އަނދިރިވުމުން

ހަތަރުވަނަބައި

ނިހާޔަތުމެން ދޯނިން ފޭބުމާއެކު މެދުއުމުރުގެ އަންހެނަކު އައިސް އަސްރާ އުރާލިއެވެ. ހަމައެހެންމެ ނިހާޔަތުގެ މޫނަށް ބަލާލަމުން ހާލު ކިހިނެތްތޯ އަހާލި އެވެ. އޭރު އޭނާގެ މޫނުމަތިން ފާޅުވަމުންދަނީ އުފަލާއި ހިތްހަމަޖެހުމުގެ އިތުރުން ގާތްކަމާއި އޯގާތެރި ކަމެވެ.
އަސްރާ އުރައިގެންހުރެ ނިހާޔަތާއި ވާހަކަދައްކަމުންދާ އަންހެންމީހާ އަކީ ސިފާންގެ މަންމައާ އެއްބަނޑު އެއްބަފާ މީހެއްކަމާއި ސިފާންގެ ބޮޑުދައިތަ ފާރިސާ ކަމަށް ނިހާޔަތުގާތު ސިފާން ބުންޏެވެ. އަދި ދެމީހުން ދެމީހުންނަށް ތަޢާރަފް ކޮށް ދިނެވެ.
ނިހާޔަތުގެ މޫނުމަތިން ވެސް ފާޅުވަމުންދަނީ އުފަލާއި ހިތްހަމަޖެހުމުގެ އަސަރުތަކެވެ.
ސިފާންއާ ކުޑަކޮށް ވާހަކަދައްކާލުމަށްފަހު އަސްރާއާ ނިހާޔަތު ގޮވައިގެން ފާރިސާ ދިޔައީ އޭނާގެ ގެއަށެވެ.
ސިފާން ހަރަކާތްތެރިވަމުން ދިޔައީ ގެނައިތަކެތި ގެއަށް ގެންދާށެވެ. މުޅި ދިރިއުޅުން ބަދަލުކުރާތީ ގެނައި ސާމާނު ވެސް އެހާމެ ގިނައެވެ. އެމަސައްކަތްތަކުގައި އޭނާގެ ބައެއް ރައްޓެހިން ބައިވެރި އެހީތެރިކަމާއި އެއްބާރުލުން ދެމުންދިޔައެވެ.
ގެނައި ހުރިހާ ސާމާނު ގެއަށް ގެންގޮސް ތަރުތީބުން އަތުރާލިއެވެ. އޭރު އެގޭތެރޭން ފެންނަމުންދަނީ ފުރިހަމަކަމާއި ރީތިކަމެވެ.
ސިފާންމެންގެ ގެއަކީ ރަށުގެމީހުން ދިރިއުޅެމުންދާ ގެތަކާއި ތަންކޮޅެއް ދުރުގައި ހުރި ގެއެކެވެ. ހަމައެހެންމެ އެރަށުގައި ދިރިއުޅެމުންދާ އޭނާގެ ޢާއިލާމީހުން ވެސް ދިރިއުޅެމުން ދަނީ އެރަށުގެ އަނެއްކޮޅުގައެވެ. އެކަންކަމާމެދު ސިފާން ކޮންމެވެސް ވަރަކަށް ކަންބޮޑުވި ނަމަވެސް ނިހާޔަތު ކަންބޮޑެއް ނުވެއެވެ.
މިދުވަސްވަރު ސިފާނަށް ރަށުގައި މަޑުކުރެވޭން ނެތުމުން ނިހާޔަތުމެނާއި އެކުގައި މިދުވަސްވަރު އެގޭގައި މަޑުކުރުމަށް، ފާރިސާމެން ގޭގައި ގެންގުޅޭ އިންޑިޔާ އަންހެންމީހާ ސާމިރާ އެގެއަށް ފޮނުވިއެވެ.
އެހިސާބަކީ ވަރަށް ގަސްގިނަ ޖަންގަލިބޯ ހިސާބެކެވެ. ހިރުނދުގަހާއި މިދިލިގަހާ އުނިގަސްފަދަ ގަސްތައް އެ ހިސާބުގައި ވަރަށް ގިނައެވެ. ހަމައެހެންމެ ފާޑުފާޑުގެ ވިނަތައް ވެސް އެހިސާބުން ފެންނަމުން ދިޔައެވެ. ގެއަށް އައިސް ގޮސް ވާން އޮންނަނީ ވެސް ހިމަހިމަ މަގެކެވެ.
ވަށައިގެން ގަސްހެދިފައިވާ އެސަރަހައްދުގައި ބިނާކޮށްފައިވާ އެގޭގެ ރީތިކަމާއި ފުރިހަމަކަމުން އެހިސާބަށް އިތުރު ރީތިކަމަކާއި ފުރިހަމަކަމެއް ލިބިފައިވެއެވެ. އެގޭ ގޯތިތެރޭން ގޭ ކުރިމަތީގައި ވެސް މިދިލިގަހެއް ހައްދާފައި ހުއްޓެވެ. ހަމައެހެންމެ އެގޭ ފުރަގަހުގައި ވެސް ވަރަށްގިނަ ވައްތަރުތަކުގެ ގަހާއިވިނަ ހައްދާފައި ހުއްޓެވެ. އޭގެތެރޭގައި ކެއުމަށް ބޭނުންކުރާ ބާވަތްތައް ވެސް ހިމެނެއެވެ. މާމެލާމެލިފަދަ ޒީނަތްތެރިކަމަށް ބޭނުން ކުރާ ބާވަތްތައް ވެސް މަދެއްނޫނެވެ. އެރީތި އެހާމެފުރިހަމަ މާހަޢުލަކީ ނިހާޔަތުގެ އިތުރުން އަސްރާ ވެސް ވަރަށް ގަޔާވާ މާހަޢުލަކަށް ވިއެވެ.
ސިފާންގެ ފަހަތުން ކަހަލަގޮތަކަށް އަސްރާ އުރައިގެން ސާމިރާ ވެސް ގޭތެރެއަށް ވަނެވެ.
ގޭ ކުރިމަތީގައިހުރި މިދިލިގަހަށް ބަލަހައްޓައިގެން ގަސްކައިރީގަ ނިހާޔަތު ހުއްޓެވެ. އޭރު އެގަހުގެމަތީގައި ވާލާއި ކާޅުފަދަ ދޫނިސޫފާސޫފި އުދުހެމުން ދިޔަ އެވެ.
ނިހާޔަތުމެން ގެކައިރިއަށް ބޭލުމަށްފަހު ކާރު ހިނގައްޖެއެވެ. އޭރު ސިފާންގެ ސައިކަލް ވެސް ގެކައިރިއަށް ގެނެސްފައި ހުއްޓެވެ.
މިދިލިގަހާއި ދިމާއަށް ބަލަހައްޓައިގެންހުރި ނިހާޔަތަށް އެންމެ ބޮޑު ސަމާލުކަމެއް ދެވުނީ އެގަހުގެ ގޮފިގަނޑެއްގެ މަތީގައި ހަދާފައިވާ ހާއްޔަށެވެ.
ކުޑައިރުކޮޅަކު އެތަނުގައި މަޑުކުރުމަށްފަހު ނިހާޔަތު ވެސް ގޮސް ގޭ ތެރެއަށްވަނެވެ. އަދި ގޭތެރެއަށާއި ގޭތެރޭގައިވާ ތަކެއްޗަށް ނަޒަރު ހިންގާލިއެވެ. އެގޭ ތެރޭންނާއި ތަކެތިން ފެންނަމުން ދަނީ ރީތިކަމާއި ފުރިހަމަ ކަމެވެ.  
” ކޮބާ .. މިގެ ރަނގަޅުތަ ؟ ” ބަދިގެބައި ބަލާލުމަށްފަހު އެތަނުން ނުކުންނަމުން ނިހާޔަތަށް ބަލާލާފައި ސިފާން އަހާލިއެވެ.
” އާން … ވަރަށް ސަޅި. ” ސިފާނަށް ބަލާލާފައި ހިނިތުންވަމުން ނިހާޔަތު ޖަވާބު ދިނެވެ.
” މިހާރު ނުބެލެނީ ނިހާޔަތުގެ ކޮޓަރި އެކަނިދޯ. ހިނގާދާން އެތަން ވެސް ބަލާލާން. ” ނިހާޔަތަށް ބަލާން ހުރެ ސިފާން ވާހަކަ ދެއްކިއެވެ.
” އެއީ އަހަރެންގެ އެކަނި ކޮޓަރިތަ ؟ ” ސިފާނަށް ބަލާންހުރެ ހިނިތުން ވެލަމުން ނިހާޔަތު އެހިއެވެ.
” އާން ….. އަހަރެން ރަށުގައި ނުހުންނައިރު ނިހާޔަތު އެކަންޏެއްނު އެތަނުގައި އުޅޭނީ. އެހެންވީމަ ވާނީ ނިހާޔަތުގެ ކޮޓަރިއަކަށްނު. ” ހިނިތުންވެލަމުން ސިފާން ބުނެލިއެވެ.
ސިފާންގެ ފަހަތުން ކަހަލަގޮތަކަށް ނިހާޔަތު ވެސް އެކޮޓަރިއަށް ވަނެވެ. އަނެއް ދެކޮޓަރީގައި ކުޑަ ދެއެނދު ހުރި ނަމަވެސް މިކޮޓަރީގަ ހުރީ ބޮޑު އެއްއެނދެވެ. ބޮޑު އަލަމާރިއަކާއި ރީތިވާ ސާމާނު ބަހައްޓާ މޭޒެއްވެސް ހުއްޓެވެ. ކޮޓަރީގަ ތަކެތި ގިނަ ނަމަ ވެސް ޖާގަބޮޑުވެފައި ތަނަވަހެވެ. ކޮޓަރިއަށް ވަނުމުން ވެސް ނިހާޔަތަށް ހިތްހަމަޖެހުން ލިބިގެން ދިޔައެވެ.  
” ވަރަށް ރީތި. އެހާމެ ފުރިހަމަ ” ހިނިތުންވުމާއިއެކު ސިފާންގެ ކޮޑުގައި އަތްއަޅާލަމުން ނިހާޔަތު ބުނެލިއެވެ.
” އެހެންތަ ؟ ” ނިހާޔަތުގެ ދެއަތުގައި ހިފަހައްޓާ އޭނާއާ ގާތަށް ދަމާލަމުން ސިފާން އަހާލިއެވެ.
ކޮންމެ ފަސްދޮޅަސް މިނިޓަކުން ގަޑިއެއް ފާއިތުވަމުން ވަގުތުތައް ދައުރުވަމުން ދިޔައެވެ. ނިހާޔަތުމެނާއި އެކުގައި ވަގުތުކޮޅެއް ހޭދަކޮށްލުމަށްފަހު ސިފާން މާލެ ދިއުމަށްޓަކައި ކައިރި ރަށަކަށް ދިއުމަށް ފުރާންވެގެން ހިނގައްޖެއެވެ. މާދަމާ ހެނދުނު ސިފާން ފިހާރައިގެ ވަޒީފާއަށް ނުކުންނާން ޖެހޭތީ އޭނާ ރަށަށްއައީ ކައިރި ރަށަކުން މިރޭ މާލޭ ދެވޭނޭހެން ހަމަޖައްސާފައެވެ. އިރުއޮއްސުމަށްފަހު ދަތުރުކޮށްދޭނެ ފަރާތެއް ނުލިބުމުން ސިފާނަށް ޖެހުނީ އިރުއޮއްސުމުގެ ކުރިން އެ ރަށަށް ދާށެވެ.
އެވަރަކުން ސިފާން އައީ ވެސް ނިހާޔަތު އެކަނި އައިސް އެހުރިހާ ކަމެއް ހަމަޖައްސާން ފަސޭހަ ނުވާނެތީ އާއި ވެސް އެކުގައެވެ.
ސިފާން ފުރައިގެން ދިޔައީ ޗުއްޓީގެކަންތައް ހަމަޖެހުނުހާ އަވަހަކަށް ނިހާޔަތުމެން ކައިރިއަށް ރަށަށް އަންނާނެ ކަމަށް ބުނެފައެވެ. ހަމައެހެންމެ ވަރަށްއަވަހަށް ޗުއްޓީގެކަންތައް ހަމަޖެހޭނެ ކަމަށް ލަފާކުރެވޭ ކަމަށް ވެސް ބުންޏެވެ. އެހެންވެ ނިހާޔަތާއި އަސްރާ ތިބީ ވަރަށް ހިތްހަމަޖެހި އުފާވެފައެވެ.
ސިފާންއާ ވަކިން ދިރިއުޅުމަކީ ނިހާޔަށް އާކަމެއް ނޫނެވެ. ހަމަ އެހެންމެ އެހާ އުނދަގޫކަމެއް ވެސް ނޫނެވެ. ކުޑަކޮށް ވެސް ވިސްނާން ޖެހެނީ މާހަޢުލު ތަފާތުވުމުން ނެވެ. ޙަޤީޤަތް ނޭނގޭ ރަށެއްގައި އެކަހެރި ހިސާބެއްގައި އެކަނި އުޅޭންޖެހޭތީ އެވެ. އެހެނަސް އެކަމަކީ ވެސް ހައްލުވާނެ ކަމެއްކަމުގައި ނިހާޔަތަށް ގަބޫލުކުރެވެއެވެ.
އެސަރަހައްދުގައި ބައިވަރު ގެތަކާއި ގެވަޅުތައް ހުރި ނަމަވެސް އެއިން އެއްވެސް ތަނެއްގައި މީހަކު ނޫޅެއެވެ. މިހާރު އެހެން ހުރިނަމަވެސް ކައިރިމުސްތަޤުބަލެއް ގައި އެހިސާބު އާބާދުވާނެކަމުގައި ނިހާޔަތަށް ގަބޫލުކުރެވެއެވެ.
ވަގުތުތައް ފާއިތުވަމުން އައިސް ރޭގަނޑު އަށްގަޑިތިރީސްކަން ހާއިރެވެ. ރޭގަނޑުގެ ކެއުން ނިންމާލުމަށްފަހު، އަސްރާ ގޮވައިގެން ސާމިރާ ދިޔައީ ކޮޓަރިއަށެވެ. ސާމިރާ އާއި އަސްރާ އުޅުމަށް ހަމަޖައްސާފައިވަނީ އެއްކޮޓަރިއެއްގައެވެ.
ނިހާޔަތަކީ ނޫސް މަޖައްލާފަދަ ތަކެތި ކިޔުމަށް ނުހަނު ޝައުޤުވެރިވާ ޒުވާނެކެވެ.
ހަތަރހަހހހ