ހިތް އެދެ ޔާރާ ތިއޭ – 39

“ކައިލް..” މައިރީން އެނދުގައި އިށީންނަމުން ކައިލްއަށް ތަންކޮޅެއް ސީރިއަސްވެލަމުން ގޮވައިލިއެވެ. ކައިލް ބުމަ އަރުވައިލަމުން މައިރީންއާއި ދިމާލަށް ބަލައިލިއެވެ. “ރުކައިންމެނާ އެއްކޮށް މައިއޭ ކިޔައިގެން ކޮން ވާހަކައެއް ދެއްކީ؟” މައިރީން އަހައިލިއެވެ. ކައިލް އެއްޗެކޭ ބުނުމެއްނެތި ކޮނޑު އަރުވައިލިއެވެ. “ކައިލްލްލް..” ކައިލްގެ ނަމަށް ދަމައިލަމުން މައިރީން ގޮވައިލިއެވެ. “އެވާހަކަ ކިޔައިދޭނީ މައިރީން އަހަރެންގެ އުނގުގައި އިށީނީމަ..” ބޯދަށަށް އަތްލައްވައިގެން އިނދެ ލާނެތް ގޮތަކަށް މައިރީންއަށް ބަލައިލަމުން ކައިލް ބުނެލިއެވެ.

***ޕާޓް 39***

މައިރީން ދެ ކޯތާފަތް ހީވަނީ ވިރިގެން ފައިބަފާނެހެންނެވެ. ކޯފުއްޕައިލަމުން ޝަކުވާގެ ނަޒަރަކުން މައިރީން ކައިލްއާއި ދިމާލަށް ބަލައިލިއެވެ. ކައިލް އެހެން އިނދެ އޭނަގެ ފަލަމަސްގަނޑުގައި އަތުން މަޑުމަޑުން ޖަހައިލީ އެތާ އިށީންނާށޭ ބުނާ ފަދައަކުންނެވެ. “ދެން ކައިލްލްލް.. ސީރިއަސްވެބަލަ..” މައިރީން ތުން ދަމައިލަމުން ބުންޏެވެ. “އަހަރެން ވަރަށް ސީރިއަސްއޭ ހަމަ..” ކައިލް އަޑަށް ބަރުކަން ވެރިކޮށްލަމުން ބުންޏެވެ. މައިރީން ދަތްކުނޑިވިކައިލަމުން ދާން ނުދާން އިނދެފައި އެންމެފަހުން ކައިލްގެ އުނގުގައި އިށީނެވެ. ކައިލް މައިރީންގެ ބަނޑުގައި އޭނަގެ އަތް ވަށައިލިއެވެ. “އަހަރެން ބުނީ އަހަރެންގެ ލޯބިނުވާ އަނބިމީހާގެ ގޮތް ދޫނުކުރުމުގެ ސަބަބުން މާލެއަށް ޓައިނީ ގެންދާކަށް ބޭނުމެއް ނޫނޭ.. އަހަރުންނަށް މިތާ ދިރިއުޅުމެއް ފަށައިގެން ޓައިނީ ބޭބީސް ހޯދައިގެން އުޅެވޭނެއެއްނުން.. ނުލާހިކު ހިތް ފަސޭހަ ރަށެއްވިއްޔަ މީ..” މައިރީންގެ ކޮނޑުގައި ދަތްދޮޅިއަޅުވައިލަމުން ކައިލް ބުންޏެވެ.

އޭރު ކައިލްގެ ހޫނު ނޭވާ މައިރީންގެ ކަނދުރާއަށް އެޅެމުންދިޔައެވެ. މައިރީންގެ ކަނދުރާގައިވާ ކުދިކުދި އިސްތަށިކޮޅުތަށްވަނީ ކޮޅަށް ޖެހިފައެވެ. އެހެންނަމަވެސް ކައިލްގެ ވާހަކައިން މައިރީންގެ ގާތަށް ރުޅިއައެވެ. ދެބުމަ ގޮށްޖަހައިލަމުން ކައިލްގެ އަތުތެރެއިން މިނިވަންވާން މައިރީން ގަދަ ހަދައިލިއެވެ. ކައިލް ހިނިއައިސްފައިހުރެ މައިރީންގެ ހަށިގަނޑުގައި ވަށައިލެވިފައިވި އަތަށް ބާރުކޮށްލިއެވެ. “ކައިލް ޕްލީޒް.. މައި މިއީ ކައިލްގެ އަނބިމީހާއަށްވިޔަސް މައި މިއީ ކިޔަވައިގެން ހުރި މީހެކޭ.. މައި މީ ލޯޔަރެކޭ.. ކަންތައް އުނދަގޫވާއިރު މައި ފިލީމަ މީހުން ކީކޭތަ ހީކުރާނީ..” ކައިލްއަށް ވިސްނައިދެވޭތޯ މައިރީން މަސައްކަތް ކުރިއެވެ. “އަހަރެން މީހުން ކިޔާ އެއްޗަކާ ދޭތެރޭ ވިސްނާނެހެން ހީވޭތަ؟ އަހަރެން މި މަސައްކަތް ކުރަނީ ޓައިނީ ރައްކާތެރިކުރެވޭތޯއޭ..” ކައިލް ބުންޏެވެ.

މައިރީންގެ ދެލޯ ފެންކަޅިވާން ފެށިއެވެ. “ކީތްވެތަ އެންމެން މައި ރައްކާތެރިކުރަންނޭ ކިޔާފަ މައި ކޮށީގައި ބަންދުކޮށްގެން ގެންގުޅޭހެން ގެންގުޅެނީ؟ މައި މިއީ ކުޑަކުއްޖެއްނޫނޭ.. މައިއަށް އަމިއްލަ ނަފްސު ރައްކާތެރި ކުރެވޭނޭ..” މައިރީން އަޑަށް ބާރުލަމުން ބުންޏެވެ. މައިރީންގެ ހަނދާނަށް އަންނަމުން ދިޔައީ ފުރާވަރުގައި އޭނަގެ މައިންބަފައިން ރައްކާތެރިކުރަންށޭ ކިޔާފައި ގޭގައި ބަންދުކޮށްގެން ގެންގުޅުނު ދުވަސްވަރެވެ. “އެހެންވެތަ މީގެ ހަފްތާއެއްވަރު ކުރިން ޒާއިދުމެންގެ އަތްދަށަށް މައިރީން ދިޔައީ؟ ކޮބާ އޭރު އަމިއްލަ ނަފްސު ރައްކާތެރިކުރެވިފަ؟ މާޔަލް ގޮވައިގެން އެތަނަށް ދިޔައިރު ހިތަކަށް ނާރާތަ ތިއީ ލޯޔަރެކޭ.. އަހަރެންނަށް ޖެހުނީ އެމީހުން ކައިރިން މައިރީން ސަލާމަތްކުރަން.. އެހާ މޮޅުނަމަ ކީއްވެ އެމީހުންގެ އަތްދަށުން އަމިއްލައަށް ސަލާމަތް ނުވެވުނީ؟ ދެން އަމިއްލަ ނަފުސު ރައްކާތެރި ކުރެވޭނެއޭ ކިޔާ އަނގަ ނުހުޅުވައްޗޭ.. އެދުވަހު އަހަރެން މައިރީން ސަލާމަތް ނުކުރިނަމަ މިއަދު މައިރީން ދިރި ހުންނާނެ ކަމެއްވެސް ނޭނގެ..” ރުޅިއައިސްފައި ހުރިވަރުން ކައިލްގެ އަޑު ބާރުވަމުން ދިޔައެވެ.

މައިރީން ތުންފިއްތައިލިއެވެ. ގަދަހަދައިލާފައި ކައިލްގެ އަތުތެރެއިން ނިކުމެ ދުވެފައި މައިރީން ގޮސް ފާހަނައަށް ވަނެވެ. ކައިލްއަށް އައި ރުޅީގައި މައިރީންއާއި ދިމާލަށް ކިޔުނު އެއްޗެހި ހިތަށް އެރުމުން ބޮލުގެ އިސްތަށިގަނޑަށް އަތް މަހައިލާ ވާންކޮށްލެވުނެވެ. މައިރީންގެ ގިސްލުމުގެ އަޑުއިވުމުން ކައިލް އަވަސް އަވަހަށް ފާހަނަ ކައިރިއަށް ގޮސް ދޮރުގައި ޓަކިޖަހަން ފެށިއެވެ. “ޓައިނީ ޕްލީޒް ނުކުމެބަ.. ވަރަށް ބޮޑަށް ސޮރީ.. އަހަރެންނަށް ޓައިނީއާއި ދިމާލަށް އެހެން އެއްޗެހި ކިޔުނީތީ މާފުކުރޭ.. އައި ޑިޑިންޓް މީން އިޓް… ޕްލީޒް އަހަރެންނަށްޓަކައި ޓައިނީގެ ދެލޮލުން އަގު ހުރި ކަރުނަތެކެއް އިސްރާފު ނުކުރޭ…” ކައިލް ދޮރުގައި ޓަކި ޖަހަމުން ކިޔަމުން ދިޔައެވެ.

ކައިލް ފާހަނަ ދޮރުގައި ކަންފަތް ޖައްސާލިއެވެ. އޭރުވެސް މައިރީންގެ މަޑު ރުއިމުގެ އަޑު އިވިއިވި ހުއްޓެވެ. ކައިލް ފާހަނައިގެ ދޮރުގައި ބޯޖައްސައިލިއެވެ. އޭނަ ހުރީ މައިރީން ރޮއްވާލެވުމުން ވަރަށް ބޮޑަށް ދެރަވެފައެވެ. “ރުކައިންމެންނާ ދެއްކި ވާހަކަ ބުނާނަން މި ގަޑީ ނިކުމެއްޖެއްޔާ..” މައިރީން އެތަނުން ނެރެން ކައިލް ބުންޏެވެ. ކުޑައިރުކޮޅެއްފަހުން އިސްކޫރު ދޫކޮށްލި އަޑުއިވުނެވެ. އެއަށްފަހު މައިރީން މޫނުދޮވެލައިގެން ފާހަނައިން ނިކުތެވެ. މައިރީން ހުރީ ކައިލްއާއި ހަތަރު ކަޅި ހަމަ ނުކުރާން އިސްޖަހައިލައިގެންނެވެ. ކައިލް އެއަށް ބެލުމެއްނެތި މައިރީންގެ އުނަގަނޑުގައި ހިފައި އޭނަގެ ގާތަށް ދަމައިލިއެވެ. އަދި އޭނަގެ ވަރުގަދަ އަތުތެރޭ މައިރީން ފޮރުވައިލިއެވެ.

މައިރީން ކޮންމެވެސް ވަރަކަށް ސިހުނެވެ. އެހެންނަމަވެސް މައިރީންއަށް ކައިލްއަކާ ދުރެއް ނުވެވުނެވެ. “އައިމް ސޮރީ.. އައިމް ސޯ ސޮރީ.. ޓައިނީ ރޮއްވާލާކަށްނޫން އެއްޗެހި ކީއީ.. އައި ލް..” ކައިލް އޭނައަށް ބުނެވެން އުޅުނު ޖުމުލަ އަމިއްލައަށް މެދުކަނޑައިލިއެވެ. އަދި މައިރީންގެ ކަރުނަތަށް ފޮހެލަދިނެވެ. މައިރީންގެ ހިތުގެ ތެޅުން އަވަސްވާން ފެށިއެވެ. “ސޮރީ ގަބޫލެއް ނުކުރާނަންތަ؟” ކުޑަކުއްޖެއް ފަދައިން ކައިލް ސުވާލުކޮށްލިއެވެ. މައިރީން ބޯހޫރައިލިއެވެ. “އަހަރެންނާ ވާހަކައެއް ނުދައްކާނަންތަ؟” މައިރީންގެ މޫނުކޮޅުގައި ހިފަމުން މައުސޫމު ގޮތަކަށް ކައިލް އަހައިލިއެވެ.

މައިރީން ވާހަކަ ނުދައްކާ ހުންނަން ފެށުމުން ކައިލް ދެރަވިއެވެ. “ރުކައިން ބުނީ ޓައިނީ ތިހުރީ ވަރަށް ބޮޑު ޑޭންޖާއެއްގައޯ.. ބްލެކް މާރކެޓްގަ ޓައިނީގެ ނަން އެބަ އޮތް.. އެހެންވެ އަހަރެން މިހާ ބޮޑަށް ޓައިނީ ޕްރޮޓެކްޓް ކުރަން މިއުޅެނީ.. ރުކައިން ބުނި އެކަމް.. އަހަރެންނާ ޓައިނީއާ ޓީމްއެއް ގޮތަށް މެރީކޮށްގެން މަސައްކަތް ކުރަންޏާ ފަސޭހަވާނެއޯ.. ތީ އެންމެންގެ ހިތްތަކުން ޖާގަ ހޯދާފަ ހުރި މޮޔަ އައި މީން މޮޅު ލޯޔަރެއް.. ލިބުނު އެއްވެސް އެއްވެސް ކޭސްއެއް ކާމިޔާބުނުވެ ނިންމާލާފައެއް ނޯންނާނެއޭ އެންމެ ފުރަތަމަ ޓައިނީ އަހަންނާ ބައްދަލުވި ދުވަހު ބުނީ.. އެހެންވީމަ މިކޭސް ވަކި ކާމިޔާބު ނުވާންވީ ކީއްވެ؟” މައިރީންގެ އަތަށް މަޑުމަޑުން ފިތައިލަމުން ކައިލް އަހައިލިއެވެ. “އެހެންވީމާ… ލޯޔަރ އައިޝަތު މައިރީން ރިޔާޒް.. އޮފިސާރ އަހްމަދު ކައިލްއަށް މިކޭސް ކާމިޔާބުކަމާއިއެކީ ނިންމާލުމަށްޓަކައި އެހިވެދޭނަންތަ؟” ލާނެތް ގޮތަކަށް ހީލަމުން އެއްފައި މައްޗަށް ތިރިވެ އިނދެ ކައިލް އަހައިލިއެވެ. “އަޅުގަނޑު އައިޝަތު މައިރީން ރިޔާޒް، އޮފިސާރ އަހްމަދު ކައިލްއަށް މި ކޭސް ކާމިޔާބުކަމާއިއެކު ނިންމާލުމަށް އެހީވެދޭނަން..” ކައިލް ބުނި ލާނެތް ރާގުގައި މައިރީންވެސް ބުންޏެވެ.

ދުވަސްތައް އޭގެ ހަލުވިކަމާއިއެކު ވޭތުވަމުން ދިޔައެވެ. ދުންޔާ ޑިޔުޓީ ނިންމާފައި ހުރީ އޭނަގެ ކައިރީގައި ހުރި ފިރެހެން ޑޮކްޓަރަކާއި ވާހަކަ ދައްކާށެވެ. ދުންޔާ ބަލައި ހޮސްޕިޓަލަށް އައި ޔާދިންއަށް އެ މަންޒަރު ފެނުމުން ޔާދިންގެ މޫނުމަތި ބަނަވެގެން ދިޔައެވެ. ދުންޔާ ފޯރިއާއެކު ވާހަކަ ދައްކަން ހުއްޓާ ޔާދިން ދެފަހަރަށް ސައިކަލުގެ ބަރުގަނު އަޅައިލިއެވެ. ޔާދިން ފެނުމުން ދުންޔާ ތެޅިގަތެވެ. އަދި އަވަސްއަވަހަށް ޔާދިން ގާތަށް އައިސް ހުއްޓުނެވެ. “ކީތްކުރަން އަހަރެން ކައިރިއަށް ތިއައީ.. ދޭބަލަ އެ ޑޮކްޓަރާ ވާހަކަ ދައްކަން.. އަހަރެން އައީމަ ހީވީ ވައްކަމެއް ކުރަން ހުއްޓަ ފަޅާއެރިހެންވިއްޔަ..” ހިތްހަމަ ނުޖެހިފައި ހުރެ ޔާދިން ބުންޏެވެ.

ދުންޔާ ތުންފަތުގައި ދަތްއަޅައިލިއެވެ. “އެއްކަލަ ދިން.. އަހަރެން ދިންދެކެ އެހާ ލޯބިވާއިރުވެސް އަހަރެންނަށް ޝައްކު ކުރަނީތަ؟” ދެރަވެފައި ދުންޔާ އަހައިލިއެވެ. “އަހަރެންދެކެ ލޯބިވެޔޭ ބުނާއިރު މިހާރު އަހަރެންނަށް ވަގުތެއް ދެވޭ ކަމަކަށް ނުވޭ.. އަހަރެން ކައިރިވީމަ ވަރުބައްޔޭ އެހެން އެއްޗެކޭ ކިޔާފަ ދަނީ ދުރަށް..” ޔާދިން ޝަކުވާކޮށްލިއެވެ. “ދިން ބުނެގެންނުން އަހަރެން ޖޮބަށް ދާން ފެށީވެސް..” ދުންޔާ ބުންޏެވެ. “ހުއް މިހާރު މަގޭ ބޮލަށް އެ ކަނޑާލީ.. އަރާ ސައިކަލަށް..” ޔާދިން ދެ ބުމަ ގޮށްޖަހައިލަމުން ބުންޏެވެ. ޔާދިންގެ ރާގުން ދުންޔާގެ ހިތަށް ތަދުވިއެވެ. އިތުރަށް ދެބަސްވާން ބޭނުންނުވާތީވެ އޭނަ ޔާދިންގެ ސައިކަލު ފަހަތަށް އެރިއެވެ. ޔާދިން މިއަދު ސައިކަލު ދުއްވަމުން ދިޔައީ އެހެން ދުވަސްތަކާއި ހިލާފަށް ބާރަށްށެވެ.

ދުންޔާ އިނީ ޔާދިންލައިގެން ހުރި ކަޅު ކުލައިގެ ގަމީހުގެ ދެފަރާތުގައި ހިފައިޓާލައިގެންނެވެ. ގެއާއި ކައިރިވުމުން ޔާދިން ސައިކަލުން ފޭބުމަށްފަހު ގެއަށް ވަނެވެ. ދުންޔާ މަޑުމަޑުން ހިނގާފައި ޔާދިންގެ ފަހަތުން ވަނެވެ. ގޭގެ ދޮރުލެއްޕުމާއިއެކުހެން ޔާދިން ހުރީ ދުންޔާގެ މޫނާއި މޫނު ޖެހޭހައި ގާތުގައެވެ. ޔާދިންގެ ލޮލުގައިވީ ގޮތް ނޭނގޭ އަސަރު ފެނި ދުންޔާއަށް ލާން އުޅުނު ނޭވާ ހިފައްޓައިލަން މަޖުބޫރުވިއެވެ. ބަހެއް ބުނުމެއް ނެތި ޔާދިން އަވަސް ހަރަކާތާއިއެކު ދުންޔާ އޭނަގެ އަތްދަނޑި މައްޗަށް އުފުލައިލިއެވެ. އޭރު އޭނަގެ މޫނުމަތީގައި ހުރީ ބަޔާން ކުރަން ދަތި އަސަރުތަކެކެވެ.

ދުންޔާގެ ހިތުގެ ތެޅުން އަވަސްވެގެން ދިޔައީ ޔާދިން އޭނަ އެނދަށް އެއްލައިލުމުންނެވެ. “ބިރުންތަ ތިހުރީ؟” ދުންޔާގެ ކަންފަތާއި އަނގަ ކައިރިކޮށްލަމުން ޔާދިން ބުންޏެވެ. “ދިން އުޅޭ ގޮތުން މީހަކު ބިރު ނުގަންނަވަރެއް ނޫނެއްނުން..” ދުންޔާ އޭނަގެ މޫނުމަތިން ބިރުގަންފައި ހުރިކަމުގެ އަސަރުތައް ފޮރުވައިލަމުން ބުންޏެވެ. ދުންޔާގެ ނިތްކުރީގައި ޔާދިންގެ ނިތްކުރި ޖައްސައިލަމުން ފުންނޭވާއެއް ދޫކޮށްލިއެވެ. “އަހަރެން ވަރަށް ރުޅިއައިސްފަ މިހުރީ.. އަހަރެން ބޭނުމެއްނޫން އަހަރެންގެ ރުޅިއާއިހުރެ ދޫނިއަށް އަނިޔާއެއްވާކަށް..” ފުން ނޭވާއެއް ދޫކޮށްލަމުން ޔާދިން ކޮޓަރިން ނިކުންނަން ހިނގައިގަތެވެ.

ތަނަވަސް ބޮޑު ކޮޓަރިއެކެވެ. ރޭގަނޑުގެ އަނދިރިކަމުގެތެރެއަށް އެ ކޮޓަރި ގަރަގުވެފައިވާ ފަދައެވެ. އޭސީގެ ފިނިކަން ސޯޅައަށްލާފައި ހުރި ނަމަވެސް އެނދުމަތީގައި އޮތް ޒުވާނާގެ މޫނުމަތީގައި ދާތިކިތައް ވިދަމުން ދިޔައެވެ. އޭނަގެ އަތުތެރެއަށް އެނދުމަތީގައި އަޅާފައިވި ބެޑްޝީޓްވަނީ ބޮޑިކޮށްލެވިފައެވެ. ދެލޯމަރައި ފިތްތާލާފައިވި ނަމަވެސް ލޮލުގެ ހިމަކޮޅުން ކަރުނަތިކިތައް ރޮގަކަށް ބާލީހަށް ވެއްޓެމުންދިޔައެވެ. ނޭވާނުލެވިގެން އުޅޭ ފަދައަކުން އޭނަގެ ތަނަވަސް މޭ އަވަސް އަވަހަށް އުފުލިފައި ތިރިވަމުން ދިޔައެވެ. ބޯ ދެފަރާތަށް ހޫރަމުން ދިޔައިރު އޭނަގެ އަނގައިން ދިޔައީ ކޮންމެސް އެއްޗެހިތަކެއް ކިޔަމުންނެވެ. ކަރަށް ވާންވާ ފަދަ އިހްސާސެއްވުމުން އޭނަގެ ހަށިގަނޑު ކޮޅަށް ޖެހުނެވެ.

ކޮށިއަރައި ފާޑަކަށް ކެއްސައިގަތުމަށްފަހު އެނދުގެ ހެޑްބޯރޑްގައި ހުރި ފެންފުޅި ނަގައި އަނގަޔަށް އޮއްސައިލިއެވެ. ދެތިން ކޯވަރު ބުއިމަށްފަހު ފުންކޮށް ނޭވާލާން ފެށީ އަމިއްލަ ނަފްސު ހަމައަކަށް އަޅުވައިލާށެވެ. އޭރު އޭނަގެ ބޮލުގައި ހީވަނީ މީހަކު މަރުތެޔޮލަކުން ތަޅާހެންނެވެ. ކުޑަކޮށް ނިދާލުމަށްޓަކައި އޭނަ އެނދަށް ވެއްޓިގަތެވެ. އެފަދައިން ރޭގަނޑު ނޭވާނުލެވިގެން ހޭލެވުމަކީ އޭނައަށް އާންމު ކަމެކެވެ. ކުލަނުވާ އެ ހުވަފެންތަކަކީ އޭނަގެ ހަޔާތުގެ ވަރަށް މުހިންމު ބައެއްހެން ވެސް އޭނައަށް ހީވެއެވެ. އެހެންނަމަވެސް އޭނަގެ ޑޮކްޓަރު ބުނި ފަދައިން އެއީ އޭނައަށް ޖެހިފައިވާ ބަލިމަޑުކަމުގެ އަސަރުތަކެވެ. ގާޓުގައި ހުރި ކަބަޑުގެ ދޮރު ހުޅުވައިލުމަށްފަހު ޑޮކްޓަރ ސްކިޒޮފްރީނިއާގެ ބައްޔަށް ދީފައި ހުރި ބޭސްތަށް ކާލައިގެން، ރޭގަނޑުގެ އަރާމު ނިދިން މިންވަރެއް ލިބޭތޯ އޮށޯތެވެ.

އެޕާރޓްމެންޓްގެ ދޮރު ހުޅުވައިލުމަށްފަހު ވަރުބަލިކަމާއިއެކު ޔަޝާލް އެތެރެއަށްވަނެވެ. ބޫޓު ހަރުގަނޑަށްލުމަށްފަހު ބޮކިތައް ދިއްލައިލި ވަގުތު އޭނަގެ ހަށިގަނޑަށް ސިހުމެއްވެރިވީ ސޯފާގައި ހަމަޖެހިލަގެން އިށީނދެގެން ހުރި މީހާ ފެނުމުންނެވެ. ޔަޝާލް ފެނުމުން އޭނަ ދެބުމަ ގޮށްޖަހައިލަމުން ތެދުވިއެވެ. “ކަލޭ ކައިރީ މަށަކަށް ނުބުނެވޭތަ ކަލޭ ގެންގުޅޭ އެއްޗެހިތައް މައިތިރި ކުރާށެކޭ؟ ކަލެއަށް އެކަން ނުވަންޏާ މަށަށް ޖެހޭނީ އޭޗެހިން މައިތިރިކުރަން.. މަ އެކަން ކުރަންޏަކާ މާކަށް ރީއްޗެއް ނުވާނެ..” ޔަޝާލްގެ ކުރިމަތީ ހުއްޓެމުން ރުޅިއައިސް ރަތްވެ ހުރެ ޒާއިދު ބުނެލިއެވެ.

“އެމީހުން އެއްޗެކޭ ކީމަ ގޯސްވަނީ.. ކަލޭޔަށް އުޅެވޭ ގޮތެއް ނޭނގެ ދޯ ތިހެން ކިޔާއިރު.. އެމީހުންގެ ގައިގަ އިނގިލިކުރި ޖައްސާލިޔަސް ކަލޭ ކުރި ހުރިހާ ކަމެއް ހެއްކާއިއެކު މީޑިއާއަށް އަޅައިލާނަން..” ދަތްކުނޑިވިކައިލަމުން ޔަޝާލް ބުންޏެވެ. ޒާއިދުގެ މޫނުމަތި ރަތްވެގެން ދިޔައީ ހަނދުކޭތަ ހިފާ ވަގުތު ހަނދަށް އިރުގެއަލި އެޅޭ ފަދައިންނެވެ. ކުއްލިއަކަށް ޒާއިދު ޔަޝާލްގެ ކަރުގައި ހިފުމަށްފަހު ފާރަށް ގަންނަވައިލިއެވެ. “ކަލޭތީ މަގޭ ކޮއްކޮގެ ދަރިއެއް ނޫންނަމަ ކަލޭ ހުންނާނީ ބިމު އަޑީގަ!” ދަތްކުނޑިވިކައިލަމުން ޒާއިދު ބުންޏެވެ.

(ނުނިމޭ)

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.