ޓެކްސީ (އަށްވަނަ ބައި)

އަހަރެން ބޯ ހޫރާލުމަށް ފަހު އާދައިގެމަތިން ދިޔައީ ހިނގާލާށެވެ. އެހެން ދުވަސްތަކާ ޚިލާފަށް އަހަރެންގެ އަތުގައި ޓެނިސް ނެތުމުން އަހަރެން ކަސްރަތުކުރުމުގެ ޚިޔާލު ދޫކޮށްލީމެވެ. ގަޑިން 7 ޖަހަންދެން ހިނގާލުމުގަ ވަގުތު ހޭދަކޮށްލުމަށް ފަހު އަހަރެން ދިޔައީ އެޕާޓްމެންޓަށް ވަންނާށެވެ. އޭރު ޖަލީން ފޯނުން ވާހަކަ ދައްކާ އަޑު އިވި އިވި ހުއްޓެވެ.

އަހަރެން ފެނުމުން ޖަލީން ފޯނު ބޭއްވުމަށް ފަހު ހެނދުނުގެ ނާސްތާ އަށް އޯޑަރު ދިނެވެ. އޯޑަރު ކުރި ތަކެތި އަންނަން ދެން އަހަރެން ގަސްދުކުރީ ކޮޓަރިއަށް ވަންނާށެވެ. ކުރާނެ ކަމެއް ނެތުމުން ފޯނަށް އަޅާފަ ހުރި ހިތްގައިމު ނަޝީދްތައް އަޑު އަހަން ފެށީމެވެ. އަހަރެން އެންމެ ފުރަތަމަ ވެސް އަޑު އަހަން ފެށީ މިޝަރީ ރާޝިދް އަލް އަފަސީގެ ‘ރަޙްމާން’ އެވެ. ނަޝީދް ކިޔާފަ ހުރި ރީތިކަމާއި އަސަރުގަދަ ކަމުން އެންމެ ހަރު ހިތުގެ ވެރިޔާގެ ހިތައްވެސް އެނގުން ވެލައިގެން ދާނެކަން ގައިމެވެ. ނަޝީދްގެ ތެރެއަށް ގެއްލިފަ އިންދާ އަހަރެން ސިހިގެން ދިޔައީ ކޮޓަރީގެ ދޮރުގައި ޓަކި ދިން އަޑަށެވެ. ވަގުތުން އަހަންނަށް އެއީ ހެނދުނުގެ ނާސްތާ ލިބުނީކަން އެގުނެވެ. އެހެނީ ޖަލީން ކޮޓަރިއަށް ވަންނަން ޓަކި ނުޖަހާނެއެވެ. އަދަބުވެރި ކަމާއި އެކު ވާހަކަ ދެއްކުމަށް ފަހު ނާސްތާ ހިފައިގެން އައި މީހާ ދިއުމާއެކު ހެން ޖަލީން ކޮޓަރިއަށް ވަނެވެ.

ޖަލީން ކޮޓަރިއަށް ވަނުމަށް ފަހު ކޮޓަރިތެރެ އަށް ވެރިވެފައިވީ މަރު ފަދަ ހިމޭން ކަމެވެ. އެ ހިމޭން ކަމުގެ ސަބަބުން އަހަންނަށް ކުޑަކޮށް އުނދަގޫ ވާ ގޮތް ވިއެވެ. “ކޮން އިރަކު ގެއަށް ދަނީ؟” އަހަރެން ކޮޓަރީގެ ހިމޭންކަން ނަގާލަމުން އެހީމެވެ. “މިރޭ”. ކުރު ޖަވާބަކުން ޖަލީން ފުއަދާލިއެވެ.

އިރުކޮޅަކުން އިވުނީ މެންދުރު ނަމާދަށް ބަންގި ދިން އަޑެވެ. އަހަރެން ވުޟޫ ކޮށް ނިމިގެން ފާހާނައިން ނުކުތް އިރު ޖަލީން އެނދުގައި އިނެވެ. އަހަރެން ޖަލީން އަށް ނަމާދު މަތިން ހަދާން ކޮށް ދިނީމެވެ. އެއީ ކޮންމެ ނަމާދު ގަޑިއެއްގެ ވެސް ހާލަތެވެ. އަހަރެން ހަނދާން ކޮށް ނުދޭހާ ހިނދަކު ޖަލީން ނަމާދެއް ނުކުރެއެވެ. މި ކަންކަމުން އަހަރެންނަށް އެނގިގެން ދިޔައީ ނަމާދު ކުރުމަކީ ޖަލީން ގެ ކަށީގައި އަށަގެންފައިވާ ކަމެއް ނޫން ކަމެވެ.

އަސަރު ނަމާދު ކޮށް ނިމުުނުތަނާހެން އަހަރެންގެ ފޯނަށް މެސެޖެއް އައެވެ. ނަމާދު ދޮޅި އޮޅާލުމަށް ފަހު ފޯނަށް އައި މެސެޖު ކިޔާލީމެވެ. އެެއީ މި އެޕާރޓްމެންޓާއި މާ ދުރު ނޫން ހިސާމެއްގައި ހުންނަ މިސްކިތެއްގައި ބާއްވަން ހަމަ ޖެހިފައިވާ ދީނީ ދަރުހަކަށް އައުމަށް އެދި ފޮނުވާފައި އޮތް މެސެޖެކެވެ. އަހަރެން ޖަލީން ގާތު ދަރުހަށް ދިޔުމަށްޓަކައި 5.00 ޖަހާ އިރަށް ތައްޔާރު ވުމަށް ބުނީމެވެ. ޖަލީން ފޫހި ރާގަކަށް ހޫމް އަޅުވާލުމުން ޖަލީން އެ ދަރުހަށް ދާން ބޭނުން ނުވާކަން އަހަންނަށް ރަނގަޅަށްވެސް އެނގިގެން ދިޔައެވެ. ޖަލީން ފެންވަރަން ވަނުމުން އަހަރެން އަލަމާރި ތެރެއިން އޭނަ ލާނެ ހެދުމެއްނަގާ ބޭއްވުމަށް ފަހު އަވަސް އަވަހަށް ތައްޔާރު ވެލީމެވެ. ޖަލީން ތައްޔާރުވެ ނިމުމުން ދެމީހުން އެކީގައި ނުކުމެ މިސްކިތާ ދިމާލަށް މިސްރާބު ޖެހީމެވެ. ދިހަވަރަކަށް މިނެޓު ހިނގާލުމަށް ފަހު އަހަރެމެންގެ މަންޒިލާ ހަމަޔަށް ވާސިލު ވިއެވެ.

އަހަރެން ގޮސް އަންހެނުންނަށް ހާއްސަ ކޮށްފައިވާ ބައިގައި އިށީނުމުން ޖަލީންވެސް ގޮނޑިއެއްގައި އިށީނެވެ. ދަރުސް އޮތީ ނަމާދާއި ރޯދަޔާ ބެހޭގޮތުން ކަމަށް ވުމުން އަހަރެން ހުރީ އެއިން ޖަލީން އަށް ހެޔޮ ބަދަލެއް އަންނަތޯ ދުޢާ ކޮށްލަ ކޮށްލަ އެވެ. ދަރުސްގައި ނަމާދުގެ މުހިންމުކަމާއި ރޯދައާއި ނަމާދާއި ހުރި ގުޅުން ފަދަ އެތަކެއް މަޢުލޫމާތުތައް ދިނެވެ. ދަރުސް ނިމުނީ ޢަސްރު ނަމާދަށް ބަންގި ދޭން ދިހަ ވަރަކަށް މިނެޓް ވެފައިވަނިކޮށް ކަމުން އަހަރެން ޖަލީން ގާތު މިސްކިތުގައި ނަމާދު ކުރަން އެދުމަށް ފަހު ގެޔާއި ދިމާލަށް މިސްރާބު ޖެހީމެވެ. ރޫމާއި ހަމަޔަށް ދެވުމާއި އެކު ބަންގި ދިނުމުން އަހަރެން ސުންނަތާއި އެކު ނަމާދު ކޮށްލީމެވެ. އެއަށްފަހު ކުރާނެ ކަމެއް ނެތިގެން ފޯނު ނެގި އިރު ޗާޖް ނެތްކަން އެނގުމުން އަވަހަށް ޗާޖަށް ޖަހާލީމެވެ.

ފޯން ކުޑަކޮށް ޗާޖު ވުމުން އަހަރެން ފޯނު ހުޅުވާލީމެވެ. ފޯނު ހުޅުވާލި އިރު ފުލުފުލަށް ނަސްރީންގެ މެސެޖްތައް އަންނަން ފެށިއެވެ. ހުސް ޖެއްސުން ކޮށްފަ ތިބި މެސެޖުތަކެވެ. އަހަރެން ފޯނު ހުޅުވިކަން އެނގުމާއި އެކު ނަސްރީން އަހަންނަށް ގުޅާލިއެވެ. “ކޮބާ ފިރިކަލުން ގާތު ހުރެވުނީމަ ފޯނުވެސް ނިއްވާލައިގެން ދޯ ތިއުޅެނީ. ދެން މިހާރު ހާދަ ވަގޭ ދޯ. ފިރިކަލުން ހުރީމަ ބެސްޓީގެ މަތިންވެސް ހަނދާން ނެތޭ މީހުން ފެނެޔޭ އިނގޭ. ދެން ރަންކޮޅުގެ ހުރިހާ ކަމެއްވެސް ރަނގަޅު ދޯ؟” ނަސްރީން ފައްޗަކަށް ހުރިހާ އެއްޗެއް އަމުނާލުމުން އަހަރެން ގާތަށް ހިނި އައެވެ. އަހަރެންވެސް ނަސްރީން ވާހަކަ ދެއްކި ފަދަ މަޖާ ރާގަކަށް ވާހަކަ ދެއްކީމެވެ. “އޭ ލަވް. ކޮން އިރަކުތަ ގެއަށްދަނީ؟” ދޭތެރެ އަކުން ނަސްރީން އަހާލިއެވެ. “މިރޭ ދާނަން އިންޝާ ﷲ”

ކުއްލިއަކަށް ޖަލީން ކޮޓަރީގެ ދޮރުފަތް ހުޅުވާލުމުން އަހަރެން ފޯނު ކުރު ކުރުމަށް ފަހު ބޭއްވީމެވެ. އަހަންނާ ދިމާލަށް ބަލާލުމަށް ފަހު ޖަލީން ބުނެލިއެވެ. “ހިނގާ ގެއަށް ދާން”. އެވަގުތު އަހަރެން ހުރީ ނުހަނު ބަނޑުފައި ވެފައި ކަމުން ބުނާނެ އެއްޗެއް އަހަންނަކަށް ނޭނގުނެވެ. ކުރި ސުވާލަށް ޖަވާބެއް ނުދިނުމުން ޖަލީން ކައިގެން ދޯއޭ އަހާލިއެވެ. ޖަވާބެއްގެ ގޮތުން އަހަރެން ބޯ ޖަހާލީމެވެ. ކައި ނިމިގެން އަހަރެން ޕެކް ކުރަން ފެށުމުން ޖަލީން ވެސް އެހީތެރި ކަމުގެ އަތެއް ފޯރުކޮށް ދިނެވެ. ޕެކް ކުރަމުން ދިޔަ އިރުވެސް ކޮންމެހެން ބުނަން ޖެހޭ ވާހަކައެއް މެނުވީ އަހަރެމެންގެ ދެމީހުން ދޭތެރެއަކު ނުދެކެވެއެވެ. ކައިވެނީގެ މަތިވެރި ގޮށުން ދެމީހުން މުޅި އުމުރަށް އެކީ ގައި ބަނދެވިފައި ވިޔަސް އެ ދޭތެރޭގައި ލެވިފައިވާ ފާރުގެ ބޯމިން ނޭނގޭ ފަދަ އެވެ. ވާނީވެސް އެހެން ނޫން ތޯއެވެ. ދުނިޔޭގެ ލޯތަކަށް ލޯބިން ކުރެވުނު ކައިވެންޏެއްގެ ގޮތުގައި ފެނުނަސް ހަގީގަތް އެހާ ފޮންޏެއް ނޫނެވެ. ދެމަފިރިކަމުގެ ގުޅުން އެ ދެމެދުގައި ވިޔަސް އަހަންނަށް ް ޖަލީން ގެ ފަރާތުން ލިބުނު އަނިޔާގެ މަތިން ހަނދާން ނައްތާލާ ޖަލީން އަށް މާފު ކުރެވިދާނެ ހެއްޔެވެ؟ ދެމަފިރިން އެކީގައި އުފާވެރި ދިރިއުޅުމެއް ވޭތު ކުރެވިދާނެ ހެއްޔެވެ؟އަހަރެނގެ ހިތުގައި ޖަލީންގެ ސަބަބުން ލެވުނު ފުން ޒަޚަމްތައް ފަސޭހަ ވެދާނެ ހެއްޔެވެ؟

ޕެކް ކޮށް ނިމުމަށް ފަހު ހޮޓެލްގެ ޓެކްސީ އެއްގައި އަހަރެމެން ދިޔައީ ގެއާއި ދިމާލަށެވެ. ޓެކްސީ ގައި ދަތުރު ކުރަމުން ދިޔައިރު އަހަރެންނަށް ސިފަވަމުން ދިޔައީ ޖަލީންގެ ފަރާތުން އަހަންނަށް ލިބުނު އަނިޔާ ތަކެވެ. އަހަރެންގެ އިއްފަތްތެރިކަން އެއްވެސް އަގެއްނެތް ގޮތަކަށް ވެއްޔާމޮޑެލި އިރު ޖަލީންގެ ހިތައް ހަމަ އެއްވެސް އެއްޗެއް ނޭރި ހެއްޔެވެ؟ އަހަރެން ކުރި އާދޭސްތަކާއި ރުއިންތައް އަޑެއްނީވޭ ހެއްޔެވެ؟ ދެން ކުރާނެ ކަމެއް ނެތެވެ. އަހަރެމެންގެ ދޭތެރޭގައި ކޮންމެ ކަމެއް ވެފައިވީ ނަމަވެސް މިހާރު އަހަރެން މި ހުރީ ޖަލީން ގެ އަނބިމީހާގެ މަޤާމުގައެވެ. އާނ އެކެވެ. އަހަރެންގެ އަތުގައި އޮތް އެންމެ އަގުބޮޑު ޚަޒާނާ ފޭރިގަތް މީހާގެ އަނބިމީހާގެ މަޤާމުގައެވެ. މި މަޤާމުގައި ހުރެ ޖަލީންގެ ކިބައިން އަހަންނަށް ލިިބުނު ފަދަ ވޭނަކާއި ކެކުޅުމެއް އެހެން އުޚްތަކަށް ނުލިބޭނެ ފަދަ ހުރިހާ ކަމެއް އަހަރެން ކުރާނަމެވެ. ﷲގެ އިރާދަފުޅާއި އެކު ޖަލީން އަކީ ދީނަށް ލޯބި ކުރާ މީހަކަށް ހަދާނަމެވެ.

އަހަރެންގެ ޚިޔާލުތަކުން ބޭރުވެވުނީ ކާރު ގޮސް ގެކުރިމަތީ މަޑު ކުރީމައެވެ. އޭރު އަހަރެންގެ ދެލޯ ފެންކަޅި ވެފަ ހުރުމުން މީހަކަށް ނޭނގޭނެ ގޮތަށް ދެލޯ ފުހެލީމެވެ. އަހަރެން ދަބަސް ހިފައިގެން ގެއަށް ވަންނަން ދިޔައިރު ޖަލީން ޓެކްސީ ޑްރައިވަރު އަތަށް ލާރި ދޭން ހުއްޓެވެ. އޭރު ގޭތެރެއިން މަންމަ ވާހަކަ ދައްކާ އަޑު އިވި އިވި ހުއްޓެވެ. އަހަރެން ދޮރުގައި ޓަކި ދިނުމަށް ފަހު ސަލާމް ގޮވައިލީމެވެ. “ވަޢަލައިކުމުއް ސަލާމް މަންމަގެ ލައު” އަހަރެން ފެނުމާއި އެކު ބައްދާލުމަށް ފަހު މަންމަ ބުނެލިއެވެ. އޭރު ޖަލީންވެސް ވަންނަނީ އެވެ. “ދަރިފުޅު ކިހިނެއްތަ؟” ޖަލީންއާއި ސަލާމަށް އަތް ދިއް ކޮށްލަމުން މަންމަ އަހާލިއެވެ. “ރަނގަޅު”. ޖަލީން ހީލުމަށް ފަހު ބުނެލިއެވެ. “އަހަ ދައްތާ! މިއީ އަހަންނާ އެއްބަފާ ދެ ދައްތަ. ނައުފާ އާއި ރަޝާ. އެއީ އެއްމާބަނޑު ދެ ކުދިން” ޖަލީން ބުނެލިއެވެ.

“ތެދެއް. އަން. މިއޮތީ ލައު އަށް ގެނައި ކުޑަ ހަދިޔާ އެއް. ނައުފާ އަހަރެންގެ އަތަށް ކޮތަޅެއް ދިއްކޮށްލަމުން ބުުނެލިއެވެ. އަހަރެން އެއީ ކޯއްޗެއްތޯ ބަލާލީމެވެ. އެއީ ފައިވާނެކެވެ. ކަޅުކުލަޔާއި ރަންކުލައިން ޒީނަތްތެރި ކޮށްފައި ހުރި އިރު ބަލައިލަން ނުހަނު ހިތްގައިމެވެ. “ތީތި ލާބަ ހެޔޮވަރުތޯ ބަލަން.” ރަޝާ ބުނެލުމާއި އެކު އަހަރެން އެ ފައިވާން ލީމެވެ. އަހަރެންގެ ފަޔަށް ހެޔޮވަރު ވުމުން އަހަރެން އުފާވެފަ ހުރެ އަހާލީމެވެ.” ކިހިނެއް ލައު ފައިގެ ސައިޒް އެނގުނީ؟” “ޖަލް ބުނީ” ނައުފާ ބުނެލި އެތިން އަހަރެންނަށް ބަލާލެވުނީ ޖަލީން އަށެވެ. އޭރު ޖަލީންވެސް ހުރީ އަހަންނާ ދިމާލަށް ބަލަހައްޓައިގެންނެވެ. ދެ މީހުންގެ ކަޅި ދިމާވުމާއި އެކު އަހަރެން ވަގުތުން ނޭނގޭ ކަމަށް ހަދާލުމަށްފަހު އަނެއްފަރާތަށް މޫނު އަނބުރާލީމެވެ. ގޮނޑިން ތެދުވަމުން ރަޝާ ކާރުގެ ތަޅުދަނޑި ނެގުމަށް ފަހު ދެން ދަނީއޭ ބުނެލިއެވެ. އަހަރެންވެސް އެމީހުން ގޮވައިގެން ގޭގެ ގޭޓާ ހަމަޔަށް ދިޔައީމެވެ.

“ދަރިފުޅުމެން ކައިފިންތަ؟” އަހަރެން ވަނުމާއި އެކު މަންމަ އަހާލިއެވެ. “ލައްބަ އަންމީ. ހޮޓަލުން ކައިގެން މި އައީ” އަހަރެން ބުނެލީމެވެ. “އެހެންތަ؟ އަންމީވެސް އެ ދެކުދިންނާއި އެކީ ކައިފިން. އަންމި ދެން މިދަނީ ނިދަން އިނގޭ”. މިހެން ބުނެލުމަށްފަހު މަަންމަ ނިދަން ދިޔައެވެ. އޭރު ޖަލީން އަހަރެންގެ ކޮޓަރިއަށް ވަނުމުން އަހަރެން ވެސް އިރުކޮޅަކަށް ސިޓިންގރޫމްގައި މަޑުކޮށްލުމަށް ފަހު ކޮޓަރިއަށް ވަނީމެވެ. އޭރު ޖަލީން އޮތީ ނިދިފައެވެ. ރޭގަ ރަނގަޅަށް ނުނިދުނީމަ ކަންނޭނގެއެވެ. އަހަރެންވެސް ފާހާނަޔަށް ވަދެ ދަތް އުނގުޅާ މޫނު ދޮވެ ހަދައިގެން އައިސް ޖަލީންގެ ބިއްދޮށުގައި އޮށޯތީމެވެ. މާ ގިނަ އިރުތަކެއް ނުވެ އަހަރެންވެސް ހުވަފެނީ ޢާލަމަށް ދަތުރު ކުރީމެވެ.

-ނުނިމޭ-