ފުންއަސަރު 04

ެ. ބަދިގެ ތެރޭ ލައިޓް އަލިގަދަ ކޮށްލާފައި ހުރިނަމަ އެމީހެއްގެ މޫނު ވަރަށް ރީތިކޮށް ޒޯހަންއަށް ފެންނާނެއެވެ. އެކޮޓަރިއާއި ދިމާލަށް ބަލަން އިރުކޮޅަކު މަޑުކޮށްލައިގެން ހުރުމަށްފަހު ޒޯހަން ކޮޓަރިއަށް ވަނީ ލަތާ ކައިރީގައި މިވާހަކަތައް ދައްކަން ހިތު އަޅައިގެން ހުރެއެވެ.

ފަތިސްނަމާދު ކޮށްގެން ލަތާ ބަދިގެއަށް ވަންއިރު ޔަޝްމީ ރޮށި ފިހަން ހުރިއިރު ޝިޔާރާ ޒިންކު ކައިރީގައި މަސައްކަތެއްގައި ހުއްޓެވެ. “މަންމަ ހީކުރީ ދަރފުޅު ރޭގައި ބަނޑުގައި ރިއްސާތީ އުޅުނީމަ މިއަދު ތަންކޮޅެއް ލަހުންކަމަށް ހޭލާނީ… މަންމަ ހުރީ ވަރަށް ފަތިހާ ބަދިގެއަށް ވަންނަން ކަމަށް… އެކަމަކު މަންމަ ލަސްވީ. ނަމާދު ކުރިންތަ؟ ލަތާގެ އެންމެ ރަނގަޅު ތަންކޮޅަކީ އެއީއެވެ. ނަމާދު މަތިން އަބަދުވެސް ދަރިންނަށް ހަނދާންކޮށްދޭނެއެވެ. “ނޭރުނޭ ނަމާދަށް. އޭރުގަ އެވަރަށް ބަނޑުގަ ރިއްސީ ނަމާދު ޗުއްޓީ ލިބެން ވެގެން” ދޭފަތުން ރޮށި ފޮރޮޅާލަމުން ޔަޝްމީ ލަތާއަށް ބަލާލަމުން ބުނެލިއެވެ. “އެހެންތަ.. އެހެންވިއްޔާ ދަރިފުޅު ދާންވީނުން އަރާމުކޮށްލަން. މަންމަ ރިހަކޮޅު ކައްކާނަން” ލަތާ ކުރިއަށް ޖެހިލާ ޔަޝްމީ އަތުން ދޭފަތް އަތުލަން އުޅުމުން ޔަޝްމީ އެގޮތަށް އެއްބަހެއް ނުވިއެވެ. “ނޫން މަންމާ..އަޅުގަނޑުގެ އެއްވެސް ތަނަކަށް މިވަގުތު ނުރިއްސާ. އެހެންނޫނަސް މިއަދު މަންމަ ރޯދައެއްނު. މަންމަ ރެސްޓް ކުރޭ. އަޅުގަނޑު ހުއްޓާ މަންމަވެސް އަދި ދޮންތަވެސް މަސައްކަތެއް ކުރާކަށް ނުޖެހޭނެ” ޔަޝްމީގެ ކޮލުގައި ފިރުމާލުމަށްފަހު ބަދިގެ އިން ނިކުންނަން ހިނގައިގަތް ލަތާއަށް ސިހުމެއް ލިބުނީ ކުރިމަތީގައި އައިސް ހުއްޓުނު ޒޯހަން ފެނިފައެވެ. “މަަންމާ ކޮފީއެއް” ޒޯހަންގެ އަޑު އިވުމާއެކު އުނދުން ކައިރީގައި ހުރި ޝިޔާރާ ސިއްސައިގެން ގޮސް އަތުގައި އޮތް ދަޅުކެނޑި ވެއްޓި ފައިތިލަ މަތީގައި ޖެހުނެވެ. އެއަޑަށް ލަތާ އެނބުރި ބަލާލުމަށްފަހު ތިރިވެ ފައިގާ ފިރުމަމުންދިޔަ ޝިޔާރާ ކައިރިއަށް ދަމުން ޒޯހަން ކައިރީގައި ކޮފީ ކޮޓަރިއަށް ފޮނުވާނެ ކަމުގައި ބުނެލިއެވެ. މިފަހަރު ވެސް ޒޯހަންއަށް ޝިޔާރާގެ މޫނު ފެނުމުގައި ކުރިއެރުމެއް ނުލިބުނެވެ. ޒޯހަންއަށް ޝިޔާރާއަށް ބަލާލެވުނީ ފާޑަކަށެވެ. ރޭގައި ރޮއެ މީހަކީ އެއީއޭ ޒޯހަންގެ ހަވަނަ ހިއްސު ބުނެލި ކަހަލައެވެ.

ހެނދުނުގެ ނާސްތާއަށް ހުރިހާ ކުދިން މޭޒު ކައިރިއަށް ޖަމާވެފައި ތިއްބެވެ. ހަމައެކަނީ މަދީ ލައިލްއެވެ. އިރުކޮޅަކުން ޒޯހަންގެ ކޮޓަރިން ދެލޯ ފޮހެމުން ނިކުތް ލައިލް ފެނުމުން ޔަޝްމީ އެސޮރު ގޮވައިގެން އެމީހުންގެ ބަޔަށް އެރީ ލައިލް ރީތިކޮށްލުމަށެވެ. ސުފުރާ މަތީގައި މާގިނަ ވާހަކަތަކެއް ދެއްކުމެއް ނެތި އެމީހަކު އެމީހެއްގެ މަންޒިލަށްދާން ދަތުރު ފެށިއެވެ. މޭޒު ކައިރިން ހުރިހާ މީހުން ހުސްވިއިރު ޒޯހަން ނުގޮސް އިނުމުން ލަތާ ސުވާލު ކުރިއެވެ. “އޮފީސް ބޮޑުމީހާ އެންމެ ރަނގަޅެއްނު ލަހުން ދިޔަސް” ލަސްލަހުން ބޮމުން ދިޔަ ކޮފީތަށި އަނގަޔާއި ދުރުކޮށްލަމުން ޒޯހަން ވާހަކަދެއްކިއެވެ. “ނޫން. ވަގުތަށް ކަމޭހިތަންވާނެ ކިތަންމެ މަތީ މަގާމެއްގައި ހުރި ކަމުގައި ވިޔަސް” ލަތާ ކުޑަކޮށް ނުރުހުންވި ކަމަށް ހަދާފައި ބުނެލިއެވެ. “މިދަނީ މަންމާ. އަސްލު މަންމަ ކައިރީގައި އެއްޗެއް އހަލާން އުޅުނީ” ޒޯހަން ބުންޏެވެ. ‘އަހާބަލަ” ގަޔާވެފައި ލަތާ ޒޯހަމް ކައިރީގައި ގޮނޑީގައި އިށީނެވެ.

“އެއީ ކާކުގެ ކޮޓަރިއެއް މަންމާ” ރޭގައި ޝިޔާރާ ވަން ކޮޓަރި ދައްކާލަމުން ޒޯހަން ލަތާއާއި ސުވާލުކުރިއެވެ. “އެއީ… އެއީ މަންމަ ބުނީމެއްނު މިގޭގައި އުޅޭނޭ މަންމައަށް އަތްގާތްކޮށްދޭން އުޅޭ ދިވެހި ކުއްޖެއް. އެއީ އެކުއްޖާގެ ކޮޓަރި. ކިހިނެއްވީ ޒޯން؟” ރޭގައިވި ހުރިހާ ކަމެއް ޒޯހަން ލަތާއަށް ކިޔާދިނެވެ. “އަސްލު ދަރިފުޅާ އެއީ ވަރަށް ނިކަމެތި އަންހެންކުއްޖެއް. އާންމުކޮށް އޭނަ ނިދާނީ މިގެއަކު ވެސް ނޫން. ފަތިހު އަންނަ ގޮތަށް ރޭގަނޑު ބޮޑުބައެއްދާ ފަހުން އޭނަ މިގެއިން އޭނަ ދިރިއުޅޭ ގެއަށް ދާނީ. ބައެއް ރޭރޭ އެހެން މަޑުކޮށްލިއަސް ވަރަށް ރޭނުކުރާނެ މިގޭގަ. ރޭގައި ކަމެއް ދިމާވީކަމަށް އެވާނީ. ދެން މިގޭގައި ހޭދަވާ ވަގުތުތަކު ލިބޭ ހުސްވަގުތުގައި ރެސްޓްކޮށްލާ ނަމާދުކޮށް ހަދަން މަންމަ ދިން ކޮޓަރި އެއީ. ވަރަށް ހިތްހެޔޮވާނެ” ޝިޔާރާ އާއި ބެހޭ ގޮތުން ލަތާއަށް އެނގޭ މިންވަރު ޒޯހަންއަށް ކިޔާލަދިނެވެ.

ރޭގަނޑު އެގާރަ ޖެހީއެވެ. އާދައިގެ މަތިން މިރޭ ވެސް ޝިޔާރާ މަގުމަތީގައި ބާރަށް ހިނގާފައި އެދަނީ އެގާރަ ގަޑި ފަނަރަ ވުމުގެ ކުރިން ނިދާ ކޮޓަރިއަށް ވަދެވޭތޯއެވެ. އެންމެ މިނިޓެއް ލަސްވިޔަސް ޝިޔާރާއަށް އޮތް ގޮތެއް ހިޔާލަށް ވެސް ނުގެނޭވޭނެއެވެ. ފިޔަވަޅަކަށް ފަހު ފިޔަވަޅެއް ބާރު ކުރަމުން ގޮސް އެގާރަ ގަޑި ފަނަރަވާން އެންމެ މިނިޓަކަށް ހުއްޓާ ޝިޔާރާއަށް ކޮޓަރިއަށް ވަދެވުނެވެ. މެކާހިޔާއާއި މާދުރުނޫން ހިސާބެއްގައި ހުންނަ އެކޮޓަރިއަކީ ގޯޅިގަނޑެއްގެ ތެރޭގައި ހުންނަ ކުޑަ ކޮޓަރިއެކެވެ. އެތަނުގެ ތެރޭގައި ކައްކާ ކެވޭ ގޮތަށް ހުރިއިރު ނިދާބައި ހުންނަނީ މަތީން ޑެކް އަޅާފައެވެ. މައްޗަށް އަރާ ލައިޓް ޖައްސާލުމާއެކު ޝިޔާރާއަށް ފެނުނީ އެމޫނަކަށް އޭނަ އެންމެ ނަފްރަތުކުރާ މީހާގެ މޫނެވެ. ކޮޓަރިން މީހަކު އުޅޭހެން ހީވެގެން ބަކުރު ބޯހިއްލާލާ ތެދުވެލިއެވެ. “އާދެވިއްޖެދޯ. ދޫނި ނައިސްގެން މަ މިހާރު ހަލާކުވަނީ މި. ކޮބާ ލާރިކޮޅު. އަވަހަށްދީ” އެއްލެމުން އެއްލެމުން ކުރިއަށް އައި ބަކުރު ފެނިފައި ވެސް ޝިޔާރާ ހުރީ މޭނުބައި ކޮށްފައެވެ. މުށުތެރޭގައި ހުރި ފަސް ސަތޭކަ ރުފިޔާގެ ހަގަނޑު ބަކުރާއި ދިމާލަށް ހުރާލީ ޝިޔާރާއި ހަމައަށް ބަކުރު އަޔަނުދިނުމަށެވެ. އެއީ މިރޭ ޝިޔާރާ އަށް މެކާހިޔާއިން ލިބުނު ފައިސާއެވެ. މީ ކޮންމެ ފަހަރެއްގެ ވެސް އާދައެވެ. ޝިޔާރާ ބޭނުންކޮށްލަން ލިބެނީ އެންމެ އެއްހާސް ރުފިޔާއެވެ. އެއީ ވެސް ލަތާ ލޯބިން ޝިޔާރާއަށް ވަކިން ދޭ ލާރިއެވެ. ނުލަފާ ވައްތަރަކަށް ހީލުމަށްފަހު ބަކުރު ޝިޔާރާ ފުރަގަހަށް އެނބުރުނު ގަޑީގައި ބައްދައިގަނެ ތިރީގައި އަޅާފައި އޮތް ބަކުރު ނިދާ ތުނި ގޮދަޑި މައްޗަށް ވައްޓާލިއެވެ. މާސިންގާ ފިރިހެނެއްގެ ކުރިމަތީގައި ބާރެއް ނެތް ނިކަމެތި އަންހެނަކަށް ދެއްކޭނީ ކޮން ގަދަކަމެއް ހެއްޔެވެ؟ މަގުމައްޗަށް އިވޭ ވަރަށް ކިތަންމެ ހަޅެއްލަވަން ބޭނުމަސް މިއަދު ޝިޔާރާއަކީ އެބާރު ވެސް އޮތް މީހެއް ނޫނެވެ. ބަކުރު ކުރިމަތީގައި ޝިޔާރާ ގަދަހަދާ ކޮންމެ ފަހަރަކު އެނިކަމެތި ހަށިގަނޑު ތަހައްމަލް ކުރަންޖެހޭ ވޭން މާބޮޑެވެ. ޝިޔާރާގެ ހަށިގަނޑުގައިވާ ހުރިހާ އަންނައުނު ތައް ގަޔާ ވަކި ކޮށްލިއިރު ވެސް ރުޔުން ނޫން ކަމެއް ނުކުރެވުނެވެ. މީ އަލަށްވާ ކަމެއް ނޫނެވެ. ކޮންމެ ރެއެއްގެ ވެސް ހަމަ އާދައެވެ. ޝިޔާރާގެ ދިރުއުޅުމާއި މިގޮތަށް ބަކުރު ކުޅޭތާ މިހާރު އަށް މަސް ވާން ކައިރިވަނީއެވެ. އެތަންމަތީގައި އެނިކަމެތި ހަށިގަނޑުގެ ބޭނުން އެތައް ގޮތަކަށް ބަކުރު ހިފިއެވެ. ބަކުރު ބޭނުންވަރަކަށް އެދުން ފުއްދުމާއެކު އެވަރުބަލި ކަންމަތީގައި އޮވެ ނިދީއެވެ. ނިކަމެތި ޝިޔާރާއަށް ދުއްވައިގަނެވުނީ ފާހާނާއާއިވީ ދިމާލަށެވެ. މާގަނޑު ދަށުގައި އިނދެ ގައިގެ އެތަން މިތާ އަތްހާކަމުން ދަނީ ބަކުރުގެ މުޑުދާރު އަނގަ ޖެހުނު ތަންތަން ސާފުކުރުމަށެވެ. ޝިޔާރާ ބޭނުންވަނީ މުޅި ހަށިގަނޑު ހަން ނޮޅާލާށޭވެ. އެހާ ވެސް ބާރަށް ހަށިގަނޑުގައި އަތް ހާކަމުން ދިޔައެވެ. އެވަގުތު ސައިބޯނި ހުސްވެފައި ހުރުމުގެ ސަބަބުން ހެދުން ދޮންނަން ބޭނުންކުރާ އޯމޯވެސް ހަށިގަނޑުގައި ހޭކުނު އަދަަދެއް ބުނަންވެސް ނޭނގއެވެ. ފާހާނާގެ ފެންމާގަނޑު ދަށުގައި ބަރާބަރު ދެގަޑީރު ހޭދަކުރުމަށްފަހު ޝިޔާރާ ނިކުމެ ފާރުގެ އެއްކައިރީގައި އޮޅާލާފައި ބަހައްޓާފައި ހުރި ކުނާ ނަގާ ފަތުރާލިއެވެ. ތުނި ބާލީހެއް ބޯދަށަށްލުމަށްފަހު އޮށޯވެލީ ދެލޮލަށް ބަރުވެފައިވި ނިދިގަނޑު ފިލުވާލުމަށެވެ. އެހެން އޮވެ އަނެއްފަރާތު ނިދާފައި އޮތް ބަކުރަށް ބަލާލީ ކަޅި އަޅާލައިގެންނެވެ. ޝިޔާރާ ފާފަވެރި ނުވާނަމަ މިހާރު އެއިންސާނާ އޮންނާނީ ބިމުން ހަފޫޓް އަޑީގައެވެ. ރުޅިވެރިކަމާއެކު ބަކުރަށް އަމާޒުވެފައި ހުރި ޝިޔާރާގެ ދެލޮލުން ކުއްލިއަކަށް ފެނުނީ ކަރުނަ ފައިބައިގަތް މަންޒަރެވެ. އިސާހިތަކު ގިސްލެވެން ވެސް ފެށިއެވެ. ނަމަވެސް އެމަންޒަރުު ދެކޭނެ މީހެއް މިދުނިޔޭގައި އެބަހުރި ބާވައެވެ؟ މިނޫން ގޮތެއް ޝިޔާރާއަށް ހަމަ ނެތީބާވައެވެ؟ މިއަނިޔާވެރިޔާގެ ކިބައިން ޝިޔާރާ ސަލާމަތްވާނީ ކޮންދުވަހަކުންބާވައެވެ؟ ޒޯހަންގެ މޫނު ޝިޔާރާގެ ލޯކުރިމައްޗަށް ސިފަވުމާއެކު މާބޮޑަށް ހިތުގައި ޖެހިއްޖެއެވެ. ކުރުގެޅިލާފައި އޮތް ހަށިގަނޑުމަތިން ފެން ފުހަން ގެންގުޅޭ ތުވާލި އަޅާލުމަށްފަހު ޝިޔާރާ ދެލޯމަރާލީ ހެއްދެވި ފަރާތަށް ވަކީލު ކުރަމުންނެވެ.

ޝިޔާރާ ހަނދާން ހުންނަން ފެށިއްސުރެ ފެށިގެން އެންމެ ކައިރީގައި ވިއްދާލާފައި ހުންނަނީ އަބަދުވެސް ބަކުރެވެ. ބަކުރަކީ ޝިޔާރާގެ ބައްޕަ އުމުރު ފުރާގެ މީހެކެވެ. ނުލަފާ އަންހެނެއް އަތުން ބަކުރު ޝިޔާރާ ގަތީ އެއަންހެނާ ބުނި ވަރަކަށް ލާރި ދީފައެވެ. އޭރުގަވެސް ބަކުރު ހުންނަނީ ޝިޔާރާއާއި ފާޑަކަށް އަޅައިގަނެފައެވެ. އުމުރުން އެންމެ އަށާރަ އަހަރުވީ ދުވަސް އެއީ ޝިޔާރާގެ ހަޔާތުގައި އައި އެންމެ ހިތާމަވެރި އެއްދުވަހެވެ. ހުރިހާ އުއްމީދުތައް ވިއްސި ވިހާލިވި ދުވަހެވެ. ބަކުރުގެ އަތް ދަށުގައި މުޅި އުމުރަށް ގައިދުވި ދުވަހެވެ. މައިންބަފައިން މަތިން އެންމެ ހަނދާންވި ދުވަހެވެ. ނަމަވެސް އޭނާއަށް އޭނާ މައިންބަފައިންވީ ތަނެއް ވެސް ނޭނގެއެވެ. އެނުލަފާ ފިރިހެނާގެ އަތްދަށުން ސަލާމަތްކުރައްވާތޯ ޝިޔާރާ އަށް މާތްﷲ ށް ދެންނެވުނު އަދަދެއް ވެސް ނޭނގެއެވެ. އެކުވެރި ހާލާ އެއީ މިދުނިޔޭގައި ހުރި ޝިޔާރާގެ ހަގީގަތް އެނގޭ ހަމައެކަނި އިންސާނާއެވެ. ޝިޔާރާގެ ހިތަށް ހަމަޖެހުމެއް ލިބެނީ ހާލާގެ ފަރާތުންނެވެ. ހާލާގެ އަބަދުގެވެސް ނަސޭހަތަކީ ލޯބިވާ މީހަކު ލިބުމާއެކު އަވަހަށް މާލެއިން ފުރައިގެން އެހެންތަނަކަށް ދިޔުމެވެ. ނަމަވެސް ހިތާމައަކީ ޝިޔާރާގެ ލޯބި ބޭނުންވާ އިންސާނަކު މިދުނިޔޭގައި ނެތް ކަމެވެެ. ޝިޔާރާ ފަދަ ނުކުޅެދޭ ވާހަކަނުދެއްކޭ މަންމަނެއްގެ ލޯބި އެއްވެސް ޝަރުތަކާއި ނުލާ ގަބޫލުކުރާނެ ފަރާތެއް މިދުނިޔޭގައި ވޭބާވައެވެ؟ ފަތިސްނަމާދުގެ ބަންގީގެ އަޑު ޝިޔާރާގެ ކަންފަތުގައި ޖެހުނީވެސް ނުނިދި ދެފަރާތަށް ފުރޮޅި ފުރޮޅި އޮށްވައެވެ. އަވަސްއަވަހަށް ތެދުވެ ފާހާނާއަށް ވަނީ ބަކުރު ހޭލުމުގެ ކުރިން އެގެއިން ނިކުމެގެން މެކާހިޔާއަށް ދިއުމަށެވެ. ސަބަބަކީ ބަކުރު ދެލޯ ހުޅުވާލުމާއެކު ދެން ފެންނާނީ މަކުނެއްހެން ޝިޔާރާގެ ހަށިގަނޑުގައި ތައްލާފައިވާ އޮށްވައެވެެ. ފަތިސްނަމާދު ވެސް ނުކޮށް ހަމައެކަނި ވުލޫ ކޮށްގެން ގެއިން ނިކުމެ ބާރު ސްޕީޑުގައި މަގުމަތީގައި ހިނގާފައި ދިޔައީ މެކާހިޔާއަށް ގޮސް ނަމާދުކޮށްލާށެވެ. ގޭދޮރާށިން އެތެރެއަށް ވަދެވަދެ ހުރި ޝިޔާރާގެ އަތުގައި މީހަކު ހިފާ ދަމާ ގަތުމުން ސިހިފައި އެނބުރުނެވެ. ނުލަފާ ގޮތަކަށް ކުރިމަތީގައި ހީލައިގެން ހުރީ ބަކުރެވެ. ޝިޔާރާއަށް ބަލަހައްޓައިގެން ހީގަނެގެން ހުރި ބަކުރުގެ ހަޑި ދަތްޕިލާ ރަތްއަރާފައި ހުރިއިރު ދެދަތް ދޭތެރޭގައި ކޮބަޑި ހެދިފައި ހުއްޓެވެ. އަދި ބައެއް ދަތްތަކުން ލޮނދިލާފައި ހުރުމުގެ ސަބަބުން ތުންފަތުގެ ދެފަރާތުން އޮލަ ހެދި އަނގައިން ނުބައި ވަސްވެސް ޝިޔާރާއަށް ދުވިއެވެ. “ދޫނީ..މިއަދު މާބާރަށް ފިލައިގެން ތިއައީ ކީއްވެ؟ އެނގެއެއްނު މިގަޑީގައި ދޫނި ގައިގާ ބައްދާލަން ބޭނުންވާ ވަރު” ޝިޔާރާގެ އަތުން ދޫނުކޮށް ހުރެ ބަކުރު ވާހަކަދެއްކިއެވެ. ތިރިއަށް ބަލަހައްޓައިގެން ޝިޔާރާ ހުރީ ބަކުރުގެ އަނގައިގެ ތެރެ ފެނި މޭނުބައި ކުރާތީއެވެ. “ހަޑި މީހާގަނޑު…މީ މަށާ ޖެހިފައި ހުރި ބޮޑު ބައްޔެއް” ހިތާ ހިތުން ޝިޔާރާ ހަޅޭއްލަވަމުން ދިޔައެވެ. ސިޓިންގްރޫމަށް ވަދެވޭ މައިދޮރަށް ތަޅުދަނޑި ޖަހާލި އަޑު އިވުމާއެކު ޝިޔާރާ ތެޅިގަނެފައި ބަކުރު މޭގައި އަތްއަޅާ ދުރަށް ކޮށްޕާލިއެވެ. އަދި ދުވަމުން ގެއަށް ވަދެގެންދިޔަ ބާރުމިނުގައި މީހެއްގެ ގައިގާ ޖެހި ޝިޔާރާގެ ހަށިގަނޑު ބެލެންސް ނުކުރެވި ތިރިއަށް ވެއްޓުނެވެ. އެންމެ ފުރަތަމަ ވެސް  ޝިޔާރާގެ ލޮލުގައި އަޅާގަތީ ކަޅާއި ހުދުކުލައިގެ ޓެނިހެވެ. ޓެނިހުން ފެށިގެން މައްޗަށް ޝިޔާރާ ކަޅި ހިންގާލިއެވެ. ހަމަ އެކުލައިގެ ދިގު ޓްރެކްޝޫޓާއި އަތްދިގު ޓީޝާޓްގައި ޒޯހަންގެ ހިތްގައިމުކަން ހާދަހާ ރީއްޗެވެ. ޒޯހަން އާއި ޝިޔާރާގެ ހަތަރުކަޅި ބައްދަލުވުމާއެކު ޝިޔާރާގެ ދެލޯ ހިނދުކޮޅަކަށް ޒޯހަންގެ ލޮލަށް ހުއްޓުނެވެ. ދެވަނަ ސިކުންތުގައި ޝިޔާރާގެ ހިތް މައްޗަށް ވިސްނުން ގަދަ ކުރުމަށްފަހު ތެދުވެ ޝިޔާރާއަށް ދީފައި ހުންނަ ކޮޓަރިއާއި ދިމާލަށް ދުއްވައިގަތެވެ. “އޫޕްސް…. ސޮރީ…” ޝިޔާރާއާއި ދިމާލަށް އަތް ދިއެްކޮށްލި ޒޯހަން ބުނެލިއެވެ. ޝިޔާރާގެ އެއްވެސް ހަބަރެއް ނުވުމުން ޒޯހަންވެސް ގެއިން ނިކުންނަން ހިނގައިގަތް އިރު އެމޫނު ކޮންމެސް ތަނަކުން ފެނުނު ހަނދާނެއް ވިއެވެ.

ނުނިމޭ