއި ކުރިޔަދީގެން ނުވާނެ.” ނަޝްވާ ހުރީ ވަރަށް ހާސްވެފައެވެ. “އިނގޭތަ އަހަރެންގެ ބޭބެ އިޔާޒްއާ މެރީ ކުރި ޒާޔާގެ ކަޒިންއެއް މިކްޔަންއަކީ” އެއްދިމާލަކަށް ބަލަހައްޓައިގެން ހުރެ ޒިޔާން ބުނެލިއެވެ. “ސޮރީ ޒިޔާ. ޒިޔާ އަހަރެން ދެން ކިހިނެއް ހަދާނީ؟” ނަޝްވާއަށް ރޮވުނެވެ. ހަގީގަތުގައިވެސް އޭނާއަށް އޭނާގެ ކުއް އިހުސާސް ވެއްޖެއެވެ. “ގުޅާބަލަ މިކްޔަންއަށް” ޒިޔާން ބުނެލިއެވެ. “މިކްޔަން އަހަރެންގެ ނަންބަރު ބްލޮކް ކޮށްލާފައި. ޒިޔާ ގުޅާބަ” ނަޝްވާ ބުނެލިއެވެ.

ޒިޔާން ޖީބުގައި އަތްހިންގާލިއެވެ. “ޝިޓް. އަވަސް ކުރަންހަދައިގެން ފޯނުވެސް ބާއްވާފަ މިއާދެވުނީ” ޒިޔާން މިހެން ބުނުމުން ނަޝްވާ ހާސްވިއެވެ. “ޒިޔާ. ހިނގާ މިކްޔަންއާ މީޓް ކުރަން. މިހާރު. މާދެންނަކަށް މަޑެއް ނުކުރެވޭނެ” ޒިޔާންވެސް އެކަމާ އެއްބަސްވިއެވެ.

*******

“ޔެސް ޔެސް ޔެސް. އަލްހަމަދުލިﷲ. އައިމް ޕްރެގްނެންޓް” ރިޕޯޓް ބަލާލާފައި ޔާނާ ފުންމައިގަތެވެ. ދެވަނަ ސިކުންތުގައި އޭނާ މައިތިރި ވީ މީހުންތައް ބަލާކަށް އިނގުމުންނެވެ. ޔާނާ އަވަސް އަވަހަށް ގެއަށް ދިޔުމަށް ހިނގައިގަތީ މިކްޔަންއަށް މިހަބަރު ދިނުމަށެވެ.

****

ނޫޑްލިސް ކައްކަން ހުރި މިކްޔަން އަށް ޒާއިން ވަދެގެން އަންނަތަން ފެނުމުން ގޮވާލިއެވެ. “އޭ ބްރޯ. ނޫޑްލިސް ކައްކަނީ މި. ކައިގެން ވަންނަންހުރޭ”

“ނޫނޭ ކައިގެން މިއައީ ބޭރުން. ދެން މިރޭ ތިމީހުން ޑިނާ ނައިޓަކަށް ހަދާލާ” ޒާއިން ލާނެތް ކަމާއެކީ މިހެން ބުނެ ކޮޓަރިއަށް ވަނެވެ.

ޒާއިން ކޮޓަރިއަށް ވަދެ ފޯނަށް ބަލާލިއެވެ. އަދިވެސް ލާރާގެ ހަބަރެއް ނުވެއެވެ. ނަމަވެސް މާދަމާރޭ ބައްދަލުވާނޭ ހިތަށް އެރުމުން ހިނިތުންވެލާފައި ކައިރީގައި ހުރި ރިމޯޓް ނަގައި ފިލްމެއް އަޅުވާލިއެވެ.

ނޫޑްލިސް ކައްކާފައި ތަށިތައް އަތުރަން ހުރި މިކްޔަން ގޭގެ ބެލް ޖަހާލަމުން ޔާނާ އައީ ކަމަށް ހީކޮށް ގޮސް ދޮރުހުޅުވާލިއެވެ. މިކްޔަންގެ ދެބުމަ ގޮށްޖެހުނީ ކުރިމަތީ ހުރި ނަޝްވާ ފެނުމުންނެވެ. މިކްޔަން އެއްޗެކޭ ބުނަންހަދާލިތަނާ ފަހަތުގައި ހުރި ޒިޔާން ފެނުމުން އެއްޗެކޭ ނުބުނެ މައިތިރިވިއެވެ. “މިކްޔަން ވަރަށް ބޮޑު ވާހަކަ އެއްދައްކަންވެގެން” ނަޝްވާ މިހެން ބުނުމުން މިކްޔަން ބަލާލީ ޒިޔާންއަށެވެ. “ޒިޔާންއަށް ހުރިހާ ވާހަކަ އެއްވެސް އިނގެޔޭ” ނަޝްވާ ބުނެލިއެވެ. “ބުނޭ” އެހުރިގޮތަށް ހުރެ ފުންނޭވާއެއް ލުމަށްފަހު މިކްޔަން ބުނެލިއެވެ. “މިތާކު ނޫން. މީހަކަށް އަޑުއިވިދާނެ” ޒިޔާން ބުނެލިއެވެ. ޒިޔާން އެހެން ބުނުމުން މިކްޔަން އެތެރެއަށް ވަނުމަށް ތަންދެއްކިއެވެ. “ހިނގާބަލަ ބަދިގެއަށް” ޒިޔާން އަނެއްކާވެސް ބުނެލިއެވެ. މިކްޔަން ދެބުމަ ގޮށްޖަހާލާފައި ބަދިގެއަށް ގޮސް ވަނެވެ.

“ނަޝްވާ ތިއައީ އަހަރެންގެ ލޯތްބަށް ސަލާން ޖަހަން ކަމުގައި ވަނީނަމަ އަހަރެން ބުނެފާނަން އަހަރެން ލޯބިވަނީ ޔާނާ ދެކެ”

ގޭގެ ދޮރުހުޅުވާފައި ހުރުމުން ދޮރުހުޅުވާފައި ވަން ޔާނާ ބަދިގެ ތެރެއިން މިކްޔަން ވާހަކަ ދައްކާ އަޑުއިވުމުން ބަދިގެ ކައިރިއަށް ދިޔައެވެ. ކުޑަކޮށް ބޯދިއްކޮށްލި ޔާނާގެ ދެލޯބޮޑުވީ މިކްޔަން ކައިރި ހުރި ނަޝްވާ ފެނުމުންނެވެ. ޒިޔާން ހުރީ ފްރިޖްއާއި ނިވާވެގެން ކަމުން ޔާނާއަށް ޒިޔާންއެއް ނުފެނެއެވެ. “އަހަރެން ޔާނާ އާއި އެކު ލޯބިން އުޅެން އެކްޓްޖެއްސީ ނަޝްދެކެ ލޯބިވާތީ. ޔާނާ އަމިއްލެއަށް އަހަރެންގެ ދިރިއުޅުމުން ދުރަށް ދޭތޯ. އޭރުން އަހަރެންގެ ދިރިއުޅުމަށް ނަޝް ގެނެވޭނެތީ” މިހިސާބަށް އަޑުއެހި ޔާނާ އަނގަ މަތީ އަތްއަޅައިގެން ހުރެ ފަހަތަށް ޖެހެން ފެށިއެވެ. މިއޮއްހާދުވަހު މިކްޔަން ޖެއްސީ ހުސް އެކްޓް ހެއްޔެވެ. އޭނާދެކެ ލޯބިވެޔޭ ބުނެ ހެދީ ހުސް ދޮގު ހެއްޔެވެ. މިކްޔަން އަހަރެން ޔޫޒް ކޮށްލީހެއްޔެވެ. އާއެކެވެ. އެހެން އެބުނީ ހަމަ މިކްޔަންގެ ދުލުންނެވެ. ޔާނާ ފަހަތަށް އެނބުރި ރޮވޭހާލު ބޭރަށް ދުއްވާގަތީ އަތުގައި އޮތް ފައިލް ވަންނަ ދޮރުކައިރި ހުރި މޭޒެއްގެ މަތީ ބާއްވާލަމުންނެވެ.

“އެކަމް އަހަރެން މިހާރު ޔާނާދެކެ އިންތިހާއަށް ލޯބިވޭ.” މިކްޔަން އަށް ވާހަކަ ހުއްޓާލަން ޖެހުނީ ނަޝްވާ ގޮވާލުމުންނެވެ. “އަހަރެން މިއައީ ޔާނާއާ މިކްޔަންއާ ދެމަދަށް ވަންނާކަށް ނޫން. މިކްޔަންއަށް އިނގެންޖެހޭ ވަރަށް ބޮޑު ވާހަކައެއް އަންގަން” މިކްޔަން ފާޑަކަށް ނަޝްވާއާ ދިމާލަށް ބަލާލިއެވެ. “އަހަރެމެންގެ ފޮޓޯއެއް ނަޒީހް އަތުގައެއް ނެތް” ނަޝްވާ ބުނެލިއެވެ. “ނަޒީހް. ނަޝްގެ ކަޒިންތަ؟” ހައިރާންވިވަރުން މިކްޔަންއަށް އަހާލެވުނެވެ. ނަޝްވާ ދެފަރާތަށް ބޯހޫރާލިއެވެ. “އަހަރެން މިކްޔަންއާ ރައްޓެހިވީ ނަޒީހް އާ ރައްޓެހިވެ ހުރެ ނަޒީހްގެ ބުނި ބުނުމަކަށް. މިކްޔަން ދެކެ ލޯބިވާތީއެއް ނޫން. އަހަރެންނަށް މާފްކުރޭ” މިކްޔަންގެ ލޭކެކިގަތް ނަމަވެސް އެކަމާ އެއްވެސް އެއްޗެކޭ ނުބުންޏެވެ. “ކީއްވެ ނަޒީހް ތިހެން ހެދީ؟” މިކްޔަން އަށް އަހާލެވުނެވެ.

“އޭނާގެ ކޮއްކޮއަށްޓަކައި. ޖަނާ ދަންނަންތަ؟” ނަޝްވާ އަހާލިއެވެ. މިކްޔަން ހަނދާން ކޮށްލިއެވެ. ޖަނާއެއަކީ ކުރިން އޭނާއާ ހެދި ހޭބަލިބެފައި ހުރި ކުއްޖެކެވެ. މިކްޔަން ބޯޖަހާލިއެވެ. “އޭނާ އަމިއްލަޔަށް މަރުވީ މިކްޔަން އޭނާގެ ލޯބި ގަބޫލިނުކުރީމަ”

“މަރުވީއޭ؟” މިކްޔަންގެ ދެލޯބޮޑުވިއެވެ. އެވަރުކަމަކާ މީހަކު އަމިއްލަޔަށް މަރުވޭހެއްޔެވެ. “ނަޒީހް ބޭނުންވީ އެކަމުގެ ބަދަލު ހިފަން. އަހަރެންނަކަށް ކުރިޔަކު ނޭގޭ އެވަރުކަމަކާ ހެދި ކަމެއް މިކްޔަންގެ ކިބައިން ބަދަލު ހިފަން އުޅުނީ. އެހެންނޫންނަމަ އަހަރެން އެހެން ނޫޅުނީމުސް. އޭގައި މިކްޔަންގެ ކުށެއް ނެތް. ސޮރީ މިކްޔަން. އަހަރެންގެ ސަބަބުން މިދިމާވި ކަންތައްގަނޑާ. އަހަރެން މިއައީ މިކްޔަން ކައިރި އެލިޔުންތަކުގައި ސޮއި ނުކުރާތީވޭ ބުނަން. ނަޒީހް އަތުގައި ނެތް ފޮޓޮއެއް. ދެން ދަނީ” ނަޝްވާ މިހެން ބުނެ ޒިޔާން އަށް އިޝާރަތް ކޮށްލީ ދާން ހިނގުމަށެވެ. އަތުގައި އޮތް ނަޝްވާގެ ފޯނު ނަޝްވާގެ އަތަށް ދެމުން ޒިޔާން ނަޝްވާއާއެކީ ހިނގައިގަތެވެ. “އަދި އެއްވާހަކަ. ދެން އަހަރެންގެ ފަރާތުން އެއްވެސް އުދަގުލެއް މިކްޔަންއަކަށް ނުފޯރާނެ. އުފާވެރި ހަޔާތަކަށް އެދެން” ނަޝްވާ ހިނިތުންވެލާފައި ފަހަތަށް އެނބުރި މިހެން ބުނެ ޒިޔާންއާއެކީ ނިކުމެގެން ދިޔައެވެ.

މިކްޔަން އަށް ބަޔާން ކުރަންދަތި ހިތްހަމަ ޖެހުމެއް ލިބިގެން ދިޔައެވެ. އޭނާ އެމަޅިން ސަލާމަތްވީއެވެ.

*****

ގަބުވެފައި ހިނގަމުން ދިޔަ ޔާނާ ހުއްޓުނީ ރަސްފަންނުގައެވެ. އޭރު އުޑުމަތީ އޮތީ ވަރަށް ބޮޑަށް ބަނަ ކޮށްލާފައެވެ. ޔާނާ އަނެއްކާވެސް ހިނގާލާފައި ގޮސް މީހުން މޫދަށް އެރޭ މޫދު ފެންނަ ހިސާބަށް ގޮސް ހުއްޓުނެވެ. ލޯބިވެރިން ފިޔަވައި އެތާ އެއްވެސް މީހެއްނެތެވެ. ޔާނާ އެހުދު ވެލިގަނޑު މައްޗަށް ތިރިވީ ގައިން ވަރުދޫވުމުންނެވެ. ދެ ކަކުލުގައި އަތް އަޅައިގެން ޔާނާއަށް ކަރުނަ ބޭލެން ފެށުނެވެ. “އާރގް. އަހަރެންގެ ކުށަކީ ކޮބާ؟ ހަމައެކަނި ޔަން ދެކެ ލޯބިވެވުންތަ. އަދި އެލޯބި ހޯދުމަށް ޔަން އާ ކައިވެނި ކުރީމަތަ. ޔަން ކީއްވެ އަހަރެންނަށް ތިހެން ތިހެދީ. އަހަރެން ހީކުރީ. ހީކުރީ ޔަން އަސްލުވެސް އަހަރެންދެކެ ލޯބިވަނީ ކަމަށް” ގިސްލެވޭ ހާލު ޔާނާ އަމިއްލަ ނަފްސާ ވާހަކަ ދެއްކިއެވެ. ޔާނާ ފަހަތް ބަލާލީ މީހަކު އޭނާގެ ކޮނޑުގައި އަތްއެޅުމުންނެވެ. ފަހަތުގައި ހުރި ލީޒާ ފެނުމުން ޔާނާ ތެދުވެ ލީޒާ ގައިގަ ބައްދާފައި ރޯންފެށިއެވެ.

******

ޔާނާ ގެއަށް ވަދެ އޭނާ މޭޒުމަތީ ބޭއްވި ފައިލް ނެގިއެވެ. އެއަށްފަހު ކުރިއަށް ހިނގައިގަތެވެ. “ބޭބް. ހާދަ ލަހުން. އިންތިޒާރެއް ކުރެވިއްޖެ އިނގޭ. އަވަހަށް ހިނގާބަލަ ކާން” ޓީވީ ބަލަން އިން މިކްޔަން ތެދުވެގެން ގޮސް ޔާނާ ކައިރި ހުއްޓުނެވެ. ޔާނާ ފައިލް ފަހަތަށްލައި ފޮރުވާލިއެވެ. “ހިނގާބަދެން” މިކްޔަން މަޑުމަޑުން ޔާނާގެ ކޮލުގައި ޖަހާލިއެވެ. ޔާނާ މިކްޔަންގެ ލޮލަށް ބަލާލީ ޝަކުވާގެ ނަޒަރަކުންނެވެ. އެ ލޮލުންބުނާފަދައެވެ. ޔަންއެވެ. ދެން ތި އެކްޓް ޖެއްސުން ހުއްޓާލާށެވެ. ހެޔޮނުވާނެއެވެ. މިހާރު ވާވަރު ވެއްޖެއެވެ. “ހޭއި” މިކްޔަން ގޮވާލިއެވެ. “އެބައަންނަން” ޔާނާ މިހެން ބުނެ އެތެރެއަށް ދިޔުމުން މިކްޔަން އަނެއްކާވެސް ޓީވީ ބަލަން އިށީއިނދެލިއެވެ.

ޔާނާ ދިޔަގޮތަށް ގޮސް ވަނީ ޒާއިންގެ ކޮޓަރިއަށެވެ. ޓީވީއަށް ގެއްލިފައި އޮތް ޒާއިންއަށް ޔާނާ ފެނުމުން ތެދުވެ ހިނިތުންވެފައި ކިހިނެއްވީހޭ އަހާލިއެވެ. “މިއައީ ކަމަކު ކިޔަން. ވާނެތަ” ޔާނާ ބުނެލިއެވެ. “ސާބަސް ދޮންބެދައްތާ. ތިހެންނުބުންޏަސް ކޮށްދޭނަމޭ” ޒާއިން ބުނެލިއެވެ.

“މި ފައިލް މާދެން ހެނދުނު ބަރާބަރު އެގާރަ ޖަހާއިރު ދޭންވީ ދޮންބެ އަތަށް.”

“އޯކޭ. އެކަމް މީކޯއްޗެއް”

“ޒާއިންވެސް މާދެން ބެލިޔަސް ހެޔޮ އިނގޭ. އެކަމް އޭގެ ކުރިން ނުބަލާތި” ޔާނާ މިހެން ބުނެ ޒާއިން ގައިގަ ބާރަކަށް ބައްދާލިއެވެ. ޒާއިން ޔާނާ އުޅޭގޮތުން ހައިރާންވެފަ ހުއްޓަސް އެއްޗެކޭ ބުނާކަށް ނުކެރުނެވެ.

*****

“ޔާނާ ތީ” ބޮޑު ފޮއްޓެއް ހިފައިގެން އައި ޔާނާ ފެނި މިކްޔަންއަށް އިންތަނުން ތެދުވެވުނެވެ. “ޕްލީޒް މިކްޔަން. ދެން ތި އެކްޓް ނުޖައްސަފާނަންތަ” ހުއްޓިލަމުން ޔާނާ ބުނެލީ ފެންކަޅިވެފައި ހުރެއެވެ. “ޔާނާ ކީކޭ”

“އަހަރެންނަށް އިވުނޭ ނަޝްވާ ގެނެއްސަ ކީއެއްޗެހި. އަހަރެންދެކެ ލޯބިވެޔޭ ކިޔާފަ. ހުސް އެކްޓް. އަހަރެން ކައިރި ރީއްޗަށް ބުނި ނަމަވެސް އަހަރެން ޔަން ދޫކޮށްލީމުހޭ. ކީއްވެ އަހަރެން ޔޫޒް ކުރީ” ޔާނާގެ އަޑުބެދުނެވެ. “ޔާނާ އަހަރެން ތިހެން ބުނިން އެކަމް އަހަރެން ދައްކާ ވާހަކަވެސް އަޑުއަހާބަލަ”

“އަހަރެން ބޭނުމެއްނޫން އަޑުއަހާކަށް. އަޑުއަހާނެ އެއްޗެހި އަޑުއިވިއްޖެ. އަހަރެން މިކްޔަން ބޭނުންވިގޮތަށް މިދަނީ މިކްޔަން ދޫކޮށް. ނަޝްވާއަކާ އެކީ ދެން އުފަލުގައި އުޅޭ” ޔާނާ ނިކުތުމަށް ހިނގައިގަތެވެ. މިކްޔަން އަށް އެއްމެ އަސަރު ކުރީ ޔާނާ މިކްޔަންއޭ ކިޔާ މުހާތަބު ކުރުމުންނެވެ. ވީދެރައިން ޔާނާގެ އަތުގައި ހިފާ އެމޫނަށް ބަލާލީ ނުދާށޭ ބުނާފަދައިންނެވެ. އޭރު އެލޯ ވަނީ ކަރުނުން ފުރިފައެވެ. ޔާނާވެސް އެއްމެ ފަހު ފަހަރަށް ކަރުނަވީ ލޮލަކުން މިކްޔަންއަށް ބަލާލިއެވެ. ދެމީހުންގެ ލޮލުން ފެންނަމުންދިޔައީ ލޯތްބާއި ވޭނެވެ. ޔާނާ މަޑުމަޑުން ފަަހަތަށް ދެތިންފިޔަވަޅު އަޅާލިއެވެ. އެއާއެކު ދެމީހުންގެ އަތް މަޑުމަޑުން ދުރުވެގެން ދިޔައެވެ. އެވަގުތު ޖަހާލި ބާރު ގުގުރީގެ އަޑުން ހީވީ މުޅި ކާއިނާތުވެސް އެދެމީހުން ވަކިވުމުން ހިތާމަކުރާހެންނެވެ.

=ނުނިމޭ=

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.