ޝިރާތް 1

(1 ވަނަ ބައި)

އަންހެން ކުއްޖަކަށް ވުމަކީ ކުށެއް ހެއްޔެވެ؟ ނުވަތަ ފާފައެއް ހެއްޔެވެ؟ ނުވަތަ މަޔަކަށާއި ބަފަޔަކަށް ކުރެވޭ ކުށެއްޖެ ޝަޒާ ހެއްޔެވެ؟ ނޫނެކެވެ! އެއީ ދުނިޔެ ދެކޭގޮތެވެ. އަހަރެމެންގެ ރަސޫލާ މުހައްމަދު ޞައްލައްﷲ އަލައިހި ވަސައްލަމް އެންގެވީ އެހެންނެއް ނޫނެވެ. އަންހެން ކުދިންނަކީ ނިޢުމަތެކެވެ. އަންހެން ކުދިންނަކީ ބައްޕައަކަށް ސުވަރުގެއަށް ވަނުމަށް ހުޅުވޭ ދޮރެވެ. އަނބިމީހާއަކީ ފިރިހެނާގެ ދީނުގެ ދެބައިކުޅަ އެއްބައި ފުރިހަމަ ކޮއްދޭ މީހާއެވެ. އެންމެ ފަހު ދުނިޔެއާއި ކުރިމަތި ލާއިރު ސުވަރުގެ ވަނީ މައިމީހާގެ ފައިތިލަ ދަށުގައެވެ.

އެހެންނަމަވެސް މިއަދު މަންޒަރު ފެންނަނީ އެހެނެއް ނޫނެވެ. އަންހެން ކުދިންނަކީ އަގެއް ނެތް ބައެކެވެ. އަންހެނުންނަކީ ފިރިހެނުން ކުޅެން ގެންގުޅޭ “ޑޯލް” އެކެވެ. އެހެން ވާންވީ ކީއްވެގެން ހެއްޔެވެ؟ ފިރިހެނުން އަންހެނުންގެ އިހުސާސްތަކަށް އެހާ ރަހުމު ކުޑަ ވާންވީ ކީއްވެގެން ހެއްޔެވެ؟ އަހަރެމެންގެ ރަސޫލާ އަންހެނުން ހިމާޔަށް ކުރުމައް އެދި އެވަރަށް ރުއީ ކީއްވެގެންކަން މިއަދު ކަންކަން މިވާގޮތުން މާރަނގަޅަށްވެސް އެބަ އެނގެއެވެ.

ޝިރާތަކީ އާދައިގެ ދިރިއުޅުމެއް އުޅެމުން އައި ކުއްޖެކެވެ. މާގޮތް ބޮޑު ނޫނަސް އުފާވެރި ހަޔާތެކެވެ. ނަމަވެސް ހުރިހާ ކަމެއް ބަދަލުވެގެން އައީ ޝިރާތުގެ އުމުރުން އެންމެ 11 އަހަރުގައި ޝިރާތުގެ ބައްޕަ އިލްޔާން ބައެއްގެ ޝިކާރައަކަށްވެ ނިޔާވުމުންނެވެ. އެއީ ޝިރާތުގެ ހަޔާތައް އައި އެންމެ ހިތާމަވެރި ދުވަހެވެ. ހަޔާތާއި ކުރިމަތި ލާނޭ ގޮތެއް ނޭނގުނެވެ. އެހެނަސް ލޯބިވާ މަންމައަށް ޓަކައި ހިތްވަރު ގަދަ ކުރިޔެވެ. ބައްޕަ ބޭނުންވީ ފަދައިން ކިޔަވާ މޮޅު ކުއްކުއްޖަކަށްވެ، ލޯބިވާ މަންމަ އޭނާގެ ބެލުމުގެ ދަށުގައި އުމުރަށް ގެންގުޅުމަށް އަޒުމް ކަނޑައެޅިއެވެ.

ޝިރާތަކީ އަބަދުވެސް ހިތްހެޔޮ ކުއްޖެކެވެ. ހިތް މަޑު، އެހެން މީހުންގެ އިހުސާސްތައް ދެނެގަންނަން އިނގޭ ކުއްޖެކެވެ. ނަމަވެސް ޝިރާތަކީ އެއްވެސް އިރަކު އަމިއްލަ އިހުސާސްތަކާއި މެދު ވިސްނި ކުއްޖެއް ނޫނެވެ. އެކަން އޭނާއަށް ދަސްނުވެފައިވެސް ވުމާއި އެކުއެވެ.

ނަމަވެސް ޝިރާތުގެ ބައްޕަ ނިޔާވީ އިރުވެސް ޝިރާތު ދިޔައީ ސިއްރުން ކަމަކާއި ހިތާމަ ކުރަމުންނެވެ. ކިލާސް ކުއްޖެއްގެ ފަރާތުން އޭނާއަށް ގޯނާތަކެއް ކުރިމަތި ވާތާ އޭރު އަހަރެއްހާ ދުވަސް ވެދާނެއެވެ. ނަމަވެސް އެވާހަކަ މަންމަމެން ގާތުގައި ބުނާކަށް ޝިރާތަކަށް ނުކެރުނެވެ. އެހެންކަމުން ޝިރާތު އެވާހަކަ ހިއްސާ ކުރީ ޝިރާތުގެ ކިލާސް ލީޑިންގް ޓީޗަރު ކަމުގައިވާ ޖުވޭދަށެވެ. އެކަން ހަމައަކަށް އެޅުނީ އެހިސާބުންނެވެ.

ޝިރާތުގެ އެއާދައިގެ ދިރިއުޅުމަށް ހޭނުނުހެން ހީނުވަނީސް ޝިރާތުގެ މަންމަ ޝާޔާ މިދުނިޔެއާއި އަލްވަދާއު ކިއެވެ. އެއީ ޝިރާތުގެ މުޅި ދިރިއުޅުން މަޑުމޮޅިވި ދުވަހެކެވެ. ހަފަރާތުން އެކަނިވެރިކަމުގައި ބެދުނު ދުވަހެވެ. ނަމަވެސް ޝިރާތު ހިތްވަރު އެލުވައެއް ނުލައެވެ. އެކަން ކުރަން ހިތަށްވެސް ނާރައެވެ.

“ޝިރާއަށް ޔަގީންތަ ރެޑީކަން.؟” “މަންޒިލް” ގޭދޮރުމަތީގައި ސައިކަލު މަޑުކޮއްލަމުން ފަހަތުގައި އިން ޝިރާތައަށް ހައުޒާން ބަލައިލިއެވެ. ހައުޒާނަކީ ޝިރާތްގެ ލޯބިވެރިޔާއެވެ. “ރެޑީނޫނަސް ޝިރާ ކީއްކުރާނީ؟ މިއަދު ޝިރާ ބަލާނީ ކާކު؟ ޝިރާ ބޭނުމެއްނޫން ޒާންގެ ރުފިޔާއިން ދިރިއުޅޭކަށް” ޝިރާތު ސައިކަލުން ފޭބިއެވެ.

“ތިއީ ޝިރާ ބޭނުންވާ ގޮތް ނަމަ އަބަދުވެސް ހިތްވަރުދޭން ގާތުގައި ހުންނާނަން” ޝިރާތުގެ މަޑުކަފަކޮޅެއް ފަދަ އަތުގައި ހައުޒާން ފިރުމާލިއެވެ. ޝިރާތު ހިނިތުންވެލިއެވެ. އަދި ލުއި ފިޔަވަޅު ތަކެއްގައި މަންޒިލް ގެއަށް ވަނެވެ.

ދޮރާށިން ބޭރުގައި ހުދު ކުލަލެވިފައި ވީއިރު މައިދޮރު ކައިރީގައި ހުދު ކުލައިގެ ބޯގަންވިލާ ގަހެއް ހުއްޓެވެ. އެތެރެއަށް ވަދެވުނު އިރު، އެއްފަރާތުގައި ބެންޗާއި، އުނދޯލި ހުރި އިރު ތަފާތު ވައްތަރުގެ މާމެލި ހުއްޓެވެ. އަނެއް ފަރާތުގައި ހުރީ ގަސްތައް އިންދާފައެވެ. ރާނބާފަތާއި، ހިކަނދިފަތުގެ އިތުރުން، މޭވާ ގަސްގަހެވެ. ފެޝަން ފްރުޓް ވެޔޮލަކާއި، އަނބުގަހާ، ކުންނާރު ގަހާއި، ބިލިމަގު ގަހާއި، މިރުސް ގަސް ހުއްޓެވެ.

“އައްސަލާމު އަލައިކުމް” ޝިރާތު ސަލާމް ގޮވާލިއެވެ. ބޭރު ތެރެއަށް ވުރެ ގޭތެރެ ގައިމުވެސް މާރީއްޗެވެ. ގޭގައި އުޅެމުން ދިޔައީ މުއްސަނދި ބައެއްކަން ކޮންމެ ތަންކޮޅަކުންވެސް ދިޔައީ އެނގި ހާމަ ވަމުންނެވެ. ސިޓިންގް ރޫމްގައި ބޮޑު ސޯފާއެއް އިން އިރު، ސޯފާ ކައިރީ ބިއްލޫރި މޭޒެއް އިނެވެ. ސިޓިންގް ރޫމް މޭޒު އެއްފަރާތުގައި ކާޕެޓެއް އަޅާފައި ވީއިރު، އެކި ކަހަލަ ކުޅޭ އެއްޗެހި ކައިރީގައި ހުއްޓެވެ. އެފާރު ކައިރީ އިނގިރޭސި، ދިވެހި، އަދި އަރަބީގެ އަކުރުތައް ތަތް ކުރެވިފައި ވިޔެވެ.

އަނެއްފަރާތުގައި ބޮޑު މަސްޓޭންކެއް އިން އިރު ތަފާތު، އެކި ކުލަ ކުލައިގެ މަސްތައް އޭގައި ހުއްޓެވެ. “ނިއޯން ލައިޓްސް” އިން ޓޭންކު ދިއްލާލާފައިވީ އިރު ވަރަށް ރީއްޗެވެ. ސިޓިންގް ރޫމް ފާރުގައި އެކި ވައްތަރު ޑިޒައިން ހުރި އިރު ސީލިންގުގައި އިން ބޮޑު ޗާންދަލިޔާ މުޅި ސިޓިންގްރޫމް ފުރިހަމަ ކޮއްދެއެވެ.

“ވާލައިކުމްސަލާމް. ޝިރާތު ދެއްތޮ؟” ބަދިގެ ތެރެއިން ނިކުން އަންހެން މީހާ ހިނިތުންވުމަކާއި އެކު ވާހަކަ ދެއްކިއެވެ. “އިށީންދޭ. އެބައަންނަން އިނގޭ” ދައްތަ ހިނގައިގަތީ ކޮޓަރިއަކާ ދިމާލަށެވެ. ޝިރާތު ސޯފާގައި އިށީންދެލިއެވެ. ދެން އެއަންހެން މީހާ ނިކުތީ ފިރިހެނަކާއި ދެއަހަރެއްހާ އަންހެން ކުއްޖަކު ގޮވައިގެންނެވެ.

(ނުނިމޭ)

ދެވަނަބައިގެ ތެރެއިން:

“ޝިރާތްދޯ ކިޔަނީ؟” ޝިރާތްގެ ބޮލުން ފެށިގެން ފައިގެ ބޮޑުވައިން އިނގިއްޔާއި ދިމާލަށް ހުޝާލް ބަލައިލިއެވެ. “ސްކޭން” އެއްކޮއްލި ފަދައެވެ. ހުޝާލްގެ އެއަމަލުން އުނދަގޫ ވީނަމަވެސް ޝިރާތް ހީލިއެވެ. “ލައްބަ” ހުޝާލް ހީލިއެވެ. “ވަރަށް ލޯބި ނަމެއް” ހުޝާލް ކުރިއަށް ފިޔަވަޅެއް އަޅާލިއެވެ. މަޑުމަޑުން ހުރެފައި ދެން ހުޝާލް ކޮއްލި ކަމަކުން ޝިރާތް ދިޔައީ ސިއްސައިގެންނެވެ. “ކީއްތިކުރަނީ؟” ޝިރާތު ފަހަތަށް ފިޔަވަޅެއް އަޅައިލިއެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.