ޔާރު މިވަނީ ލޯތްބޭ ޙަޤީގީ (ތޭރަވަނަ ބައި)

ކައި ނިމިގެން އެންމެން ތިބީ މަޖާވާހަކައެއްގައެވެ. އޭރު ގަޑިން ފަސްގަޑި ބަޔަށްވުރެ ބޮޑު ވެއްޖެއެވެ. އުޑުމަތިން ރަތްވިލާގެ ނިޝާންތައްވެސް ފެންނަމުންދިޔައެވެ. ހިނގާލަން އައިސް އުޅޭ މީހުންތައްވެސް ގެޔަށް ދިއުމަށް މިސްރާބުޖަހާފައިވާތީ ފެނެއެވެ.ފުޓްބޯޅަ ކުޅެން ތިބި ބައިގަނޑުވެސް، ނިންމާލާފައި އެތަނުން ހިނގައްޖެއެވެ. ޝައުންވެސް ކުޅެ ނިމުމުން ޒިކާންމެންނާއި ބައިވެރިވިއެވެ. އެވަގުތު އިޔާޒް ކިޔައިދިން ޖޯކަކުން އެންމެނަށްވެސް ނުހީއެއް ނުތިބެވުނެވެ. ހެމުން އުނގުގައި ބޯއަޅާލި ޔަލްވީ، އެންމެން ހުނުން ހުއްޓާލުމުންވެސް އެގޮތަށް ބޯއަޅައިގެން އިނެވެ. ކައިރީގައި އިން އަޔާނީ އޭނާގެ ގައިގައި ކޮއްޓާލަމުން، އަދިވެސް ހެނީތޯ އަހާލިއެވެ. ނަމަވެސް އެއްވެސް ޖަވާބެއް ނުދީ ޔަލްވީ އިންގޮތަށް އިނީއެވެ. ގިނައިރުވާން ފެށުމުން ކަމެއް ގޯސްވެއްޖެކަން އެންމެނަށްވެސް ނަގައިގަނެވުނެވެ. މިޝްޔާއާއި، ޝިއުރީ، ޔަލްވީގެ ދެކޮނޑުގައި ހިފާ އުފުލާލިވަގުތު އަޔާނީއަށް ހަޅޭލަވައިގަނެވުނީ ޔަލްވީގެ މޫނާއި، އަނގަމަތި ފެނުމުންނެވެ.

---

 

ދެލޯ މެރިފައިވާއިރު ޔަލްވީގެ އަނގައިން ބޮރިލައިގެންގޮސް ފޮނު ނުކުންނަނީއެވެ. އޭނާ އޮތީ ހޭނެތިފައެވެ. އެންމެން ހާސްވެގެން ތެޅި ފޮޅެން ފެށިއެވެ. ޔަލްވީ ހޭއަރާތޯ މިޝްޔާ ގޮވަމުންދިޔައެވެ. ނަހީކް ފެންފުޅިއެއް ދިއްކޮލުމުން މިޝްޔާ ޔަލްވީގެ މޫނަށް ފެންވިއްސާލިއެވެ. ދެތިންފަހަރު އެގޮތަށް ކަންތައް ކުރުމުންވެސް އޭނާ ހޭއަރާގޮތެއް ނުވިއެވެ. ހާސްވެފައި ޔަލްވީއަށް ބަލަން ހުރި މިޝަލް، މަސައްކަތްކުރީ އެމްބިއުލާންސަށް ގުޅޭތޯއެވެ. ޝިއުރީ، ނޫރައިންއަށް ގުޅާފައި ކުރުގޮތަކަށް ކަންވީގޮތް ކިޔައިދިނުމަށްފަހު، ޔަލްވީ ހަސްފަތާލަށް ގެންދާ ވާހަކަ ބުނެލިއެވެ. އަނގަމަތީ އަތްއެޅި ގޮތަށް، އަތް ނަގަން ނޭނގިފައި އަޔާނީ ހުރީ ހަދާނެގޮތެއް ނުވިސްނިފައެވެ. ޔަލްވީގެ އަނގަމަތީގައި ހުރި ފޮނުތައް ފޮހޭވަރުން ނުކުންނަމުން ދެއެވެ. އެންމެންގެ މޫނުމަތިންވެސް ފެންނަނީ ހާސްކަމެވެ. މާގިނައިރެއް ނުވެ އެމްބިއުލާންސް އައުމުން ޔަލްވީ އެއަށް އެރުވިއެވެ. އަދި އެހީތެރިންގެ ގޮތުގައި މިޝްޔާއާއި ޝިއުރީގެ އިތުރުން ނަހީކާއި މިޝަލްވެސް އެރިއެވެ. އަޔާނީއަށް އެއަށް އަރަން ނުކެރުމުން އޭނާ ދިޔައީ ޒިކާނާއިއެކު ސައިކަލްގައެވެ.

 

ސައިރެން އަޅަމުން ބާރު ދުވެލީގައި ދުއްވާފައި ދިޔަ އެމްބިއުލާންސް މަޑުކޮށްލީ ހަސްފަތާލު ދޮރުމަތީގައެވެ. އޭރު މަސައްކަތު ދެމީހަކާއި ނަރުސްކުއްޖެއްގެ އިތުރުން ޑަކްޓަރުވެސް އެތާ މަޑުކޮށްލައިގެން ތިއްބެވެ. އެމްބިއުލާންސުން ޔަލްވީ ބޭލުމާއިއެކު، މަސައްކަތު ދެމީހުން އަވަސްވެގަތީ ބަލިމީހުން ބެލުމަށް ޚާއްސަކުރެވިފައިވާ ކޮޓަރިއަށް ޔަލްވީ ވެއްދުމަށެވެ. ނަހީކާއި މިޝަލްވެސް އެމީހުނަށް އެހީވުމުގައި އުޅުނެވެ. މިޝްޔާމެންބޭރުގައި މަޑުކުރީ އަޔާނީމެން އަންނަންދެނެވެ.

 

ބަލިމީހުން ބެލުމަށް ޚާއްސަކުރެވިފައިވާ ކޮޓަރީގެ ބޭރުގައި މަޑުކޮށްލައިގެން ހުރިހާ ކުދިން ތިއްބެވެ. ޔަލްވީ ހެޔޮ ޙާލުގައި ލެއްވުމަށް އެދި، އެއިން ކޮންމެ ކުއްޖަކުވެސް، މާތްﷲ ގެ ޙަޟްރަތަށް ހިތާ ހިތުން ދުޢާކޮށްލިއެވެ.

ކުޑަކޮށް ދުވަމުންކަހަލަ ގޮތަކަށް ހަސްފަތާލަށް ވަދެގެން އައި ނޫރައިންއަށް މިޝްޔާމެން ފެނުމުން އެދިމާއަށް މިސްރާބުޖެހިއެވެ. އުމުރުން ފަސްދޮޅަހުގެ އަހަރުތައް ގުނަމުންދާ ނޫރައިންގެ މައިންބަފައިންވެސް އެމީހުންނަށް ހިނގޭ އެންމެ ބާރުމިނެއްގައި އޭނާގެ ފަހަތުން ހިނގާފައި ދިޔައެވެ.

 

“ކޮ ބާ  ޔާ ލް…..” ބާރަށް ހިނގާފައި އައުމުގެ ސަބަބުން މާނޭވާލެވެމުންދާތީ، ނޫރައިންއަށް ވާހަކަ ދައްކަންވެސް އުނދަގޫވިއެވެ. އޭނާގެ ދެލޯ ބޮޑުވެފައިވާއިރު ކަރުނައިގެ އަސަރު އެދެލޮލުން ފާޅުވާން ހުއްޓެވެ. އޭނާގެ މައިންބަފައިންގެ ޙާލަކީވެސް އެއީއެވެ. ޑަކުޓަރު އަދިވެސް ޔަލްވީ ބަލަނީކަމުގައި ބުނެ، ނޫރައިން އިށީންނަން ޝިއުރީ ތަންދެއްކިއެވެ. ނަމަވެސް އޭނާ އިށީންނަ ޚިޔާލެއް ނުކުރިއެވެ. ލޯބިވާ ދަރިފުޅުގެ ޙާލު އެހާ ނާޒުކުއިރު އޭނާ ހަމަޖެހިގެން އިށީންނާނީވެސް ފަހެ ކިހިނަކުން ހެއްޔެވެ.؟ މިޝަލް ޔަލްވީގެ މާމައާއި ކާފަ ގޮނޑިބަރީގައި ބޭންދިއެވެ. ނޫރައިން ހުރީ ފާރުގައި ލެނގިލައިގެންނެވެ. އޭނާގެ ދެ ލޮލުން ކަރުނަ ފައިބާތަން ފެނުމުން ޝިއުރީމެންގެ ހިތްތަކަށް ފުން އަސަރުތަކެއް ކުރިއެވެ. ދަރިއަކަށް ދެރައެއް ލިބުމުން އެކަމުގެ ވޭން އެންމެ ބޮޑަށް ތަޙައްމަލް ކުރަނީ މައިންނެވެ. ދަރިންނާއި މައިންގެ ދެމެދުގައިވާ ގުޅުމަކީ މި ދުނިޔެމަތީގައިވާ އެންމެ މާތް ގުޅުމެވެ. ޔަލްވީއަށް އެހެންވުމުން ނޫރައިން ދެރަވާނެވަރު އެކުދިންނަށް އަންދާޒާވެސް ނުކުރެވޭނެއެވެ. ނޫރައިންގެ ކޮނޑުގައި އަތް ބާއްވާލަމުން ޝިއުރީ އޭނާއަށް ހިތްވަރުލައިދިނެވެ. ޔަލްވީގެ ޚަބަރެއްވާނެ އިރަކަށް އިންތިޒާރުކުރަމުން އޭނާވެސް ފާރުގައި ލެނގިލިއެވެ.

 

ޑަކުޓަރު ބެލުމަށްފަހު، ޔަލްވީ ވޯޑަށް ނެރުނީ ހަދަން ބޭނުންވާ ޓެސްޓުތައް ހެދުމަށް ލޭ ނެގުމަށްފަހުއެވެ. އޭރުވެސް ޔަލްވީ ހެއެއް ނާރައެވެ. ނަމަވެސް ހުއްޓުމެއްނެތި އަނގައިން ފޮނުއަންނަމުން ދިޔައެވެ. އެދުވަސްކޮޅަކީ ބަލިތައް މަދު ދުވަސްކޮޅެއްކަމުން، ވޯޑުގައި ޔަލްވީ ފިޔަވައި އިތުރު ބަލިމީހަކު ނެތެވެ. ޔަލްވީގެ ޢާއިލާމީހުންގެ އިތުރުން ޝިއުރީމެންވެސް އޭނާގެ ގާތުގައި މަޑުކޮށްލައިގެން ތިއްބެވެ. މިޝަލްމެން ތިބީ ބޭރު ގޮނޑިބަރީގައެވެ.

 

“ޝިއުމެން ދެން ގެއަށް ދާންވީނު…… މިހާރު އިރުއޮއްސި މަޣްރިބް ނަމާދަށް ބަންގި ގޮވަނީ އެ…. ޔާލްއަށް ވާނުވާ ދައްތަ އަންގާލާނަން…..” މަޣްރިބް ނަމާދަށް ބަންގި ގޮވާއަޑު އިވުމުން މިޝްޔާގެ އަތުގައި ހިފާލައިގެންހުރެ، އަޔާނީއަށާއި ޝިއުރީއަށް ބަލާލަމުން ނޫރައިން ބުނެލިއެވެ. ނޫރައިންއަށް ހިތްވަރުދިނުމުގެ ގޮތުން ދެ ތިން ބަހެއް ބުނެލުމަށްފަހު، ތިން ކުދިން އެކުއެކީގައި ދާން ހިނގައިގަތެވެ.

 

ޝިއުރީމެނަށް ވޯޑުގެ ދޮރުން ނުނުކުމެވި އުޅެނިކޮށް އިވިގެން ދިޔަ ބާރު ހަޅޭކުގެ އަޑާއިއެކު ތިންކުދިންނަށް އެއްފަހަރާ ފަހަތް ބަލައިލެވުނެވެ. އެތެރެއިން ފެނުނު މަންޒަރުން، ޝިއުރީ ހައިރާންވެފައި ބަލަން ހުރިއިރު، އަޔާނީ އޭނާގެ އަތުގައި ބާރަށް ހިފަހައްޓާލީ ދެލޯ ބޮޑުކޮށްލަމުންނެވެ. މިޝްޔާވެސް ހުރީ އަނގަމަތީ އަތްއަޅާލިގޮތަށް ދެލޯ ބޮޑުވެފައެވެ.

 

އޭރު ގަދަހަދާލާފައި އެނދުން ފައިބަން އުޅުނު ޔަލްވީ ހިފެހެއްޓޭތޯ ނޫރައިންގެ އިތުރުން އޭނާގެ މަންމައާއި ބައްޕަވެސް މަސައްކަތްކުރަމުން ދިޔައެވެ. ކަރުބުޑުން ހަޅޭލަވަމުންދިޔަ ޔަލްވީއަށް ހީވަނީ އާދަޔާ ޚިލާފު ބާރެއް ލިބިފައިވާހެންނެވެ. އޭނާގެ ވާތުގައި ހިފަހައްޓައިގެން ހުރި ނޫރައިންގެ އަތް ފޮޅުވާލީ ރުޅިވެރި ދެލޮލުން ނޫރައިންއަށް ކަޅިއަޅާލަމުންނެވެ. ހަށިގަނޑު ހިފަހައްޓާނުލެވުމުގެ ސަބަބުން ފަހަތަށް ޖެހުނު ނޫރައިން ވެއްޓުނީ ޖެހިގެން އޮތް އެނދު މައްޗަށެވެ. ދެފައިގައި ހިފަހައްޓަން މަސައްކަތްކުރި ހަލީމާގެ ގައިގައި ކޮޅުފައިން ޖަހައި ކޮށްޕާލުމުން އޭނާ ވެއްޓުނީ ތަށިމުށިތައް މައްޗަށެވެ. ޖެހުނުގޮތުން ފޫކޮޅަށާއި އަރިކަށްޓަށް ތަދުވީވަރުން އަރިކަށީގައި އަތްއަޅާލަމުން ހަލީމާއަށް “އައްދޯއި” އޭ ބުނެލެވުނެވެ. ޝިއުރީ ދުވެފައި ގޮސް ހަލީމާ އެތަނުން ނެގިއެވެ. ޔަލްވީގެ ކަނާތުގައި ހިފަހައްޓައިގެން ހުރި ފަހުމީއަށް އޭނާ ހިފަހައްޓާލެވެނީ ހަމަ ކިރިޔަ ކިރިޔާއެވެ. އޭރު މިޝްޔާއާއި އަޔާނީގޮސް ނޫރައިންގެ ގާތުގައި މަޑުކޮށްލަނީއެވެ. އެންމެންގެ މޫނުމަތިންވެސް ހާސްކަމާއި ބިރުވެރިކަން ފެންނަމުން ދިޔައެވެ.

 

އެތެރޭގައި އަޑުގަދަވެގެން ބޭރު ގޮނޑިބަރީގައި މަޑުކޮށްލައިގެން ތިބި މިޝަލްމެންވެސް އެތެރެއަށް ބޯ ދިއްކޮށްލިއެވެ. އެއާއިއެކު، ފެނުނު މަންޒަރުން ހައިރާންވީ ނަމަވެސް އެމީހުން އަވަސްވެގަތީ ފަހުމީއަށް އެހީވުމަށެވެ. ޔަލްވީގެ ޙާލު ބަލައިލާން އައި ޝައުނަށާއި އިޔާޒަށްވެސް އާދެވުނީ އެވަގުތުކަމުން އެމީހުންވެސް މިޝަލްމެންގެ ފަހަތުން ދިޔައެވެ. އޭރު ފަހުމީގެ އަތުން ރެކިގަނެގެން ޔަލްވީ ދުއްވައިގަންނަނީއެވެ. މިޝަލްމެންނަށް އޭނާ ހިފަހައްޓާލެވުނީ ކިރިޔާއެވެ. ފަސް ފިރިހެނުންވެގެން ޔަލްވީ ގެނެސް އެނދުގައި ބޭއްވުމުން ފަހުމީ އަވަސްވެގަތީ ފެން ކިޔަވާ ސުލައިމާނުބޭ ބަލާ ދިއުމަށެވެ. ޔަލްވީ ހިފަހައްޓަން އުޅުމުގެ ތެރެއިން އުނަގަނޑަށް އެރި ތަދު ނުފިލާ ހުރުމުން އުނަގަނޑުގައި އަތް އަޅައިގެން ހުރެ ފަހުމީ ހިނގައިގަތެވެ.

 

ޔަލްވީގެ އެތެރެހަށީގައިވަނީ އާދަޔާ ޚިލާފު ބާރެއްކަމުން، އެއްވަރުގެ ބާރުގަދަ ފަސް ފިރިހެނުންނަށް އޭނާ ހިފަހައްޓާލެވެނީ ހަމަ ކިރިޔާއެވެ. އޭރުވެސް ހަޅޭލަވަމުން ޔަލްވީ މަސައްކަތް ކުރީ އެނދުން ފައިބާށެވެ. ހަސްފަތާލުގައި މަސައްކަތްކުރާ އެކި މީހުންވެސް އެވަގުތު އެތަނަށް އެއްވެ ތިއްބެވެ. އޭގެ ތެރޭގައި ޑަކުޓަރާއި ނަރުހުންވެސް ތިއްބެވެ. ޔަލްވީއަށް ވާގޮތް ބަލަން އެމީހުނަށް ތިބެވުނީ އެއީ ޑަކުޓަރީ ފަރުވާއަކުން ރަނގަޅު ކުރެވޭނެ ބައްޔެއް ނޫންކަން އޭނާގެ ޙަރަކާތްތަކުން އެނގުމުންނެވެ.

 

މާ ގިނަ އިރެއްނުވެ ފަހުމީ ވޯޑަށް ވަދެގެން އައީ ސުލައިމާނުބޭ ގޮވައިގެންނެވެ. ސުލައިމާނުބެ އައުމުން އެތަނަށް އެއްވެ ތިބި މީހުންތަށް އެއްފަރާތްވެލިއެވެ. ޔަލްވީގެ ގާތުގައި މަޑުކޮށްލަމުން ސުލައިމާނުބެ އެދުނީ ފެންތަށްޓެއް ގެނެސްދިނުމަށެވެ. މަސައްކަތު މީހަކު ފެންތަށްޓެއް ގެނެސްދިނުމުން ކިޔެވުމަށްފަހު، އެއަށް ފުމެލިއެވެ. އަދި އެފެންތަށިން ފެންފޮދެއް ނަގާ ތިން ފަހަރުމަތިން ޔަލްވީގެ މޫނަށާއި، ގަޔަށް ވިއްސާލުމުން އޭނާ މައިތިރިވިއެވެ. ސުލައިމާނުބޭގެ އިޝާރާތަށް ޔަލްވީގެ ގައިގައި ހިފަހައްޓައިގެން ތިބި މިޝަލްމެން އަތް ދޫކޮށްލި ނަމަވެސް އެމީހުން ތިބީ ހުޝިޔާރުވެގެންނެވެ.

 

ދެންމެ ހަޅޭލަވާ ގަދަހަދަމުންދިޔަ ޔަލްވީ މައިތިރިވިއެވެ. އެނދުމަތީ ދެފައި ވަށްކޮށްލައިގެން އިންއިރު އޭނާގެ ތުންފަތަށް ލާނެއް ހިތުންވުމެއް ވެރިވެފައިވެއެވެ. ކަނާތުގެ ކުޑަވާއިނގިލި އަނގަޔަށް ލައިގެން ދެފަރާތަށް ހެލިލަ ހެލިލާ އިނދެ، ފަހަރަކު މީހެއްގެ މޫނަށް ބަލަމުން ދިޔައެވެ. ޔަލްވީގެ ޙަރަކާތްތައް ހުރިގޮތުން އަދިވެސް އޭނާ ރަނގަޅު ނުވާކަން އެތަނަށް އެއްވެ ތިބި އެންމެނަށް ޔަޤީންވެއެވެ. ކުރިމަތިން ފެންނަމުންދިޔަ މަންޒަރަކީ ޝިއުރީމެންނަށް އައު މަންޒަރެއް ނަމަވެސް އެއީ ނޫރައިންއަށް އަލަށް ފެނުނު މަންޒަރެއް ނޫނެވެ. ޔަލްވީ އެޙާލުގައި ތެޅިފޮޅޭތަން ފެންނަ ކޮންމެ ފަހަރަކު އޭނާގެ މައިލަގޮނޑިއަށް ކެތްނުވާ ވަރަށް އަސަރު ކުރެއެވެ. ބައެއްފަހަރު ހިތްދަތިވެގެން ގޮސް ހިތް ފަޅިފަޅިވެގެން ހިނގައިދާނެހެން ހީވާ ފަހަރުވެސް އާދެއެވެ.

 

ފާރުގައި ލެނގިލައިގެންހުރެ ލޯބިވާ ދަރިފުޅަށް ބަލަން ނޫރައިން ހުރީ ފެންކަޅިވެފައެވެ. އޭނާއަށް ހިތްވަރުދިނުމުގެ ގޮތުން ހަލީމާ އޭނާގެ ކޮނޑުމަތީގައި އަތްބާއްވާލި ނަމަވެސް ހަލީމާއަށްވެސް ވަނީ ޔަލްވީގެ ޙާލު ފެނުމުން ފުން އަސަރުތަކެއް ކޮށްފައެވެ.

 

“މީ މި މަންޖެއަށް ކުރިންވެސް ވާގޮތެއްތަ…..؟؟؟؟ ނޫނީ މިއަދު އަލަށް ވީކަމެއްތަ…..؟؟؟؟؟” ސުލައިމާނުބޭ ސުވާލުކޮށްލީ ފަހުމީއަށް ބަލާލަމުންނެވެ. ފަހުމީ ނޫރައިނަށް ބަލާލުމުން ނޫރައިން ފަހުމީގެ ގާތަށް ޖެހިލިއެވެ.

“މިހެންވާތާ ދެ އަހަރު ވެދާނެ….. އެކަމަކު މިރަށަށް އައި ފަހުން އަދި މިނޫނީ މިކަހަލަ ކަމެއް ދިމައެއް ނުވޭ….” ނޫރައިން އޮޅުންފިލުވައިދިނެވެ. ނޫރައިންގެ ޖަވާބުން އެތާ ތިބި އެންމެނަށްވެސް ސިހުން ގެނުވިއެވެ. މިޝްޔާމެން ހައިރާންވެ ތިބެ އެކަކު އަނެކަކަށް ބަލާލެވުނީ މީގެ ކުރިން އެކަހަލަ އެއްވެސް ވާހަކައެއް ޔަލްވީ ދައްކާފައިނުވާތީއެވެ.

“ވަރަށް ގިނައިން ފަންޑިތަވެސް ހެދިން…. އެކަމަކު ރަނގަޅުވާ ގޮތެއް ނުވި……” ދެރަވެލާފައި ނޫރައިން މިހެން ބުނުމުން ފަހުމީ ނޫރައިންގެ ކޮނޑުގައި އަތްބާއްވާލިއެވެ.

“މީނާ އަދި މުޅިއަކުން ރަނގަޅެއް ނުވެ…. ފަންޑިތަ ހެދުން އެއީ ރަނގަޅު ކަމެއް ނޫން….. މީ ބޭބެ މި ކިޔަވާކަހަލަ އާދައިގެ ފެންތަށްޓެއް ކިޔަވައިގެން ރަނގަޅު ކުރެވޭނެކަމެއްވެސް ނޫން…. މިކަމަށް ޖެހޭނީ ރުޤްޔާ ކިޔަވަން…… ” ސުލައިމާނުބޭ މިހެން ބުނެލީ އެއްފަހަރު ޔަލްވީއަށް އަދި އަނެއްފަހަރު ނޫރައިންއަށް ބަލާލަމުންނެވެ.

“ބޭބެ ދަންނަން ރުޤްޔާ ކިޔަވަން ވަރަށް ރަނގަޅު މީހެއް…. އެމީހާއާއި ވާހަކަ ދައްކާލާފައި ޚަބަރެއް ވެލާނަން…..  މިމަންޖެ މިތާ ނުބާއްވާ ގެއަށް ގެންދޭ….. މިތަނުން މިމަންޖެއަށް ދެވޭނެ ފަރުވާއެއް ނޯންނާނެ…..” މަޣްރިބް ނަމާދަށް މިސްކިތަށް ދާން ތެދުވެފައި ސުލައިމާނުބޭ ބުނެލިއެވެ.

 

“އަދި ބުނަން…. ދެނަމާދުދޭތެރޭ ކޮންމެވެސް މި މަންޖެ ބޭރަށް ނުނެރޭތި….. އިޝާ ނަމާދަށް ބަންގި ގޮވީމަ ގެއަށް ގެންދާނީ…..” ވަކި ހިސާބަކަށް ގޮސްފައި މަޑުކޮށްލަމުން ސުލައިމާނުބޭ މިހެން ބުނުމުން ފަހުމީ ބޯޖަހާލިއެވެ.

***********************

 

އަޔާނީ ކޮޓަރީގެ ދޮރުހުޅުވާލިއެވެ. ކޮޓަރިތެރެއިން އޭނާއަށް މަރުހަބާކީ ކަނު އަނދިރިކަމާއި ހަމަހިމޭންކަމެވެ. އަޔާނީ، ބޭރުގައި ހުރެފައި ދޮރުކައިރީގައި ހުރި ސްވިޗްތަކަށް އޮބާލަމުން،  ކޮޓަރީގައި ހުރި ދެހޮޅިބުރި އެކީ ޖައްސާލިއެވެ. ހިންދިރުވާލަމުން ކޮޓަރިއަށް ނަޒަރު ހިންގާލެވުނީ ޔަލްވީގެ ޙަރަކާތްތަކުން ހިތުގައި އުފެދިފައިވާ ބިރުވެރިކަމެއްގެ ސަބަބުންނެވެ. އެތެރެއަށް ވަދެ ދޮރުލައްޕާލިއިރު ހިތް ނެގިނެގިފައި ޖެހެނީއެވެ. އެއްލި ކަޅިއަކުން ބެލްކަނީގެ ދޮރު ހުޅުވާފައި ހުރިތަން ފެނުމުން އިތުރަށް ހިތްބިރުގަންނަ ގޮތްވިއެވެ. ދާން ނުދާން ހުރެފައި އެދިމާއަށް ހިނގައިގަތީ ޖެހިލުންވެފައި ހުރެއެވެ. އޭރު ދުނިޔެމައްޗަށްވަނީ އަނދިރިކަން ވެރިވެފައެވެ. ފަންކާ ނުޖަހާ ހުރުމުގެ ސަބަބުން ކޮޓަރިތެރެއަށް ހިމޭންކަން ވެރިވެފައިވެއެވެ. އެހިމޭންކަމުގައި އިވެމުންދިޔަ ފަނިފަކުސާގެ އަޑުވެސް އަޔާނީއަށް އިވުނީ ބިރުވެރިއަޑެއް އިވޭހެންނެވެ. އިރުއިރުކޮޅާ ހިންދިރުވާލެވެނީ އެހެންވެއެވެ. އަޔާނީ އަވަހަށް ބެލްކަނީގެ ދޮރު ލައްޕާލިއެވެ. އެއަށްފަހު ފާޚާނާއަށް ވަދެ ވުޟޫކޮށްލައިގެން ނުކުމެ މަޣްރިބް ނަމާދު ކޮށް ޤުރްއާން ކިޔަވާލިއެވެ. ކިޔަވާ ނިމުންއިރު އޭނާ ހުރީ ފެންބޮވައިގެންފައެވެ. ފެން ބޯން ބަލާލިއިރު ފެންފުޅި ހުސްވެފައި ހުރުމުން އޭނާ ދިޔައީ ފުޅިއަށް ފެންއަޅާށެވެ.

ފުޅިއަށް ފެންއަޅައިގެން އައި އަޔާނީ، ކޮޓަރީގެ ދޮރު ހުޅުވާލުމާއިއެކު އޭނާގެ މޫނުގައި ބޮސްދިނީ ފިނިފިނި ވައިރޯޅިއެކެވެ. އެހެނަސް އެވައިރޯޅީގެ ސަބަބުން އަޔާނީގެ ހިތަށް ފިނިކަން ލިބުމުގެ ބަދަލުގައި ހިތް ނުތަނަވަސްވިއެވެ. ބެލްކަނީގެ ދޮރުހުޅުވިފައިވާތަން ފެނުމުން އޭނާއަސް ދެލޯ ބޮޑުކޮށްލެވުނެވެ. އަތުގައި އޮތް ފެންފުޅިވެސް ނުވެއްޓުނީ ކިރިޔާއެވެ. މޫނުމަތީ ދާތިކިތަށް ވިދަން ފެށީ ހާސްވީވަރުންނެވެ. އެ ދޮރަކީ ބައެއް ފަހަރު މައްސަލަޖެހޭ ދޮރެއްކަމުން އޭނާއަށް ރަނގަޅަށް ނުލެއްޕެނީކަމަށް ހީކޮށް ބިރުގެންފައި ހުރިނަމަވެސް އަޔާނީ ދިޔައީ ދޮރުލައްޕާށެވެ.

ދޮރު އަތްގަނޑުގައި ހިފާލި ވަގުތު ކަޅުފޮއި އަނދިރީގެތެރެއިން ބެލްކަނީގެ ރެއިލިންގައި ހިފަހައްޓައިގެން މީހަކު ހުރިތަން ފެނުމުން އަޔާނީގެ އަތުގައި އޮތް ފެންފުޅި ވެއްޓުނެވެ. އަޑުގެ ކޮޅަށް ހަޅޭލަވަން ކުރި މަސައްކަތް ވީ ބޭކާރެވެ. މާބޮޑަށް ބިރުގަތުމުން އަޑު ބޭރުވާގޮތް ނުވީއެވެ. ފެންފުޅި ވެއްޓުން އަޑަށް ރެއިލިންގައި ހިފަހައްޓާލައިގެން ހުރި އިޔާޒް ފަސްއެނބުރި ބަލާލިއެވެ. ބެލްކަނި ދޮރުކައިރީ މޫނުގައި ދެއަތް އަޅާލައިގެން ހުރި އަޔާނީ ފެނުމުން ދެބުމަ ގޮށްޖަހާލެވުނީ އޭނާ ހުރިގޮތް ފެނުމުންނެވެ. ހިތުގައި ސުވާލު އުފެދުނު ނަމަވެސް އަޔާނީއާއި ގާތްވެލާ އޭނާގެ ކޮނޑުގައި އަތްބާއްވާލަމުން ގޮވާލިއެވެ. ބިރުގެންފައި ހުރި އަޔާނީއަށް އިޔާޒްގެ އަޑު އިވުނީ ބިރުވެރިކޮށެވެ. އިޔާޒަށް ބަލާލުމެއްވެސް ނެތި ކޮނޑުމަތީ އޮތް އޭނާގެ އަތް ފޮޅާލުމަށްފަހު ގައިގައި ހުރި ބާރެއްލާފައި ދުއްވައިގަތީ ކޮޓަރީން ނުކުންނާށެވެ. އެހެނަސް އޭގެ ކުރިން އިޔާޒްގޮސް އަޔާނީ ހުއްޓުވަމުން އެއީ އޭނާކަމުގައި ބުނެލިއެވެ. އަޔާނީގެ ފިޔަވަޅުތައް މަޑުޖެހުނުނަމަވެސް އޭނާގެ ހިތް އޮބި ނޯންނަވަރަށް ތެޅެމުންދިޔައެވެ. ބިރުގެންފައިވާ ދެލޮލުން އިޔާޒަށް ބަލަމުން ދިޔައީ އެއީ އިޔާޒްކަން ޔަޤީންކުރަން ބޭނުންވެފައި ހުރެއެވެ.

“އަހަންނަށް ކިހިނެއް އެނގެނީ ތީ އިޔާކަމެއް….؟؟؟ އިޔާ ސިފައިގައި ހުރި ޖިންނިއަކަށްވެސް ވެދާނެ…. ޝަހާދަތް ކިޔާ އޭރުން އަހަރެން ޤަބޫލުކުރާނީ….؟؟؟؟” އިޔާޒާއި ދުރަށް ޖެހިލަމުން އަޔާނީ ބުނެލިއެވެ. އޭރުވެސް އޭނާގެ ބޮޑު ދެލޮލުން ބިރުގެންފައިވާކަމުގެ އަސަރުތައް ފާޅުވާން ހުއްޓެވެ. އެވާހަކަތަކުން އިޔާޒަށް ޗޮކެއް ކަނޑާލެވުނެވެ.

“އަޖައިބު ހީވެދާނެ…. އަޅެ އަހަރެން އެންމެ ތުއްތުއިރުން ފެށިގެން މިހާވަރު ވަންދެން އުލެ ބޮޑުވީ ސިސީއާއިއެކީ އެއްނޫންތަ….، އެކަމަކު މިރޭ ކުއްލިއަކަށް މީ އަހަރެންކަން ޔަޤީންކުރަން ޝަހާދަތް ކިޔަން ތި ޖެއްސީ…..” އަޔާނީގެ ވާހަކަ ހުރިގޮތުން އިޔާޒްހުރީ ހިތްހަމަ ނުޖެހިފައެވެ. އެހެނަސް އަޔާނީގެ ހިތަށް ތަސައްލީ ހޯދައިދިނުމަށްޓަކައި އޭނާ ޝަހާދަތްވެސް ކިޔާލިއެވެ. އަޔާނީ ފުން ނޭވާއެއް ބޭރުކޮށްލީ ހިތަށް ލިބިފައިވާ ބިރުވެރިކަން ކުޑަވުމުންނެވެ.

“އެކަމް އިޔާ ކޮން އިރަކުތަ ބެލްކަންޏަށް ވަނީ…..؟؟” އަނެއްކާވެސް އަޔާނީގެ ހިތަށް ބިރުވެރި ޚިޔާލްތައް ވެރިވާން ފެށިއެވެ. އިޔާޒާއި ދުރަށް ޖެހިލަމުން އޭނާ ބަލަން ހުރީ ފާޑަކަށްށެވެ. އަޔާނީގެ ބަސްމަގާއި ޢަމަލުތައް ހުރި ގޮތުން އިޔާޒްގެ ރުޅިގަދަވުން ނޫންކަމެއް ނުވިއެވެ.

“މީގެ ކުޑައިރުކޮޅެއް ކުރިން އަހަރެން އައީ…. އޭރު ސިސީ ނެތް ކޮޓަރިއަކު….. އެހެންވެ ސިސީ އަންނަންދެން އަހަރެން އެތާ މަޑުކޮށްލީ…. ކިހިނެއްވެގެންތަ މިރޭ މާ ފާޑެއްގެ ސުވާލުތަކެއް ތިކުރަނީ…..؟؟؟” ދެއުކުޅުގައި އަތްވިއްދާލަމުން ދެބުމަ ގޮށްޖަހާލައިގެން ހުރެ އިޔާޒް އަހާލިއެވެ. އަޔާނީ، ފަޒާގެ ތެރެއަށް ފުން ނޭވާއެއް ދޫކޮށްލިއެވެ. މޫނުމައްޗަށް ޖަމާވެފައިހުރި ދާތިކިތައް އަތުގެ ނުފުށުން ފުހެލަމުން ގޮސް ކޮޓަރީގައި ހުރި ސޯފާގައި އިށީނެވެ. އިޔާޒްގެ ސުވާލުތަކަށް ޖަވާބު ދޭކަށް އޭނާ ނޫޅެއެވެ. އަޔާނީގެ ޙަރަކާތްތަކަށް އިރުކޮޅަކު ބަލަން ހުރެފައި އިޔާޒް ދެފަރާތަށް ބޯ ހޫރާލިއެވެ. އަދި ލަސްފިޔަވަޅުތަކެއް އަޅަމުންގޮސް އަޔާނީގެ ގާތުގައި އިށީނެވެ.

“ސިސީ…. ސިސީއަށް އެނގޭތަ ޔާލްއަށް ކުރިން އެހެން ވާކަން…. މިބުނީ ޔާލްގެ އެ ޑާކް ސީކްރެޓްގެ ވާހަކަ ސިސީމެންނަށް ކިޔައިދިންހޭ…؟؟؟؟” ސޯފާގެ ލެނގޭބައިގައި ލެނގިލަމުން އިޔާޒް ސުވާލުކޮށްލިއެވެ. ޔަލްވީގެ ފަރާތުން ފެނިގެންދިޔަ އާދަޔާ ޚިލާފް ކަންތަކުން، ގެއަށް އައީއްސުރެވެސް އޭނާއަށް އެކަމާ ވިސްނެނީއެވެ. އެހެންކަމުން އަޔާނީގެ ކޮޓަރިއަށް އޭނާ ދިޔައީ އެކަމާ ބެހޭގޮތުން އަޔާނީގެ ގާތުން އިތުރަށް އޮޅުންފިލުވުމުގެ ބޭނުމުގައެވެ. ޔަލްވީއަށް އެހެންވާން ދިމާވި ސަބަބު އެނގެން ބޭނުންވެފައި ހުރެއެވެ.

“ޔާލް އެކަހަލަ އެއްވެސް ވާހަކައެއް ނުދައްކަ….” ބޯހޫރާލަމުން އަޔާނީ ބުނެލިއެވެ.

“ވެދާނެ ދޯ ބުނަން ނުކެރުނީ ކަމަށްވެސް……” ވިސްނަން އިނދެފައި އިޔާޒް މިހެން ބުނުމުން އަޔާނީ ބޯޖަހާލިއެވެ.

“އަހަންނަށް އެކަހަލަ މަންޒަރެއް މިފެނުނީ އަދި އަލަށް…. މިރަށު ކުއްޖަކަށް އެކަހަލަ ކަމެއް ނުވޭ ދޯ…..” އަޔާނީ ބޯޖަހާލިއެވެ. އެ ރަށަކީ އެކަހަލަ ކަމެއް ހިނގާފައިވާ ރަށަކަށް ނުވުމުން އޭނާއަށްވެސް އެކަހަލަ މަންޒަރެއް އެ ފެނުނީ އަދި ފުރަތަމަ ފަހަރަށެވެ. އެހާ ބޮޑަށް ހިތް ބިރުގަތީވެސް އެހެންވެއެވެ.

“ސިސީ ދެން އެހާ ބޮޑަށް އެކަމާ ނުވިސްނާ… މާތް ﷲ އިރާދަ ކުރެއްވިއްޔާ ޔާލް ވަރަށް އަވަހަށް ރަނގަޅުވެދާނެ…..” އަޔާނީގެ މޫނުމަތިން ހާސްވެފައިވާކަމުގެ އަސަރުތައް ފެންނާން ހުރުމުން، އޭނާގެ ހިތްހަމަ ޖައްސާލަދިނުމަށްޓަކައި އިޔާޒް ބުނެލިއެވެ. އަޔާނީ ހިނިތުންވާން މަސައްކަތް ކުރަމުން ބޯޖަހާލިއެވެ. އިޝާ ނަމާދު ބަންގި ގޮވަން ފެށުމުން ނަމާދަށް ދަނީކަމަށްބުނެ އިޔާޒް ތެދުވުމުން އަޔާނީވެސް ނަމާދުކުރުމަށް ތައްޔާރުވެލިއެވެ.

********************

 

އެކިދިމަދިމާއިން ބަނދަރަށް މީހުންތައް ޖަމާވަމުން ދެއެވެ. ފުރަން އަންނަ މީހުންނާއި އެމީހުން ފުރުވަން އަންނަ މީހުންނެވެ. ފަތިހުގެ ފިނިފިނި ވައިރޯޅިން ހަށިގަނޑު ރޫރޫއަޅަންފެށުމުން މިޝްޔާ އޭނާގެ ކަރުގައި އޮޅާފައިވާ ފެހިކުލައިގެ ދޯޕައްޓާ ނަގާ ގައިގައި އޮޅާލިއެވެ. ބަނދަރުގައި ހުރި ރުކެއްގެ ކައިރީ އަޔާނީއާއި ޝިއުރީގެ ގާތުގައި މަޑުކޮށްލައިގެން ހުރިއިރު އޭނާގެ ނަޒަރު ސީދާވެފައިވަނީ ތަންކޮޅެއް ދުރުގައި މަޑުކޮށްލައިގެން އެކުވެރިންނާއި ވާހަކަ ދައްކަން ހުރި ޒިކާނަށެވެ. ޒިކާން ހުރީ ކޮނޑުގައި ދަބަހެއް އަޅުވާލައިގެންނެވެ. އެކުވެރިންނާއި ވާހަކަ ދައްކަން ހުރި ނަމަވެސް އިރުއިރުކޮޅާ ޒިކާން މިޝްޔާއަށް ބަލާލައެވެ. ދެމީހުންގެ ހަތަރުކަޅި ބައްދަލުވާ ކޮންމެ ފަހަރަކު ހިނިތުންވުމެއް ބަދަލުކޮށްލައެވެ. ޝިއުރީއަށް މިތަން ފެނުމުން އަޔާނީގެ ގައިގައި ކޮށްޓާލަމުން އެމަންޒަރު ދައްކާލިއެވެ.

“ތިހާވަރުވަންޏާ ދުރުގަ ނުހުރެ ނިކަން ގާތަށް ދޭބަލަ…..” މިޝްޔާގެ ކޮނޑުގައި ޖެހިގަންނަމުން އަޔާނީ ބުނެލިއެވެ. އެއާއިއެކު ޝިއުރީ ހޭންފެށުމުން އަޔާނީވެސް އޭނާގެ ހުނުމުގައި ބައިވެރިވިއެވެ. މިޝްޔާ ދެމީހުނަށް ލޯއަޅާލަމުން ތުންކޮޅު އަނބުރާލިއެވެ.

“އޭނަޔާ އެކުވެރިންނާ ދުރުކުރާކަށް، އަހަރެން މީ އެހާ އަމިއްލަ އެދުން ބޮޑު މީހެއްނޫނޭ….. އަހަންނަށް އަހަރެންގެ އެކުވެރިން މުހިންމުހެން އޭނައަށް އޭނަގެ އެކުވެރިންވެސް މުހިއްމުވާނެކަން އަހަރެން ދަންނަމޭ…..” ދެފަރާތުގައި ތިބި ދެއެކުވެރިންގެ އަތުގައިހިފާލަމުން މިޝްޔާ ބުނެލިއެވެ.

“އެހެން ނޫނަސް މިއަދު ހިތްފުރޭންދެން ބަލާލަން ބޭނުމީ….. ދެން އަނެއްކާވެސް ފެންނާނީ އެހާ ގިނަ ދުވަސް ކޮށްލާފައި…..” މިފަހަރު މިޝްޔާގެ އަޑު އައީ ކުރެހިގެންނެވެ. އެކުވެރިން ބަލާލުމުން ގަދަކަމުން ހިނިތުންވެލިއެވެ. ނުބުނިކަމުގައިވިޔަސް ޒިކާން ދާތީ މިޝްޔާ ދެރަވެފައިހުރިކަން ޝިއުރީމެނަށް އެނގެއެވެ. އެހެންކަމުން އޭނާއަށް ހިތްވަރުދިނުމުގެ ގޮތުން އެމީހުންވެސް ހިނިތުންވެލަމުން ޒިކާން ނެތްކަމުގެ އިޙްސާސްވިޔަކަ ނުދޭނަމޭ ބުނެލިއެވެ.

 

ބަނދަރުގައި އަޅާފައި އޮތް ލޯންޗަށް ފަޅުވެރިން އެރުމުން މީހުންތައް ފޮށިތަކާއި، ފޮށިގަނޑުތައް އެއަށް އެރުވުމަށްޓަކައި އެދިމާއަށް ދާންފެށިއެވެ. މިޝަލްމެންވެސް ޒިކާންގެ ސަމާނުތައް ހިފައިފެން ލޯންޗަށް އަރުވަން ހިނގައިގަތުމުން ޒިކާން މިސްރާބުޖެހީ މިޝްޔާމެން ތިބި ދިމާއަށެވެ. ދެލޯބިވެރިންނަށް ވަގުތުކޮޅެއް ދިނުމަށްޓަކައި ޝިއުރީއާއި އަޔާނީ އެއްފަރާތަށް ޖެހިލިއެވެ.

 

ޒިކާން އައިސް މަޑުކޮށްލުމުން މިޝްޔާ ޒިކާނަށް ބަލާލަމުން ހިނިތުންވެލިއެވެ. ޒިކާން މިޝްޔާގެ މަޑު އަތްތިލާގައި ހިފާލަމުން އެއަތަށް ފިތާލިއެވެ. ވަކިވާންވީ ވަގުތު އައިސް ޖެހިއްޖެކަން އެނގުމުން ދެރަވީ ވަރުން މިޝްޔާ އިސްޖަހާލީ ދެލޯ ފެންކަޅިވާން ފެށުމުންނެވެ. އޭނާ ޒިކާނަށް އަލްވަދާއު ކިޔަން ބޭނުމީ ދެރަވެ ހުރެގެންނެއް ނޫނެވެ. އުފަލުން ހުރެއެވެ. އެހެންކަމުން ތިރީތުންފަތުގައި ދަތްއަޅާލަމުން ދެލޮލަށް ޖަމާވަމުންދިޔަ ކަރުނަތައް ހިންދާލިއެވެ. އަދި ތުންފަތަށް ފުޅާ ހިނިތުންވުމެއް ވެރިކުރުވަމުން އަނެއްކާވެސް ޒިކާނަށް ބަލާލިއެވެ. ޒިކާން ހުރީ ފަރުވާތެރިކަމާއިއެކު، މިޝްޔާގެ ޙަރަކާތްތަކަށް ބަލާށެވެ. މިޝްޔާ ދެރަވެފައިހުރިވަރު ޒިކާނަށް ސިއްރެއް ނުވެއެވެ. ނަމަވެސް އޭނާއަށް އެނގޭކަމަކަށް ނަހަދައެވެ. މިޝްޔާހެން، އޭނާވެސް ބޭނުމީ ދިއުމުގެ ކުރިން ދެމީހުން އެކުގައި ހޭދަކުރާ ވަގުތުކޮޅަކީ އުފާވެރި ވަގުތުކޮޅަކަށް ހަދާށެވެ. އެވާހަކަ ދައްކައިގެން މިޝްޔާ އިތުރަށް ދެރަކުރާކަށް އޭނާ ބޭނުމެއް ނުވެއެވެ.

“ހާދަ ވަރަކަށް ތިހެނީ…. އަހަރެން ދާތީ އުފާ ފާޅުކުރަނީ ދޯ……” ބޯއަރިކޮށްލަމުން  ސަމާސާ ރާގަކަށް ޒިކާން މިހެން ބުނުމުން މިޝްޔާ ލޯއަޅާލަމުން ތުންދަމާލިއެވެ. މިޝްޔާގެ މިއަދާއިން ޒިކާންގެ ހިނިގަނޑު ފަޅައިގެން ދިޔައެވެ.

“ވަރަށް މިސްވާނެ މިޝީމަތިން…… ސްޕެޝަލީ ތިހިރަ ބޭބީ ގޮތްގަނޑުމަތިން…..” މިޝްޔާގެ ކޮލުގައި ހިފާލަމުން މިހެން ބުނުމުން މިޝްޔާއަށްވެސް ނުހީއެއް ނުހުރެވުނެވެ.

“އަހަރެންވެސް ޒީކްމަތިން ވަރަށް ހަނދާންވާނެ…. ނޭނގެ ކީއްވެގެންކަމެއް….. މިފަހަރު ޒީކް ދާތީ އަހަރެން މާބޮޑަށް ދެރަވޭ…. ކިތަންމެ ފަހަރަކުވެސް ހިތަށް އެރި ނުދާށޭ ބުނެފާނަމޭ……” ޒިކާންގެ ދެލޮލަށް ބަލަންހުރެ މިޝްޔާ ބުނެލީ ސަމާސާގޮތްގަނޑު ކަނޑާލަމުންނެވެ. ޒިކާން ކުޑަކޮށް ގުދުވެލަމުން މިޝްޔާގެ ކަންފަތްދޮށުގައި ބުނެލި އެއްޗަކުން މިޝްޔާގެ ތުންފަތަށް ރަކި ހިނތުންވުމެއް ވެރިވިއެވެ. އިސާހިތަކު އޭނާގެ ދޮންމޫނަށް ފިނިފެންޖަންބުކުލަ ފާއްދާލިއެވެ.

ނުނިމޭ

 

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.