ހިތް އެކީ ދެވިިއްޖޭ.. 10

7 އަހަރު ފަސް….

“ކިއާ ދަރިފުޅާ….. ބައްޕަ ވަރަށް އުފާވެއްޖެ.. ވަރަށް ވަރަށް އުފާވެއްޖެ… ރަނގަޅު ނަތީޖާއަކާއި އެކު ދަރިފުޅު މި ކޮލެޖްއިންވެސް އެއްވަނަ ލިބުމަކީ މި ބައްޕަ ކިހާ އުފާވާނެކަމެއް ކަން ދަރިފުޅަށް އަންދާޒާވެސް ކޮށްނުލެވޭނެ… ހެއްދެވި ފަރާތަށް ހަމްދުހުރި ” ފަތުހީ ކުރިމަތީ ހުރި ކިއާރާ ގައިގާ ބައްދާލަމުން ބުނެލީ ކަރުނުން ފުރިފައިހުރިހާލުގައެވެ. އެ ކަރުނަތަށް ރަމްޒުކޮށްދެނީ އެ ބައްޕަގެ އުފާވެރިކަމެވެ. ދަރިފުޅާއި މެދު ވެވުނު ފަހުރެވެ. ކިއާރާ އޭނާގެ ކޮލެޖް ގެ ދުވަސްތަށް ނިންމާލީއެވެ. އެ ރީތި ތުންފަތުގައި ވަނީ ހިނިތުންވުމެކެވެ. މޫނުމަތީ ވަނީ އުފާވެރިކަމެވެ. ދެލޮލުގައި ވަނީ އުފާވެރިކަމުގެ ކަރުނައެވެ. އޭނާ ބިޒްނަސްގެ ދާއިރާއިން މަތީ ފާސްހޯދީ އޭނާގެ ހުވަފެންތަށް ސީދާކުރަމުންނެވެ. ހުވަފެންތަށް ސީދާވުމުން އުފާނުވާނީ ވަކި ކާކުހެއްޔެވެ؟

“ހޭ ކިޓީ.. ކޮންގްރޭޓްސް.. އަންކަލް.. ހޭއި.. ކޮންގްރޭޓްސް..” ކިއާރާގެ އެކުވެރިއަކު އޭނާގެ ގައިގާ ބައްދާލަމުން ބުނެލިއެވެ. އަދި ފަތުހީއާއި ސަލާމްކޮށްލިއެވެ. ދެތިން އެކުވެރިން އައިސް ކިއާރާއާއި ބައްދަލުކޮށް މަރުހަބާ ކިއެވެ. “އަންކަލް ޔޫ ވިލް ސްޓޭ ހިއަރ އޯރ ގޮއިން ބެކް ޓު މޯލްޑިވެސް..؟” ކުއްޖަކު ވާހަކައިގެ ތެރެއިން ބުނެލިއެވެ. ކިއާރާގެ ހިނިތުންވުން ފަނޑުވިއެވެ. ފަތުހީއާއި ދިމާލަށް ބަލައިލެވުނެވެ. ފަތުހީއަށްވެސް ވީ އެގޮތެވެ. “އިޓްސް އަޕް ޓު ހާރ..” ފަތުހީ ބުނެލީ ކިއާރާގެ ކޮނޑުގައި އަތް އަޅުވާލަމުންނެވެ. އެއަށްފަހު އެންމެންނާއި އަލްވަދާއު ކިޔާފައި އޭނާ ހޯލުން ނުކުމެގެން ދިޔައީ ކިއާރާ ގޮވައިގެންނެވެ. ކިއާރާ ގެ މޫނުމަތިން ފެނުނީ ހިތާމައެވެ. އޭނާގެ ދެލޯ ކަރުނުން މިފަހަރު ފުރުނީ އުފަލުންނެއްނޫނެވެ. ކަޅު މާޒީގެ ސަބަބުންނެވެ. ނަމަވެސް ކައިރި ހުރި ފަތުހީ ކިއާރާގެ ކޮނޑަށް ބާރުކޮށްލީ ހިތްވަރެއް ދިންފަދަ ގޮތަކަށެވެ. ޕާކްކޮށްފައި ހުރިތަނުން ކާރަކަށް ގޮސް ފަތުހީއަރާލިއެވެ. ކިއާރާ ޖެހިގެން ހުރި ސީޓްގައި އިށީނދެލަމުން އަޅައިފާ ހުރި ކަޅު ކޯޓާއި ޝޭޝް ބާލާ ބޮލުގައި އިން ހެޓްވެސް ނެގިއެވެ. އަދި ބެކްސީޓަށް ލިއެވެ. ފަތުހީ ކާރު ސްޓާރޓްކޮށްލިއެވެ. ކިއަރާ ފުން ނޭވައެއް ދޫކޮށްލިއެވެ. “ޑޭޑް…. އާރ ވީ ގޮއިން ބެކް؟؟” ކިއާރާ ބުނެލިއެވެ. އަޑުގައިވަނީ ހިތާމައެވެ.

“ކިއާ ދަރިފުޅާ… ވީ ޝުޑް ގޯ ބެކް…. އެ ގައުމަކީ އުފަންވި ގައުމު… ބޭރު ތަންތަނުގައި ކިޔަވައި ނިމުނަސް އެ ތަނުގައި ހިދުމަތްކުރަންޖެހޭނެ… އެއީ ދިވެހިންގެ ބިން…. މިތާ އުޅުނެއްކަމަކު މެލޭޝިއަނުންނަކަށް ނުވެއެއްނު ދޯ… އެކަމް އިޓްސް އަޕް ޓު ޔޫ.. ދަރިފުޅު ބޭނުންނޫންނަމަ ނުދާނަން… އެކަމް ކިއާ… ހަޤީޤަތާ ކޮންމެވެސް އެއްދުވަހަކުން ކުރިމަތި ލާންޖެހޭނެ.. އެ ދިރިއުޅުމާއި ދަރިފުޅާއި ގުޅުން ހުރި ހުރިހާ ކަމެއް ބަދަލުވިއެއްކަމަކު ތެދު ނުފޮރުވޭނެކަން އިނގޭނެ ދޯ ދަރިފުޅަށް.. އަދިވެސް ތީ އެމީހުންގެ ދަރިފުޅުކަން ހަނދާން ނައްތާނުލާތި…..” ފަތުހީ ބުނެލިއެވެ. އޭނާގެ ނަޒަރު ހުރީ ކުރިމަތިން ފެންނަ މަގުމައްޗަށެވެ. ކިއާރާ ލޮލުގެ ހިމަކޮޅުން ވެއްޓުނު ކަރުނަތިކި ފޮހެލިއެވެ. “ޑޭޑް އަމް ނޮޓް ދެޓް ގާލް އެނީމޯރ… މީ މިހާރު ކިއާރާ…. ކިއާރާ ފަތުހީ… އާލިޔާ އަދުނާން އެއްނޫން… އެ ދިރިއުޅުމަށް އަޅުގަނޑު ދާކަށްވެސް ބޭނުމެއްނޫން.. އަދި އުޅޭކަށްވެސް ނޭދެން…ހަނދާނުން ނުފިލިޔަސް… އެކަމް އަޅުގަނޑު ދާން… ރާއްޖެ ދާން ބޭނުން.. އާލިޔާ އަދުނާންއަށް ވެގެނެއްނޫން.. ކިއާރާ އަށް ވެގެން.. އެ ގައުމަށް ހިދުމަތްކުރަން… އަޅުގަނޑުގެ ބައްޕަ ގޮތަށް އެ ތަނުގެ ހިދުމަތުގައި ނިމިގެން ދިޔުމަށް…އޭރުގެ ދިރިއުޅުމަކީ މިހާރު އަޅުގަނޑާއި ބެހޭ ދިރިއުޅުމެއް ނޫން.. އޭރުގެ އެއްވެސް މީހެއްވެސް އެ އުޅުމެއްވެސް……………………..” ކިއާރާ ބުނެލިއެވެ. އޭނާ މާޒީގެ ސަބަބުން މުސްތަގުބަލް ހަލާކުވާކަށް ނޭދެއެވެ.

“އަޔާން އާއިވެސް؟ ކިއާ… އަޔާން އަކީ ތިހިތުގެ ރާޖާ…އެހެންމީހެއްގެ ހައްޤެއްކަމަކު ބައްޕައަށް އިނގޭ އަޔާން އަށް ޓަކައި މި ވޭތުވެދިޔަ އަހަރު ޖަހާ ވިންދަކަށް ބަދަލެއް ނާންނަކަށް.. ތިއީ އަބަދަށް ބަދަލުވުމެއްނެތި އޮތް ލޯތްބެއްކަން.. ހަމަގައިމުވެސް އަޔާން އާއި ގުޅުން އޮންނާނެކަން ބައްޕައަށް އިނގޭ… އާލިޔާއަށް ވިޔަސް ކިޔާރާއަށްވިޔަސް ތިހިތް ބަދަލެއް ނުވެއެއްނު…” ފަތުހީ ބުނެލި އެއްޗަކުން ކިއާރާ ހިތުގައި އަތްއަޅާލެވުނެވެ. އެއީ ތެދެކެވެ. ނަން ބަދަލުކުރެވިދާނެއެވެ. ހަށިގަނޑުވެސް ބަދަލުކުރެވިދާނެއެވެ. ދިރިއުޅުންވެސް ބަދަލުކުރެވިދާނެއެވެ. އެކަމަކު އެ ހިތުގައި ލިޔެފައިވާ ނަމެއް ބަދަލެއް ނުވާނެއެވެ. ކިއާރާ އަކީ 7 އަހަރުކުރިން ފަތުހީ އޭނާގެ އަމިއްލަ ދަރިއެއް ގޮތުގައި މެލޭޝިޔާއަށް ބަދަލުކުރި އާލިޔާއެވެ. ނަން ބަދަލުކުރީވެސް ހުދު އާލިޔާއެވެ. އެ ދިރިއުޅުމާއި އެއްވެސް ގުޅުމެއް ބާއްވަން އޭނާ ނޭދޭތިއެވެ. ހަމަ އެހެންމެ ބަޔަކު އޭނާ ހޯދަފާނެތީއެވެ. އޭނާ ދެކޭ ކޮންމެ ހުވަފެނަކާއި މުސްތަގުބަލަށް އަޅާ ކޮންމެ ބިންގާއާއި ގުޅިފައިވަނީ އަޔާންއެވެ. އޭނާގެ ހިތުގައި އަބަދުމެ އަބަދަށް ރަސްކަންކުރާ އަދި ކުރާނެ އަޔާންއެވެ. އޭނާ ބިޒްނަސް ދާއިރާއިންވެސް ކުރިއަށް ދިޔައީ އެހެންވެއެވެ. ފަތުހީއަކީ އެކަނިވެރި މީހެކެވެ. އިނދެގެން އެތަށް އަހަރަކު އުޅުމަށްފަހު ވިހެއުމުގެ ތެރެއިން ދަރިފުޅާ އޭނާގެ ލޯބިވާ އަންހެނުން ނިޔާވިއެވެ. އޭގެފަހުން އޭނާ ވޭތުކުރަމުން ދިޔައީ އެކަނިވެރި ދިރިއުޅުމެކެވެ. ހޯދާ ފައިސާ ހަރަދުކުރާނެ މީހެއްނެތެވެ. އޭނާއަށް މީގެ އަހަރުތަކެއް ކުރިން އާލިޔާއާއި ދިމާވުން ވެގެން ދިޔައީ އެ އެކަނިވެރި ދިރިއުޅުން ނެތުނުކަހަލަ ނިއުމަތަކަށެވެ. ހަމައެހެންމެ ލޯބިވާ ދަރިފުޅެއް ލިބުނު ދުވަހެކެވެ. އާލިޔާއަށްވެސް ލޯބިވާ ބައްޕައަކާއި އަޅާލާނެ މީހެއް ލިބުނެވެ. އޭގެފަހުން އޭނާ އަކީ މާޒީއާއި އެއްވެސް ގުޅުމެއްހުރި ކުއްޖެއްނޫނެވެ. އަޔާންފިޔަވައެވެ. އާލިޔާވެސް އަދި އެ ނަންވެސް އެ ދުވަހުން އެދުވަހަށް ފޮހެވުނެވެ. އަދި ހަމަ އެފަދަ ހިތްވަރުގަދަ އޯގާތެރި ކިއާރާއެއް އުފަންވިއެވެ.

“ބައްޕާ އެއްވެސް މީހަކަށް އަޅުގަނޑުމީ ކާކުކަން އެނގޭކަށް ބޭނުމެއްނުވޭ އެކަމް ވަރަށް ހިތްއެދޭ ކިއާރާއަށް ވެގެންވިޔަސް އާލިޔާގެ ދިރިއުޅުން އުޅެލަން…. މިބުނީ އެކަހަލަ ވޭންތަކަކާއި ކުރިމަތި ލާކަށް ނޫން…. މާއި.. އަޔާން… އެއީ އަޅުގަނޑަށް ހެޔޮއެދިން ބައެއް… ކިއާރާއަށް ވެގެންވެސް އެމީހުންނާއި އެކު އުޅެލަން އަޅުގަނޑު ބޭނުން……” ކިއާރާ ބުނެލިއެވެ. “ތިބުނީ ރާއްޖެ ދާނަމޭތަ؟” ފަތުހީ ބުނެލީ ޓްރެފިކްއަށް ކާރު ހުއްޓާލަމުންނެވެ. ކިއާރާ ބޯޖަހާލިއެވެ. ފަތުހީ ހިނިތުންވެލަމުން ލޯބިވާ ދަރިފުޅުގެ ބޮލުގައި ފިރުމާލިއެވެ. “އެކަމް ބައްޕާ….. މީހުންނަށް އަޅުގަނޑު ފެނި މީ އާލިޔާ އިނގިއްޖެއްޔާ.. އަޅުގަނޑު ނޭދެން އެހެންވާކަށް…” ކިއާރާ ބުނެލިއެވެ. “ދަރިފުޅާ އެދުވަހުން އެދުވަހަށް އާލިޔާ ނެތިއްޖެ.. މިހާރު މީ ކިއާރާ.. ރިކޯރޑްގައި ވިޔަސް އެހެން އެއްޗެއްގައިވިޔަސް މިހާރު ނޯންނާނެ ލިޔެފައެއް ކިއާރާއަކީ އާލިޔާ ކަމުގައެއް… އާލިޔާއާއި ކިއަރާއާއި އެއްވެސް ގުޅުމެއް އޮތްކަމެއް… އެހެންވީމަ ޑޯންޓް ވޮރީ… ވައްތަރުވެދާނެ.. އެކަމް މީހަކަށް ހެއްކެއް ދެއްކޭކަށް ނޯންނާނެ… މިހާރު 7 އަހަރު ފާއިތުވީ… މީހަކަށް އާލިޔާއެއް ނޭނގޭނެ….” ފަތުހީ ބުނެލީ ޔަޤީންކަމާއި އެކުގައެވެ. އެއީވެސް ތެދެކެވެ. 7 އަހަރު ފާއިތުވެއްޖެއެވެ. އާލިޔާ އަކީ އުޅުނު މީހެއްކަމުގައިވެސް އެކަކުވެސް ހަނދާނެއް ނުހުންނާއެވެ.

………

އޭގެ ދެތިން ދުވަސްފަހެވެ.

އިންޓަނޭޝަނަލް އެއާރޕޯޓް އިން ކޮނޑުގައި ބެކްޕެކަކާއި ޓްރޯލީއަކަށް ދަބަސްތަކެއް ލައިގެން ނިކުންނަމުން ދިޔަ އަންހެންކުއްޖާއަށް އެންމެންގެ ނަޒަރު ހުއްޓުނެވެ. ހަމުގެ ކުލަ އަލިވެފައި އެހާވެސް އޮމާނެވެ. ފަން ކުރު އިސްތަށިގަނޑު ވަނީ ވަޔާއި ވިހުރެން ހާވާލާފައެވެ. ބޮޑު ދެލޯ ފޮރުވާލެވިފައިވަނީ އައިނަކުންނެވެ. އޭނާގެ މޫނުގައި ރީތި ހިނިތުންވުމެއް ވިއެއްކަމަކު އޭނާ ގެ ހިތް ތެޅެއެވެ. ސިކުނޑީގާއި އެތަކެއް ކަމެއް އެނބުރެމުން ދިޔައެވެ. ކިއާރާ އެއަރޕޯޓުން ފެންނަމުން ދިޔަ ކޮންމެ މީހަކަށް ބަލަމުން ދިޔައީ ދަންނަ މީހެއްތޯއެވެ. އެއިން މީހަކަށް އޭނާ ދަނެދާނެތީއަދިވެސް އޭނާ ބިރުގަނެއެވެ. ކައިރި ހުރި ފަތުހީ ކިއާރާގެ އަތުގައި ހިފައިފާލައިފާ ހާސްނުވާށޭ ބުނީ އޭނާއަށް ކިއާރާއަށް ވާ ގޮތްތަށް އިހްސާސްވާތީއެވެ. ފަތުހީ ހަމަޖެއްސި ލޯންޗް ކައިރި މަޑުކޮށްލުމަށްފަހު ކިއާރާ ސިމް ލައްވައިދިން ފޯނުން ނަމްބަރަކަށް ގުޅާލިއެވެ. “ހަލޯ.. އާނ.. ކައިރިކުރޭ… އޯކޭ..” ފަތުހީ އެހެން ބުނެފައި ފޯނު ކަނޑާލިއެވެ. “ޑޭޑް….. އަޅުގަނޑު ބިރުގަނޭ..” ކިއާރާ ބުނެލިއެވެ.

“ކިއާ… ކީއްކުރަން ބިރުގަންނަންވީކީ.. ބައްޕަނޫނީ ކިއާ ގޯސްކަމެއް ކުރިތަ؟؟” ފަތުހީ އަހާލިއެވެ. އެއަށްފަހު ލޯންޗަށް އަރައިފާ ކިއާރާއަށްވެސް އަތްދިއްކޮށްލިއެވެ. ކިއާރާ އެ އަތުގައި ހިފައިފާ އެތެރެއަށް ވަދެ ފަތުހީ ކައިރި އިށީނދެލިއެވެ. “ގޯސްކަމެއް ނުކުރަމެއްނު ޑޭޑް…އެކަމް…. ޑޭޑް އަށް ޔަޤީންތަ މީހަކަށް ނޭނގޭނެކަން…؟” ކިއާރާ ބުނެލިއެވެ. ފަތުހީ ބޯ ޖަހާލިއެވެ. ކިއާރާ ބިރުގަންނަނީ އޭނާ އެނގިގެން އަލުން އެ ދިރިއުޅުމަށް ދާންޖެހިދާނެތީއެވެ. އެ އަޅާލި ވޭން ހިތަށް އަރުވާލިޔަސް އަދިވެސް އެ ހިތް ތެޅެންފަށައެވެ. ލޯލިތަށް ކޮޅަށްޖެހެއެވެ. ލޯންޗް ނައްޓާލީ އެވަގުތުއެވެ. ކިއާރާ ފެންނަމުން ދިޔަ ރީތި ކަނޑަށް ނަޒަރު ހިންގާލައިގެން އިން އިރު އޭނާގެ އިސްތަށިގަނޑު މަތަނުވެއެވެ. މޫނުމައްޗަށް އިރު އިރުކޮޅާ ވެއްޓެއެވެ. ނިތްކުރިމަތިން އޭނާގެ ބޮޑު ލޯ ފޮރުވޭނެހާ ހަމާލުން ފަށައިގެން ކަންފަތާއި ހަމާއަށް ކޮށާލެވިފައި ހުރި އިސްތަށިކޮޅުތަށް މޫނުމަތީ ތޮޅެ ސަމާސާކުރަމުންދިޔަ ފަދައެވެ. ނަމަވެސް އެއިން އެއްވެސް ފަރުވާލެއްކުރުމެއްނެތި ކިއާރާ އެ އިންގޮތަށް އިނީއެވެ. “ޑޭޑް… މިދަނީ 7 އަހަރުފަހުން…. ޑޭޑް ގެ ބިޒްނަސް ރާއްޖޭގައި ކުރިއަރަމުން ދިޔައެއްކަމަކު އަޅުގަނޑުމެންނަށް ވާނީ އާ ކަމަކަށްނޫންތޯ؟ އަޅުގަނޑު ބޭނުންވަނީ ޑޭޑް ގެ ބިޒްނަސްގައި އުޅެން ހަމަ…. އެކަމް އެތަނާއި މިތަން ތަފާތު ވާނެ ނު..” ކިއާރާ ބުނެލިއެވެ. “އާނ ތަފާތުވާނެ.. ކޮމްޕެޓިޓަރސްވެސް ތަފާތުވާނެ… އެކަމް ބައްޕައަށް އިނގޭ ދަރިފުޅަށް ވާނެކަން ބައްޕައަށް ނުވިޔަސް..” ފަތުހީ ބުނެލިއެވެ. އިރުކޮޅެއް ނުވެ މާލޭގެ ފަޅަށް ލޯންޗް ޖައްސާލިއެވެ. ކިއާރާ ދަބަސް ކޮނޑުގައި އަޅުވާލައިގެން ލޯންޗުން ފޭބިއެވެ. ފުރަތަމައިނުންވެސް އެޅި ފިޔަވަޅާއި އެކު އެ ހިތް ތެޅިގަތެވެ. އެ މާޒީ ކުރިމައްޗަށް ސިފަވިފަދައެވެ. ކިއާރާ އަވަސް ނޭވާތަކެއް ލާންފެށީ އެ ދުވަސްތަށް އަލުން ދެކެން އޭނާ ބޭނުންނުވާތީއެވެ. އަންހެނެއްގެ އެންމެ އަގުހުރި ހަޒާނާ ވަނީ އެމީހުން ކިއާރާ އަތުން ދަމައިގަނެފައެވެ. އަނިޔާދީފައެވެ. އެ ޅަހިތް ކުދި ކުދިކޮށްލާފައެވެ. އޭނާގެ ޅަދުވަސްކޮޅު ހަލާކުކޮށްލާފައެވެ..

ލޯންޗުން ފޭބި ފަތުހީ ކިއާރާގެ ކޮނޑުގައި ހިފަހައްޓާލިއެވެ. ކިއާރާ ސިހިފައި ފަތުހީއަށް ބަލައިލިއެވެ. ފަތުހީ ކުރިއަށް އެޅި ފިޔަވަޅާއި އެކު ކިއާރާވެސް އަޅާލިއެވެ. އޭނާ ގެ ކަޅު މަޒީގައި އެހީވާނެ މީހެއްނެތަސް މިހާރު އެބަހުއްޓެވެ. ކިއާރާ އަޅާލާ ކޮންމެ ފިޔަވަޅާއި އެކު ދެގޮތެއްނުވެ ކައިރި ހުންނާނެ އޯގާތެރިބައްޕައެއް އެބަހުއްޓެވެ. ފަތުހީ ފޯނުން އަނެއްކާވެސް މީހަކަށް ގުޅާލާ އޭނާ ހުރިތަން ބުނެލިއެވެ. ކިއާރާ ފަތުހީގެ ކާރު އަންނަންދެން މަޑުކޮށްލައިގެން ހުރިއިރު ފެންނަމުން ދިޔަ މާލޭގެ އިމާރާތްތަކަށް ބަލައިލިއެވެ. މި އެތަކެއް އަހަރުކުރިން އޭނާ ދޫކުރި މާލެއެކޭ އޭނާއަކަށް ނުބުނެވޭނެއެވެ. އިމާރާތްތަށް ގިނަވެ އުސްވެފައެވެ. ތަރައްޤީވެފައެވެ. ނަމަވެސް މީހުން މަދެއްނުވެއެވެ. އަދިވެސް މަގުތަށް އޮތީ ހަލަބޮލިކޮށެވެ. ކާރު އައިސް އެމީހުންގެ ކުރިމައްޗަށް ހުއްޓި ހޯން އެޅުމާއި އެކު ކިއާރާ ސިހިފައި ކާރަށް ބަލައިލިއެވެ. “ކިއާ ދޭ އަރަން ބައްޕަ ފޮށިތަށް ލާން އުޅޭނަން…” ފަތުހީ ބުނެލިއެވެ. ކިއާރާ ގޮސް ކާރުގެ ސީޓަށް އަރާލިއެވެ. ނިކުމެގެން ދިޔަ ޑްރައިވަރު ގޮސް ފަތުހީއާއި ބައްދަލުކޮށް ބައްދާލިއެވެ. ކާރަކީ ބޮޑު 7 ސީޓްގެ ކާރެކެވެ. ޑިކީއަށް ނުލެވުނު ލަގެޖްތަށް ފަހަތު ސީޓަށް އަރާ ފުރާލިއެވެ. އެއަށްފަހު ފަތުހީވެސް އައިސް ކުރީ ސީޓަށް އަރާލިއެވެ. “ސަރ.. އަޅުގަނޑު އުފާވަނީ ސަރ އައީމަ ސަރ ގެ ދަރިފުޅު ގޮވައިގެން..” ޑްރައިވަރު ބުނެލިއެވެ. އޭނާ ބުނިގޮތުން ކިއާރާއަށް ހެވުނެވެ. މިއަދަށްފަހު އޭނާ އުޅެންޖެހޭނީ ދިވެހި ދަންނަ މީހުންގެ ތެރޭގައެވެ. މެލޭޝިއާގައި ދިވެހިން އުޅުނެއްކަމަކު ގިނައިން ފެންނަނީ ބޭރުކުދިންތާއެވެ. ވަށާލެވިފައިވަނީ ބޭރުކުދިންނާއިގެންނެވެ. އެހެންކަމުން އޭނާއަށް ބޮޑަށް އާދަވެފައި ވަނީ އެމީހުންގެ ތެރޭ އުޅޭށެވެ. ދިވެހިން ވާހަކަދައްކާ ހަދާ މީހުން ފެނުމުން ކިހާ ތަފާތު އިހްސާސްއެއްވާނެހެއްޔެވެ؟

ކިއާރާ ލޯގަނޑުން ފެންނަމުން ދިޔަ މާލޭގެ މަގުތަކަށް ބަލައިލިއެވެ. ހިނގާފައި ދާ މީހުންނަށް ބަލައިލައެވެ. އެނާ ލޯހޯދަމުން ދިޔައީ އެންމެ ފަރާތަކަށެވެ. އެންމެންގެ މޫނުމަތިން ހޯދަމުން ދިޔައީ އެންމެ ސޫރައެކެވެ. އެކަމް މިއޮށް ބޮޑު މާލޭން އޭނާ ފެނިދާނެބާއެވެ؟ މިހާރު ހުންނާނީ ކިހިނެއްބާއެވެ؟ އޭނާ ހަނދާންވާނެބާއެވެ. “އާލިޔާ” އަކީ ކާކުކަން ހަނދާންހުންނާނެބާއެވެ؟ މައިޝާ ވެސް މިހާރު ވާނީ 22 އަހަރެވެ. އޭނާވެސް ބޮޑުވާނެއެވެ. މައިޝާ އޭނާ މަތިން ހަނދާންނެތޭނެބާއެވެ؟ ސައީދާ އޭނާ ހޯދާނެބާއެވެ.

އެތަކެއް ހިޔާލުތަކަކުން ފުނިޖެހެމުން ދިޔަ ކިއާރާ ގެ ސިކުނޑި ހަމަޔަކަށް އެޅެވުނީ އިވެމުން ދިޔަ ރީތި ލަވައެއްގެ ސަބަބުންނެވެ.

” އެވްރީ ނައިޓް އިން މައި ޑްރީމްސް.. އައި ސީ ޔޫ..

އައި ފީލް ޔޫ…. ދެޓްސް ހައު އައި ނޯ ޔޫ.. ގޯ އޮން….

ފާރ އެކްރޮސް ދި ޑިސްޓޭންސް… އެން ސްޕޭސަސް ބިޓްވީން ޔޫ…” އެ ލަވައަށް ގެއްލިފައި އިން ކިއާރާ ސިހުނީ ކާރު ކުއްލިއަކަށް މަޑުކޮށްލުމުންނެވެ. ކިއާރާ ކުޑަކޮށް ކުރިއަށް ދިޔައެވެ. ނަމަވެސް ހަމަޖެހިލިއެވެ. ގެއަށް އާދެވުނީކަންނޭނގެއެވެ. ފަތުހީ ނިކުމެފައި ލަގެޖްތަށް ނެރުމުގައި އުޅުނެވެ. ކިއާރާ ކާރުން ފޭބީ ކައިރި އޮތް ބެކްޕެކް ކޮނޑުގައި އަޅުވާލަމުންނެވެ. މިއީ މީގެ އަހަރުތަކެއް ކުރިން އޭނާ އަށް ހިމާޔަތްކަން ދިން ގެއެވެ. ނަމަވެސް މިހާރު އެ ގެ ވަނީ ބަދަލުވެފައެވެ. އެތަށް ގޮތަކަށެވެ. ރީތިގޮތަކަށް ބޭރު ޑިސައިންކުރެވިފައެވެ. ދެބުރިއަށް ހުރިއެއްކަމަކު ކިތަންމެހާވެސް ރީއްޗެވެ. އެއްފަޅީގައި ބޮޑު ގަރާޖެއް އޮތެވެ. އެތެރޭގައި ދެތިން ކާރު ވެއްދޭނެ ޖާގަ އޮންނާނެއެވެ. އޭނާ ވަދެގެން އައި ބޮޑު ގޭޓް ފެނުނީ ދެނެވެ. ގޭޓުން އެތެރެއަށް  ކާރު އަންނަން އޮތް ތަނުގައި އޮތީ ތާރު އަޅާފައެވެ. ތާރުގެ ބޭރުގައި ވަނީ ފެހި ވިނައެވެ. އެ ފެންނަލެއް ވަރަށް ހިތްގައިމެވެ. ވިނަ ތަކުގެ ތެރެއިން ފަޅާފައި ހުރި ކުދި ކުދި މާތަށް ހުއްޓެވެ. ގުދުރަތުން ފުރިފައިވާ ރީތި މަންޒަރެކެވެ.

ކިއާރާ މުޅިގެއަށް ނަޒަރު ހިންގާލީ އެނބުރިލަމުންނެވެ. “ވާއު ޑޭޑީ… ހީވަނީ މެލޭގައި އުޅުނު ގެ ހެން ހަމަ…. އެކަމް  މި ނޭޗަރ އައި އަޅައެއްނުކިޔޭނެ..” ކިއާރާ ބުނެލިއެވެ. ފަތުހީ ދަބަސްތަށް ހިފަހައްޓައިގެން ހުރެ ހިނިތުންވުމެއް ދިނެވެ. ފަސްވަރަކަށް ސިޑި ބައްރިއަކަށް އަރައިގެން ވަދެވެން ހުރި ގޭގެ ބޮޑު ދޮރަށް ކިއާރާ ބަލައިލިއެވެ. އެ ދޮރު ކައިރި ދެތިން ބޭރު މީހަކު ތިއްބެވެ. އެއީ އެގޭގައި މަސައްކަތްކުރާ މީހުންނެވެ. ކިއާރާ ހިތްހެޔޮކަމާއި އެކު އެމީހުންނާއި ކައިރިވެލިއެވެ. “ހައި.. އަމް ކިއާރާ..” ސަލާމަށް އަތް ދިއްކޮށްލަމުން ކިއާރާ ބުނެލިއެވެ. މެލޭޝިޔާގައިވެސް ގެންގުޅުނު މަސައްކަތްކުރާ މީހުންނާއި ކިއާރާއާއި އޮންނަނީ އެކުވެރިކަމެވެ. ކިއާރާއަކީ  ވެރިއަކަށްވުރެ އެކުވެރިއެކޭ އެމީހުން އަބަދުވެސް ބުނެއެވެ. ފޮށިތަށް ވެއްދުމުގައި އުޅުނު ފަތުހީއަށް އެ މަންޒަރު ފެނި ހިނިތުންވެވުނެވެ. “ހައި މޭމް… އަމް ޝާލީ… އަމް ދަ ހެޑް އޮފް ދެމް…” ޝާލީ ކިއާރާއާއި ސަލާމްކޮށްލަމުން ބުނެލިއެވެ. “އޯހް.. ކޫލް ހެލޯ.. އެން ޓެލް މީ ޔުއަރ ނޭމް….؟” ކިއާރާ ދެން ތިބި ދެ އަންހެނުންނަށް އިޝާރާތްކޮށްލިއެވެ. އެ ތިންމީހުންގެވެސް ހަމުގެ ކުލަ އަލިވެފައި އިސްތަށިގަނޑުގައިވަނީ ރަންކުލައެވެ.

އަމް ޖެސިކާ…” ޖެސިކާ ކިއާރާއާއި ސަލާމްކޮށްލިއެވެ. ކިއާރާ ހިނިތުންވެލިއެވެ. “އަމް ރޯސް..” ރޯސް ތައާރަފްވެލިއެވެ. “ނައިސް ޓު މީޓް ޔޫ ގައިސް… ޔޫ ނޯ ދިވެހި؟” ކިއާރާ ބުނެލިއެވެ. “ކުޑަ އިނގެނީ.. އަންޑަސްޓޭންޑްވަނީ.. ކާންޓް ޓޯކް ވެލް” ޖެސިކާ ބުނެލީ ހެމުން ހެމުންނެވެ. ކިއާރާވެސް ހޭންފެށިއެވެ. “އައި ލަވް ޓު މޭކް ނިކްނޭމްސް ސޯ އައި ވަނަ މޭކް ފޯ ޔޫ ތްރީ…” ކިއަރާ ބުނެފައި ވިސްނަންފެށިއެވެ. އެ ތިން މީހުންގެ މޫނުމަތިން ފެންނަނީ އުފާވެރިކަމެވެ. އެހާ ގާތް ކުއްޖަކު ވެރިއަކަށް ހުރެވުނީމައެވެ. “ކިއާ އާދޭ އެތެރެއަށް..” ފަތުހީ ފަހު ފޮށި ވައްދަމުން ބުނެލިއެވެ. “ލައްބަ ޑޭޑް އެބަ ދަން..” ކިއާރާ އެހެން ބުނެލިއެވެ.

“އަމް  ޝާލް…. ޖެސީ.. އެން ރޯސް.. ޔޫ ޑޯންޓް ނީޑް އެނީ ނިއު ނޭމް… އިޓްސް ޝޯރޓް އެން އީސީ..” ކިއާރާ ބުނެލިއެވެ. އެއަށްފަހު ހެމުން ހެތެރެއަށްވަދެލިއެވެ. އެ ތިން މީހުންވެސް ބޮޑު ދޮރު ލައްޕަމުން އެތެރެއަށް ވަދެލިއެވެ.

“ކިއާ.. އާދޭ ކޮޓަރި ދައްކާނަން..” މައްޗަށް އަރާލަމުން ފަތުހީ ބުނެލިއެވެ. ކިއާރާ އެ ބޮޑު ސިޓިންގް ރޫމްއަށް ބަލައިލިއެވެ. ބޮޑު ސޯފާ ސެޓެކެވެ. ބޮޑު ޓީވީއެކެވެ. ތަނބުތަކެއް އެއްފަޅީގައި ހުރުމުން ވަރަށް ޝާހީގޮތެއް ދައްކާލައެވެ. ސިޑީގައިވެސް ވަނީ ކާޕެޓެއް އަޅާފައެވެ. ކިއާރާ ސިޑިން އަރައިގެން ދިޔައެވެ. “ޖަމީލް ގެންނާނެ ކިއާ ގެ ފޮށިތަށް އިރުކޮޅަކުން އިނގޭ..” ފަތުހީ ބުނެލިއެވެ. އެއަށްފަހު ކޮޓަރިއެއް ކުރިމައްޗަށް ހުއްޓުނެވެ. އެ ދޮރު ހުޅުވާލުމާއި އެކު ކިއާރާއަށް އަނގަ ހުޅުވާލެވުނެވެ. ފިޔާތޮށިކުލައިން ޖަރީކުރެވިފައިވާ އެ ކޮޓަރީގައި ނެތް އެއްޗެއް ނެތެވެ. ކުޑަ ސޯފާ ސެޓެއް އެބަ ހުއްޓެވެ. ފާރުގައި ޓީވީއެއް ހަރުކުރެވިފައި އިނެވެ. ބޮޑު އަލަމާރިއެކެވެ. ވައް ބޮޑު އެނދެކެވެ. ބެލްކަނީ ވަކި ކުރެވިފައިވަނީ އެތެރެ އާއި ބޭރު ފެންނަ  ކުޑަ ދޮރުތަކަކުންނެވެ. އެ ދޮރުތަށް ކިއާރާއަށް ވުރެ ދިގެވެ. ކަބަޑުތަކެއްވެސް ހުއްޓެވެ. ފާހަނަވެސް އެހާ ބޮޑެވެ. ކިއާރާގެ އިސްކޮޅުގެ ބާތު ޓަބެއްވެސް އޮތެވެ. “ޑެޑީ.. ވާއު..ތެންކިޔޫ…..” ކިއާރާ ފެންކަޅިވެފައި ހުރި ހާލު ފަތުހީގައިގާ ބައްދާލިއެވެ. މިއީ އޭނާ އަބަދުވެސް ހުވަފެނުން ދުއް ކަހަލަ ކޮޓަރިއެކެވެ. މެލޭޝިޔާގައި ހުރި ގޭވަނީ ކުރީގައިވެސް ފަރުނީޗަރުތަށް ލާ ނިންމާފައި ކަމުން އެތަން ކިއާރާ އެދޭފަދަ ގޮތަކަށް ބަދަލުނުކުރެވުނެވެ. ބަދަލުކުރަންވެސް ބޭނުންނުވީއެވެ.

ނުނިމޭ….