އަނދިރިވުމުން 9 ވަނަބައި

ކަންތައް ވަމުންދާ ގޮތުގެ ސަބަބުން ނިހާޔަތުގެ ސިކުނޑި ސުމަކަށް ދާ ވާރު ވެއްޖެއެވެ. އެހެންކަމުން އަވަސް އަވަހަށް ލައިލާމެން ގެއަށް ގޮސް ލައިލާގާތު އެވާހަކަތައް ދައްކާ އޭނާއަށް އެހީތެރިކަމާއި އެއްބާރުލުން ދިނުމަށް އެދުނެވެ.
ލައިލާގާތަށް އައިސް ނިހާޔަތު ދައްކަމުންދާ ވާހަކަތަކަކީ އަޖުމަލް އަޑުއަހާން ބޭނުންވާ ވާހަކަތަކަކަށް ނުވިއެވެ. އެހެންވެ އޭނާގެ ކިބައިން ފެނިގެން ދިޔައީ ހިތްހަމަ ނުޖެހުމުގެ އަސަރުތަކެވެ.
” ކަލެއަކީ ސުންޕާ މީހެއް ….. ކަލޭ މިގެއިން ނުކުމޭ ……. ދެން ދުވަހަކު ވެސް މިގެއަށް ނާއްނާތި …… ކަލޭ ތީ ސުންޕާ މީހެއް …. ކަލޭގެ ތިޔަ ސުންޕާކަން މިގެއަށް ވާރުތަ ވެދާނެ …. އަވަހަށް ދޭ. ” ރުޅިވެރިކަމާއެކު ނިހާޔަތަށް ބަލާން ހުރެ އަޖުމަލް އެއްޗެތި ކިޔަމުން ދިޔައެވެ. އޭރު އޭނާގެ އަޑާއި ހަރަކާތުން އަދި މޫނުމަތިން ފާޅުވަމުން ދަނީ ރުޅިވެރިކަމުގެ އަސަރުތަކެވެ.
ހެދޭނެ އެހެން ގޮތެއް ނެތުމުން ނިހާޔަތު އަނެއްކާ ވެސް ދިޔައީ އޭނާގެ ގެއަށެވެ. އެރަށުން އޭނާއަށް ކުޑަ ނަމަވެސް އެހީތެރިކަމެއް ލިބެމުންދިޔަ ލައިލާގެ ފަރާތުން ވެސް، އެހީއެއް ލިބޭގޮތް ނުވުމުން ނިހާޔަތުގެ ހާލަތު އިތުރަށް ގޯސްވިއެވެ. އެހެނަސް މިއަދަކު އޭނާއަކަށް އިތުރުގޮތެއް ނެތެވެ.
ދިމާވަމުން ދިޔަ ކަންތައްތަކުގެ ސަބަބުން އެގޭގައި އުޅޭން ބޭނުން ނޫންކަމަށް ބުނެ ބަހަނާތަކެއް ދެއްކުމަށްފަހު ސާމިރާ އެގެއިން ނުކުމެގެން ހިނގައްޖެއެވެ.
މިހާރު އެގޭގައި ދިރިއުޅެމުންދަނީ ނިހާޔަތާއި މަލްސާ އެވެ. އެނޫންގޮތެއް މެދުވެރިވޭތޯ ނިހާޔަތު ހިތާހިތުން ދުޢާ ކުރަމުން ދިޔައެވެ.
އިރުގެ ދައުރުވުމާއެކު ވަގުތުތައް ފާއިތުވަމުން އިރުއޮއްސުމާއި ދިމާއަށް ދަތުރުކުރަމުން ދިޔައެވެ. ރަށުތެރެއަށް ވެރިވަމުން ދިޔަ އަނދިރިކަމާއެކު ނިހާޔަތުގެ ހާސްކަމާއި ބިރުގަތުން އިތުރުވަމުން ދިޔައެވެ. ކަންބޮޑުވުމާއެކު ހަދާނެގޮތެއް ނޭނގިގެން އެކި ދިމަ ދިމާއަށް ދުވެވޭން ފެށިއެވެ.
އިރުއޮއްސި އަނދިރިކަން ރަށުތެރެއަށް ވެރިވުމުގެކުރިން، ގެއަށް ވަދެވެންހުރި ހުރިހާތަނެއް ލައްޕާ ތަޅުލިއެވެ. ހަމައެހެންމެ އިރުއިރުކޮޅުން އެތަންތަން ޗެކުކުރަމުން ދިޔައެވެ. އަދި ނުރައްކަލެއް އަތުވެދާނެކަމަށް ގަބޫލުކުރެވޭ ދިމާތައް އިތުރަށް ބަލަމުން ދިޔައެވެ.
ދުވަސްވަރަކީ ހަނދުމަހުގެ ތޭރަ ސާދައިގެ ދުވަސްވަރަށް ވާތީ އިރުއޮއްސި މާގިނައިރެއް ނުވަނީސް ހަނދުވަރުގެ އަލިކަން ވެރިވާން ފެށިއެވެ.
ވަށައިގެން ވެރިވެފައިވާ ކަނުއަނދިރީގެ މައްޗަށް ހަނދުވަރުގެއަލިކަން ވެރިވުމުން ނިހާޔަތަށް ކޮންމެވެސް ވަރެއްގެ ހިތްހަމަ ޖެހުމެއް ލިބުނެވެ.
ހަނދުން ދީފައިވާ ނަލަ ހަނދުވަރުގެ އަލިކަމުގެ މައްޗަށް ކަޅު އަނދިރިކަން ވެރިވާން ފެށިއެވެ. ކަޅުވިލާތަކުން ހަނދު ފޮރުވާލުމާއެކު ވައި ގަދަވާން ފެށިއެވެ. ފުރާޅުމަތީގަ މީހަކު އުޅޭކަހަލަ އަޑެއް އިވޭންފެށުމާއެކު ވިދާ ގުގުރާ ވާރޭ ވެހެން ވެސް ފަށައިފިއެވެ. ޖަހާލާ ގުގުރީގެ އަޑު ބާރުކަމުން މަލްސާ އިރުކޮޅަކުން ރޮއިގަނެއެވެ. އެފަދަ ކޮންމެ ފަހަރަކު އެހެން ވެސް ތުއްތު ކުއްޖެއްގެ ރުއިމުގެ އަޑު އިވޭކަމުގައި ނިހާޔަތަށް ގަބޫލުކުރެވޭން ފެށިއެވެ. ހަމައެހެންމެ ބައެއް ފަހަރު އަންހެނަކާއި ފިރިހެނެއްގެ ހުނުމުގެއަޑު ކަހަލަ އަޑެއް ވެސް އިވޭހެން ނިހާޔަށް ހީވަމުން ދިޔައެވެ. އެގޮތުން އިވެމުންދާ ފިރިހެން އަޑަކީ ސިފާންގެ ހުނުމުގެ
އަޑު ކަމުގައި ވެސް ނިހާޔަތަށް ގަބޫލުކުރެވެމުން ދިޔައެވެ.
އެތަނުގަ ގިނައިރު މަޑުކުރާނަމަ ނުރައްކާތެރިކަން އިތުރުވެގެން ހިނގައިދާނެ ކަމުގައި ނިހާޔަތަށް ގަބޫލުކުރެވޭން ފެށިއެވެ.
އެތައް އިރަކު ވިސްނާން ހުރުމަށްފަހު ކޮންމެގޮތެއް ވިޔަސް ހެޔޮކަމަށް ނިންމާފައި މަލްސާ ގޮވައިގެން ނިހާޔަތު ގެއިން ނުކުތެވެ. އަދި އަވަސް އަވަހަށް މަގާއި ދިމާއަށް ދުއްވައިގަތެވެ.
މަގަށް ނުކުތުމަށް ދުވެފައިއައި ނިހާޔަތުގެ ފިޔަވަޅުތަކަށް ހުއްޓުންއައީ ކާރެއް އައިސް ދޮރޯށިކައިރިއަށް މަޑުކުރުމުންނެވެ. ކާރު މަޑުކުރުމާއެކު ނިހާޔަތުގެ ރައްޓެހި ޑޮކްޓަރާއި މުސްކުޅިވަރުގެ ފިރިހެނަކު ކާރުން ފޭބިއެވެ.
މުޅި ބޯ ނުރަވެފައިވާ އެމުސްކުޅިޔާގެ އަތުގައި ދުވަސްވީ ބާ ފޮތްތަކެއް ވެސް ހުއްޓެވެ.
” ޑޮކްޓަރ …… ޑޮކްޓަރ ….. އަހަރެން ސަލާމަތް ކޮށްދެއްވާ ” ދުވެފައި ގޮސް އެދެމީހުން ގާތަށް ހުއްޓި ރޮއިގަންނަ ފަދައަކުން ނިހާޔަތު ވާހަކަ ދެއްކިއެވެ. އޭރު މަލްސާ އިނީ ރޮއި ރޮއި ގިސްލެވިފައެވެ.
” ނިހާޔަތު! ހާސް ނުވޭ … އިރާދަ ކުރެއްވިއްޔާ ހުރިހާ ކަމެއް ވެސް ރަނގަޅުވާނެ. އަހަރުމެން މިއައީ ނިހާޔަތު ތިކަމުން ސަލާމަތްކޮށްދޭން ……….. މިއީ ކާސިންފުޅު. މީނާ އަކީ ތިކަހަލަ ކަންކަމާބެހޭ މަޢުލޫމާތު ވަރަށް ރަނގަޅަށް ދަންނަ އަދި ތިފަދަ އެތައް ކަމަކުން މީހުން ސަލާމަތް ކޮށްފައިވާ ކުޅަދާނަ އިލްމުވެރިއެއް ….. އިރާދަ ކުރެއްވިއްޔާ މިފަހަރު ވެސް ކާމިޔާބު ވާނެ. ” ނިހާޔަތަށް ކާސިންފުޅު ދައްކަމުން ޑޮކްޓަރ ވާހަކަ ދެއްކިއެވެ.
” ބޭބޭ! އަހަރުމެން މިކަމުން ސަލާމަތްކޮށްދީ. އާދޭސްކޮށްފައި ބުނަން އަހަރެންނަށް އެހީވެދީ. ” ކާސިންފުޅަށް ބަލާލަމުން ނިހާޔަތު ވާހަކަ ދެއްކިއިރު ދެލޮލުން ކަރުނަ އޮހޮރެމުން ދިޔައެވެ.
” ދެރަނުވޭ ކޮއްކޯ. އިރާދަ ކުރެއްވިއްޔާ މިފަހަރު ތިކަމުން ސަލާމަތް ކޮށްދޭނަން. ” ނިހާޔަތުގެ ބޮލުގައި ފިރުމާލަމުން އުންމީދާއި ޔަގީންކަމާއެކު ކާސިންފުޅު ބުންޏެވެ.
ކާސިންފުޅު ހިނގައިގަތީ ގޭތެރެއަށް ވަންނާށެވެ. އޭނާގެ ފަހަތުން ޑޮކްޓަރ ހިނގައިގަތުމުން ނިހާޔަތު ވެސް ހިނގައި ގަތެވެ. މަލްސާ އޮތީ ނިހާޔަތުގެ ކޮނޑުމަތީގައެވެ.
ވެހެމުންދިޔަ ބޯ ވާރޭ ތުނިކޮށްލާފައި ވީ ނަމަވެސް ބާރު ވަޔާއި ވިދާ ގުގުރުމަށް މާބޮޑު ބަދަލެއް ނާދެއެވެ.
ގޭތެރެއަށް ވަދެވުމާއެކު ކާސިންފުޅު އޭނާގެ އަތުގައިވާ ފޮތްތަކުން ފޮތެއް ހުޅުވާލިއެވެ. އަދި ނިހާޔަތަށް ބަލާލަމުން އޭނާގެ ކޮޓަރި ދެއްކުމަށް އެދުނެވެ. ކާސިންފުޅު އެހެން ބުނުމާއެކު ނިހާޔަތު އަތުގެ އިސާރާތުން ކާސިންފުޅަށް އެކޮޓަރި ދައްކާލިއެވެ. އޭރު ވެސް ނިހާޔަތު ހުރީ ބިރުންކަން އޭނާގެ ހަރަކާތްތަކުން ކިތަންމެ ރަނގަޅަކަށް ވެސް އެނގެއެވެ.
ކާސިންފުޅު ގޮސް ކޮޓަރީގެ ދޮރު ހުޅުވާލުމާއެކު ސީލިންގްފަންކާ ވިއްސައިގެން ގޮސް ކުޑަދޮރުގަ ޖެހި ބިއްލޫރިތައް ފުނޑު ފުނޑުވެގެން ފޭބިއަޑު ޖައްވުގެތެރެއަށް ފެތުރިގެން ދިޔައެވެ. ފެނުނުމަންޒަރާއި އިވުނު އަޑުތަކުގެ ސަބަބުން ނިހާޔަތުގެ ބިރުގަތުން އިތުރުވެގެން ގޮސް ހަޅޭލަވައި ގަނެވުނެވެ.
” ހަމަޖެހޭ. ” ނިހާޔަތަށް ބަލާލުމަށްފަހު ކޮޓަރިއަށް ވަންނަމުން ކާސިންފުޅު ބުންޏެވެ.
ކާސިންފުޅު ދިޔަގޮތަށް ގޮސް ނެގީ މޭޒުމަތީއިން ޓޯޗްބައްތި އެވެ. ޓޯޗްބައްތި ނަގައިގެން ދޮރާއި ދިމާއަށް އެނބުރިލުމާއެކު ހޮޅިބުރި ފުނޑު ފުނޑުވެގެން ބިންމައްޗަށް ފޭބިއެވެ. އެއާއެކު މުޅިތަނަށް ވެރިވެގެން ދިޔައީ ކަނު އަނދިރިކަމެވެ.
” ނިހާޔަތު! ކެތްތެރިވެ ހަމަޖެހޭތި. މިއީ އަދި އެއްވެސް ކަމެއް ނޫން. ” ބައްތިން އަލިކުރަމުން ނިހާޔަތުމެނާއި ދިމާއަށް އަންނަމުން ކާސިންފުޅު ވާހަކަ ދެއްކިއެވެ.
ކާސިންފުޅު އެގޭގެ އެތަންމިތަން ބަލަމުން ނިހާޔަތު ގާތުން މަޢުލޫމާތު ހޯދަމުން ދިޔައެވެ.
” ނިހާޔަތު! ތިބުނާ ފިރިހެން މީހާގެ އަޑަކީ ސިފާންގެ އަޑުކަން ނިހާޔަތަށް ހަމަ ޔަގީންތަ ؟ ” ނިހާޔަތަށް ބަލާލަމުން ކާސިންފުޅު ޔަގީން ކޮށްލިއެވެ.
” އާން ….. އެއީ އަހަރެންގެ ފިރިމީހާ ސިފާންގެ އަޑުކަން އަހަރެންނަށް ޔަގީން. ” މަޑުމަޑުން ނިހާޔަތު ބުނެލިއެވެ.
ފެންޑާތެރޭ ކުޑަދޮރުތަކުން ދޮރެއްގެ ދޮރުފަތް އެއްވެސް މީހެއްގެ އެހީއަކާނުލާ ހުޅުވުމަށްފަހު ވަރަށް ބާރަށް ލެއްޕުނެވެ. އެއާއެކު ދޮރުފަތުގެ ބިއްލޫރިތައް ފުނޑު ފުނޑުވެގެން ފެންޑާތެރެއަށް ބުރައިގެން ދިޔައެވެ.
ނުނިމޭ