ކަޅު ބުޅާ 21

ލޯގަނޑު ކުރި މަތީ ހުއްޓި އޭނާ މޫނު މަތީގައި އިން މޫނު ފޮތި ކޮޅު ނެގިއެވެ. މޫނު މަތީގައި ބޮޑެތި ރަތް ބިހި ތަކެއް ނަގާފައި ވީ އިރު، ނޭފަތުންނާއި އެއްމިޔަކަނުން ލޭ އޮހޮރެމުން ދިޔައެވެ. ބަލާލަން ބިރުގަންނަހާ އޭނާގެ ސޫރަ ބިރުވެރިއެވެ. އެވަގުތު ހުރިހާ އަލިކަމެއް ނިވުނެވެ. ދެން އިވުނީ އޭނާގެ ވޭނީ ހަޅޭކުގެ އަޑެވެ. އެއަޑުގައި ވޭނާއި ބިރުވެރިކަން އެކުލެވިފައި ވިއެވެ.

(21 ވަނަ ބައި)

“ކަ.. ކާކު ސިހުރު ހެދީ…؟” މިޒިޔަލްއަށް އަހާލެވުނެވެ. އޭރު މިޒްނާގެ ހިތްވެސް ދިޔައީ ފެނުންނެގި ރޯމަހެއްހެން ތެޅެމުންނެވެ. އިބްރާހިމްބެގެ ޖަވާބަށް ދެމައިންވެސް އިންތިޒާރު ކުރަމުން ދިޔައެވެ.

“ސިހުރު ހަދާފައި ވަނީ މިސްޓްރީ ގޯތި އާދަނު. ސިހުރު ހަދަން އެދިގެން އައީ މިޒްނާގެ ދޮންތަ އިޒްނާ”

“މަންމާ؟ މަންމާ؟” ހަމަ ހިއްސު ކެނޑިފައި އޮތް އިޒްނާއަށް ހޭލެވުނީ އިޒާކް ދޮރުގައި ޖަހާ އަޑަށެވެ. ހަށިގަނޑުގައި އެއްވެސް ވަރެއް ނެތުމުން އިޒްނާ ދޮރު ހުޅުވާކަށް ބޭނުމެއް ނުވިއެވެ. ނަމަވެސް އިޒާކް ދޮރުގައި ޓަކި ޖަހާ ވަރުން އެއައީ ކޮންމެވެސް ވާހަކައެއް ބުނަންކަން އިޒްނާއަށް ދެނެގަނެވުނެވެ.

“ކީކޭ ދަރިފުޅޫ؟” އިޒްނާ ނިކުތީ މޫނުވެސް އަޅައިގެންނެވެ. އިޒްނާ މިހާރު އެހުރި ސިފަ އިޒާކްއަށް ފެންނާކަށް އެއްގޮތަކަށްވެސް އިޒްނާ ބޭނުމެއް ނޫނެވެ.

“މަންމާ. އެ އިވްޔާއާއި މިޒިޔަލް ވަރި ވެއްޖޯ ދޯ؟ މަންމާ. އެޒާއަށް ޔަލްއާއި ކައިވެނި ކުރެވޭނެ ދޯ އެހެންވެ؟” އިޒާކް އުފާވެލާފައި ވާހަކަ ދެއްކިއެވެ.

“ހެހެ. ލައްބަ ދަރިފުޅާ. މިޒިޔަލްއެއީ ކުޑައިރުން ސުރެވެސް ދަރިފުޅުގެ ހައްގެކޭނުން؟” އިޒްނާ އިޒާކްގެ ބޮލުގައި ފިރުމާލިއެވެ.

އިޒާކްއަކީ އިޒްނާގެ ދަރިފުޅެވެ. އިޒާކްގެ ބައްޕަ ވިޝާން ވަނީ އިޒްނާ ބަނޑުބޮޑު އިރު މަތިންދާބޯޓު ހާދިސާއެއްގައި ނިޔާ ވެފައެވެ. އެދުވަހުން ފެށިގެން އިޒްނާ އަޒުމް ކަނޑައެޅިއެވެ. އޭނާގެ ދަރިފުޅަށް ދުނިޔެވެސް ހޯދައިދޭނެއެވެ.

އިޒާކްއާއި މިޒިޔަލް ބޮޑުވީ އެކު އެކީގައި ހެންނެވެ. އިޒާކް މިޒިޔަލްއަށް ވުރެ ހަގީ އެންމެ 10 މަހެވެ. ކުޑަ އިރުން ސުރެ ދެމީހުންގެ މެދުގައިވީ ވަރުގަދަ ގުޅުމެކެވެ. ނަމަވެސް އިޒާކް މިޒިޔަލް އެއް އިރެއްގައިވެސް ބޭބެއެއްގެ ގޮތުގައި ނުދެކެއެވެ. ސަބަބަކީ އިޒާކް މިޒިޔަލް ދެކެ ލޯބި ވުމެވެ. މިޒިޔަލްއަށް ލޯބި ހުށައަޅަން ނުކެރިފައި ހުއްޓާ ދެން އިވުނީ މިޒިޔަލްއާއި އިވްޔާގެ ވާހަކައެވެ.

މިޒިޔަލްއާއި އިޒާކްގެ މެދުގައިވީ ވަރުގަދަ ގުޅުމުގެ ސަބަބުން މިޒިޔަލްއަށް އިވްޔާދެކެ ލޯބި ވެވިއްޖެކަންވެސް އެންމެ ފުރަތަމަ އެނގުނީ އިޒާކްއަށެވެ. އިވްޔާގެ ވާހަކަ އަބަދު މިޒިޔަލް ދައްކައެވެ. އިވްޔާ ހާސިލް ކުރުމަށް މިޒިޔަލް އެނބުރި ހިންމަފުއްޓަށް ދާން އުޅުނު ދުވަހަކީ އިޒާކް އަމިއްލައަށް މަރުވާން އުޅުނު ދުވަހެވެ.

އެދުވަހު އިޒްނާ ނިންމިއެވެ. އޭނާ ފިޔަވަޅެއް އަޅަން އެބަ ޖެހެއެވެ. އިޒްނާއަށް ފެނުނީ އެންމެ ދޮރެކެވެ. އެއީ ސިހުރުގެ ދޮރެވެ. ނުރައްކާތެރި މަގެއް ނަމަވެސް އިޒާކްގެ ހައްގުގައި އެފާފައަށް އަރައިގަތުމަށް އިޒްނާ ނިންމިއެވެ. ނަމަވެސް އިޒްނާ ސިހުރު ހެދިކަން އެއީ އިޒާކްއަށްވެސް ވަންހަނާ ކުރެވިފައިވީ ކަމެކެވެ.

ސިހުރު ހަދާ މީހަކަށް އިތުބާރު ކުރެވޭނެ ހެއްޔެވެ؟ އިޒްނާއަކީ އާދަނަށް ލިބުނު “ކްލައިންޓްސް” ތެރެއިން އެންމެ މުއްސަނދި މީހާއެވެ. އާދަނު ބޭނުންވީ ދެކޮޅުން ކާށެވެ. އިޒްނާ އަތުން ގިނަ ގުނަ ރުފިޔާ ތަކެއް ނެގި ނަމަވެސް އާދަނު ސިހުރު ހަދަމުން ދިޔައީ ގަސްތުގައި ނުބައި ކޮށެވެ. އިޒާކްގެ ބަދަލުގައި މިލީންއަށް މިޒިޔަލްގެ ކައިވެނި ކުރުވުމަށް މިޒްނާ މަޖުބޫރު ކުރަންވީ ސަބަބަކީވެސް އެއީއެވެ.

“މިޒްނާއަށް ސިހުރު ހަދާފައިވީ ކާއެއްޗަކަށް އަޅައިގެން. މިޒިޔަލްއަށް ސިހުރު ހަދާފައި ވަނީ ގޭ ދޮރާށި ކައިރީ ވަޅުލާފައިވީ އެއްޗަކުން” އިބްރާހިމްބެ ކިޔައިދިނެވެ.

މިޒިޔަލްއަދި މިޒްނާވެސް އިނީ ހައިރާން އަންތަރީސް ވެފައެވެ. އެފަދަ ކަމެއް އެއްބަނޑު އެއްބަފާ މީހަކު ކޮއްފާނޭ ހީކުރާނީ ކާކު ހެއްޔެވެ؟

“އިބްރާހިމްބޭ. އަޅުގަނޑާއި އަޅުގަނޑުގެ އާއިލާ ސަލާމަތް ކޮއްދީ. މިހާރު އެޖިންނި އަޅުގަނޑުގެ ދަރި އެއްވެސް ހުރޭ. ހެޔޮނުވާނެ އަޅިގަނޑު ސަލާމަތް ކޮއްދީ” ކުއްލިއަކަށް މިޒިޔަލް އިބްރާހިމްބެ ފައި ދަށަށް ތިރި ވިއެވެ. މިޒިޔަލްގެ ވާހަކައިން މިޒްނާ އަދި އިބްރާހިމްބެއަށްވެސް ހައިރާން ކަން ގެނުވިއެވެ. އެޖިންނި މިޒިޔަލް ފަހަތުން އުޅޭކަން އެނގުނު ނަމަވެސް ކުއްޖަކު ހުންނަކަން އިބްރާހިމްބެއަށް މި އެނގުނީ އަދި އަލަށެވެ.

“އެކޮއެ، ލަސް ކުރާނެ ކަމެއް ނެތް. އަވަހަށް އަންހެނުންގެ ރަށަށް ހިނގާ. ތިކުއްޖާ މާ ބޮޑު ވެއްޖެ ނަމަ މާ އުނދަގޫވާނެ. އެ ޖިންނި އަކީ ޖިންނީންގެ ތެރެއިން އެންމެ ބާރު ގަދަ ޖިންނި. ދެން އެ ދަރިފުޅަކީ ޖިންނި އަކާއި އިންސިއެއްގެ ނަސްލު ހުރި ކުއްޖެއް. އެކުއްޖާ މާ ބާރު ގަދަ ވާނެ. ބޮޑުވެގެން މިޒިޔަލްގެ އަންހެނުން އަދި ދަރިފުޅަށް ވެސް ދުއްތުރާ ކުރާނެ” އިބްރާހިމްބެ ބުނެލިއެވެ.

އެރޭ މިޒިޔަލް ނިދީ މިޒްނާ ގޮވައިގެން ގެސްޓް ހައުސް އެއްގައެވެ. ޖެހިގެން އައި ދުވަހު ހެނދުނު ހިންމަފުއްޓަށް ފުރަން ހަމަ ޖެހިފައިވީ އިރު ދެހިތުގައިވެސް ނުތަނަވަސްކަން ވިއެވެ. އެދަތުރަކީ އަމާން ދަތުރަކަށް ނުވެދާނެކަމަށް އިބްރާހިމްބެ ބުނެފައިވީތީއެވެ.

ކޮޓަރީގެ ކަނެއްގައި ރޯލަ ރޯލަ އިވްޔާ އިންނަތާ މިހާރު 4 ވަރަކަށް ގަޑި އިރު ވެދާނެއެވެ. މިހާރު އިވްޔާގެ ހާލަކީ މިއީއެވެ. ރުއިމާއި ނިދުމެވެ. ހަގީގަތުގައި މިހާރު އީވާ ބަލަނީވެސް އިނާއެވެ. ކުޑަ ކުއްޖަކު ގޮވައިގެން އުޅޭނެހާ ހިތްވަރު އިވްޔާގެ ހަށިގަނޑުގައި ނުހުންނާތީވެއެވެ.

އަނެއް ސަބަބަކަށްވީ އީވާ މިޒިޔަލްއާއި ވައްތަރުކަމެވެ. ބޮޑުވި ބޮޑުވިހެން މިޒިޔަލްގެ ސިފައާއި އީވާ އެއްގޮތް ވަމުން ދިޔައެވެ. އީވާދެކެ ލޯބިވީ ނަމަވެސް އީވާ ފެނުމުން ހަގީގަތުގައި މިހާރު އީވާއަށް އުނދަގޫ ވެޔެވެ. އީވާ ކުރި މައްޗަށް އަރަން މިހާރު ނުކެރޭތީވެ އީވާއަށް ގާތުން ދެނީވެސް ޕަމްޕް ކޮއްގެންނެވެ.

އެވަގުތު އިވްޔާގެ ފޯނު ރިންގުވާން ފެށިއެވެ. އިވްޔާ ދުވެފައި ގޮސް ފޯނު ނެގިއެވެ. ގުޅަމުން ދިޔައީ މިޒިޔަލް ކަމަށް ހީކޮށެވެ. ނަމަވެސް ގުޅަމުން ދިޔައީ ނުދަންނަ ނަންބަރަކުން ކަމުން، އިވްޔާގެ މޫނު އޮއްސުނެވެ.

އަޅާނުލާ އިވްޔާ ފޯނު ބޭއްވިއެވެ. އެމީހަކު ކެނޑޭ އިރަށް ހަމަ ގުޅައެވެ. 10 ވަނަ ފަހަރަށް ގުޅުމުން އިވްޔާ ނިންމީ ފޯނު ނަގާށެވެ.

“ދަރިފުޅާ…”

(ނުނިމޭ)

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.