މަންޝާ (ސަތުޔާޅީސްވަނަ ބައި)

އަލިތައްކާން ހިފި ކަންފަތުގައި ފިރުމަމުން އަޒީމް ދިޔައީ އޭނާގެ މަންމަ އުޅޭ ކޮޓަރިއަށެވެ. އޭރު އެ ކޮޓަރީގައި ހުރީ އޭނާގެ މަންމަ އެކަނި ނޫންކަން އަޒީމަށް އެނގުނެވެ. ” އާމިނަ ދެން ނިގޯވައި ހުއްޓަލަ… އާމިނައަށް މީން އެއްވެސް ކަމަށް އެނގޭކަމަށް ހަދާނެކަމަށް ނެއް… އެނައްކެޑުން އާމިނާސް ތެހިށީ ވެހާށް ކަވަރިވެފެއި… އަލިތައްކާނު ދޭތިން އެކައްތައް ހިފާށުމައު ބެނި… އެ ޖިންނިއަކީ ވަރަށް ބާރޮގަދަ ޖިންނިއަ… އެހެންވެ މާދުމެއި ރެއި މިކަންތައް ކެރާ އެދިމާ ކެރަނީއަސް… ހަނދޮ ފުރިހަމަވޭ ރެއިތަކާ ކަޅޮފޮއިރޭތަކަކީ މިކަންކަންކެރާ އެންމެ ރަނގަޅަ ރެއިތައް… ހާސްނިވެ… އަލިތައްކާނު މަސައްކައް ފެށުމުގެ ކުރިން އަފިރިންގެ ރައްކަލަށް ހަށި ރައްކާ ތައްޔާރޮ ކެރާހެއް…” (އާމިނަ ދެން ނުރޮއި ހުއްޓާލާ… އާމިނައަށް މިއިން އެއްވެސް ކަމެއް އެނގޭ ކަމަށް ހަދާނެކަމެއް ނެތް… އަނެއްކޮޅުން އާމިނަވެސް ތިހުރީ ވިހަން ގާތްވެފަ… އަލިތައްކާނު ދޭތިން އެކައްޗަށް ހިފާނަން ކަމަށް ބުނި.. އެ ޖިންނިއަކީ ވަރަށް ބާރުގަދަ ޖިންނިއެއް… އެހެންވެ މާދަމާ ރޭ މިކަންތައް ކުރަން އެދިމާ ކުރަނީވެސް… ހަނދު ފުރިހަމަ ވާ ރޭތަކުގަޔާ ކަޅުފޮއެ ރޭތަކަކީ މިކަންކަން ކުރަން އެންމެ ރަނގަޅު ރޭތައް… ހާސްނުވޭ… އަލިތައްކާނު މަސައްކަތް ފެށުމުގެ ކުރިން އަހަރެމެންގެ ރައްކަލަކަށް ހަށިރައްކާ ތައްޔާރު ކުރާނެ…) އާމިނަގެ ބުރަކަށީގައި ފިރުމަމުން އިބްޒީމާ ނަސޭހަތް ދެމުން ދިޔައެވެ. އާމިނަގެ ލޮލުން ފައިބަމުން ދިޔަ ކަރުނަތައް ފޮހެލަމުން އާމިނަ ނޭފަތް ދަމާލިއެވެ.

ދޮރު ކައިރީ ފިލާ ހުރި އަޒީމަށް ސިހުމެއް ލިބުނީ މީހަކު އޭނާގެ ކޮނޑުގައި ހިފާލުމުންނެވެ. ސިހިފައި އޭނަ ފަހަތް ބަލާލީ އެއީ އަލިތައްކާނު ކަމަށް ހީކޮށެވެ. “އަހަނ ރިޔާޒްއީ؟.. ހިނގައު ކޮޅޮނަށް ބޭރަށް…” (އަހަނ ރިޔާޒްތަ؟… ހިނގާ ކުޅެން ބޭރަށް….) އަޒީމާ ދާދި އެއް އުމުރެއްގެ ރިޔާޒް ފެނުމުން އަޒީމަށް ހިތްހަމަ ޖެހުމުގެ ނޭވާއެއް ލެވުނެވެ.

“މިގެއް އާއްސެއި އަޒީމް ހޯދާތާ ކޮން ވޭލާށް… ހިނގައު ހޮކީ ކޮޅޮނަށް…” (މިގެއަށް އައިސް އަޒީމް ހޯދާތާ ކޮންއިރެއް… ހިނގާ ހޮކީ ކުޅެން…) އެ ދެކުދިން އެކީގައި ގޯތިތެރެއަށް ނުކުތެވެ.

—————————————————————————————————————

“އަޒީމް.. އަޒީމް… އޭ.. ކޮން ހިޔާލެއްގަ…” ނަވާފް ވާހަކަ ދެއްކުމުންވެސް އަޒީމްގެ ހިލަމެއް ނުވުމުން އޭނާގެ އަތުގައި ހިފާ ތަޅުވާލިއެވެ. ސިހިފައި އަޒީމް ބަލާލީ ނަވާފާ ދިމާއަށެވެ. ބުނާނެ ވަކި އެއްޗެއް އަޒީމްގެ ސިކުނޑިއަކަށް ނުވިސްނުނެވެ.

“އަޒީމް… މީ ގެންގުޅެން ހެޔޮ ވާވަރުގެ އެއްޗެއް ނޫން… މީ ފަންޑިތަ ސިހުރު ހަދާ ކަހަލަ ފޮތްތަކެއް… މިކަން ކުރުމަކީ ރަނގަޅު ކަމެއް ނޫން… އަޒީމްގެ މަންމައަށް މި ފޮތްތައް ލިބުނީ ކިހިނެއް… އަދި ރިޔާޒް ބައްޕައަށް މި ފޮނުވާ ސަބަބަކީ ކޮބާ؟…” ނަވާފް ހުރީ ވަރަށް ހާސްވެފައެވެ. އަޒީމްގެ އާއިލާއަކީ މިފަދަ ކަންކަން ކުރާ ބައެއްކަން ނަވާފަށް ނޭނގި އޮތަސް މި ހުރިހާ ކަމެއް އެންމެ ގާތުން ފެނިފައިވަނީ ރިޔާޒަށެވެ. އެހެންކަމުން މިވާހަކަތައް ނަވާފަށް ތަފްސީލުކޮށް ކިޔައިދޭން އަޒީމް ބޭނުމެއް ނުވިއެވެ.

“ސީރިއަސްލީ.. މަށަކަށްވެސް ނޭނގެ… އެކަމު ދޭށޭ ބުނި އެއްޗެއް ހަވާލުކުރީމަ ނިމުނީނު… އަހަރެމެންނަށް މި ފެނުނު ކަމަށް ނުހެދިއްޔާ ރަނގަޅުވާނީ….” ކޮތަޅުތެރެއަށް ހުރިހާ ފޮތްތަކެއް އަޒީމް ލިއެވެ.

“ކޮންކަމެއް އިނގޭކަމަށް ނުހަދާ ވާހަކައެއްތަ ތިބުނީ؟… މަންޝާ ކޮބާތަ؟.. އަހަރެން ގުޅާ ގުޅާ މޮޔަ ވެއްޖެ، ފޯނަށް ޖަވާބެއް ދޭން ނޭނގެނީތަ؟.. އަޅެ މިސްޑް ކޯލް ފެނިގެން ގުޅާލާ ނަމަވެސް ކިހާ ރަނގަޅު… މެސެޖްވެސް ކޮށްފިން… އޭނަ އަނެއްކާ ރަނގަޅުތަ؟…” ތުއްތު ޒަފްރީން އުރައިގެން ކޮޓަރިން ނުކުތް ޒުހާ ވާހަކަ ދައްކަމުން އައިސް އަޒީމް ކުރިމަތީ ހުއްޓުނެވެ.

“އޯޝިޓް.. އަޅެ މަހަނދާން ނެތުނީ… މަންޝާ ކައިރީ އެވާހަކަ ބުނަން ހުރީ… ބަޓް ހަމަ އެއްގޮތަކަށްވެސް ހަނދާނެއް ނުވި… ކޮން އިރަކުތަ ފުރަނީ؟…” ނިތްކުރީގައި ފިރުމަމުން އަޒީމް ޖަވާބުދިނީ ނަވާފްމެން އާއިލާ މެލޭޝިޔާއަށް ބަދަލުވާ ވާހަކަ މަންޝާ ކައިރީ ބުނަން ހަނދާން ނެތުނީމައެވެ.

“މިރޭ ފުރަނީ…. އެހެންވެ އަހަރެން މިދަނީ އެގެއަށް ދާން…. ނަވާފް އަހަރެން އަންނާނަން.. ޒަފްރީން ގޮވައިގެން މިދަނީ…” ކޮނޑުގައި ދަބަސް އަޅުވާލަމުން މަންޝާމެން ގެއަށް ދާން ޒުހާ ހިނގައިގަތެވެ. “ކާރަކަށް ގުޅަންތަ؟… މިއޮއް އަވިދަގަ ގަޑީގަ ހިނގާފަ ދާނެކަމެއް ނެތް؟…” ނަވާފް ތެދުވެ ދޮރުކައިރިއަށް ދިޔައެވެ. “ޒުހާ ފޮނުވާލާފަ ގޭތެރެއަށް ނަވާފް ވަތްއިރު އަޒީމް ފޯނާ ކުޅެން އިންތަން ފެނުނެވެ. ނަވާފް އައިސް އަޒީމް ގާތުގައި އިށީންނަމުން ޓީވީ ހުޅުވާލިއެވެ.

“އަސްލު ވަރަށް މިސްވާނެ ދޯ… ދެން މާލެ އާދެވޭނީވެސް ލައްކަ ދުވަސް ފަހުން ދޯ.. ބަޓް ޔޫ ގާއިސް އާ ސޯ ލަކީ… ކިޔަވަން ލިބޭ މިކަހަލަ ފުރުސަތުތައް ގެއްލުވާލާކަށް ނުވާނެ… ނޫންތަ؟…” ނަވާފް ކޮނޑުގައި ޖަހާލަމުން އަޒީމް ވާހަކަ ދެއްކީ އޭނާގެ އެކުވެރިޔާއަށް ކިޔަވަން ދާން ލިބުނު ފުރުސަތަށް ތާއީދު ކުރަމުންނެވެ.

“ނަސީބެއް އެކޮޅުގަ ބޮޑުބޭބެމެން ފެމިލީ އުޅޭކަން.. އެހެން ނޫންނަމަ ކުދިވެރިންނާ ޒުހާ ބަހައްޓާފަ ދާން ޖެހޭނީ… ޒުހާމެން ނުގެންދެވޭނަމަ އަހަރެން މި ސްކޮލަރޝިޕް ދޫކޮށްލާނީ… ކުދިންނަށް އެންމެ އަޅާލުމާ ލޯބި ބޭނުންވާ ދުވަސްވަރެއްގަ ދުރުގަ ހުރުމަކީ ރަނގަޅުކަމެއް ނޫންދޯ…” ނަވާފް ވިސްނަން އިނދެ ބުނި ޖުމްލައިން އަޒީމް ގާތަށް އައީ ހިންޏެވެ.

“ކޮންމެ ހެން ތިހެން ނުކިޔާ… ޒުހާ ނެތީމަ ކެތް ނުވާނޭ ބުނޭ….” ނަވާފާ ދިމާކޮށްލަން ލިބުނު ފުރުސަތުގެ ބޭނުން އަޒީމް ހިފިއެވެ. ދެމީހުންނަށް އެއްފަހަރާ ހެވުނެވެ.

*** *** *** *** *** ***

އޮފީހުގައި މަސައްކަތް ކުރަން އިން ނަމަވެސް ރިޔާޒްގެ ސިކުނޑީގައި މުޅިން އެނބުރެނީ މީރާގެ ހިޔާލެވެ. މެންދުރު ކާގަޑީގެ ކުރިން އޮފީހުގައި ބޭއްވި ބައްދަލުވުމުގައި އިން ރިޔާޒަށް އެ މީޓިންގައި ދެއްކި އެއްވެސް ވާހަކައަކަށް ސަމާލުކަމެއް ނުދެވުނެވެ. މީޓިންގް ކުރިއަށް ދިޔައިރު ރިޔާޒްމެން ޑިޕާޓްމަންޓާ ހަވާލުވެގެން ހުރި މެނޭޖަރ ކުރި ސުވާލު ރިޔާޒަށް އަޑު ނީވޭކަހަލައެވެ. އަތުގައި އޮތް ގަލަން ތަޅުވާލަ ތަޅުވާލަ އޭނާ އިނީ މުޅިންއެހެން ދުނިޔެއެއް ގައެވެ.

މީޓިންގް ނިންމާލުމާއި އެކީ އެންމެން މީޓިންގް ރޫމުން ބޭރަށް ނުކުތުމަށް އަވަސްވިއެވެ. އެވަގުތު މެނޭޖަރ ރިޔާޒަށް ގޮވާލުމުން ރިޔާޒް މީޓިންގް ރޫމުގައި މަޑުކުރިއެވެ. ހުރިހާ މުވައްޒަފުން ނުކުތުމުން މެނޭޖަރ ކައިރީ ހުރި ގޮނޑީގައި ރިޔާޒް އިށީނުމަށް މެނޭޖަރ އަކްރަމް އެދުނެވެ.

“ރިޔާޒް.. ހާދަ ބޮޑު ފިކުރެއްގަ އުޅޭހެން ހީވެއޭ… އަންހެނުން މާ ބޮޑަށް ބަލީތަ؟…” އަކްރަމް ވާހަކަ ދެއްކީ ރިޔާޒްގެ ފަރާތުން ފަހަކަށް އައިސް ފެންނަމުންދާ ތަފާތު ކަންތައްތައް ފާހަގަވުމުންނެވެ. ރިޔާޒްގެ ކޮއްކޮ ނިޔާވިކަމާއި މަންމަ ބަލިވެގެން އުޅުނުކަން އަކްރަމަށް އިނގެއެވެ. އަދި ވަރަށް ފަހުން މީރާ ހޮސްޕިޓަލުގައި އެޑްމިޓް ކުރިކަންވެސް އޭނާއަށް އިނގޭތީ ރިޔާޒް އެއިން ކަމަކާ ހާސްވެފައި ހުރިކަމަށް އަކްރަމަށް ނަގައިގަނެވުނެވެ.

“އާދެ… އަންހެނުން އެހާ ރަނގަޅެއްނޫން… އަސްލު އަޅުގަނޑު ޗުއްޓީއެއް ބޭނުންވެފަ މިހުރީ.. އެކަމަކު ޗުއްޓީއެއް ނަގާކަށްވެސް ނުކެރޭނެ…” ރިޔާޒް އޭނާގެ ހާލަތު ބަޔާން ކުރަމުން އިސް ޖަހާލިއެވެ.

“ނޫނޭ ތިކަމާ ހާސްނުވޭ… ރިޔާޒަކީ ކިހާ ދުވަހެއް ވަންދެން މި ކުންފުންޏަށް ހިދުމަތް ކޮށްދިން މުވައްޒަފެއްކަން އަހަންނަށް އިނގޭ… ދިރިއުޅުމުގަ އެކި މީހުންނަށް ދިމާވާނީ އެކިކަހަލަ ކަންތައްތައް… ރިޔާޒަށް ލީވެއް ލިބޭނެ ގޮތެއް ހަމަޖައްސައި ދޭނަން… އަހަރެން އެޗް.އާރާ ވާހަކަ ދައްކާނަން… އަވަހަށް ލީވަށް އެދޭ ފޯރމް ފުރާލާ… އިތުރު ކަމެއް ބޭނުން ވިޔަސް ޑޯންޓް ހެސިޓޭޓް… ހުރިހާ ކަމެއްވެސް އިރާދަކުރެއްވިއްޔާ ރަނގަޅުވާނެ… ދެން އެންމެ ރަނގަޅު ދިޔަޔަސް….” ރިޔާޒަށް ދާން ހުއްދަ ލިބުމުން ގޮނޑިން ތެދުވެ އޭނާ މެނޭޖަރަށް ޝުކުރު އަދާ ކުރިއެވެ.

މީޓިންގް ރޫމުން ނުކުމެ އޭނާގެ ކެބިނަށް ދިޔައިރު މުނާޒް ހުރީ ރިޔާޒް އަންނާނެ ވަގުތެއްގެ އިންތިޒާރުގައެވެ. “ހޭ.. ކިހިނެއްވީ؟… ހިނގާ ލަންޗަށް ދާން…” ރިޔާޒްގެ ކޮނޑުގައި ޖަހާލަމުން މުނާޒް ވާހަކަ ދެއްކިއެވެ.

“ނޯ ތޭންކްސް.. އަހަރެން ބޭނުމީ ގެއަށް ދާން.. ވައިފް ވަރަށް ބަލި… ޗުއްޓީއެއް ހަމަޖެއްސޭތޯ މިއުޅެނީ… ދެން ދަނީ އިނގޭ…” މޭޒުމަތީ އޮތް ސައިކަލު ތަޅުދަނޑި ނެގުމަށްފަހު ކެބިނުން ނުކުންނަމުން ރިޔާޒް ވާހަކަ ދެއްކިއެވެ.

“މީރާއަށް މަގޭ ސަލާމް…. އެހެންވެއްޖިއްޔާ އަހަރެން ރަޝާދާ އެކީގަ މިދަނީ…” ރިޔާޒްގެ ފަހަތުން ނުކުންނަމުން މުނާޒް މިސްރާބުޖެހީ ރަޝާދުގެ ކެބިނަށެވެ.

އޮފީހުން ނުކުމެ ނުކުމެ ހުރި ރިޔާޒްގެ ފޯނު ރިންގްވާން ފެށުމުން ފިޔަވަޅު މަޑުކޮށްލަމުން ފޯނުނަގާ ޑިސްޕްލޭއަށް ބަލާލިއެވެ. “ހަލޯ… ކެހެނަކަށްވީ؟…” (ހަލޯ ކިހިނެއް ވީ؟..) ރިޔާޒް މަޑު ފިޔަވަޅެއްގައި ސައިކަލް ޕާކްކޮށްފައިވާ ޒޯނާ ދިމާއަށް ހިނގައިގަތެވެ.

“ވަރަށް ބޮޑޮ ވާހަކައަށް ދައްކާށްވެފެއި ތެބޮށް… އަދި ރިޔާޒްގެ ބައްޕާއަށް ދޭއްވެފެއި އޮއް އެއްތަކަސް ތެބޮށް… ކެހެނަކަށް ހަދާށްވީ؟…” (ވަރަށް ބޮޑު ވާހަކައެއް ދައްކަން ވެފަ އެބައޮތް… އަދި ރިޔާޒްގެ ބައްޕައަށް ދޭންވެފަ އޮތް އެއްޗެއްވެސް އެބައޮތް؟… ކިހިނެއް ހަދަންވީ؟..) އަޒީމްގެ އެދުން ހާމަ ކުރުމުން ރިޔާޒް އޭނާ މިދަނީ ގެއަށް ކަމަށް ބުނެ އަޒީމް ގާތު ގޭދަށަށް އައުމަށް އެދުނެވެ. ފޯނު ޖީބަށް ލުމަށްފަހު ރިޔާޒް ސައިކަލަށް އަރާ މިސްރާބު ޖެހީ މީރާ ކައިރިއަށް ދާށެވެ.

ސައިކަލުގައި ގެއާ ހަމައަށް އާދެވުނު އިރު އަޒީމް ހުރީ އެގޭ ދޮރުމަތީގައި މަޑުކޮށްގެންނެވެ. ސައިކަލުން ފައިބައިގެން ގެއާ ދިމާއަށް ރިޔާޒް ހިނގައިގަތް އިރު އަޒީމްގެ އަތުގައި އޮތް ކޮތަޅަށް ބަލާލެވުނެވެ. “މީ ކަންކާ ދިން އެއްތަށް؟..” (މީ ކާކު ދިން އެއްޗެއް؟…) އަޒީމް އަތުގައި އޮތް ކޮތަޅު ރިޔާޒާ ދިމާއަށް ދިއްކޮށްލުމުން ރިޔާޒް އަހާލިއެވެ.

“ތޭ މަންމާ ދިން އެއްތައް… އެކަމަކި ބެނީ މީހަކާ ދިން އެއްތަކައު… މަށް އެނގެއި ތޭ މަންމާ ދިން އެއްތެއް ކަން… އަފިރިން ކުދުވޭލެއި ބައްޕާމެން ކޮޓަރިއަށް ވެދެ މިފޮއްތައް ބަލާ ހަނދާން މަ ވެއި… އެދުވަހި ވީލެއް މަ ދުވަހަކިއަސް ހަނދާނުން ނިފިލާހެއް…. ޟިރާރުބެއާ ވާހަކަ ދައްކަފެލަ… މި ފޮއް ހޯދާފެހޭ އެވެރިން އެ ހިނގަނީ ވަރަށް ވަރޮގަދަ ކަމަށް ކެރާށްކަން މަށް އެނގެއި… ދެންއެބޭނީ… ވާހަކަ ދައްކާ މަޑޮކެރެވޭކަށް ނެއް… މަމިހިށީއަސް ވަރަށް ލަސްވެފެއި…” (ތީ މަންމަ ދިން އެއްޗެއް… އެކަމަކު ބުނީ މީހަކު ދިން އެއްޗެކޯ… އަހަންނަށް އިނގޭ ތީ މަންމަ ދިން އެއްޗެއްކަން… އަހަރެމެން ކުޑައިރު އަހަރެންގެ ބައްޕަމެން ކޮޓަރިއަށް ވަދެ މި ފޮތްތައް ބަލާ ހަނދާން އަހަރެން ވޭ… އެ ދުވަހު ވީ ކަންތައް އަހަރެން ދުވަހަކުވެސް ހަނދާނުން ނުފިލާނެ… ޟިރާރުބެއާ ވާހަކަ ދައްކަބަލަ… މި ފޮތް ހޯދާނަމަ އެމީހުން އެ އުޅެނީ ވަރަށް ވަރުގަދަ ކަމެއް ކުރަންކަން އަހަންނަށް އެނގޭ… ދެން ދަނީ ވާހަކަދައްކަން މަޑުކުރެވޭކަށްވެސް ނެތް… އަހަރެންނަށް ވަރަށް ލަސްވެސް އެބަވޭ…)

އަޒީމްގެ ވާހަކަ ނިންމާލަމުން އޭނާގެ އަތުގައި އަޅާފައިވާ ގަޑިއަށް ބަލާލިއެވެ. އަދި އޭޑީކޭއާ ދިމާއަށް އަޒީމް ހިނގައިގަތެވެ. އަޒީމް ދިޔަ ދިމާއަށް ބަލަން ހުރުމަށްފަހު ރިޔާޒް ގެއަށް ވަންނަން ހިނގައިގަތެވެ. އަޒީމް ދެއްކި ވާހަކަތަކުން ރިޔާޒަށް ކޮންމެވެސް ވަރެއްގެ އުނދަގުލެއް ވެއްޖެއެވެ. އެކޮތަޅުގައި ވާ އެއްޗެއް ބެލުމުގެ ޝައުގުވެރިކަން ބޮޑުވި ނަމަވެސް ރިޔާޒް އެޕާޓްމަންޓަށް ވަދެ ފުރަތަމަވެސް މިސްރާބުޖެހީ މީރާ ކޮބާތޯ ބަލާށެވެ.

ކޮޓަރިއަށް ވަތް އިރު މީރާ އޮތީ ނިދާފައެވެ. އެހެންކަމުން މީރާއަށް އުނދަގޫ ނުކޮށް ރިޔާޒް ބޭރަށް ނުކުތެވެ. ކާމޭޒުމަތި ހުރީ ހުސްކޮށްކަމުން މޭޒުމަތީ އެ ފޮތް ކޮތަޅު ބެހެއްޓުމަށްފަހު އޭގެން ފޮތެއް ނެގާ ހުޅުވާލިއެވެ. ގަނޑުތައް އުކަމުން ގޮސް ތަރިއެއްގެ ބައްޓަމަށް ކުރަހާފައިވާ އަކަ ފެނުމާއި އެކު ރިޔާޒް ހުއްޓުނެވެ. އެއީ ހަމަ އެފޮތެވެ. އަޒީމް ކުލަ ޖެއްސި ފޮތެވެ. އެދުވަސް ރިޔާޒް ރަނގަޅަށް ހަނދާން ހުއްޓެވެ.

————————————————————————–

“މީ ހައުދަހައި ފާޑަކި ފޮތަކޭ… އަޒީމް ބައްޕާއަށް އެއިންގޭފެހޭ ރިޑިއަރާހެއްނު…” (މީ ހާދަ ފާޑެއްގެ ފޮތެކޭ… އަޒީމް ބައްޕައަށް އެނގިއްޖިއްޔާ ރުޅިއަންނާނެއްނު…) ރިޔާޒް ހުރީ އަޒީމް ކުލަ ޖައްސާފަ އޮތް ގަނޑަށް ބަލާށެވެ.

“ޝްޝްޝް… ފޮއް ލައްޕަލަ… ހިނގައު ނިކުންނަން… ބައްޕާ އާފެހޭ ރިޑިއަރާހަ. ހިނގައު ކޮޓަރިއަށް އޭ..” (ޝްޝްޝް… ފޮތް ލައްޕާ… އާދޭ ނުކުންނަށް.. ބައްޕަ އައިއްސިއްޔާ ރުޅިއަންނާނެ… ހިނގާ ކޮޓަރިއަށް ދާން…) އަޒީމް ހުރީ ދޮރުކައިރީ ފާރައަށެވެ. މީހަކު އައުމުގެ ކުރިން އެދެކުދިން އެތަނުން ނުކުންނަށް ބޭނުންވިއެވެ. އެމީހުންގެ ޕްލޭން ދިޔައީ ވަރަށް ކާމިޔާބުކޮށެވެ. ގޭތެރޭގައި އެތައް ބަޔަކު އުޅުނު އިރުވެސް އެއިން އެއްވެސް މީހަކަށް ނުފެނި އަޒީމާ ރިޔާޒް އެކޮޓަރިން ނުކުމެ އަޒީމްގެ ކޮޓަރިއަށް ދިޔައެވެ.

“މިގޮތަށް ކޮންމެ ދުވަހަކި މިގެއް ގިއޭ އެއްތެއްނާ ހައުދަހައި މަޖާވޭށިއޭ…” (މިގޮތަށް ކޮންމެ ދުވަހަކު މިގެއަށް އާދެވޭނަމަދޯ… ހާދަ މަޖާވާނޭ…) އެނދުގައި އޮށޯންނަމުން ރިޔާޒް ވާހަކަ ދެއްކިއެވެ.

“އަސްލަސް ވަރަށް މަޖާވޭހެއް… އޭ… ޝްޝްޝް… މީހަކާ ތެބޭ ކަންނޭނގެ… ނިދާ ކަމަށް ހަދަފެލަ…” (އަސްލުވެސް ވަރަށް މަޖަވާނެ… އޭ… ޝްޝްޝް…. މީހަކު އެބަ އާދޭ ކަންނޭނގޭ… ނިދާ ކަމަށް ހަދާ…) ދެކުދިން ވެސް ބިށްދޮށަށް އެނބުރުނެވެ. އެދެކެދިންނަށް ބިށްދޮށަށް އެނބުރި ހަމަޖެހުނު ވަގުތު އެ ކޮޓަރީގެ ދޮރު މީހަކު ހުޅުވާލިއެވެ. ދެލޯ ފިއްތާ ބާރުކޮށްގެން އަޒީމް ރިޔާޒް އޮތީ އަތަކަށް ގުޑިވެސް ނުލައެވެ. އެމީހުން ހޭލަ ތިބިކަން އެނގިއްޖެއްޔާ ޟިރާރާ އަލިތައްކާނު އިންތިހާއަށް ރުޅިއަންނާނެކަން އެނގެއެވެ. އަޒީމާ ރިޔާޒާ ތިބީ ހޭލާ ކަމުން ދޮރު ކައިރީ ތިބި މީހުން ދައްކަމުންދިޔަ ވާހަކަ ރަނގަޅަށްއިވުނެވެ.

“ކުދިވެރިން ނިދަފެއި ތިބީ..” (ކުދިވެރިން ނިދާފަ ތިބީ….) އަލިތައްކާން މިހެން ބުނުމާއެކީ ދެން ވާހަކަ ދެއްކީ ޟިރާރެވެ.

“މަ ހީކެޑެއި މިހެއިވޭލަވީކޯ އާމިނަ ވެހާހެއްކަމަށް… އަދިއަސް ރިހުމަކަށް ބަދަލަށް ނިއެއި… ފާތުމަ ބެނީ ދެންމާގިނަވޭލާ ނިވޭށިއައު… ކޮބާ އިބްޒީމާ؟..” (އަހަރެން ހީކުރީ މިހާއިރުވީރު އާމިނަ ވިހާނެކަމަށް… އަދިވެސް ރިހުމަކަށް ބަދަލެއް ނާދޭ… ފާތުމާ ބުނި ދެން މާ ގިނަ އިރެއް ނުވާނެޔޯ… ކޮބާތަ އިބްޒީމާ؟…) ޟިރާރުގެ ވާހަކަ މެދުކަނޑާލުމުން އަލިތައްކާނު ފުން ނޭވާއެއް ބޭރުކޮށްލިއެވެ.

“އިބްޒީމާ ދީ… އެއަސް ބަނޑޮރިހޭވަރުން އެ ހިނގަނީ…” (އިބްޒީމާދޯ.. އޭނަވެސް ބަނޑުގަ ރިއްސާތީ އެއުޅެނީ…) އަލިތައްކާނު އަތުގައި މިއަދު އެޅި ތަވީދުގައި އަތް ޖައްސާލަމުން ޟިރާރުމެން ތަވީދު އެޅިތޯ ޔަގީން ކޮށްލިއެވެ. އެއަށްފަހު ކޮޓަރި ތެރެއަށް ވަނެވެ. އަޒީމާ ރިޔާޒްގެ އުނަގަނޑުގައި ތަވީދު އައްސާފައި އޮތްތޯ އަލިތައްކާނު ބަލާލިއެވެ. ނިދާކަމަށް ހަދައިގެން ތިބި ދެކުދިން ގުޑިނުލާ އޮތެއް ކަމަކު އެމީހުން ތިބީ ވަރަށް ބިރުންނެވެ.

“ދެން ހިނގައު އުސްފަސްގަނޑާއި ދިމާލަށްއޭ… މިކޯ ކިޔެވެލި ކިޔަވާ ފަށާއްވީ.. ވަގުތު ފާއިތުނިވެނީސް މަސައްކައް ފެށިމެއި މިރެއި މިކަންތަކުން ސަލާމަށް ވެވޭނެއި… ފާތުމާއި އެކީ ތިމާގެބާކިން ގޭތެރޭ ތެބެ ވޭނޑޭނުން… އެނެއްކެޑުން ކަމަށް ދިމާވިއަސް ވަގުތުން ގިއޭހެއި ކަވަރިއެ ދީ މިތިބީ…އިބްޒީމާމެންނާއި އެކެހި ބެނާހެތި މިގަޑިއެ އެއްވެސް ބާކިޔަ ބޭރަށް ނިނުކުންނަހެތިޔައު…” (ދެން ހިނގާ އުސްފަސްގަނޑާ ދިމާއަށް… މިހާރު ކިއެވެލި ކިޔަވަން ފަށަންވީ… ވަގުތު ފާއިތުނުވަނީސް މަސައްކަތް ފެށުނީމަ މިރޭ މިކަންތަކުން ސަލާމަތް ވެވޭނީ… ފާތުމާއާ އެކީ ތިމާގެ ގިނަ ބަޔަކު ގޭތެރޭގަ އެބައުޅެއެއްނު… އަނެއްކޮޅުން ކަމެއް ދިމާވިޔަސް ވަގުތުން އެތަނަށް އާދެވޭހާ ކައިރީގަ ދޯ މިތިބީ… އިބްޒީމާމެން ކައިރީ ބުނާތި މިގަޑީގަ އެއްވެސް މީހަކު ބޭރަށް ނުނިކުންނައްޗޭ…) ޟިރާރު އެކޮޓަރިން ނުކުތެވެ. ޟިރާރުގެ ފަހަތުން ނުކުންނަމުން އަލިތައްކާނު އެކޮޓަރީގެ ދޮރު ލައްޕާލަމުން ފަހު ފަހަރަށް އަޒީމާ ދިމާއަށް ބަލާލިއެވެ.

ކޮޓަރިއަށް ވެރިވެފައިވާ ހަމަހިމޭންކަން ނަގާލީ ކުޑަވަގުތު ކޮޅެއްގެ ތެރޭގައެވެ. “އުސްފަސްގަނޑި ކޮންކަމަށް ކެރާއްބާ އެހިނގަނީ… މިރެއި ބޮޑޮކަމަށް ކެރާށް އެހިނގަނީ… މަ ބޭނުން އެތަން ބަލަލާއޭއް…” (އުސްފަސްގަނޑުގަ ކޮންކަމެއް ކުރަންބާ އެއުޅެނީ… މިރޭ ބޮޑުކަމެއް ކުރަން އެއުޅެނީ… އަހަރެން ބޭނުން އެތަން ބަލާލަން ދާން…) އަޒީމް ތެދުވެ ދޮރުން ތަންކޮޅެއް ހުޅުވާލަމުން ބޭރުބަލާލިއެވެ. އެކޮޓަރި ކައިރީ މީހަކު ނެތްކަން ޔަގީން ވުމުން އަޒީމް ބޭރަށް ނުކުންނަން މަސައްކަތް ކުރިއެވެ.

“އޭ އަޒީމް… މީހާކާ ފެނިގޭފެހޭ ކަޑަވޭހެއް… ނިކުންނަނެ ކަމަށް ނެއް…” (އޭ އަޒީމް.. މީހަކަށް ފެނިއްޖިއްޔާ ކަޑަވާނެ.. ނުކުންނާނެ ކަމެއް ނެތް…) އަޒީމްގެ އަތުގައި ހިފާ އެތެރެއަށް ދަމައިގަންނަމުން ރިޔާޒް ވާހަކަ ދެއްކިއެވެ. ރިޔާޒް ހުރީ މީހަކަށް ފެނިދާނެތީ ބިރުންނެވެ.

އެތެރެ ކޮޓަރި ތެރެއިން އޭރު އާމިނަ ރޯއަޑު ގޭތެރޭގައި ހިއްޕާލާފަ ހުއްޓެވެ. އަޒީމްގެ ސަމާލުކަން ދިޔައީ އެކޮޓަރިއާ ދިމާއަށެވެ. މިވަގުތު ހުރިހާ އެންމެން އުޅޭނީ އެތާ ކަން އެނގޭތީ އޭނާ އެކޮޓަރިއަށް ދާން އޮތް ޝައުގު ބޮޑުވިއެވެ. “އަޒީމް… ކޮންތާކަށް ތެއެނީ… ބެނިންދީ ކޮޓަރިއަށް ވެދެ ދެކުދިން ނިދާއްކެނައު…” (އަޒީމް… ކޮންތާކަށް ތިދަނީ.. ބުނިން ދޯ ކޮޓަރިއަށް ވަދެ ދެކުދިން ނިދާށޭ….)

އަޒީމްގެ ފަހަތުން އިވުނު އަޑަށް އަޒީމް ސިހުނެވެ. ފަހަތް ބަލާލިއިރު މިހުރީ އިބްޒީމާއެވެ. އޭނާ ހުރީ ދާހިއްލާ ފޯވެފައެވެ. އުނަގަނޑުގައި އަތް ވިއްދައިގެން ހުރި ގޮތުން އިބްޒީމާ އުޅެނީ ބަނޑުގައި ރިއްސާތީކަން އެނގެއެވެ. ބަދިގެ ފަރާތުން އައިސް ގޭތެރެއަށް ވަތް ފާތުމަ ހިފައިގެން ހުރި ތެލިން ދުންއަރައަރަ ހުއްޓެވެ. ފާތުމައަށް ތަން ދައްކަން އިބްޒީމާ އަޒީމްގެ އަތުގައި ހިފާ އެއްފަރާތަކަށް ޖެއްސިއެވެ.

ކައިރިންލާފަ ފާތުމަ ދިޔަ ވަގުތު އަޒީމް ބޯއަރިކޮށްލަމުން އެތެލީ ތެރެއަށް ބަލާލިއެވެ. އޭގައި ހުރީ ފެނެވެ. “މަންމާ އެއި ކެންކެރާ ހުނުފެނަށް..” (މަންމާ އެއީ ކީއްކުރާ ހޫނު ފެނެއްތަ؟…) އެއީ ކީއްކުރާ އެއްޗެއްތޯ ބަލަން އަޒީމް ބޭނުންވިއެވެ.

“ބޭކާރު ވާހަކަ ނިދައްކެއި އެބޭއް ކޮޓަރިއަށް…” (ބޭކާރު ވާހަކަ ނުދައްކާ ދޭ ކޮޓަރިއަށް…) ހަރުކަށި ރާގަކަށް އިބްޒީމާ އެހެން ބުނުމުން އަޒީމް އިސްޖަހައިގެންގޮސް ކޮޓަރިއަށް ވަނެވެ. ދޮރު ލައްޕާލި ވަގުތު އިބްޒީމާ ފާތުމައަށް ގޮވާލި އަޑު އިވުނެވެ. “ފާތުމާ އާއްސެލަ… އާ… މަ ބަނޑޮވަރަށް ރިހެއި…” (ފާތުމާ އާދެބަލަ… އާ… މަގޭ ބަނޑުގަ ވަރަށް ރިއްސާ….)

“ހިނގައި ކޮޓަރިއަށް ވެށިއޮންނަން… ތަންމަތި ތައްޔާރޮކޮށްފެއި އެހިށީ… އަވަހަށް ހިނގައު ދެންމާ ގިނަ ވޭލަށް ނިވޭހެ…. ބަޝީރާސް ބާއި… ފޫޅުމާމީހާ ބެނޑުވަގެން…” (ހިނގާ ކޮޓަރިއަށް އޮށޯންނަން… ތަންމަތި ތައްޔާރުކޮށްފަ އެހެރީ… އަވަހަށް ހިނގާ.. ދެންމާ ގިނައިރެއް ނުވާނެ…. ބަޝީރާވެސް އައިއްސި ފޫޅުމާ މިހާ ގޮވައިގެން) ދުވެފައި ފާތުމަ އައިސް އިބްޒީމާ ގޮވައިގެން އާމިނަ އޮތް ކޮޓަރިއަށް ގެންދިޔައެވެ. އޭރު އިބްޒީމާ ބަނޑަށް ތަދުވާތީ ރޮނީއެވެ.

ބޭރަށް ނުކުންނާނެ ގޮތަކާ ދޭތެރޭ ވިސްނަން އަޒީމާ ރިޔާޒް އެތައް އިރަކު އުޅުނެވެ. އެންމެ ފަހުން ކުޑަދޮރުން ފުންމާލައިގެން ދިޔުން އެއީ އެންމެ ބުއްދިވެރިގޮތްކަމަށް ނިންމާ ދެމީހުންވެސް ކުޑަދޮރު ކައިރިއަށް ލެފިގަތީ ކޮޓަރި ދޮރު އެތެރެއިން ތަޅުލާފައެވެ. ގޭ ބިށްދޮށުން ފޭބެނީ ބޯ ކެޔޮގަސްތައް އިންދާފައވާ ދިމާއަށެވެ. އެދިމާ އަނދިރިކަމުން އެތަން ފެންނަނީ ވަރަށް ބިރުވެރިކޮށެވެ. ރިޔާޒް ކޮންމެވެސް ވަރަކަށް ފަސްޖެހުނެވެ. “އަޒީމް ހިނގައު ގެއު އެބޭ…” (އަޒީމް ހިނގާ ގެއަށްދާން…)

“ނުން… މިރެއި… އުސްފަސްގަނޑި އެވެރިން ކެރާ ކަމަށް ބަލަފެއި ގެއް އެބޭނީ…” (ނޫން… މިރޭ… އުސްފަސްގަނޑުގަ އެމީހުން ކުރާ ކަމެއް ބަލާފަ ގެއަށް ދާނީ…) އަޒީމް ކުރިއަށް ހިނގައިގަންނަމުން ރިޔާޒްގެ އަތުގަ ހިފިއެވެ.

“އަފިރިން ކޮޓަރިޔެ ނެއްކަން އެނގިގޭފެހޭ ވަރަށް ސަކަރާށެވޭހެ….” (އަހަރެމެން ކޮޓަރީގަ ނެތްކަން އެނގިއްޖިއްޔާ ވަރަށް ސަކަރާތްވާނެ…) ރިޔާޒް އަދިވެސް ހުރީ ދެ ހިޔާލެއްގައެވެ. ގަސްތަކުގެ ތެރެއިން ހިނގަމުން އައިސް ގޮނޑުދޮށާ ހަމައަށް އެކުދިންނަށް ނުކުމެވުނީ ވަރަށް ހާލުންނެވެ. ރޭގަނޑުގެ އަނދިރިކަމުގެ ތެރެއިން ގަސްތަކުގެ ތެރޭގައި އެކުދިން ހިނގީ ވަރަށް ބަލައިގެންނެވެ. އަތިރިއަށް ނުކުމެވުމުން އަލިކަމެއް ފެންނާނެކަމަށް ހީކުރި ނަމަވެސް ގޮނޑުދޮށުންވެސް ފެންނަމުން ދިޔައީ ކަނު އަނދިރިކަމެވެ. އެހެންކަމުން ދެކުދިންނަށް އެއްފަހަރާ ބަލާލެވުނީ އުޑުމައްޗަށެވެ.

“ހަނދުކާފެއި އެހިށީ…” (ހަނދު ކާލާފާ އޭނީ….) ފުރިހަމަ ކޭތައެއް ހިފާފައިވާ ހަނދަށް އިޝާރާތް ކުރަމުން އަޒީމަށް ބުނެވުނެވެ.

“އެހެންވެކަން ނިއެނގި ބައްޕާ ބެނީ މިރެއި އެއްވެސް މީހަކާ ގެއިން ބޭރަށް ނިނުކުންނަހެތިއައު… ހިނގާ އަވަހަށް ގެއް އެބޭއް… ގިޔާމަށް ވަނީ ކަންނިއެނގެ…” (އެހެންވެކަންނޭނގެ ބައްޕަ ބުނީ މިރޭ އެއްވެސް މީހަކު ގެއިން ބޭރަށް ނުނިކުންނައްޗޭ.. ހިނގާ އަވަހަށް ގެއަށް ދާން.. ގިޔާމަތްވަނީ ކަންނޭނގެ…) ރިޔާޒް ހުރީ އިންތިހާއަށް ބިރުގެންފައެވެ. ދެކުދިން އެންމެ ފަހުން ނިންމީ ގެއަށް ދާށެވެ. ވަލުފަރާތުން ދާން ހިނގައިގަތް ވަގުތު އަޒީމްގެ އަތުގައި ހިފާ ރިޔާޒް ދަމައިގަތެވެ. “މަށް ލާހިކަށް ނޫން ތެހެން އޭކަށް… ތެހެންލާފެއި ގެއް ނިއޭށުން…” (މަށަކަށް ލާހިކެއްނޫން ތިހެން ދާކަށް… ތިހެންލާފަ ގެއަކަށް ނުދާނަން…) ރިޔާޒް ބިރުގެންފައިހުރުމުން އަޒީމް ބޭނުންވީ އަތިރިމަގުން އެއްގަމަށް ނުކުންނާށެވެ. ނަމަވެސް އެމީހުންގެ ފިޔަވަޅު ހުއްޓުމަކަށް އައީ އަންހެނެއްގެ ވޭނީ ހަޅޭކުގެ އަޑު އެމީހުންގެ ކަންފަތުގައި ޖެހުނެވެ.

ރިޔާޒާ އަޒީމާ ދެކުދިން ބަލާލީ އެކަކު އަނެކަކުގެ މޫނަށެވެ. ބިރުން ހުރެ އެމީހުންނަށް އެއަޑު އައި ދިމާއަށް ބަލާލެވުނެވެ. އުސްފަސްގަނޑު ސަރަހައްދުގައި ޖިފްޓިގަނޑު ޖަހާފައިވާތަނުން ގަދަ އަލިކަމެއް އެމީހުންނަށް ފެނުނެވެ. އެމަންޒަރު ކައިރިން ބަލަން ބޭނުންވެފައިވާލެއް ބޮޑުކަމުން އަޒީމް އެދިމާއަށް ދުއްވައިގަތެވެ. އެވަގުތު ރިޔާޒަށް އެ ޖިފްޓިގަނޑުގެ މައްޗަށް ވެއްޓުނު އަލިފާން ގުޅަ ފެނުނެވެ. އެ އަލިފާން ގުޅަ ވެއްޓުމާއެކީ އެ ޖިފްޓީގައި އަލިފާން ރޯވިއެވެ. އެހިސާބުން ދެމީހުންގެ ފިޔަވަޅު މަޑުވިއެވެ. ދެމީހުންނަށް އެނބުރި ހަނދާ ދިމާއަށް ބަލާލެވުނެވެ. އޭރު ހަނދުހުރީ ކުރިން އެމީހުންނަށް ފެނުނު ހަނދު ހުރިގޮތަކަށް ނޫނެވެ. މިހާރު ފެންނަން ހުރީ ފުރިހަމަ ރީތި ހަނދެކެވެ.

“އެތަނުން މީހުންތައް އެއޮއް ނުކުންނެއި… ބައްޕާމެންނަށް ފެނިގޭފެހޭ އަފިރިން މަރާހެ…” (އެތަނުން މީހުންތައް އެއޮއް ނުކުތީ.. ބައްޕަމެންނަށް ފެނިއްޖެއްޔާ އަހަރެމެން މަރާނެ…) ރިޔާޒް އަތުގައި ހިފާ ދަމަމުން އަޒީމް އެތަނުން ދާން ދުއްވައިގަތެވެ. ދެމީހުންނަށް ގެއަށް އާދެވުނު އިރު މާ ނޭވާ ލެވެނީއެވެ. ކުޑަދޮރުން އެތެރެއަށް ވަދެ ކުޑަދޮރު ލެއްޕުމަށްފަހު އެދެމީހުން އެނދުގައި އޮށޯތެވެ. އޭރުވެސް މޭގަނޑު ބަންބަންލާފައި ޖެހެއެވެ. މުޅިތަނަށް ވެރިވެފައިވާ ހަމަހިމޭންކަން ނަގާލީ ތުއްތު ކުއްޖެއްގެ ރުއިމުގެ އަޑުންނެވެ. އެއީ ޒިމްނާއާ ރޫހީ އުފަންވި ރެއެވެ. ހަމަ އެހެންމެ ޖިފްޓީގައި އަލިފާން ރޯވުމުގެ ހާދިޘާގައި އަލިތައްކާނު މި ދުނިޔެ ދޫކުރި ރޭވެސް މެއެވެ.

—————————————————————–

“ރިޔާޒް… ކާ ހަދާށްވިއްޔާ….” (ރިޔާޒް ކާން ހަދަންވީތަ؟…) އާމިނަގެ އަޑު ކަންފަތުގައި ޖެހުމުން ރިޔާޒް އެ ފޮތް ލައްޕާލިއެވެ. ދެލޮލަށް ޖަމާވެފައިވާ ކަރުނަތައް ހިންދަން މަސައްކަތް ކުރަމުން ރިޔާޒް ހިނގައިގަތީ ފާޚާނާއަށް ވަންނާށެވެ. ރިޔާޒް އެފޮތަށް ގެއްލި ބަލަން ހުރިގޮތް އާމިނައަށް ފެނުނެވެ. ރިޔާޒް ގޮސް ކޮޓަރިއަށް ވަނުމުން އާމިނަ މޭޒާ ގާތްވެލިއެވެ. މޭޒުމަތީ ހުރިފޮތްތައް ފެނި އާމިނަގެ ހިތް އަވަސްވިއެވެ.

*** *** *** *** *** ***

“މަންޝާ… މަންޝާ….” ދޮރުގައި ތަޅާ ތަޅާ ޒުހާ ހުރީ ވަރުބަލިވެފައެވެ. މަންޝާގެ ހިލަމެއް ނުވުމުން އޭނާ އެނބުރި ގެއަށް ދާން ސިޑިން ފައިބަން ހިނގައިގަތެވެ. އެވަގުތަކީ އެގޭ މައިދޮރާށިން އެތެރެއަށް އަޒީމް ވަތް ވަގުތެވެ. “އަހާ… ހާދަ އަވަހަކަށް ތި ދަނީ….” ޒުހާ ފެނުމުން އަޒީމް ވާހަކަ ދެއްކިއެވެ.

“މަންޝާ ދޮރެއް ނުހުޅުވި…. ދޮރު ވެއްޓޭ ވަރަށް ޓަކި ޖަހައިފިން…. އަނެއްކާ ނިދާފަ ކަންނޭނގެ…” ޒުހާ ސިޑިމަތީ މަޑުކޮށްގެން ހުރެ ވާހަކަ ދެއްކިއެވެ. “އެހެންތަ… އެކަމަކު އަހަރެން ގެއިން ނުކުތް އިރު ހޭލާ އުޅުނީ… ވެދާނެ ވީ ފާޚާނާގަ ކަމަށްވެސް…ހިނގާ މައްޗަށް….” އަޒީމް ސިޑިން އަރަމުން ޒުހާ ގާތު މައްޗަށް އައުމަށް އެދުނެވެ.

ތަޅުދަނޑިޖަހާ ދޮރުގެ ތަޅު ހުޅުވާލަމުން އަޒީމް ދޮރުތަންމިނަށް ހުޅުވާލިއެވެ. ދުވި ވަހުން ޒުހާ ނޭފަތުގައި އަތްއަޅާލަމުން މޫނަށް ވައްތަރެއް ޖައްސާލިއެވެ. “ރެހި ތެލުލީތަ؟… ދޮރުތައް ލައްޕާފަ ހުރީމަ މުޅި ގޭތެރޭގަ ވަސް ހިއްޕާލާފަ މިހިރީ… އަޒީމް މި ކުޑަދޮރުތައްވެސް ހުޅުވާލަބަލަ…” ޒުހާ ގެ ކުޑަދަރިފުޅަށް އޭރު ހޭލެވިއްޖެއެވެ. ދެލޯ ބޮޑު ކޮށްލަމުން އެމަންޖެ ވަށައިގެން ބަލާލިއެވެ.

އަޒީމް ކުޑަދޮރުތައް ހުޅުވާލުމަށްފަހު ކޮޓަ ރިތެރެއަށް ވަނެވެ. މުޅި ކޮޓަރިވަނީ އެއްކޮށް އަނދިރިކޮށްފައެވެ. އެނދުގައި އޭރު މަންޝާ އޮށޯވެގެން އޮތެވެ. ބޮލާ އެކީ ރަޖާ އަޅާއިގެން މަންޝާ އޮތް ގޮތް ފެނުމުން އަޒީމް މަންޝާއަށް ގޮވާލިއެވެ. “މަން… އެބަހުރި ޒުހާ އައިސް.. ހިނގާބަލަ ބޭރަށް.. ކުޑަމީހާވެސް ގޮވައިގެން އައިސް ހުރީ… ޒުހާމެން އެއުޅެނީ މެލޭއަށް ފުރަން.. ދެން ނޭނގެ ކޮން ދުވަހަކުން ކަމެއް ދިމާވާނީކީވެސް.. އާދެބަލަ…”

“ނޫން އަޒީމް..އަހަރެން މިއުޅެނީ ވަރަށް ބޮޑަށް ބޮލުގަ ރިއްސާތީ.. ޕްލީސް.. އަހަރެންނަށް ނުތެދުވެވޭނެ… އަހަރެން ބާއްވާލަދީ…” މަންޝާގެ އަޑުން ފާޅުވަމުން ދިޔައީ ބަލިކަމެވެ. އެހެންކަމުން އަޒީމް ޒުހާއަށް ގޮވާލިއެވެ. ބޭރުގައި ހުރި ސޯފާގައި ދަބަސް ބަހައްޓާފަ ކޮޓަރިއަށް ވަންނަން ޒުހާ ހިނގައިގަތެވެ.

ކޮޓަރި ދޮރާހަމައަށް އަރަމުން ޒުހާ ވާހަކަ ދެއްކިއެވެ. “މަންޝާ… އަހަރެންނަށް ކުރިން ދުވަހު ދެވުނީ ހަދިޔާ ދަޅުތައް ވެސް ބަހައްޓާފަދޯ… އަނެއްކޮޅުން މި އުޅެނީ ފުރަން..މަންޝާ ފޯނަށް ގުޅިއަސް ފޯނު ނަގާނަމަތާދޯ…” ޒުހާ ވާހަކަ ދައްކަމުން އައިސް ކޮޓަރިތެރެއަށް އެޅި ފުރަތަމަ ފިޔަވަޅާ އެކީ ތުއްތު ޒަފްރީން ބާރުބާރަށް ރޯން ފެށިއެވެ. ހީވަނީ އެ ތުއްތު ހަށިގަނޑަށް އަނިޔާއެއްވީ ހެއްނެވެ.

“އެމަންޖެއަށް ކިހިނެއްވީ؟…” ޒުހާ ގާތަށް އަޒީމް ގާތްވެލިއެވެ.

“ނޭނގެ.. ހަމަ އެހެންހުރެފަ…ކުއްލިއަކަށް.. ހޫންހުން ހޫންހުން… ހުއްޓާލަ… ނާނަނާނަ…” ޒަފްރީން މަސަލަސް ކުރަމުން ޒުހާ ސިޓިންގް ރޫމަށް ނުކުތީ މަންޝާއަށް އުނދަގޫ ވެދާނެތީއެވެ. އަޒީމްވެސް ޒުހާއާ އެކީ ބޭރަށް ނުކުތެވެ.

“މަންޝާ އެއޮތީ ވަރަށް ބޮޑަށް ބޮލުގަ ރިއްސާތީއޯ… ކިހިނެއްތަ ވީ ހާދަވަރަކަށް އެރޮވެނީ…” ޒަފްރީނާ ގާތްވެލަމުން އަޒީމް ވާހަކަ ދެއްކިއެވެ.

“ނޭނގެ… ބަނޑުހައި ވީ ކަންނޭނގެ… އަޅެ ހުއްޓާވެސް ނުލި… މަންޝާވެސް ބަލިދޯ.. ދެން އަހަރެން ގެއަށް ދާނީ… އެކަމަކު ފުރުމުގެ ކުރިން މަންޝާއަށް ގުޅާނަން… އަޒީމް… މި ގޭގަ ހުންނާނެ ހަދިޔާ ކޮތަޅެއް އެ ހިފައިގެން އާދެބަލަ… އަހަރެން މި ނުކުންނަނީ ބޭރަށް ޓެކްސީއެއް ހޯދަން…” ކުޑަ ދަރިފުޅު ލާފަ އޮތް ފޮތިގަނޑު ރީތި ކޮށްލަމުން ޒުހާ ކޮނޑުގައި ދަބަސް އަޅުވާލިއެވެ. އެވަގުތު އަޒީމަށް އެ ހަދިޔާ ދަޅުތައް އަޅާފަހުރި ކޮތަޅު ފެނުނެވެ. ޒުހާއާ އެކީ އަޒީމް ތިރިއަށް ފޭބީ ޒުހާއަށް ޓެކްސީއެއް ހޯދައިދޭށާ އެކީގައެވެ.

އެމީހުން ގެއިން ނުކުތުމުން މަންޝާ ގައިމަތީ އަޅާފަ އޮތް ފޮތިގަނޑު ނެގިއެވެ. އޭރު މަންޝާ އޮތީ ދާހިއްލާ ފޯވެފައެވެ. ގައިގެ ހަންގަނޑު ހިރުވިނަމަވެސް ނުކަހާ ހުރެވޭތޯ އޭނާ މަސައްކަތް ކުރިއެވެ. ނަމަވެސް ކަނދުރާ މަތިން ވަރަށް ބޮޑަށް ހިރުވާތީ މަންޝާ އެދިމާ އަތުން ކަހާލިއެވެ. ޒުހާ އެގެއިން ނުކުތުމުން މަންޝާގެ ހަށިގަނޑަށް ވަމުން ދިޔަ އުނދަގޫތަކަށް ލުޔެއް ލިބުނެވެ.

ޒުހާ ގެއަށް ފޮނުވާލުމަށްފަހު އަޒީމް ގެއަށް އައިސް ވަނެވެ. އޭރު މަންޝާ ހުރީ ބަދިގޭގައި ކާން ހަދާށެވެ. މަންޝާ ތެދުވެ ހުރިތަން ފެނުމުން އަޒީމް ހައިރާންވިއެވެ. މަންޝާ ކާން ހަދަން މޭޒުކައިރީ ހުރި އިރު އޭނާ ދިޔައީ ރާގަކަށް ލަވައެއް ކިޔަމުންނެވެ.

“ފިނިފިނި ރެއަކައު، ފިނިފިނި ރެއަކައު، ތުރުތުރު މަމި އެޑަނީ،

ތެރިވެތިރާނީ ގެހުނުން މަމިރެއި ހީފަލުވެއި ދޭކެން…..”

މަންޝާ ކިޔަމުން ދިޔަ ލަވައަކީ ޒޭބާއާ އަޒީމާ އެކުގައި ހުރިރެއެއްގައި ޒޭބާވެސް ކީ ލަވައެކެވެ. މަންޝާއަކީ އެހާ ލަވަކިޔާ މީހެއްނޫނެވެ. އެހެންކަމުން އަޒީމަށް އެކަންވީ ހައިރާން ވާކަހަލަ ކަމަށެވެ. މަންޝާއާ ގާތްވަމުން އައިސް އޭނާގެ ފަހަތުގައި ހުއްޓިގެން ހުރި އަޒީމްގެ ލޮލުގަ އަޅައިގަތީ މަންޝާގެ އިސްތަށިގަނޑެވެ. މަންޝާގެ އިސްތަށިގަނޑަކީ ފަން އިސްތަށިގަނޑެކެވެ. ނަމަވެސް އެ އިސްތަށިގަނޑުގައި ހުރީ ކުދި ބުޅިކަމެކެވެ. އަޒީމްގެ ގައިން ހީބިހި ނެގިއެވެ. ކުއްލިއަކަށް ޒޭބާމަތިން ހަނދާންވާ ގޮތްވިއެވެ.

ކުރިއަށް ފިޔަވަޅު އަޅަމުން ދިޔައިރު އޭނާ ހުރީ މަންޝާއަށް ގޮވާލަންވެސް ނުކެރިފައެވެ. ހާވާލާފައިވާ އިސްތަށިގަނޑު އެއްފަރާތަކަށް ގެނެސް މަންޝާގެ ކުރިމައްޗަށް އިސްތަށިގަނޑު ވައްޓާލިއެވެ. އޭރުވެސް އެލަވައިގެ ރާގުގަނޑު އަޅުވާލައިގެންހުރެ މަންޝާ ދިޔައީ ހޫންހޫން ލައްވަމުންނެވެ. އަޒީމަށް ފެނުނު މަންޒަރުން ދެ ފިޔަވަޅު ފަހަތަށް އެޅުނެވެ. މަންޝާގެ ކަނދުރާމަތިން އަޒީމަށް ބޮޑު ލަކުނެއް ފެނުނެވެ.

“ޒެ.. ޒޭބާ…” އަޒީމަށް އެހެން ބުނެވުނީ ބޭ އިޚްތިޔާރުގައެވެ.

މަންޝާ އަޒީމާ ކުރިމަތިލާން އެނބުރުނެވެ. އެއީ ޒޭބާއެއް ނޫނެވެ. އެއީ މަންޝާކަން އަޒީމަށް ޔަގީން ވިއެވެ. “މަންޝާ ކަރަށް ކިހިނެއްވީ؟… ހާދަ ރަތްވެފަ މިހުރީ…” ކަރުދަށުގައި އަޒީމަށް ލަފެއްހެން ފެނުނުތަން ހުރީ ރަތްކޮށެވެ. މަންޝާއާ ގާތްވެލަމުން އަޒީމް ވާހަކަ ދެއްކިއެވެ.

“އާން އެއީ ދެންމެ އެތަން ކަހާލާފަ… އާދޭ ކާން… ވަރަށް ބަނޑުހައި ވެފަ ދޯ ތިހުރީ…” އަޒީމް އިށީންނަން ގޮނޑި ދަމާލަމުން މަންޝާ ވާހަކަ ދެއްކިއެވެ.

“މިހާރު ބޮލުގަ ނުރިއްސާތަ؟.. މަންޝާވެސް އާދޭ ކާން…” ގޮނޑީގައި އިށީންނަމުން މޭޒުމަތީ ހުރިތަށިތަކަށް ބަލާލަމުން އަޒީމް ވާހަކަ ދެއްކިއެވެ.

“ބޮލުގަ ރިއްސާ… އަހަރެން ދެންމެ ކައިފިން… އަޒީމް ކައިގެން އާދޭ އެތެރެއަށް…” މަންޝާ މިހެން ބުނެ ކޮޓަރި ތެރެއަށް ދާން ހިނގައިގަތެވެ.

ކައި ނިމިގެން އަޒީމް ފެން ބޮއިގެން އައިސްއަލަމާރިއަށް ފެންފުޅިލާން އަލަމާރި ހުޅުވާލިއެވެ. ކާން މޭޒުމައްޗަށް ނަގާފަ ހުރި ރެހި މަދުކަމުން އަޒީމް ބަދިގެތެރެއަށް ބަލާލިއެވެ. އައިސްއަލަމާރި ގަނޑުކުރާ ބައި ހުޅުވާލިއިރު އޭނަ އަލަމާރިތެރޭ ބެހެއްޓި ރެހި ކޮތަޅު ނެތުމުން ހިތުގައި ސުވާލެއް އުފެދުނެވެ. ޑަސްބިން ހުޅުވާލީ އަނެއްކާ މަންޝާ އެ ރެހި ކޮތަޅު ޑަސްބިނަށް ލީތޯ ޔަގީން ކުރާށެވެ. ޑަސްބިންގަ ނެތުމުން އަޒީމް ކޮޓަރިއަށް ވަނީ މަންޝާއާ އެވާހަކަ ދައްކާށެވެ.

“އައިސްއަލަމާރިގަ އިން ރެހި ކޮތަޅު ކޮބާ؟…” އަޒީމް ލައިގެން ހުރި ގަމީސް ބާލާފަ ހެދުން އަޅުވާ ތަނުގައި ގަމީސް އަޅުވާލަމުން މަންޝާއާ ވާހަކަދެއްކިއެވެ.

“ރެހި މަދުހެން ހީވީމަ އެބައިވެސް ނެގީ.. އަހަރެން އެބައި ކާލީ.. ލޮނުމިރުސް ނުލާ ހުންނައިރު އަހަންނަށް ވަރަށް މީރު… އަޒީމަށް ބެހެއްޓި ރެހިކޮޅު މަދުވީތަ… އަހަންނަށް ރެހިވަރަށް މީރު…” އެނދުގައި އޮވެ މަންޝާ ވާހަކަ ދެއްކީ އަޒީމާ ދިމާއަށް އަތުން ހަނާ އަޅަމުން އޭނަ ކައިރިއަށް އައުމަށް އިޝާރާތްކުރަމުންނެވެ. އަޒީމް އައިސް މަންޝާގެ މަގަތުގައި އޮށޯތެވެ. މަންޝާއޮތީ އަޒީމަށް ފުރަގަސްދީގެންނެވެ. ފަހަތުން މަންޝާގެ ހަށިގަނޑު ވަށާލަމުން މަންޝާގެ ބަނޑުގައި އަޒީމް ފިރުމާލިއެވެ. “ކޮން އިރަކު ޑޮކްޓަރަށް ދައްކަނީ؟… ރަށުން އައިފަހުން އަދި ޑޮކްޓަރަކަށް ނުދައްކަމެއްނު….”

“އާން.. އެކޮޅުން އެއްމަސް ދުވަހު ބޭސް ދީފަހުރީ… ދެން ދައްކަން ޖެހޭ ދުވަހު ދާން ޖެހޭނީ ޓެސްޓުތަކެއް ހަދައިގެން…. ސޯ މަސްދުވަސް ވާން ކައިރިވީމަނުން އެކަމާ އުޅޭނީ.. ދެން ހިނގާ ނިދަން… އިރުއޮއްސޭ އިރަށް ހޭލަންވެސް ޖެހެއެއްނު…” މަންޝާގެ ބަނޑުމަތީގައި ބާއްވާލާފަ އޮތް އަޒީމްގެ އަތުގައި ފިރުމާލަމުން މަންޝާ ވާހަކަ ދެއްކިއެވެ.

*** *** *** *** *** ***

ރުޅިއައިސް ރަތްވެފައި ހުރި ޒިބާނަށް ގޭގެ ދޮރާ ދިމާއަށް ބަލާލެވުނީ ސަކޭރާ ގެއަށް ވަތްތަން ފެނުމުންނެވެ. “ކޮބާ ބައްޕާ… މިކޯއެއޮއް އިރިފުހެނީ… ތިންވަނަ ދުވަސް ހަމަވީ… މަ މިނިވަން ކެރާ އޭކަށް ނިވެއި..” (ކޮބާތަ ބައްޕަ؟.. މިހާރު އެއޮއް އިރުއޮއްސުނީ… ތިންވަނަ ދުވަސް ހަމަވީ… އަހަރެން މިނިވަން ކޮށްދޭން އަންނާކަށް ނުވޭތަ؟…) ޒިބާންގެ އަޑުގައި ރުޅިވެރިކަމެއް އެކުލެވިފައިވާކަން ސަކޭރާއަށް އެނގެއެވެ. އެހެންކަމުން އޭނާ މަސައްކަތްކުރީ ޒިބާން ހަމައަކަށް އަޅުވާށެވެ.

“ޒިބާން…. ހަމަޖެހިފެލަ… ބައްޕާ އޭހެއް… ދެން މާގިނަވޭލާ ނިވެ މަންޝާއެކަހަށް ގިއޭހެއް..” (ޒިބާން.. ހަމަޖެހިބަލަ.. ބައްޕަ އަންނާނެ… ދެން މާ ގިނަ އިރެއް ނުވެ މަންޝާ ކައިރިއަށް ދެވޭނެ…) ސަކޭރާގެ ވާހަކަތަކުން ޒިބާންގާތަށް އައި ރުޅި ގަދަވިއެވެ. އޭނާގެ ހުދު އިސްތަށިގަނޑުގެ ތެރެއަށް އަތް ކޮށްޕާލަމުން ވާހަކަ ދެއްކިއެވެ.

“މަކަށް ނިއެނގެ… އަދި ކިހެއިވޭލާ ވޭހެ… މަށް ކެތަށް ނިވޭހެއް… މަންޝާށް ވޭ ކޮންމެ އުނދަގުލަށް މަށް ތެބެ އިހުސާސްވެއި.. ބޮޑޮދައިތާ ގޮއްސެލަ ބައްޕާ ހޯދާ… މި ތަޒްކިޔާދެކެ މަވަަރަށް ފޫހިވެއި…” (މަށަކަށް ނޭނގެ… އަދި ކިހާ އިރެއް ވާނެތަ؟.. އަހަންނަކަށް ކެތެއް ނުކުރެވޭނެ… މަންޝާއަށް ވާ ކޮންމެ އުނދަގުލެއް އަހަންނަށް އެބަ އިހްސާސްވޭ… ބޮޑު ދައިތަ ދޭބަލަ ބައްޕަ ބަލާ… މި ތަޒްކިޔާ ދެކެ އަހަރެންވަރަށް ފޫހިވޭ…) ޒިބާން އެ ރުޅިގަނޑުގައި ހުރެ ވާހަކަ ދައްކަމުން ދިޔަ ވަގުތު އެގެއަށް ތަޒްކިޔާ ވަނުމުން ޒިބާން ތަޒަކިޔާއާ ދިމާއަށް ބަލާލި އަނގުރުއަލިފާން ބުރަމުން ދިޔަ ރަތް ލޮލުންނެވެ.

ޒިބާންގެ ރުޅިވެރި މޫނު ފެނި ތަޒްކިޔާ ދޮރު ކައިރީ މަޑުކޮށްލިއެވެ. “ތަޒްކިޔާ ދޮގަށް ނިހެދާހެއް.. ޒިބާން އަދޮ ބިމަށް ފޭބިމެއި އެކަން ކަށަވަރޮވޭހެ… ތަޒްކިޔާ ދެއްކި ވާހަކަ އަވަ ގަބޫލުކެރަން….” (ތަޒްކިޔާ ދޮގެއް ނުހަދާނެ… ޒިބާން މިއަދު ބިމަށް ފޭބީމަ އެކަން ކަށަވަރުވާނެ.. ތަޒްކިޔާ ދެއްކި ވާހަކަ ގަބޫލުކުރަން…) ތަޒްކިޔާގެ މިލާފައިވާ މޫނު ފެނުމުން ތަޒްކިޔާ ދިފާއުކޮށް ސަކޭރާ ވާހަކަ ދެއްކިއެވެ.

“ތޭ ހީވޭހީވުމަށް… ބަލަ ތަޒްކިޔާ މާއި އެޑަގެނެގެން ހިނގާކޯ އެއަ ބޭނުންވޭށީ މަ އެހެން މީހަކާ ގުޅޭ… އޭ ތަޒްކީ ކޮޅަނަ މޮޅޮ ޑްރާމާށް… އެކަލަކިދީ މަންޝާ ދޫކޮށްފެއި މަ ތަޒްކިޔާއި އިންނަނެއި… ހަހަހަ… ސަތޭކަ ޕަސެންޓް ޔަގީންކަން މިދެނީ… މަންޝާ މަކަށް ބޭވަފާތެރިއެއް ނިވޭހެ…” (ތީ ހިވާ ހީވުމެއް… ބަލަ ތަޒްކިޔާ އަހަންނާ އަޅާއިގަނެގެން އުޅޭއިރު އޭނާ ބޭނުންވާނެތަ އަހަރެން އެހެން މީހަކާ ގުޅެން.. އެއީ ތަޒްކީ ކުޅުނު މޮޅު ޑްރާމާއެއް.. އޭރުންދޯ އަހަރެން މަންޝާ ދޫކޮށްފަ ތަޒްކީއާ ކައިވެނި ކުރާނީ… ހަހަހަ… ސަތޭކަ ޕަސެންޓް ޔަގީންކަން މިދެނީ މަންޝާ އަހަންނަށް ބޭވަފާތެރި ނުވާނެ…) ޒިބާން އޭނާގެ މޭމަތީ ޖަހާލަމުން އެހެންބުނެލީ ސާބިތުކަމާ އެކީގައެވެ.

“ތެހެއި ޔަގީންކަން އޮއްފެހޭ މަދައްކާ ވާހަކަސް ކަނޮލާއި އަޑޮއަހަފެލަ… ތަޒްކިޔާ އެބެނީ ތެދަށްފެހޭ ޒިބާން ކާއިވެނި ކެރާށް ޖެހޭނެއި ތަޒްކިޔާއި… މަށް ތަޒްކިޔާއަޚި ކިހެއިވަރެއްގެ ކޫދަކާކަން އެއިނގެން މިހެން މި ބެނަނީ… ޒިބާނަށް ތެ މަންޝާއި އެނގެނެތާން މާގިނަދުވަހަށް ވީކީ ނޫން… އެވަރުން މީހުންގެ ގޮށް ކޭއް އެނގޭށީ…” (ތިހާ ޔަގީންކަން އޮވެއްޖެއްޔާ މަދައްކާ ވާހަކަވެސް ކަނުލާ އަޑުއަހާ… ތަޒްކިޔާ އެބުނީ ތެދުކަމަށް ވެއްޖެއްޔާ… ޒިބާން ކައިވެނި ކުރަން ޖެހޭނީ ތަޒްކިޔާއާ… އަހަރެންނަށް ތަޒްކިޔާއަކީ ކިހާވަރެއްގެ ކުއްޖެއްކަން އެނގިގެން މިހެން މިބުނަނީ… ޒިބާނަށް ތި މަންޝާއެއް އެނގުނުތާ މާގިނަ ދުވަހެއް ވީކީ ނޫން.. އެވަރުން މީހުންގެ ގޮތް ކިޔަން އެނގޭތަ…)

ދޮރު ކުރިމަތިން އިވުނު އަޑަށް އެންމެން ދޮރާ ދިމާއަށް ބަލާލިއެވެ. ދޮރު މަތީ ހުދު ފޭއްޔެއްގައި ހުރި ސައިބްރޯތުގެ ލޮލުންވެސް ފާޅުވަމުން ދިޔައީ ރުޅިވެރިކަމެވެ.

(ނުނިމޭ)

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.