އިންތިޒާރުގައި ހުރިން (2)

އެއް އަހަރުފަސް..

ޔާއިންގެ އުމުރުން 5 އަހަރަށް އޮތް އިރު އޭނާ އަކީ އުމުރާއި ބަލާފައި އެހެން ކުދިންނަށްވުރެ ވިސްނުން ތޫނު ބަސްއަހާ ކިޔަމަންތެރި ކުއްޖެކެވެ. ސަބަބަކަށް ހަމައެކަނި ވީ ސުމާ އާއި މާޒިންގެ އިތުރުން ލިބެމުން ދިޔަ މާރިޔާގެ ލޮތްބާއި ރަނގަޅު ތަރުބިއްޔަތެވެ. ސުމާ ދިޔައީ ޔާއިންއެކޭ އެއްފަދައިން މާޒިންއަށްވެސް ވަގުތު ދެމުންނެވެ. ދެމީހުންޝަކުވާ ކުރާނެ ޖާގައެއް އޭނާ ނުދެއެވެ. އެހެނީ އެއީ އޭނާ މިދުނިޔޭގައިވެސް އެންމެ ލޯބިވާ ދެމީހުންނެވެ.

އެއްދުވަހެކެވެ. ޔާއިން ހެނދުނާއި ސުކޫލަށް ލާން ގޮއްސާ އައިސް ސުމާ އެނދުމަތީ އޮތީ ބޮލަށް އެނބުރުން އަރާތީއެވެ. އޭނާ އަށް ކިރިޔާ އުޅެވޭކަމެވެ. މިއަދު ފާހަނަތެރެއަށް ނުވެއްޓުނީވެސް ކިރިޔާއެވެ. ނަމަވެސް އޭނާ ހިތްވަރުކޮށްލައިގެން އޭނަގެ ޒިންމާތަށް އަދާކުރުމުގައި އުޅުމަށްފަހު އަމިއްލަ ނަފްސަށް ވަގުތެއް ދެވުނީ ކިރިޔާއެވެ. މާޒިންވެސް ހޮސްޕިޓަލަށް ގޮއްސާ ބްރޭކްއަށް އަންނަން އުޅޭވާހަކަ ބުނިކަމުގައިވިޔަސް އަދިވެސް ނާދެއެވެ. ސުމާ އަށް މިދުވަސްކޮޅު ރަނގަޅަށް ނުކެވެނީބާއެވެ. ނުވަތަ މާ ބޮޑަށް މަސައްކަތްކުރެވެނީބާއެވެ. މިހާރު ވަރުބަލިވާލެއްވެސް އަވަހެވެ. އެހެންޏާ ކޮށް ނިންމާލާ ކަންތަކުގެ ދެބައިކުޅަ އެއްބައި ނުނިމެނީސް ހުންނަނީ މީހާ ވަރުބަލިވެ ނޭވައި ކުރުވެފައެވެ.

ސުމާ އޮށޯވެ އޮއްވާ މާރިޔާ ކޮޓަރިއަށް ވަނީ އޭނާއަށް ސުމާ މިއަދު ބަލިކަން އިނގޭތީއެވެ. “މަންމަ މިއައީ ދަރިފުޅަށް ކާއެއްޗެއް ހިފައިގެން.. ބޭސްކާލައިގެން އޮތީމަ ރަނގަޅުވެދާނެ… މިހާރު މާ ބުރަކޮށޭ ތިއުޅެނީ…” މާރިޔާ ކަބަޑުމަތީ ޓްރޭ ބަހައްޓާލަމުން ބުންޏެވެ. ސުމާ ހިނިތުންވެލިއެވެ. ނަމަވެސް މިވަގުތު ކާކަށް ބޭނުމެއްނުވިއެވެ. “މަންމަ މިދަނީ މާހާ ކައިރިއަށް ދާންވެގެން.. އަންނަމުން ޔާން ގޮވައިގެން އަންނާނަން އިނގޭ… ދަރިފުޅު ކައިގެން ބޭސްކައިގެން އަރާމްކޮށްލާ… މާޒިންވެސް އަންނާނެ ދޯ އިރުކޮޅަކުން.. ޝަރޫ ކައިރި ބުނެފަ މަންމަ ދާނަން މާޒިން އަންނަންވާއިރަށް ކާންހަދާށޭ.. ދަރިފުޅު އޮވޭ އިނގޭ.. ކާތި ހަނދާންކޮށް…” މާރިޔާ ސުމާގެ ބޮލުގައި ފިރުމަ ފިރުމާފައި އެހެން ބުންޏެވެ. “މާހާ ރަނގަޅުތަ؟” ބަލިއަޑަކުން ސުމާ ބުނެލީ މާހާ އާއި މެދު ކަންބޮޑުވެފައެވެ. 8 މަހުގެ ބަނޑަކާއި އެކު އޭނާ އުޅޭއިރު ދުވަސް ކޯކޮޅުން އޭނާ ވަރަށް ބަލިވާ ވާހަކަ އަޑުއިވެއެވެ. މިއަދުވެސް އެކަހަލަ ކަމެއް ވީކަމަށް ސުމާ ހިތަށް އަރާ ކަންބޮޑުވެވުނީއެވެ. “އިރާދަކުރެއްވިއްޔާ ރަނގަޅު.. ކުރިންވާގޮތަށް މިހާރު ނުވެޔޯ… މަންމަ މިދަނީ  ޖައްސާލަންވެގެން… މާހާ މަންމަ އެގެއަށް އަންނަން ބުނީމަ… ދަރިފުޅު ދެން އެ ހުރިހާ ކަމަކާ ނުވިސްނާ ކައިގެން ނިދާލާ..” ތެދުވަމުން މާރިޔާ ބުނެލިއެވެ. ސުމާ ދެކެ އޭނާ އަބަދުވެސް ދަރިއެއްދެކެ ވާފަދަ ލޯބިވެއެވެ. މާރިޔާ ސުމާ ކައިރި އެތަށް ފަހަރު އަރާމްކުރުމަށް ބުނުމަށްފަހު ނިކުމެގެން ދިޔައެވެ. ސުމާ ކެއުމުގެ ބަދަލުގައި ބާލިހުގައި ބައްދާލައިގެން އޮތީއެވެ.

މާޒިން އާއިރު ސުމާ އޮތީ ބާލިހެއްގައި ބައްދާލައިގެން ނިދާފައެވެ. ކަބަޑުމަތީ މާރިޔާ ގެނެއްސާ ހުރި ޓްރޭ އެ ހުރިގޮތަށް ހުއްޓެވެ. ސުމާ ބަލީބާއޭ ހިތަށް އޭނާ ހިތަށްއެރިއެވެ. އެހެނީ މިއަދު ހެނދުނަކުވެސް ސުމާ ބަލި ވާހަކައެއް ނުބުނެއެވެ. މާޒިން ކުޑަކޮށް ނުތަވަސްވެފައި ސުމާގެ ނިތްކުރިމަތީ އަތްލަމުން ހުން ހުރިތޯ ބަލާލިއެވެ. ހުމެއް ނެތެވެ. ސުމާ ނިދާފައި އޮތުމުން ގޮވާކަށް ނުކެރުނެވެ. އެހެންކަމުން އޭނާ ފެންވަރަން ވަނީ ދެން ހޮސްޕިޓަލަށް ނުދާން ނިންމާފައެވެ. މިއަދު ސުމާއާއި އެކު ވަގުތު ހޭދަކޮށްލަން ބޭނުންވީއެވެ. އެމަރޖެންސީއެއް ވާނަމަ އެކޮޅުން ގުޅާނެތާއެވެ. ފެންވަރައި ނިމިގެން އޭނާ ތިރިއަށް ދިޔައީ މާރިޔާ އުޅޭނެކަމަށެވެ. ނަމަވެސް މާޒިންއަށް ކާންތައްޔާރުކުރަން ހުރި ޝަރުމީލާގެ ފަރާތުން އިނގުނު ގޮތުގައި މާރިޔާ ދެން އަންނާނީ މެންދުރު ހާއިރުއެވެ. އެއީ ޔާއިންވެސް ގޮވައިގެން އަންނާތީއެވެ. ކާންއިނދެފައި ޝަރުމީލާ ކައިރި ސުމާގެ ވާހަކަ މާޒިން އެހިއެވެ. “ސުމާ އުޅުނީ ވަރަށް ބަލިކޮށް ހެނދުނުވެސް… މިއަދު ޔާއިން ލާފައި ގޮސް އޮތީ… ދައްތަ ބުނި ކައިގެން ދާށޭވެސް ބުނީމަވެސް ނުކައި ދިޔައީ… ދައްތަ ގެންދިޔަ ސައި ހަދައިގެން ސުމާއަށް ބޭސްވެސް ހިފައިގެން…” ޝަރުމީލާ އެހެން ބުނެފައި އެތަނުން ދާން ހިނގައިގަތީ ކުރަންހުރި އެހެންކަމެއް ހަނދާންވެގެންނެވެ. ސުމާ ނެތުމުން ކުޑަކޮށް އޭނާއަށް އުނދަގޫވިއެވެ. މަސައްކަތްތަށް ގިނަވިއެވެ. ނަމަވެސް ޝަކުވާއެއްނެތެވެ. އެހެނީ ސުމާވަނީ ޝަރުމީލާގެ ހިތުންވެސް ޖާގައެއް ހޯދާފައެވެ. އެހާވެސް އޭނާ ރަނގަޅެވެ.

މާޒިން ކައިގެން އަވަސް އަވަސް ކޮށްލާފައި ކޮޓަރިއަށް ދިޔައެވެ. ސުމާ ނުވެސް ކައި އޮތްކަން އިނގުމުން ހިތްހަމަނުޖެހިފައި ސުމާއަށް ގޮވިއެވެ. ސުމާ ބާލިސްތެރޭ އިތުރަށް މޫނު ފޮރުވާލުމުން މާޒިން ބާލިސް އޭނާއާއި ދުރުކުރިއެވެ. ސުމާ މަޑު މަޑުން ލޯ ހުޅުވާލިވަގުތު މާޒިން ފެނިފައި ދެލޯ ބޮޑުވިއެވެ. ކުއްލިއަކަށް ތެދުވެވުނު ގޮތުން ބޮލަށް އަނެއްކާވެސް އެނބުރުން އެރިއެވެ. ސުމާ ބޮލުގައި ހިފަހައްޓާލައިގެން އެނދުގައި ލައްގަނެލުމުން މާޒިން ހާސްވިއެވެ. އެއަށްފަހު ސުމާ އާއި ކައިރިވެލާފައި އޭނާގެ ހާޓް ބީޓްގެ އިތުރަށް ވިންދު ޗެކް ކުރަންފެށިއެވެ. ހާޓް ބީޓްވަނީ އަވަސްވެފައެވެ. “ބޭބީ.. ބަލީތަ؟ ކިހިނެއްވީ؟” މާޒިން އަހާލުމުން ލޯ މަރާލައިގެން އިން ސުމާ ލޯހުޅުވާލަމުން ހިނިތުންވެލިއެވެ. “ބޮލުގައި ރިއްސާތީވެ…އެނބުރުންވެސް އަރަނީ..” ސުމާ ބުންޏެވެ. “ނުކައިތަ އުޅެނީ ލަވް؟ ބަލާބަ މަންމަ ގެނެއްސަ ދިޔަ އެއްޗެހި ނުވެސް ކައި ތި ހުރީ.. އެނބުރުންވެސް އަރާނެއެއްނު އެހާ ލަހުން ކަނީވެސް.” މާޒިން ޝަކުވާ ކޮށްލުމުން ސުމާ ހިނިތުންވެލާފައި އޭނާގެ އަތް މާޒިންއާއި ދިމާލަށް ދިއްކޮށްލިއެވެ. މާޒިން އެ އަތުގައި ހިފާލަމުން ބޮސްދިނެވެ.  “.ހިނގާ ކާން ދޯ…” މާޒިން އެހެން ބުނުމުން ސުމާ މޫނު ހަދާލާފައި ނޫނެކޭ ބުނެލީ އޭނާ އެއްގޮތަކަށްވެސް ކާން ބޭނުންނުވީމައެވެ. ކުޑަކޮށް މޭބޮޑުވާކަހަލަ ގޮތެއްވެސް ވާންފެށުމުންނެވެ.

“އުނހު… ކާންވާނެ.. ބޮލުގައިވެސް ރިއްސަނީ ނުކާތީއޭ…” މާޒިން ބުންޏެވެ. “ޕްލީސް… ކާ ހިތެއް ނެތް…..” ސުމާ ބުނީ މޭގައި އަތް އަޅާލަމުންނެވެ. “ދެން؟ ކޯޗެއް ގެންނަންވީ؟ އެހެން އެއްޗެއް ގެނެސްދެންތަ؟” ސުމާގެ ދެކޮނޑުގައި ހިފަހައްޓާލަމުން މާޒިން އެހިއެވެ. “ނޫން.. ކާން ގޮސްދާނަން…” ސުމާ އެހެން ބުނެފައި ތެދުވަން އުޅުނެވެ. އޭރު އެނބުރުން އަރައިފިއެވެ. ނަމަވެސް މާޒިން ކުރިމަތީ އެކަން ނުދައްކަން އޭނާ ހިނިތުންވެލާފައި ފިޔަވަޅަކަށްފަހު ފިޔަވަޅެއް އަޅަމުން ދިޔައީ ފާހާނާއާއި ދިމާލަށެވެ. އޭނާގެ ދެލޮލަށް އަނދިރިވެ ހުރިތަނަށް ތިރިވެވުނީ ހަމަކުއްލިއަކަށެވެ. މާޒިން ގޮވާލިއަޑު އިވުނެވެ. އޭގެ ފަހުން ވީގޮތެއް އޭނާއަކަށް ނޭނގުނެވެ.

ސުމާގެ ދެލޮލަށް ފެނުގެ އިހްސާސް ކުރިވަގުތު ދެފަހަރު ތަޅުވާލިއެވެ. ފުން ނޭވައަކާއި އެކު އޭނާއަށް ދެލޯ ހުޅުވުނެވެ. އެވަގުތު ހާސްވެފައިވާ މާޒިން ފެނި ސުމާ ދިޔައީ ސިއްސައިގެންނެވެ. މާޒިން ސުމާގެ ބޮލުގައި ފިރުމާލަމުން ނިތުގައި ބޮސްދިނީ ހަމަޖެހިލަމުންނެވެ. “ލަވް..!! ހިނގާ ޑޮކްއަށް ދައްކަންދާން…..” މާޒިން ބުނެލީ ސުމާގެ އަތުގައި ހިފަހައްޓާލަމުންނެވެ. ސުމާ ނޫނެކޭ ބުނެލިވަގުތު ދޮރުގައި ޓަކި ޖެހި އަޑުއިވުނެވެ. މާޒިން ދޮރު ހުޅުވިއިރު އެއީ ޝަރުމީލާއެވެ. ސުމާއަށް ކާއެއްޗެހި ހިފައިގެން އައީއެވެ. އޭގާ ހުރީ ހޫނު ކިރުތައްޓެއްގެ އިތުރަށް އާފަލުކޮޅަކާއި ރޮށި މޮޑެފައެވެ. ޝަރުމީލާ ހިނިތުންވެލާފައި އައިސް ސުމާ ކައިރި ކެއުމަށް ބުންޏެވެ. އަދި ބޭސްގުޅައަކާއި ފެންތަށްޓެއްވެސް ބަހައްޓާފައި އޭނާ ދިޔައީއެވެ. މާޒިން ސުމާ ތެދުވުމަށް އެހީވެދިނެވެ. އެއަށްފަހު އޭނާއަށް ސަމްސަލުން ކާންވެސް ދިނީ މާޒިންއެވެ. ބަސްއަހާ ކުއްޖެއް ފަދައިން މާޒިން އަތުން ސުމާ ކަމުން ދިޔައެވެ.

“ކިރު ތަށިވެސް ބޯލާ ހިހޫ ނުވަނިސް..” މާޒިން ބުނެލީ ކިރުތަށި ދިއްކޮށްލުމުންނެވެ. ސުމާއަށް އޭގެ ވަސް ޖެހުމާއި އެކު މޭނުބައި ވެއްޖެއެވެ. އަދި ވަގުތުން ނޫނެކޭ ކިޔަންފެށިއެވެ. “ސީރިއަސްކޮށްނޭ… ހޫނުކޮށް ބުއީމަ އޯކޭވާނެ…” މާޒިން ގަދަކަމުން ސުމާގެ އަނގައިގާ ޖެއްސީ އޭނާ ނުބޯން އުޅެނީ ހުސްކިރުވީމަ އޭ ހިތާއެވެ. ނަމަވެސް ހަމަ އެތެރެއަށް ދަމާލި އެތިކޮޅާއި އެކު ސުމާ ތަށި ދުރައްޖައްސާލަމުން އަނގަމަތީ އަތް އެޅިއެވެ. އަދި ދެލޯ ބޮޑުކޮށްލާފައި ހުރެ ދުވެފައި ފާހަނައަށް ދިޔައީ މާޒިންއަށް އެވަރު ދެނެގަނެވޭނެވަރަށްވުރެވެސް ހަލުވިކޮށެވެ. ސުމާ އަށް ފާހަނައަށް ވަދެވުނުކަމެވެ. ބަނޑަށް އެޅުނުހާ އެއްޗެއް ހޮޑާއި އެކު ނިކުމެގެން ދިޔައެވެ. ހޮޑު ފެނުނުވަރަކަށް އޭނާ އޯކަށް ދެމެންފެށިއެވެ. ބަނޑު ހުސްވަންދެން އޭނާއަށް ހޮޑުލެވިފައިވުމުން އިތުރަށް ހޮޑެއް ނުލެވުނެވެ. އެކަމުގެ ސަބަބުން އޭނާގެ ބަނޑަށް ތަދުވާންފެށިއެވެ. ދޮރުމަތީ ދެލޯ ބޮޑުކޮށްލާފައި މާޒިންއަށް ހުރެވުނީއެވެ. ސުމާ ހިތްވަރުކޮށްލާފައި ހޮޑުތަށް ސާފްކުރިއެވެ ދޮރުމަތީ ހުރި މާޒިންއާއި ދިމާލަށް އެނބުރުނު ވަގުތު އޭނާ އަނެއްކާވެސް އެނބުރުން އެރިއެވެ. ހުސްގޮހޮރާ ހުރުމުގެ ސަބަބުން ގައިން ވާގި ހުސްވިކަހަލައެވެ. މާޒިން ވަގުތުން އޭނާއާއި ދިމާލަށް ސުމާ ގެނެސް އަތުތެރޭ ހައްޔަރު ކުރިއެވެ. ސުމާ ހަބަރުހުސްނުވިއެއްކަމަކު އޮތީ ލޯ މަރާލައިގެންނެވެ. މާޒިން ވަގުތުން ހޮސްޕިޓަލަށް ދާންބޭނުންވިއެވެ. “ނޫން… ޒިން…މިގަޑިއަކު ނޫން..” ސުމާ ބުނެލީ މާޒިން އޭނާ އެނދުގައި ބައިންދާލުމުންނެވެ. އެއަށްފަހު މާޒިން އިތުރު އެއްޗެއް ބުނެފާނެތީ އަވަސް އަވަހަށް މޭވާކޮޅުތަށް ކާންފެށިއެވެ. ހަޤީޤަތުގައި ހައިވީލެއްވެސް ބޮޑުވެގެންނެވެ. އެއަށްފަހު އޭނާ ބެސްކައިގެން ފެންވެސް ބުޔެވެ.

“އެކަމް…. ހިނގާ ޑޮކްއަށް ދައްކަން… ޕްލީސް…” މާޒިން ބުނުމުން ސުމާ ނޫނެކޭ ބުންޏެވެ. “އެކީއްވެ.. އުނހު ހިނގާ…އަހަރެން ދެންމެ ނެތްނަމަ ސުމްކޮއަށް ވާނެގޮތް އިނގޭތަ؟ އަހަރެން ބޭނުމޭ ސުމްކޮއަށް ތިވާގޮތެއް އޮޅުންފިލުވަން…. ކިރިޔާ ދެފަހަރަށް ހާރޓް އެޓޭކެއް ނައި…” މާޒިން އެހެން ބުނުމުން ސުމާ  ހޭންފެށިއެވެ. “ހޭކަށެއް ނޫނޭ ވީ… މަޑުކުރޭ އަދިއަންނާނަން އާފަލުކޮޅެއް ހިފައިގެން…. އެ ކައިގެން ދާނީ ޑޮކްޓަރަށް ދައްކަން… މަންމަ އަންނާނެއެއްނު ޔާން ގޮވައިގެން އެހެންވީމަ ހާސްވާކަށްވެސް ނުޖެހޭނެ…” މާޒިން ތަށިތަށް ހިފައިގެން ދަމުން ބުންޏެވެ. “ޒިން ދެން ޕްލީސް.. އެ މާ ބުރަކޮށް އުޅެވޭތީ ނުކެވެނީއޭ… އެހެންވެ އެނބުރުން އަރަނީ.. ދެން ކާނަމޭ.. ޑޮކްއަށް ނުދެއްކިޔަސް…………….” “ނޯ ނޯ ނޯ ނޯ ނޯ… އަޑެއް ނާހާނަން…. މިހާރުވެސް ހޮސްޕިޓަލުގައި ހަމަ ތިގޮތަށްވެގެން ބައިވަރު ކުދިން އެޑްމިޓް ކޮށްފަ އެބަތިބި…. ބޮޑުވަރުނުވަނިސް ހިނގާ ދައްކަން.. ސުމްޖެހޭނީ މިފަހަރު ގޮތް ދޫކުރަން.. ގަދަކަމުންވެސް މިފަހަރު ގެންދާނަން…. އަހަރެން ނެތް އިރަކު އެނބުރުން އަރައިގެން ވެއްޓިފައި ތަނެއް ހަލާކުކޮށްލަންތަ ބޭނުމީ….” މާޒިން ހިތްހަމަނުޖެހިފައި ބުންޏެވެ. ސުމާ މާޒިން ދިޔަދިމާލަށް ލޯ އަޅައިގެން ބަލަން އިނެވެ. ވަޒީފާއަކަށް ނުދިޔައެއްކަމަކު އޭނާ އަކީވެސް ހޮވާލެވޭނެ މޮޅު ޑޮކްޓަރަކަށްވާނެކަން ޔަޤީނެވެ. ނަމަވެސް މުޅި ދުނިޔޭގައިވެސް އޭނާ އެންމެ ފޫހިވާ ކަމަކީ އަމިއްލަ ނަފްސަށް ފަރުވާކުރުމެވެ. ޑޮކްޓަރަށް ދެއްކުމެވެ. މާޒިން އެހެން ހެދުމުން އެންމެ ފަހުން އޭނާ މިޖެހުނީ އެކަންތަށްވެސް ކުރާށެވެ.

މާޒިން އިރުކޮޅަކުން އައީ އާފަލު ތަށްޓެއް ހިފައިގެންނެވެ. ސުމާ އެ ކާންފެށުމުން މޭ ހެޔޮވާންފެށިއެވެ. “އޯކޭ.. އަވަސް.. ތައްޔާރުވޭ… އެހެންނޫނީ ތި ހުރިގޮތަށްވެސް ގެންގޮސްދާނަން..” މާޒިން ބުނެލީ ސުމާ އަށް އިތުރު “އޮޕްޝަން” އެއް ނުދޭންވެގެންނެވެ. ސުމާ ރުޅި އައިކަމަށް ހަދާލާފައި ހުސްތަށި ކަބަޑުމަތީ ބެހެއްޓީ ވަރަށް ބާރަށެވެ. އެ އަޑު ކޮޓަރީގައި ހިފައިލިއެވެ. ސުމާ އެ ތަށި ތެޅުނުތޯ ބަލައިލީ އެހާ ބާރަށް ޖެހިދާނެކަމަށް ހީކޮށްފައިނުވުމުންނެވެ. މާޒިން ކައިރިއަށް ހިނިއައެވެ. އިތުރު ގޮތެއް ނެތުމުން ސުމާ ތައްޔާރުވާންފެށިއެވެ. އާދައިގެ ގޮތަކަށް ބުރުގަލެއް އަޅާލައިގެން ކަކުލާއި ހަމާއަށް އަރާ ދިގު އަދި ދޫ ހެދުމެއް ލިއެވެ. މިގަޑީގައި އަބާޔާ ލާން ބޭނުންނުވީ ހަށިގަނޑަށް ވަމުންދިޔަ އުނދަގުލަކުންނެވެ.

ސުމާ ސައިކަލާއި ދިމާލަށް ދިޔައީ މާޒިން ސައިކަލަށް އަރާނީކަމަށް ހީކޮށެވެ. ނަމަވެސް އޭނާގެ ހިތްމޮޅުކަމުން ގޮސް އެރީ ކާރަށެވެ. ސުމާ ރުޅިގަދަވެފައި ހުރުމުން މާޒިން ކުރާ ކޮންމެކަމަށް ފާޑުކިޔަމުންދިޔައެވެ. އެއްޗެއް ނުބުނެ އޭނާ އައިސް އިށީނެވެ. “ޖޮބްއަށް ނުދިޔަސް ތީވެސް ޑޮކްޓަރެއް ވިއްޔަ، ތިވަރަށް ފޫހިވާންޖެހޭތަ ދެން ޑޮކްއަށް ދައްކަންވީމަ؟” މާޒިން ހިނިއައިއްސާ އެހިއެވެ. ސުމާ މާޒިން އާއި ދިމާލަށް ލޯ އަޅާލަމުން ސީޓްގައި ލެނގިލީ އެ ކާރު ދުއްވާލުމުންނެވެ. އެހެން ދުވަސްދުވަހާއި ހިލާފަށް ކާރު ދުއްވާގޮތުންވެސް އޭނާ ގެ ބޮލުގައި ރިއްސައިގަތެވެ. އެހެންވެ ލޯ މަރައިގެން އޭނާ އޮތީއެވެ.

ހޮސްޕިޓަލަށް ގޮސް އެތަށް އިރަކު ތިބުމަށްފަހު އެމީހުންނަށް ޑޮކްޓަރަށް ދެއްކޭ ގޮތްވިއެވެ. ޓެސްޓްތަކެއް ހަދަންޖެހުމުން ސުމާ އިތުރަށް ރުޅިއައެވެ. ނަމަވެސް މާޒިން އާއި ހެދި އެކަންތަށްވެސް ކުރަންޖެހުނީއެވެ. ރިޕޯޓު މާދަމާ ލިބޭނެކަމަށް ބުނުމުން މާޒިންއާއި ސުމާ ދާން ހިނގައިގަތެވެ. އޭނާގެ މޫނަށް ބަލައިލާފައިވެސް ހުރީ ރުޅިއައިއްސާކަން މާޒިންއަށް އިނގުމުން އިތުރަށް އުނދަގޫ ކުރަން ބޭނުންނުވީއެވެ. ދިޔަމަގުމަތީ އޭޑީކޭގެ ބައެއް މުވައްޒަފުންނާއި ދިމާވެ އެމީހުން ސުމާމެންނާއި ވާހަކަދެއްކިއެވެ. ސުމާ ވެސް ވާހަކަދައްކާހެދީ ފޭކް ހިނިތުންވުމަކާއި އެކުގައެވެ. .

ކާރުގެ ސީޓްގައި އިށީނދެފައި ސުމާ “އަރގްގްގްގް” އޭ ކިޔާފައި ދެއަތް މުއްކަވާލިއެވެ. މިހުރިހާއިރު އޭނާ ހުރީ ވަރަށް ކެތްކޮށްލައިގެންނެވެ. މާޒިން ހިނިގަނޑުމަތަ ކޮށްލީ ވަރަށްހާލުންނެވެ. ހޭކަން އިނގިއްޖެއްޔާ އޭނާ ނޮޅާ ކައިވެސް ލާފާނެއެވެ. “ހާދަ ފޫހިވެޔޭ.. މިތަނުން އަދި ކިރިޔާ ކަމެއްވިޔަސް ޓެސްޓެއް ހަދައިގެން ނޫނީ އެއްޗެއް އިނގޭ ބައެއް ނޭނގޭނެ.. ބަލާބަލަ އަތަށް ކުރިވަރު..” ސުމާ އަތަށް ބަލަހައްޓައިގެން އިނދެ ބުންޏެވެ. އަތް ވަނީ އޮޅަބުއްޓާއި ހަމާއަށް އޮޅާލެވިފައެވެ. އޭރު އަތުގައި މަލަންކޮޅެއް އިނެވެ. އޭނާގެ އަތުގެ ދެތަނަކަށް އިންޖިކްޝަންޖަހަން ޖެހުނީ ފުރަތަމަ ތަނަށް ޖަހައިގެން ލޭ ނުނެގެވުމުންނެވެ. ދެވަނަ ތަނަށް ޖަހާއިރަށް އުޅުނީ ލޭ މަނާނުވެގެންނެވެ. ސުމާ ހައްތަހާވެސް ރުޅި އަންނަ ކަންތަކެވެ. “އާދަޔާ ހިލާފް ވީމަ ވާނީ އެހެނެއްނު… ފުރަތަމަ ތަނުން ލެއެއް ނައި…ދެވަނަތަނުން ލޭ މަނައެއް ނުވި… އެހެންވެ އޭ ބުނަނީ މަގޭ ޖާނުގަނޑަކީ ވަން އިން އަ މިލިއަން އޭ..” ހިނިގަނޑަކާއި އެކު މާޒިން އަށް އެހެން ބުނެލެވުނެވެ. “ވަރަށް މަޖައެއްނު…” ސުމާ ބުނެފައި ލޯގަނޑުން ބޭރަށް ނަޒަރު ހިންގާލިއެވެ. ހިތާހިތުން މިއަދު މާ ރުޅި އައިސްގެން މިއުޅެނީ ކީއްވެތޯ އަހާލެވުނީ މީ އެހެންޏާ އޭނާ އުޅޭ ގޮތަކަށް ނުވީމައެވެ.

ސިގްނަލް އަށް ހުއްޓާ ކޮންމެ ފަހަރަކު މާޒިން ސުމާ އިތުރަށް ރުޅި އަރުވާލަން ބޭނުންވާތީ ގައިގާ ކޮއްޓާލައެވެ. ނުވަތަ ބުރުގަލަށް ދަމާލައެވެ. ސުމާ ކޮންމެފަހަރަކުވެސް މާޒިންގެ އަތް ފޮޅާލަނީއެވެ. “ސުމްކޮޅު ހާދަލޯބިއޭ ރުޅިއައީމަ އެހެންވެ ކަމެއް ނުކޮށް ނީނދެވެނީ.. ސޮރީ އިނގޭ..” ފެހި ސިގްނަލްއާއި އެކު ކާރު ދުއްވާލަމުން މާޒިން ބުނީ އިތުރަށް އޭނާ ރުޅި ނާރުވާންވެގެންނެވެ.. “ތިނޫންވަރެއް ނުވެއެއްނު.. ރުޅި ނާރުވާ ވަގުތެއް ދޭތަ..” ސުމާ އެހެން ބުނުމުން މާޒިންއަށް ވީ އިތުރަށް މަޖަލެވެ. އެ އެއްލާ ބަސްތަކުން އަންނަނީ ހިންޏެވެ. ކާރު ގޭ ދޮރުމައްޗަށް ހުއްޓިކަމެއް ނޭނގެ ސުމާ ދޮރު ބަންކިޔާފައި ޖެހި އަޑުއިވުނެވެ. އެ ދިމާ ބަލައިލިއިރު އޭނާ ގެއަށް ވަދެގެން އެހެރަ ދިޔައީއެވެ. މާޒިން ކާރު ޕާކްކޮށްލުމަށް ފަހު އެތެރެއަށް ވަތް އިރު ޝަރުމީލާ ހުރީ ރުޅިއައިއްސާ ދިޔަ ސުމާއާއި ދިމާ ބަލަހައްޓައިގެންނެވެ. “ކިހިނެއްވީ؟ ޑޮކްޓަރު ކީކޭ ބުނީ؟” ކަންބޮޑުވެލާފައި ޝަރުމީލާ އެހިއެވެ. “ޓެސްޓް ތަކެއް ހެދީ…. މާދަން ނަތީޖާ ލިބޭނެ.. ޑޮކްއަށް ދެއްކީމަޔާއި ލޭ ނަގަންޖެހުނުލެއް ގިނަކަމުން ރުޅިއައިއްސަ އެ ހުރީ…” މާޒިން ހެމުން ހެމުން އެހެން ބުނެފައި މައްޗަށް އެރިއެވެ. ޝަރުމީލާވެސް ހޭންފެށިއެވެ. އޭނާ އެންމެ އުފާވަނީ މިގޭ އެކަކުވެސް އޭނާ ނޯކަރެއްގެ ގޮތުގައި ނުދެކޭތީއެވެ. އޭނާއާއި ވެސް ވާހަކަތަށް ހިއްސާކޮށް އެކުވެރިކަން ބާއްވާތިއެވެ. އަދި އިހްތިރާމްވެސް ކުރާތީއެވެ.

މާޒިން ކޮޓަރިއަށް ދިޔައިރު ސުމާ ބުރުގާ އެނދުމައްޗަށް އެއްލާލާފައި ބަންޑުން ގޮސް އޮވެއްޖެއެވެ. އެހެންއޮވެ އެ ފަން ބޮލުގައި އައްސާލެވިފައިވާ ވޫލުކޮޅުވެސް ނައްޓުވާލާ ހޫރާލިއެވެ. އެ އިސްތަށިކޮޅު ރީތިގޮތަކަށް ނަށާލިއެވެ. މާޒިން އައިސް ސުމާގެ އިސްތަށިގަނޑާއި ކުޅެންފެށިއެވެ. “ބޭބީ…. ދެން އެހާ ރުޅި ނާދެބަ.. ސިކުނޑިއަށްވެސް އަރާމެއް ދޭންވާނެއެއްނު ދޯ… ތިހެން ރުޅި އައީމަ ޔާއިންއަށް ދަސްވާނެއެއްނު..” މާޒިން އެހެން ބުނުމުންވެސް ސުމާ އެ އޮތްގޮތަށް އޮތީއެވެ. ހޮޑުލެވުމާއި ހޮސްޕިޓަލުގައި ދިމާވި ކަންތަކުގެ ސަބަބުން އޭނާ މޫޑް ހުރީ ގޯސްވެފައެވެ. ހީވަނީ އަދިވެސް ހޮޑު ލެވެން އުޅެވޭހެންނެވެ. މާޒިން ސުމާ އަނބުރާލިއެވެ. ލުއި ފަތެއް އަނބުރާލިހާ ފަސޭހައިން އޭނާ އަނބުރާލެވުނެވެ.

ސުމާގެ އަތުން ލޭނެގި ހިސާބު ހުރީ ކުޑަކޮށް ދުޅަވެފައެވެ. މާޒިން މަޑުމަޑުން އަތުގައި ފިރުމާލިއެވެ. އަދި ސުމާގެ ނިތުގައި ބޮސްދިނެވެ. “އިނގޭ ދޯ ވަރަށް ލޯބިވާކަން؟” މާޒިން ބޭނުންވީ ސުމާގެ ރުޅި މަޑުކުރާށެވެ. ސުމާ ބޯޖަހާލިއެވެ. “އެހެންވީމަ، ލަވް ބަލިވީމަ ކިހާ ހާސްވާނެ، ބޭނުމެއް ނުވެޔޭ ދެންފަހަރަކުން ވެސް އެނބުރުން އަރައިގެން ވެއްޓޭކަށް..  އެވަގުތު އަހަރެން ކައިރި ނެތިއްޔާ ކާކު ހޭންޑްލް ކުރާނީ…. އެހެން ހިތަށް އެރިޔަސް އެބަ ހިތް ބިރުގަނޭ… މިހާރު ކިތަންމެ ކުޑަކަމެއްވިޔަސް ޑޮކްއަށް ދައްކަންޖެހެނީ ކުދި ކަންތަކުން ބޮޑެތި ކަންތަކަށް ބަދަލުވާއިރުވެސް އަމިއްލަ ނަފްސަށް ނޭނގޭތީ.. އެ ކުދި ކަންތަކީވެސް ތިމާގެ ފުރާނައަށްވެސް ގެއްލުން ވެދާނެކަމެއްކަމަށް މީހުން ގަބޫލެއްނުކުރޭ… އެހެންނު؟ ބޭބީ ޑޮކްއަކަށް ވެފައި އެ ހުރިހާ އެއްޗެއް އިނގޭއިރު އެކަންވެސް ގަބޫލުކުރަން ޖެހޭނެއެއްނު.. ނޫންތަ؟” މާޒިން ވަރަށް ލޯބިން ވިސްނައިދިނެވެ. ސުމާ އެ ހުރިހާ ކަމެއްވެސް ގަބޫލުކުރެވެއެވެ. ނަމަވެސް ރުޅި އާދެވުނީ ކީއްވެކަމެއް ނޭނގެއެވެ. ބަލިވީމާ އޭނާ އޮޓޯއިން ރުޅި ގަނޑު މައްޗަށް ދަނީބާއެވެ. ސުމާ މާޒިންގެ އަތަށް ބާރުކޮށްލިއެވެ. “އިނގެޔޭ ޒިން…. އެކަމްވެސް…..” ސުމާ އިތުރަށް އެއްޗެއް ނުބުނެ މާޒިންގެ އަތުގައި ބައްދާލަމުން ލޯ މެރިއެވެ.. މާޒިން ސުމާގެ ބޮލުގައި ފިރުމާލަ ފިރުމާލަ އިނެވެ. އޭނާވެސް ހިސާބަކަށް ހިތްހަމަނުޖެހުނެވެ. އޭނާގެ ލޯބިވާ ސުމާގެ އަތަށް އެމީހުން އިންޖެކްޝަން ކޮށްޕާލިތަން ބަލަން އޭނާއަށްވެސް އުނދަގޫވިއެވެ. ނަމަވެސް އެއީ ތިމާއަށް ވާ ކަންތަށް ދެނެގަންނަންތާއެވެ.

ކުއްލިއަކަށް އޭނާ ސިހުނީ ދޮރުގައި ޓަކި ޖަހާލިއަޑަށެވެ. ސުމާވެސް މަޑު މަޑުން ލޯ ހުޅުވާލިއެވެ. މާޒިން އަތުން ސުމާ ދޫކޮށްލުމުން އޭނާ ގޮސް ދޮރު ހުޅުވާލިއިރު ހިނިތުންވެލާފައި ހުރި ޔާއިން ފެނި މާޒިންގެ ހިނިތުންވުންވެސް ފުޅާވިއެވެ. “ކޮބާ މާމަ؟” މާރިޔާ ފެންނަން ނެތުމުން މާޒިން އެހިއެވެ. “މާމަ ނަމާދުކުރަން ދިޔައީ…” އެތެރެއަށް ވަންނަމުން ޔާއިން ބުންޏެވެ.

މާޒިން ޔާއިންގެ ކޮނޑުގައި އަޅުވާފައި އިން ދަބަސް ނަގައި ކަބަޑުމަތީ ބެހެއްޓިއެވެ.”މަންމީ…” ސުމާ ފެނިފައި ޔާއިން އެ ދިމާލަށް ދިޔައީ ދުވެފައެވެ. އިސްޓާކީނަށް އަރާހުރުމުން އޭނާ ކައްސައިވެސް ނުލީ ކިރިޔާއެވެ. މާޒިން ވަގުތުން ޔާއިން ހިފަހައްޓާފައި ސުމާއާއި ކައިރިކުރިއެވެ. “މަންމި… ކީއްވީ..” ޔާއިން އެހީ އެހެންޏާ ސުމާ އެގޮތަށް ނޯންނާތީއެވެ. ސުމާ ބަލައި ނާންނަ ދުވަހުގައި ވިޔަސް ޔާއިން އަންނަންދެން އިންތިޒާރުގައި ބޭރުގައި ހުރެއެވެ. ލައިގެން ހުރި ސޯއްޓާއި ޔުނީފޯރމު ހުރީ ކުޑަކޮށް ރޫޖެހިފައިކަމުން  މިއަދުވެސް ކުޅިވަރެއް ކުޅުނީކަން ސުމާއަށް އިނގުނެވެ.

“މަންމި ބަލިވީ… ޔާން މިއަދު ބައްޕި އާއި އެކު ދޯ ފެންވަރާނީ..” މާޒިން ބުނެލީ ލޮތްބާއި އެކުގައެވެ. ޔާއިން އާއެކޭ ބުނެލާފައިވެސް ސުމާއާއި ދިމާލަށް ބަލައިލީ ދެރަވެފައެވެ. “މަންމި ރެސްޓް ކުރީމަ އޯކޭ ވާނެ އިނގޭ… ޔާން ބައްޕި އާއި އެކު ހުރިހާ ކަމެއް ކުރާނަމޭ… މަންމި އޮވޭ..” ލޯބިގޮތަކަށް ސުމާގެ ބޮލުގައި ފިރުމާލަމުން ޔާއިން އެހެން ބުންޏެވެ.. ސުމާ އެ މަޑު ކުޑަ އަތްތިލައަށް ބޮސްދިނެވެ. މާޒިން އަވަސްވެލީ ޔާއިން ފެންވަރަން ގެންދާށެވެ. ސުމާ އެނދުގައި އޮތް އިރު ފާހަނަތެރޭ އެދެމީހުން ސަކަރާތް ޖަހާ އަޑު އިވި އޭނާއަށްވެސް ހެވެންފެށުނެވެ. ދޮރުގައި ދެފަހަރު ޓަކި ދިނުމަށްފަހު މާރިޔާ ދޮރު ހުޅުވާލީ ސުމާ ކޮޅަށް ތެދުވެ ތެދުވެ ހުއްޓައެވެ. މާރިޔާ ހުޅުވާލުމުން ސުމާ އަނެއްކާވެސް އޮށޯތެވެ. އޭރު ފާހަނަތެރޭ ދެބަފައިންގެ ސަކަރާތުގެ އަޑު އިވި މާރިޔާ އެދިމާ ބަލައިލިއެވެ. “ދަރިފުޅު މިހާރު ރަނގަޅުތަ؟ އެއްޗެއް ކައިފިންތަ ފަހުން؟” މާރިޔާ އެހިއެވެ. “ކެއިން އެކަމް ކިރު ތަށި ބޯލާއިރަށް ހޮޑުލެވުނީ ދެން އެނބުރުންވެސް އެރީ ހޮޑުލެވިގެން ބަނޑު ހުސްވީވަރުން.. މާޒިން ޑޮކްޓަރަށް ދައްކަން ދިޔައީމަ މިއޮތީ އެމީހުން ކުރިވަރު… ދެތަނަށް ޖެހި..” ސުމާ ޝަކުވާކުރިއެވެ. މާރިޔާ ދެރަވިނަމަވެސް އޭނާވެސް އެއީ ކޮންމެހެން ކުރަންޖެހޭނެ ކަމެއްކަން ގަބޫލުކުރިއެވެ. “ހިނގާ ތަންކޮޅެއް ވަރުޖެހޭނެ އެއްޗެއް ކާލަން… ދަރިފުޅު މިހާރު މާ ކެއުމަށް ފަރުވާކުޑަކަން މަންމައަށް ފާހަގަކުރެވޭ… އަނެއްކާ މިދުވަސްކޮޅު  ވަރުގަދަ ހުމެއްވެސް އެބައުޅޭ…. ޔާއިންވެސް ބޭރަށް ގިނައިން ނުގެންދަންވީ… މާހާ ގޭ ކައިރި ހުރި މަންމަ ރައްޓެއްސަކާއި ދިމާވެގެން އޭނާ ބުނި އޭނާގެ ދަރިފުޅަށްވެސް ހުން އައިސް ހޮޑުލެވޭތީ އޭ އުޅެނީ… އޮންނަނީ އަބަދު ވާތާވެފައޭ… ބަނޑަށް އެއްޗެއް ލެވޭއިރަށް ހޮޑޭލަނޭ… ދަރިފުޅު ހުމެއް ނާދޭތަ؟” މާރިޔާ އެހެން ބުނެފައި ސުމާގެ ނިތުގައި އަތް ޖައްސާލި ނަމަވެސް އޭނާގެ ހުން ނެތްކަން އިނގި އަތް ނެގިއެވެ.