ޔާރު މިވަނީ ލޯތްބޭ ހަޤީގީ (އަށްވަނަ ބައި)

ރަށުގެ ތުނޑިއަށް ދޯނި ބީއްސާލުމާއިއެކު އެންމެން އަވަސްވެގަތީ ފޭބުމަށެވެ. ޔަލްވީވެސް އެކުވެރިންނާއިއެކު ފައިބަން ދިޔައެވެ. ރަށުގެ ހުދު ފަސްގަނޑުގައި ފައިޖެހުމާއިއެކު ޔަލްވީއަށް ކުރެވުނީ ބުނެދޭންދަތި އިޙްސާސެކެވެ. ދެލޯ މަރާލުމަށްފަހު ފުން ނޭވާއެއް ބޭރުކޮށްލެވުނީ ހިތަށް ފިނިކަން ލިބުމުންނެވެ. ކުޑަ ވަގުތުކޮޅަކަށްނަމަވެސް އޭނާއަށް ލިބިފައިވާ މިނިވަންކަމުން، ހިތަށް އުފާލިބިގަންނަށް ޔަލްވީ ބޭނުންވިއެވެ. ފައިވާން އަތަށްލުމަށްފަހު އެކުވެރިންނާއިއެކު އެއްގަމަށް ދާން ނެގި ފުރަތަމަ ފިޔަވަޅާއިއެކު، ފަސްގަނޑުގެ އޮލަކަން ޔަލްވީއަށް އިޙްސާސްކުރެވުނެވެ. ކުއްލިއަކަށް އޭނާގެ ޚިޔާލް ބަދަލުވިއެވެ. އެކުވެރިންނާއިއެކު އެއްގަމަށް ދިޔުމުގެ ބަދަލުގައި އޭނާ ބޭނުންވީ އެ ފަސްގަނޑުމަތީ ހިނގާލާށެވެ.

---

 

ކުރެދިގަހުގެ ހިޔަލުގައި އިށީނދެލައިގެން ވެއްޔާއި ކުޅެން އިން ޔަލްވީ އިނީ ވަށައިގެން ފެންނަމުންދިޔަ ޤުދުރަތީ މަންޒަރުތަކުގެ ރީތިކަމަށް ގެއްލިފައެވެ. ޖެހިލާ ފިނިފިނި ވައިރޯޅިއާއިއެކު އޭނާގެ ފަން އިސްތަށިގަނޑު މިނިވަންކަމާއިއެކު ވިހުރެމުންދިޔައެވެ. އިރުގެ ދަޅަ އެޅިފައިވުމުން އިސްތަށިގަނޑު ފެންނަނީ މުށި ކުލައިންނެވެ. އޭނާ ލައިގެން އިން ރަތް ކުލައިގެ އަތްދިގު ޓީޝާޓާއި ނޫ ޖިންސުގައި ވެލިފުއްތައް ހަރުލާފައި ވެއެވެ. ޖިންސުގެ ފައިކުރި ކުޑަކޮށް އޮޅާލާފައިވާއިރު ފައިގެ ދޮންކަން ހާމަވާން ހުއްޓެވެ. މަޑު އަޅިކުލައަކަށް ދާ ބޮޑު ދެލޯ ވަނީ އަވި އައިނަކުން ފޮރުވާލެވިފައެވެ. އަންނާރު ކުލައިގެ ލިޕްސްޓިކުން ފަވާލެވިފައިވާ ތުންފަތަށްވަނީ އުފާވެރި ހިނިތުންވުމެއް ވެރިވެފައެވެ.

ޤުދުރަތުގެ ފުރިހަމަކަމަށް ގެއްލިފައި އިން ޔަލްވީގެ މޫނުގެ ކުލަވަރު ބަދަލުވެގެން ދިޔައީ ރާޅު ޖަހާ ހިސާބުން ހަލުވި ފިޔަވަޅުތަކެއް އަޅަމުން ދިޔަ އީޝާއާއި އޭނާގެ ފަހަތުން ހިނގާފައި ދިޔަ ޝައުން ފެނުމުންނެވެ. އުފާވެރިކަން ރަސްކަން ކުރަމުންދިޔަ ޔަލްވީގެ ހިތް، ހަލަބޮލިވާން ސިކުންތުކޮޅެއްވެސް ނުނެގިއެވެ. އިންތަނުން ތެދުވެވުނީ ހިތަށް އުނދަގޫވާންފެށުމުންނެވެ. މީހެއްގެ ޙައްޤަކަށް އަރައިގަތުމަކީ ފަހަރެއްގައިވެސް ޔަލްވީ ކުރަން ބޭނުންވާކަމެއް ނޫނެވެ. ނަމަވެސް ޝައުން ފެނުމުން ޔަލްވީގެ ހިތަށް ގޮތްތަކެއް ވަނީއެވެ. ޝައުން ޙާޞިލް ކުރަން ބޭނުންވަނީއެވެ. އަބަދުމެ އޭނާގެ ރީތި ސޫރަ ދެކޭހިތްވަނީއެވެ. ވާހަކަ ދައްކާލާހިތްވަނީއެވެ. އެކުގައި ވަގުތު ހޭދަކުރަން ބޭނުންވަނީއެވެ. ޔަލްވީގެ ބަސްނާހާ ހިތް ޝައުންމަތިން ހަނދާން ނައްތާލުމަށް ހުރަސް އަޅަނީއެވެ. އެހިތަށް ވިސްނައިދޭނެ ގޮތެއް ޔަލްވީއަކަށް ނުވިސްނުނެވެ. އިތުރަށް އެތާ މަޑުނުކޮށް އޭނާ ހިނގައިގަތީ އެމަންޒަރު ބަލައިގެން ހިތްދަތިވާން ބޭނުން ނުވާތީއެވެ.

********************

 

“ބޭބް… ރުޅި ނައިސް ބުނީމައެއްނު އަހަންނަށް ތިވެގެން އުޅޭ ގޮތެއް އެނގޭނީ….!!!!!” އީޝާގެ ކުރިމަތީ މަޑުކޮށްލަމުން ޝައުން ބުނެލިއެވެ. މޫނު ކުނިކޮށްލައިގެން ހުރި އީޝާ މޫދާ ދިމާއަށް ބަލާލަމުން މޭމަތީ ދެއަތް ހުރަސްކޮށްލިއެވެ. އީޝާއަށް ބަލަން ހުރި ޝައުން ދެފަރާތަށް ބޯހޫރާލަމުން އަނެއްކާވެސް ވެގެން އުޅޭ ގޮތެއް އަހާލިއެވެ.

“ޝައުން ކީއްވެ ދޮގުހެދީ…..؟؟؟” ޝައުނާއި ދިމާއަށް ރުޅިވެރި ނަޒަރަކުން ބަލާލަމުން އީޝާ މިހެން ބުނުމުން ޝައުން ކޮން ދޮގެއްހޭ އަހާލިއެވެ.

“ޝައުން ނުބުނަންތަ އެއަންހެނާ މިދަތުރުގަ ބައިވެރިއެއް ނުވާނެއޭ…. ބަލާބަލަ އެދައިތަގަނޑު އެހުރީ އެންމެފަހުން އައިހެއްނު……” ނިއްކުރިމައްޗަށްވާގޮތަށް ކޮށާފައި ހުރި ކުދި އިސްތަށިތައް އެއްފަރާތްކޮށްލުމަށްފަހު، ޝައުނަށް ކުރިމަތިލަމުން އީޝާ ބުނެލީ ނިކަން އަޑުހަރުކޮށެވެ.

“ޗުސް…. ޔާލް ދަތުރު އައީމަ އެކަމާ ރުޅިއައިސްގެން ދޯ މިހާރު ތިއުޅެނީ….” ޝައުނަށް ޗޮކެއް ކަނޑާލެވުނީ އީޝާ އެވަރުކަމަކާ ރުޅިއައުމުންނެވެ.

“ދެން އަހަރެން ހޭންތަ ވީ….؟؟؟ ޝައުން ތިހުންނަނީނު އޭނާ ބަލާތީ އެކަމާ އުފަލުން، ދަތްޕިލަ ސޭލް އަޅުވައިގެން ހެވިދިލިފަ….. ވަރަށް ފޫހިވޭ…..” އީޝާ ދަތްވިކާލަމުން ކުދި ކިޔާލިއެވެ. އީޝާ ކިޔާ އެއްޗެހިން ޝައުންގެ ގާތަށް ހިނިއައެވެ.

“ހެހެހެ…. ދަތްޕިލަ ސޭލް އެޅުވީއޭ….. ހެވިދިލިފައޭ….. ހަހަހާ… ކޮންތާކުން ދަސްކުރި އެއްޗެއްތަ ތިކިޔަނީ….” ހެމުން ހެމުން ޝައުން އީޝާގެ ބަސްތައް ތަކުރާރުކޮށްލިއެވެ.

“ދެން ޝައުން….. މަޖަލެއް ނޫން……” ޝައުން ހޭންފެށުމުން، އީޝާ އިތުރަށް ރުޅިގަދަވިއެވެ. ޝައުނަށް ލޯއަޅާލަމުން އެތަނުން ދިއުމަށްޓަކައި އޭނާ ހިނގައިގަތެވެ. އެވަގުތު ޝައުން ހިނިގަނޑު މަތަކުރަމުން އީޝާގެ އަތުގައި ހިފާ ހުއްޓުވިއެވެ.

“ސޮރީ…. އީޝް، އެހެންކީމައޭ ހިނިއައީ….. ދެން ތި ރުޅި މަޑުކޮށްބަލަ… ކުރިން އޭނަ ބުންޏޭ ނާންނަމޭ …. ވެދާނު ފަހުން ޚިޔާލް ބަދަލްވީކަމަށް…… އީޝް ބޭނުމީ ދެން އެކަމާ ހިތްހަމަ ނުޖެހިފައި ހުންނަންތަ..؟؟؟؟ ނޫނީ މިދަތުރުގައި މަޖާ ކުރަންތަ…..” އީޝާއަށް ބަލަން ހުރެ ސީރިޔަސްވެފައި ޝައުން ވާހަކަ ދެއްކުމުން އީޝާ ބޮލުގެ އިޝާރާތުން ނޫނެކޭ ބުނެލިއެވެ.

****************************

 

ޔަލްވީ ދިޔައިރު މިޝްޔާމެން އުޅެނީ ހެނދުނުގެ ސައި ތައްޔާރުކޮށްގެންނެވެ. އޭރު އެއްބަޔަކު ސައިބޯންވެސް ފަށައިފިއެވެ.

“ޔާލް ނައިސްގެން ބަލަންދާން އުޅެނިކޮށް ތިއައީ…..” ޔަލްވީގޮސް މަޑުކޮށްލުމުން މިޝްޔާ ބުނެލިއެވެ. ޔަލްވީ ވަކި އެއްޗެއް ނުބުނެ ހިނިތުންވެލީއެވެ. ޔަލްވީ އަތަށް ކަޅުސައިތަށްޓެއް ދެމުން މިޝްޔާ އެދުނީ ތަންކޮޅެއް ދުރުގައި ސައިބޮން ތިބި ބައިގަނޑުގެ ތެރޭގައި އިން މިޝަލަށް އެ ގެންގޮސްދިނުމަށެވެ. ސައިތަށީގައި ހިފަމުން ޔަލްވީ މިޝަލްމެން ތިބި ދިމާއަށް ދާން ހިނގައިގަތެވެ.

 

“މިޝަލް ބިޓެއް ހޯދާކަން ނޫޅެންތަ…..؟؟؟؟” ސައިތަށި ދީފައި ޔަލްވީ ހިނގައިގަތުމުން އެދިމާއަށް ބަލާލަމުން ނަހީކް ބުނެލިއެވެ.
“އެ ތެދެއް…. މިހާރު މިޝަލް އެކަނި މި ގްރޫޕްގަ ބިޓެއް ނުނަގަނީ….. ދެން އަވަހަށް މަންޖެއެއް އަތު އަޅުވާލަން އުޅެބަލަ….” ޝައިމަންވެސް ނަހީކާއި އެއްބައިވަމުން މިޝަލާއި ދިމާކޮށްލިއެވެ. މިޝަލް ވަކި އެއްޗެއް ނުބުނެ ހީލީއެވެ. އަދި ދުރުގައި ތިބި މިޝްޔާމެނަށް ބަލާލިއެވެ.

“އަހަންނަށް ހީވަނީ މިސޮރުގެ ހިތުގައި ޓަކި ޖަހާލައިފިހެން…. އެދިމާއަށް މާވަރަކަށް ތިބަލަނީ ކޮންކަމަކާ….؟؟؟؟” މިޝަލް މިޝްޔާމެން ތިބި ދިމާއަށް މާވަރަކަށް ބަލަން ފެށުމުން އޭނާގެ ކޮނޑުގައި ޖެހިގަންނަމުން އިޔާޒް މަޖާވެލާފައި ބުނެލިއެވެ.

“މިޝް އެއީ ކޮއްކޮ…. ޝިއު އެއީ ނަހީކްގެ….. ޔާނީ އެއީ އަހަރެންގެ… އެހެންވީމަ ދެން ބާކީ އެއިން މަންޖެ އެކަނި ހުސްކޮށްހުރީ…. ސޯ، އޮބްވިއަސްލީ…. އޭނަ އެބަލަނީ ޔާލްއަށް…..” އަފްލާކްވެސް ނަހީކްމެންގެ ވާހަކައިގައި ބައިވެރިވިއެވެ. ބަހެއް ނުކިޔާ މަޑުން އިން ޒިކާން މިޝަލާއި ދިމާއަށް ބަލާލީ ހަޤީގަތް އެނގިހުރެ، އެކުވެރިޔާއަށް ޙަމްދަރުދީވާޙާލުއެވެ.

“މިޝަލް…. ޔާލް ސެޓް ކުރަންވީނު…  ހުރިހާ ގޮތަކުންވެސް ރަނގަޅު ކުއްޖެއް އެއީ…. ބޭނުމިއްޔާ އަހަރެމެން އެހީވެދީފާނަން….” މިޝަލްގެ ކޮނޑަށް އަތް ވައްޓާލަމުން ނަހީކް ބުނެލިއެވެ.

“އަހަންނަށްވެސް ވަރަށް ފެންނަކަމެއް ތީ……” ނަހީކްގެ ވާހަކައަށް ތާއީދު ކުރަމުން ޒިކާން މިހެން ބުނެލީ ސީދާ މިޝަލްގެ ދެލޮލަށް ބަލަން އިނދެއެވެ.

“ޒީކްވެސްތަ…..؟؟؟؟؟” މިޝަލް ޒިކާނާއި ދިމާއަށް ބަލާލީ ޒިކާން އެފަދަ އެއްޗެއް ބުނެފާނެކަމަށް ހީކުރެވިފައި ނެތުމުންނެވެ.

“ޔެސް… އެންޑް އައި މީން އިޓް…. އަބަދު ތިހެން ހުހަށް ކިހިނެއް ހުންނާނީ…؟؟؟؟؟ މިޝަލްގެ ޙަޔާތަށްވެސް ބައިވެރިއަކު ބޭނުންވާނެއެއްނު….” ޒިކާން ވާހަކަ ދެއްކީ ވިސްނައިދޭފަދައިންނެވެ. ޒިކާން އެވާހަކަ ފެށުމުން މިޝަލް އެކަމާ ދޭތެރޭ ވިސްނާނެކަމަށް ބުނެލިއެވެ.

********************

 

ސައިބޮއެ ނިމުމުން އަޔާނީއާއި އަފްލާކް ތބީ މޫދު ފެންނަ ހިސާބުގައި ގަހެއްގެ ހިޔާދަށުގައެވެ. އެހިސާބުގައި ދަތުރުގެ ބައިވެރިން ހޭލަމޭލަވަމުންދާތީ ފެނެއެވެ. އެއްބަޔަކު ކުޅެނީއެވެ. އަނެއްބަޔަކު މޫދުގައެވެ. ބައެއް ކުދިން ބައިބަޔަށް އެކިދިމާގައި ވާހަކަ ދައްކަންވެސް ތިއްބެވެ. ދެމީހުން އިށީނދެ ހަމަޖެހިލިތަނާ އިޔާޒް އައިސް އަޔާނީގެ އެއްފަރާތުގައި އިށީނެވެ. ދެކަކޫމަތީ ދެއަތް އަޅުވާލައިގެން އިންއިރު، އޭނާގެ މޫނުމަތީގައިވަނީ ލާނެއް ހިނިތުންވުމެކެވެ. އަޔާނީމެން، އޭނާއަށް ބަލަން ތިބީ ސުވާލުގެ ނަޒަރަކުންނެވެ.

“މިތާ ކީއްކުރަނީ…..؟؟؟؟” ނިތައް ރޫ އަރުވާލަމުން އަޔާނީ ސުވާލުކޮށްލިއެވެ.

“ބޮޑުމަންމަ ބުންޏެއްނު އަހަރެންގެ ޙަވާލުގައޭ ސިސީ ދަތުރު ފޮނުވީ…. ސިސީއަށް ރަނގަޅަށް ބަލާށޭ…. އެހެންވީމަ އަހަރެން ޖެހޭނެއްނު ސިސީ ދާހާ ތަނަކަށް ދާން….. އޭރުންތާ ރަނގަޅަށް ބެލޭނީ….” ލާނެއްގޮތަކަށް ހީލަމުން އިޔާޒް ބުނެލިއެވެ. އިޔާޒްގެ ލާނެއްކަމާއިހުރެ، އަޔާނީ ދެފަރާތަށް ބޯހޫރާލަމުން އޭނާގެ ގައިގައި ބޮނޑިއެއް އަޅުވާލިއެވެ.

“ދުރުގައި އިނދެގެންވެސް އަހަންނަށް ވާނުވާ ބެލޭނެދޯ…. ހަމަ މިހާރު މިތަނުން ދޭ…..” އިޔާޒްގެ ކޮނޑުގައި އަތްއަޅުވާ ކޮށްޕާލަމުން އަޔާނީ ބުނެލިއެވެ. ނަމަވެސް އިޔާޒަށް ކަހާތަން ހިރުވާލާހެންވެސް ހީނުވެއެވެ. އޭނާ އެތަނުން ތެދުވާ ޚިޔާލެއް ނުކުރިއެވެ. އަޔާނީ ރުޅިގަދަވީވަރުން އަނެއްކާވެސް އިޔާޒް ކޮށްޕާލިއެވެ. ދެންވެސް ހަމަހިލާ އޭނާ އެތަނުން ނުތެދުވިއެވެ.

“ބްރޯ ދެން އެހާވަރަށް ޔާނީ ރުޅިނާރުވާބަލަ ދޯ…..” އަޔާނީ ރުޅިއައިސްގެން ކޮޅަށް ތެދުވުމުން އޭނާގެ އަތުގައި ހިފާލަމުން އިޔާޒަށް ބަލާލަމުން އަފްލާކް ބުނެލިއެވެ. އަޔާނީ ރުޅިވެރި ނަޒަރަކުން ބަލާލުމުން އިޔާޒް ހެމުން ހެމުން ކޮޅަށް ތެދުވިއެވެ. އަދި އަޔާނީ ނުވިސްނާހުއްޓާ އޭނާގެ ދެކޮލުގައި ހިފާލުމަށްފަހު ދުއްވައިގަތެވެ. އަޔާނީވެސް އޭނާގެ ފަހަތުން ދިޔައެވެ. ނަމަވެސް އަތުޖެހޭ ގޮތް ނުވުމުން އަނބުރާ އައިސް އަފްލާކްގެ ގާތުގައި އިށީނެވެ. ދުރުގައި ހުރި އިޔާޒް، އަޔާނީ ބަލާލުމުން ވައްތަރުޖައްސާލާފައި އެހެން ދިމާއަކަށް ދިޔައެވެ.

“އަދިވެސް ރުޅިއައިސްފައިތަ…….؟؟؟” އަޔާނީ މޫނު ހަދާލައިގެން އިނުމުން އަފްލާކް ބުނެލިއެވެ. އަދި ލޯތްބާއިއެކު އަޔާނީގެ ދަތްދޮޅީގައި ހިފާލުމުން އަޔާނީ ބޯހޫރާލީ ހިނިތުންވެލަމުންނެވެ.

“ވަރަށް ހޫނުގަދަދޯ…..”ލައިގެން އިން އަޅިކުލައިގެ ޓީޝާޓް ގަޔާ ދުރުކޮށްލަމުން އުޑާ ދިމާއަށް ބަލާލަމުން އަފްލާކް ބުނެލިއެވެ. އަޔާނީ އަފްލާކަށް ބަލާލިއެވެ. އަފްލާކަކީ އިސްކޮޅުން ދިގު ބާމަތިފުޅާ ހަށިގަނޑެއްގެ ވެރިއެކެވެ. ރާއްޖޭގެ ނިސްބަތުން ބަލާނަމަ އެންމެ ދޮންމީހުންގެ ތެރޭގައި އޭނާވެސް ހިމެނޭނެއެވެ. ފަންއިސްތަށިގަނޑު ކުޑަކޮށް ދިގުކޮށްލާފައިވުމުން ކަންފަތުގެ ބޮޑުބައެއްވަނީ ފޮރުވިފައެވެ. ރީތިގޮތަކަށް ތުނބުޅިމަތިމަސް އެއްވަރުކޮށްލާފައިވެއެވެ. މުށިކުލައިގެ ދެލޮލުގައި ހިތްދަމައިގަންނަ ބާރެއްވާކަހަލައެވެ. އުމުރު ދުވަހު އެދެލޮލަށް ބަލަން ވިޔަސް އަޔާނީ ފޫއްސެއް ނުވާނެއެވެ.

“ޔާނީ…. ކީއްވެ މާވަރަކަށް ތިބަލަނީ…..” އަފްލާކްގެ ރީތި ހިނިތުންވުން ހަދިޔާކޮށްލަމުން ސުވާލުކޮށްލިއެވެ. އަފްލާކްގެ ރީތިކަމަށް ގެއްލިފައި އިން އަޔާނީއަށް ހަމަހޭވެރިކަންވީ އޭނާ ވާހަކަ ދެއްކުމުންނެވެ. އެހާ ގިނައިރުވަންދެން އެގޮތަށް ބަލަން އިނދެވުމުން އޭނާ ރަކިވާގޮތްވިއެވެ. ލަދުރަކިގޮތަކަށް ހީލަމުން އަފްލާކް ދާން އުޅޭތީ ހިތްފުރެންދެން ބަލާލަނީއޭ ބުނެލިއެވެ. އަފްލާކް އަޔާނީގެ އަތްތިލައިގައި ހިފާލަމުން ހިނިތުންވެލިއެވެ.

********************

 

އަޔާނީ ރުޅިއަރުވާލުމަށްފަހު، އިޔާޒް ދެން ވިސްނީ އެހެން މީހަކަށް ޖެއްސުންކޮށްލުމަށެވެ. އެވަގުތު އޭނާގެ ލޮލުގައި އަޅައިގަތީ ފަސްގަނޑުމަތީ އަކުންބަކުން ކުޅެން ތިބި މިޝްޔާއާއި ޒިކާނެވެ. މޮޅު ޚިޔާލެއް އައުމުން އެއްގަމަށް އެރީ އޭނާގެ ދަބަސްހޯދުމަށެވެ.

“ތިއުޅެނީ ކީއްކުރަން…..؟؟؟؟” ދަބަސްތެރެއަށް އަތް ލައިގެންހުރި އިޔާޒް ސިހިގެން ދިޔައީ، ދާދިގާތުން ޔަލްވީގެ އަޑުއިވުމުންނެވެ. ތުންފަތުގައި ޝަހާދަ އިނގިލި ޖައްސާލަމުން “ޝްޝްޝް….” އޭ ބުނެލަމުން އަޑުއިވޭ ހިސާބުގައި އެހެންމީހަކު ހުރިތޯ ބަލާލީ ވައްކަން ކުރަން އުޅޭ މީހަކު ފަދައިންނެވެ. އިޔާޒް އުޅުންގޮތުން ހިނިއައިނަމަވެސް، އަމިއްލަ ތުންފަތުގައި އޭނާވެސް އިނގިލި ޖައްސާލިއެވެ. އަދި ވަރަށް ސިއްރުން އަނެއްކާވެސް އެ ސުވާލު ތަކުރާރުކޮށްލިއެވެ. ދަބަސްތެރެއަށް ބޯދިއްކޮށްލަމުން އިޔާޒް އޭގެން ނެގި މީދަލެއް ދައްކާލުމާއިއެކު ޔަލްވީ ދެލޯބޮޑުކޮށްލަމުން ހަޅޭލަވައިގަތެވެ. ނަމަވެސް އަޑުބޭރުވުމުގެ ކުރިން އިޔާޒް ޔަލްވީގެ އަނގަމަތީ އަތްއަޅާލިއެވެ.

“ޔާލް ހަޅޭނުލަވައްޗޭ…. މީ އަސްލު އެއްޗެއް ނޫން…. ފޭކެއް…..” އެއްއަތުން ޔަލްވީގެ އަނގަމަތީގައި އަތްއަޅައިގެންހުރެ އަނެއް އަތުގައި އޮތް ޕްލާސްޓީކް މީދާ ދައްކާލަމުން އިޔާޒް ބުނެލިއެވެ. އިޔާޒް އެހެން ބުނުމުން ޔަލްވީ މައިތިރިވިއެވެ. އަދި އަނގަޔަށް ގޮތްގޮތް ހަދަމުން އޭގައި އިނގިލި ޖައްސާލީ އިޔާޒް އެބުނީ ތެދެއްތޯ ޔަޤީންކޮށްލުމަށްށެވެ. އޭގައި އަތްޖެހުމުން އެއީ އަސްލު އެއްޗެއް ނޫންކަން އެނގުމުން ޔަލްވީގެ ގާތަށް ހިނިއައެވެ.

“ތި ހިފައިގެން މިރަށަށް ތިއައީ ކީއްކުރަން…..؟؟؟” ޔަލްވީއަށް މަޖާވުމުން ސުވާލުކޮށްލިއެވެ. ޖަވާބު ދިނުމުގެ ބަދަލުގައި އިޔާޒް އަތުން އިޝާރާތްކޮށްލީ އޭނާއާއިއެކު ދިއުމަށެވެ. އިޔާޒް ކުރަން އުޅޭކަމެއް އެނގެން ބޭނުންވެފައިހުރި ޔަނާލް އޭނާއާއިއެކު ދިޔައެވެ.

 

އިޔާޒްގޮސް މަޑުކޮށްލީ މިޝްޔާމެން ތިބި ދިމާލުން އެއްގަމަށްވާގޮތަށް ހުރި މަގޫގަހެއްގެ ކައިރީގައެވެ. ޔަލްވީވެސް އޭނާގެ ފަހަތުގައި މަޑުކޮށްލައިގެން ހުއްޓެވެ. މިޝްޔާމެންނާ ސީދާކޮށްލުމަށްފަހު، އިޔާޒް އެ މީދާ އެއްލިއެވެ. އަދި ޔަލްވީގެ އަތުގައި ހިފާލަމުން އެމީހުންނަށް ނުފެންނާނެހެން އެ ގަހާ ނިވާވެލިއެވެ. ކުޅުމަށް ގެއްލިފައި ތިބި ދެމީހުންނަށް އެއްފަހަރާ ކޮޅަށް ތެދުވެވުނީ އެމީހުންގެ މެދަށް އެއްޗެއް ވެއްޓުމުންނެވެ. އެއީ ކޯއްޗެއްތޯ ބަލާލީވެސް ކޮޅަށް ތެދުވެފައެވެ. ބިންމަތީގައި އޮތް މީދާ ފެނުމުން ތޫލި އަޑަކުން ހަޅޭލަވައިގެންފައި މިޝްޔާ އެއްގަމަށް ދުއްވައިގަތެވެ. އެ ފެނުމުން ޒިކާނަށްވެސް ފުރަތަމަ ފަހަތަށް ޖެހިލެވުނެވެ. ނަމަވެސް އިރުކޮޅަކު ދުރުގައި ހުރެފައި އައިސް އެ މީދާ ނެގީ، ޙަރަކާތެއް ނުކޮށް އޮތުމުން، އެއީ އަސްލު އެއްޗެއް ނޫންކަން ވިސްނުމުންނެވެ. އޭރު މިޝްޔާއަށް ހުރެވުނީ އިޔާޒްމެން ފިލާތިބި މަގޫގަހާ ހަމައިގައެވެ. ގަސްތެޅިލުމުން އޭނާ އެދިމާއަށް ބަލާލިއެވެ. ގަހުގެ ނިވަލުގައި ހުރި އިޔާޒް ފެނުމުން އެއީ އޭނާގެ ކަމެއްކަން މިޝްޔާއަށް ވަގުތުން ޔަޤީންވިއެވެ. ދުރުގައި ހުރި ޒިކާން ބަލާލުމުން ލޮލުގެ އިޝާރާތުން އެދިމާއަށް ދިއުމަށް ބުނެލިއެވެ. މީދާ ބިންމައްޗަށް ވައްޓާލުމަށްފަހު، ދުވެލާފައި ޒިކާން މިޝްޔާގެ ގާތަށް ދިޔައެވެ. މިޝްޔާ، ޒިކާނަށް ގަހުގެ ނިވަލުގައި، ފިލާހުރި އިޔާޒް ދައްކާލިއެވެ. ހީލަމުން ޒިކާން ދެފަރާތަށް ބޯހޫރާލީ އިޔާޒްގެ ލާނެއް ކަމުންނެވެ. އެއްގޮތަކުން ނުވިއްޔާ އަނެއް ގޮތަކުންވެސް މީހަކަށް ޖެއްސުންކޮށްލެވޭތޯ އޭނާ ބަލާނެއެވެ. ޒިކާން ދިޔަގޮތަށްގޮސް އިޔާޒްގެ ކަންފަތުގައި ހިފާ އެތަނުން ނެރުނެވެ. ބަނޑަށް ހީ ހީ ހުރި ޔަލްވީ، އަޑު ވީއްލާ ހޭންފެށީ އިޔާޒް ކުރި ކަންތައް މިޝްޔާމެންނަށް ފަޅާއެރުމުންނެވެ. ޔަލްވީ އެތާ ހުރިކަންވެސް މިޝްޔާމެންނަށް އެނގުނީ ދެނެވެ. މާ ގިނައިން ހެވުމުގެ ސަބަބުން ޔަލްވީގެ ދެލޮލުން ފެންއައިސްފައިވެއެވެ. އޭނާގޮސް މަޑުކޮށްލީ މިޝްޔާގެ ގާތުގައެވެ.

“ޔާލްވެސްތަ……؟؟؟؟ ޔާލް ކޮންއިރަކު މި ޖޯކަރާއި އެއްބައިވީ….؟؟؟؟” ހައިރާންވީ ނަމަވެސް މިޝްޔާގެ މޫނުމަތީގައިވަނީ ހިނިތުންވުމެވެ. އޭނާހުރީ ޔަލްވީއަށް ބަލަހައްޓައިގެންނެވެ. އޭރުވެސް ޔަލްވީއަށް ހެވެވެނީއެވެ. އޭނާއަށް ޖަވާބުދެވޭވަރެއް ނުވިއެވެ.

“ޔަޤީން…. މިހިރަ ޖޯކަރު ޔާލްގެ ބޯތެރެއަށް ވަނީ ދޯ…” ޔަލްވީއަށް އަނގައިން ނުބުނެވުމުން މިޝްޔާ ދެން ބަލާލީ އިޔާޒަށެވެ. އިޔާޒް ލާނެއްގޮތަކަށް ހެވިފައި ހުރުމުން މިޝްޔާއަށްވެސް ހެވުނެވެ.

“ދެވަނަ ދެގޮތެއްވެސް ނަހަދާނަން…. މިފަހަރު ހަމަ މޫދަށް ލާނީ…..” އިޔާޒްގެ ކަންފަތުގައި ހިފައިގެން ހުރި ޒިކާން އިޔާޒްގެ ޓީޝާޓް އަތަށް ބޮނޑިކޮށްލަމުން ބުނެލިއެވެ. އެހެން ބުނުމާއިއެކު އިޔާޒް ޖަހާލީ ހިނިގަނޑެކެވެ.

“މިޝަލް، ތީ ކޮންކަމެއް…؟؟؟” ޒިކާންގެ ފުރަގަހަށް ބަލާލަމުން އިޔާޒް މިހެން ބުނުމުން ޒިކާންގެ އިތުރުން މިޝްޔާމެންވެސް އެދިމާ ބަލާލިއެވެ. ނަމަވެސް އެތާކު މިޝަލެއް ނެތެވެ. އެނބުރި އިޔާޒަށް ބަލާލިއިރު އޭނާއެއް ނެތެވެ. އިޔާޒްގެ ޓީޝާޓް ޒިކާންގެ އަތުގައި އޮތެވެ. އޭނާހުރީ ދެތިން ފިޔަވަޅު ދުރުގައެވެ. އިޔާޒް އެމީހުން ހައްދާލީއެވެ. ޒިކާނަށް ވީގޮތް ރޭކާލުމުން އިޔާޒްގެ ފަހަތުން ދުއްވައިގަތެވެ.

 

ކުޅެން ހުރެފައި ޝައުން ހޯދަމުން އެއްގަމަށް އަރައިގެން އައި އީޝާއަށް ފައިން އެއްޗަކަށް އެރުމުން ބަލާލިއެވެ. ފައިދަށުގައި އޮތް މީދާ ފެނުމުން އޭނާ އަށް ވީގޮތްވެސް ނޭނގުނެވެ. ތޫލި އަޑަކުން ހަޅޭލަވައިގަންނަމުން އެއްގަމަށް ދުއްވައިގަނެވުނީ ވަކި ގޮތެއް ބަލާފައެއް ނޫނެވެ. އެދިޔަ ގޮތަށްގޮސް އޭނާ ލައިގަތީ އެކޮޅުން ދުވެފައި އައި އިޔާޒްގެ ގައިގައެވެ. އެއާއިއެކު ދެމީހުންނަށްވެސް ހަމައަށް ފައިނޭޅެވުމުގެ ނަތީޖާއަކަށްވީ ދެމީހުން އެއްކޮށް ބިންމައްޗަށް ގުޅައަކަށް ޖެހުމެވެ. ކުރިންވެސް ހިނިގަނޑު މަތަނުކުރެވިގެން އުޅުން ޔަލްވީއަށް މިމަންޒަރު ފެނުމުން ބަނޑުގައި އަތް އަޅާލެވުނީ ހިހީ ބަނޑަށް ތަދެއް އެރުމުންނެވެ. ގާތުގައި ހުރި މިޝްޔާވެސް ބިނދިބިނދިފައި ހެމުން ދިޔައެވެ. އިޔާޒްގެ ފަހަތުން ދުވެފައި އައި ޒިކާންވެސް ހެމުން އުނގަނޑުގައި ދެއަތް ވިއްދާލިއެވެ.

އީޝާ އޮތީ އިޔާޒްގެ ގައިމަތީގައެވެ. އިޔާޒް ބަލަން ނޯވެ އީޝާގެ އަތުގައި އަތް އަޅާ ބިންމައްޗަށް ކޮށްޕާލަމުން އޭނާ ތެދުވިއެވެ. ގައިން ވެލި ފޮޅާލުމަށްފަހު ބިންމަތީގައި އިން އީޝާއަށް އަތްދިއްކޮށްލީ އޭނާ ނެގުމަށެވެ. އިޔާޒް އަތް ދިއްކޮށްލުމާއިއެކު އީޝާވެސް އެއަތުގައި ހިފަން އަތްދިއްކޮށްލިއެވެ. ނަމަވެސް އީޝާ އެއަތުގައި ހިފުމުގެ ކުރިން އިޔާޒް އަތްދަމައިގަތުމަށްފަހު، ބޮލުގައި އަތް ހިންގާލިއެވެ. އިޔާޒް ކަންތައްކުރިގޮތުން ރުޅިއައިވަރުން އީޝާ ތުން އަނބުރާލިއެވެ. ގެނައި ކުއްލި ޙަރަކާތަކާއިއެކު އިޔާޒް ބިންމަތީގައި އޮތް މީދާ ނަގައި އީޝާއާއި ދިމާއަށް އެއްލިއެވެ. އޭތިގޮސް ޖެހުނީ އީޝާގެ އުނގަށެވެ. ހަޅޭލަވައިގަތް އީޝާ، އުނގުމަތިން އޭތި ފޮޅާލަމުން ތެދުވިއެވެ. އޭގައި އަތްޖެހުމުން އީޝާއަށްވެސް އެއީ އަސްލުއެއްޗެއް ނޫންކަން އެނގުމުން މައިތިރިވިއެވެ. ފަހުން އިޔާޒް އެކޮށްލި ކަމަކުން މަޖާވެގެން ޒިކާން އައިސް އިޔާޒްގެ ކޮނޑަށް އަތްލަމުން އަނެއް އަތުން އިޔާޒާއި އަތްޖަހާލިއެވެ. އީޝާ އައި ރުޅިން މީދާ ނަގައި އިޔާޒާއި ދިމާއަށް އެއްލުމަށްފަހު އެތަނުން ދާން ހިނގައިގަތެވެ. ޔަލްވީމެންނާއި އަރާ ހަމަވުމުން އޭނާ އެމީހުންނަށްވެސް ކަޅިއަޅާލީ އެމީހުން ހޭކަން އެނގުމުންނެވެ. އީޝާ ކަޅިއަޅާލިގޮތުން ޔަލްވީ ތަންކޮޅެއް މައިތިރިވިނަމަވެސް، މިޝްޔާ ހުއްޓާނުލާ ހެވެމުން ދިޔައެވެ. އީޝާ ފަސްދީ ދިއުމުން ޔަލްވީވެސް އަނެއްކާ މަޖާވެފައި ހޭންފެށިއެވެ.

********************

 

“މިގަހުގެ އޮފިގަނޑު މަތީ އިށީނދެލައިގެން ސެލްފީ ނެގީމަ ވަރަށް ރީތިވާނެ…..” މޫދާ ދިމާއަށް ވެއްޓިފައި އޮތް ހިކިގަސްގަނޑެއް އެކުވެރިންނަށް ދައްކާލަމުން އަޔާނީ ބުނެލިއެވެ. އަޔާނީ މިހެން ބުނެ އެގަހުގެ އޮފިގަނޑެއްމަތީގައި އިށީނުމުން ޝިއުރީމެންވެސް އިށީނެވެ.

“ނަސީބެއްނު ޒީކްމެން އެދިމާލުގައި ފުޓްބޯޅަ ކުޅެން ތިބިކަން… އެހެންނޫނީ އަހަރެމެން ސެލްފީ ނަގާތަން ފެނިއްޖެއްޔާ ހަމަ ޔަގީނުންވެސް އެއްޗެހި ކިޔާނެ……” ފޯނުން ދެތިން ސެލްފީ ނަގާލުމަށްފަހު މިޝްޔާ ބުނެލިއެވެ.

ކުއްލިއަކަށް ހަތަރު ކުދިން އެކީ ސިހިގެން ދިޔައީ މީހަކު އެކުދިން އިށީނދެގެން ތިބި ގަސްގަނޑު ގުޑުވާލުމުންނެވެ. ފަހަތް ބަލާލިއިރު ލާނެއް ފާޑަކަށް ހީގަނެގެން އެހުރީ އިޔާޒެވެ. އަނެއްކާވެސް އިޔާޒް އެގަސްގަނޑު ގުޑުވާލުމުން އަޔާނީމެން އެގަހުން ފޭބުމަށްފަހު، ހަތަރު ކުދިން އެކީ އިޔާޒްގެ ފަހަތުން ދުއްވައިގަތެވެ. އެކުދިންގެ އަތު ނުވާންވެގެން އިޔާޒްވެސް ދުއްވައިގަތީ ރަށުތެރެއާއ ދިމާއަށެވެ. ވަކި ހިސާބަކަށް ދިޔަތަނާ ބިންމަތީއޮތް މޫގަނޑެއްގައި އަޅައިގެންފައި ޔަލްވީ ވެއްޓުނެވެ. ތަންކޮޅެއް ކުރީގައި ހުރި މިޝްޔާއަށް މިމަންޒަރު ފެނިގެން އޭނާއާއި ދިމާއަށް އަންނަން ފެށުމުން، ޔަލްވީ އަތުގެ އިޝާރާތުން ދިޔުމަށް ބުނެލިއެވެ. އަދި އެތަނުން ތެދުވެ ގައިން ވެލިފޮޅާލުމަށްފަހު، ދާން ހިނގައިގަތްތަނާ ފަހަތުން ޝައުން ގޮވާލިއަޑު އިވުނެވެ. މަޑުކޮށްލައިގެން ހުރި މިޝްޔާއަށް ޝައުން ފެނުމުން ޔަލްވީ އެކަނި ނުވާނެކަން އެނގުމުން އަނެއްކާވެސް ދުވެފައި ގޮސް ޝިއުރީމެންނާ އަރާ ހަމަކުރިއެވެ.

 

“ޔާލް….. އިޔާޒް ފަހަތުން ދޯ އެމީހުން އެ ދުވަނީ…..” މިޝްޔާމެން ދިޔަ ދިމާއަށް ބަލާލަމުން ޝައުން އަހާލިއެވެ. ޔަލްވީ ބޯޖަހާލަމުން ޝައުން އައި ދިމާއަށް ބަލާލީ ފަހަތުން އީޝާ އާދޭތޯއެވެ. އީޝާ ފެންނަން ނެތުމުން ޔަލްވީ ހަށިފުރާ ނޭވާއެއްލުމަށްފަހު، މީހާ ހަމައަކަށް އެޅިލިއެވެ.

“ޝައުން ނުކުޅެނީތަ…..؟؟؟؟ މިތާ ކީއްކުރަނީ…..؟؟؟؟ އެކަނިތަ…..؟؟؟” ޔަލްވީ ބޭނުންވީ އަދިވެސް ޝައުނާއިއެކު އެތަނަށް އީޝާ އައިތޯ ޔަޤީން ކުރާށެވެ.

“އައްދޭ އަހަންނަށް މިއުޅެވެނީ ސުވާލު މުބާރާތެއްގައި ބައިވެރިވެވިގެންތަ….؟؟؟؟ އެއްފަހަރާ ހާދަ ސުވާލެކޭ ތި ބަންޑުންކޮށްލީ…..” ސަމާސާ ރާގަކަށް ޝައުންބުނެލިއެވެ. ޔަލްވީ ދެކޮނޑު އަރުވާލަމުން ހީލިއެވެ.

“އަހަރެން އައީ އިޔާޒްއާއި އެކީ….. ވަކި ހިސާބަކަށް އައިއްސަ ތިމީހުން ފެނިގެން އޭނަ މާބަރަށް ދުވެފަ އެއައީ، ޖެއްސުންކޮށްލަންވެއްޖޭ ކިޔާފަ….. ” ކުކުޅު ބިސް ކުލައިގެ ކަކުލާ ހަމައަށް އަރާ ސޯޓުބުރީގެ ދެޖީބަށް އަތްޖަހާލަމުން ޝައުން ބުނެލިއެވެ.

“ދެން ހިއެއްނުވެ އެމީހުން މިދިމާއަށް އަންނާނެހެނެއް…. ހިނގާ އަތިރިން ލާފައި އެދިމާއަށް ދަމާ…..” ލައިގެން ހުރި އޮރެންޖްކުލައިގެ އަތް ދިގު ޖާރޒީގެ އަތް ކުޑަކޮށް ކަހާލަމުން ޝައުން ބުނެލިއެވެ. ޔަލްވީ ޝައުނާއިއެކު އެތަނުން ދިއުމަށްޓަކައި ހިނގައިގަތެވެ.

********************

 

ގައިގައި ހުރި ބާރެއްލާފައި ދުވަމުން ދިޔަ އިޔާޒް އެންމެ ގަސްބޯ ހިސާބަށް ވަނެވެ. ޝިއުރީމެންވެސް އެންމެ ތަންފުކެއްވެސް ދޫ ނުދީ އޭނާގެ ފަހަތުން ދުވިއެވެ. ގަސްބޯ ހިސާބަށް ވަދެވުމުން އަޔާނީގެ ހިތަށް ބިރުވެރިކަން ވަންނަން ފެށިއެވެ. އެކި ދިމަދިމާއަށް ބަލަމުން އޭނާ ދުވީ ހިތަށް ބިރުވެރި ޚިޔާލްތައް ވަންނަން ފެށުމުންނެވެ. ކުއްލިއަކަށް އެއްލި ކަޅިއަކުން ފެނުނު މަންޒަރުން އަޔާނީގެ ދެލޯ ބޮޑުވިއެވެ. އަޔާނީ ބިރުންހުރެ ގާތުގައި ހުރި މިޝްޔާއަށް ގޮވާލުމަށްފަހު އެމަންޒަރު ދައްކާލިއެވެ. އެއާއިއެކު، އިވިގެން ދިޔައީ މިޝްޔާގެ ތޫލި ހަޅޭކުގެ އަޑެވެ. މިޝްޔާ ހަޅޭލަވައިގަތުމުން އަޔާނީވެސް ހަޅޭލަވައިގަންނަމުން މިޝްޔާގެ އަތުގައި ހިފައިގެން ދުއްވައިގަތެވެ. މިއަޑަށް ތަންކޮޅެއް ކުރީގައި ހުރި ޝިއުރީވެސް ފަހަތް ބަލާލިއެވެ. ފެނުނު މަންޒަރުން ޝިއުރީގެ ދެލޯވެސް ބޮޑުވެ ހަމަ އެހާބާރަށް ހަޅޭލަވައިގަނެވުނެވެ. ރަތް ކުލައިގެ ބިރުވެރި ސިފައެއްގައި ހުރި އެއްޗެއް، އަޔާނީމެންގެ ފަހަތުން އަންނަ މަންޒަރު ފެނުމުން ޝިއުރީގެ ގައިން ހީބިހި ނަގައިގެން ދިޔައެވެ. އޭރު އިޔާޒުވެސް މާދުރަށްގޮސް އޮބާލައިފިއެވެ. އަޔާނީމެން ޝިއުރީއާއި އަރާ ހަމަވުމުން ތިން ކުދިން އެކީ ދުއްވައިގަތެވެ. ފަޔަށް ލެވުނުހާ ބާރެއް ލައިފައި ތިންކުދިން ދުވަމުން ދިޔައިރު ބިރުންގޮސް ތިބީ ރޮވޭވަރުވެފައެވެ. ދުވެ ދުވެ ނޭވާވެސް ކުރުވާ ހިސާބަށް ގޮއްސިއެވެ. އަޔާނީއަށް އިރުއިރުކޮޅާ ފަހަތް ބަލާލެވެއެވެ. އޭރުވެސް އެބިރުވެރި އެތި ފަހަތުން އަންނަމުންދެއެވެ. އަޔާނީގެ ހަނދާނަށް އައީ ކުރީ ރެއަކު އޭނާއަށް ފެނުނު ބިރުވެރި ހުވަފެނެވެ. އޭތީގެ ކިބައިން ސަލާމަތްކޮށްދެއްވުން އެދި، އޭނާ، ހިތާހިތުން މާތް ﷲ ގެ ޙަޟްރަތަށް ދުޢާކޮށްލިއެވެ.  ފަހަތް ބަލަމުން ދުވުމުގެ ސަބަބުން އަޔާނީގޮސް ލައިގަތީ ޝިއުރީގެ ގައިގައެވެ. ކުއްލިއަކަށް އަޔާނީ އައިސް ޖެހިގަތުމުން، ފައިހަމަ ނުކުރެވިގެން، ޝިއުރީ ބަނޑުވަތަށް ވެއްޓުނެވެ. ވެއްޓުންވަގުތު އެތާގައި އޮތް ގައުގަނޑެއްގައި ޖެހިފައި ޝިއުރީގެ ދަތްދޮޅި ފަޅައިގެން ގޮސް ލޭއަންނަން ފެށިއެވެ. ވީތަދުންނާއި ބިރުގެންފައި ހުރިވަރުން ޝިއުރީއަށް ރޮއިގަނެވުނެވެ. އަޔާނީއާއި، މިޝްޔާ ޝިއުރީއަށް ތެދުވުމުގައި އެހީވިއެވެ. އެވަގުތުކޮޅުވެސް އަޔާނީއަށް ބަލާލެވުނީ އެބިރުވެރި އެތި ކޮބައިތޯއެވެ. އޭރު އެ އެއްޗަށްވަނީ އަޔާނީމެންނާއި ދާދި ގާތަށް އާދެވިފައެވެ. އެހެން ކަމުން ތިން ކުދިން ބެލީ މިޝަލްމެން ތިބި ދިމާއަށް އަވަހަށް ދެވޭތޯއެވެ. އެރަށަށް ފުދޭ ވަރަކަށް ގިނައިން ދެވިފައިވުމުން، އެކުދިންނަށް އެރަށުގައި ކޮންމެވެސް ވަރަކަށް ހިނގަން އެނގެއެވެ. މާގިނައިރެއްނުވެ، ދެން، މިޝަލްމެން ތިބި ތަނަށް ދެވިދާނެކަން އެނގުމުން އެކުދިން އިތުރު ހިތްވަރެއްލާފައި ދުވެވުނު އެންމެ ބާރަކަށް ދުވަމުން ދިޔައެވެ.

******

 

“ދޮންބޭ…. ޒީކް…..” މިޝަލްމެން ފެނުމުން މިޝްޔާ ބާރަށް ހަޅޭލަވައިގަތެވެ. އޭނާގެ ގައިގައި ދެން އިތުރަށް ދުވާނެހާ ވަރެއް ނެތެވެ. އޭރު ޝިއުރީވެސް ވަރުބަލިވެފައިހުރިވަރުން ބިންމަތީ ދެކަކޫ ޖަހައިގެން އިށީނެވެ. އަޔާނީވެސް ބަނޑުގައި އަތްއަޅައިގެން ގުދަށްއޮވެ، ފަހަތް ބަލާލިއެވެ. ނަސީބަކުން އެބިރުވެރި އެތި ފެންނާކަށް ނެތެވެ. އަޔާނީއަށް ހަށިފުރާ ނޭވާއެއް ލެވުންއިރު، އަފްލާކް އައިސް ކުރިމަތީގައި ހުއްޓެނީއެވެ. ބިރުގެންފައި ހުރި އަޔާނީ އަފްލާކްގެ އަތުގެ މުލައްދަނޑީގައި ބާރަށް ހިފާލަމުން ކުޑަކުއްޖެއްހެން ފަހަތަށް އިނގިލި ދިއްކުރަންފެށިއެވެ. ބިރުގެންފައި ހުރިވަރުން އޭނާގެ އަނގައިން ބަހެއް ބޭރުވާގޮތެއް ނުވިއެވެ. މިޝަލަށް މިޝްޔާގެ ކައިރިއަށް އާދެވުނީ ހަމަކިރިޔާއެވެ. ވަރުދޫވެގެން ވެއްޓެންދިޔަ މިޝްޔާގެ ގައިގައި އޭނަ ހިފަހައްޓާލުމުން، މިޝްޔާ އޭނާގެ ގައިގައި ބާރަށް ބައްދާލަމުން އަޑުން އަޑުނަގާ ރޯންފެށިއެވެ. އޭނާއަށްވެސް ވީގޮތް ކިޔައިދެވޭ ވަރެއް ނުވިއެވެ. މިޝަލަށް ދެން ބަލާލެވުނީ ބިންމަތީ އިށީނދެގެން އިން ޝިއުރީއަށެވެ. އޭރު ޝިއުރީގެ ދެފަރާތުގައި ތިބެގެން ނަހީކާއި ޝައިމަން ވެގެން އުޅޭގޮތެއް އޮޅުންފިލުވޭތޯ ބަލަމުން ދިޔައެވެ. ޝިއުރީއަށްވެސް އަނގައަކުން ނުބުނެވުނެވެ. އަޑު ނުވީއްލިކަމުގައިވިޔަސް އޭނާގެ ދެލޮލުންވެސް ހުއްޓުމެއްނެތި ކަރުނަ އަންނަމުންދެއެވެ. ދަތްދޮޅި ފަޅައިގެން ގޮސްފައިވާތަނުން ލޭ މަނާވެފައިވީނަމަވެސް، އެތަން ހުރީ ދުޅަވެފައެވެ. ނަހީކް އައިސްބޮކްސްއިން ގަނޑުފެންފުޅިއެއް ގެނެސް އެތާ ޖައްސަންފެށިއެވެ.

 

“މިޝް ނުރޮއި ބުނެބަ ވީގޮތެއް…..” ރޮމުން ދިޔަ މިޝްޔާގެ ބުރަކަށީގައި ފިރުމާލަމުން ޒިކާން އަހާލިއެވެ. މިޝްޔާ، މިޝަލްގެ ގައިން ދޫކޮށްލަމުން ވީގޮތް ކިޔައިދދޭން މަސައްކަތްކުރިއެވެ.

“އަންނަނީ…. އޭތި…. އޭތި……” ކުއްލިއަކަށް ހުރެފައި އަޔާނީ ގަސްތަކާއި ދިމާއަށް އިނގިލި ދިއްކޮށްލިއެވެ. އަފްލާކްގެ ފުރަގަހަށްވަދެ، އޭނާގެ އަތުގައި ކުރިއަށްވުރެވެސް ބާރަށް ހިފަހައްޓާލަމުން ދެލޯ މަރާ ބާރުކޮށްލިއެވެ. އޭރު އޭނާއަށްވެސް ރޮވިއްޖެއެވެ. އަޔާނީގެ އަޑަށް އެންމެން އެދިމާ ބަލާލިއެވެ. ގަސްތަކުގެ ތެރެއިން ނުކުތް ބިރުވެރި ސިފައެއްގައި ހުރި މަހްލޫގު ފެނުމުން އެންމެންވެސް ޖެހިލުންވިއެވެ.

ނުނިމޭ

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.