ވަންހަނާ (28)

އާޒިމްގެ ލޮލުން އިންތިހާ ނަފްރަތު ފާޅުވާން ހުރިއިރު އޭނާ ބަލަން ނުހުރެ ހަރު ފިޔަވަޅުތަކެއްގައި ރިއުމާންއާއި ދިމާއަށް އަންނަން ފެށިއެވެ. އެންމެ ފިޔަވަޅެއް ވެސް ފަހަތަށް ޖެހިނުލައި ރިއުމާން ހުރީ އޭނާގެ ގޮތުގައި ކޮންމެ ކަމެއް ކުރިމަތި ވިއަސް ފަސް ނުޖެހޭން ނިންމައިގެންނެވެ.”ކީއްކުރަނީ ތި މިތާ؟ ދޭ ހަމަ މިހާރު!” އާޒިމް އައިގޮތަށް އައިސް އަމުރު ކުރުމުން ރިއުމާން ހައިރާންވިއެވެ. އޭނާ ދެކެ އާޒިމް އެހައި ރުޅިއައިސްފާނެ ކަމަކަށް ފަހަރެއްގައި ވެސް ހިއެއް ނުކުރެއެވެ. އޭރު އައްޔާދް އެމީހުންނާއި ދިމާއަށް އަންނަން ހިނގައިގެން އިރު ނަޒީރު ހުރީ ދެބުމަ ގޮށްޖަހައިގެންނެވެ. “ރިއުމާން..” އައްޔާދް އައިސް ހުއްޓިލަމުން މިހެން ބުނެލިއިރު އެއަޑުގައިވީ ރިހުން އިވި ރިއުމާން ވެސް ހިތުގައި ޖެހުނެވެ.

“އައްޔާދް ހަމަ މިހާރު ދޭ އެކޮޅަށް! އެންމެން ގަނޑު ތެރޭގައި އަހަރެން ލައްވަ ހަޅޭލައްވަން އުޅޭނެ ކަމެއް ނެތް!” އާޒިމް ހަރުކަށިކަމާއިއެކު މިހެން ބުނި އިރު ކައިރީގައި ތިބި މީހުންގެ ނަޒަރު މިހާރު ވެސް އެދިމާއަށް ހުއްޓެމުންދިޔައެވެ. އޭރު ގޮނޑިބަރީގައި އިން ޒުލްފާ އައިސް ރިއުމާން ކުރިމަތީގައި ހުއްޓެލި އިރު އެލޮލުގައި ކަރުނަ ނުހިކިވިއެވެ. “އަޅުގަނޑު މިއައީ ލައިބާ އެކްސިޑެންޓް ޚަބަރު ލިބުމުން.. ކޮބާ އޭނަ؟ ވަރަށް ސީރިއަސްތަ؟” ރިއުމާން މަޑުމައިތިރި ކަމާއިއެކު ހަމްދަރުދީވެ ވާހަކަދެއްކިއެވެ.

“އަހަރެން ދަރިފުޅުގެ ނަން ތި ދުލުން ކިޔާނެ ކަމެއް ވެސް! އޭނާގެ ހުރިހާ އުފާތަކެއް ޖަހައިގެންފައި ކޮން ލައިބާއެކޭ ކިޔާކަށް.. ދާން އުޅޭ މިތަނުން.. އާޒިމް ހަމަ މިހާރު އޭނާ ފޮނުވާލާ އަހަރެން އަތުންފައިން ގޯހެއް ނުހެދެނީސް.” މާރިއާ ރުޅިއައިސްފައި ހުރިއިރު އެލޮލުން އިންތިހާ ނަފްރަތު ފާޅުވަމުން ދިޔައެވެ. “އަޅުގަނޑަށް ވިސްނޭ މިވަގުތު އެންމެން ވެސް ތިތިބީ ހާސްވެފައިކަން.. އެކަމު އެއްވެސް އިރެއްގައި ލައިބާއަށް ދެރައެއް ދޭކަށް އަޅުގަނޑު ނުވިސްނަން. މިއީ އޮޅުމެއްގެ ތެރެއިން ހިނގި ކަމެއް. އައްޔާދް..” ރިއުމާން މިހިސާބަށް ބުނިތަނާ އާޒިމް ރުޅި ހަމައިންނެއްޓިއެވެ.

“އަދިވެސް އައްޔާދްގެ ފަހަތުން ނުނެއްޓިގެން ތިއުޅެނީ ކީއްވެ؟ ތިކަހަލަ ހަޑި މުޑުދާރު މީހަކު އަހަރެން މިއާއިލާއާއި ގުޅުނަ ދޭނެހެން ވެސް ހީވޭތަ! ތިކަހަލަ އަންހެނުންގެ ސަބަބުންނޭ މުޖްތަމަޢު ފަސާދަވެ އާއިލާތަށް ރޫޅެނީ. އަހަރެން މިއާއިލާ ރޫޅުނަކަ ނުދޭނަން.. މިހުރިހާ ކަމެއް ވެސް މިވީ ހަމަ ތިކުއްޖާއާއި ހެދި!” އާޒިމް އޭނާގެ އަޑު މަޑުކުރެވޭތޯ ބެލިއެވެ. “ރިއުމާން! ނަމަކީ ރިއުމާން.. އަދި ތިބުނާ ކަހަލަ މީހެއް ނޫން އަޅުގަނޑަކީ.” ރިއުމާން ހަރުކަށި ކަމާއިއެކު މިހެން ބުނެލި އިރު ދުރުގައި ހުރި މާރިއާ ވެސް ކައިރިއަށް ޖެހެލިއެވެ.

“އެހެންތަ! ބަލަ އަމިއްލަ ބަފަޔާ ގުޅުން ހިންގާއިރު ލަދޭ މިކިޔާ އެއްޗެއް ގަނޭތަ!” އާޒިމް އައިސްފައި ހުރި ރުޅީގައި އަނގައިން އެބަސްތައް ބޭރުވުމާއިއެކު އެއްޗެކޭ ނުބުނެ ހުރި އައްޔާދް ދެލޯ ބޮޑުވިއެވެ. “ބައްޕާ!!” އައްޔާދަށް ހަޅޭލަވައި ގަންނަމުން އާޒިމް ކުރިމައްޗަށް އަރައި އޭނައާއި އެތޫނު ކަޅި އަމާޒުވިއެވެ.

އޭރު އެހިސާބުގައި ތިބި އެންމެން އެއްފަހަރާ ކަހަލަ ގޮތަކަށް ހަރަކާތްތަށް ހުއްޓި އެދިމާއަށް ބަލަން ފެށިއެވެ. “އިތުރަށް ރިއުމާންއޭ ކިޔައިގެން އެންމެ އެއްޗެކޭ ބުންޏަސް ނިމުނީ! ވަރަށް ކެއްކޮށްފިން.. ބަޓް ނޯ މޯ!” އައްޔާދް ހަރުކަށި ކަމާއިއެކު އިނގިލި ދިއްކޮށްލި އިރު ދެބުމަ ގޮށްޖެހި އިންތިހާ ރުޅިވެރިކަން އެމޫނުމަތިން ފާޅުވާން ހުއްޓެވެ.

“ކިހިނެތް ވެގެންތޯ މިއުޅެނީ؟” ދުރުން އައި ފުލުސް އޮފިސަރަކު މާ އަޑު ގަދަވެގެން އެމީހުން ކައިރިއަށް އައިސް މަޑުކޮށްލަމުން އަހާލިއެވެ. އެވަގުތު އޭނާގެ ނަޒަރު އައްޔާދަށް ހުއްޓުމުން އެއީ ކާކުކަން އިނގި ތަންކޮޅެއް ދުރަށްޖެހިލައި ބުނަން އުޅުނު ވާހަކަ މެދުކަނޑާލިއެވެ. “ސާޖެންޓް އައްޔާދް.. ހޮސްޕިޓަލް ތެރޭގައި އަޑުމަޑުކޮށްލަ ދިނުން އެދެން” އެފުލުސް އޮފިސަރު ބުނެލިއެވެ. “ސޮރީ.. ތަންކޮޅެއް އަޑުގަދަވީ.” އައްޔާދް ހަމަޖެހިލަމުން މިހެން ބުނުމުން އެފުލުސް އޮފިސަރު ދުރަށް ޖެހިލައި އެތަނުގައި މަޑުކޮށްލިއެވެ.

“ކީކޭ އާޒިމް ތިބުނީ؟” ޒުލްފާ ހައިރާންވެފައި ހުރިއިރު ދެންމެއަކު އެއިވުނު ވާހަކަ ޤަބޫލުކުރަން ދަތިވެފައި ހުއްޓެވެ. “އައި އެމް ސޮރީ.. އެކަމު މިއީ ޒުލްފާއްތަމެންނާއި ބެހޭ ކަމެއް ނޫން.. ދިސް އިޒް ޕާސަނަލް.. ކްލިއަލީ މިވާހަކަ އެންމެންގެ ތެރޭގައި ދައްކާކަށް ބައްޕައަކަށް ވެސް ނުޖެހޭނެ.” އައްޔާދް ލޯއަޅާލަމުން މިހެން ބުނިއިރު އާޒިމަށް ވެސް އޭނާއަށް އެކިޔުނީ މިފަދަ ތަނެއްގައި ބުނެވިގެންވާނެ ކަހަލަ ވާހަކައެއް ނޫންކަން އިހުސާސްވިއެވެ. އޭރު ރިއުމާން ބަސްމަދުވެ ގަބުވެފައި ހުރިއިރު އޭނާ ފަހަރެއްގައި ވެސް އެގޮތަށް އާޒިމް އެކަން ހާމަ ކޮށްފާނެ ކަމަކަށް ހިއެއް ނުކުރެއެވެ.

އައްޔާދް އިތުރު އެއްޗެކޭ ބުނުމުގެ ކުރިން އެމަޖެންސީ ރޫމް ތެރެއިން ނެއްލި ލައިބާ ފެނި އެންމެންގެ ސަމާލުކަން އެދިމާއަށް ހުއްޓުނެވެ. ބޯއެއްކޮން ބެންޑޭޖް ކޮށްފައި އޮތް ނަމަވެސް ރަތްލޭ އެހުދު ފޮތިގަނޑުން ފޭދިފައި ވިއެވެ. ލޭތަށް ސާފުކޮށްލެވިފައި އޮތް މޫނުގައި ޒަހަމްތަށް ވީއިރު ނަރުސް ކުދިންތައް އަވަސް ފިޔަވަޅުތަކެއްގައި އޭނާ އޮތް އެނދު ކުރިއަށް ދުއްވަމުން ދިޔައެވެ.

“ކޮންތާކަށްތި ގެންދަނީ؟” ނަޒީރު ހާސްވެފައި އަހާލިއިރު އައްޔާދް ވެސް އެނދާއި ކައިރިއަށް ޖެހިލިއެވެ. އޭރު ލައިބާ އޮތް ހާލުފެނި ރިއުމާންގެ ހިތަށް ތަދުވިއިރު އޭނާ ސަލާމަތް ކުރުމަށް އެދި ހިތާހިތުން ދުޢާ ކުރެވުނެވެ. “ތިއޭޓާއަށް.. ވަރަށް އަވަހަށް ބޭނުންވޭ އެބަ އޭ ޕޮޒިޓިވް ބަލަޑް.. މިކޮޅުން ލިބެން ހުރި ވަރު މަދުވާނެ. ވަރަށް މަދު ބައެއް ގައިގައި މިލޭ ލިބެން ހުންނާނީ. ވީމަ ވިހާވެސް އަވަހަށް ހޯދަ ދޭން ވީ. ޕޭރެންޓެއް ނެއްތޯ އޭ ޕޮޒިޓިވް ހުންނަ؟” ކައިރީގައި ހުރި ޑޮކްޓަރ މިހެން ބުނުމުން ނަޒީރުގެ ނަޒަރު ޒުލްފާއަށް ހުއްޓުނެވެ.

“އަޅުގަނޑު އަންހެނުން..” ނަޒީރު މިހެން ބުނުމުން އެތަނުން ދެ ނަރުސް ކުއްޖަކު ޒުލަފާ ގާތު އެމީހުންނާއި އެކު އައުމަށް އެދުނެވެ. އޭރު އެމީހުން ލައިބާ އެތަނުން ގެންދިޔަ އިރު ޒުލްފާ ހިތާއި ދެކޮޅަށް ފަސްދީފައި ހިނގައިގަތެވެ. އޭރު އައްޔާދް ހުއްޓި ލައިބާ ގެންދިޔަތަން ބަލަން ހުރިއިރު ނަޒީރު ފާރުގައި ލެނގިލިލައި ދެއަތިން މޫނުގައި އަތް ހާކާލިއެވެ.

“ރަނގަޅުވާނެ އިރާދަކުރެއްވިއްޔާ..” ނަޒީރުގެ ކޮނޑުގައި އަތް ބާއްވާލަމުން އާޒިމް ހިތްވަރުގެ ބަސްކޮޅެއް ބުނެލިއެވެ. “އަތް ނުލައި ގައިގައި.. ތި މީހުންނާއި ހެދި މިހެން މިވީ. ލައިބާ.. ލައިބާ ތިއާއިލާއާއި ނުގުޅުނު ނަމަ… މިހެން ނުވީސް.” ނަޒީރު ކޮނޑުގައި އެޅި އާޒިމްގެ އަތް ފޮޅުވާލަމުން ތިއޭޓަރާއި ދިމާއަށް ހިނގައިގަތެވެ. އޭރު އާޒިމް ލަދުން އިސްޖެހި އައްޔާދާއި ދިމާއަށް ނަޒަރު ހުއްޓާލިއިރު އޭނާ ދުރުގައި ރިއުމާންގެ އަތުގައި ހިފައްޓައިގެން ހުއްޓެވެ. ދެބަފައިންގެ ނަޒަރު ބައްދަލުވީ ހިނދު ދެމީހުން ވެސް އެކަކު އަނެކަކު ކުށްވެރިކޮށް މޫނު އަނބުރާލިއެވެ.

****

އިރު އޮއްސި އަނދިރިވެގެން ދިޔައިރު ތިއޭޓަރު ބޭރުގައި ނަޒީރު ގޮނޑިއެއްގައި އިންއިރު ކައިރީގައި އިން ޒުލްފާ ފާރުގައި ބޯ ޖައްސާލައިގެން ލޯމެރިފައި އިނެވެ. މާރިއާ ބަހެއް ނުބުނެ ދުރުގައި އިންއިރު އަނާ އޭނާގެ މަންމަ ކައިރީގައި އިނެވެ. އޭރު އާޒިމް ދުރުގައި ދެކޮޅަށް ހިނގާލަ ހިނގާލަ ހުރިއިރު އެމީހުންނާއި ތަންކޮޅެއް ދުރުގައި ވަކިން ހުރި ގޮނޑިބަރިއެއްގައި އައްޔާދްއާއި ރިއުމާންއިނެވެ.

އައްޔާދްގެ އަތްތިލައާއި އަމިއްލަ އަތްތިލަ ގުޅުވާލައިގެން އިންއިރު ރިއުމާންގެ ބޯވަނީ އައްޔާދްގެ ކޮނޑުގައި އަޅާލެވިފައެވެ. އެތަށް އިރަކު އައްޔާދް އެގޮތަށް އަނގައިން ބަހެއް ނުބުނެ އިން އިރު އެލޮލުން ހިތާމައިގެ އަސަރު ފާޅުވެއެވެ. އަދިވެސް ލޭތަށް ފޭދި ހިކިފައި ހުރި ޔުނީފޯމް ލައިގެން އޭނާ ހުރިއިރު އެކަމުން އުނދަގޫ ވެސް ނުވާ ކަހަލައެވެ.

“އައްޔާދް erektilemed.de.. ދާން ވީނުން ގެއަށް ގޮސް ޗޭންޖް ކޮށްލައިގެން އަންނަން.” ރިއުމާން ބޯ އުފުލާލަމުން މިހެން ބުނި ނަމަވެސް އައްޔާދަށް އިވުނު ހެންނެއް ހިއެއްނުވެއެވެ. “އައްޔާދް..” އޭނާގެ ކޮނޑުގައި ކޮއްޓާލުމުން އައްޔާދް ހޭވެރިކަންވެ ގޮނޑީގައި ލެނގިލަމުން ރިއުމާންއަށް ނަޒަރު ހުއްޓާލިއެވެ. “ކީކޭ؟” އަތުން ނިއްކުރީގައި އިނގިލިތައް ހާކާލިއިރު ބޮލުގައި ރިހުމެއް އުފެދިފައިވިއެވެ.

“ދާންވީ ނޫންހޭ ފެންވަރައިގެން ތި ގަމީސް ބަދަލު ކޮށްލައިގެން އަންނަން. ހުސް ލެއެއްނުން..” ރިއުމާން މިހެން ބުނުމުން އައްޔާދް އޭނާ ލައިގެން ހުރި ޔުނީފޯމަށް ބަލައިލުމުން އެބުނީ ތެދެއްކަން ރޭކާލިއެވެ. ހާސްވެފައި ހުރިވަރުން އޭނާ ހުރި ހާލަތު ވެސް ހަނދާން ނެތުނީއެވެ. “ދާންވީ.. ވަރަށް ބޮލުގައި ރިއްސާއެބަ.” އައްޔާދް އަނެއްކާވެސް ބޮލުގެ އިސްތަށިކޮޅަށް އަތްމަހާލަމުން ލޯމަރާލިއެވެ. ރިއުމާން މަޑުމަޑުން އޭނާގެ އިނގިލިތަކުން އައްޔާދްގެ ނިއްކުރީގައާއި ބޮލުގައި މޮޑެލަ ދިނުމުން އޭނާ ގޮނޑީގައި ހަމަޖެހިލިއެވެ. ދުރުގައި މި މަންޒަރި ބަލަން ހުރި އާޒިމް ދަތްކުނޑި ވިކާލިއެވެ.

“ދެން އެކަމު ދިޔައީމަ ލައިބާ ޔޯ؟” ލައްޕާފައި ހުރި ތިއޭޓަރުގެ ދޮރަށް ނަޒަރު ހުއްޓާލަމުން އައްޔާދް ބުނެލިއެވެ. “ލައިބާ ނެރެފިއްޔާ ގުޅާނަން. އޯކޭނުން. އެކަމު ތިހެން އެހައި ގިނައިރު އިންނާކަށް ނުވާނެ.. މެންދުރު ގެއަށް ދިޔަގޮތަށް އެއްޗެއް ނުވެސް ކަން ދޯ އަދި.” ރިއުމާން ވިސްނާލާފައި އަހާލުމުން އައްޔާދް ބޯޖަހާލިއެވެ. “ދޭ ގެއަށް ގޮސް ޖޫސްތަޓެއް ނަމަވެސް ބޯލައިގެން އަންނަން. ދާއިރުން މަންމަ ވެސް ގޮވައިގެން ދޭ.. ވަރަށް އިރުވެއްޖެ އެއްނުން އިންނަތާ.” ދުރުގައި އިސްޖެހިފައި އިން މާރިއާއަށް ނަޒަރު ހުއްޓާލަމުން ރިއުމާން ބުނެލިއެވެ.

“ދެން ރިއު މަޑުކުރަނީތަ؟” އައްޔާދް އަހާލުމުން އޭނާ ބޯ ޖަހާލިއެވެ. “އިޓްސް އޯކޭ.. އަހަރެން ބޭނުން މަޑުކުރަން.. ޝީ އިޒް މައި ފްރެންޑް.. އަސްލު ދެރެވޭ މިގޮތަށް ކަންތައް ވީތީ. އެކަމު އައްޔާދް ޕްލީޒް ޑޯންޓް ބްލޭމް ޔުއާ ސެލްފް.. މިހެން ވެދާނެ ކަމެއް ވަކި ކާކަށް އިނގޭނީ. ޔޫ ޑިޑް ވަޓް ޔޫ ކުޑް އިނގޭ..” ރިއުމާން ނިކަން ލޯބިން ވިސްނާ ދިނުމުން އައްޔާދް އެއްބަސް ވިއެވެ. “ބައްޕައާއި ވާހަކަ ނުދައްކާތި. އެއްޗެކޭ ބުންޏަސް ދުރަށް ދޭ.” ދުރުގައި އެމީހުންނަށް ލޯ އަޅައިގެން ހުރި އާޒިމް ފެނުމުން އައްޔާދް ބުނެލިއެވެ.

“ޑޯންޓް ވޮރީ.. އައި ކެން ހޭންޑަލް މައި ސެލްފް. އައްޔާދް ހާސްނުވެބަލަ.. ދެން ދޭ މަންމަ ގޮވައިގެން. އަހަރެން މަޑުކުރާނަން އަންނަން ދެން.” ރިއުމާން ލުއި ގޮތަކަށް ހިނިތުންވެލުމުން އައްޔާދް ތެދުވެ އޭނާގެ ބޮލުގައި ބޮސް ދިނުމަށްފަހު މާރިއާ ކައިރިއަށް ގޮސް އިށީނދެލިއެވެ. އިރުކޮޅެއްފަހުން އައްޔާދް ވާހަކަ ދެއްކުމުން އޭނާ އަނާއާއި އެކު ތެދުވެ ޒުލްފާ ކައިރި އެއްޗެކޭ ބުނެލުމަށްފަހު އައްޔާދާއި އެކު ދާން ހިނގައިގަތެވެ. ރިއުމާން ކުރިމަތިން ހުރަސް ކަނޑާފައި ދިޔައިރު ވެސް މާރިއާ އޭނައާއި ދިމާއަށް ބަލާނުލައެވެ. ރިއުމާން އެއްޗެކޭ ހީނުކޮށް އެތަނުގައި އިނެވެ. އާޒިމް އިރުއިރުކޮޅާއި ރިއުމާންއަށް ލޯއަޅާލާއިރު އޭނަ އިތުރަށް އެކަމާއި ވާހަކަދައްކާކަށް ނާދެއެވެ.

****

އޮހޮމުންދިޔަ ފެން މާގަނޑު ދަށުގައި ހުރި އައްޔާދްގެ ދެލޯ ވަނީ މެރިފައެވެ. ގައިގައި ތަތްވެ ހިކިފައި ހުރި ލޭތަށް ފެނާއި އެކުވެގެން ފައިބަމުން ދިޔައިރު ޓައިލްސްތަކު މަތީގައި އޮތް ޔުނީފޯމްގައި ވީ ލޭތަކުން ހީވަނީ އެހިސާބުގައި އެއްކޮން ރަތް ދޫލައެއް އަޅާލާފައި އޮތްހެނެވެ. އަތްލައިން މޫނު ފޮހެލި އިރު ޚިޔާލުގައި އެނބުރެމުން ދިޔައީ މިއަދުގެ ހާދިސާތަކެވެ. ރިއުމާން އޭނާގެ ހިތި މާޒީ ހާމަކުރުމާއި ލައިބާއަށް ހަޤީޤަތް އިނގި އެކްސިޑެންޓް ވީއިރު އާޒިމް އެންމެން ކުރިމަތީގައި ރިއުމާން ބޭޒާރު ކޮށްލިގޮތް ހަނދާވުމުން ކޮލުގެ ކަތުރުކަށިގަނޑު ބާރުވެގެން ދިޔައެވެ.

އާޒިމް އެގޮތަށް ރިއުމާންއާއި ވާހަކަދެއްކުމުން އޭނާ އިންތިހާއަށް ރުޅިއައި ނަމަވެސް ބައްޕައަށް ވީތީ ކަމެއް ކުރެވޭކަށް ނެތެވެ. މިއަދު އެވާހަކަތައް ދެއްކީ އެހެން މީހެއްނަމަ އެމީހެއްގެ އަނގަމަތި ފަޅާލަން ވެސް އައްޔާދް ފަސްނުޖެހުނީއެވެ.

އޭނާ އަވަސް އަވަހަށް ގައި ދޮވެލައިގެން އުނުގައި ތުވާލި އޮޅާލުމަށްފަހު ސިންކުގައި އަތް އަޅުވާލަމުން ކުރިމަތީގައި ހުރި ބޮޑު ލޯގަނޑުން އަމިއްލަ ސޫރައަށް ނަޒަރު ހުއްޓާލިއެވެ. އޭނާ ދެއަތުން ބާރަށް ސިންކުގައި ހިފައްޓާލައިގެ ހުރިއިރު އިނގިލިތަކަށް ލޭއެރިއެވެ.

އާޒިމްގެ އެބަސްތަށް ސިކުނޑީގައި އެނބުރެމުން ދިޔަވަރަށް އެތެރެ ހަށީގައި ހިފާފައިވީ އަލިފާނުގައި ހުޅު ރޯވެގެން ދިޔައެވެ. ކުއްލިއަކަށް އަތު ޖެހޭ ހިސާބުގައި ހުރި މުށިން ހަދާފައިވީ ޖޯޑެއް ފާޑު އެއްޗެއް ނަގައި އަތަށް ލެވުނުހައި ބާރެއްލާފައި ލޯގަނޑާއި ދިމާއަށް ހޫރުވާލިއެވެ. އޭތި ލޯގަނޑުގައި ޖެހުމާއި އެކު ލޯގަނޑުގެ އެއްފަޅިން ރެނދުލައި ތެޅިފައިވީ އިރު އެއްލި ޖޯޑު ފަޅައިގެން ގޮސް އެތިކޮޅުތައް ބުރައިގެން ދިޔައެވެ. އިރުކޮޅަކު ތެޅިފައިވީ ލޯގަނޑުން އަމިއްލަ ސޫރަށްއަށް ބަލަން ހުރެ އައިސްފައި ހުރި ރުޅިވެރިކަމަށް ލުޔެއް ލިބުމުން ފާޚާނާއިން ނިކުތެވެ.

ކޮޓަރިން ނިކުތުމާއި އެކު ލޮލުގައި އަޅައިގަތީ އެނދުމަތީގައި އޮތް ފޯނު ރިންގުވަމުން ދިޔަ ތަނެވެ. އޭނާ ދެފިޔަޅު އެޅުމަށްފަހު ފޯނު ނެގި އިރު ގުޅަނީ ރިއުމާންއެވެ. “ހަލޯ.. އާނ މި ނިކުތީ. ލައިބާ ނެރުނީތަ؟ ޔާ އޯކޭ މިދަނީ.” އައްޔާދް ފޯނު ބޭއްވުމަށްފަހު އަވަސްވެގަތީ ތައްޔާރު ވެގެން ހޮސްޕިޓަލަށް ދިއުމަށްށެވެ. ލައިބާ ތިއޭޓަރުން ނެރުނު ޚަބަރު ލިބުމުން އޭނާގެ ހިތް އިތުރަށް ނުތަނަސް ވިއެވެ.

****

އައްޔާދް އަވަސް ފިޔަޅުތަކެއްގައި ހޮސްޕިޓަލަށް ވަދެގެން ދިޔައިރު މާރިއާ ވެސް ގޭގައި މަޑުނުކުރާން އޭނައާއި އެކު އައެވެ. ދުވެލާފައި ކަހަލަ ގޮތަކަށް އައްޔާދް ގޮސް ތިއޭޓަރާއި އަރައި ހަމަވިއިރު އެހިސާބުގައި އެއިން އެކަކު ވެސް ފެންނަން ނެތުމުން އޭނާ ފޯނުން ރިއުމާންއަށް ގުޅާލިއެވެ. ލައިބާ އައި.ސީ.ޔޫއަށް ވެއްދި ޚަބަރު ލިބުމުން އޭނާ އަވަހަށް އެދިމާއަށް ހިނގައިގަތެވެ.

“ރިއު.. ކިހިނެތްވީ؟” ރިއުމާންއާއި އަރައި ހަމަވުމުން އައްޔާދް މައި ނޭވާ ލެވިފައި ހުރެ އަހާލިއެވެ. “ނޭނގެ އަދި.. ޑޮކްޓަރ ބުނީ ނިކުމެފައި ކިޔާދޭނަމޯ. ލައިބާ ވީ އެތެރޭގައި.” ރިއުމާން އޮޅުން ފިލުވާ ދިނުމުން އައްޔާދް އިއި.ސީ.ޔޫ ކައިރިއަށް ޖެހިލިއެވެ. އޭރު ނަޒީރު ކެތްމަދުވެފައި ދޮރު ބުޑުގައި ހުރިއިރު މާރިއާ ގޮސް ޒުލްފާ ކައިރި ހިތްވަރުދެމުން މަޑުކޮށްލިއެވެ. އޭރުވެސް އާޒިމް އެއްޗެކޭ ނުބުނެ ގޮނޑީގައި އިންއިރު އިރުއިރުކޮޅުން އައި.ސީ.ޔޫއާއި ދިމާއަށް ނަޒަރު ހުއްޓާލައެވެ.

މާ ގިނައިރެއް ނުވެ ދޮރު ހުޅުވާލުމަށްފަހު ޑޮކްޓަރު ނިކުތުމާއި އެކު އެންމެން އެއްފަހަރާ ކަހަލަ ގޮތަކަށް އެދިމާއަށް ދިޔައެވެ. “ޕިކަޕް ދަށު ވުމުން މޭކަށިގަނޑަށް ގެއްލުންވެ އިންޓާނަލީ ބްލީޑްވެފައި ހުރީ.. އެކަމަކު ބްލީޑިން ކޮންޓުރޯލް ކުރެވިއްޖެ.. އަދި އަމިއްލައަށް ނޭވާ ނުލެވޭތީ މިހާރު އިންކިއުބޭޓް ކޮށްފައި އޮންނާނީ.. ނަސީބަކުން ސިކުނޑިއަށް މާބޮޑު ގެއްލުމެއް ނުލިބޭ.. ޖަސްޓް އަ މައިލް ކޮންކަޝަން.. އަނެއްހެން ބްރެއިން އޯކޭ.” ޑޮކްޓަރު ދިން ޛަބަރު އެންމެންނަށް ހިތްހަމަޖެހުމުގެ ނޭވާއެއް ލެވުނެވެ.

“އޭނަ ރަނގަޅުވާނެތަ ދެން؟ ކޮންއިރަކުން ހޭ އަރާނީ؟” ޒުލްފާ އަވަސް އަވަހަށް ސުވާލު ކޮށްލިއެވެ. “ވަކި އިރެއް ބުނާކަށް ނޭނގެ.. އެކަމު މި ބަލަނީ ދެ ދުވަހެއް ވަރު ތެރޭގައި ހޭއަރާނެ ކަމަށް. އޭގެ ކުރިން ވެސް ހޭއަރާފާނެ.. ދެއާ އިޒް ނޯ ސީރިއަސް ބްރެއިން އިންޖަރީ.. އެހެންވީމަ އެހައި ގިނައިރެއް ނުނަގާނެ. އެކަމަކު ހޭ އެރިއަސް އައި.ސީ.ޔޫގައި ބާއްވާނީ. ޝީ އިޒް އައުޓް އޮފް ޑޭންޖާ ބަޓް ސްޓިލް ކްރިޓިކަލް.” ޑޮކްޓަރ މިހެން ބުނުމުން އައްޔާދް ހެއްދެވި ފަރާތަށް ހަމްދު ކުރިއެވެ.

“ދެކިލަން ވަދެވޭނެތޯ؟” އައްޔާދް އަހާލިއެވެ. “އެންމެ މީހަކަށް މިވަގުތު ވަދެވޭނީ.. ފަހުން ސްޓޭބަލް ވީމަ ދެމީހުންނަށް ވެސް ވަދެވިދާނެ. އެކަމު އެއަށް ވުރެ ގިނައިން އައި.ސީ.ޔޫއަށް ނުވެއްދޭނެ.” ޑޮކްޓަރ މިހެން ބުނެފައި ދިޔުމުން ނަޒީރު އައްޔާދްގެ ކުރިމައްޗަށް އެރިއެވެ. “ލައިބާ ކުރިމައްޗަށް ވެސް ކަލޭ އަރައިގެން ނުވާނެ! އަހަރެން ބޭނުއްމެއް ނޫން ދެން ލައިބާއާއި އައްޔާދާއި އެއްވެސް ގުޅުމެއް އޮންނާކަށް.. ކައިވެނި ވެސް މިހިސާބުން ކެންސަލް.” ނަޒީރު ހިތްހަމަނުޖެހިފައި ބުނެލިއިރު މޫނުމަތިން ނަފްރަތު ފާޅުވާން ހުއްޓެވެ.

“ނަޒީރު ތިހިސާބަށް ދާކަށް ނުވޭ.. ކައިވެނި އަދި.” ކައިރީގައި ހުރި އާޒިމްގެ ވާހަކަ މެދުކަނޑާލަން ނަޒީރު އޭނައާއި ދިމާއަށް އަތްތިލަ ހުރަސް ކޮށްލިއެވެ. “ކީކޭ މި ބުނީ؟ އަހަރެން ބޭނުމެއް ނޫނޭ ލައިބާ ތި އާއިލާއާއި ގުޅޭކަށް. މިހިސާބުން އަހަރެމެންގެ ގުޅުން ވެސް މިކެނޑުނީ.. މާރިއާ އަހަންނަށް ހުރިހާ ކަމެއް ކިޔާދީފި.” ނަޒީރު މިހެން ބުނުމުން އާޒިމްގެ ނަޒަރު މާރިއާއަށް ހުއްޓުނެވެ. ލައިބާ ތިއޭޓަރަށް ވެއްދި ފަހުން ނަޒީރު ވަކިން ގޮސް މާރިއާ ގާތު އަހައިގެން ހުރިހާ ކަމެއް އޮޅުން ފިލުވިއެވެ.

“އައްޔާދް ކައިރި އަހާ ލުމެއްނެތި މި ކައިވެނި ހަމަޖެއްސީ އާޒިމް އަމިއްލައަކަށް ނުން.. މިހިރަ ކުއްޖާއާއި އައްޔާދް ގުޅިދާނެތީ. ބުނަން ތި އަންހެން ކުއްޖާ ކުރިކަމަކާއި އާޒިމް އޭނަދެކެ ތި އަންނަ ރުޅިއަކީ އަހަންނާ ބެހޭ ކަމެއްނޫން. އެކަމު އަހަރެން ދަރިފުޅު އައްޔާދްދެކެ ވީ ލޯބި ބޭނުން ކޮށްގެން އޭގެ ނާޖާއިޒް ފައިދާ ނަގައި އަމިއްލަ އެދުމަށް އައްޔާދްގެ ނުރުހުމުގައި އެދެމީހުން ގުޅުވަން އުޅުނީ އާޒިމް. އެހެންވީމަ ތިކަހަލަ މީހަކާއި އެއްވެސް ގުޅުމެއް ބާއްވަން އަހަންނެއް ނޭދެން.. ދެން އެންމެ ރަނގަޅު ވާނީ މިތަނުން ދިޔައިއްޔާ. ލައިބާ ކައިރީގައި އޭނާގެ މައިންބަފައިން އަދި އެބަ ތިބި!” ނަޒީރު ހަރުކަށި ކަމާއިއެކު ދެއްކި ވާހަކަތަކުން އާޒިމްގެ ދޫ ބަންދު ވިއެވެ.

އައިސްފައި ހުރި ރުޅިންނާއި ގައިން ލަދުން އޭނާ އިތުރަށް އެންމެ ބަހެއް ވެސް ނުބުނެ ފަސް އެނބުރި ހިނގައިގަންނަމުން ދުރުގައި ހުރި ރިއުމާންއާއި ހަމައަށް އަރައި ހުއްޓުނެވެ. އޭނާ ރިއުމާންއާއި ދިމާއަށް ލޯ އަޅާލިއިރު ހުރީ ދަތްކުނޑި ވިކާލައިގެންނެވެ. “ހީނުކުރައްޗޭ ތިކަން ވާނެޔޭ.. އަހަރެން ދިރި ހުރިހާ ދުވަހަކު އައްޔާދްގެ ހަޔާތަކަށް ނާދެވޭނެ!” އާޒިމް އިންޒާރެއް ދިނެވެ. “އަދި އަޅުގަނޑު ދިރި ހުރިހާ ދުވަހަކު އައްޔާދްގެ ހަޔާތުން ވަތްކެއް ނުވެވޭނެ.” ރިއުމާން ވެސް އޭނާގެ ގޮތުގައި ހިފައްޓާލަމުން ޔަޤީން ކަމާއިއެކު ބުނެލިއެވެ.

-ނުނިމޭ-