ލޯބި އަހަރެން ވާނަމޭ (6)

އިސާހިތަކު އެދެލޮލުން ކަރުނަ ފައިބަން ފެށިއެވެ. އެދިގު އެސްފިޔަތައް ތެމިގެން ދިޔައީ ބަސްބުނާހާ ކުޑަ ހިދުކޮޅެއް ތެރޭގައެވެ. އެހެން އެތައް އިރަކު އިނުމަށްފަހު އަމާން ތެދުވީ ގެޔަށް ދިއުމަށެވެ. އޭރުގަޑިން މެންދުރު ދޭއްޖަހައިފިއެވެ. ކޮޓަރިތެރޭގައި ކޮޅުކޮޅަށް ހިނގާލަ ހިނގާލަ ހުރި ހަޔާގެ މޫނުމަތީން ކަންބޮޑުވުން ފާޅުވާން ހުރިއިރު އިރުއިރުކޮޅާ ފޯނުން ލަޔާންއަށް ގުޅަމުން ދިޔައެވެ. މިހާރު އޭނާއަށް ލަޔާންގެ ފޯނަށް ގުޅުނު އަދަދެއްވެސް ނޭގެއެވެ. ފޯނުވެސް ނުނެގިއެވެ. ހާސްވެފައި ހުރިވަރުން ކުރަންވީ ކަމެއްވެސް ހަޔާގެ ސިނކުޑިއަށް ނައެވެ. އެހެން ހުރެފައި ހަޔާ ގެއިން ނިކުތީ އެނޫންގޮތެއް ނެތުމުންނެވެ. މަގުމަތީން ޓެކްސީއެއް ހުއްޓުވާ ލަޔާން އުޅޭ ބިލްޑިންއާއި ދިމާލަށް މިސްރާބު ޖެހިއިރު އެސިނކުޑީގައި ދިޔައީ ވަރުގަދަ ޕުލޭނެއް ރާވަމުންނެވެ. ޓެކްސީގޮސް ލަޔާން އުޅޭ ބިލްޑިން ކައިރިއަށް ހުއްޓުމުން ޑުރައިވަރު އަތައް ފައިސާ ދީފައި ހާޔާ ދުވެފައި ގޮސް އެތެރެއަށް ވަދެ ލިފްޓަށް އެރިއެވެ. ދެންމަ ހިނިތުންވެ ހުރި ކުއްޖާ މިހާރު މޫނުމަތިން ފެންނަމުން ދިޔަ ކަންބޮޑުވުމުން ހީވަނީ ބޮޑުކަމެއް ދިމާވެގެން އުޅޭ ހެންނެވެ. ލިފްޓް ގޮސް ހަވަނަ ފަންގިފިލާއަށް ހުއްޓުމާއެކު ހަޔާ ދުވެފައި ގޮސް ލަޔާންގެ އެޕާޓްމެންޓްގެ ބެލް ޖަހަމުން ދިޔައީ މީހަކު ދޮރު ނުހުޅުވާނެ ވަރަކަށެއް ނޫނެވެ. ލަޔާންގޮސް ދޮރުހުޅުވީ އެއީ ހަޔާގެ ކަމެއް ނޫނީ ނުވާނެކަން އެނގިހުރެއެވެ. އޭނާ ހިތައް އަރުވައިގެން ހުރީ އެމަކަރުވެރި އަންހެނާއާއި ދިމާލަށް ބަވާލުމަށެވެ. ނަމަވެސް ދޮރުހުޅުވާލި އިރު ފެނުނު މަންޒަރުން ލަޔާންއަށް ހުރިތާ ހުރެވުނީއެވެ. ހަޔާގެ ދެލޯވަނީ ރަތްވެ ދުޅަވެފައެވެ. އޭރުވެސް ހުއްޓުމެއްނެތި އެދެލޮލުން ކަރުނަ ފައިބަމުންދިޔައެވެ. ނޭފަތްވެސް ރަތްކަމުން ހީވަނީ އެހެން ކަމެއްހެންނެވެ. “ޔާން އަހަރެން ބޭވަފާ…” ހަޔާގެ ޖުމްލަ ފުރިހަމަ ނުވަނީސް އޭނާ އަބުރައިގަނެގެން ވެއްޓެންދިޔައެވެ. ލަޔާން ހުޝިޔާރު ކަމާއެކު ހަޔާ ވެއްޓިނުދީ ހިފަހަށްޓާލިއެވެ. ލަޔާން ހަޔާ އަތްދަނޑިމައްޗަށް ނަގައިގެން ގެގޮސް ސޯފާގައި ބާއްވާފައި ފެންފުޅިއެއްހިފައިގެން އައިސް އެމޫނަށް ދެތިން ފަހަރު ފެން ވިއްސާލަމުން ހަޔާ މަޑުމަޑުން އެސްފިޔަތައް ތަޅުވާލިއެވެ. އަދި މަޑުމަޑުން ލޯހުޅުވާލައިފައި ތެދުވަންވެގެން މަސައްކަތްކުރިއެވެ. “ތިތާ މަޑުން އޮވެބަލަ” ލަޔާން ހިތްހަމަނުޖެހިފައި އެހެންބުނުމުން އަނިއްކާވެސް ހަޔާގެ ދެލޯ ފެންކަޅިވެގެން ދިޔައެވެ. “އަހަރެން ލަޔާންއަށް ބޭވަފާތެރިއެއް ނުވަން.. ޕުލީސް އެންމެ ފަހަރަކު އަހަރެން

ދައްކާ ވާހަކަ އަޑުއަހާލަދީ” އެއްއަތުން ބޮލުގައި ހިފަހައްޓާލައިގެން ހަޔާ ތެދުވަން މަސައްކަތްކުރުމުން ލަޔާން ހަޔާ ތެދުވަން އެހީތެރިވެދިނެވެ. ލަޔާން ބޮލުން ކުރިއަށް ގެންދިއުމަށް އިށާރާތްކުރުމުން ހަޔާ ވާހަކަދައްކަން ފެއްޓިއެވެ. “އަމާންއެއީ ކުލާސްމޭޓެއް.. އޭނައާއި ރައްޓެހިވަން ޖެހުނީ ފާތުންނަށްޓަކާ ޒައިންދެކެ ފާތުން އައީ އެންމެ ފުރަތަމަ އޭނާ ފެނުނު ދުވަހުން ފެށިގެން ލޯބިވަމުން އެކަމު ޒައިން ޝަރުތުކުރީ އަހަރެން އަމާންއާއި ރައްޓެހި ނުވެއްޖެނަމަ އޭނަ ފާތުންނާއި ރައްޓެހި ނުވާނެކަމަށް މިއިން އެއްވެސް ކަމެއް ފާތުންނަކަށްވެސް އަމާންއަކަށްވެސް ނޭނގޭނެއެވެ. ކުއްކުރެވުނީ އަހަރެންނަށް އަހަރެންނަށް މާފުކޮށްދީ.. އަދިވެސް ލަޔާންގެ ނަޒަރުގައި އަހަރެން މިއީ ކުއްވެރިއަކަށް ވާނަމަ އަހަރެން ދޫކޮލިޔަސް އަހަރެންގެ އެއްވެސް ޝަކުވާއެއް ނެތް.. އަކަމަކު އަދިވެސް އަހަރެން ބުނާނީ އަހަރެން ލޯބިވަނީ ހަމަ ތި ލަޔާންދެކެއެވެ.” އެހެންބުނެ ހަޔާ ސޯފާއިން ތެދުވީ ވީއެންމެ އަވަހަކަށް ލަޔާންގެ ކުރިމަތިން ދުރަށް ދިއުމަށެވެ. ނަމަވެސް ތެދުވިކަމެއް ނޭނގެ އަނިއްކާވެސް އޭނާ އަރިއަޅާލިއެވެ. ލަޔާން ހަޔާގެނެސް އެއަތުތެރެއަށްލާ ބޮޑިކޮށްލަމުން “އައި އޭމް ސޮރީ” އޭ ބުންޏެވެ. ލަޔާން ދިޔައީ އެތައް ފަހަރަކު އެޖުމްލަ ތަކުރާރު ކުރަމުންނެވެ. ހަޔާ އިޓްސް އޯކޭއޭ ބުނެ ލަޔާންގެ މޫނުގައި ދެއަތުން ހިފަހައްޓާލަމުން ލަޔާންގެ ނިއްކުރި އޭނާގެ ނިއްކުރީގައި ޖައްސާލިއެވެ. އަދި ލަޔާން ގައިގައި ވަރަށް ބާރަށް ބައްދާލިއެވެ. އޭރު އެތުންފަތް މަތީ ވަނީ ފަތަހައިގެ ހިނިތުންވުމެކެވެ. އެމޫނަށް ބަލާލައިފައި ކިތަންމެ މައުސޫމް ވައްތަރު ޖެހިޔަސް މަކަރާ ހިލާތުން ހަޔާ ވަނީ އެތައް ފިރިހެނެއްގެ ހިތް ހަލާކުކޮށްލާފައެވެ. ކައިވެނިން ބޭރުގައި ނަހަމަ ގުޅުން ހިންގަމުން ދާއިރު ބިރުގެ ކަންފުޅެއްވެސް އެހިތުގައި ނެތީތީ ކޮންމެ މީހަކުނަމަވެސް އަޖައިބުވާނެއެވެ. ހަޔާގެ ހަގީގަތް ނޭނގޭ މީހަކު މަދުވާނޭ ބުންޏަސް ދޮގަކަށް ނުވާނެއެވެ.

ސިޓިން ރޫމުގެ ސޯފާގައި ޓީވީބަލަން އިން އަފްހަމްގެ ދެލޯބޮޑުވެގެން ދިޔައީ ގެޔަތްވަތް އަމާން ފެނިފައެވެ. ދެލޯރަތްވެފައި ހުރިއިރު މުޅި މީހާ ހުރީ ދަލުން ތަތްތެޅިފައެވެ. އެހެންޏާ އަބަދު ޖެލްލައި ތަތްކޮށްލާފައި އޮންނަ އިސްތަށިގަނޑު އޮތީ ނިއްކުރިމައްޗަށް ވެރިފައެވެ. އަފްހަމްގެ ސިނކުޑި ވަގުތުން އެންގީ އަމާންއަށް ވަރަށް ބޮޑުކަމެއް ދިމާވެއްޖެކަމުގައެވެ. އަފްހަމް ޓީވީ ނިއްވާލާފައި ގޮސް އަމާންގެ ފަހަތުން ކޮޓަރިއަށް ވެންނިއިރު އަމާން ފަހަނާއަށް ވަންނަނީއެވެ. އެހެންކަމުން އަފްހަމް އެނދުގައި އިށީނދެ އިންތިޒާރު ކުރަމުން ދިޔައީ އަމާން ފާހަނައިން ނިކުންނާނެ އިރަކަށެވެ. އަމާން ފާހަނައިން ނިކުތީ ބައިގަޑިއިރު ފަހުންނެވެ. އޭރު މީހާ ހުރީ ކޮންމެސް ވަރަކަށް ހަމަޔަކަށް އެޅިފައެވެ. ރީތިވެލައިގެން އެންމެ ފުރަތަމަވެސް އަމާން ދިޔައީ މިސްކިތަށެވެ. މިސްކިތުން އައިސް ކާން އިށީނނީ ބަނޑުހައިވެފައި ހުރިވަރުންނެވެ. އޭރު އަފްހަމް އިނީ އެކުވެރީޔާއަށް ވީކިހިނެއްތޯ އޮޅުން ފިލުވަން ކެއްމަދުވެފައެވެ. އަމާން ކައިނިމުމުން އަފްހަމްއާއި އެކު އޭނަ ދިޔައީ އާޓިފިޝަލް ބީޗަށެވެ. އޭރުވެސް ބައެއް މީހުން ކުދިން ގޮވައިގެން އައިސް އެތާގައި އުޅެއެވެ. “ދެން ބުނެބަ ތިވެގެން އުޅޭ” މީހުންނެތް ދިމާލެއްގެ ދޮންވެލިގަނޑުމަތީ އިށީނދެ ހަމަޖެހެލަމުން އަފްހަމް އެއްސެވެ. އަމާން ފުންނޭވާއެއް ދޫކޮށްލަމުން މިއަދުވީ ހުރިހާ ކަމެއް އަކުރުން އަކުރަށް
އަފްހަމްއަށް ކިޔާދިނެވެ. “އަޅެ ހާދަ އަންހެނެކޭ ދޯ ތީ.. އަޅާ ނުލާ މާންްއަށް އޭނާއަށް ވުރެ ރަގަނޅު ކުއްޖަކު ލިބެން އޮތީމަ ވީގޮތެއް އެއީ.. މާންކަހަލަ ހޭޑްްސަމް ބޯއީ އަކަށް ލިބިންޖެހޭނީ ޕާފެކެޓް ގާލްއެއް އެހެވީމަ ތިބުނާ ހަޔާއަށް އެގެއްލުނީ ހަމަ ރަންގަނޑެއް ފަހުން އަދި އަންނާނެ މާން ގާތު މާފަށް އެދެން މަ ބުނީތީ ބަލަން ހުންނައްޗޭ” އެކުވެރިޔާ ހިތްވަރުދިނުމަށް ބުނި ބަސްތަކުން އަމާންގެ މަރުވެފައި އޮތް ހިތައް ކޮންމެސް ވަރެއްގެ ދިރުމެއް ލިބިގެން ދިޔައެވެ. “ތޭންކްސް މޭން” “އެނީ ޓައިމް ބުރޯ.. މަ ބުނީ ހިނގާބަ މިރޭ އަފޫ ލައްވާ ނޫޑުލްސްގަނޑެއް ކައްކާލަން.. އޭނަ މެލޭއަށް ދިއުމުގެ ކުރިން ވާނެއެއްނު މުޅި އަހަރު ދުވަހަށް ވާވަރަށް ޖެއްސުންކޮށްލަން” “އަދި އެހާ ދުރަށް ދާން އުޅޭ އިރުވެސް ޖެއްސުންތަ ކުރަންތިއުޅެނީ!!” “މާން އަދި ނުދެކެއްމެއްނު އޭނަ ރުޅުއަރާފަ ހުއްޓައެއް ވަރަށް މަޖާވާނެ ރުޅިއައިސްފަ ހުންނަ އިރު” އަފްހަމް ހީފަ އިދެ އެހެން ބުނުމުން އަމާން އަފްހަމްގެ ގައިގައި ބޮޑިއެއް އަޅުވާލިއެވެ. އަދި ހޭންފެށީ އަފްހަމް ޖައްސާލި ވައްތަރަކުންނެވެ. ހަޤީގަތުގައި އަފްހަމް ބޭނުންވީވެސް އަމާން ހެއްވާލުމަށެވެ. އެކަން ކާމިޔާބުވުން އޭނަވެސް ހިނިތުންވެލީ އެކުވެރިޔާގެ މޫނުމަތިން އުފާވެރިކަން ފެނުމުންނެވެ.

ލޯގަނޑު ކުރިމަތީ ރީތިވާން ހުރީ ހަޔާ ހުރީ ރަތްކުލައިގެ ރީތި މެކްސީއެއް ލާފައެވެ. ހުދުކުލައިގެ އެސްތަކެއް ކަރުކައިރީގައި ހިއްޕާފައި ހުރި އިރު މޭދަށުގައި ފަހަތައް އައްސާލާ ގޮތަށް ފޮތިކޮޅެއް އިނެވެ. ހެދުމުގެ ފަސްބައިގެ ބޮޑުބައެއްއޮތީ ޓައިލްސްމަތީގައެވެ. އިސްތަށިގަނޑު ރީތިގޮތަކަށް ހުޅިއެއް ޖަހާ ހަރުކޮށްލާފައި ހުރިއިރު ކަނާތް ފަރާތުން މޫނުމައްޗަށް ކުރު އިސްތަށިކޮޅެއް ވައްޓާލައިފައި އޮތެވެ. ލޮލުގައި އަދުންއަޅާލައިފައި ހުރި އިރު ތުންފަތުގައިވަނީ ގަދަ ރަތް ކުލައިގެ ލިޕްސްޓިކެއް ޖައްސާލާފައެވެ. “މަންމަގެ ދަރިފުޅު ހާދަހާ ރީއްޗޭ؟؟” “ތެންކިޔޫ މަންމާ.. މިދަނީ ލަޔާންއާއިއެކު ކާރު ދުއްވާލަން އިރުނޯސެންދެން އަންނާނަން” ހަޔާ އޭނާގެ މަންމަގެ ގައިގައި ބައްދާލައިގެން ހުރެ ބުންޏެވެ. “އެންމެ ރަގަނޅު ލަސްނުވައްޗޭ ކޮންމެސް” ހަޔާ އާއެކޭ ބުނެ ކޮޑުގައި ދަބަސް އަޅުވާލަމުން ބޭރަތް ނިކުތް އިރު ލަޔާން އޭނާގެ އިންތިޒާރުގައި އިނެވެ. ހަޔާ ގޮސް ކާރަށް އެރުމުން ލަޔާންއަށް ހަޔާއާއި ދިމާލަށް ބަލަހައްޓައިގެން އިދެވުނީއެވެ. “ޔާން ދެން ތިވަރަށް ނުބަލާބަލަ ލަޔާން ބަލަހައްޓައިގެން އިންގޮތުން ލަދުންއިދެ ހަޔާ ބުންޏެވެ. ”އަހަރެން އަމިއްލަ ބާރުގަ ވާކަމެއް ނޫން ހަޔާ ނޭނގެ އަހަންނަށް ޖައްސާ ޖާދޫއެއްވެސް” ލާނެތްްވައްތަރަކައް ހީލަމުން ލަޔާން އެހެން ބުނުމާއެކެ ހަޔާގެ ކޯތާފަތަށް ޖަންބުކުލަ އަރައިގެން ދިޔައެވެ. ލަަޔާން އޭނާގެ ކެމެރާ ނަގާ ހަޔާގެ ތަސްވީރެއް އޭގައި ރައްކާކޮށްލިއެވެ.

ގެޔަށްވަދެގެން އައި އަފްހަމް އެޅި ފުރަތަމަ ފިޔަވަޅާއެކު އެނާގެ މޫނުމަތީގައި އައިސް ޖެހުނީ ކުޝަންއެކެވެ. ކުރިމަރީ ރުޅިއައިސް ރަތްވެފައި ހުރި އަފްރީން ފެނުމުން ކަންތަކާ ޖެހުނީއޭ އަފްހަމްގެ ހިތައް އެރިއެވެ. “މިހާރު ކިހިނެއްވީ؟؟” ޓައިލްސްމަތިން ކުޝަން ނަގައިގެން ގެންގޮސް ސޯފާގައި ބާއްވަމުން އަފްހަމް ބުންޏެވެ. “ކީއްވެ އަފޫގެ ޗޮކުލެޓްކާލީ؟؟” “ޗޮކުލެޓްދޯ” އެހެންބުނެފައި އަފްހަމް ޖަހާލީ ހިނިގަނޑެކެވެ. “ދޮންބެ ދޮންބެގެ ޗޮކްލެޓް ކާލައިފައި
އަދި އެވަރުން ނުވެގެން އަފޫގެ ޗޮކުލެޓްވެސް ކާލީ ހަމަ އަފޫ ރުޅިއަރުވަންވެގެން” އަފްހަމް ހީފަ ހުރެ އަފްރީން ކިޔާއެއްޗެއް ކިޔަންދެން އަޑުއަހައިގެން ހުރުމުން އަފްރީންގެ ރުޅިގަނޑުވީ ހައްދާ ގަދައެވެ. އަދި އައި ރުޅީގައި ކާމޭޒުމަތީ ހުރި ފެންޖަހު އަފްހަމް ގަޔަށް ޖެހިއެވެ. ”ދެން ހުރޭ ހޭން” އަފްހަމް ހުރީ އެކަހަލަ ކަމެއް އަފްރީން ކުރާނެކަމަށް ވިސްނައިގެން ނޫންކަމުން ވަގުތުން އަފްރީން ފަހާ އަފްހަމް ދުއްވައިގަތެވެ. “ދެންމައޭ ފެންވަރައިގެން މިއެއްޗެހިލީ..މިއަދު ބޮޑިއެއް ދީފަ ނޫނީ ދޫނުކުރާނަން” އަފްހަމް އަފްރީން އޭނާގަޔަށް ފެންޖެހި ޖަގަށް ފެންއަޅައިގެން އެހިފައިގެން ދުވަމުން ދިޔައީ އަފްރީން ގަޔަށް ފެންޖެހުމަށެވެ. ކަންދިމާކުރި ގޮތުން އަފްހަމް އުކައިގަތް ފެންތައް ދިޔައީ އެމީހުން ގަންނަ ގަނޑު ބަލަން ހުރި އަމާންގެ ގަޔަށެވެ. “ބުރޯ މަވެސް ދެންމައޭ ފެންވެރީ” ލައިގެން ހުރި ގަމީހަށް އިޝާރަތް ކުރަމުން އަމާން ބުންޏެވެ. އޭރު އަފްރީން
ހުރީ އެދެމީހުން ތިބި ގޮތުން ހީހީހަލާކުވެފައެވެ. “އަފޫ ދެން ނުކުރެވޭނެ ދުލެއް އަމާންވެސް ބަދިގެޔަށް ވަދެ ޖަގަކަށް ފެންއަޅައިގެ އައިސް އަފްހަމްްއާއި އެއްހަމައިގައި ހުއްޓިލަމުން ބުންޏެވެ. އަފްރީން ހަޅޭއްލަވައިގެންފައި މުޅިގޭގައި ދުވަން ފެށިއެވެ. ސިޓިންރޫމުގައި މާއަޑުގަދަ ވާން ފެށުމުން ކޮޓަރީގައި އަފްރާހުގެ އެއްޗެހި ފަތްޖަހަން ހުރި މިޝާ ސިޓިންރޫމަށް ނިކުތްވަގުތުވީ އަފްރީން މިޝާއާއި އަރާ ހަމަވި ވަގުތަށެވެ. އަފްހަމްއާއި އަމާންވެސް ފެންއުކައިގަތީ ހަމައެވަގުތުއެވެ. ދެމީހުން އުކައިގަތް ފެންތަކުން މިޝާ ހަމަ ރީއްޗަށް ތެމުނެވެ. އަފްރީންގެ ހިނިގަނޑު ފަޅައިގެން ދިޔައިރު އަފްހަމްއާއި އަމާންތިބީ ދެލޯ ބޮޑުވެފައެވެ. ”އަޅެ ދަރިފުޅުމެން ފެންކުޅެނީކަން އެނގުނުނަމަ ކޮޓަރިން ނުނިކުތީހެވެ.” ބޭރުގައި އުޅެފައި އަފްރާހްވެސް ގެޔަށް ވެންނީ އެގުތުއެވެ. ފެނުނު މަންޒަރުން އަފްރާހުގެ ހިނިގަނޑުވެސް ފަޅައިހެން ދިޔައެވެ. އޭރު އަފްރީން އޮތީ ހީހީ ސޯފާއަށް ދެމިފައެވެ. ”މިޝާ ބަލާކަށް ނުހުރެ އަފްހަމްގެ އަތުގައި އޮތް ފެންޖަކުގައި ހުރި ފެންކޮޅު ފުރަގަހުން ގޮސް އަފްރާހުގެ ބުރަކަށްޓަށް ޖެހިއެވެ. ވަގުތުން އަފްރާހް ނޫން އެންމެން ހީގަތެވެ. ވެލްކަމް ހޯމް ހަޒްބެންޑް” ހިނިތުންވެލަމުން މިޝާ އެހެންބުފައި އަފްރާހްގެ ފޯނު ޖީބުން ނަގާ ޓީވީ ކަބަޑު ވަތްގަނޑަށް ލިއެވެ. އެންމެން ދެން ބަލާލީ އަފްރީންއާއި ދިމާލަށެވެ. އަފްރީން ބަލާކަށް ނުހުރެ ދުއްވައިގަތީ އޭނާގެ ކޮޓަރިއާއި ދިމާލަށެވެ. ނަމަވެސް ކޮޓަރީގެ ތަޅުގައި ނިހިފެންދެން އަމާން ގެނައި ކުއްލި ހަރަކާތަކާއެކު އޭނާއާއި ދިމާލަށް އަފްރީން ދަމާލިއެވެ. އަފްރީން ގޮސް ޖެހުނީ އަމާންގެ މޭމަތީގައެވެ. އެވަގުތު ދެންތިބި ތިންމީހުން އަފްރީންގެ ގަޔަށް ފެންޖަގުތައް އޮއްސާލިއެވެ. ފެންއަޅަން ތިބި ތިން މީހުންނަށް ނޭގުނަސް އެވަގުތު އެދެޒުވާނުންގެ ހިތްދިޔާއީ އާދަޔާ ހިލާފައް ތެޅެމުންނެވެ.