މިހިތުގެ ފަސާނާ 25

އެތައް އިރަކު ފެންމާގަނޑު ދަށުގައި ހުރުމަށްފަހު ފެންވަރާ ތާޒާ ވެލައިގެން ޒީޝާވެސް ބެރަށް ނިކުމެލިއެވެ. ރެސްޓޯރެންޓުން ކައިގެން ޒީޝާ ބޭނުންވީ ބީޗްގައި މަދުކޮށްލުމަށެވެ. މަޑު ހިނގުމެއްގައި ހިނގާފައި ދިޔަ ޒީޝާގެ ކުރިމައްޗައް އެރި މީހަކު ފެނިފައި ހިތް ނުހުއްޓުނީ ހަމަ ކިރިޔާއެވެ. ޒީޝާގެ ކުރިމަތިންކަހަލަ ގޮތަކަށް މައިކަލް ދިޔައީ މިހަކާ ވާހަކަދައްކަމުންނެވެ. ޒީޝާ އަވަސް އަވަހާ އެތާހުރި ގަސްގަނޑެއް ފަހަތައް ވަދެ ނިވާވެލީ މައިކަލް ފަސް އެނބުރި ބަލާލުމުންނެވެ.

“ނަސީބެއް ހަމަ ކިރިޔާ އެސަލާމަތްވީ..” މެއާ ދިމާއިން އަތް އަޅަމުން ޒީޝާ ފުން ނޭވައެއްދޫކޮށްލިއެވެ. ބީޗާއި ދިމާއަށް ހިނގާފައި ދިޔަ ޒީޝާގެ ހިޔާލުތަށް ގުޅިފައިވަނީ އައުފްއާއި އެވެ. ގަސްތަކުތެރޭން ބީޗަށް ނިކުންނަށް ދިޔަ ޒީޝާ ހުރު ދިމާ ކުރިމަތިން ތަންކޮޅެއް ދުރުގައއި ތިބި ދެމީހަކު ފެނި މޫނުމަތީގެ ކުލަވަރު އޮއްސިގެންދިޔައެވެ. ގޮށްޖަހާލެވިފައިވާ ބުމައިން ޒީޝާ ނުރުހުންވެފައިވާ މިންވަރު ހާމަކޮށްދެއެވެ.

**

އައުފާއި މިކްޔާ ތިބީ ބިންމަތީ އިށީނދެލައިގެންނެވެ. ހަނދުވަރުގެ އަލިން މުޅިތަން އަލިކޮށްލާފައި ވަނީ ހިތްގައިމު ގޮތަކަށެވެ. ދުރުދުރުން މީހުންގެ ހިލަން ވެލިޔަސް ވަގުތުގެ ގޮތުން މާގިނަ މީހުންނެއް އަތިރިމައްޗަކުން ނުފެނެއެވެ. މިކްޔާއާއި އައުފްގެ ދައްކަން ބޭނުންވާ އެތައް ވާހަކަތަކެއް ވީނަމަވެސް ދުލަށް އެއްމެ ބަހެއްވެސް ނާދެއެވެ. ހާމަކަން އޮތް އުޑަށް ނަޒަރު ހިންގާލައިގެން އިން އައުފްގެ ހިތުގައި ވަނީ ތޫނު ރިހުމެއް އުފެދިފައެވެ. ދާދިގާތުގައި މިކްޔާ އިނީ އައުފް އޭނާ އާއި ބައްދަލުކޮށްލަން ބޭނުންވި ސަބަބެއް އޮޅުންފިލުވާހިތުން ކެތްމަދުވެފައެވެ. އަދިއެހެންމެ އައުފާއި ބައްދަލުކޮށް މިދަތުރުގެ ވާހަކަތައް އޮޅުން ފިލުވަން ބޭނުންވެފައި ވަނިކޮށް އެކަނި ބައްދަލު ކޮށްލާނެ ފުރުސަތެއް ލިބުނީމަ އެކަމާ ނުހަނު ހިތްހަމަ ޖެހިފައިއެވެ.

ނަމަވެސް އައުފްގެ އެމިލާފައިވާ މޫނަށް ބަލަހައްޓައިގެން އިން މިކްޔާ ގެ ހިތަށް އަސަރު ކުރަނީ ކީއްވެހެއްޔެވެ؟ އައުފާއި މެދު ވިސްނިވަރަކަށް އެހިތުގައި ރިއްސަނީ ކީއްވެހެއްޔެވެ؟ މިކްޔާ ލޯބިވަނީ ޝަމާންދެކެ އެއްނޫންހެއްޔެވެ؟ ވީއިރު މިކްޔާ އަށް އައުފްގެ އެމިޒާޖުން އުނދަގޫ ކުރަމުންދަނީ ކީއްވެހެއްޔެވެ؟  ހިތުގައި އުތުރި އަރަމުންދާ ސުވާލުތަކުން ހިތް ނުތަނަވަސް ވުން ނޫން ކަމެއް ނުވެއެވެ. ޝަމާން އާއި އައުފް އާއި ދެމީހުން ދެކެ އެއްފަހަރާ ލޯބި ވެވުނީ ކަންނޭނގެއެވެ. އެހެންވެސް ވެދާނެއެވެ. މިކްޔާގެ ހިތައް އެރި އެއްޗަކުން ތުންފަތަށް ހިނިތުންވުމެއް ވެރިވިއެވެ. އޭނަވެސް ކިހާ މޮޔަ ހެއްޔެވެ؟ ދެމީހުންދެކެ އެއްފަހަރާ ލޯބިވެގެން ދެ މީހުންނާއެކީ އުޅޭވޭނެ ހެއްޔެވެ؟ ދީނުގައިވެސް އެކަން އެގޮތަކަށް ނޯވެއެވެ. ވީއިރު މިކްޔާ އަށް އެހެން ވެގެން ނުވާނެއެވެ. މިކަންތައް އަވަހަށް ހައްލުކުރަން ވެއްޖެއެވެ. މިއީ ގްލޯބަލް ވޯރމިންގް އަށް ވުރެވެސް ނުރައްކާތެރި ކަމެއްގެ ގޮތުގައި މިކްޔާއަށް ސިފަކުރެވުނު ހިނދު އަނެއްކާވެސް ތުންފަތުގައި ދުވެލީ ހިނިތުން ވުމެކެވެ. ދުރު ބަލަން ހުރި މީހަކަށް ހީވާނީ މިކްޔާ އެއިނީ މޮޔަވެފައިކަމެވެ.

ހަމަ ހިމޭންކަމުގެ ވަގުތު ކޮޅަކަށްފަހު އައުފް ބަލާލީ ކައިރީގައި އިން މިކްޔާއަށެވެ. އެވަގުތު މިކްޔާވެސް އިނީ އައުފާއި ދިމާއަށް ބަލަހައްޓައިގެންނެވެ. ދެމީހުންގެ ހަތަރުކަޅިބައްދަލުވީ ވަގުތު މިކްޔާ އަށް އަފްގެ ލޮލުގެތެރޭން ފެންނަމުންދިޔައީ މާޔޫސްކަމެވެ. މޮޅިވެރިކަމުގެ ސާލެއް އޮޅާލެވިފައިވާ ދެލޮލުން ފެންނަމުންދިޔައީ މިކްޔާއަށް އެދޭ މިންވަރެވެ. އެވަގުތު މިކްޔާ ބޭނުންވީ އެދެލޮލުގެތެރެއަށް ގެންބިގެންދާށެވެ. އިންތިހާދަރަޖައިގެ ލޯތްބާއި އޯގާތެރިކަން ލިބިގެންދާނެކަން މިކްޔާއަށް ޔަޤީން ކުރެވެއެވެ.

އައުފްއަށް މިކްޔާއާއި ނަޒަރު ވަކިކޮށްލެވުނީ އިތުރަށް އެގޮތުގައި ބަލަން އިނދެފިނަމަ ޖަޒުބާތުގައި އޮޔާބެހިގެން ހިނގައިދާނެކަމުގެ ބިރު ހީވުމުންނެވެ. އެއީ އޭނާ އެއްގޮތަކަށްވެސް ބޭނުންވާގޮތެއް ނޫނެވެ. ހިތްފުރޭވަރަށް މިކްޔާއަށް ބަލާލުމުގެ ފުރުސަތެއް ދެން ނުލިބޭނެއެވެ. ކުރިއަށް އޮތް ދުވަސްތަކުގައި މިކްޔާ އެހެން މީހެއްގެ ހައްޤަކަށް ވެގެން ދާނެއެވެ. އޭރުން އަބަދުގެ އަބަދަށް މިކްޔާ ގެއްލޭނެއެވެ. ކިތައްމެ ހިތް ނޭދުނަސް އައުފަށް އެނޫން ގޮތެއް ނެތެވެ. އައުފްގެ ހިތުގައި މިކްޔާގެ ނަން ފެވިފައި އެވަނީ ފަނޑުވުމެއް ނުވާ ގަލަމަކުންނެވެ. މިކްޔާ އެހެން މީހެއްގެ ހައްޤަކަށް ވީނަމަވެސް އެހިތުގައިވާ ލޯތްބަށް ކުޑަ ނަމަވެސް ބަދަލެއް ނާންނާނެއެވެ.

“މިކްޔާ! އަހަރެން ބޭނުން ވަރަށް ބޮޑު ވާހަކައެއް ބުނަން…އިނގޭ މިކަމަކީ މިކްޔާ އާއި ކުރިން ހިއްސާކުރަން ޖެހޭނެ ކަމެއްކަން..އެކަމަކު މިހާރު ހުރިހާކަމެއްވެސް ފައިނަލް ވެއްޖެ..ސޯ  އައި ޖަސްޓް ވޯންޓް ނޯ………” އައުފަށް އިތުރަށް ވާހަކަ ކުރިއަށް ގެންދާނެ ގޮތެއް ނުވިސްނުނެވެ. މިކްޔާގެ ކައިވެނި ޝަމާން އާއި ކުރުމަށް ހަމަޖެއްސުނު ވާހަކަ ބުނާނީވެސް ކިހިނަކުން ހެއްޔެވެ؟ އެހެން ނޫނަސް އޭނައަކީ މިކްޔާގެ ދިރި އުޅުމުގެ ކަންތައް ނިންމަން ކާކު ހެއްޔެވެ؟

އައުފަށް އެއްޗެއް ނުބުނެވިގެން އުޅެނިކޮށް މިކްޔާ އޭނާގެ އަތް މަތީ އަތް ބާއްވާލިއެވެ. އައުފަށް އެމޫނުމަތިން ފެންނަމުން ދިޔައީ ކަންބޮޑުވުމުގެ ކުލަވަރެވެ. އަދި އެވާހަކަ އޮޅުން ފިލުވަން ބޭނުންވެފައި ހުރި މިންވަރެވެ. އެހެން ނަމަވެސް އައުފްގެ ދުލަށް އިތުރަށް އެންމެ ބަހެއްވެސް އަންނަ ގޮތެއް ނުވިއެވެ. ނަފްސު ކޮންޓްރޯލް ކުރަން ބޭނުންވީ ނަމަވެސް ނޭނގޭ ބާރަކުމުން މިކްޔާ އާއި ކައިރި ކުރަމުން ދިޔައެވެ.

ދެހިތުގެ ތެޅުން ވަނީ އަވަސްވެފައެވެ. މިކްޔާ އިނީ އައުފްގެ އެގާތް ކަމުން ހިތް ނުތަނަވަސް ވެފައެވެ. އައުފްގެ ކުއްލި ހަރަކާތަކުން މިކްޔާ އިނީ ދެލޯ ބޮޑުވެފައެވެ. އެހެންނަމަވެސ ދާދި ކުޑަ ހިނދުކޮޅެއްގެ ތެރޭގައި ހިއްސުތައް ހޭލައްވާލީ ހިތުގައި ހިނގާލި އޮއެވަރަކުންނެވެ. އައުފް ގެ އިސްތަށިގަނޑުތެރެއަށް މެހިގެންދިޔަ މިކްޔާގެ ހިމަ އިނގިލިތަކުން އެދެމެދުގައިވާ ދުރުކަން އިތުރަށް ގާތް ކުރުވިއެވެ. ހިނދުކޮޅަކަށް ދިގުދެމިގެން ދިޔަ އެ ވަގުތުކޮޅުގެ ސަބަބުން މިކްޔާގެ ހިތުގައިވި ހާސްކަން ފިލާ ހިނގައްޖެއެވެ. އެ ކުޑަ ވަގުތުކޮޅެއްގެ ތެރޭގައިވެސް މިކްޔާގެ ދިރިއުޅުމުގައި އައުފް އަކީ ކިހާ މުހިއްމު މީހެއްކަން އިހުސާސް ކުރެވިއްޖެއެވެ.

އައުފް ދެލޯ މަރާލަމުން ބިންމަތީގައި އޮށޯވެލީ ކުޑަ ހިނދުކޮޅަކަށް ނަމަވެސް ހިތައް ލިބުނު ހިތްހަމަޖެހުމަކުން ސިކުނޑި ތާޒާ ކޮށްލުމަށެވެ. މިކްޔާ އާއި ވަކިން އުޅޭނީ ކިހިނަކުން ހެއްޔެވެ؟ ފުރާނަ ހުރިހާ ހިނދަކު އައުފަށް މިކްޔާ ނޫން މީހެއްދެކެ ލޯބި ނުވެވޭނެކަން އެއީ ޔަޤީން ކަމެކެވެ. ވީއިރު މިކްޔާ އެހެން މީހެއްގެ ހައްޤަކަން ވާތަން ބަލަން ހުންނަންވީ ހެއްޔެވެ؟

” މިކްޔާ! މާދަމާ ޝަމާންގެ ފަރާތުން އަންނާނެ ރަންކިޔަން…ނެކްސްޓް ވީކްގަ އޮންނާނެ ވެޑިން…ސޯ ބީ ރެޑީ ފޯ އިޓް…މޯމް މެންނަށްވެސް އިނގޭ ތި ދެމީހުންގެ ލަވް ސްޓޯރީ…ސޯ ނޮ ވޮރީސް އެޓް އެބައުޓް ދެމް..” ހަށިގަނޑު ތެދުކޮށްލަމުން އެއްވެސް އަސަރެއް ނެތި  އައުފް އިއްވާލި ބަސްތަކުން މިކްޔާ ހައިރާންވީވަރުން އަނގަހުޅުވިގެން ދިޔައެވެ. ސިކުނޑިތެރޭގައި ބޮޑު ހައިޖާނެއް އުފެދި ކިޔާނެ ބަހެއް ނޭނގިފައި އައުފާއި ދިމާއަށް ބަލާލެވުނީ ދެލޯ ބޮޑުކޮށްލަމުންނެވެ.

” އުފާވެރި ކައިވެންޏަކަށް އެދެން..” މިކްޔާ އާއި ދިމާއަށް ބަލާލުމެއްނެތި ކުރިއަށް ހިނގައިގަންނަމުން އައުފް ބުނެލިއެވެ.