ހިތް އެދެ ޔާރާ ތިއޭ – 38

ރުކައިން އޭނައަށް ދެއްކެނީ ކައިލްގެ އަނބިމީހާގެ ވާހަކަކަމެއް ނޭނގި ކައިލްއަށް ކިޔައިދިނެވެ. ރުކައިންގެ ވާހަކަ އަޑުއިވި ކައިލްގެ އަތު ގައި އޮތް ކޮތަޅަށް ބާރުކޮށްލެވުނެވެ. އެ މޫނުމަތިން ނުރުހުމުގެ ކުލަތައް ފާޅުވެގެން ދިޔައެވެ.

***ޕާޓް 38***

ގެއަށް ވަނުމާއިއެކު އަރީޝާއާއި މައިރީންގެ ހުނުމުގެ އަޑު އެމީހުންނަށް މަރުހަބާކިއެވެ. އަރީޝާއާއި މައިރީން ދިޔައީ މަޖާ ވާހަކައެއްގައި ތިބެގެން ދޮން އަނބުކޮށަމުންނެވެ. ކިރަމް ދެމީހުންގެ ވާހަކަ އަޑުއަހަން ހެވިފައި ހުއްޓެވެ. އަރީޝާ ގާތުއިން މައިރީން ފެނި ރުކައިންއަށް ދެލޯ ބޮޑުކޮށްލާފައި އާހިލްއާއި ދިމާލަށް ބަލައިލެވުނެވެ. އޭރު އާހިލްގެ ދެލޯވެސް ހީވަނީ އޭގެ މަގާމް ދޫކޮށް ވެއްޓިދާނެ ހެންނެވެ. ކައިލްގެ ދެ އެކުވެރިން އުޅޭ ގޮތުން ކައިލް ގާތަށް ހިނިއައެވެ. “ކޮން ވާހަކައެއް މަންމަމެން ތި ދައްކާލަނީ..” ހީލަމުން އަތުގައި އޮތް ކޮތަޅު މޭޒުމަތީގައި ބަހައްޓަމުން ކައިލް އަހައިލިއެވެ. “މި ދައްކަނީ މަންމަމެން މެލޭއަށް ދިޔައިރުވީ ކަމެއްގެ ވާހަކަ ދޯ ދަރިފުޅާ.. އަސްލުވެސް މަންމަ ވަރަށް ދެރަވި ދަރިފުޅުމެންގެ ކައިވެންޏަށް ނާދެވުނީމަ.. އެދުވަހު މަންމަގެ ރިޕޯޓު ޑޮކްޓަރަށް ދައްކަން އޮތީމަ ކިހިނެތްދޯ އާދެވޭނީ.. އެހެންވެ މާލެއަށް އާދެވުނުހާ އަވަހަށް ރަށަށް އައިސް މިގެއަށް މިއައީ..” އަރީޝާ ހިނިއައިސްފައިހުރެ ބުންޏެވެ.

އަރީޝާއަށް ދެލޯ ބޮޑުކޮށްގެން ކައިލްގެ ފަހަތުގައި ތިބި މީހުން ފެނުމުން ހައިރާންވިއެވެ. “ކައިލް މީ ކޮން ބަޔެއް؟” އަރީޝާ އަހައިލިއެވެ. “މިއީ އަޅުގަނޑުގެ ދެ އެކުވެރިން… ރުކައިންއާއި އާހިލް.. ކައިވެނި ކުރީމަ ކެޔުން ދޭށޭ ކިޔާވަރުން މި ގެނައީ.. މިހިރީ އަހަރެންގެ މަންމައާ ދެން އަހަރެންގެ އަނބިމީހާ މައިރީން..” މައިރީންގެ އުނަގަނޑުގައި އަތް އަޅުވައިލަމުން އޭނަގެ މަންމަގެ ސުވާލަށް ޖަވާބު ދިނުމަށްފަހު މައިރީން ތަޢާރަފުކޮށްދިނެވެ. އެއާއެކު ރުކައިންއާއި އާހިލްގެ ކަތުރުކަށިގަނޑު ބިންމަތީ ޖެހުނުފަދައެވެ.

ކައިލްގެ އަތް މައިރީންގެ އުނަގަނޑަށް އިހްސާސްވުމުން މައިރީންގެ ހަށިގަނޑަށް ހޫނުކަމެއްވެރިވިއެވެ. މަޑުމަޑުން ތުންފަތުގައި ދަތްއަޅައިލަމުން މައިރީން އިސްޖަހައިލިއެވެ. މައިރީންއަށް އައި ބަދަލުން ކައިލް ގާތަށް ލާނެތް ހިންޏެއްއައެވެ. “އެހެންދޯ ވަނީ.. ދެކުދިން ސިޓިންރޫމަށް ދާންވީނުން.. އަދި މެންދުރުގެ ކެއުން ތައްޔާރުވެސްނުވެ.. ހަމަ އެހާ ބަނޑުހައިވެގެންތަ މި ދެކުދިން އަނގަތައް ހުޅުވައިގެން މިހުންނަނީ..” ހިނިއައިސްފައި އަރީޝާ ސުވާލުކޮށްލިއެވެ. އަވަސް އަވަހަށް ރުކައިން އާއި އާހިލް އަނގަ ލައްޕާލަމުން ބޯކަހައިލިއެވެ. “އެ.. އެ..އީ.. މީ.. އަނެއް.. ކައިލް މަންމަ އެހާ ރީތިވީމަ..” އަޅައަޅައިގަންނަމުން އާހިލް ބުނެލި ޖުމުލައިން ފެންބޯން ހުރި ކައިލް ކޮށިއަރައިގެން ދިޔައެވެ.

މައިރީން ނުހޭންވެގެން އަނގަމަތީ އަތް އަޅައިލިއިރު، ރުކައިން އާހިލްގެ ކޮނޑުގައި ބޮޑިއެއް އެޅިއެވެ. ކިރަމް ކަރުކެހިލަމުން އަރީޝާގެ އުނަގަނޑުގައި ހިފައި ކައިރިކޮށްލިއެވެ. “އެހެމް އެހެމް.. ތި ކިޔަނީ އަހަރެންގެ އަނބިމީހާގެ ވާހަކަ.. އަހަންނަށް ހީވަނީ އާހިލް ތަންކޮޅެއް ކުޑަ ކަންނޭނގެ އަރީޝާއަށް..” ދެބުމަ ކައިރިކޮށްލަމުން ކިރަމް އާހިލްއަށް ބުންޏެވެ. އޭރު އާހިލް ހުރީ ލަދުންގޮސް ހަލާކުވާ ވަރުވެފައެވެ. އޭނަ އެހެން ބުނީ އެއްވެސް ގޯސް ނިޔަތަކުއެއްނޫނެވެ. އެކަމަކު ކިރަމްގެ ވާހަކައިން އާހިލްގެ ކަންފަތް ރަތްވާން ފެށިއެވެ. “މާފްކުރޭ ކައިލްގެ ބައްޕާ.. އަޅުގަނޑު އެހެން ބުނި އެއްޗެއް ނޫން އެއީކީ..” އާހިލް އިސްޖަހައިގެން ހުރެ ބުންޏެވެ.

އަރީޝާ އަދި މައިރީން ދިޔައީ ބަނޑަށް އަޑުއިވޭވަރަށް ހެމުންނެވެ. އާހިލްއަށްވީ ގޮތުން ކިރަމް ގާތަށްވެސް ހިނިއައެވެ. “ދެން ތިބުނީ އަހަރެންގެ ލޯބިވާ އަނބިމީހާ ހަޑިއޭތަ؟” އާހިލް އިތުރަށް ތަޅުވައިލަން ކިރަމް ބުންޏެވެ. އާހިލް އަވަސް އަވަހަށް ދެފަރާތަށް ބޯ ހޫރައިލިއެވެ. އޭރު އާހިލްގެ މޫނު އެއްކޮށްހެން ވަނީ ރަތްވެފައެވެ. “ސާބަހޭ ބައްޕާ.. އާހިލް ނޫޅޭ އަހަރެންގެ ދޮންބައްޕައަށްވާ ހިތަކުން.. ބައްޕަވެސް ދައްކާ ވާހަކަ ދޯ..” ކައިލް ބޯ ހޫރައިލަމުން ބުންޏެވެ. “އަލަށް މި ފެންނަނީ ފިރެހެނެއް އެހާ ބޮޑަށް ބްލަޝްވާތަން..” މައިރީން ހިނިއައިސްފައިހުރެ އާހިލްއާ ދިމާކޮށްލިއެވެ.

“އަހަރެން ބޭރަށް ޖެހިލަން އެބަ ވައިކޮޅެއް ޖައްސާލަން..” އެހެންބުނެ ބާރު ބާރަށް ހިނގާފައި އާހިލް ބޭރަށް ނުކުތުނެވެ. “މިއޮތް ރަތްދައްކާ އަވީގަ ކޮން ވަޔެއްތަ ޖެހޭނީ..” ރުކައިން އާހިލްއަށް އަޑުއިވޭ ވަރަށް ގޮވައިލިއެވެ. އާހިލް އެއްޗެކޭ ނުބުނެ ދިޔުމުން އޭނަ އެދިޔައީ ލަދުންކަން އެންމެނަށް އެނގުނެވެ. “ބައްޕަވެސް ކުރާ ކަންތައް.. އެސޮރު ރަނގަޅަށް ލަދުގަނުވައިލާފިއޭ…” ކިރަމްގެ ބަނޑުގައި މަޑުމަޑުން އުޅަބޮށިން ޖަހަމުން ކައިލް ބުންޏެވެ. “ދެން އަހަރެންގެ އަނބިމީހާ އަތުލަން އުޅެންޏާ އެހެނެއްނުންވާނީ.. މިހާރުގެ އަންހެނުންވެސް ޒުވާން ކުދިންނަށް ނުލާހިކު ހިތްކިޔާނެ.. ކައިލްވެސް މައިރީންއަށް ރަނގަޅަށް ބަލާތި.. ކައިލް ތިއީ މައިރިންއަށްވުރެ ފަސް އަހަރު ބޮޑު މީހެއް.. އެހެންވީމަ އަވަހަށް މުސްކުޅިވާނީވެސް ކައިލްއެއްނުން..” ކިރަމް ލާނެތް ގޮތަކަށް ބުނެލިއެވެ.

“ބައްޕަ އެއްގޮތަކަށްވެސް އެހެންވީމަ މަންމައަކަށް އިތުބާރެއް ނުކުރަންދޯ.. މިހާރު ގާތް ގަޑަކަށް ވެދާނެ ތިރީސް އެއް އަހަރުވަރު ތި ކައިވެންޏަށް.. އެކަމަކުވެސް އިތުބާރު ނުކުރާކަން ތިޔަ ފެންނަނީ.. ކީތްކުރާނީ މި ފިރެހެނުންގެ ހިތަކީ ޝައްކުބަލި ބޮޑު އެއްޗެއް..” މައިރީން މަޖަލަކަށް ބުނެލިއެވެ. “ބައްޕައަށް އަޑުއިވޭ ގައިމު އަންހެނުންނޭ ޝައްކުބަލި ބޮޑީ..” ކިރަމް ހިނިއައިސްފައި ބުންޏެވެ. “އެހެންވިއްޔާ ބައްޕަ ތީ އަންހެނެއްދޯ…” މައިރީންގެ ޖުމުލައިން އެންމެންގެ ހިނިގަނޑު ފަޅައިގެން ދިޔައެވެ. “ބައްޕާ ތި ޖަދަލުކުރެވެނީ ލޯޔަރަކާ.. ބައްޕަ މޮޅު ނުވާނެކަން ހަނދާން ބަހައްޓައިގެން ޖަދަލުކުރަންޏާ ޖަދަލުކުރަންޖެހޭނީ..” ކައިލް ހެމުން ބުންޏެވެ. “އެހެންދޯ މިވަނީ.. ކައިލްއަށް ކެތްތެރިކަން ދެއްވާތޯ ބައްޕަ ދުޢާ ކުރާނަން..” ކިރަމް ބުންޏެވެ. އެކަހަލަ މިކަހަލަ ވާހަކައެއްގައި ތިބެގެން އެންމެންވެގެން މެންދުރުގެ ކެއުން ތައްޔާރުކުރަން ފެށިއެވެ.

މައިރީންގެ ރަހީނު ކޭހުގެ ބައްދަލުވުމެއް ރިޕޯޓަރުންނާއިއެކު ފުލުހުން ބާއްވާތީވެ، އަލިޝްކާ ހުރީ އައިނާއާއިއެކު އެތަނުގައެވެ. “މިފަދަ ކުޑަކުޑަ ގައުމެއްގައި ކުށް ގިނަވުމަކީ ވަރަށް ބިރުވެރިކަމެއް.. އޭގެ ސަބަބުން އާންމު ރައްޔިތުންގެ ހިތުގައި ބިރުވެރިކަން އުފެދޭކަމެއް.. ހިތާމައަކީ އެހާ ކުށް ގިނަވެފައިވީއިރުވެސް ކުށްވެރިންނަށް އެމީހުންނަށް ލިބެންޖެހޭ އަދަބު ނުލިބޭތީ.. އެމީހުން ސަލާމަތްވާތީ.. އަނިޔާ ލިބުނު ފަރާތަށް އިންސާފު ނުލިބޭތީ.. އޭގެ ސަބަބުން އަޅުގަނޑުމެންނަށް ތިބޭފުޅުންނަށް ކުރަންޖެހޭ އިތުބާރެއް ނުކުރެވޭ.. އަޅުގަނޑުގެ ސުވާލަކީ ތިބޭފުޅުންނަށް ކުށްވެރިން ހައްޔަރު ނުކުރެވެނީ ކީއްވެގެންތޯ؟ ހައްޔަރު ކުރާ ކުށްވެރިއެއްވިއްޔާ ސަބަބަކަށް ނުވާ ސަބަބެއްގައި ދޫކޮށްލަނީ ކީއްވެތޯ؟ އަންމު ނިކަމެތި ރައްޔިތުމީހާއަށް އިންސާފު ލިބުމަށް ހުރަސް އެޅެނީ ކީއްވެތޯ؟ އައިޝަތު މައިރީން ރިޔާޒްއަކީ ލޯޔަރެއް.. ކުށްވެރިންނަށް އިންސާފު ހޯދުމަށްޓަކައި މެދު ކެނޑުމެއްނެތި މަސައްކަތް ކުރަމުން އަންނަ ހީވާގި ދިވެހި ދަރިޔެއް.. އެފަދަ ގޮތަކަށް މައިރީން ރަހީނު ކުރުމުން އަޅުގަނޑުމެން އެންމެންވެސް މިތިބެނީ ވަަރަށް ބޮޑު ބިރުވެރިކަމެއްގެތެރޭގަ.. މައިރީން ރަހީނުކުރި ކުށްވެރިން ހޯދިއްޖެތޯ؟..” އައިނާ މައިކު ހިފައްޓައިގެން ސާބިތުކަންމަތީ ހުރެ ވާހަކަ ދެއްކިއެވެ.

“އާދެ އަޅުގަނޑުމެންވެސް މި މަސައްކަތް ކުރަނީ އައިޝަތު މައިރީން ރިޔާޒްގެ ކުށްވެރިން ހޯދުމަށްޓަކައި އިނގޭތޯ.. ތިޔަ ބޭފުޅުންގެ އެއްބާރުލުން އަޅުގަނޑުމެންނަށް ވަރަށް މުހިންމު..” ކަރުކެހިލަމުން ޒާއިދު ބުންޏެވެ. “ކުއްވެރިން ހައްޔަރު ކުރުމަށް މަސައްކަތް ކުރާއިރު، ކުއްވެރިންގެ މައުލޫމާތުތައް ހަބަރުތަކަށް ނުދެވެނީ ކީއްވެތޯ؟ އަޅުގަނޑުމެންނަށް ކުއްވެރިންގެ މައުލޫމާތު އެނގޭނަމަ އެމީހުން ހައްޔަރު ކުރަން ފަސޭހަވާނެއެއްނުންތޯ؟” އަލިޝްކާ ވާހަކަ ދެއްކިއެވެ.

ރިޕޯޓަރުން ކުރަމުންދިޔަ ސުވާލުތަކުން ޒާއިދުގެ ނިތްމަތިން ދާ ތިކި ހިލެމުންދިޔައެވެ. އޭނަގެ މުޅި ހަށިގަނޑަށް ދިލަ ހޫނުކަމުގެ އަސަރު ކުރަމުންދިޔައެވެ. “ކުއްވެރިންގެ މައުލޫމާތަކީ ސިއްރު ކުރެވިފައި އޮންނަ އެއްޗެއް.. އެއީ އިންސާނީ ހައްގުތަކުގެ ތެރެއިން ހައްގެއް.. އެހެންކަމުން އަޅުގަނޑުމެންނަށް ކުއްވެރިންގެ ހަބަރު ހެއްކަކާ ނުލައި ފަތުރަން ދެވޭކަށް ނެތް..” ޒާއިދު ވާހަކަ ދެއްކިއެވެ. “އެމީހުން އެހެން އިންސާނުންގެ ހައްގުތަކަށް އެރައިގެން ނަމަވެސް އެމީހުންގެ ހައްގުތަކަށްތޯ ފުރަތަމަވެސް އިސްކަންދޭން ޖެހެނީ؟ ތިހެންވަންޏާ އަނިޔާ ލިބުނު ފަރާތަށް އޮތް އިންސާފަކީ ކޮބާތޯ؟” އައިނާ ވަރުގަދަ ރައްދެއް ޒާއިދުގެ ވާހަކައަށް ދިނެވެ. އެއާއެކު ޒާއިދުގެ އަނގަ ލެއްޕިގެން ދިޔައެވެ. “އެހެން ސުވާލެއް ނެތިއްޔާ މި ވަގުތަށް މި ބައްދަލުވުން ނިންމާލީ.. ބައްދަލުވުމަށް އައިސްދެއްވި އެންމެހާ ފަރާތްތަކަށް ޝުކުރުއަދާކުރަން..” ކަރުކެހިލަމުން ޒާއިދު ބުނެލިއެވެ.

އައިނާގެ ތުންފަތް އެއްމިޔަކަނުން ދެމިގެން ދިޔައެވެ. އަލިޝްކާވެސް ހިނިއައިސްފައި އައިނާއަށް ބަލައިލިއެވެ. “އައި ވަރަށް މޮޅު އިނގޭ.. އޭނަ ބަސްހުއްޓިގެން ހަމަ އެދިޔައީ..” އަލިޝްކާ ތަޢުރީފްކޮށްލިއެވެ. “ހޫމް ހަމަ ރަނގަޅަށްވެސް.. ބޮސް ކައިރީ ނުބުނައްޗޭ.. އަހަރުން މަރާނެ އެސޮރަށް އެނގިއްޖެއްޔާ..” އައިނާ ދުލުކުރީގައި ދަތް އަޅައިލަމުން ބުންޏެވެ. އަލިޝްކާ ދެލޯ ބޮޑުކޮށްލިއެވެ. “އެއީ ކީއްވެ؟” އަވަސް އަވަހަށް އަލިޝްކާ އަހައިލިއެވެ. “އޭނަ އެހާ ގަބޫލެއް ނުވާނެ އަހަރެމެން ޒާއިދު ކަހަލަ ޑޭންޖަރަސް މީހުން ކައިރިއަށްދާކަށް.. އެހެން ރޫޑްކޮށް ހުއްޓަސް ބޮޑު ސޮފްޓީއެއް އެއީ… އަހަރުންނާ މެދު ވަރަށް ވިސްނާނެ..” އައިނާ ހެމުން ބުންޏެވެ. އެމީހުންނަށް ކޮކާ.އެމްވީ އިމާރާތުގެ ދޮރާއި އަރައި ހަމަވީއިރު ޔަޝާލް ހަށަން ބަނދެލައިގެން ހުރުމުން ދެމީހުންގެ ހިތް ޑަންޑަންލާން ފެށިއެވެ.

އައިނާ ތުންފަތުގައި ދަތް އަޅައިލައިގެން އަލިޝްކާއާއި ދިމާލަށް ބަލައިލިއިރު އަލިޝްކާ ހުރީ އިސްޖަހައިލައިގެންނެވެ. “ދެމީހުން ކޮންތާކަށް ގޮސްލާފަ ތިއަންނަނީ؟” ޔަޝާލް ވަރަށް ހަމަޖެހިލާފައި ސުވާލުކޮށްލިއެވެ. އޭނަގެ ކެބިންއަށް އަންނަން އިޝާރާތްކޮށްލުމަށްފަހު ސޯފާ ދެމީހުންނަށް ދައްކާލިއެވެ. “ކުޑަކުޑަ ބައްދަލުވުމަކަށް ގޮސްފަ..” އައިނާ އިށީންނަމުން ބުނެލިއެވެ. ޔަޝާލް ބޯޖަހައިލުމަށްފަހު ޓީވީ ހުޅުވައިލިއެވެ. އެއިން ފެނިގެން ދިޔައީ ދެންމެ ބޭއްވުނު ބައްދަލުވުމެވެ. އައިނާއާއި އަލިޝްކާވެސް ޓީވީއަށް އަރައިފައި ހުއްޓެވެ. އަލިޝްކާއަށް ހިންދިރުވައިލެވުނެވެ. “އަހަރެން ހީކުރީ އައިނާއަށް ތަންކޮޅެއް ވިސްނޭނެކަމަށް.. ތިހެން ހެދީމަ އަހަރުންނަށްށޭ ހުރިހާ ރޯޅިއެއް އަންނާނީ..” ޔަޝާލް ހަރުކަށި ރާގަކަށް ބުންޏެވެ.

“ޔަޝާލް މާ ބޮޑަށްށޭ ތިވިސްނަނީ.. އެމީހުނަށް އަހަރުންނަށް ކީއްކުރެވޭނީ؟ ކަމެއްކޮށްފިއްޔާ ރައްޔިތުން އެމީހުން ކުޑަ ކުރާނެ..” އައިނާ ހަމަޖެހިލަމުން ބުންޏެވެ. “ޒާއިދު އަކީ އަހަރެންގެ-” ޔަޝާލް އޭނައަށް ބޭރުކުރެވެން އުޅެވުނު ޖުމްލަ މެދުކަނޑައިލިއެވެ. އޭނަ ދުލުގައި ދަތް އަޅައިލަމުން މޫނު އަނބުރައިލިއެވެ. “ކާކު؟” ޔަޝާލްގެ ކުރިމައްޗަށް އަރަމުން އައިނާ ބުންޏެވެ. “ޔަޝާލް! ޒާއިދުއަކީ ޔަޝާލްގެ ކާކު؟؟” ހައިރާންވެފައި ހުރެ ހަރުކަށި ގޮތަކަށް އައިނާ އެއްސެވެ. “އަހަރެން މިއީ އައިނާގެ ބޮސް.. އަހަރެންގެ ކުރިމަތީ އަޑުގަދަކުރަން ނަހަދާ.. ދެން އެ ކޭސްގެ އެއްވެސް ކަމަކާ އުޅޭ މީހަކަށް މިތާ ވަޒީފާއެއް އަދައެއް ނުކުރެވޭނެ!” ޔަޝާލް ހަރުކަށިކަމާއިއެކު އެހެން ބުނެ އެތަނުން ނިކުމެގެން ދިޔައެވެ.

ވާރޭކަނިތައް މަޑު މިޔުޒިކެއް ފަދައިން ފުރާޅަށް ވެއްޓެމުން ދިޔައެވެ. ކުޑަދޮރުގެ ބިއްލޫރިގަނޑުގައި ވާރޭ ތިކިތައް ބީހިލާފައި ވެއްޓެމުން ދާ މަންޒަރަކީ ބަލަބަލާވެސް ފޫހިވާނެ މަންޒަރެއްނޫނެވެ. މާލެތެރެއާއި ހިލާފަށް ކުޑަދޮރުން ބޭރުބަލައިލުމުން ގަސްތަކާއި ރުއްތަށް ޖެހެމުންދިޔަ ވަޔަށް ނަށަމުން ދާތަން ފެނެއެވެ. ކުޑަދޮރުން ބޭރު ބަލަން އިން މައިރީންގެ ހިތަށް އެ ފިނި ރޭގެ ފިނިކަން ވަންނަމުން ދިޔައެވެ. ނިދަންލާ ކެހެރިބޯ އަތްދިގު ދަނބުކުލައިގެ ބެގީކޮށްފައި ހުރި ނިދާހެދުމާއިއެކު، އެވައްތަރުގެ ހަރުވާޅެއްލައިގެން މައިރީންއިން އިރު ނުހަނު މައުސޫމު ކަމަށް ދައްކައެވެ.

ކައިލް ކޮޓަރިއަށް ވަނުމުން މައިރީން ފިނިވިއެވެ. އެހެންނަމަވެސް ފަހަތަށް އެނބުރުމެއްނެތި ކުޑަދޮރުން ބޭރުބަލަން މައިރީންއިނެވެ. “އަހަރެން އެހެން ބުނީމަތަ ރަންނަމާރިއަށް ތައްޔާރުކޮށްފަ އިންނަ ކުއްޖަ އިންނަހެން ތި އިންނަނީ؟” ކައިލްގެ ލާނެތް ޖުމުލައިން މައިރީންގެ ގާތަށް ހިނިއައެވެ. އެހެންނަމަވެސް ލޯއަޅައިލިއެވެ. “މިރޭ އަހަރެން އޮންނާނީ އަހަރެންގެ އެނދުގަ.. އަހަރެންނަށް މިއަދުކޮށްލިވަރުންވެސް ގައިގަ ރިއްސާއެބަ..” ކައިލް އެނދު މައްޗަށް ވެއްޓިގަންނަމުން ބުންޏެވެ. އެހެން ބުނުމުން މައިރީން މަޑުން އިނދެފައި ސޯފާ ކައިރިއަށް ހިނގައިލާފައި ދިޔައެވެ. “އަހަރެން ކޮންއިރަކު ބުނީ މައިރީން ތިތާ އޮންނާށޭ.. އާދޭ އެނދަށް.. ތިތާ އޮވެ ނިދާފިއްޔާ މިތަނަށް އުރައިލާގެންވެސް ގެންނާނަން.. އޭރުން ފަހަރެއްގަ އަހަރެންނަށް ކުރަންނުވާވަރު ކަމެއް ކުރެވިދާނެ މި ވިއްސާރަރޭގަ.. އަހަންނަކީވެސް ފިރެހެނެއް..” ލާނެތް ގޮތަކަށް ކައިލް ބުންޏެވެ.

މައިރީން ކައިލްއަށް ކަޅި އަޅައިލިއެވެ. “ކައިލްގެ ލާނެތްކަން ލިބިފަތިހުރީ ހަމަ ކައިލް ބައްޕަ ފަރާތުންނޭ ދޯ..” މައިރީން ބޯހޫރައިލަމުން ބުންޏެވެ. ކައިލް ހިނިގަނޑެއް ޖަހައިލިއެވެ. “ކައިލް..” މައިރީން އެނދުގައި އިށީންނަމުން ކައިލްއަށް ތަންކޮޅެއް ސީރިއަސްވެލަމުން ގޮވައިލިއެވެ. ކައިލް ބުމަ އަރުވައިލަމުން މައިރީންއާއި ދިމާލަށް ބަލައިލިއެވެ. “ރުކައިންމެނާ އެއްކޮށް މައިއޭ ކިޔައިގެން ކޮން ވާހަކައެއް ދެއްކީ؟” މައިރީން އަހައިލިއެވެ. ކައިލް އެއްޗެކޭ ބުނުމެއްނެތި ކޮނޑު އަރުވައިލިއެވެ. “ކައިލްލްލް..” ކައިލްގެ ނަމަށް ދަމައިލަމުން މައިރީން ގޮވައިލިއެވެ. “އެވާހަކަ ކިޔައިދޭނީ މައިރީން އަހަރެންގެ އުނގުގައި އިށީނީމަ..” ބޯދަށަށް އަތްލައްވައިގެން އިނދެ ލާނެތް ގޮތަކަށް މައިރީންއަށް ބަލައިލަމުން ކައިލް ބުނެލިއެވެ.

(ނުނިމޭ)

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.