ހަންޖަރު 5

އީވާން އީނާލްދެކެ ވާލޯބި އެނގިފައި ނުހައިކްގެ ތުންފަތުގައި ހިނިތުންވުމެއް ކުރެހުނެވެ. “ކީއްވެ ތަ ކިނބުލެއްހެން ތި ހެނީ؟” އީވާން ކަޅި އަޅާލިއެވެ. “ކިހިނެތް އަހަރެން ހަދައިދޭން ވީ؟ އަހަރެން އެހީވެދޭނަން” ނުހައިކް ބުނެލީ އަޒުމާއި އެކުއެވެ.

(5 ވަނަ ބައި)

“ސީރިޔަސް؟” އީވާން އަހާލީ ޔަގީން ކޮއްލާފަދައިންނެވެ. “ޔެސް. ސީރިޔަސް” ނުހައިކް ހިނިތުންވެލިއެވެ. އީވާން ހަމަޖެހުމުގެ ނޭވާއެއް ދޫކޮށްލިއެވެ. އަދި ފޯނު ހުޅުވާލާފައި މޭޒު މަތީގައި ބާއްވާލިއެވެ. “މިޔޯ؟” ނުހައިކް ފޯނަށް ރީތިކޮށް ބަލައިލިއެވެ.

“ތިއީ އެމީހަކީ” އީވާން ދުރުބަލައިލިއެވެ. “އޭނ؟ ކީކޭ؟ ކިހިނެތް؟ މިއީ ކޮންތާކުން ހޯދި ކުރެހުމެއް؟” ކުރެހުމުގައި ފެންނަން އިން މެދުއުމުރުގެ ފިރިހެން މީހާއަށް ބަލަން އިނދެ ނުހައިކް އެއްސެވެ.

“ނާލު ވަރަށް ރީތިކޮށް ކުރަހާނެ. ނާލުއަށް ފެންނަ މަންޒަރެއް ކުރަހާލުމަކީ އެއްވެސް ކަމެއް ނޫން. ތިއީ ނާލުގެ ކުރެހުމެއް” އީވާން ބުނެލިއެވެ. “މިއީ އަސްލު ވަރަށް ބޮޑު ކުރިއެރުމެއް. އިންޝާ ﷲ އަހަރެމެންނަށް މިކަން ވާނެ” ނުހައިކް ބުނެލީ ހިތްވަރުދޭ ރާގަކަށެވެ. އީވާން ހިނިތުންވެލާފައި ބޯޖަހާލިއެވެ. “އިންޝާ ﷲ ވާނެ”

ކޮޓަރި ތެރޭގައިވީ ކަނު އަނދިރިކަމެވެ. ހުރިހާ ބޮތްކެއް ނިވާލާފައިވީ އިރު ފަންކާ އެނބުރޭ އަޑާއި ކޮޓަރި ތެރޭގައި ޖަހާފައި ހުރި ބަޤަރާ ސޫރަތުގެ އަޑު ނޫން އެހެން އެއްވެސް އަޑެއް ނީވެޔެވެ. ސީލިންގާއި ދިމާލަށް ބަލަން އޮތް ވިނާލްގެ މޫނު މަތީގައި އެއްވެސް އިހުސާސެއް ނެތެވެ. މަރު މައްޔިތެއް ފަދައެވެ. ދުވަހަކު އުފަލެއް ލިބުނު ފަރާތެއްހެން ހީވެސް ނުވެޔެވެ.

ފުންނޭވާއެއް ދޫކޮށްލާފައި ވިނާލް ތެދުވިއެވެ. އެނދުން ފައިބައިގެން ކޮޓަރިން ވެސް ނިކުތެވެ. ބަރުހެލި ފިޔަވަޅު ތަކެއްގައި ގޮސް ޖެހިގެން އިން ކޮޓަރިއަށް ވަނެވެ. ވިނާލްގެ ހަރަކާތްތަށް ފެނުނު ވާއިލްއަށް ތެޅިގަނެފައި ވިނާލް ފަހަތުން ދެވުނެވެ.

ކޮޓަރި ދޮރު ހުޅުވާލިލެއް ބާރު ކަމުން އަނެއްކޮޅުގައި ކޮޓަރި ދޮރުގެ ތަޅު ޖެހިފާ އަނެއްކާ ދޮރު ލެއްޕެން އުޅުނެވެ. އެއްއަތް ހިއްލާފައި ވިނާލް ދޮރު ހުޅުވިއެވެ. އެނދުމަތީގައި އިށީނދެގެން އިން ވިއާމް ކަޅި އަޅާލިއެވެ. ސޯފާގައި ވާހަކަ ފޮތެއް ހިފައިގެން އިން ނީރާ ތެދުވީ ވިނާލް ހުއްޓުވުމަށެވެ. “ބައްޕަ ނުގަބޫލަސް ވަރިހަމަ. ވިވީ ވާންއަށް ކަައިވެނި ކުރާނަން!” ވިނާލް ބުނެލީ އަޒުމުގައެވެ.

ވިނާލްގެ ޖުމްލަ އިވި ވިއާމްއަށް އެރީ ކޮންކަހަލަ ބާރެއް ކަމެއް ވެސް ނޭނގެޔެވެ. މަޑުމަޑުން އިނދެފައި ކުއްލިއަކަށް ތެދުވެ ބަރުހެލި ފިޔަވަޅުތަކެއްގައި ގޮސް ވިނާލްގެ ކަންކަށިމަތީގައި ޖެހިއެވެ.

“ތިއީ ތަ އަހަރެން ކަލޭ ބަލާ ބޮޑު ކުރި ގޮތަކީ؟ ކަލޭތި ކާކު މަގޭ ކުރިމަތީ ފުއްޕަން އޭނ؟ ހަނދާން ކުރާތި. މިއަދުން ފެށިގެން މިގެން ބޭރަށް ކަލޭ އެންމެ ފިޔަވަޅެއް އެޅިޔަސް ހުރިހާ ހުޅުތަކެއް ބިންދާލާނަން! މަމީ ފިސަހައިރި ނުބައި މީހެއްކަން ދައްކާލާނަން!!” ވިއާމް ހުރީ ރުޅި އައިސްގެން ރޫރޫ އަޅާހާލުގައެވެ.

“ބައްޕާ!” ދުރުގައި މަންޒަރު ބަލާކަށް ވާއިލްއަކަށް ނުހުރެވުނެވެ. “ކީއްވެ ތި ޖެހީ؟ އުމުރު ދުވަހު ވެސް ބައްޕަ ތިއީ އަހަރެމެންނަށް އަނިޔާ ކުރި މީހެއް ނޫން. އަހަރެމެން ބޮޑުވެ މީހުނާ އިންނަ ވަރުވީމަ ތަ އަނިޔާ ކުރަންވީ؟” ވާއިލް ހުރީ ވަރަށް ހިތްހަމަ ނުޖެހިފައެވެ.

“ކަލޭ ތަ ވިނާލް ބަލާ ބޮޑު ކުރީ؟ ކަލެއަށް ތަ އެނގޭނީ ވިނާލްއަށް ހަދާނެ ގޮތެއް؟ ކަލޭ ތިވަރަށް ފުއްޕާނީ މަގޭ މަރުވާ ދުވަހަކުން. އަދި މައިތިރި ވެގެން ހުރޭ” ވިއާމްއާއި ވާއިލްގެ ޒުވާބު ހޫނުވާތީވެ ނީރާގެ ހިތް “ޑަން ޑަން” ލަމުން ދިޔައެވެ.

“ވާ ހެޔޮ ދަރިން މަށަށް ލިބިފަ މިތިބީ. ދޭތިން ކުރެ އެކަތި ވެސް ދެން މިގެއިން ނިކުމެގެން ނުވާނެ. ނިކުތީއާ ދެން އަލުން މިގެއަށް ވަދެގެން ނުވާނެ!” ވިއާމް ކޮޓަރިން ނިކުމެގެން ދަމުން ބުނެލިއެވެ.

ހަވީރުގެ ވަގުތު ކަމުން މަގުތަކުގައިވީ ހިތްހަމަ ޖެހުމާއި އަމާން، އޮމާންކަމެވެ. ދޫނި ސޫފި ގޮވާ އަޑު އަޑުގެ އިތުރުން ކުޑަ ކުދިން ސަކަރާތް ޖަހާ އަޑު އަޑު ވެސް ހުއްޓުމެއްނެތި އިވެމުން ދިޔައެވެ. ކަޅު ކުލައިގެ ސޯޓަކާއި އެކު ކަނޑު ނޫކުލައިގެ ޓީޝާޓެއް ލައިގެން ގޭ ޖޯލި ފަތީގައި އޮތް އީވާން އޮތީ ދެލޯ މަރާލައިގެންނެވެ. ފޯނު ކަންފަތާއި ކައިރި ކޮއްގެން އޮތް އިރު ހީވަނީ ކޮންމެވެސް މީހަކާ ގުޅަނީ ހެންނެވެ.

“ތިޔަ ގުޅުއްވި ނަންބަރު މިވަގުތު ވަނީ ނިވާލާފަ. ފަހުން ގުޅުއްވާލައްވާ…” މިފަހަރު ވެސް ލިބުނީ ހަމަ އެޖަވާބެވެ. ފޯނު ކަންފަތާއި ދުރު ކޮއްލާފައި ފޯނާއި ދިމާލަށް ބަލައިލިއެވެ. “މައި ލަވް” ގެ ނަމުން ސޭވް ކޮއްފައި އިން ވިނާލްގެ ނަންބަރަށް އީވާން ގުޅިމިއީ 12 ވަނަ ފަހަރެވެ. ކޮންމެ ފަހަރަކު ވެސް ލިބުނީ ހަމަ އެޖަވާބެވެ.

“އަނެއްކާ ކަމެއް ވީ ބާ؟” ވިނާލްއަކީ ނިދަން އޮށޯންނަމުން ވެސް ފޯނު ނިވާލާ ކުއްޖެއް ނޫނެވެ. ދެން މިއަދު ފޯނު ނިވާލާފައި އޮތުމުން އީވާން ހަގީގަތުގައި ވެސް ހައިރާން ވިއެވެ.

“ކިހިނެތް ވީ ބިމަށް ތުން ހަރައިގެން ތީނީ؟” އެވަގުތު ގެއިން ނިކުން އީނާލް އަހާލިއެވެ. ކަޅު ކުލައިގެ ހޫޑީއަކާއި އެކު ކަޅު ކުލައިގެ ޖީންސްއަކާއި އެކު ކަޅު ކުލައިގެ ވަށް ބުރުގަލެއް އަޅައިގެން ހުރި ވިނާލްގެ މޫނު ފެންނަނީ ސާދަ ވިލޭރޭގެ ހަނދު ފަދައިންނެވެ. މޫނު މަތީގައި އެއްވެސް މޭކަޕެއް ނެތް އިރުވެސް ހައިރާން ވާހާ ރީތި ކަމެކެވެ.

“ބިމަށް ތުން ހަރައިގެން ތަ މީނީ؟ ނުދެނަ ހުރިން” އީވާން ހީލިއެވެ. އީވާންގެ އެކަންބޮޑު ވުން އީނާލްއަށް ދައްކާކަށް އީވާން އެއްގޮތަކަށް ވެސް ބޭނުމެއް ނޫނެވެ.

“މިއަދު ބޭރަށް ނުދަނީ ތަ؟” އީވާން އަވަހަށް ވާހަކަ އޮޅުވާލިއެވެ. “ޔާ. ދެން ނާލު ވެސް އެކަނިވީނުން. ރުކާންއާއި ލާލަ ވެސް ދެން މާ ހިންގަން ފަށައިފި ވިއްޔާ” އީވާން ގާތުގައި އިށީންނަމުން އީނާލް ބުނެލިއެވެ.

“އޭނ؟ ތިބުނީ؟” އީވާންއަކަށް ސާފެއް ނުވިއެވެ. “މިބުނީ އެދެމީހުން ރައްޓެހިވީއޭ” އީނާލް ބުނެލިއެވެ. “އޯ އެމް ޖީ. ދެން ނާލު ވެސް ބިޓެއް ހޯދަން ވީނުން؟”

“އައްޗީޑި. ނޫޅެން. ދެން ޔަކް. ފިރިހެނުންދެކެ ވަރަށް ފޫހިވޭ. އެމީހާ ވެސް ހީވަނީ މީހަކާ އިނދެ ދަރިން ލިބިފަ ހުރި މީހެން ހެން.. އެކަމް ވެސް އޭނާ ނާލު…” އީނާލްގެ އަޑު ކުރެހުނެވެ.

“ސޮރީ…” އެހެން ބުނެވުމުން ހަގީގަތުގައި ވެސް އީވާންގެ ހިތަށް ތަދުވިއެވެ. “ހެހެ އިޓްސް އޯކޭ. ދޮންބޭ. ނާލު ވާހަކައެއް ބުނަން ބޭނުން” އީނާލް ބުނެލިއެވެ. “ދޮންބެ ދެން އޭނަ ހޯދުން ހުއްޓާލަން ވީނުން؟” އިނގިލިތަކާއި ކުޅެން އިނދެ އީނާލް ބުނެލިއެވެ.

“ކީކޭ؟” އީވާންއަށް ކޮޅަށް ތެދުވެވުނެވެ. “ކީއްވެ؟ ކީއްކުރަން؟ ކޮބާ ސަބަބަކީ؟ ކީއްވެ ދޮންބެ މިކަން ހުއްޓާލަން ވީ؟ ކީއްވެ؟ ކޮއްކޮގެ ހިތުގަ އަޅާ ވޭނޯ؟ ކޮއްކޮ ތިރޯ ރުއިމޯ؟ ދޮންބެ އަހަމޭ ރޭގަނޑު ކޮއްކޮ ރޯއަޑު” ހިތްހަމަ ނުޖެހިފައި ހުރުމުން އީވާންއަށް ބުނެވުނީ ތަންކޮޅެއް ބާރަށެވެ.

“ދޮންބެއަކަށް އޭނައެއް ނުފެނުނޭނުން؟ ދެން ކީއްކުރަން؟ ދޮންބެ މީހަކާ ނީންނަން ތިހުރީ ވެސް އެހެން ކިޔާފަ. ދޮންބެ ވީވީއާ ކައިވެނި ކޮއްބަ. ފަހަރިއެއް ލިބުނީމަ ނާލު ކިހާ އެކަނިވެރިކަން ފިލާނެ؟ އޭރަށް ވެސް މިކަމުން އަރައިގަނެވިދާނޭނުން؟ ޕްލީޒް ދޮންބޭ. ނާލު ބޭނުމީ ދެން ދިރިއުޅުމައިގެން ކުރިއަށް ދާން. ނާލު ބޭނުމީ ދެން އުފަލުގަ އުޅެން. ފަހަތަށް ބަލަމުން ކިހިނެތް ކުރިއަށް ހިނގާނީ؟ ނާލުއަކަށް ދެން ނުވާނެ މިކަމެއް” އީނާލްގެ އަޑު ކުރެހުނެވެ.

“އެހެންވެގެންނޭނުން މިބުނަނީ ދޮންބެ މިކަމެއް ނުހުއްޓާނަމޭ؟ ކޮއްކޮގެ ދިރިއުޅުން ހަލާކު ކޮއްލަން ކެރުނު މީހަކު އަތުލާފަ ނޫނީ މި އީވާން މުހައްމަދެއް ހުއްޓާ ނުލާނަން. ސާފު؟” އީވާން ބަރުހެލި ފިޔަވަޅުތަކެއްގައި ގޮސް ގޭތެރެއަށް ވަނެވެ.

“ނާލު ޔޫ އާރް ސޯ ކްރޫލް” އީނާލް ބޮލުގައި އަތުން ޖަހަމުން ވާހަކަ ދެއްކިއެވެ. “ނާލުގެ ސަބަބުން ދޮންބެ އެއުޅެނީ އެއްވެސް އުފަލެއް ނުލިބިގެން. ތިއީ ހާދަ އަމިއްލަ އެދުން ބޮޑު ކޮއްކޮއެކޭ” އީނާލް ބޮލުގައި ހިފާ ވާން ކޮއްލިއެވެ. “މަންމާ… ބައްޕާ… ނާލުއަށާއި ދޮންބެއަށް އުފާވެރި ދިރިއުޅުމެއް ނުލިބޭނެ ތަ؟ ކީއްވެ ތަ ދޮންބެ އެހާ ބޯހަރީ މަންމާ؟؟ ބައްޕާ…؟” އީނާލަށް ގިސްލަ ގިސްލާފައި ރޯން ފެށުނެވެ.

(ނުނިމޭ)

ހަވަނަބައިގެ ތެރެއިން:

ގެއަށް ވައިން ނުހައިކްއަށް އިވުނު އެއަޑުން ހުރެވުނު ތަންވެސް ނޭނގުނެވެ. ދުވެފައި ކަހަލަ ގޮތަކަށް ކޮޓަރިއަށް ވަދެވުނީ ގަންނާ ކުރެއްވީ ބިރުންނެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.