އިއުނާސް (12)

ދަތުރު ދިގުވެ ކުއްލިއަކަށް ލޯންޗުގެ މިސްރާބު އެހެން ދިމާއަކަށް އަނބުރާލައިފިއެވެ. ލޯންޗުގެ ކެޕްޓަންގެ އެއްވެސް އިޚްތިޔާރެއް އެކަމުގައި ނެތްކަހަލައެވެ. އޭނާވެސް އިނީ ގޮތް ހުސްވެފައެވެ. އޭނާ ދަތުރު ފެށީ ހުރައަށް ދާށެވެ. ނަމަވެސް ލޯންޗުގެ ވަށައިގެން އެރި ދުންތަކާއެކު ލޯންޗުގައިހުރި ޖީޕީއެސް ނިވުނުފަހުން އޭނާއަށް މިހާރު ލޯންޗު ދަތުރުކުރަމުން މިދަނީ ކޮންތާކަށްކަމެއް ނޭނގެއެވެ. އޭނާ އެކަން އެހެންމީހުންނަށް އަންގަން މަސައްކަތްކުރި ނަމަވެސް އޭނާގެ ދޫ ހަރަކާތެއް ނުކުރިއެވެ. ކުޑަމިނުން އެމީހުންނާ ދިމާއަށް ބަލާވެސްނުލެވުނެވެ. ހީވަނީ އިންތަނަށް ގަނޑުވެފައި އިންހެންނެވެ. އެތައްއިރަކު ދުއްވުމަށްފަހު ލޯންޗުގެ ދުވެލި މަޑުވެލައިފިއެވެ. ކުއްލިއަކަށް ކައްޕިއަށްވެސް ދިރުން ލިބިއްޖެއެވެ. އެންމެންނަށް ބޭރު ބަލާލެވުނުއިރު ރަށެއްގެ މަލަމަތި ފެންނަން ފެށުމުން ހައިރާންވެފައި ބަލަން ތިބެވުނީ އެއީ އެއިން މީހަކު ދުވަހަކުވެސް އައިސްފައިވާ ރަށަކަށް ނުވާތީއެވެ. އަނެއްކޮޅުން އެމީހުން ހުރައަށް ފެށި ދަތުރުގައި އެހެން ރަށަކަށް އާދެވުނީތީވެސްމެއެވެ.

“ކައްޕި! މީ ކޮން ރަށެއް؟ ހުރައަށް ފެށި ދަތުރެއް މިރަށަށް ނިމެންވީ ކީއްވެ؟” ޔާމިންއަށް ކެތްނުވެގެން އަހާލެވުނެވެ.

“ނޭނގެ.” ކައްޕިގެ ޖަވާބު ވަރަށް ކުރެވެ.

“ތީ ދެން އަޖައިބެއްނު. ކަލޭ ދުއްވީ. ކަލޭއަކަށް އާދެވުނު ތަނެއް ނޭނގޭ.” ޔާމިންގެ ގާތަށް ރުޅިއައެވެ.

“މީ އަހަރެން ދުވަހަކުވެސް އައި ރަށެއް ނޫން. އަދި ދުވަހަކު ދެކުނު ރަށެއްވެސް ނޫން. ދެން އަހަރެންނަށް ކިހިނެއް އެނގޭނީ މީ ކޮން ރަށެއްކަމެއް؟” ކައްޕި ރުޅިއައިސްފައި ބުންޏެވެ.

“ތެދަށް ބުނޭ! މީ ކޮން ރަށެއްހޭ!؟” ޔާމިން ކައްޕިގެ ޓީޝާޓު ކަރުވަރުގައި ހިފަމުން އޭނާއާ ދިމާއަށް ހަޅޭއްލަވައިގަތެވެ.

“ޔާމްބޭ! ހަމަޖެހިބަލަ. ދޫކުރޭ!” މިއުވާން ގަދަކަމުން ޔާމިންގެ އަތް ނެއްޓުވިއެވެ. އަދި ކައްޕިއާ ދުރުކުރުވިއެވެ.

“ހަމަޖެހޭށޭ!!؟ ބަލަ މީގަ މިތިބީ މާބަނޑު ދެއަންހެނުންނާ ކުޑަ އަންހެންކުދިންތަކެކޭ. ދެންވެސް ތިބީ ގިނައިން އަންހެނުންނޭ. އަނެއްކޮޅުން މީ ކޮންފަދަ ރަށެއް ކަމެއްވެސް ނޭނގެ.” ޔާމިންގެ ރުޅި އަދިވެސް މަޑުވާގޮތެއް ނުވެއެވެ.

“ޔާމްބެވެސް ވިސްނާލަބަލަ. ޔާމްބެވެސް ދުށީމެއްނު ލޯންޗު ވަށައިގެން ދުންތަކެއް އަރާފަ ވީގޮތްގޮތް. އެހެންވީމަ ކައްޕިއަށްވެސް އާދެވުނު ތަނެއް ނޭނގޭނެއެއްނު.” މިއުވާން ޔާމިންއަށް ވިސްނައިދޭފަދަ ގޮތަކަށް ބުންޏެވެ. އޭރު ހުރިހާ އަންހެންވެރިންނަށްވެސް އެކަމަށް ސަމާލުކަން ދެވިއްޖެއެވެ. އިރުކޮޅެއްވީއިރު ކައްޕި އިނީ އޭނާގެ ސީޓްގައެވެ. އޭނާ އުޅުނީ އެމީހުން ތިބީ ކޮން ހިސާބެއްގައިކަން އެނގޭނެ ގޮތެއް ވޭތޯއެވެ.

“ޖީޕީއެސްވެސް ހުންނާނެއެއްނު. އެއިން އެނގޭނެއެއްނު މީ ކޮން ރަށެއްކަން. ކޮން ހިސާބެއްކަންވެސް. ހިނގާބަލަ.” ޔާމިންއަށްވެސް ވިސްނުނީ ކަންނޭނގެއެވެ. އޭނާ އެހެން ބުނިއިރު އެއަޑުގައި ކުރިން ހުރި ރުޅިވެރިކަމެއް ނެތެވެ. މިއުވާންއާއި ޔާމިން ކައްޕި ގާތަށް ދިޔައިރު އޭނާ އުޅެނީ ޖީޕީއެސް ނުހުޅުވިގެންނެވެ.

“މީތި ހަލާކުވީ ކަންނޭނގެ. އޭރު އެ ދުންތަކެއް އެރިތަނާ ނިވުނުގޮތަށް މިއެއް ނުހުޅުވުނޭ.” ކައްޕި ކަންބޮޑުވެފައި އެހެން ބުނެލުމުން މިއުވާންއަށް ބަލާލެވުނީ ޔާމިންއަށެވެ.

“ދެން ކިހިނެއް ހަދާނީ؟” ޔާމިންއަށް އަހާލެވުނެވެ.

“އަހަރެންނަށް ފެންނަނީ މިރަށަށް ފައިބަން.” މިއުވާން ވަރަށް ވިސްނާލާފައި ބުންޏެވެ.

“ވާން! މޮޔަވީތަ؟ މީ ގޮތް ނޭނގޭ ރަށެކޭ. މިރަށަށް ފޭބުން ބުއްދިވެރި ގޮތަކަށް ނުވާނެ. އަހަރެންނަށް ފެންނަނީ މާލެ ދާން.” ޔާމިން ހިތްހަމަނުޖެހިފައި ބުންޏެވެ. އޭރު ރައޫފްއާއި މާހިރުވެސް އައިސް އެމީހުން ގާތު ހުއްޓި ޚަބަރު އޮޅުންފިލުވިއެވެ. ޔާމިން އެމީހުންނަށް ވީގޮތް ކިޔައިދިނެވެ.

“ދަރިފުޅާ! ޔާމިން އެބުނީ ރަނގަޅަށް. މިކަހަލަ ގޮތް ނޭނގޭ ތަނަކަށް ފޭބުން ރަނގަޅެއް ނުވާނެ. އެހެންވީމަ އެންމެ ރަނގަޅުވާނީ ޔާމިން އެބުނިހެން މާލެ ދިޔައިއްޔާ. ދޯ ރައޫފް.” މާހިރު ރައޫފްއަށް ދޯ ދިނުމުން ރައޫފްވެސް އެކަމާ އެއްބަސްވިއެވެ.

“ކައްޕީ! މާލެ ދާން ނައްޓާލާ.” ރައޫފް އެހެން ބުނެލުމުން ކައްޕި ލޯންޗު ސްޓާޓް ކުރެވޭތޯ އުޅުނެވެ. ސްޓާޓެއް ނުވިއެވެ. ތެޔޮވެސް ބަރާބަރަށް އެބަހުއްޓެވެ. ނަމަވެސް އެތައް މަސައްކަތަކުންވެސް ލޯންޗު ސްޓާޓް ކުރެވޭގޮތެއް ނުވިއެވެ.

“ލޯންޗުގަނޑުވެސް ހަލާކުވީތަ؟ ހާދަ ސުންޕާ ދަތުރެކޭ މި ރޭވުނީ. އެހެން ލޯންޗަކަށް ގުޅޭތޯ ބަލަމާ.” ޔާމިން ބުންޏެވެ.

“ގުޅިއްޔާ އަހަރެމެން ކިހިނެއް މިތަން ބުނެދޭނީ. މީ ކޮން ރަށެއްކަން އެނގޭ އެކަކުވެސް މިތާ ހުރީކީ ނޫން. އަނެއްކޮޅުން ޖީޕީއެސް ހަލާކުވެފަ. ދެން…”

“ފޯނުންވެސް ބެލޭނެއެއްނު.” ޔާމިން އެހެން ބުނެފައި ފޯނު ނެގިއިރު ފޯނުގައި ރޭންޖެއް ނެތެވެ.

“ޝިޓް!! އަދި ރޭންޖުވެސް ނުލިބޭ ހިސާބެކޭ މީ.” ޔާމިން ކަންބޮޑުވެފައި ބުނެލިއެވެ.

“ދެން އޮތް ހަމައެކަނި ގޮތަކީ މާތް ﷲއަށް ވަކީލުކޮށްލައިގެން މިރަށަށް ފޭބުން. އިރާދަކުރެއްވިއްޔާ ދެރަގޮތެއް ނުވާނެ.” ،މިއުވާން ބުނެލިއެވެ. މިކަމަކީ އޭނާއަށް ކޮޓަރިތެރެއިން ފެނުނު ކަންތަކާ ގުޅުންހުރި ކަމެއްހެން އޭނާއަށް ހީވަނީއެވެ. ރުކާން ބުނިހެން އެދެމީހުން ދުރުކުރަން އެޖިންނި ބޭނުންވަނީ ހެއްޔެވެ؟ އަނެއްކާ އެއީ މާޝަލްއަށް ނުވެދާނެބާއެވެ. ނަމަވެސް މާޝަލް މަރުވެއްޖެކަމަށް ރުކާން ވަނީ ބުނެފައެވެ. ވީއިރު އޭނާއާއި ރުކާން ދުރުކުރަން އުޅޭނީ ކާކުބާއެވެ. އަނެއްކާ ރުކާންއާ އަޅައިގެންފައި އެހެން ޖިންނިއެއް ހުންނަނީބާއެވެ. މިފަދަ ޚިޔާލުތަކަކުން މިއުވާން ހާސްވެއްޖެއެވެ. ނަމަވެސް އޭނާ އެކަން ނުދައްކާ ހުރީ އެހެންމީހުންނާ ދޭތެރޭ ވިސްނާލާފައެވެ.

ހުރިހާ އަންހެންވެރިން ނުހަނު ހާސްވެފައި ތިބިއިރު ރުކާންގެ ހާލު ވަކިން ބޮޑެވެ. ދަތުރު އަންނަ ވާހަކަ ދެއްކީއްސުރެ އޭނާގެ ހިތްވަނީ ނުތަނަވަސްވެފައެވެ. ނަމަވެސް ރޯދަޔަށްވީތަނާ ވިއްސާރަވެގެން ދަތުރު ކެންސަލްވުމުން ދެން ދަތުރު ނާންނާނެކަމަށް ހީކޮށް އޭނާ ހިތްހަމަޖައްސާލައިގެން ހުރީއެވެ. މިއީ އޭނާއާ ދިމާކުރާ ޖިންނީގެ ކަމަކަށް ނޫނީ ނުވާނެޔޭ އޭނާގެ ހިތް ބުނެއެވެ. ދެން ކުރާނެކަމެއް ނެތެވެ. މިފަހަރު މިއޮތީ ހަމަ ރަނގަޅަށްވެސް އެއެތީގެ އަތްދަށުވެފައެވެ. ދެން މިރަށަށް ނުފައިބާ ޔަޤީނުންވެސް ސަލާމަތެއް ނުވެވޭނެއެވެ. އަދި ސަލާމަތްވާނެކަމުގެ ޔަޤީންކަމެއްވެސް އޭނާއަކަށް ނެތެވެ.

“ހިނގާ ފައިބަމާ.” މާހިރުއާއި ރައޫފް އެހެން ބުނެލުމުން މުނީޒާއަށް ތެޅިގަނެވުނެވެ.

“އަހަރެންނަކަށް ނުކެރޭނެ މިރަށަށް ފައިބާކަށް.” މުނީޒާ އަވަސްއަވަހަށް ބުނެލިއެވެ. ޔުމްނާއާއި ރަހީމާވެސް އެކަމާ އެއްބަސްވީއިރު ރުކާން އެއްވެސް އެއްޗެކޭ ނުބުނެ އިނީ އެރަށަށް ނުފައިބާ ވާނެ އިތުރު ގޮތެއް ނެތްކަން ޔަޤީންވީތީއެވެ.

“މަންމާ! ހާސްނުވެބަލަ. އިރާދަކުރެއްވިއްޔާ އެއްވެސް ކަމެއް ނުވާނެޔޭ. ހިނގާ ފައިބަން. މިހެން ތިއްބަސް ކުރެވޭނެ އެއްވެސް ކަމެއް ނޯންނާނެ. ކައިބޮއި ހެދޭނީވެސް ރަށަށް ފައިބައިގެންނު. މިހާރު މަލާމެންވެސް ތިބޭނީ ވަރަށް ބަނޑުހައިވެފަ. އަޅުގަނޑަކަށް ހިޔެއްނުވޭ މިރަށަށް ނުފައިބާ އެނބުރި މާލެ ދެވިދާނެހެނެއް.” މިއުވާން އެންމެފަހުން ބުނި މާނަ ފުން ޖުމްލަ އެކަކަށް ވިސްނައިނުގަނެވުނަސް މިއުވާން އެބުނި އެއްޗެއް ރުކާންއަށް އެނގުނެވެ. އެހެންމީހުންނަށް އެކަން ފާހަގަނުކުރެވުނީ ކަންބޮޑުވެފައި ތިބުމުގެ ސަބަބުންނެވެ. އެތައް ވާހަކައެއް ދެއްކުމުން މުނީޒާ ރަށަށް ފައިބަން އެއްބަސްވީ ހިތާއި ދެކޮޅަށެވެ. އިތުރު އެހެންގޮތެއް ނެތްކަން އެނގުނުއިރު އޭނާ ވިސްނީ ހަމައެކަނި އޭނާގެ ދަރިންކޮޅާމެދުގައެވެ. އަނެއްކޮޅުން ކެއުމަށް ޚާއްސަ ސަމާލުކަމެއް ދޭންޖެހޭ ޒުވާން ދެ އަންހެންކުދިންނަށެވެ.

“ހިނގާ ރަށުތެރެއަށް އަރަމާ.” މިއުވާން އެހެން ބުނެފައި އެތެރެއަށް ހިނގައިގަތުމުން ޔާމިން އޭނާގެ އަތުގައި ހިފެހެއްޓިއެވެ.

“ވާން! އަހަރެންނަކަށް ނުފެނޭ ރަށުތެރެއަށް އަރާކަށް. ކޮންމެއަކަސް މީ ވަރަށް ސުންޕާ ރަށެއް. މިރަށަށް އައިއިރު ދަތުރުމަތިން ދިމާވީކީ އާދައިގެ ކަމެއްނޫން. އަނެއްކޮޅުން މިރަށަށް ލެފުނުއިރު ޖީޕީއެސްގެ ބޭނުން ނެތި ފޯނުގެ ބޭނުން ނެތުނީމަވެސް އެނގޭ މީ ރަނގަޅު ރަށެއް ނޫންކަން.” ޔާމިން އެހެން ބުނެލުމުން މިއުވާން ޗޮކެއް ކަނޑާލިއެވެ.

“ކޮންކަމަކާ ބިރުންތަ ތިއުޅެނީ؟ މިދުނިޔެ މައްޗަށް މާތް ﷲ ފޮނުއްވާފަ ވަނީ ހަމައެކަނި އިންސާނުންނެއް ނޫނޭ. އަހަރެމެން އެއެއްޗިއްސަށް ގޯނާއެއް ނުކުރަނީސް އެއެއްޗެހި އަހަރެމެންނަކަށް ގޯނާއެއް ނުކުރާނެ. ކިތަންމެ ވަރަކަށް ފިލަން ދުވިޔަސް އަހަރެމެންނަށް މަރަކަށް ނުފިލޭނެ. އެހެންވީމަ އާދޭ! އެކަކުވެސް ވަކިން ތަނަކަށް ނުދާތި! އެންމެން އެކުގަ އުޅެންވާނީ. އިރާދަކުރެއްވިއްޔާ ދެރަގޮތެއް ނުވާނެ.” މިއުވާންގެ ވާހަކައިން މާހިރުއަށް ﷲއަށް ޙަމްދުކުރެވުނީ އެފަދަ މާތް ދަރިއަކު އޭނާއަށް ލިބުމުންނެވެ.

މިއުވާންގެ ފަހަތުން އެންމެން ހިނގައިގަތްއިރު ރުކާން ހުރީ ތަންކޮޅެއް ފަހަތުގައެވެ. އޭނާ ހުރީ ދެން ވާނީ ކިހިނެއްބާއޭ ހިތަށް އަރައަރައެވެ. އެހެންމީހުން ފަރާތް ފަރާތަށް އެނބުރެމުން މަޑުމަޑުން ކުރިއަށް ދިޔައެވެ.

“މަންމާ!” މަޑުމަޑުން ހިނގަމުންދިޔަ ރުކާންއަށް ހުއްޓެވުނީ ދާދި ގާތުން މަންމާއޭ ކިޔާފައި ގޮވާލި އަޑަށެވެ. ނުހަނު އޮމާން އަންހެން އަޑެކެވެ.

“ދަރިފުޅާ! މަންމައަށް ފެނިބަލަ.” ރުކާން ބިރުން ހުރިނަމަވެސް އެ ލޯބި އަޑު އިވުމާއެކު މައިވަންތަ ލޯބި އުތުރި އަރައިގަތެވެ. ހިނދުކޮޅެއް ކުރިން އޭނާ ގެންފައިވާ ބިރު ފިލައިގެން ދިޔައީ ބަސްބުނާހާ ހިނދުންނެވެ.

“މަންމާ! އަޅުގަނޑު މިހުރީ މަންމަގެ ފަހަތުގައޭ.” މިޝްކާ އެހެން ބުނެލުމާއެކު ރުކާން ފަސްއެނބުރި ބަލާލިއެވެ. އެޔާއެކު އޭނާއަށް ސިހުމެއް ލިބުނީ ފަސްވަރަކަށް އަހަރުގެ އަންހެންކުއްޖެއް ފެނިފައެވެ. އެއީ ހަމަ އޭނާގެ ދަރިފުޅުބާއޭ ރުކާންގެ ހިތަށްއެރިއެވެ. އޭނާގެ ދަރިފުޅަށް އަދި އެއް އަހަރުވެސް ނުވާނެއެވެ. އެކަމަކު އޭނާގެ ކުރިމަތީ އެހުރީ ފަސްވަރަކަށް އަހަރުގެ އަންހެންކުއްޖެކެވެ. މިޝްކާގެ ބޮޑު ދެލޮލުގައި ހުރީ މާޝަލްގެ ލޯފަދައިން ރަންކުލައެވެ. ފައިތިލައާއި ހަމައަށް ހުރި ދިގު އިސްތަށިގަނޑު އެހާމެ ކަޅުކަން ގަދަވެފައި ނުހަނު ވަރުގަދައެވެ. ހަންގަނޑު އޮމާންވެފައި ބޯކިރު ފޮދެއްހާ ކުލަ އައްޔެވެ. ފަޔާއި ހަމައަށް ހުރި ރަންކުލައިގެ ދަޅައަރާ ހެދުމުން މިޝްކާގެ ރީތިކަން އެތައް ގުނައަކަށް އިތުރުކޮށްދީފައިވެއެވެ.

“އަޅުގަނޑަށް އެނގޭ މަންމަ ތި ވިސްނަނީ ކޮން އެއްޗެއްކަން؟ މީ ހަމަ މަންމަގެ މިޝްކާއޭ. އަޅުގަނޑުމެންނަކީ ސިފަ ބަދަލުކުރެވޭ ބައެއް. އަޅުގަނޑުގެ އުމުރުން ކިތަންމެ ހަގުވިޔަސް އަޅުގަނޑުމެން ބޭނުންވެއްޖެނަމަ މުސްކުޅިއެއްގެ ސިފައަށްވެސް ބަދަލުވެވިދާނެ.” މިޝްކާ މައުސޫމްކަމާއެކު ބުނެލިއެވެ.

“ދަރިފުޅާ!” ރުކާން މިޝްކާއާއި އެއްވަރަށް ތިރިވެލަމުން މިޝްކާގެ މައުސޫމް އޮމާން މޫނުގައި ފިރުމާލިއެވެ. އަދި މޫނުގައިވެސް އެތައްފަހަރަކު ބޮސްދީފައި އޮޅުލައިގަތްގޮތުން ހީވީ އެތައް ދުވަހެއް ވަންދެން ގެއްލިފައިހުރި ދަރިއަކު ފެނުނުހެންނެވެ. އެ އަސަރުގަދަ މަންޒަރު ފެނުނު ކޮންމެ މީހެއްގެ ލޮލުން ކަރުނަ ހިލުވާލާނެކަން ގައިމެވެ. މިޝްކާއަކީ އިންސާނަކަށް ނުވިޔަސް މައިވަންތަކަމުގެ ކުލުނު ވަނީ އެހުރިހާ ކަމެއްގެ މައްޗަށް ބާރުފޯރުވާފައެވެ.

“މަންމާ! މިރަށުން މަންމަމެންގެ އެއްވެސް މީހަކަށް އެއްވެސް ނުރައްކަލެއް ނުވާނެ. މީ އަހަރެމެންގެ އާއިލާގެ އަމިއްލަ ރަށެއް. އަޅުގަނޑުމެން އާއިލާގެ އެއްވެސް ދުޝްމަނަކަށް މިރަށަކަށް ނާދެވޭނެ. އަދި މިރަށެއް ނުވެސް ފެންނާނެ. މަންމަމެން މިރަށަށް ގެނައީ މާމަ ބޭނުންވެގެން. މާމަ ބުނުއްވި މަންމައާ ބައްދަލުކުރަން ބޭނުންފުޅުވާ ވާހަކަ. އެހެންވެގެން މަންމަމެން މިރަށަށް ގެނައީ. އެންމެ ފަސޭހައިން މަންމައާ އެވާހަކަ ދެއްކެވޭނީ މިރަށުންކަމަށްވާތީ.” މިޝްކާ އޮޅުންފިލުވައިދިނެވެ. މިރަށަށް ފޭބީއްސުރެ އެންމެން އުޅެމުންދިޔަ ގޮތް މިޝްކާއަށް ވަނީ އެނގިފައެވެ. އެހެންކަމުން އޭނާ ބޭނުންވީ އެރަށުން އެމީހުންނަށް އެއްވެސް ކަހަލަ ނުރައްކަލެއް ނެތްކަމުގެ ޔަޤީންކަންދޭށެވެ.

“މަންމަ އަޅުގަނޑުދެކެ ބިރުގަނޭތޯ؟” ރުކާން މިޝްކާގެ މޫނަށް ބަލަހައްޓައިގެން ހުއްޓާ މިޝްކާ ސުވާލުކޮށްލުމުން ކުޑަކޮށް ސިހިފައި ދުރަށް ޖެހިލެވުނެވެ. އޭނާއަށް މިޝްކާގެ މޫނަށް ބަލާލެވުނެވެ. އެދެލޮލުގައިވާ ހިތްދަތިކަން ރުކާންއަކަށް ސިއްރެއްނުވިއެވެ. މިޝްކާގެ ދެލޮލުން ބުނަން ބޭނުންވީ ވާހަކަތައް ރުކާންއަކަށް ތަރުޖަމާ ކުރާކަށް ނޭނގުނެވެ. ނަމަވެސް އޭނާއަށް އެނގޭހާވެސް އެއްޗަކީ އެދަރިފުޅު އޭނާގެ ގާތުގައި ބުނަން ބޭނުންވާ ވާހަކަތަކެއް ހުރިކަމެވެ. އޭނާ އިންތިޒާރުކުރީ މިޝްކާ އޭނާ ގާތުގައި އެވާހަކަތައް ބުނާނެ ވަގުތަކަށެވެ. ނަމަވެސް އޭނާގެ އިންތިޒާރަކަށް ނިމުމެއް އަންނަ ގޮތެއްނުވިއެވެ. އެހެނެއްކަމަކު އޭނާ އެކަމާ ސުވާލެއް ނުކުރީ މިޝްކާ އެވާހަކަ ދައްކަން ބޭނުންވެގެން އަމިއްލައަށް އެވާހަކަ ބުނަން ފުރުސަތުދޭށެވެ.

“ނޫން. ދަރިފުޅު މިއަދު ކޮންކަހަލަ ވާހަކައެއް ތިދައްކަނީ؟ މަންމަ ދަރިފުޅުދެކެ ބިރެއް ނުގަނޭ. މަންމަމެން ކަހަލަ އިންސާނަކަށް ނުވިޔަސް ތީ ހަމަ މިމަންމަގެ ދަރިއެއް. އެހެންވީމަ މަންމަ ކީއްވެ ދަރިފުޅުދެކެ ބިރުގަންނަންވީ؟” ރުކާން ބުނެލިއެވެ.

“މަންމަ ބައްޕަދެކެ ލޯބިވޭތަ؟”

“މަންމައަކަށް ނޭނގެ ތިސުވާލުގެ ޖަވާބެއް. އެކަމަކު ދުވަހަކުވެސް ބައްޕަ ހިތްހަމަނުޖެހޭނެ ކަމެއް ނުކޮށްވޭތޯ މަސައްކަތްކުރިން. ދަރިފުޅު ފެންނަ ކޮންމެ ފަހަރަކު ދަރިފުޅުގެ ބައްޕަ މަތިން ވަރަށް ހަނދާންވޭ. ދަރިފުޅުގެ ބައްޕައަކީ ވަރަށް ރަނގަޅު މީހެއް. އިންސާނަކަށް ނުވިޔަސް، މަންމައަށް އެނގިގެން ދުވަހަކުވެސް މީހަކަށް ގެއްލުމެއް ނުދޭ. ހިއެއްނުވޭ މަންމައަށް ނޭނގިވެސް މީހަކަށް ގެއްލުމެއް ދިންހެނެއް.” ރުކާންގެ ދެލޯ ފެންކަޅިވިއެވެ. އޭނާއަށް މާޝަލްދެކެ ލޯބިވެވުނީ ވަގުތީ ގޮތުން ކަމަށްވިޔަސް އޭނާ މާޝަލްގެ ހެޔޮކަން ދުވަހަކުވެސް ހަނދާނެއް ނުނެތޭނެއެވެ. އަދި އަމުދުން މިޝްކާ ދުނިޔޭގައި ހުރިހާ ހިނދަކު އެކަން އެގޮތުގައި ދެމިއޮންނާނެއެވެ.

“އަޅުގަނޑަށް އެނގޭ. މަންމަ އަބަދުވެސް ލޯބިވަނީ މިއުވާން ބޭބެދެކެ. ބައްޕައަށް މަންމަ އެންމެ ފުރަތަމަވެސް ފެނުނީ މިއުވާން ބޭބެ ހެދިގޮތަކުން ދެރަވެގެން އުޅެނިކޮށް. މަންމަގެ ހުރިހާ ކަމެއްވެސް އަޅުގަނޑަށް އެނގޭ. އެކަމަކުވެސް އަޅުގަނޑު މަންމަދެކެ ވަރަށް ލޯބިވޭ.” މިޝްކާގެ ވާހަކައިން ރުކާންއަށް ހައިރާންކަމެއް ލިބުނެވެ. އެ ޙާދިސާތަކަކީ މިޝްކާ ދުނިޔެއަށް އުފަންވުމުގެ ކުރިން ހިނގާފައިވާ ޙާދިސާތަކަކަށްވާއިރު އެކަންކަން މިޝްކާއަށް އެނގޭނީ ކޮންމެވެސް މީހަކު ކިޔައިދިނީމަތާއެވެ. އަނެއްކާ އެވާހަކަތައް މިޝްކާއަށް ކިޔައިދިނީ މާޝަލްބާއެވެ. ނޫނީ އާޝާބާއެވެ. މިފަދަ ޚިޔާލުތަކެއް ވެރިވުމުން ރުކާން ދެރަވިއެވެ. ނަމަވެސް އޭނާ އެކަމާ ވިސްނާކަށް ބޭނުމެއްނުވިއެވެ.

“މަންމަ ދެން ދަނީ.. މިހާރު މާމަމެން މަންމަ ހޯދަން އުޅޭނެ.” ރުކާން އެހެން ބުނެލުމުން މިޝްކާ ހީލި އަޑު މިއުޒިކެއް ފަދައިން ރުކާންގެ ކަންފަތާއި ހަމައަށް ފޯރިއެވެ.

“މާމަމެން މަންމަ ގެއްލިގެނެއް ނޫޅޭނެ. އެއީ މިދަތުރު ނިމެންދެން އަޅުގަނޑުގެ އާއިލާގެ ދައްތައެއް މަންމަގެ ސިފައިގަ އެމީހުންނަށް ފެންނާނެ. އެމީހުންނަށް އެއްވެސް ޝައްކެއް ނުވާނެހެން އެދައްތަ އުޅޭނެ މިއަދު ދަތުރު ނިމެންދެން. މިއަދު އިރުއޮއްސުމުގެ ކުރިން މަންމަމެންނަށް މިރަށުން ފުރޭނެ. އެހުރިހާ ވަގުތަކުވެސް މަންމަ އުޅެނީ އަޅުގަނޑާއިއެކު.” މިޝްކާގެ ވާހަކައިން ރުކާންއަށް ހަމަޖެހުމުގެ ނޭވައެއް ލެވުނެވެ.

“މަންމަމެން އައި ވަގުތު ހިނގި ހުރިހާ ކަމަކީވެސް މާމަ ކުރި ކަންތައްތަކެއް. އެއީވެސް މަންމަމެންގެ ރައްކަލަކަށް. އަދި މަންމައާ ދައްކަވަން ބޭނުންފުޅުވާ ވަރަށް މުހިންމު ވާހަކައެއް އޮތްކަމަށް މާމަ ބުނުއްވި.” މިޝްކާ އެހެން ބުނެލުމުން ރުކާންއަށް ހަމަޖެހުމުގެ ނޭވައެއް ލެވުނެވެ. އޭނާގެ ޝައްކު ޔަޤީނަށް ބަދަލުނުވީތީ ހިތާހިތުން ﷲއަށް ޙަމްދުކުރެވުނެވެ.

“ކޮބާ މާމަ؟”

“މާމަ އެއޮއްގެން ދުރުވަނީ.” ރުކާންގެ ފަހަތަށް އިނގިލި ދިއްކޮށްލަމުން މިޝްކާ ބުނެލިއެވެ. ރުކާން ފަހަތަށް ބަލާލިއިރު އަންހެނަކު ހިނގާލާފައި އާދެއެވެ. އެއީ މާޝަލްގެ މަންމަ އާޝާއެވެ. އުމުރު ސާޅީހަށްވުރެ މައްޗަށް އަރާފައިވާއިރުވެސް ޒުވާންކަމުން ހީވަނީ ވިހި ފަންސަވީސް އަހަރުގެ އަންހެނެއްހެނެވެ.

“ދަރިފުޅާ ރުކާން. ހިނގާ ގަނޑުވަރަށް.” އާޝާ ހިތްހެޔޮކަމާއެކު ރުކާންގެ އަތުގައި ހިފަމުން ބުނެލިއެވެ. ރުކާންއަށް އާޝާގެ އަތުގެ ފިނިކަން އިހުސާސްކުރެވުނެވެ.

**********

“މީ އަޖައިބެއް ކަހަލަ ރަށެއް. މިއޮއް އަވިގަދައިރުވެސް އެއްވެސް ވަރަކަށް ހޫނެއްނުވޭ.” ޔާމިން ބުނެލިއެވެ.

“އާނ ދޯ؟ އަނެއްކާ މިރަށުން އެއްވެސް ބަޔަކުވެސް ނުފެނޭ. އެކަމަކު މިހިރަ ބަގީޗާތަކާ މަގުތައް ހަދާލާފަ މިއޮތްގޮތުން ހިއެއްނުވޭ މީ ފަޅު ރަށެއްހެނެއްވެސް. ނޫންތަ؟” އީޝަލްގެ ވާހަކައަށް އެންމެންވެސް ތާއީދުކުރިއެވެ.

“އަހަރެންނަށް ހީވަނީ އަހަރެމެން ބިރުން އުޅުނަސް މީ އެކަހަލަ ރަށެއް ނޫންހެން. މިހާރުވެސް ކިހާ ތަނަކަށް ހިނގިއްޖެ. އެކަމަކު އެކަހަލަ ކަމެއްގެ ނިޝާނެއްވެސް ނުފެނެއެއްނު. އެކަހަލަ ރަށެއްނަމަ މިހާއިރުވާއިރު އެކަހަލަ ކަމެއް ނުފެނިއެއް ނުދާނެ.” ޔާމިން ބުނެލިއެވެ.

“އަހަރެން އޭރުވެސް ބުނީމެއްނު އިރާދަކުރެއްވިއްޔާ އެއްވެސް ކަމެއް ނުވާނެޔޭ.” މިއުވާން ހިނިތުންވެލަމުން ބުނެލިއެވެ. އެންމެނަށްވެސް ބޯޖަހާލެވުނެވެ. އޭރު އެމީހުންގެ ފަހަތުން ހިނގަމުންދިޔަ ރުކާންގެ ސިފައިގައިވާ ޖިންނީގެ ތުންފަތުގައިވަނީ ކާމިޔާބީގެ ހިނިތުންވުމެކެވެ. އޭނާ އެހާ ހިމޭންވެފައި ހުރުމުންވެސް އެމީހުންނަށް ޝައްކެއްނުވީތީ އޭނާ ހިތްހަމަޖެހުނެވެ.

**********

އާޝާ ރުކާންގެ އަތުގައި ހިފައިގެން ގޮސް ގަނޑުވަރަށް ވެއްދުމުން ރުކާންގެ ލޯ ދިޔައީ ތަރަތަރަޖަހައިގެންނެވެ. ދުނިޔެމަތީގެ ކަމެއްބާއޭވެސް އޭނާގެ ހިތަށްއެރިއެވެ. ތާޖު މަހަލްވެސް އެހާ ފުރިހަމަވާނެކަމެއް ނޭނގެއެވެ. ގަނޑުވަރުގެ ހުރިހާ ފާރެއްގައިވެސް ވަނީ ބިއްލޫރިއެވެ. ބިއްލޫރި އެތައް ދޮރަކުން ވަދެވި ނުކުމެވި ވާ އެބޮޑު ގަނޑުވަރުގައި އޭނާ މަގުއޮޅި ނުދާނެބާއޭވެސް އޭނާގެ ހިތަށްއެރިއެވެ. އެ ގަނޑުވަރުގެ އެއްބައިގައި ކުރާ ކަންތައްތައް އަނެއް ބަޔަށް ފެންނަގޮތަށް ހުންނައިރު ހާދަހާ ފުރިހަމައެވެ. ނަމަވެސް ކޮޓަރިތަކުގައި ވަނީ އެތެރެއިން ބޭރު ފެންނަ، ބޭރުން އެތެރެ ނުފެންނަ ބިއްލޫރިއެވެ. މި ގަނޑުވަރު ފަރުމާކޮށްފައިވާލެއް ފުރިހަމަކަމުން ރުކާން ހުރީ ޝޯޚުވެފައެވެ. އެގޮތަށް ހައިރާންވެފައި ގަނޑުވަރުގެ އެކި ދިމަދިމާއަށް ނަޒަރު ހިންގަމުން ހިނގަމުން ދަނިކޮށް ރުކާންއަށް ހުއްޓުމެއް އައީ ކޮޓަރިއަކަށް ވަދެވުމުންނެވެ. އެކޮޓަރީގައިވާ ފަރުނީޗަރުތައް ޖަވާހިރު ފަދައިން ވިދަމުން ދިޔަގޮތުން އޭނާއަށް އެސްފިޔަ ޖަހާލަންވެސް ހަނދާން ނެތުނެވެ.

“މަންމާ!” ރުކާންއަށް ކުއްލިއަކަށް ފަސްއެނބުރި ބަލާލެވުނީ މިޝްކާގެ އަޑު އިވުމުންނެވެ.

“ދަރިފުޅާ! މަންމައަށް ކަމެއް ކޮށްދީބަލަ.” ރުކާން މިޝްކާއަށް ބަލާލާފައި ބުނެލިއެވެ.

“ކޮންކަމެއްތޯ؟ އަޅުގަނޑަށް ވާވަރުގެ ކޮންމެ ކަމެއްވެސް އަޅުގަނޑު އުފަލުން ކޮށްދޭނަން.” މިޝްކާ ފުޅާ ހިނިތުންވުމެއް ތުންފަތަށް ވެރިކުރުވަމުން ބުނެލިއެވެ.

“ދަރިފުޅާ! މަންމަ ބޭނުން މަންމައަށް ދަރިފުޅުގެ އަސްލު ސޫރައިގަ ފެނިލަން.” ރުކާންއަށް އެހެން ބުނެވުނީ ކީއްވެކަމެއް ޚުދު އޭނާއަކަށްވެސް ނޭނގުނެވެ.

“މަންމަ ބިރެއް ނުގަންނާނެތޯ؟” މިޝްކާ އަހާލިއެވެ. އޭނާ ބޭނުންވީ ޔަޤީންކަން ހޯދާށެވެ. އޭނާގެ މަންމަ ބިރުގަންނާނެ ކަމެއް ކުރާކަށް އޭނާ ބޭނުމެއްނޫނެވެ.

“ނުގަންނާނެ.”

“ޔަޤީންތޯ؟” މިޝްކާ ސުވާލު ތަކުރާރުކޮށްލިއެވެ. ރުކާން ބޯޖަހާލުމާއެކު މިޝްކާ ލޯމަރާލިއެވެ. އެޔާއެކު އޭނާގެ ގަޔަށް އާދަޔާ ޚިލާފު ބާރުގަނޑެއް އަރާފައި އޭނާގެ ހަށިގަނޑުން ރަންކުލައިގެ ވިދުމެއް ފާޅުވިއެވެ. ބަލަބަލާ ހުއްޓާ ކަރުން ފެށިގެން ހެދުންވެސް ރަންކުލައިގެ މުޅިން އެހެން ޑިޒައިނަކަށްވާ ކަކުލާއި ހަމައަށް ހުރި ހެދުމަކަށް ބަދަލުވިއެވެ. ދެން ބުރަކަށިން މަޑު ދިލައެއް ނަގާފައި ލޭސްކޮޅެއްފަދަ ރަންކުލައިގެ ދެ ވަރަގަނޑު ފާޅުވީ ހިނދު އެދެލޯ ރަންކުލައިން ދިއްލިގެން ދިޔައެވެ.

(ނުނިމޭ)