ވާތީ ހިތަކު ލޯބި މަންމަންވެފާ 60

~ވާތީ ހިތަކު ލޯބި މަންމަންވެފާ ކިޔުއްވާ ހުރިހާ ކިޔުންތެރިންނަށް عيد مبارك🩶~

ކައިވެނީގެ ހަފުލާގެ ބާކީ އޮތްބައި ދެން ކުރިއަށް ދިޔައީ ވަކިން އުފާވެރިކަމާއި އެކުގައެވެ. އަލަށް ކައިވެނި ކުރެވުނު ޖޯޑާއި ކައިވެނި ކުރަން ތައްޔާރީތައް ފެށުނު ޖޯޑަށް މަރުހަބާ ކިޔުމައް ފަހު، ފޮޓޯތައް ނަގާ އެ އުފާވެރި ރޭ ހަނދާނުގެ ފޮތުގައި ރައްކާ ކުރިޔެވެ. މަޖަލާއި ސަކަރާތުގައި އުޅިފައި ހަފުލާ ނިމުން އިރު 30 12 ވާން އުޅެޔެވެ.

(60 ވަނަ ބައި)

ކައިވެނީގެ ހަލަބޮލި ހަފުލާއަށްފަހު، މީކައިލްއާއި ވިޝާޔާ އެމީހުންގެ ކޮޓަރިއަށް ވަދެގެން ދިޔައިރު، އެތަނުން ފެނުނު މަންޒަރުން މުޅި ހަށިގަނޑަށް ތާޒާކަމާއި ހިތްހަމަޖެހުން ގެނެސްދިނެވެ. މުޅި ކޮޓަރި ފަރުމާ ކޮށްފައިވަނީ ކައިވެނީގެ “ކެރެމެލް ބްލަޝް” ތީމާ ނުހަނު ގުޅޭގޮތަށެވެ. ކޮޓަރީގެ ފާރުތަކުގައި ހުރި މަޑު އޮރެންޖު އަދި ރަންކުލައިގެ އަލިތަކުން މުޅި މާހައުލު ވަނީ އުޖާލާވެފައެވެ. ދޮރު ހުޅުވާލުމާއެކު ނޭފަތުގައި ޖެހުނީ ތާޒާ ފިނިފެންމަލާއި، މީރުވަސްދުވާ އުއްބައްތިތަކުގެ ހިތްގައިމު ވަހެވެ.

ކޮޓަރީގެ މެދުގައި ހުރި ބޮޑު އެނދު ވަނީ ވަރަށް ފުރިހަމައަށް ތައްޔާރުކޮށްފައެވެ. އެނދުގައި އަޅާފައިވަނީ ކެރެމެލް ކުލައިގެ މަޑު ފަށުވި ‘ސިލްކް’ ފޭރާމުގެ ބެޑްޝީޓެކެވެ. އޭގެ މަތީގައި އަތުރާލެވިފައިވާ ބްލަޝް ޕިންކް ކުލައިގެ ބާލީސްތަކުން އެނދަށް އިތުރު ފުރިހަމަކަމެއް ގެނެސްދެއެވެ. އެނދުގެ މެދުގައި ފިނިފެންމަލުގެ ފިޔަވަތަކުން ހިތެއް ކުރަހާފައިވާއިރު، އެނދުގެ ދެފަރާތުގައި ހުރި ކުދި މޭޒުތަކުގެ މަތީގައި ކެރެމެލް ކުލައިގެ ބިއްލޫރި ފުޅިތަކެއްގައި ހުރި ފިޔާތޮށިކުލައިގެ މާތައް ފެންނަނީ ނުހަނު ލޯބިކޮށެވެ. އެނދުގެ ފަހަތު ފާރުގައި ރަންކުލައިގެ ލެޓަރިންގް އިން “މީކައިލް އެންޑް ވިޝާޔާ” ޖަހާފައިވަނީ ވަރަށް ފަރުވާތެރިކަމާއެކުގައެވެ.

ކޮޓަރީގެ އެއްކަނެއްގައި ހުރި ސޯފާ ސެޓާއި ކުޑަ މޭޒުމަތިވެސް ވަނީ ހަމަ އެ ތީމަށް ޒީނަތްތެރިކޮށްފައެވެ. މޭޒުމަތީގައި ބަހައްޓާފައިވާ މޭވާގެ ވަށިގަނޑާއި، އެކި ވައްތަރުގެ ޗޮކްލެޓްތައް ހުރީ ކެރެމެލް ކުލައިގެ ރިބަނުން ޖަރީކޮށްފައެވެ. ކޮޓަރީގެ ބޮޑު ކުޑަދޮރުގެ ފޮތިގަނޑުތައް ހުރީ ކެރެމެލް އަދި ބްލަޝް ކުލައިގެ ލޭޔަރުތަކަކަށެވެ. ކުޑަދޮރުން ބޭރު ބަލާލުމުން ފެންނަނީ ހަނދުވަރުގެ ރީތި އަލި ކަނޑުގެ ލޮނުގަނޑަށް އެޅިފައިވާ މަންޒަރެވެ. އެ އަލި ކޮޓަރީގެ ތެރެއަށް ފޭދިގެން އައިސް ކޮޓަރީގައި ހުރި ކޮންމެ އެއްޗެއްގައި ބީހިލުމުން، މުޅި މާހައުލަށް ގެނެސްދެނީ ބުނެދޭން ނޭނގޭ ފަދަ އާދަޔާ ޚިލާފު ރީތިކަމެކެވެ.

ވިޝާޔާ އޭނާގެ ދިގު، ދޫ ހެދުމާއެކު ކޮޓަރީގެ ތެރޭގައި ހިނގާލާއިރު، އޭނާގެ ހެދުމުގެ ފަސްބައި ކެރެމެލް ކުލައިގެ ކާޕެޓް މަތީގައި ކޭތެމުންދާ އަޑު މަޑުމަޑުން އިވެއެވެ. މީކައިލް އޭނާގެ ކޯޓު ބޭލުމަށްފަހު، މި ހިތްގައިމު މާހައުލުގައި ވިޝާޔާއާއި ދިމާލަށް ބަލާލީ ފުން ލޯތްބަކާއެކުގައެވެ. މި ކޮޓަރީގެ ކޮންމެ ކަނެއް، ކޮންމެ މަލެއް އަދި ކޮންމެ އަލިކަމެއް ފަރުމާކޮށްފައިވަނީ އެދެމީހުންގެ ހަޔާތުގެ މި އާ ފެށުން ފާހަގަކުރުމުގެ ގޮތުންނެވެ.

ވިޝާޔާ އެނދުގައި ބައިންދާފައި މީކައިލް އޭނާ ގާތުގައި އުޑަފައިން އިށީނެވެ. އޭނާގެ އުނގުގައި ބޯ އަޅާލި އިރު، އެދެލޮލުގައި ކަރުނައިގެ މުތީތައް ބަބުޅަމުން ދިޔައެވެ. “ހިތައް އަރާ… މި މަންޒަރު ދެކެން މަންމަމެން ދުނިޔޭގަ ހުރި ނަމައޭ… އަހަރެން ފިރިއަކަށްވެ، މިކީ ހިތުބާ ކުރެވުނީ ހަމަ އެއް ރެޔަކު.. މިރޭ މަންމަމެން ތިބި ނަމަ ހާދަ އުފާވީހޭ…” ރޮމުން ރޮމުން ވިޝާހާގެ މޭގެތެރޭގައި ބޮނޑިވެލަމުން މީކައިލް އެހިތުގެ ޝަކުވާ ކޮށްލިއެވެ.

“ހުއްޓާލާ. އިންޝާ ﷲ މިހާރު މަންމަމެންވާނީ މިދުނިޔެއަށް ވުރެ މާ ރަނގަޅު ތާކު. މިއަދު މަންމަމެން ވަރަށް އުފާވާނެ. ތިކަހަލަ ރަނގަޅު ފިރިޔަކަށް ކައިލްވީތީވެސް” މީކައިލްގެ ބޮލުގައި ބޮސް ދެމުން ވިޝާހާ ބުނެލިއެވެ.

“ދެން މި އުފާވެރި ރޭ ރުއިމެއް ނެތެއްނުން ދޯ؟ ހިނގާބަލަ ދެން ނަމާދު ކޮށްލަން. އެބަ އޮތޭ ހަދިޔާއެއްވެސް..” ހީނލަމުން ވިޝާހާ ބުނެލިއެވެ. މީކައިލް ބޯ ޖަހައިލިއެވެ. ދެމަފިރިން އެކުގައި ކައިވެނީގެ ފުރަތަމަ ރޭ ކުރާ ނަމާދު ކޮށްލިއެވެ.

“ކައިލް މަޑު ކުރައްޗޭ އިނގޭ؟ ޝާހާ އެބަ އަންނަން ފާހަނަ ކޮށްލައިގެން” މީކައިލްގެ ނިތުގައި ބޮސް ދެމުން ވިޝާހާ ބުނެލިއެވެ. ބޯ ޖަހާލަމުން މީކައިލް ގޮސް އެނދުގައި އިށީނެވެ. ވިޝާހާ ފަދަ އަންބަކު ލިބުމުން ހާސް ފަށުން މާތް ﷲ އަށް ހަމްދު ކުރެވުނެވެ.

އެޙިޔާލު ތަކުގައި އިން މީކައިލް އިސް އުފުލާލީ ފާހާނާ ދޮރު ހުޅުވާލި އަޑަށެވެ. ކުރިމަތީގައި ހުރި ވިޝާހާ ފެނި އޭނާގެ ދެލޯ ވިދާލިއެވެ. ކިރިޔާ ބުޑު ނިވާ ވާރުގެ ކުރު ހެދުން ކޮޅެއް ލައިގެން ނިކުން ވިޝާހާ ފެނި އޭނާގެ ހިއްސުތައް ހޭލަން ފެށިއެވެ. ލައިގެން ހުރި ޓީޝާޓު ބާލަމުން އޭނާ ވިޝާހާއާއި ދިމާލަށް ފިޔަވަޅެއް އަޅައިލިއެވެ.

****

އިރު އޭގެ ރަންދޯދިތައް ދުނިޔެއަށް ދައްކާލި އިރު ޒާލާ އޮތީ ނިދިފައެވެ. މުޅި ކޮޓަރެ ވަނީ އެއްވެސް ތަރުތީބެއް ނެތިއެވެ. ގިނަ ބާލިސްތަކަކާއި ފޮތިގަނޑުތައް ހުރުމުން އެކަމުން އަންގައިދެނީ، އެތަނުގައި އެރޭ އެހެން ބަޔަކުވެސް ނިދިކަމެވެ. އިރުކޮޅެއް ފަހުން ދޮރު ހުޅުވާލާފައި އިނާރާއާއި ދުއާ ވަނެވެ. އަތުގައި ޗޮކޮލެޓް ކޭކެއް އޮތް އިރު އޭގައި އައިސިންގިން ‘އަޕް ފޯރ އަ ނިއު ޗެޕްޓާރ’ ޖަހާފައި އިނެވެ. ކޭކު ގެންގޮސް އެނދު ކައިރީގައި އިން މޭޒުގައި ބައިންދާފައި އޭނާ ގޮސް ޒާލާ ގާތުގައި އިށީނެވެ.

(ނުނިމޭ)

ފަސްދޮޅަސްއެއްވަނަބައިގެ ތެރެއިން:

“އާދަމް އަޒީން ކިޔަނީ. ކިޑްނީ ފެއިލް ވެގެން. ނޭކުރެންދޫ ބައެއް އެއީ. މިއަދު މިކޮޅަށް އައީ” އަޒީންގެ ކޭސް ފައިލް ޒާލާ އަތައް ދެމުން ފައިހާ ބުނެލިއެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.