ޢަޞްރު (ފަންސާސްވަނަ ބައި)

އަދި އޭނަގެ މަޤްޞަދަކީ އަޒާނާއި އައިމަން ވެސް ދުވަހަކުވެސް ބަދުނާމު ނުވާވަރަށް ބަދުނާމުކޮށްލުންކަމެވެ. ހަމަ މިއާއެކު އެ ރޭވުމުގެ ތެރެއިން އެމީހުން މުޅި ޢުމުރަށް ޝުކުރުވެރިވާނެ ނިޢުމަތެއް ލިބިގެންދާނެކަން ވެސް އެމީހުންނަށް ރޭކާނުލައެވެ.

އެރޭގެ ވަގުތެއްގައި އަޒާން ފެންވަރައި ތާޒާ ވެލައިގެން އޭނަގެ އަތުގައި އޮތް އެންމެ އާ ގަމީހާއި ޖިންސް ލައި ސެންޓުގެ ވަހުން މުޅި ކޮޓަރި އެއްވަސް ކޮށްލިއެވެ. ހުދާއާއި ރައްޓެހިވާން އެދެން ދިޔަ ރޭ އައިމަން ބުނިހާ ގޮތަކަށް ކަންތައް ކުރިއެއްކަމަކު މިރޭ އޭނަ އައިމަންގެ ވާހަކަތައް އަޑުއަހާކަށް ބޭނުމެއްނޫނެވެ. މިރެއަކީ ހުދާ އޭނަ އޭނަގެ ގޮތުގައި ބަލައިގަންނަ ރޭ ކަމަށް ހަދަން އަޒާން ބޭނުންވިއެވެ. އެކަން ވާނެ ކަމުގެ އުއްމީދު ކުޑަވިއެއްކަމަކު ހުދާ މި ހުރިހާ ދުވަހު އޭނައާއި އެކީގައި ހޭދަކުރި ވަގުތުތަކުގެ މަތިން ހަނދާންވެފައި އަޒާނަށް ހިނިތުންވެވެމުން ދިޔައެވެ. މަންމަގެ ހުއްދައާއެކު އަޒާން ސައިކަލަށް އަރައި ދަތުރު ފެށީވެސް ހިނިތުންވުމެއްގައި އިނދެއެވެ.

**

“އޯ އެމް ޖީ ޝިޔާ ޓުނައިޓް ވިލް ބީ އޯސަމް!” އެހެން ބުނެލީ ފޯނު ކަންފަތުގައި ޖައްސައިގެން ރީތިވާ މޭޒު ކައިރީގައި ހުރި ހުދާއެވެ. އޭނަ ހުރީ ކުރުކޮށް އޮތް ބާރު ޓީޝާޓަކާއި ޖިންސަކާއެކީ ބުރުގާ ނާޅައެވެ. ހުދާއަށް އޭނަގެ މި ވާހަކަތައް ޝިޔާއާއި ޙިއްޞާ ކުރެވެނީ ކީއްވެކަމެއް ޚުދު އޭނައަކަށް ވެސް ނޭނގެއެވެ. ޝިޔާއަކީ އޭނައާއި އެއްކުލާހެއްގައި އެކީގައި އުޅޭ ކުއްޖަކަށް ވިޔަސް ލަދުކުޑަ ކޮންމެ ކަމަކަށް ޝިޔާ ދެކޮޅު ހަދާނެކަން ހުދާއަށް އެނގެއެވެ. އެހެނަސް ނޭނގޭ ސަބަބަކާހުރެ ޝިޔާގެ ފަރާތުން އިޙްޞާޞް ކުރެވޭ ގާތްކަމެއްގެ ސަބަބުން އޭނައަށް ޝިޔާއާއި ހުރިހާ ވާހަކަ ޙިއްޞާ ކުރެވެނީއެވެ.

“ހުދާ……ހުދާއަށް އެބައިނގެއެއްނޫންތަ ތިއީ ގޯހެއްކަން؟ އަޒާނަށް އެނގޭތަ ކީއްކުރަންކަން ހުދާ ތިއުޅެނީ؟” ޝިޔާ އޭނަގެ ކޮޓަރީގެ އެނދުގައި އިނދެ ކަންބޮޑުވުމާއެކީ އަހާލިއެވެ. އޭނަގެ ލޯ ކުރިމަތިން ގޯހެއް ވާތަން ދެކުމަކީ އޭނަގެ ހިތަށް އެންމެ އުނދަގޫ ކުރުވާ އެއްކަންތަކެވެ.

“އޭނަ މާ އިނޮސެންޓް އެނގޭވަރަށްވުރެ. ވަރަށް ޝޮކްވާނެ އޭނަ މިރޭ. ގޭގަ ހަމަ އެކަކުވެސް ނެތް. މަންމަ އަސްލުވެސް ހާދަ ކޫލްއޭ. އަހަރެން އެދޭ އިރަށް މަންމަ ޒައިން ގޮވައިގެން ކާފަމެންގެއަށް ގޮއްސި.” ހުދާ ހެވިފައިހުރެ ބުނެލިއެވެ. އެ ވާހަކަ އިވިފައި ޝިޔާ އިތުރަށް ހާސްވެގެން ދިޔަ ހިތަކާއެކީ އެއްޗެކޭ ބުނަން އުޅުނު ވަގުތު އޭނަގެ ކޮޓަރީގެ ދޮރުގައި މީހަކު ޓަކި ޖަހާލި އަޑު އިވުނެވެ. އެ ހިނދު ފޯނުގެ އަނެއްކޮޅުން ހުދާ ވެސް އަޒާން އައިއްސިއޭ ބުނެ ފޯނު ކަނޑާލި އަޑު އިވުނެވެ. ޝިޔާ އެއަށް އެއްޗެކޭ ބުނަން އުޅުނެއްކަމަކު އޭނަ އެކަމަށް ނުކުޅެދުނެވެ. ހުދާއަށް އިތުރަށް ނަޞޭޙަތް ނުދެވުނު ކަމުގެ ހިތާމައާއެކު ޝިޔާ އޭނައަށް އިވުނު ޓައްކާއިމެދު ވެސް ޙައިރާންވިއެވެ. އޭނަގެ ކޮޓަރީގެ ދޮރުގައި އާ ގޮތަކަށް ޓަކި ދެވުނު އަޑު އިވިފައި ޝިޔާގެ މެއަށް ގޮތެއްވިއެވެ. ބައްޕަ ގެއިން ބޭރުގައި ވަނިކޮށް މަންމަ އޭނަގެ ކޮޓަރިއާއި ހަމައަށް މީހަކު ވަނަ ދިނީ ކީއްވެތޯ ހިތް ސުވާލުކުރިއެވެ. ކޮންމެއަކަސް ޝިޔާ ދެބުމަ ކައިރިކޮށްގެން ހުރެ އެނދުން ތެދުވެ އެތާ އޮތް ބުރުގާ އެޅިއެވެ. އެއަށްފަހު ލަސް ފިޔަވަޅުތަކެއްގައި ގޮސް ދޮރާއި ހަމަ ކުރިއެވެ. އެއަށްފަހު ކުއްލިއަކަށް ދޮރު ހުޅުވާލުމާއެކު ޝިޔާގެ ދެބުމަ ކައިރިވިއެވެ.

“ތިއީ ކޮންބޭފުޅެއްތޯ؟” އޭނަގެ ކުރިމަތީގައި ހުދުކުލައިގެ ކުރުތާއަކާއި ފައިކުރި ކުރުކޮށް ހުރި ފަޓުލޫނަކާއެކީ ތުނބުޅި ދިގުކޮށް ހުރި ފިރިހެން މީހާ ފެނިފައި ޝިޔާއަށް އަހާލެވުނެވެ.

“ނޭނގުނުކަމާމެދު ޙައިރާންވެއްޖެ………މިއީ މަޝްހޫރު ޢިލްމުވެރިޔާ މަންސޫރު.” އެމީހަކު ހުރިހާ ދަތްތައް ދައްކަމުން ބުނެލި ނަމަކުން ޝިޔާގެ ނިތުން ރޫ ފިލައި ދިޔައެވެ.

**

އަޒާން ހުދާމެންގެ ގޭގެ ދޮރުމަތީގައި ހުރެ ފުން ނޭވައެއް އެތެރެއަށް ދަމާލިއެވެ. އެއަށްފަހު ހިނިތުންވުމަކާއެކީ ކުރިމަތީގައި ހުރި ދޮރުގައި ޓަކި ދިނެވެ. މާ ގިނައިރެއްނުވެ ކޮޓަރީގެ ދޮރު ހުޅުވިގެން ދިޔުމުން އަޒާން ހުއްޓުން އަރާގޮތްވިއެވެ. ފުރަތަމަ ފަހަރަށް ހުދާ ބުރުގާ ނާޅާ ހުރިތަން ފެނިފައި އަޒާނަށް އޭނަގެ ދެލޯ މަތީގައި އެއްއަތް އަޅާލެވުނެވެ.

“އަމް……ހުދޫ ހަނދާން ނެތުނީ ދޯ ބުރުގާ އަޅަން؟” އަޒާނަށް ހެވިފައިހުރެ އަހާލެވުނެވެ.

“އައްދޭ ހާދަ ލަދެކޭ. ބުރުގާ ނާޅާ ހުރީ ގޭގަ ހުންނާތީ. ގޭގަ އޭތި އެޅޭތަ މިހާ ހޫނުވާއިރު؟ ދެން ވެސް ތި ލޯ މަތިން އަތް ނަގާލަބަލަ. ތިއީއެއް ނޫނޭ އަންހެން ކުއްޖަކީ.” ހުދާ ހިސާބެއްގެ ނުރުހުންތެރިކަމާއެކީ ގަދަކަމުން އަޒާންގެ އަތް އަޒާންގެ ލޯމަތިން ނަގާލިއެވެ. އަޒާން އިސްއުފުލާލި ހިނދު އެ މޫނުމަތިން ފެނުނީ އޭނަ ހިތްހަމަނުޖެހިގެން އުޅޭ ފަދަ އަސަރެކެވެ. ދެންމެ ހުދާ އެ ދެއްކީ ގޯސް ވާހަކަތަކެއްކަމަށް އޭނަގެ ހިތް ބުންޏެވެ. އެހެނަސް ޙަޤީޤަތަކީ އެއީ ދެކޮޅުކަން އަޒާނަށް އެއްބަސްވާން މަޖުބޫރުވީ ހުދާ މި ހަދަނީ އޭނަގެ ވަށައިގެން ފެންނަ ގިނަ އަންހެން ކުދިން ކަންތައް ކުރާ ގޮތްކަން އެނގުންވުމުންނެވެ. އެހެންކަމުން އޭނަ ދެން އިތުރު ވާހަކައެއް ދެއްކުމެއްނެތި ގޭގެ ތެރެއަށްވަނެވެ. އެއަށްފަހު ހުދާ ކީއްކުރަނީތޯ އަހަމުން އޭނައާއި އެކީ ގޮސް ސިޓިންގް ރޫމުގެ ސޯފާގައި އިށީނެވެ. އެރޭ ހުދާ އާދަޔާ ޚިލާފަށް އޭނައާއި ގާތްވާން މަސައްކަތް ކުރަމުން ދިޔަކަން އަޒާނަށް އެނގުންވަމުން ދިޔައެވެ. ސޯފާގައި ވެސް ހުދާ އިށީނދެގެން އިނީ އޭނައާއި ޖެހޭ ނުޖެހޭ ހިސާބުގައެވެ. ދޭތެރެ ދޭތެރެއިން ހުދާ އޭނަގެ ކޮނޑުގައި ބޯ އަޅައި އޭނަގެ ގަމީހުގެ ގޮށްތަކާއި ކުޅެމުން ދިޔަ ގޮތުން އަޒާންގެ ނޭވާ ކުރުވާގޮތްވިއެވެ. ތެޅުން އަވަސްވަމުން ދިޔަ އަޒާންގެ ހިތަށް ނޭނގޭ ބިރުވެރިކަމެއް ވެސް ވަންނަމުން ދިޔައެވެ. ނުފެންނަ ނުރައްކަލަކުން އެ ހިތް އޭނަ ސަލާމަތް ކުރަން އުޅޭ ފަދައަކުންނެވެ. އެންމެ ފަހުން ހުދާ ކުޅެމުން ގޮސް އޭނަގެ ގަމީހުގެ އެއްގޮށް ނެއްޓުނު ވަގުތު އަޒާނަށް ކޮޅަށް ތެދުވެވުނެވެ.

“އަސްލު މިއައީ މުހިއްމު ވާހަކައެއް ދައްކަން ވެގެން.” އަޒާން ހުދާއަށް ބަލަން ހުރެ އޭނަގެ ގަމީހުގެ މަތިން ނެއްޓިފައިވާ ހިސާބު އެއްއަތުން ކައިރި ކުރަމުން އަވަސްއަވަހަށް ބުނެލިއެވެ. ދެންމެ ހުދާ ކުރި ކަންތަކާއި ދެކޮޅަށް އޭނައަށް ވާހަކަ ނުދެކެވުނީ ކީއްވެކަމެއް އޭނައަށް އެއްގޮތަކަށް ވެސް ނޭނގެއެވެ. ހަމަ ގައިމުވެސް އޭނަގެ ހިތް އެއީ ގޯހެއްކަމުގައި ބުންޏެވެ. އެހެނަސް ހުދާ އެކަން ކުރުމުން އެއީ ރީތި ކމަެއްގެ ގޮތުގައި އޭނައަށް ފެންނަމުން ދިޔައީ ކީއްވެކަމެއް ނޭނގެއެވެ.

“ކޮން ވާހަކައެއް؟” ހުދާ ދެންވެސް ސޯފާއަށް ލެނގިގެން އޮވެ އަހާލިއެވެ. ހުދާ ކުޑަ ހިނދުކޮޅަކަށް މައިތިރި ވެއްޖެކަން އެނގުންވުމުން އަޒާނަށް ފުން ނޭވައެއް ދޫކޮށްލެވުނެވެ. އެއަށްފަހު އެތާ ގޮސް ވަކިން ހުރި ސޯފާއެއްގައި އިށީނެވެ. އޭނަ މިރޭ ދައްކަން އައީ ކޮން ވާހަކައެއްކަން ހަނދާންވެފައި އަޒާން ޖެހިލުންވިއެވެ. ވަކިން ޚާއްޞަކޮށް ދާދި ދެންމެއަކު ހުދާ ކަންތައް ކުރި ގޮތް އޭނަގެ އެ ވާހަކަތައް މިވަގުތުކޮޅު ދުލާއި ހަމައަށް ގެންނަން ގޮންޖެހިއެވެ. އެހެނަސް ހުދާގާތު މި ވާހަކަތައް ޙިއްޞާކޮށްގެން ނޫނީ އޭނައާއި ހުދާގެ ގުޅުން ވެސް ކުރިއަށް ނުދާނެހެން ހީވުމުން އަޒާނަށް ވާހަކަ ދެކެވުނެވެ.

“އަހަރެން ވާހަކަ ދައްކަން ބޭނުންވަނީ……..ﷲ އާމެދު.” އަޒާން އިސްޖެހިފައި ދެލޯ މަރައިގެން އިނދެ ބުނެލި ވާހަކައިން ހުދާ ބާރު އަޑަކުން ވަޓްއޭ ކިޔާފައި ސީދާވެލެވުނެވެ.

**

“މާތް ﷲ ތިބާއަށް ހެޔޮ ރަޙްމަތް ލައްވާށި! އެހާ ދިގު ދަތުރެއްކޮށްފަ ތިއައީ ހަމަ ސިޓީއެއް އޭގެ ވެރިފަރާތަށް ރައްދުކުރަން. މާ ޝާ ﷲ!” މަންސޫރު އޭނަގެ ހިނިތުންވުމުގައި ހުރެ އެހެން ބުނެލީ އޭނަގެ ފުރަގަހުން ކޮޓަރީގެ ދޮރު ލައްޕައި ދޮރު ތަޅުލަމުންނެވެ. އެ މަންޒަރު ފެނިފައި ޝިޔާގެ ހިތުގައި ނުތަނަވަސްކަމުގެ ރާޅުބާންޏެއް ނެގިއެއްކަމަކު އެވަގުތު އޭނަގެ ގާތަށް އައިސްފައިވި ރުޅި އެއަށްވުރެ ގަދައެވެ. އޭނަގެ މޫނު ރަތްވެ އަތް މުއްކެވިފައިވީއިރު މުޅި މީހާ ތުރުތުރު އަޅަމުން ދިޔައެވެ.

“ރަނގަޅުވާނީ ތިބޭފުޅާ ތިހާ ރީތި ބަސްތައް ބޭނުން ނުކުރެއްވިއްޔާ! ދީން ދައްކުވައިދެނީ ހަމައެކަނި ބުނެލާ ބަސްތަކުން ނޫނީ ލައިގެން ހުންނަ ހެދުމަކުންނެއްނޫން. ތިމާގެ ޢަމަލުން ވެސް ދީން ފެންނަންޖެހޭ!” ޝިޔާ ސާބިތުކަމާއެކީ އެހެން ބުނެލިއިރު އޭނަގެ ދެލޯ ރަތްވެފައިވިއެވެ. އޭނަގެ ވާހަކަ ނިމުނުތަނާހެން މަންސޫރު ދެދަތްޕިލަ ޖައްސައިގެން ހުރެ އޭނަގެ ކައިރިއަށް އައިސް ބުރުގާގެ މަތިން އޭނަގެ އިސްތަށިގަނޑުގައި ބާރަށް ހިފަހައްޓާލިއެވެ. ވީ ތަދާއެކީ ޝިޔާގެ އަނގައިން ހަޅޭކެއްގެ އަޑު ނިކުތެވެ.

“މާ އަނގަގަދަ ކުރަން އުޅެންޏާ މުޅި ޢުމުރު ދުވަހަށް މި ކޮޓަރީގަ ބަންދުވެފަ ހުންނަން ޖެހިދާނެ ފަދަ ކަމެއްކޮށްފާނަން. ކަލޭގެ ދައްތައަށް ހެދިގޮތަށް!” މަންސޫރު އޭނަގެ މޫނު ޝިޔާގެ މޫނާއި ކައިރިކޮށްގެން ހުރެ ބުނެލި ވާހަކައިން ޝިޔާގެ ލޮލަށް ކަރުނަތައް ޖަމާވިއެވެ. ހަމަ އެއާއެކު އޭނަގެ ރުޅިވެރިކަން އިތުރު ދަރަޖައަކަށް މަތިވިއެވެ.

“ދައްތަގެ ނަން ވެސް ނުކިޔާތި ކަލޭ! ކަލޭ ހީކުރަނީ ކަލެއަށާއި އެ ޔާސިރަށް ދައްތައަށް ގެއްލުމެއް ދެވުނު ކަމަށްތަ؟ ނޫން! ދައްތަ އަބަދުވެސް ވީ ކަލޭމެންނަށްވުރެ މާ މަތީ މަޤާމެއްގަ. މިއަދު ވެސް އިން ޝާ ﷲ ދައްތަ ވާނީ ސުވަރުގޭގަ. ޚުދު އަހަރެންގެ ޙަޔާތް ވެސް ބަދަލުވީ ދައްތަގެ ސަބަބުން. ދައްތަގެ ބަސްތަކުންނާއި އުޅުމުގެ ތައުބާވެގެން ތިބި މީހުން އެބަތިބި. އޭގެ ޘަވާބުވެސް ލިބެމުން ދާނީ ދައްތައަށް!” ޝިޔާ ރޮވިފައިވާ އަޑަކުން އެހެން ބުނެ މަންސޫރުގެ އަތް ފޮޅުވާލިއެވެ.

**

“އަހަރެން އަސްލު ދީނަށް ޝައުޤުވެރިވީ މީގެ އަހަރުތަކެއްކުރިން މާލެއަށް ގޮއްސަ އުޅެނިކޮށް. އޭރު ގްރޭޑް 5 ގަ އުޅުނުއިރު ޓާރމް ބްރޭކަށް މާލެއަށް ގޮއްސަ އެއްރެއަކު ތަރާވީޙަށް ދިޔުމުން ފެނުނު މަންޒަރަކުން. ނަމާދު ތެރޭގަ ކޮންމެވެސް އަންހެނަކު ރޯ އަޑު އިވުނީ. ޑޭޑްއާއި އަހަރެން ނަމާދުކޮށްގެން ނިކުންނަ ކޮންމެ ފަހަރަކު ފެންނާނެ އެ އަންހެން މީހާ ފޮށާ އަޅައިގެން އަންހެނުންނަށް ޚާއްޞަ ކުރެވިފައިވާ ބައިގަ ކަކޫމަތީގައި ބޯއަޅައިގެން އިންނަ މަންޒަރު. އަހަރެން އަހަންވެސް އަހަން ބައްޕަ ކައިރިން ކީއްވެހޭ އެ އަންހެން މީހާ ރޮނީ. ބައްޕަ ބުނާނެ އެއީ ކޮންމެވެސް މީހަކު މަރުވެގެން އުޅޭތީވެއޭ. އެކަމަކު އަހަންނަށް ޤަބޫލެއް ނުކުރެވޭ. ދެން ފަހުން އެނގުނު ކަމަކީ ހަމަ ވަރަށް ގިނަ މީހުން ނަމާދު ކުރާއިރު ރޯކަން. އެއީ ކީއްވެތޯ ހިތަށްއަރަމުން ދަނިކޮށް މަންސޫރުބެ އަހަރުމެންނަށް ނަރަކައިގެ މަތިން ހަނދާންކޮށްދޭން ފެށީ. ދެން ހިތަށްއެރީ މީހުން ނަމާދުގައި ނަރަކައިގެ މަތިން ހަނދާންވާތީވެއޭ ރޮވެނީ. އަހަންނަށް ވެސް އެއްފަހަރު އެހެންވި. އެކަމަކު ނޭނގޭ ކީއްވެކަމެއް. ހަމަ ހިތަށްއަރަމުން ދިޔައީ އެއަށްވުރެ ބޮޑު ސަބަބެއް ވާނެއޭ. ބައެއްމީހުން އަހަންނާއި ޚިލާފަށް ނަމާދު ކުރާ ހިތުން ނަމާދަށް ދަނީ އަހަންނަށް ނޭނގޭ ކަމެއް އެމީހުންނަށް އެނގޭތީވެއޭ. އެހެންވެ ޤުރުއާނާއި ސުންނަތާމެދު ތަފްޞީލުކޮށް ދެނެގަންނަން ބޭނުންވި. އެކަމަކު އެ ދޭތި އުނގެނެން އަހަރެން ޖެހިލުންވީ އެއީ ކިހާ ވަރުގަދަ ދެއެއްޗެއްކަން އެނގުންވާތީ. އޭތި ރަނގަޅަށް އެނގިހުރެ ދެކޮޅުވާން ނިންމައިފިއްޔާ އެއަށް ނަފްރަތު ކުރުމުގެ ގޮތުން ކޮންމެ ކަމެއްވެސް ކުރެވިދާނެ. އަދި އެއެއްޗެހި ދެކެ ލޯބި ވެއްޖެއްޔާ މުޅި ޖާނު ޤުރުބާން ކޮށްގެން ވެސް އެއާއި އެއްގޮތަށް އުޅެން އަހަރެން ބޭނުންވާނެކަން. އަހަރެން ބިރުގަންނަނީ އަހަރެން ދީނާއިމެދު އިތުރަށް އުނގެނިއްޖެއްޔާ އަހަރެން މަންސޫރުބެ ގޮތަށް ވެދާނެތީ. ދީނާއިމެދު އެންމެ ރަނގަޅަށް އެނގެނީ މަންސޫރުބެއަށް. އަހަރެން ބޭނުމެއްނޫން މަންސޫރުބެ ގޮތަށްވާކަށް. އެކަމަކު އަހަރެން ބޭނުން ޤުރުއާނުން ބުނާ އެއްޗެއް އެނގެންވެސް. މިކަމުގަ އަހަރެން ހުދާގެ އެހީ ބޭނުންވަނީ މިހެން ވީމަ. އަހަންނަށް ގޯހެއް ހެދެން އުޅުނަސް ހުދާ އަހަރެން ރަނގަޅު މަގަށް އަޅުވައިދޭން ހުރެދެއްޗޭ.” އަޒާން ސީރިއަސްކަމާއެކީ އެއްދިމާލަކަށް ނަޒަރު ހުއްޓައިގެން ވާހަކަ ދައްކަން އިނުމަށްފަހު ހުދާއަށް ބަލާލިއެވެ. ހުދާއަށް ދެބުމަ ކައިރިކޮށްގެން އަޒާނަށް ބަލަން އިނދެވުނެވެ.

**

“އޭނަ ހިތުން އޭނަ އުޅުނީ ރަނގަޅު މަގަށް. އެކަމަކު އެއީ ބޮޑު މުނާފިޤެއް! ބައެއް މީހުން ކުރިމަތީގަ ޞާލިޙު އަޅަކަށްވެފަ އަނެއްބައި މީހުން ކުރިމަތީ ނާޗަރަންގް…..” މަންސޫރުގެ ވާހަކަ ފުރިހަމައެއްނުވިއެވެ.

“ކަލެއަކަށް އެއްވެސް ޙައްޤެއް ނޯންނާނެ ދައްތައާމެދު އެފަދަ ގޮތަކަށް ވާހަކަ ދައްކާކަށް. ކަލޭގެ ތި އިލްޒާމް އެންމެ ރަނގަޅަށް އެޅުވޭނީ ހަމަ ކަލޭގެ ބޮލުގަ. ހީނުކުރާތި މަށަށް ނޭނގޭ ކަމަށް ކަލޭ ދައްތައަށް ކުރި ކަންތައް. ތި އައީ ވެސް އޭގެ ހެކި ނައްތާލަންކަން އަހަންނަށް އެނގޭ. އެކަމަކު ކަލޭ ކާމިޔާބެއް ނުވާނެ!” ޝިޔާގެ ހިތުގައި އޭރުވެސް ބިރުވެރިކަމެއް އޮތެއްކަމަކު އޭނަ ދެންވެސް ވާހަކަ ދެއްކީ ސާބިތު ކަމާއެކީގައެވެ. އޭނަގެ އެންމެ ފަހު ޖުމްލައިން މަންސޫރުގެ މޫނުމަތީގައިވި ނުރުހުންތެރިކަން އިތުރުވިއެވެ.

“ކަލޭ މަށަށް އޭތި ނުދީފިއްޔާ މިރެއަކީ ކަލޭ އަބުރުވެރި އަންހެނެއްގެ ގޮތުގައި އުޅޭނެ އެންމެ ފަހު ރޭ.” މަންސޫރު އިންޒާރެއްގެ ގޮތުގައި އިއްވާލި ވާހަކައިން ޝިޔާ ގަނޑުވިއެވެ.

**

“އަސްލު އަހަންނަށް ހީވޭ އަހަރެންގެ ޙަޔާތުގައިވި ހުރިހާ މައްސަލައެއްގެ ޙައްލަކީ ވެސް މި ދީންހެން. ﷲ އަހަރުމެންނަށް ދަސްކޮށްދެއްވާފައިވަނީ އެންމެ އިންސާފުވެރި އަދި އަބުރުވެރި ދިރިއުޅުމެއް އުޅެން. އެއީ ޙަޤީޤަތުގަ ﷲ އަށް ޝުކުރުވެރިވާންޖެހޭނެ ކަމެއްނުދޯ؟ އަސްލު މި ދުނިޔެއަށް އައިއްސަ ބޭނުންހާ ގޮތަކަށް އުޅުމަށްވުރެ ހުރިހާ ކަމެއް ދެނެވޮޑިގެންވާ ފަރާތް އެންގެވި ގޮތަށް އުޅުން ދޯ އެންމެ މޮޅުވާނީ؟ އައި ވިލް ބީ އޮނެސްޓް. ޙަޤީޤަތުގަ އަހަންނަށް ކަމަކުނުދޭ ހުދާ ވެސް އުޅޭ ގޮތް. އަހަރުމެން ލަދުކުޑަ ގޮތަކަށް އުޅެން އަހަރުމެން ޤަދަރުވެރި ކުރެއްވި ރަސްކަލާނގެ ރުހިވޮޑިގެންވާނެހެން ހުދާއަށް ހީވް…..” އަޒާންގެ ވާހަކަ މެދުކެނޑުނީ ހުދާ ކުއްލިއަކަށް ކޮޅަށް ތެދުވެ ނުބައި ބަސްތަކެއް ކިޔާލުމުންނެވެ. އަޒާނަށް ސިހިފައި އިސްއުފުލާލަމުން ކޮޅަށް ތެދުވެވުނެވެ. އަދި ޙައިރާންކަމާއެކީ ހުދާއަށް ބަލަން ހުރެވުނެވެ.

“އިނަފް އިޒް އިނަފް!! ގޯޑް ސީރިއަސްލީ! ކޮންކަހަލަ މީހާގަނޑެއްތަ މިއީ؟ ނޭނގެ ކިހިނެއްކަމެއް މަ މިހުރިހާ ދުވަހު މީނައާއެކީ ހޭދަކުރީވެސް. މިލްނާ ބުނަނީ ރަނގަޅަށް. ތިއީ އެއްވެސް އަގެއްނެތް ކުނިގަނޑެއް. ކަލެއަށް ނުލިބޭނެ އެއްވެސް މީހަކު. މަ ވެސް ވަކި ލޯބިވެގެންނެއްނޫން ކަލެއާއެކު އުޅުނީ. ޙަމްދަރުދީވެގެން. އެކަމަކު ދެން މިހާރު އެހާ ވަރެއްވެސް ކޮށްދެވޭކަށް ނެތް. ދާން އުޅޭ މިގެއިން! ނިކުމެގެން ދޭ!” ހުދާ ގޭގެ ދޮރަށް ޢިޝާރާތް ކުރަމުން ހަރު އަޑުން އިއްވާލިއެވެ. އެ ހިނދު އަޒާނަށް ޤަބޫލު ކުރަން ވެސް ދަތިވެފައި ހުދާއަށް ބަލަން ހުރެވުނެވެ. މިއީ މި ހުރިހާ ދުވަހު އޭނަ ދެއްކިހާ ވަހަކަތައް ކެތްތެރިކަމާއެކީ އަޑުއަހައިގެން ހުރި ހުދާ ހެއްޔެވެ؟ މި ހުރިހާ ދުވަހު އޭނަދެކެ ބަދަލެއް ނުވާ ލޯތްބެއްވިހެން ހީވި ހުދާ ހެއްޔެވެ؟ އެ ސުވާލުތައް ހިތަށް ވެރިވަމުން ދިޔަ ހިނދު އަޒާންގެ މޭގައި ރިހުމެއް އުފެދުނީ އަނެއްކާވެސް އޭނަގެ ޒަމާންވީ އެކަނިވެރިކަން އޭނައަށް އިޙްޞާޞް ކުރެވެން ފެށުމުންނެވެ. އޭނައަށް މި ދުނިޔޭގައި ލޯތްބެއް ލިބެން ހަމަ ނެތީތޯ ހިތަށްއެރި ވަގުތު ހުދާ އައިސް އޭނަގެ މޭގައި އަތް އަޅައި ކޮއްޕަމުން ދާށޭ ބުނެލައިފިއެވެ. އެއާއެކު ހަމަ ހޭވެރިކަމެއް ލިބުނު ހިނދު އަޒާންގެ ލޮލަށް ތާޒާ ކަރުނަތައް ޖަމާވިއެވެ. އޭނަ އުޅުނީ އޭނަ ހިތުން އޭނައަށް ދުނިޔެއާއި އާޚިރަތުގެ ބާއްޖަވެރިކަން ލިބޭނެ މަގެއް ފަހި ކުރާށެވެ. އެހެނަސް މިވީ ކިހިނެއްހެއްޔެވެ؟ އެކަމަށްޓަކައި އޭނަ އެޅި ފުރަތަމަ ފިޔަވަޅުން ވެސް އޭނައަށް އިޙްޞާޞް މި ކުރެވުނީ ހިތްދަތިކަމެކެވެ. ވިސްނުމެއްގެ ތެރޭގައި ހުއްޓާ ހުދާ އަނެއްކާވެސް ދާށޭ ބުނެލުމުން އަޒާން އިރުކޮޅެއް ވަންދެން ހުރިގޮތަށް ހުރެފައި ގޮސް ގޭގެ ދޮރު ހުޅުވާލަމުން އެގެއިން ނިކުމެގެން ދިޔައެވެ. ފެންޑާ ތެރޭގައި ހުރި ސައިކަލަށް އަރަން އުޅެނިކޮށް އޭނަގެ ފަޓުލޫނުގެ ޖީބުގައި އޮތް ފޯނު ރިންގުވިއެވެ. އޭނަ ފޯނު ނަގައި ބަލާލިއިރު ސްކްރީނުން އައިމަންގެ ނަން ފެނިފައި ފޯނު ކަނޑާލަން ހިތަށްއެރިއެވެ. އެހެނަސް އައިމަން ގޮތް ދޫ ނުކުރާނެކަން އެނގި އޭނަ ފޯނު ނަގައި ކަންފަތުގައި ޖައްސާލިއެވެ.

“ހެލޯ ޒާން! އަހަރެން މިދަނީ އަހަރެންގެ އެންމެ ފަހު ޕެކޭޖް ޑެލިވާރ ކޮށްދޭން. މިރޭ ސިކްވީމަ އަހަރެން އަވަހަށް ޑިއުޓީ ނިންމާލަދެނީ. ޒާން ގެއަށް އަނބުރާ އައިސްފިންތަ؟ އޯރ އާ ޔޫ ސްޓިލް އެންޖޯއިން؟” އެންމެ ފަހު ޖުމްލަ އައިމަންގެ ފަރާތުން އަޒާނަށް އިވުނީ ލާނެތް ރާގަކަށެވެ. އެއިން ވެސް އަޒާންގެ ހިތަށް އުނދަގޫވިއެވެ. ޚުދު އޭނަގެ އަމިއްލަ ކޮއްކޮވެސް ލަދުކުޑަ ކަމަކަށް ތާއީދުކޮށް ވާހަކަ ދެއްކި ކަމަށްޓަކައެވެ. އޭނައަށް މިހެން އިޙްޞާޞްވަމުން ދާ ކަމަށްޓަކައި ވެސް އޭނައަށް ދަތިވަމުން ދިޔައެވެ. ހިތުގައި އުފެދިގެން ދިޔަ ހައިޖާނެއްގެ ސަބަބުން އަޒާނަށް ވާހަކަ ނުދެކެވުނެވެ. އޭނަ އެއްޗެކޭ ނުބުނެ ހުންނަން ފެށުމުން އައިމަން ދިގުކޮށް ހެލޯއޭ ކިޔައި ގޮވާލިއެވެ. އަޒާން ފަހުން ގުޅާނެ ކަމަށް ބުނެ ކުރު ޖަވާބެއް ދެމުން އޭނަގެ ސައިކަލަށް އަރައި ސްޓާޓް ކޮށްލީ އޭނަގެ ހިތްދަތި އިޙްޞާޞްތަކެއްގެ ތެރޭގައި ޤައިދުވަމުންނެވެ.

އަޒާން އޭނަގެ އިޙްޞާޞްތަކުގެ ތެރޭގައި ޤައިދުވީ ހިނދު ޝިޔާ ވީ މަންސޫރުގެ ބެލުމުގެ ދަށުގައި ޤައިދުވެފައެވެ. އޭނަ ދިން ފުރަތަމަ އިންޒާރާއެކީ ވެސް ޝިޔާ ކޮޓަރީގެ ދޮރު ތަޅުލާން އުޅުނެއްކަމަކު މަންސޫރު އެކަން ކާމިޔާބުވިޔަ ނުދިނެވެ. އެންމެ ފަހު ޝިޔާ މަންސޫރު އޭނައާއި ގާތްވަމުން ދިޔަ ވަރަކަށް ފަހަތަށް ޖެހެމުން ޖެހެމުން ގޮސް ފާރަކަށް ތަތްވިއެވެ. އޭގެ މާ ގިނައިރެއްނުވެ މަންސޫރު އައިސް އޭނަގެ ދެ ފަރާތުގައި ދެއަތް ވިއްދާލުމުން ޝިޔާގެ ހިތް މޭފަޅާލާފައި ނިކުމެގެން ދާނެ ވަރަށް ތެޅެން ފެށިއެވެ. ދެން އެއްވެސް ގޮތެއް ނެތް ހެން ހީވި ހިނދު ޝިޔާއަށް ހިތާހިތުން ހަނދާންކޮށްލެވުނީ ﷲ ގެ މަތިންނެވެ. އޭނަ ސަލާމަތްކޮށްދެއްވަން ދުޢާ ކުރި ތަނާހެން އެ ގޭގެ ބެލްޖަހާލި އަޑު އިވުނެވެ. އެހިނދު ޝިޔާއާއެކީ މަންސޫރުގެ ނަޒަރުވެސް އެދިމާލަށް ދަތުރު ކުރިއެވެ. މާ ގިނައިރެއްނުވެ ޝިޔާގެ މަންމަގެ އަޑުއައެވެ.

“ޝިޔާ ދަރިފުޅާ! ދަރިފުޅު އޯޑަރު ކުރި އެތި މިހިރީ އައިއްސަ. ތިކަން ފައިސާ ޙަވާލުކޮށްލަބަލަ. މަންމަގެ އަތް މިހިރީ ހަޑިވެފަ.” ޒުހުރާ އެހެން ކިޔައި ގޮވާލީ ބަދިގެ ތެރޭގައި މަންސޫރަށް ދޭން އެއްޗެއް ތައްޔާރުކުރަން ހުރެއެވެ. ޒުހުރާގެ އަޑު އިވުނީ ކިތަންމެ ދުރުން ކަމަށްވިޔަސް މަންސޫރު ކުއްލިއަކަށް ޝިޔާއާއި ދުރުވެލައިފިއެވެ. އަދި އަވަސްއަވަހަށް ކޮޓަރީގެ ދޮރާއި ހަމަކޮށް ތަޅު ނައްޓާލަމުން ކޮޓަރިން ނިކުމެގެން ދިޔައެވެ. ޝިޔާއަށް ލިބުނު ބަޔާންކުރަން ދަތި ހިތްހަމަޖެހުމާއެކު އޭނަ ފެންކަޅިވެގެން ދިޔަ ދެލޮލާއެކީ މައްޗަށް ބަލާލަމުން ޙަމްދުކުރިއެވެ. އަދި މިވަގުތު ގެއަށް އައީ ކޮންމެ މީހަކަށް ވިޔަސް އެމީހަކަށްޓަކައި ހެޔޮ ދުޢާކުރަމުން އޭނަ ރީތިވާ މޭޒުމަތީގައި ހުރި ފައިސާއާއެކީ ބޭރަށްދިޔައެވެ.

ޝިޔާ ބޭރަށް ދިޔައިރު މަންސޫރު މަޑުވެސް ނުކޮށް ގޭގެ ދޮރު ހުޅުވާލާފައި ނިކުމެގެން ދިޔައެވެ. އެކަމާމެދު އިތުރަށް އުފާކުރަމުން ޝިޔާ މާ ބޮޑު ވިސްނުމެއްނެތި ގޮސް އެދޮރު ރަނގަޅަށް ހުޅުވާލިއެވެ. ހަމަ އެއާއެކު އޭނައަށް ޤަބޫލުކުރަން ވެސް ދަތިވިއެވެ. އޭނަގެ ކުރިމަތީގައި ފުޑް ޕެކޭޖެއް ހިފައިގެން ހުރީ އައިމަން ނޫން ދެވަނަ މީހެއްނޫނެވެ. އައިމަނަށް ވެސް ހުއްޓުން އަރާފައި ޝިޔާއަށް ބަލަން ހުރެވުނީ ދެންމެ މަންސޫރުބެ މިގެއިން ނިކުމެގެން ދިޔައީ ކީއްވެކަމުގެ ޙައިރާންކަމާއިއެކީގައެވެ. ކޮންމެއަކަސް އޭނަ އޭނަގެ އަތުގައި ހުރި ޕެކޭޖް ޝިޔާއަށް ދިއްކޮށްލިއެވެ. ޝިޔާ އޭތި ހޯދަމުން ފައިސާ ޙަވާލުކުރިއެވެ. އެއަށްފަހު ސިކުންތުކޮޅެއްފަހުން އައިމަން އޭނައަށް ފަސްދިން ވަގުތު ޝިޔާއަށް ކުއްލިއަކަށް ގޮވާލެވުނެވެ.

“އައިމަން!” ޝިޔާގެ އަޑަށް އައިމަން ދެބުމަ ކައިރިކޮށްލަމުން ފަސްއެނބުރި ބަލާލިއެވެ.

“މަޑުކޮށްލަދީފާނަންތަ އިރުކޮޅަކަށް؟” ޝިޔާ ދެންވެސް ސީރިއަސް މޫނަކާއެކީ އެދުނެވެ. އެއަށްފަހު އައިމަން ބޯޖަހާލުމުން އޭނަ އައިމަނަށް ފަސްދީފައި އަނެއްކާވެސް މިޞްރާބުޖެހީ އޭނަގެ ކޮޓަރިއާއި ދިމާލަށެވެ. ކޮޓަރިއަށް ގޮސް ޕެކޭޖް މޭޒުމަތީގައި ބަހައްޓާފައި ޝިޔާ ސައިޑް ޓޭބަލެއްގެ ވަތްގަނޑެއް ދަމާލަމުން އޭނަގެ ދައްތަގެ ސިޓީ ނެގިއެވެ. އެއަށްފަހު އޭތި އޭނަގެ ކިޔަވާ މޭޒުމަތީގައި އޮތް އޭނަ އަރަބި ކިޔަވާ ފޮތުގެ ތެރެއަށް ލާފައި އެ ފޮތާއެކީ ކޮޓަރިން ނިކުމެގެން ދިޔައެވެ. ޝިޔާ އޭނައާއި ދިމާލަށް ފޮތަކާއެކީ އަންނަތަން ފެނިފައި އައިމަން އިތުރަށް ޙައިރާންވިއެވެ.

“މް…..މީ އައިމަންއަށް.” ޝިޔާ އެފޮތް ދެއަތުން ދިއްކޮށްލަމުން ބުނެލިއެވެ. އައިމަން އަޖާއިބުވެފައިހުރެ އެފޮތުގައި ހިފައި ބޭރުގައި އޮތް އެއްޗެއް ކިޔާލިއެވެ. އެއަށްފަހު އަނެއްކާވެސް ޝިޔާއަށް ބަލާލީ ކަމެއް އެނގެން ބޭނުންވާ ފަދައަކުންނެވެ. ޝިޔާ ހަމައެކަނި ހިނިތުންވާން މަސައްކަތް ކުރީ އޭނައަށް އެވަގުތު އައިމަނަށް ހުރިހާ ވާހަކައެއް ކިޔައެއްނުދެވޭނެކަން ޔަޤީންވީތީވެއެވެ. މަންމަ ކޮންމެ ހިނދަކުވެސް ބަދިގެއިން ނިކުމެދާނެތީވެއެވެ. އޭނަ އައިމަނާއި ވާހަކަ ދައްކަން ހުއްޓާ މަންމައަށް ފެނިއްޖެނަމަ މި ރޭވުން ވެސް ނާކާމިޔާބުވާނެއެވެ. އޭނަ ބޭނުންވަނީ އޭނައަށް ނުވިކަން އައިމަން ލައްވާ ކުރުވާށެވެ. އައިމަނަށް ފޮތުގެ ތެރެއިން އެ ސިޓީ ފެނިއްޖެނަމަ އޭނަ އެއާއިމެދު ކަމެއްނުކޮށް ނުހުންނާނެކަން ޔަޤީންކުރެވުނީތީވެއެވެ.

ނުނިމޭ