ޝިރާތް 2

ދައްތަ ހިނގައިގަތީ ކޮޓަރިއަކާ ދިމާލަށެވެ. ޝިރާތު ސޯފާގައި އިށީންދެލިއެވެ. ދެން އެއަންހެން މީހާ ނިކުތީ ފިރިހެނަކާއި ދެއަހަރެއްހާ ދުވަހުގެ އަންހެން ކުއްޖަކު ގޮވައިގެންނެވެ.

(2 ވަނަ ބައި)

“ދައްތައަށް ކިޔަނީ އަރޫމާ. ދެން މިއީ ދައްތަގެ ދިރިމީހާ ހުޝާލް. ދެން މިއީ ދައްތަގެ ދަރިފުޅު ހެލީން”

ޝިރާތު ތެދުވެ އަރޫމާއަށް ސަލާމް ކޮއްލިއެވެ. ހުޝާލްއަށް ހިނިތުންވުމެއް ރައްދުކޮއްލާފައި ކުޑަކުޑަ ހެލީން އުރާލިއެވެ. “މާޝާ ﷲ ވަރަށް ލޯބި” ޝިރާތު ހެލީންގެ ކޮލުގައި ހިފާލިއެވެ. “ހިނގާ އަވަހަށް ސައިބޯން. ހުންނާނެ ކަޓްލަސްއާއި ސޮސެޖް ރޯލްސް ހަދާފަ. އަނެއްކާ ކަމުދާ އެއްޗެއްތަ؟” އަރޫމާ ސުވާލު ކޮއްލިއެވެ. ޝިރާތް ބޯޖަހާލިއެވެ.

ސައިބޮއެ ނިމުމުން އަރޫމާއާއި ހުޝާލް ދިޔައީ ޑިއުޓީއަށެވެ. ހެލީން ގޮވައިގެން ޝިރާތް ވަނީ ކޮޓަރިއަށެވެ. “ދައްތި ހާދަ ރީއްޗޭ” މައުސޫމް ހިނިތުންވުމަކާއި އެކު ހެލީން ބުނެލިއެވެ. “ހެހެ ލީންވެސް ވަރަށް ލޯބި” ޝިރާތް ހީލިއެވެ.

ހެލީންއާއި އެކު ސަކަރާތުގައި އުޅިފައި މެންދުރު ވުމުން ހެލީންއަށް ކާންދީފައި ޝިރާތް ހެލީން ނިންދަވާލިއެވެ. އަރޫމާ 2 ޖަހާއިރު ޑިއުޓީ ނިންމާފައި އަންނަ ވާހަކަ ބުނެފައި އޮތުމުން ދެން ޝިރާތް އުޅުނީ ލައިންކާނެ އެއްޗެއް ތައްޔާރު ކޮއްލުމަށެވެ.

“މްމްމްމް ހާދަ ވަސްގަނޑު ރަނގަޅޭ” ފަހަތުން އިވުނީ ފިރިހެނެއްގެ އަޑެވެ. ޝިރާތް ސިހިފައި ފަހަތް ބަލައިލިއެވެ. ބަދިގެ ދޮރުކައިރީ ހުއްޓިލައިގެން ހުޝާލް ހިނިތުންވުމަކާއި އެކު ހުއްޓެވެ.

“ބޭބެ ޑިއުޓީ ނިމުނީތޯ؟” ޝިރާތް ވާހަކަ ދެއްކީ ރީތި ބަހުންނެވެ. “ބްރޭކް ގަޑިއަށް މިއައީ” އައިސް އަލަމާރިން ފެންފުޅިއެއް ހިފައިގެން ހުޝާލް ޝިރާތް ކައިރީގައި ހުއްޓުނެވެ.

“ޝިރާތްދޯ ކިޔަނީ؟” ޝިރާތްގެ ބޮލުން ފެށިގެން ފައިގެ ބޮޑުވައިން އިނގިއްޔާއި ދިމާލަށް ހުޝާލް ބަލައިލިއެވެ. “ސްކޭން” އެއްކޮއްލި ފަދައެވެ.

ހުޝާލްގެ އެއަމަލުން އުނދަގޫ ވީނަމަވެސް ޝިރާތް ހީލިއެވެ. “ލައްބަ”

ހުޝާލް ހީލިއެވެ. “ވަރަށް ލޯބި ނަމެއް” ހުޝާލް ކުރިއަށް ފިޔަވަޅެއް އަޅާލިއެވެ. މަޑުމަޑުން ހުރެފައި ދެން ހުޝާލް ކޮއްލި ކަމަކުން ޝިރާތް ދިޔައީ ސިއްސައިގެންނެވެ.

“ކީއްތިކުރަނީ؟” ޝިރާތު ފަހަތަށް ފިޔަވަޅެއް އަޅައިލިއެވެ.

“ހަމަ ޖެހިބަލަ ހެހެ. ޝިރާތު އުނަގަނޑުގައި މެއްސެއް އިނީމައޭ” ހުޝާލް ބުނެލީ “ހިތްހެޔޮ” ރާގެއްގައެވެ. ނަމަވެސް ހުޝާލްގެ ލޮލުން ޝިރާތަށް ފެނުނީ އެހެން މަންޒަރެކެވެ. އެހެން ނޫނަސް ކުރިމަތީ ހުރި މީހަކަށް ފުރަގަހުގައި އިން މެއްސެއް ފެންނަން ވީ ކީއްވެ ހެއްޔެވެ؟

“ކޯއްޗެއްތަ ތިކައްކާލަނީ” ޝިރާތުގެ މޫނުމަތިން ފެނުނު އަސަރުތަކުން ހުޝާލް އަވަހަށް ވާހަކަ އޮޅުވާލިއެވެ. “މި… މި… އަލުވި ބަތް ކޮޅެއް ކައްކާލަނީ..” ޝިރާތަށް ބުނެވުނީ އަޅައަޅައިގަންނަމުންނެވެ.

“އެހެންތަ؟ ހުޝާލްބެއަށް ވަރަށް މީރު އެއްޗެއް ތިއީ ހެހެ. ހޫމް. ދެން ކިޔާނީ ހުޝާލްބެ އިނގޭ؟” ހުޝާލްގެ ވާހަކައަށް ޝިރާތް ހަމަ އެކަނި ބޯޖަހާލިއެވެ. “ކޮބާތަ ލީން؟”

“ލީން ނިންދަވާލާފައި ކައްކަން މިއައީ” ޝިރާތު ބުންޏެވެ. އެހެންތަ؟ އެހެންވެ މިދަނީ ނަމާދު ކޮއްލަން”

ހުޝާލް ނިކުމެގެން ދިޔުމުން ޝިރާތަށް ހަމަ ޖެހުމުގެ ނޭވާއެއް ލެވުނެވެ. މޭގައި ފިރުމާލަމުން ފުންކޮށް ދެތިން ނޭވާ ދޫކޮށްލިއެވެ.

ޝިރާތު ކޮށި ފިޔާކޮޅު ވަނގާރު ކުރަން އުދައިގެން ހުރި ޝިރާތުގެ ޙިޔާލު ތަކުގައިވީ ހުޝާލްއެވެ. ހަމަ ގައިމުވެސް ޝިރާތާއި ދިމާލަށް ބަލަމުން ދިޔައީ ހިތްހެޔޮ ބެލުމަކުން ނޫނެވެ. އެވާހަކަ އަރޫމާ ގާތުގައި ބުނަންވީ ބާއެވެ؟ ނޫނެކެވެ! ވަޒީފާގެ ފުރަތަމަ ދުވަހު ވަޒީފާ ގެއްލޭކަށް ޝިރާތު ބޭނުމެއް ނުވިއެވެ. އަރޫމާއަށް ޝިރާތު ދައްކާނީ ކޮން މޫނެއް ހެއްޔެވެ؟

ޝިރާތަށް ޙިޔާލު ތަކުން ނިކުމެވުނީ ފޯނު ރިންގުވުމުންނެވެ. ގުޅަމުން ދިޔައީ ހައުޒާންއެވެ.

“ހޭ ލޯބި. ކޮބާ ކިހިނެތް ތަ ތިގޭ މީހުން؟” ހައުޒާންގެ އަޑުގައި ވަރުބަލިކަން ވިޔެވެ. “ޔެސް، އަލްހަމްދުލިއްލާހި މިގޭ ދައްތަވެސް ބޭބެވެސް ވަރަށް ރަނގަޅު” ޝިރާތު ހައުޒާނަށް އެވާހަކަ ސިއްރު ކުރިއެވެ. ހުޝާލްގެ ބޭނުމަކީ އެއީ ކަމަށްވެސް ނުވެދާނެވެ. އެއްވެސް މީހެއްގެ ބޮލުގައި ދޮގު ތުހުމަތު އަޅުވާކަށް ޝިރާތު ބޭނުމެއް ނޫނެވެ.

“ޒާން ހާދަ ވަރުބަލި ވެފަ ހެން ހީވެޔޭ؟ ކިހިނެތްވީތަ އަނެއްކާ؟” ހައުޒާންގެ އަޑުގައިވީ ވަރުބަލިކަން ޝިރާތަކަށް ވަންހަނާއެއް ނުވިޔެވެ.

“އާނ މިއަދު ވަގަކު އަތުލަން ދުވެ ދުވެފައި މިއައީ. މުޅި ރަށް ކުޑަ ކުރި ފަހުން އަތް ޖެހުނީ. ހަމަ ތެދެއް ދެރަކަމެކޭ” ހައުޒާން ފުންނޭވާއެއް ދޫކޮށްލިއެވެ. ހައުޒާނަކީ ފުލުހުގައި މަސައްކަތް ކުރަމުންދާ ހީވާގީ މުވައްޒަފެކެވެ.

މެންދުރު 30 2 ވާން އުޅެނިކޮށް ޝިރާތު ޑިއުޓީ ނިންމާފައި މަންޒިލް ގެއިން ނިކުތެވެ. ލަސް ހިނގުމުގައި ދިޔަ ޝިރާތުގެ ސިކުނޑީގައިވީ ހުޝާލްއެވެ. ހުޝާލްގެ އެކުޑަ ކުޑަ އަމަލުން އެވަޒީފާއަށް އެނބުރިދާން ޝިރާތުގެ ހިތުގައި ބިރުވެރިކަން އުފެދިއްޖެއެވެ. އެހެނަސް ފައިސާއާއި ނުލާ މިހާރު ދިރިއުޅޭނީ ކިހިނެތް ހެއްޔެވެ؟

ޝާޔާ ނިޔާވެ، ފާއިތުވީ 2 މަސް ތެރޭގައި ޝިރާތުގެ ހުރިހާ ޙަރަދެއް ކޮއްދިނީ ހައުޒާނެވެ. ނަމަވެސް ހައުޒާނަކީ އަދި ޝިރާތުގެ ލޯބިވެރިޔާއަށް ވުމުން ހައުޒާންގެ ހަރަދުގައި ދިރިއުޅެން ޝިރާތު ބޭނުންނުވީއެވެ. އެހެންކަމުން ޝިރާތު މިއަދު އެހުރީ ވަޒީފާއަށް ނުކުމެއެވެ.

ޙިޔާލު ތަކުގައި ހުރި ޝިރާތު ސިހުނީ ފަހަތުން ބަރުގޮނުގެ އަޑެއް އިވުމުންނެވެ. ޝިރާތު ލަސްލަހުން ފަހަތަށް އެނބުރުނެވެ.

(ނުނިމޭ)

ތިންވަނަބައިގެ ތެރެއިން:

“ޝިރާ މަށާއި ކައިވެނި ކުރަންވީނުން؟” ހައުޒާން ކޮއްލީ ބޮޑު ސުވާލެކެވެ. ހައުޒާންގެ އެސުވާލުން ޝިރާތު ދިޔައީ އެލިގެންނެވެ. “ކައިވެނި ކުރަންށޭ؟ ޝިރާ ކަހަލަ ނިކަމެއްޗަކަށް ކައިވެނި ކުރަން ޒާންގެ މަންމަމެން އެއްބަސް ވާނެތަ؟” ޝިރާތު އިސްޖަހާލިއެވެ. އެހެން ކަމުން ހައުޒާންގެ މޫނު މައްޗަށް އެރި ކުލަވަރު ޝިރާތަކަށް ނުފެނުނެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.