ޔާރު މިވަނީ ލޯތްބޭ ޙަޤީގީ (ތެއްތިރީސްވަނަ ބައި)

“ޔާލް……” ޔަލްވީގެ އިތުރުން ޝިއުރީމެންވެސް ހުއްޓުނީ ޝައުންގެ އަޑުންނެވެ. ޝިއުރީމެން ފަހަތް ބަލާލިނަމަވެސް، ޔަލްވީ، އެ ހުރި ފިޔަވަޅުމަތީ ގުޑިވެސް ނުލާ ހުރީއެވެ. ޔަލްވީ ބަލައި ނުލުމުން، ޝައުންގޮސް މަޑުކޮށްލީ ޔަލްވީގެ ކުރިމަތީގައެވެ.

“ޔާލް…. އަހަންނާ ގުޅުންހުރި ބައެއްގެ ސަބަބުން ޔާލްއަށް ތި ހާލު ޖެހުނީތީ، އަހަރެން ވަރަށް ދެރަވެއްޖެ…. އެ މީހުންގެ ކިބައިން އަހަރެން މާފަށް އެދެން….” ޔަލްވީގެ ދެ އަތްތިލާގައި، ހިފާލަމުން ޝައުން ބުނެލިއެވެ. ޝައުންގެ އަތުތެރޭގައިވާ ޔަލްވީގެ އަތް އޭނާ ދަމައިގަތެވެ. ޔަލްވީ ދެން ކޮށްލި ކަމަކުން އެތާ ތިބި އެންމެނަށް ސިހުން ލިބިގެންދިޔައިރު، އެމީހުން ތިބީ ބުނާނެ އެއްޗެއްވެސް ނޭނގި ބަސްހުއްޓިފައެވެ.

___________________________________________________

މޫނުގައި އަތް އަޅާލައިގެން ހުރި ޝައުންވެސް ހުރީ ހައިރާންވެފައެވެ. ޔަލްވީގެ އަތުގެ ހޫނު އެތިފަހަރެއް އޭނާގެ ކޯތާފަތަށް އަރާނެކަމަށް ފަހަރެއްގައިވެސް ޝައުނަށް ހީކުރެވިފައެއް ނެތެވެ.

“އަދިވެސް ވީވަރު ކުޑައީތަ…..؟؟؟؟ ނޫނީ އަހަންނަށް މިއަށްވުރެވެސް ބޮޑުވަރު ވާން ބޭނުންވަނީތަ….؟؟؟ ޝައުން ގާތު އަހަރެން، ކިހާ ރީތިކޮށް ބުނިންތަ އަހަންނާ ގާތް ނުވާށޭ…. އަހަންނާ ވާހަކަ ނުދައްކާށޭ…. ބުނީމަވެސް ޝައުންއަށް މަޑަކުން ނުހުރެވުނެއްނު….. ޝައުންއަށް ހަމަ ރަނގަޅަށް އެނގޭ، ޝައުން އަހަންނާ ވާހަކަ ދައްކަންޏާ އީޝާ ރުޅިއަންނަކަން…. ޝައުންގެ ސަބަބުން މި ހުރިހާ ކަމެއްވެސް މިވީ….. އަހަރެން ބުނިގޮތަށް ޝައުން ދުރުގައި ހުރިނަމަ….. …… …..” ޔަލްވީއަށް ވާހަކަ ދައްކަން އުނދަގޫވުމުން ޖުމްލަ ފުރިހަމަ ނުކޮށް ހުއްޓާލިއެވެ. އިރުކޮޅަކު އެ ގޮތުގައި ހުރުމަށްފަހު، އަނެއްކާވެސް ވާހަކަ ދައްކަންފެށިއެވެ.

“އަހަރެންގެ އިއްފަތްތެރިކަން މިއަދު މި ސަލާމަތްވީ ހަމަ ކިރިޔާ…. ޝައުން، ދެން އަހަރެންނާ ވާހަކަ ނުދައްކާތި… ދޭ…. މިތަނުން ދޭ…. އަހަންނާ ވާހަކަ ދައްކަން ދުވަހަކުވެސް މަސައްކަތް ނުކުރާތި…. މިތަނުން ދޭ…..” ރުޅިގަދަވެފައިވާ ޔަލްވީއަށް ކިޔޭ އެއްޗެއް އެނގޭހެނެއް ހިޔެއް ނުވެއެވެ. ރުޅިއާއި އެއްވަރަށް އޭނާ ހުރީ ދެރަވެސް ވެފައެވެ. ދެ އިޙްސާސް އެކުވުމުން އޭނާއަށް ކެތްކުރުންވީ އުނދަގޫކަމަކަށެވެ. ޝައުންގެ މޭގައި އަތްއަޅާ ކޮށްޕާލިއިރު އޭނާއަށް ރޮވިއްޖެއެވެ. ޔަލްވީގެ ރުއިމުން ޝައުންގެ ހިތަށް އަސަރުކުރަމުން ދިޔައެވެ. އޭނާ، އެހާ ރުޅިއައިސްފައި ހުރުމުން ޝައުން އަދި ވަކިން ދެރަވިއެވެ. ޔަލްވީ އެވަރަށް ކޮށްޕިއިރުވެސް ޙަރަކާތެއްކޮށް ނުލާ އޭނާ ހުރީ އަމިއްލަ ނަފްސު ކުށްވެރިކުރެވޭތީއެވެ.

“ނޫން ޔާލް… ތިހެން ނުބުނޭ…. އެ ކަމުގައި ކުށްވެރިވަނީ ޝައުން އެކަންޏެއް ނޫން…. އަހަރެމެންވެސް ކުށްވެރިވާނެ….. އެ ދުވަހު ޝަހުނާއަށް ދައްކަން ދޮންބެއާއި ޔާލްއާއި ދެ ކުދިން ލައްވާ އަހަރެމެން ކުރުވި ކަމަކުން ޝަހުނާގެ ހިތުގައި ޔާލްއާއިމެދު ރުޅިވެރިކަން އުފެދުނީ…. އަހަރެމެން ޝަހުނާއަށް ދޮގު ނުހެދިނަމަ، އޭނާ އެހާ ވަރަށް ޔާލްއަށް ނަފްރަތެއް ނުކުރީސް…..” ޖޫސްޕެޓީ ބުއި ދުވަހު، ޝަހުނާ ދެރަކުރަން މިޝަލާއި ޔަލްވީ، ރައްޓެހިވެގެން އުޅެނީއޭ ކިޔައިގެން ދެއްކި ދޮގު ވާހަކަތަކާއި، ޔަލްވީއާއި މިޝަލް ލައްވާ ބާބެކިއު ހެދި ދުވަހު ކުޅުވި ޑްރާމާ މަތިން، ހަނދާންވުމުން މިޝްޔާ ދެރަވެލާފައި ބުނެލިއެވެ.

“އަހަރެމެން އެ ގޮތަށް ކަންތައް ކުރިއޭ ކިޔާފައި، އެ މީހުން އެހާ ދަށު ދަރަޖައަކަށް ވެއްޓެންޖެހޭތަ…..؟؟؟ ތިކަމުގައި، އަހަންނަށް ހަމަ ކުށްވެރި ކުރެވޭނީ ޝަހުނާއާއި، އީޝާ…..” މިޝްޔާގެ ވާހަކަތަކަށް ދެކޮޅުހަދަމުން ޝިއުރީ ބުނެލިއެވެ.

“ކޮންމެ މީހަކު ކޮންމެ ގޮތަކަށް ކަންތައް ކުރިޔަސް އަހަންނަށް ހެޔޮ…. އަހަރެން މި ބުނަނީ ޝައުން ގާތު ދެން އަހަންނާ ވާހަކަ ދައްކަން މަސައްކަތް ކޮށްގެން ނުވާނެއޭ…. އަހަންނަށް ރަނގަޅީ އަހަންނަށް ފެންނަ ހިސާބަށްވެސް ޝައުން ނައިއްޔާ…..” ދެ ލޮލުން އަންނަމުންދިޔަ ކަރުނަތައް އަތުގެ ނުފުށުން ފުހެލަމުން، އޭނާގެ ކުރިމަތިން ދިއުމަށް ޝައުންގެ ގާތުން ދެ ވަނަ ފަހަރަށް ޔަލްވީ އެދުނެވެ. ޔަލްވީގެ އަޑު ބާރުކަމުން އެންމެނަށްވެސް ސިހުން ގެނުވިއެވެ. އަސަރުން ފުރިގެންވީ، ބެލުމަކުން ޔަލްވީއަށް ބަލާލުމަށްފަހު، އެ ތަނުން ދިއުމަށް ޝައުން ހިނގައިގަތީ، ހިތްދަތިވެފައި ހުރެއެވެ.

********************

“އީޝާ…..” ގޭތެރެއަށް ވަންނަން އައި އީޝާއާއި، ޝަހުނާ ސިހިގެން ދިޔައީ ޝައުންގެ ރުޅިވެރި އަޑުން އީޝާގެ ނަމުން ގޮވާލުމުންނެވެ. އެތެރެއަށް ވަންނަން ނޭނގިފައި ތިބި ދެ މީހުންނަށް އެކަކު އަނެކަކަށް ނަޒަރު ބަދަލުކޮށްލެވުނީ، ޝައުން އެހާ ރުޅިއައިސްފައި ހުރުމުންނެވެ. ރުޅިއައިސް ރަތްވެފައި ހުރި ޝައުން ހަލުވިކޮށް ހިނގާފައި އައިސް އީޝާގެ އަތުގެ މުލައްދަނޑީގައި ހިފައި، އޭނާ، މަގުމައްޗަށް ހޫރާލީ ވަކި ގޮތެއް ބަލާފައެއް ނޫނެވެ. ނުވިސްނާ ހުރި އީޝާ ވެއްޓުނީ ބިންމައްޗަށެވެ. ޝައުން ކަންތައް ކުރި ގޮތުން ހިތްހަމަ ނުޖެހިފައި ހުރި ޝަހުނާ، ޝައުންގެ ނަމުން ބާރަށް ގޮވާލިއެވެ.

“ދޮންތަ ހުރޭ މަޑުން…..” ޝަހުނާގެ އަޑަށްވުރެ ޝައުންގެ އަޑު ބާރުވިއެވެ. އެ ވަގުތު ގޭގައި އިތުރު ބަޔަކު ނެތްކަން އެއީ ކާކުގެ ނަޞީބެއްކަމެއް ނޭނގެއެވެ. އެހާ ރުޅިއައިސްގެން ޝައުން ދުވަހަކުވެސް ވާހަކަ ދައްކާފައި ނުވާތީ، ޝަހުނާވެސް ޖެހިލުންވާ ގޮތްވިއެވެ.

“މުޑުދާރު އަންހެނާ…. އަހަންނާ ކަލެއާއި  ދޭތެރޭ މި ވީހާތަނަށް ގުޅުމެއް އޮތިއްޔާ، އެ ގުޅުމެއް އަހަރެން ކަނޑާލައިފިން…. އަހަރެން ހިއެއް ނުކުރަން ތީ ތިހާ ދަށުދަރަޖައިގެ ބައެއްކަމަށް…. އަހަރެން ލަދުގަނޭ ދޮންތަ ތީ އަހަރެންގެ އެއްބަނޑު އެއްބަފާ ދައްތައެކޭ ބުނަންވެސް…. ޔާލްއާއިމެދު އެހާ އިހާނެތިކޮށް ކަންތައްކުރަން އެމީހާ ގާތު ބުނިއިރު، އެއީ ހަމަ ތި މީހުންކަހަލަ އަންހެންކުއްޖެކޭ އެއްފަހަރުވެސް ހިތަށް ނާރާތަ…..؟؟؟؟ އެކަމުގެ ސަބަބުން އޭނާގެ ދިރިއުޅުމަށް ވެދާނެ ގޮތަކާއި ދޭތެރޭ ނުވިސްނޭވަރުގެ ކުޑަކުދިންތަކެއްތަ ތީ… އޭން….. އޭނާގެ ކޮން ކުށެއް އޮވެގެންތަ ކަލޭމެން އޭނައަށް އެ ފަދަ ބޮޑު ދެރައެއް ދޭން ތި ރޭވީ…. ބުނެބަލަ…. އަހަންނަށް ޖަވާބުދީބަލަ…. ދެން ދޮންތަ….؟؟؟؟ އޭނައަށް ދެރައެއް ދިނީއޭ ކިޔާފައި ދޮންތައަށް ހީވަނީތަ ދޮންތައަށް މިޝަލް ލިބިދާނޭ….. މި ވީހާ ދުވަހުވެސް މިޝަލް ރުހުމުގެ ލޮލަކުން ބަލާލާފައި ނުވާއިރު، ދޮންތަ މައިތިރިވާކަށް ނުވޭތަ….؟؟؟ ކަލޭމެން ދެ މީހުންގެ ސަބަބުން، މިއަދު އަހަރެން ވަރަށް ލަދުގަނެއްޖެ….. އަހަރެންގެ އަތުން ފައިން ގޯހެއް ނުހެދެނިސް މިތަނުން ދާން އުޅޭ އީޝާ…. ދިއުމުގެ ކުރިން އަޑު އަހާ…. އީޝާ ކިތަންމެ ބޭނުން ނުވިކަމުގައިވިޔަސް އަހަރެންގެ ހިތުން ޔާލްއަށް ޖާގައެއް ދެވިއްޖެ…. އީޝާއަށް ނުދެވޭވަރުގެ ޖާގައެއް…. އަހަރެން ޔާލްދެކެ ލޯބިވޭ…. ވަރަށް ބޮޑަށް ލޯބިވޭ….. އަހަންނަށް ޙަޤީގީ ލޯބި މި ވެވުނީ އަދި ކިރިޔާ…. އެވެސް ޔާލްދެކެ….. އަދި އަހަރެން ކަލެއަށް އިންތިހާއަށް ނަފްރަތުކުރަން….. ވެގެން ވަންޏާ ދެން އަހަރެން ފެންނަ ހިސާބަށްވެސް ނާންނާތި….” ބުނަން ބޭނުންވި ހުރިހާ އެއްޗެއް ބުނެވުމުން ޝައުން ކޮޓަރިއަށްވަދެ ބަންލާފައި ދޮރު ލެއްޕިއެވެ. ދޮރުގައި ލެނގިލައިގެން އިނދެ އޭނާ، ބޮލުގެ އިސްތަށިގަނޑު ތެރެއަށް ދެ އަތް މަހާލިއެވެ. މީގެ ކުރިން ދުވަހަކުވެސް ނުވާ ވަރަށް މިއަދު އޭނަގެ ހިތަށް އަސަރުކޮށްފިއެވެ. ޔަލްވީދެކެ ލޯބިވެވި، އޭނާގެ ގާތުގައި އެ ވާހަކަ ބުނުމުގެ ކުރިން، ޔަލްވީ އެ ވަނީ އޭނާ ދެކެ އިންތިހާއަށް ރުޅިއައިސްފައެވެ. އެވަރުން ނުވެގެން އޭނާއާއި ދުރުގައި ހުންނަންވެސް ބުނީއެވެ.  ހުރި ހިތާމައެއްގެ ބޮޑުކަމާއިއެވެ.

********************

ދުވަސްތައް ފާއިތުވަމުން ދެއެވެ. އެ ދުވަހަށްފަހު، ޔަލްވީއާއި، ކިތަންމެ ވާހަކަ ދައްކަން ބޭނުންވިކަމުގައިވިޔަސް، އޭނާގެ ކުރިމައްޗަށް އަރާނެ ހިތްވަރެއް ޝައުނަކަށް ނުލިބުނެވެ. ޔަލްވީގެ ޙާލަކީތޯއެވެ. އެ ދުވަހު، ޝައުނާއި ދިމާއަށް އެ ހުރިހާ އެއްޗެއް ކިޔުމުން އެކަމާ، އެންމެ ދެރަވީވެސް އޭނާއެވެ. އެ ދުވަހު މާ ބޮޑަށް ދެރަވެ، ރުޅިއައިސްފައި ހުރުމުން އެ ވަގުތު، އޭނާއަށް އެ ހުރިހާ އެއްޗެއް ކިޔުނު ކަމުގައިވިޔަސް، ސިކުނޑި ރަނގަޅަށް މަސައްކަތްކުރަން ފެށުމުން، އޭނާ ފަހުން އެކަމާ ދެރަވެ ރުއިވަރު މާތްﷲ ދެނެވޮޑިގަންނަވާނެއެވެ. އެކަމުގައި ޝައުންގެ ކުށެއް ނެތްކަންވެސް އޭނާއަށް ވިސްނުނީ ސިކުނޑި ރަނގަޅަށް މަސައްކަތް ކުރަންފެށުމުންނެވެ. އޭނާ އެހާ ބޮޑަށް ދެރަވީ، ޝައުންގެ ކުށެއް ނެތްއިރުވެސް ޝައުނާއި ދިމާއަށް އެއްޗެހި ކިޔުނީތީއެވެ. އެ ދުވަހުގެ ފަހުން ޝައުންގެ ފަރާތުން ފެންނަންފެށި ދުރުކަމުންވެސް އޭނާގެ ހިތަށް ފުން އަސަރުތަކެއް ކުރުވިއެވެ.

********************

ރާހިލްގެ ޙަޤީގަތް ހޯދުމަށް އެކި ގޮތްގޮތަށް މަސައްކަތްކޮށްގެންވެސް އިޔާޒަށް އޭނާގެ ޙަޤީގަތް އެނގޭގޮތެއް ނުވިއެވެ. އެހެންކަމުން އޭނާވެސް މަސައްކަތް މެދުކަނޑާލީ، އިމްތިހާނަށް ހުރިހާ ސަމާލުކަމެއް ހުސްކޮށްލަން ބޭނުންވާތީއެވެ.

ދިރިއުޅުމަށް ކޮންމެފަދަ އިންޤިލާބެއް އައިސްފައިވީނަމަވެސް، ހަތަރު ކުދިން ހިތްވަރާއިއެކު، ފަހު އިމްތިޙާނުން ރަނގަޅު ނަތީޖާއެއް ލިބޭތޯ އަތުކުރި އޮޅާލިއެވެ. އެކުވެރިންނާއި، ބައްދަލްކުރުން ތަންކޮޅެއް މަދުކޮށްލުމަށްފަހު، ކިޔެވުމުގައި ގިނަ ވަގުތުތައް ހޭދަކުރިއެވެ.

********************

ދުވަހަކަށްފަހު، ދުވަހެއް ފާއިތުވަމުންގޮސް، ފަހު އިމްތިހާންވެސް ނިމިއްޖެއެވެ. އިމްތިހާން ނިމުމުން، ސްކޫލްގެ މެނޭޖްމަންޓާއި ގުޅިގެން އެ އަހަރުގެ ގްރޭޑް ބާރަ ނިންމި ހުރިހާ ދަރިވަރުން އެއްވެގެން “ފެއަރވެލް ޕާޓީ”  ބާއްވަން ނިންމިއެވެ. އެ ޙަފްލާ ބާއްވަން ހަމަޖެއްސުމުން، އެކަމާ އެންމެ އުފާވީ ޔަލްވީއެވެ. ޝައުން ވާހަކަ ނުދެއްކި ކަމުގައިވިޔަސް، އޭނާ ފެނުމުގެ ފުރުޞަތު ލިބޭނެތީއެވެ. ޙަފްލާގެ ކަންތައްތައް ރާވާ ނިމުމުން ހަތަރު ކުދިން އެކީ ސްކޫލުށް ނިކުންނަން ދިޔައީ، އެއީ ދެން ޔުނިފޯމް ލައިގެން ސްކޫލަށް ވަންނަންޖެހޭނެ، އެންމެ ފަހު ދުވަހަށްވުމުން އެ ވާހަކަ ދައްކަމުންނެވެ.

ގޭޓުން ބޭރުވެވުމާއިއެކު، ސްކޫލްގެ ފާރުގައި އަތްއަޅުވާލައިގެން ހިނިތުންވެފައި ހުރި އަފްލާކް ފެނުމުން، އަޔާނީގެ ފިޔަވަޅުތަކަށް ހުއްޓުން އެރިއެވެ.

“ކޮބާ…. އަހަރެން އޭރުވެސް ބުނީމެއްނު އަފޫ، ޔާނީއަށް ދެރަގޮތެއް ނުހަދާނެއޭ… އަމްހާއްތަ ބުނި ބަސްއަހައިގެން، ހަމަ ޔާނީ ކިޔަވާ ނިމެންދެން، އޭނާ ދުރުގައި އެ ހުރީ…. އަޅޭ އަހަންނަށްވެސް އަފޫ ކަހަލަ މީހަކު ލިބޭނެނަމަ…. އަހަންނަށް މިއަދު ޔަޤީންވެއްޖެ އަފޫ ޔާނީދެކެ ވަރަށް ލޯބިވާކަން….” އަޔާނީގެ އަތުގައި ހިފާލަމުން އުފާވެފައި ހުރެ، ޝިއުރީ ބުނެލިއެވެ.

“ޝިއު…. ދެން އޭނާގެ އަތުން ދޫކޮށްލާ…. މިހާރުވެސް އެ ހުރީ އަފޫ ގާތަށް ނުދެވިގެން ލަސްވެފައި….” ޔަލްވީވެސް މަޖާވެލާފައި އަޔާނީއާއި ދިމާކޮށްލިއެވެ. އަޔާނީގެ ދޮން މޫނަށް ފިނިފެންޖަންބުކުލަ ވެރިވެގަތީ އެ ކުދިން ދިމާކުރުމުންނެވެ. އޭރު ދުރުގައި ހުރި އަފްލާކް، އައިސް އެމީހުންގެ ކައިރީގައި މަޑުކޮށްލަނީއެވެ.

“އަފޫއަށް ޔާނީ ޙަވާލު…. އަހަރެމެން މި ދަނީ……” އަފްލާކް އައިސް މަޑުކޮށްލުމާއިއެކު، މިހެން ބުނެފައި ޝިއުރީމެން ހިނގައިގަތެވެ.

“އޯވ….. ޔާނީ…… ރުޅިއައިއްސަތަ…..؟؟؟؟” އަފްލާކާއި ދިމާއަށް ބަލާވެސް ނުލައި، އަޔާނީ، އިސްޖަހާލައިގެން ހުރުމުން  އަފްލާކަށް އަހާލެވުނެވެ.

“އަފޫއެއްނު ރުޅިން އުޅުނީ…..” ކުރިޔަށް ހިނގައިގަންނަމުން އަޔާނީ މަޑުމަޑުން ބުނެލިއެވެ. އޭރުވެސް އޭނާ އަފްލާކާއި ދިމާއަށް ބަލާނުލައެވެ.

“ކަމްއޯން ޔާނީބޭބީ…. ޔާނީއަށްވެސް އެނގެއެއްނު އަހަރެން އެ ގޮތަށް ކަންތައް ކުރީ ރުޅި އައިސްގެން ނޫންކަން…. އަހަރެން ބޭނުން ޔާނީ މަންމަމެންގެ ފުރިހަމަ ރުހުން ހޯދަން…. މަންމަމެން ބުނާ ގޮތަށް ކަންތައް ކޮށްގެންނު، އެ މީހުންގެ ރުހުން ހޯދޭނީ…. އެހެންވެއޭ އަހަރެން ޔާނީއާއި ވާހަކަ ނުދައްކާ ހުރީ…. އެކަމަކު، އޭރުވެސް ބުނީމެއްނު ޔާނީ ކިޔަވާ ނިމެންދެން އިންތިޒާރު ކުރާނަމޭ…. އަހަރެން ޔާނީއާއި ވާހަކަ ނުދެއްކިޔަސް ކޮންމެ ދުވަހަކު އިޔާއަށް ގުޅައިގެން ޔާނީގެ ޙާލު ބަލަން….” އަޔާނީ ހިތްހަމަ ނުޖެހިފައި ހުރިހެން ހީވުމުން އަފްލާކް ދެރަވިއެވެ. ނުހޭން އުޅުނަސް އަޔާނީގެ ގާތަށް ހިނިއައީ އެހެންވެއެވެ. އަޔާނީ ހޭންފެށުމުން އަފްލާކް ބަލާލީ ވާނުވާ ނޭނގުމުންނެވެ.

“އަޅޭ…. އަފޫ ހާދަ ދެރަވެއްޖެއޭ ދޯ…. އަހަންނަށް އެނގޭ އަފޫ އެ ގޮތަށް ކަންތައް ކުރީ ކީއްވެގެންކަން…. އަދި ކޮންމެ ދުވަހަކު އިޔާއަށް ގުޅައިގެން އަހަރެންގެ ޙާލު ބަލާކަންވެސް އެނގޭ…. ބެލްކަނީގަ ހުއްޓާ އަފޫ ފެނިގެން އަހަރެން މަގުމައްޗަށް ނުކުތް ދުވަހު، އަހަރެން ގޮވައިގެން ގެއަށް ގޮސް، އިޔާޒް އަހަންނަށް އެ ހުރިހާ ވާހަކައެއް ކިޔައިދިން….. އަފޫ އެ ގޮތަށް ކަންތައް ކުރަނީ ކީއްވެކަން އެނގުނު ފަހުން އަހަރެންގެ ހިތަށް ހަމަޖެހުމެއް ލިބުނީ….. އިޔާ ބުނި، އަހަންނަށް ނޭނގޭ ގޮތަށް އަފޫ އަހަންނަށް ބަލަން ހުންނަ ވާހަކަވެސް….. އަފޫއަށް ނޭނގުނަސް ބައެއް ދުވަސްދުވަހު، އަފޫ އިޔާޒަށް ގުޅާއިރު، އަހަރެންވެސް އަފޫގެ އަޑު އަހަން….. އިޔާ އެ ވާހަކަތައް ނުކިޔައިދިންނަމަ، އަހަންނަށް ރަނގަޅަށް ނުވެސް ކިޔެވުނީސް….” ހުރިހާ ވާހަކައެއް ދެއްކުމަށްފަހު، އަޔާނީ ހިނިތުންވެލަމުން، އަފްލާކަށް ބަލާލިއެވެ. ބަދަލުގައި އަފްލާކްވެސް ރީތި ހިނިތުންވުމެއް ހަދިޔާ ކުރިއެވެ.

“މާތްﷲ އިރާދަކުރެއްވިއްޔާ ދެން ނުޖެހޭނެ ސިއްރުން އަޑު އަހާ، ސިއްރުން ބަލަން ހުންނާކަށް…. އަހަރެމެން ދެމެދުގައި ލެވިފައިވާ ފާރު މިއަދު މި ފުނޑުފުނޑުވީ… އަހަރެމެންގެ ދިގު އިންތިޒާރަށް ނިމުން އައީ….” ފުން ނޭވާއެއް ބޭރުކޮށްލަމުން އަފްލާކް ބުނެލިއެވެ. އެކަމާ އެއްބަސްވުމުގެ ގޮތުން އަޔާނީ ބޯ ޖަހާލިއެވެ.

“މަޑުކޮށްބަލަ….. އިޔާ ބުނި އަފޫ ރިސޯޓުން ކެނޑިގެން އުޅޭ ވާހަކަ…. ކީއްވެ ރިސޯޓުން ކެނޑުނީ….. އަފޫ އެ ގޮތަށް ކަންތައް ކުރީމަ، ބައްޕަ ރުޅި އަންނާނެއެއްނު….. އަނެއްކާ ދެންމެ ތި ދެއްކީ އަހަރެންގެ އާއިލާގެ ރުހުން ހޯދަން ބޭނުންވާ ވާހަކަ….. ވަޒީފާއަކަށް ނުގޮސް ހުރިއްޔާ އަހަރެންގެ އާއިލާގެ ރުހުމެއް ނުލިބޭނެ……” ކުއްލިއަކަށް އެކަން ހަނދާންވުމުން އަޔާނީގެ ފިޔަވަޅުތައް މަޑުޖައްސާލަމުން އަފްލާކާއި ސުވާލުކޮށްލިއެވެ. މައުސޫމްކަމުން ފުރިގެންގެންވީ ބެލުމަކުން އަޔާނީ ބަލާލުމުން، ލުއިގޮތަކަށް ހީލަމުން، އަފްލާކް، އަޔާނީގެ ކޮލުގައި ހިފާލިއެވެ.

“ޔާނީއާއި ވާހަކަ ދައްކާ ނުލެވޭތާގައި، ޔާނީ ނުފެންނަ ހިސާބުގައި އުޅެން އަހަންނަށް ކެތްނުވީ…. އެހެންވެ ރިސޯޓުން ކެނޑުނީ….. އޭރުން، ޔާނީއާއި ވާހަކަ ނުދެއްކުނަސް އަހަންނަށް ޔާނީ ފެންނާނެއެއްނު….. ދެން ވަޒީފާ ދޯ…. އެކަމާ ޔާނީ ހާސްނުވޭ…. އަހަރެން މި އުޅެނީ މިރަށުގައި ހުންނަ ދިރާގުން ހުސްވެފައި އިން ވަޒީފާއަކަށް ކުރިމަތިލައިގެން….. އިންޓަރވިއުއަށްވެސް ގޮއްސިން…. މިއަދު މީ ޖަވާބު ލިބޭނެ ދުވަސް…. ވަރަށް އުއްމީދުކުރަން އެ ވަޒީފާ ލިބޭނެކަމަށް….. އެ ތަނުން ވަޒިފާ ނުލިބިއްޖެއްޔާ، މިރަށާ ކައިރި ރިސޯޓަކުން ވަޒީފާއެއް ލިބޭތޯ ބަލާނީ…. އެ ގޮތަށްވެސް ނުލިބިއްޖެއްޔާ މަހަށް ނޫނީ ކަންނެއްޔަށް ދާނީ….. އެކަމަކު ޔާނީ ނުފެންނަ ހިސާބު ދުރަކަށް ނުދެވޭނެ…. ނުވެސް ދާނަން….” އަފްލާކްގެ ވާހަކަތައް އަޑު އިވުމުން އަޔާނީ ހުރީ ބުނާނެ އެއްޗެއްވެސް ނޭނގިފައެވެ. އަފްލާކް، އޭނާދެކެ އެހާ ލޯބިވާކަން އެނގުމުން އޭނާގެ ހިތް އުފަލުން ނަށާލިއެވެ. އަޔާނީ އެ ގޮތަށް ބަލަން ހުރުމުން “ކިހިނެއްވީހޭ” އަފްލާކް އަހާލިއެވެ. އަޔާނީ ދެފަރާތަށް ބޯ ހޫރާލަމުން ހިނިތުންވެލިއެވެ. އަދި އަފްލާކްގެ އަތުގައި ހިފައިގެން ކުރިއަށް ހިނގައިގަތެވެ. ދެ ކުދިންގެ މޫނުމަތިންވެސް ފެންނަމުން ދިޔައީ، އުފަލާ ހިތްހަމަ ޖެހުމުގެ ކުލަވަރުތަކެވެ.

********************

ސްކޫލްގެ ގޯތިތެރެ ޒީނަތްތެރި ކުރެވިފައިވަނީ “ސްނޯފްލޭކް” ތީމަށެވެ. މުޅި ތަނަށްވެރިވެފައިވަނީ މަޑު ނޫކުލައިގެ އައްޔެކެވެ. ގަސްގަހުގައި އެލުވާފައިވާ “ސްނޯފްލޭކްސް” ތަކަށް އެ އަލި އެޅުމުން ފެންނަނީ ވަރަށް ހިތްގައިމު ގޮތަކަށެވެ. އެކި ބައިބަޔަށް މޭޒުދޮށުގައި އިށީނދެގެން ތިބި އެންމެންވެސް، ގަޔަށް މަހާލާފައިވަނީ، މަޑުނޫކުލައާއި ހުދުކުލައިން ފަރުމާ ކޮށްފައިވާ ހެދުންތަކެކެވެ. މާހައުލު ހަލަބޮލިވެފައިވަނީ ޙަފްލާއަށް އައިސް ތިބި ކުދިންނާއި މީހުންގެ އަޑުންނެވެ. މިރޭ، އެއިން ކޮންމެ މީހެއްގެ މޫނުމަތިންވެސް ފެންނަނީ އުފާވެރިކަމެވެ.

“އެ މީހުން މިތާ ކީއްކުރަނީ…..؟؟؟” އެކުވެރިންނާއި ވާހަކަ ދައްކަން އިން މިޝްޔާއަށް ގޭޓާއި ދިމާއަށް ބަލާލެވުނީ އަޔާނީ މިހެން ބުނުމުންނެވެ. އޭރު ރާހިލާއިއެކު، އިތުރު ދެ ޕޮލިހަކު ގޭޓުން އެތެރެއަށް ވަންނަނީއެވެ.

“ރަށުގެ އެކި މުޢައްސަސާތަކުގައި މަސައްކަތްކުރާ މީހުންނަށްވެސް ދަޢުވަތު އެރުވި… އެހެންވެ އެ މީހުން އެ އައީ….” އަޔާނީގެ ސުވާލަށް ޖަވާބުދިނީ ޔަލްވީއެވެ. އެތެރެއަށް ވަދެގެން އައި ރާހިލާއި މިޝްޔާގެ ހަތަރުކަޅި ބައްދަލްވިހިނދު، ބޭއިޚްތިޔާރުގައި، މިޝްޔާއަށް އިންތަނުން ތެދުވެވުނެވެ. އޭނާއަށް، ހަމަހޭވެރިކަންވީ، ޝިއުރީ އޭނާގެ އަތުގައި ހިފާލަމުން “ކޮންތާކަށް”ހޭ އަހާލުމުންނެވެ.

“ދޮންބެ ގާތަށް ދާން…..” ދުރުގައި އިން މިޝަލް ފެނުމުން، މިޝްޔާ އަވަސްއަވަހަށް ބުނެލިއެވެ. އަދި މިޝަލްގެ ގާތަށް ދާން ހިނގައިގަތެވެ. ރާހިލާއި އަރާ ހަމަވުމުން މިޝްޔާގެ ފިޔަވަޅުތަކަށް ހުއްޓުން އެރީ ކީއްވެކަމެއް ޚުދު އޭނާއަކަށްވެސް ނޭނގެއެވެ. އޭރުވެސް ރާހިލްގެ ނަޒަރު ސީދާވެފައި ހުރީ މިޝްޔާއަށެވެ. ރާހިލްގެ ތޫނު ބެލުންތަކުން މިޝްޔާއަށް ކެތްވަނީއެއް ނޫނެވެ. އެކަމުން ހިތުގައި އުފެދި ބޮޑުވަމުން އައި ޝައްކަށް ބޮޅެއް އިތުރުވުން ނޫންކަމެއް ނުވެއެވެ.

“އަސްލުވެސް ތިދެމީހުން ކަމެއް ދޯ….. އަހަންނަށް މިހާރު ޝައްކު….” މިޝްޔާއަށް ބަލަމުންދިޔަ، ރާހިލްގެ ކަންފަތްދޮށުގައި ޒިއާދު މަޑުމަޑުން ބުނެލިއެވެ. އާދައިގެ މަތިން ރާހިލް ހިނިތުންވެލިއެވެ. އެހެނަސް، މިފަހަރުވެސް އޭނާއަށް ޖަވާބު ދިނުން މުހިއްމުކަމަކަށް ނުވިއެވެ.

“ޝައްކުވިޔަސް އަހަރެން ޖެހޭނީ ހުންނަން…. ރާހިލްގެ ދުލަކުން، އަހަރެންގެ ސުވާލުގެ ޖަވާބެއް ލިބޭނެހެނެއް ހިއެއް ނުވޭ…. ޖަވާބު ބޭނުމިއްޔާ ޖެހޭނީ، އެ މަންޖެ ގާތުގައި އަހަންކަންނޭނގެ….. އެކަމަކު، އެ މަންޖެވެސް ހާދަ ވަރަކަށޭ އެ ބަލަނީ…..” ޒިއާދު މި ހުރިހާ ވާހަކައެއް ދެއްކިއިރުވެސް ރާހިލްގެ ދުލަކުން އެންމެ ލަފްޒެއްވެސް ބޭރެއް ނުކުރެއެވެ. ލުއި ހިނިތުންވުމަކުން ފުއްދާލީއެވެ. ޒިއާދަށް ދެ ފަރާތަށް ބޯ ހޫރާލެވުނީ އެހެންވެއެވެ. ރާހިލްގެ ފަރާތުން އެކަމަށް އެއްވެސް ޖަވާބެއް ނުލިބޭތީ، އެކަމުގެ ޙަޤީގަތް ހޯދުމުގެ ޝައުޤުވެރިކަން އޭނާގެ ހިތުގައި ދުވަހެއް ދުވަހަކަށް އައީ އިތުރުވަމުންނެވެ.

މިޝަލްގެ ގާތަށް ދިޔަ މިޝްޔާ، އެ ތާނގައި ހުރި ހުސްގޮނޑިއެއްގައި އިށީންނަމުން ރާހިލަށް ބަލާލިއެވެ. އޭރުވެސް ރާހިލް ހުރީ މިޝްޔާއަށް ބަލަންކަމުން، އެ ތޫނު ނަޒަރުން ރެކުމަށްޓަކައި، މިޝްޔާއަށް ޖެހުނީ އިސްޖަހާލާށެވެ.

“އޭނަ، ޒީކްއާއި ވަރަށް ވައްތަރުދޯ….” މިޝްޔާގެ ޙަރަކާތްތަކަށް ބަލަން އިން މިޝަލް، ބުނެލިއެވެ. މިޝްޔާއަށް ސިހިފައި މިޝަލާއި ދިމާއަށް ބަލާލެވުނީ ދުވަސްތަކަކަށްފަހު، މިޝަލްގެ ދުލުން ޒިކާންގެ ނަން އަޑު އިވުމުންނެވެ. މިޝަލް ބަލަން އިނުމުން އޭނާ ބޯ ޖަހާލީ، އެކަމަށް އެއްބަސްވުމުގެ ގޮތުންނެވެ.

“މިޝްއަށް ހީވޭތަ އެއީ ޒީކްހެން….؟؟؟؟؟” މިޝަލްގެ ނަޒަރު ސީދާވެފައި ހުރީ ރާހިލަށެވެ. އޭނާ މިޝްޔާއަށް ބަލާކަންވެސް މިޝަލަށް ފާހަގަ ކުރެވުނެވެ.

“އަހަރެންގެ ހިތް ބުނަނީ އެއީ ޒީކްއޭ…. އެކަމަކު، އޭނަ އުޅޭ ގޮތުން ހިޔެއް ނުވެއެއްނު އަހަރެމެން ދަންނަ މީހެއްހެންވެސް…..” ރާހިލަށް ބަލާލުމަށްފަހު، މިޝަލަށް ބަލާލަމުން، މިޝްޔާ ޖަވާބުދިނެވެ. މިޝަލް ބޯ ޖަހާލީ، އެކަމަށް އެއްބަސްވުމުގެ ގޮތުންނެވެ.

“ދޮންބެ ކޮން އިރަކުން ޝިއު ގާތު އެ ވާހަކަ ދައްކަނީ…..؟؟؟” މިޝަލް، ޝިއުރީއަށް ބަލާލިތަން ފެނުމުން މިޝްޔާ އަހާލިއެވެ.

“ތިކަމާ މި ވިސްނަނީ…. މި ހިތަށް އަރަނީ މިރޭ އެ ވާހަކަ ދައްކަންކަމަށް…. ވަރަށް އިންތިޒާރު ކުރެވިއްޖެއެއްނު…. ދެން ކީއްކުރަން ލަސްކުރަނީ ދޯ….” ރަކި ގޮތަކަށް ހީލަމުން މިޝަލް ބުނެލިއެވެ. އޭނާގެ ނިންމުމަށް މިޝްޔާވެސް ތާއީދު ކުރިއެވެ.

ޝިއުރީމެން ގާތުގައި އިށީނދެގެން އިން ޔަލްވީ، އެކި ދިމަދިމާއަށް ބަލާލީ ޝައުން ފެނޭތޯއެވެ. އެ ވަގުތު އިޔާޒާއި އިތުރު ދެ ކުއްޖަކާއިއެކު، މޭޒެއްގެ ދޮށުގައި އިން ޝައުން ފެނުމުން ޔަލްވީއަށް އިސް ޖަހާލެވުނީ ޝައުންގެ ނަޒަރު އޭނާއަށް ސީދާވެފައި ވުމުންނެވެ.

“ޔާލް…. މިހާރު ދެން ވެއްޖެއެއްނު އޭނައަށް މާފުކޮށްފަ، ވާހަކަ ދައްކަން…..” ޔަލްވީގެ ޙަރަކާތްތަކަށް ބަލަން އިން އަޔާނީ ބުނެލިއެވެ.

“އޭނާ އަހަންނާ ވާހަކަ ދައްކައިގެންނު…. މިހާރު އެއްގޮތަކަށްވެސް އޭނަ އަހަންނާ ވާހަކައެއް ނުދައްކާ…. ވާހަކަ ދައްކަން މަސައްކަތެއްވެސް ނުކުރޭ…. ދެން އަހަރެން ކިހިނެއް އޭނައާއި ވާހަކަ ދައްކާނީ…. އަހަންނަކަށް ނުކެރޭނެ އިސްވެ ވާހަކަ ދައްކާކަށް….” ސިއްރުން ޝައުނަށް ބަލާލަމުން ޔަލްވީ ބުނެލިއެވެ.

“ޝައުން ގާތު ވާހަކަ ނުދައްކާށޭ ޔާލް، ބުނީމައެއްނު އޭނަ ވާހަކަ ނުދައްކަނީ….. މިހާރަކަށް އައިސް ވަރަށް ދެރަވެފައި އޭނަ ހުންނަނީވެސް…. ޝައުން ޔާލްއަށް ބަލާލާ ގޮތުން އަހަންނަށް ހީވަނީ އޭނާވެސް މިހާރު ޔާލް ދެކެ ލޯބިވާހެން…. ” ޝިއުރީވެސް އެ ކުދިންގެ ވާހަކައިގައި ބައިވެރިވިއެވެ.

“އެ ދުވަހު، އެހާ ވަރަށް އެއްޗެހި ކިޔުނީމަ، އަހަރެން މި ހުންނަނީ ވާހަކަ ދައްކަން ނުކެރިފަ….” ކުރީ ދުވަހު ކަންތައް ކުރެވުނު ގޮތުން ޔަލްވީ އިނީ އަސްލުވެސް ވަރަށް ދެރަވެފައެވެ.

“އޭނަ ހަމަ އެ ދުވަހު، އެ އީޝާއާއިވެސް ރުޅިވެއްޖެ އޯ….. ޝައުން އީޝާ ގެއިން ނެރުން ގޮތްވެސް ހީހީފަ އިޔާ ކިޔައިދިން…..” އިޔާޒް ކިޔައިދިން ވާހަކަތައް އަޔާނީ އެކުވެރިންނާއި ޚިއްސާ ކުރިއެވެ.

“ނާ ހަމަ ތެދެއްތަ… އެންމެފަހުން، ޝައުން އެ އީޝާއާއި ހަމަ ރުޅިވީތަ…..؟؟؟ އީޝާ މާ މަޑުން ހުންނާތީ އަހަންނަށް ޝައްކުވިއޭ…. ހެހެހެ…. ޔާލް…. މީ ރަނގަޅު ފުރުސަތެއް…. އަހަރެން ބުނާ އަޑު އަހަންޏާ، ހަމަ މިރޭ ޝައުންއަށް މާފުކޮށް، އޭނާއާއި ވާހަކަ ދައްކާ….. މުޅި އުމުރުގައިވެސް ޔާލް ހަމައެކަނި ލޯބިވީ ކުއްޖަކީ އެއީއެއްނު…. ލިބެން އޮއްވަ އެ ފުރުޞަތުގެ ބޭނުންކުރޭ…. އަހަންނަށް ވަރަށް ބޮޑަށް ހީވެ ޝައުންވެސް ޔާލްދެކެ ލޯބިވާހެން…..” ޝިއުރީ ޔަލްވީއަށް ނަޞޭޙަތްތެރިވިއެވެ. އެހެނަސް، އިސްވެ ޝައުނާއި ވާހަކަ ދައްކަން ނުކެރުމުން، ޔަލްވީ އެކަމަށް އިންކާރުކުރިއެވެ.

********************

ޙަފްލާ ނިމުމުން މިޝްޔާ ގެއަށްލުމަށްފަހު، މިޝަލް ދިޔައީ ޝިއުރީ ގެއަށް ލައިދޭށެވެ. ދިޔަ މަގުމަތީ އޭނާ ވިސްނަމުން ދިޔައީ ޝިއުރީއަށް ލޯބި ހުށަހަޅާނެ ގޮތަކާއިމެދުއެވެ. ޝިއުރީއާއި ދިމާއަށް އަވަސްއަވަހަށް ބަލާލެވެނީ ހިތްއަވަސް ވާވަރުންނެވެ. ކުއްޖަކަށް ހިތުގެ ޙާލު ބަޔާންކޮށްދޭ ފުރަތަމަ ފަހަރަށްވުމުން ކުޑަކޮށް ހިތްނުތަނަވަސް ވާގޮތްވިއެވެ.

“މިޝަލް، ކީއްވެ އަނގައިން ނުބުނެ ތި ހުރީ….” މިޝަލް، މާ މަޑުން ހުރުމުން، ޝިއުރީއަށް ކަމަކު ނުދިޔައެވެ.

“ހެހެ… ކަމެއް ނުވެ…. މިރޭ ޝިއު ރީތިކަމުން، މި ހިތަށް އަރަނީ، އަހަންނަށް ލިބޭނެބާއޭ….” ބޯ ކަހާލުމަށްފަހު، ރަކި ގޮތަކަށް ހީލަމުން މިޝަލް ބުނެލިއެވެ. އޭނާގެ ވާހަކައިން ޝިއުރީ ފެށީ ހޭށެވެ.

“އަހަރެން ހަމަ އެހާ ރީތީތަ….؟؟؟ ނޫނީ މި ހެދުންތަ ރީތީ…؟؟؟ އަހަންނަށް ހީވަނީ މިރޭ ރީތިހެން ތި ހީވީ ލާފަ ހުރި ހެދުމަކުންހެން…. އާނ އެހެންޏަ… ތި ނޫނީ، މިޝަލް އަދި އަހަރެން ރީތި ވާހަކައެއް ނުބުނޭ ވިއްޔަ….” ޝިއުރީ މަޖާވެލާފައި މިހެން ބުނުމުން، މިޝަލް ހީލީ މައުނަވީ ގޮތަކަށެވެ.

“ހެދުންވެސް ރީތި…. ޝިއުވެސް ރީތި…. ހިނގާބަ ސެލްފީއެއް ނަގާލަން…. އެންމެ ރީތި އަންހެން ކުއްޖާއާއިއެކު ނަގާ ސެލްފީ…..” ފޮޓޯ ނަގަން ފޯނު ދިއްކޮށްލަމުން، މިޝަލް މިހެން ބުނުމުން، ޝިއުރީ، ލުއިގޮތަކަށް ހީލިއެވެ.

“ޝިއު…. އަހަރެން ވާހަކައެއް ބުނަން ބޭނުން….” ގެއަށް ވަންނަން ހިނގައިގަތް ޝިއުރީ މަޑުކޮށްލީ، މިޝަލް މިހެން ބުނުމުންނެވެ. އަދި މިޝަލް ދައްކަން އުޅޭ ވާހަކައަށް ސަމާލުވެލުމުގެ ގޮތުން މޭމަތީ ދެ އަތް ހުރަސްކޮށްލިއެވެ.

“މިޝަލް…. އަހަރެން މި ހުރީ އަޑު އަހާށޭ….. ބުނެބަލަ ތި ބުނަން އުޅޭ ވާހަކައެއް…..” މިޝަލް ބަހެއް ނުބުނެ ބަލަހައްޓައިގެން ހުންނަން ފެށުމުން ޝިއުރީ ބުނެލިއެވެ. މިޝަލް މަގުގެ ދެ ފަރާތަށް ބަލާލަމުން ތުނިކޮށް ފަޅާފައިވާ ތުނބުޅީގައި އަތް ހިންގާލީ، އެ ވާހަކަ ބުނަން އުނދަގޫވުމުންނެވެ.

“މިޝަލް…..” މިޝަލް އެގޮތަށް ހުންނަން ފެށުމުން ޝިއުރީ އަނެއްކާވެސް މިޝަލްގެ ނަމުން ގޮވާލިއެވެ. މިޝަލް ކުޑަކޮށް ކަރުކެހިލަމުން ވާހަކަ ދައްކަން ތައްޔާރުވިއެވެ. އެހެނަސް، އޭނާއަށް ހަމަހިލާ ބަހެއް ބުނެވޭގޮތެއް ނުވިއެވެ.

“ހެހެހެ…. ސާބަސް މިޝަލް…. ތިވަރުން ނުބުނިއްޔާ ކަންނޭނގެ ރަނގަޅުވާނީ…. އަވަހަށް ދޭ ގެއަށް ގޮސް ނިދާލަން…. މާދަން އަހަރެން ދާނަން ތިގެއަށް…. އޭރުން ދެން ތި ވާހަކައެއް ބުނާނީ…..” މިޝަލް އުޅޭގޮތް ފެނުމުން ޝިއުރީގެ ގާތަށް ހިނިއައެވެ. މިޝަލްގެ އަތުގައި މަޑުމަޑުން ޖަހާލަމުން، އޭނާ ގެއަށް ވަނުމަށް ހިނގައިގަތެވެ.

“އައި.ލަވް.ޔޫ” އެތެރެއަށް ވަންނަން ހިނގައިގަތް ޝިއުރީގެ އަތުގައި ހިފާލަމުން މިޝަލް، މި ތިން ލަފުޒު އިއްވާލިއެވެ. އިވިގެން ދިޔަ ބަސްތަކުން، ހައިރާންވީވަރުން، ޝިއުރީ ހުރީ ފަސްއެނބުރި ބަލައިލާންވެސް ނޭނގިފައެވެ. އެއީ މިޝަލްގެ ދުލުން ދުވަހަކުވެސް އޭނާއަށްޓަކައި އިވިދާނެކަމަށް ހީކުރެވިފައިވާ ލަފުޒުތަކެއް ނޫނެވެ. ޝިއުރީގެ ފަރާތުން އިޝާރާތެއް ނުވުމުން، މިޝަލް، ޝިއުރީގެ އަތްތިލައަށް މަޑުމަޑުން ފިތާލިއެވެ. މިޝަލްގެ މި ޙަރަކާތުން ޝިއުރީއަށް ހަމެހޭވެރިކަންވުމުން، އޭނާ ފަސްއެނބުރި ބަލާލިއެވެ. މިޝަލްގެ މޫނަށް ޝިއުރީ ބަލަމުން ދިޔައީ ދެންމެ އިވިގެން ދިޔަ ބަސްތަކުގެ ތެދުދޮގު ދެނެގަތުމަށެވެ.

ނުނިމޭ