ޢަޞްރު (ފަންސާސްއެއްވަނަ ބައި)

އައިމަނަށް ފޮތުގެ ތެރެއިން އެ ސިޓީ ފެނިއްޖެނަމަ އޭނަ އެއާއިމެދު ކަމެއްނުކޮށް ނުހުންނާނެކަން ޔަޤީންކުރެވުނީތީވެއެވެ. ޝިޔާ ބަލަބަލާ ހުއްޓާ އައިމަން އެއްފަހަރު އެފޮތަށް އަނެއް ފަހަރު އޭނައަށް ބަލާފައި ފުން ނޭވައެއް ދޫކޮށްލިއެވެ. އެއަށްފަހު އިތުރަށް މަޑުކުރުމެއްނެތި ގޮސް އެތާ ބޭރުގައި ހުރި ސައިކަލަށް އަރައި ސްޓާޓްކޮށްލިއެވެ.

**

ރެސްޓޯރެންޓްގެ ސައިކަލު އެތަނާ ޙަވާލުކޮށްފައި އައިމަން ފައިމަގުގައި ގެއަށް އައީވެސް ޝިޔާ ދިން ފޮތަށް ނަޒަރު ހުއްޓައިގެން ހުރެއެވެ. އެ ކަޅުކުލައިގެ މޮނީޓަރު ފޮތުގެ ބޭރުގައި “ޤުރުއާން އެންޑް ޢަރަބިކް” ޓިޕެކްސްއިން ލިޔެވިފައި އޮތް ގޮތުން އައިމަނަށް ދެބުމަ ކައިރިކޮށްގެން ހުރެ ވެސް ހިނިތުންވެލެވުނެވެ. ޓިޕެކްސްއިން ލިޔުމަކީ ޝިޔާ ކިހާ ކުރާ ހިތްވާ ކަމެއްކަން ހަނދާނަށް އައުމުންނެވެ. ޝިޔާ އަދިވެސް ބަދަލުނުވޭތާއޭ ހިތަށްއެރިއެވެ. އެހެނަސް އޭނަ ހާދަ ބަދަލުވެއްޖެއެވެ. ބަދަލުނުވާނަމަ މިފަދަ ފޮތެއް ޝިޔާ އޭނަގެ އަތަށް ނުދިނީހެވެ. ޝިޔާ މީތި އޭނައަށް ދިނީވެސް ފަހެ ކީއްވެ ހެއްޔެވެ؟ ޝިޔާހެން އޭނަވެސް “ދީންވެރި” ކުރުވަން ހެއްޔެވެ؟ އެއީ ވާނެކަމެއްހެން ހިއެއްނުވިއެއްކަމަކު އައިމަން އެ ފޮތަށް ޝައުޤުވެރިވިއެވެ. ކެތްތެރިކަން ކޮޅުންލުމުން އައިމަން ޕޭވްމެންޓް މަތިން ހިނގާފައި ދަމުން ވެސް ފޮތުގެ ބޭރުގަނޑު ހުޅުވާލިއެވެ. ހަމަ އެއާއެކު ފެނިގެން ދިޔައީ ފުރަތަމަ ޞަފްޙާގެ މެދުގައި ޢަރަބި ބަސްކޮޅެއް ލިޔެވިފައިވި ތަނެވެ. އެއީ ޤުރުއާނުގެ ކުރު ސޫރަތެއްކަން އައިމަނަށް އެނގުންވީ އޭތި ކިޔާލުމުންނެވެ. އެއީ އޭނަ ރަމަޟާންމަހު އަވަސްއަވަހަށް ކުރާ ބައެއް ނަމާދުތަކުގައި އެންމެ ގިނައިން ކިޔަވާ ސޫރަތެވެ. ޢަޞްރު ސޫރަތެވެ.

އައިމަނަށް އެ ލިޔުންކޮޅާއި ދިމާލަށް ބަލަން ހުރެވުނެވެ. ޝިޔާ މި ސޫރަތް މި ފޮތުގެ ފުރަތަމަ ޞަފްޙާގައި ލިޔެފައި އޮތީ ކީއްވެ ހެއްޔެވެ؟ ޤުރުއާނުގެ ފުރަތަމަ ސޫރަތަކީ އައިމަނަށް ހީވާގޮތުން އަލިފް ލާމް މީމްއޭ ކިޔާ ސޫރަތެކެވެ. ވީއިރު ޝިޔާ އެ ސޫރަތުން ފަށާފައި ނުވަނީ ކީއްވެހެއްޔެވެ؟ މި ސޫރަތް ޝިޔާއަށް މާ ޚާއްޞަވަނީ ހެއްޔެވެ؟ ސިކުނޑި ސުވާލުތަކުން ފުރިގެން ދިޔަ ހިނދު އައިމަންގެ ނިތަށް ރޫގިނަވިއެވެ. ފޮތުގެ އިތުރު ޞަފްޙާއެއް ހުޅުވަން އުޅުނުތަނާހެން ކުރިމަތިން ބާރަށް ދުއްވާފައި ދިޔަ ސައިކަލެއްގެ އަޑަށް އައިމަނަށް އިސްއުފުލައި ބަލާލެވުނެވެ. އެވަގުތު އޭނައާއި ދިމާ ކުރިމަތިން އަޒާން ނުހަނު ބާރު ސްޕީޑެއްގައި ގޮސް ސައިކަލު ގޭގެ ގޭޓުން ވައްދާލީއެވެ. އަޒާންގެ މޫނު ފެނުނު ފަޅި ސިކުންތުގައި ވެސް އޭނަގެ މޫޑު ޚަރާބުވެފައިވިކަން އައިމަނަށް އެނގުންވިއެވެ. ހަމަ އެއާއެކު ކަންބޮޑުވެގެން ދިޔަ ހިތަކާއެކީ އައިމަން އެ ފޮތް ލައްޕާލަމުން ގޭގެ ފެންޑާ ތެރެއަށް ވަނެވެ.

“ޑޫޑް ވަޓްސް ރޯންގް؟” ޖަނބުރޯލު ގަހުގެ ކައިރީގައި އަޒާން ސައިކަލު ޕާކް ކޮށްލި ހިނދު އައިމަން އޭނަ ކައިރިއަށް ދަމުން އަހާލިއެވެ. އެހެނަސް އަޒާނަށް އެ އަޑު ނުއިވުނު ފަދައެވެ. އޭނަ އައިމަނަށް ބަލާލުމެއްވެސް ނެތި އެތެރެއަށް ވަދެގެން ދިޔަ ގޮތުން އައިމަންގެ ހިތުގައި ޖެހުނެވެ. އަޒާނަށް ބޮޑު ކަމެއް ދިމާވެއްޖެކަން އޭނައަށް އެނގުންވިއެވެ. ހަމަ އެއާއެކު އަޒާނަށް އެހީވާން އެދުނު ހިތަކާއެކީ އައިމަނަށް ގޭގެ ތެރެއަށްދާން ހިނގައިގަނެވުނެވެ.

އައިމަނަށް ގޮސް ގެއަށް ވަދެވުނު ވަގުތު އަޒާން ދިގު ފިޔަވަޅުތަކެއްގައި ގޮސް ކޮޓަރިއަށްވަދެ ބާރު އަޑަކާއެކީ ދޮރު ލައްޕާލިއެވެ. އެ ހިނދު ސިޓިންގް ރޫމުގައި ތިބި ހަފްސާއާއި ރަޝީދާ ވެސް ދިޔައީ ސިހިގެންނެވެ. އައިމަން އެމީހުންނަކަށް ބެލުމެއްނެތި ގޮސް އެ ކޮޓަރީގެ ދޮރާއި ހަމަކޮށް ޓަކިދިނެވެ.

“ޒާން ކިހިނެއްތަވީ؟ ދޮރު ހުޅުވާފަ އަހަންނަށް ކިޔާދީބަލަ…..” އައިމަން ޓަކި ދެމުން އަޑު ބާރުކޮށް ވާހަކަ ދެއްކިއެވެ. އެހެނަސް އަޒާންގެ ފަރާތުން އެއްވެސް ޖަވާބެއް ނުލިބުނެވެ. ހިމޭންކަން ސިކުންތުކޮޅަކަށް ދެމިގެން ދިޔުމުން އައިމަން ދޮރުގެ ތަޅުގައި ހިފައި އަނބުރާލަން އުޅުނެވެ.

“ސީރިއަސްލީ، ވަޓް ހެޕެންޑް؟ ކިޔައިދިނީމައެއްނު ހެލްޕްވެވޭނީވެސް؟ އޮޕެން ދަ ޑޯރ!” ހިސާބެއްގެ ނުރުހުންތެރިކަމަކާއެކީ އައިމަން ބުނެލިއެވެ. އެ ހިނދު ހަފްސާ ވެސް އަޒާނަށް ކިހިނެއްވީތޯ އައިމަން ކުރެން އަހައިފިއެވެ. އައިމަން ދެކޮނޑު އަރުވާލަމުން ޖަވާބުދިނެވެ. ދެންވެސް ކޮޓަރީގެ އެތެރެއިން އެއްވެސް އަޑެއް ނުއިވުމުން އައިމަން ވާހަކަ ދެއްކިއެވެ.

“ޒާން ދޮރު ނުހުޅުވަންޏާ އެނގޭ ދޯ މި ކޮޓަރީގެ ޑުޕްލިކޭޓް ތަޅުދަނޑި އަހަ……..” އައިމަންގެ ވާހަކަ މެދުކެނޑުނީ އަޒާން ހަޅޭއްލަވައިގަތުމުންނެވެ.

“ޖަސްޓް ލީވް މީ އެލޯން!!” އަޒާން ދުވަހަކުވެސް އޭނަ އަޑު ހަރު ނުކުރާވަރަށް ހަރުކޮށްފައި އަންގާލި އަންގާލުމުން ސިޓިންގް ރޫމުގައި ތިބި އެންމެންގެ ދެލޯ ބޮޑުވިއެވެ. މިއީ ހަމަ އަޒާން ތޯ އެމީހުންގެ ހިތަށް އެރިއެވެ. އަޒާނަކީ އަމިއްލައަށް ބޭނުންވެގެން ހުންނަ ކަމެއްވެސް އަދަބުވެރިކަމާއެކީ މަޑުމައިތިރި އަޑަކުން ނޫންގޮތަކަށް ބުނެފައިވާ ކުއްޖެއްނޫނެވެ. ނަމަވެސް މިއަދު މިވީ ކިހިނެއްހެއްޔެވެ؟

އައިމަނަށް އަޒާންގެ ކޮޓަރީގެ ދޮރާއި ދިމާލަށް ބަލަން ހުރެފައި ފަހަތަށް ޖެހިލެވުނީ އަޒާން ދެން އޭނައަށް ޖަވާބެއް ނުދޭނެކަން ޔަޤީންވުމުންނެވެ. މިއީ އަޒާންގެ ފަރާތުން ފެނުނު އާ ސިފައަކަށް ވިޔަސް އަޒާނަކީ އޭނަގެ އެއްބަނޑު އެއްބަފާ ބޭބެއެވެ. އޭނައަށް އަޒާން އެނގެއެވެ. ގަދަކަމުން އަޒާންގެ ކޮޓަރީގެ ދޮރު ހުޅުވަން އައިމަން ބޭނުންވިއެވެ. އެހެނަސް އަޒާން މި ހުރިހާ ދުވަހު އޭނަ ރުޅި އިސްކުރުމުން ކެތްކުރި ގޮތަށް އޭނަވެސް އަޒާނަށްޓަކައި ކެތްކުރަން ބޭނުންވިއެވެ. އަދި އަޒާނަށް އެކަނިވެލުމުގެ ފުރުޞަތެއްދޭން ނިންމަމުން އޯކޭއޭ ބުނެ އެތަނުން ދާން ހިނގައިގަތީ ދެންވެސް އަޒާނާއިމެދު ވިސްނަމުންނެވެ. އައިމަން އޭނަގެ ކޮޓަރިއަށް ވަތް ވަގުތު މިޒަމާނުގެ ކުދިންގެ އުޅުން ހުންނަ ގޮތްދޯ އޭ ކިޔައި ހަފްސާ ކުދިކިޔަމުން ދިޔައެވެ.

**

މަންމަ ބޭރުން އެއްޗެހި ގޮވަމުން ދިޔަ އަޑު އިވިފައި އަޒާންގެ ހިތުގައި ރޯވެފައިވި ރުޅީގެ އަލިފާންގަނޑު ބޮޑުވާ ގޮތްވިއެވެ. އޭނަގެ ހިތުގައި މި އަލިފާންގަނޑު ރޯވެގެން ދިޔައީ އެ ހިތުގައި އުފެދިފައިވި އިޙްޞާޞްތަކެއްގެ ސަބަބުންނެވެ. އެންމެ ލޯބިވާ މީހެއްގެ ކުރިމަތީގައި ތިމާގެ އަގެއްނެތްކަން އެނގުމުން ލިބުނު ގިލަންވެރިކަމެވެ. އެތައް ދުވަހެއްގެ އިންތިޒާރަކަށްފަހު ލިބުނު ލޯބި ގެއްލުމުގެ ހިތާމަވެރިކަމެވެ. ޙަޔާތަށް ދެން ދުވަހަކުވެސް އުފާވެރި ދުވަސްތަކެއް ނައިސްދާނެކަމުގެ ބިރުވެރިކަމެވެ. މި ހުރިހާ އިޙްޞާޞްތަކެއްގެ ތެރޭގައި އަމިއްލަ ނަފްސު ގަންބާލަން ބޭނުންވެފައިވަނިކޮށް އައިމަން ވާހަކަ ދެއްކުމުން އޭނަގެ ކެތްތެރިކަން ކޮޅުންލާ ގޮތްވީއެވެ. އަދި އަމުދުން އައިމަނަކީ އޭނައަށް ގެއްލިފައިވާ ހުރިހާ އެއްޗެއް ލިބިފައިވާ މީހެއްހެން ހީވާތީ ހިތުގައި ޙަސަދަވެރިކަމެއްވެސް އުފެދުނީއެވެ. އޭގެ މައްޗަށް މަންމަ އެއްޗެހި ގޮވާ އަޑު އިވެން ފެށުމުން އަނެއްކާވެސް އަޒާނަށް ހަޅޭއްލަވައިގަނެވެން އުޅުނެވެ. އެކަމަށްޓަކައި ކުރިއަށް ފިޔަވަޅެއް އަޅާލި ތަނާހެން އެތާ ކިޔަވާ މޭޒުމަތީގައި ހުޅުވާފައި ހުރި އޭނަގެ ލެޕްޓޮޕްގެ ސްކްރީން އޭނަގެ ލޮލުގައި އެޅިއެވެ. އޭގައި ހުރީ ޤުރުއާނުގެ ޞަފްޙާއެއް ހުޅުވިފައިވި ޕޭޖެކެވެ. ޢަރަބި އަކުރުން ލިޔެވިފައިވި އެ އާޔަތްތަކުގެ މާނަ އެއްވެސް ވަރަކަށް ނޭނގުނެއްކަމަކު އެ ބަސްތައް ފެނިފައި އަޒާނަށް ﷲ މަތިން ހަނދުމަ ކުރެވުނެވެ. ހަމަ އެއާއެކު ދެންމެ އޭނައަށް އެޅެން އުޅުނު ފިޔަވަޅާއިމެދު ލަދުވެތިވިއެވެ. އެއީ ހަމަ ގައިމުވެސް ﷲ ރުހިވޮޑިގެންވާނެފަދަ ފިޔަވަޅެއް ނޫންކަން އެނގުންވުމުންނެވެ. އެ ހިނދު ނޭނގޭ ސަބަބަކާހުރެ އޭނަގެ ދެލޯ ފެންކަޅިވިއެވެ. ދާދި ދެންމެއަކު އޭނައަށް އައިމަނާއި ވާހަކަ ދެކެވުނު ގޮތް ހަނދާންވެފައި އަޒާންގެ ހިތް އިތުރަށް ދަތިވިއެވެ. އެއީ ވެސް ﷲ އަށް އުރެދުމަކަށް ކުރެވުނު ކަމެއްކަން ޔަޤީންވުމުންނެވެ. މީގެ އިތުރުން ވެސް މިރޭ ހުދާއާއި ގާތްވެވުނު ގޮތް ލޮލަށް ސިފަވެގެން ދިޔުމުން އަޒާންގެ ހިތަށްވީ އުނދަގުލާއެކީ އޭނައަށް މަޑުމަޑުން ތިރިވަމުން ގޮސް އެނދުގެ ކައިރީގައި ބިންމަތީގައި އިށީނދެވުނެވެ. އެއަށްފަހު އޭނައަށް އެއްދިމާލަކަށް ބަލަހައްޓައިގެން އިނދެވުނެވެ. ﷲ އޭނައާއިމެދު ރުހިވޮޑިގެންނުވާނެކަމަށް ހިތް ތަކުރާރުކޮށް ބުނަން ފެށި ހިނދު އޭނައަށް އަމިއްލަ ނަފްސަށް ރުޅިއާދެވުނެވެ. އެއީ ﷲ ރުހިވޮޑިގެންނުވާފަދަ ގޮތަކަށް އޭނައަށް އުޅެވުނުކަމަށްޓަކައިކަމެއް ނޫނީ އެއްވެސް ސަބަބެއްނެތި ﷲ މަތިން ހަނދުމަ ކުރެވޭތީކަމެއް އަޒާނަކަށް ޔަޤީނެއް ނުކުރެވުނެވެ. ނޭނގޭ ސަބަބަކާހުރެ ﷲ ޒިކުރުކުރުމަށް އޭނަގެ ހިތުގައި ނަފްރަތެއް އުފެދުނެވެ. އެކަމުން އޭނައަށް ލިބޭނީ ފަހެ ކޮން ފައިދާއެއް ހެއްޔެވެ؟ މިރޭ އޭނައަށް ދިމާވެފައިވާހާ ހިތާމައެއްގެ މުލަކީ އެއެވެ. ވީއިރު އޭނަ ވީ އެކަމުން ދުރުވާން ނޫންހެއްޔެވެ؟ ހިތަށް ވެރިވި އެ ސުވާލުން ދުނިޔޭގައިވާހާ ނުބައި ކަމެއް ކުރުމުގެ ޝުޢޫރެއް އޭނަގެ ހިތުގައި އުފެދުނެވެ. އައިމަން މީގެ ދުވަސްކޮޅެއް ކުރިން ކުރިފަދަ ހުރިހާ ފާފައަކަށް އަރައިގަންނަން ހިތުގެ ކަނަކުން އެދިލައިފިއެވެ. އެހެނަސް އޭނަގެ ހިތުގެ ބޮޑުބައިން އެ ހުރިހާ ކަމަކީ ގޯސްކަމެއްކަމަށް ބުނަން ފެށުމުން އެ ހިތުތެރޭގައި ހައިޖާނެއް އުފެދިގެން ދިޔައެވެ. އެ ހައިޖާނުގައި މޮޅުވީ ﷲ އަށް އުރެދެން އެދެމުން ދިޔަ ފަޅިއެވެ. އެހެންކަމުން އޭނަ ވަގުތުން ތެދުވެ އަވަސް ފިޔަވަޅުތަކެއްގައި ކޮޓަރިން ނިކުމެގެން ދިޔައެވެ.

މިފަހަރު އަޒާން ސައިކަލަށް އަރަން ދިޔައީ އޭނަގެ މަންމަ ނުރުހުންތެރިކަމާއެކީ ދަނީ ކީއްވެތޯ އަހަމުން ދަނިކޮށެވެ. އޭނަ މަންމަގެ އަޑަށް ބީރު ކަންފަތެއް ދެމުން ދިގު ފިޔަވަޅުތަކެއްގައި ގޮސް ސައިކަލަށް އެރިއެވެ. އެއަށްފަހު މަންމަ ބަލަން ހުއްޓާ ފަހަތް ބެލުމެއްނެތި ނުހަނު ބާރު ސްޕީޑެއްގައި ސައިކަލު ދުއްވާލައިފިއެވެ.

ގަދައަށް ހަނގުރާމަކުރަމުން ދިޔަ ދެ ޚިޔާލާއެކީ އަޒާން މިފަހަރުވެސް މިޞްރާބުޖެހީ ހުދާގެ ގެއާއި ދިމާލަށެވެ. އެގޭގެ ދޮރުމައްޗަށް ގޮސް ސައިކަލު މަޑުކުރެވުމާއެކު އަޒާންގެ މެއަށް ފިނިވެގެން ދިޔައީ އޭނަ މި ކުރަން އުޅޭ ކަމެއްގެ ބިރުވެރިކަމުންނެވެ. އެހެނަސް އޭނަ މިރޭ ފަހަތަށް ނުޖެހޭނެއެވެ. އޭނަ ހެވެއް ވެސް ނުވެ ނުބައެއް ވެސް ނުވެ އެއްވެސް ކޮޅަކަށް ނުޖެހި ދެނެއް ނުހުންނާނެއެވެ. އޭނަގެ ޙަޔާތުގެ މި ބާބު ކޮންމެވެސް އެއްކޮޅެއްގައި އޭނަ ޖައްސާނެއެވެ. އެ ޚިޔާލާއެކީ އަޒާން އަވަސްއަވަހަށް ސައިކަލުން ފޭބިއެވެ. އޭނަ ހުދާމެންގެ ދޮރާއި ދިމާލަށް އަޅަން ފެށީ ދިގު ފިޔަވަޅުތަކެއް ކަމަކު އެ ފިޔަވަޅުތަކުގައި ޖެހިލުންވުމަކާއެކީގައެވެ. ކޮންމެއަކަސް އޭނަ ގޮސް އެ ދޮރުގައި ޓަކި ދިނެވެ. އޭގެ މާ ގިނައިރެއްނުވެ ހުދާ ދޮރު ހުޅުވިއެވެ. އަޒާން ފެނުމުން މޫނުމައްޗަށް ވެރިވި ރުޅިވެރިކަމާއެކީ ހުދާ އެއްޗެކޭ ބުނަން އުޅުނު ހިނދު އަޒާން ވާހަކަ ދެއްކިއެވެ.

“އައިމް ސޮރީ ހް..ހުދާ……..އަ…..އައި ރިއަލީ އޭމް. ދް….ދެން އަ……ހަރެން އެކަހަލަ ވާހަކަތައް ން…ނުދައްކާނަން. އަހަރެން އަސްލު ކްކް..ކިއުރިއަސްވާތީ އެ….ކަހަލަ ވާހަކަތައް ދެކެވެނީ. ނަތިންގް އެލްސް. އަހަރެން ހުދާ ބޭނުންހާ ގޮތަކަށް ކަންތައް ކުރާނަން…….މިރޭ.” އަޒާން ކުރިއަށް ފިޔަވަޅެއް އަޅާލަމުން ހުދާއާއި ގާތްވެ އެހެން ބުނެލީ އޭނަގެ ހިތް މޭތެރޭގައި އޮވެ ހަޅޭއްލަވަމުން ދަނިކޮށެވެ. އޭނަ މި ފާޚިޝް ޢަމަލަށް އަރައިގަންނަން މިއުޅެނީ ގަދަކަމުންކަން ޚުދު އޭނައަށް ވެސް އެނގުންވިއެވެ. އެހެނަސް އޭނަ އަމިއްލަ ނަފްސު ހުއްޓުވާކަށް ވެސް ބޭނުމެއްނުވިއެވެ. ހުއްޓުވައިގެން އޭނަ ހައިޖާންގަނޑެއްގެ ތެރޭގައި ހުރުން ނޫންކަމެއް ނުވާނެކަން ޔަޤީންވީތީވެއެވެ.

ހުދާ ގޭގައި އެކަނި ހުރި އެ ވަގުތުގެ ބޭނުން އަޒާން އެންމެ ފުރިހަމަ ގޮތުގައި ހިފިއެވެ. ހުދާގެ ކޮނޑުގައި އެޅުނު އޭނަގެ އަތާއެކީ އެދެމީހުން އިތުރަށް ގާތްވެ ކޮޓަރިއާއި ހަމައަށް ދިޔައެވެ. އެ ހުރިހާ ވަގުތުވެސް އަޒާންގެ ހިތުތެރޭގައިވީ ނޭދެވޭ އިޙްޞާޞްތަކެވެ. އެހެނަސް ލައްޒަތުގެ ރަހަ އޭނައަށް ލިބުނު ހިނދު އޭނަ އެ ހުރިހާ ކަމެއްގެ މަތިން ހަނދާން ނެތުނެވެ. ޝައިޠާނާ އޭނައަށްޓަކައި އެ ވަގުތުކޮޅު ޒީނަތްތެރިކުރުވިއެވެ. އެހެންނޫނަސް ޒުވާން ފިރިހެން ކުއްޖަކަށް ކެތްކުރެވޭނީ މިހާވަރަކަށް ނޫންތޯ އޭނަގެ ހިތް ބުނެލައިފިއެވެ. ހަމަ އެއާއެކު ހުދާ މިއަށްފަހު ވާނީ އޭނަގެ މީހަކަށްކަން އޭނައަށް ޔަޤީންކުރެވުނެވެ. އޭނައަށް ނޭނގުނުކަމަކީ ދުވަހެއްގެ ކޮޅުން ވެސް އޭނަގެ ސިކުނޑީގައި ޒީނަތްތެރިވެފައިވި ހުދާގެ ލޯތްބެއް އޭނައަށް ނުލިބޭނެކަމެވެ. އަދި މިރޭގެ ބޭނުން ވެސް ހުދާ ހިފާނީ އޭނައާއި ދެކޮޅަށް ކަމެވެ.

އޭގެ އަނެއްދުވަހުގެ ފަތިސް ނަމާދު ބަންގީގެ އަޑަށް އަޒާނަށް ހޭލެވުނެވެ. ހިނދުކޮޅެއް އޮވެވުނު ތަން ނަގައިގަނެވުމުން އަޒާނަށް ކުއްލިއަކަށް ތެދުވެވުނެވެ. ﷲ ގެ ނަންފުޅު އިވެމުން ދިޔައިރު އޭނަގެ ހިތް ގެނބެން ފެށިތަނާހެން އޭނަ ދެރަވާކަށް ނުޖެހޭކަން އޭނަ އަމިއްލަ ނަފްސަށް ވިސްނައިދިނެވެ. އެއަށްފަހު ހުދާއަށް ބަލާލަމުން އޭނައަށް ހުދާގެ ފަރާތުން ލިބުނު އުފަލާމެދު ވިސްނާލިއެވެ. ދުނިޔޭގައި މިހެން އުޅެވޭއިރު ބޭކާރު ގޮތުގައި ވަކި ދީނެއްގެ ވާހަކަ ދައްކަނީ ކީއްކުރަންތޯ އަޒާންގެ ހިތް ބުންޏެވެ. އެ ސުވާލުން ޚުދު އޭނަ ވެސް އަމިއްލަ ނަފްސާއިމެދު ޙައިރާންވިއެވެ. އޭނައަށް މިހާ ކުއްލި ބަދަލެއް އައި ގޮތާއިމެދުގައެވެ. އެހެނަސް އޭނަ ދެން އިތުރަށް އެކަމާމެދު ވިސްނާކަށް ނުއުޅެ އެނދުން ފައިބައިގެން ދިޔައީ ނަމާދުނުކޮށް ގެއަށް ދާށެވެ.

ގެއަށް ދިޔުމާއެކު އަޒާނާއި އެތައް ސުވާލުތަކެއް ކުރިމަތިވިއެވެ. އައިމަންގެ ފަރާތުންނާއި މަންމަގެ ފަރާތުން ވެސް މެއެވެ. އެހެނަސް އޭނަ އޭގެއިން އެއްވެސް މީހެއްގެ ސުވާލަކަށް ޖަވާބުދޭކަށް ނުއުޅުނެއެވެ. އޭގެ ބަދަލުގައި އޭނަ ހުދާއާއި ގުޅުން ބަދަހި ކުރަމުން ދިޔައެވެ. އެ ހުރިހާ ވަގުތެއްގައި ވެސް އޭނަ ހުންނަނީ ނުހަނު ހެވިފައި ކަމަށްވިޔަސް އޭނަގެ ހިތަށް އެއްވެސް ހަމަޖެހުމެއް ނުލިބޭކަން ޚުދު އޭނައަށް ވެސް އެނގުންވެއެވެ. މިގޮތަށް އުޅުމުގައި ގޯހެއްވާކަމަށް އޭނަގެ ހިތް ތަކުރާރުކޮށް ބުނަމުން ދިޔައެވެ. އެއްއަނދިރިގަނޑަކަށްފަހު އަނެއް އަނދިރިގަނޑަށް ގެނބެމުން ދިޔައެއްކަމަކު އޭނައަށް އަދި ވެސް އޭނަގެ އަތުން ކޮށްފައިވާ ޢަމަލުތަކުގެ ޙަޤީޤަތް ފެންނަމުން ދިޔަ ފަދައެވެ.

މީގެ ދުވަސްކޮޅެއް ކުރިން އައިމަނަށް އައިފަދަ ބަދަލެއް އަޒާނަށް އައިސްފައިވިތަން ފެނިފައި މުޅި ޢާއިލާއަށް ކަންބޮޑުވުމެއް ވެރިވެފައިވިއެވެ. ހަފްސާ އެމީހުންގެ ޢާއިލާއަށް އެސްފީނާއެއް ޖެހުނިއްޔޭ ހިތައި ފަންޑިތަ ވެސް ހައްދަންވީ ވާހަކަ ދައްކަމުން ދިޔައެވެ. އޭނަ އެ ނިންމުން ނިންމީ މަންމައެއްގެ ދުޢާ އިޖާބަވާނެކަން ހަނދާން ނައްތާލަމުންނެވެ.

ޝިޔާ ދިން ފޮތް ބަލާލުމުގެ ފުރުޞަތެއް އައިމަނަށް ލިބުން ނާދިރު ވަމުން ދިޔައީ އޭނަވެސް އަޒާނާއިމެދު ކަންބަޑުވަމުން ދިޔައީތީވެއެވެ. އޭނަ އަޒާނާއި އެކިގޮތްގޮތަށް ވާހަކަ ދައްކަން އުޅުމުން ވެސް އެއްވެސް ކަމެއް ޙައްލުވާގޮތެއް ނުވިއެވެ. ކުރާނެ އިތުރު ކަމެއް ނެތުމުން އައިމަނަށް އޭނަގެ ބޭބެއާމެދު ދެރަވުން ނޫންކަމެއް ނުކުރެވެއެވެ. އެ ހިތާމައިގައި އެއްރޭ އައިމަން އަވަހަށް ޑިއުޓީ ނިންމާލާފައި ކޮޓަރިއަށްވަނެވެ. އެއަށްފަހު އެތައް ދުވަހެއް ފަހުން މާ ބޮޑު ވަރުބަލި ކަމެއްނެތި އެނދަށް އަރައި އޮށޯންނަން އުޅުނެވެ. ރަޖާ އެޅި ވަގުތު ހެޑްބޯޑްމަތިން ޝިޔާ ދިން ފޮތް ފެނިފައި އައިމަން ވަގުތު އޭތި ނަގާލިއެވެ. އަދި އެފޮތް ސީދަލަށް ބަހައްޓައިގެން ހުޅުވާލިއެވެ. އެ ހިނދު އޭގެ ތެރެއިން ސިޓީ އުރައެއް ވެއްޓިގެން އައުމުން އައިމަނަށް ޙައިރާންކަމެއް ލިބުނެވެ. އޭނަ އެ ސިޓީ އުރަ ނަގައި ބަލާލިއެވެ. ބޭރުން ފެނުނު ނަމަކުން ލިބުނު ޙައިރާންކަމާއެކީ އައިމަން ކޮޓަރީގެ އަލި ބޮކިތައް ދިއްލާލީ ޔަޤީންކުރުމުގެ ގޮތުންނެވެ. އެއީ ހަމަ އެ ނަންކަން އެނގުމުން އައިމަން ވަގުތުން އެ ސިޓީ އުރަ ކަނޑާލިއެވެ. އެއަށްފަހު އޭގައި ހުރި ގަނޑުތައް ނަގައި އެ އެއްޗެހިތައް ނިއުޅާލިއެވެ.

ނުނިމޭ