ކަޅު ބުޅާ 5

“މަރްހަބާ. އިވްޔާ ބަނޑުބޮޑު. ބަނޑަށް 6 ހަފްތާ” ޑަކްޓަރު ބުންޏެވެ. އިވްޔާގެ ދެލޯ ވަގުތުން ފުރުނީ އުފާވެރި ކަމުގެ ކަރުނައިންނެވެ. “އަލްހަމްދުލިއްލާހި” ދެމަފިރިންނަށް އެކުގައިހެން ބުނެވުނެވެ.

(5 ވަނަ ބައި)

ހެނދުނު 9 ޖަހަން އުޅެނިކޮއް އިވްޔާ ގެއަށް ދޫކޮށްލެވުނެވެ. ސައިކަލުގައި ގެއަށް އައި ދެމަފިރިންގެ ހައިރާންވީ “މިސްޓްރީ” ގެއިން އިވެމުންދިޔަ ހޭރުމުގެ އަޑުންނެވެ. އެއްބައިފަހަރު ހީވަނީ ބުޅާ ގޮވާހެންނެވެ. އަނެއްބައިފަހަރު އެއީ އަންހެން ކުއްޖެއްގެ ހޭރުމުގެ އަޑުހެންވެސް ހީވެއެވެ.

“އަނހާ ދަރިފުޅުމެން އައީދޯ؟” ދެން ފެނުނީ މިޒްނާ ގޭދޮރު ހުޅުވާލާފައި ނިކުންތަނެވެ. “މަންމަ ކޮންއިރަކު އައީ؟” މިޒިޔަލް އެއްސެވެ. “ދެންމެއަކު. މިއައީ ދަރިފުޅު މެންނަށް މަރްހަބާ ކިޔަން. މަރްހަބާ އިވްޔާ. އިރާދަކުރެއްވިއްޔާ މަންމައަކަށް ވަނީނުން؟” މިޒްނާ އިވްޔާގެ ބަނޑުގައި ފިރުމާލަމުން ބުންޏެވެ.

“ކިހިނެއް މަންމައަށް އެނގުނީ އިވް ބަނޑުބޮޑުކަން؟” މިޒިޔަލް ހައިރާންވީ މަންމައަށް އެކަން އެނގެންވީ ގޮތަކާއި މެދުއެވެ. “ދެން އެނގޭނެއްނުން؟ މަންމަގެ ވަރަށް ގާތް ރައްޓެއްސެއް އުޅޭނޭ ހޮސްޕިޓަލުގަ. އޭނަ ބުނީ” މިޒްނާ ބުންޏެވެ. “ދެން ހިނގާބަލަ އެތެރެއަށް. މަންމަ ހުންނާނެ މޭވާ ކޮޅެއްގެނެއްސަ” މިޒިޔަލްގެ އިތުރު ސުވާލެއް ކުރިމަތި ނުވަނިސް އަވަހަށް މިޒްނާ ބުންޏެވެ.

ދެނަމާދު ދޭތެރޭގެ ވަގުތެވެ. ކަޅު ކުލައިގެ ބޮޑު ހެދުމަކާއި އެކު މޫނުއަޅައިގެން ހުރި މެދުއުމުރުގެ އަންހެންމީހާ ގޮސް ވަނީ “މިސްޓްރީ” ގެއަށެވެ. ގޭގެ ދޮރާށި ހުޅުވާލުމާއި އެކު ގޭތެރޭގައި ހުރި ބުޅާ ތަކުގެ ނަޒަރު އެއަންހެން މީހާއަށް ހުއްޓުނެވެ. ޖޯލިފަތީގައި އެގޭ އެންމެ ދޮށީ ކުއްޖާކަމަށްވާ މީލިއާ އޮތެވެ.

“ކޮބާ ބައްޕަ؟” އެ އަންހެން މީހާއެއްސެވެ. “އެބައިން ކޮޓަރިކޮޅުގައި” މީލިއާ އޭނާގެ އުނގުގައި އޮތް ބުޅަލުގައި ފިރުމަމުން ބުންޏެވެ. މީލިއާގެ ޖަވާބާއި އެކު، އެއަންހެން މީހާ އެތެރެއަށް ވަނެވެ.

ގޭތެރޭގައިވެސްވީ ހުސް ކިލަލެވެ. ފައިހީލި ކަރުވާވަރަށް ބިންމަތީގައި ހިރަފުސް ހުރި އިރު، ގޭގެ އެކި ދިމާލުގައި މަކުނުވާވެސް ހުއްޓެވެ. ހުރިހާ ކޮޓަރިތަކާއި ތަންކޮޅެއް ދުރުގައި ރަތްކުލައިގެ ދޮރުފަތެއް އިން ކޮޓަރިއެއް އިނެވެ. އެއަންހެންމީހާ ގޮސްވަނީ އެކޮޓަރިއަށެވެ.

ކޮޓަރިއަށް ވައިން ގޮތައް ވަދެ އެއްވެސް އެއްޗެއް ނުބުނެ އެއަންހެންމީހާ ގޮސް ޖެހީ އާދަނުގެ ކަންކަށިމަތީގައެވެ. “މަކަލެއަށް ކިތައް ހާސް ރުފިޔާ ދިނިންތަ އެއިން؟ ކީއްވެ މިއަދު އިވްޔާ މާބަނޑު ވާންވީ؟ މަކަލެއަށް ދިން ހުރިހާ ރުފިޔާއެއް ގެނޭ. މަ ހިނގައިދާނަން އެހެން މީހެއްގާތަށް” އެއަންހެން މީހާ ހިތްހަމަ ނުޖެހިފައި ބުންޏެވެ.

އާދަނު ޖަހާލީ ހިނިގަނޑެކެވެ. “ހަމަ ޖެހޭ. ކަލޭ ފުރަތަމަ މަގާތު ބުނީ ކީކޭ؟ ބޭނުމީ އެދެމީހުނަށް އުފަލެއް ނުލިބުމަށޭ. މައެކަންކުރަން މިއުޅެނީ. އެމީހުނަކަށް އުފަލެއް، އަދި ދަރިއެއްވެސް ނުލިބޭނެ. ހަހަ” އާދަނު ހިނިގަނޑެއް ޖަހާލިއެވެ.

ހަމަ އެވަގުތެވެ. ނިދިފައި އޮތް އިވްޔާއަށް ހޭލެވުނީ ބަނޑަށް ތަދެއް އަރައިގެންނެވެ. “ޔަލް…؟” އިވްޔާއަށް ގޮވާލެވުނެވެ. “ޔަލް؟” އިވްޔާގެ ދެލޮލުން ކަރުނަތައް އޮހިގަތެވެ. ބަނޑުގައި ރިއްސަމުން ދިޔައީ އޭނާއަށް ކެއްވާ ވަރަކަށް ނޫނެވެ. ވަރަށް ހާލުން އެނދުމަތީގައި އޮތް އޭނާގެ ފޯނު ނަގާ މިޒިޔަލްއަށް އޭނާ ގުޅާލިއެވެ.

“ޔެސް ލޯބީ. ފިހާރައިގަ މިހުރީ. އިވް ކޯއްޗެއް ބޭނު-” އެހިސާބަށް ބުނެވުމާއި އެކު މިޒިޔަލްގެ ކަންފަތުގައި ޖެހުނީ އިވްޔާގެ ރުއިމުގެ އަޑެވެ. ވަގުތުން ހުރިހާއެއްޗެއް ބަހައްޓާފައި މިޒިޔަލް ދުއްވައިގަތެވެ.

“މަ..މަގޭ..މަގޭ ދަރިފުޅު. ނޫން ޔާ ﷲ ނޫން. މަގޭ ދަރިފުޅު…” އެނދުމަތީގައި ހުރި ލޭތަކުގައި އަތް ޖައްސާލަމުން އިވްޔާ ރޯންފެށިއެވެ. ކޮންމެވެސް ވަރަކަށް ނަމަވެސް އޭނާއަށް ވީނުވީ އެނގުނީތާއެވެ. މަންމައަކަށް ވާން އުޅޭކަމުގެ އުފާވެރި ޙަބަރު ލިބުނުތާ 24 ގަޑިއިރުނުވެ އެދަރިފުޅު އިވްޔާ ދޫކޮށްފައި އެދިޔައީއެވެ. “ނޫން.. ޕްލީޒް ނޫން.” އިވްޔާއަށް ދިޔައީ ރޮވެމުންނެވެ.

އެވަގުތު މިޒިޔަލް ދޮރުހުޅުވާފައި ވަނެވެ. އިވްޔާ އިންގޮތް ފެނި މިޒިޔަލްއަށް ހުރިތަނަށް ތިރިވެވުނެވެ.

“މަޢާފް ކުރޭ. އިވްޔާގެ ދަރިފުޅު މިދުނިޔެ ދޫކޮށްފި…” އިސްޖަހާލައިގެން ހުރެ ޑަކްޓަރު ދިން ޙަބަރު މިޒިޔަލްއަށް އިވުނީ ހޮނު ގުގުރިއެއް ފަދައިންނެވެ. ކޮންފަދަ އިމްތިހާނެއް ހެއްޔެވެ؟

އިވްޔާ އޮތް ކޮޓަރިއަށް މިޒިޔަލް ވައިން އިރުވެސް އިވްޔާ ދިޔައީ ރޮމުންނެވެ. “ޔަލް. އަހަރެމެންގެ ދަރިފުޅު މަރެއްނުވޭދޯ؟ ނުވޭދޯ؟ ނޫން. އަހަރެމެންގެ ދަރިފުޅު މަރެއް ނުވާނެ. އެހާ ކުޑަ ހިނދުކޮޅެއްގައި އަހަރެމެން ދޫކޮށްފައި ދަރިފުޅެއް ނުދާނެ ނޫން ނޫން. ބުނެބަލަ ޔަލް. އަހަރެމެންގެ ދަރިފުޅު މަރެއް ނުވެއެއްނުން؟ ނުވާނެ މަރެއް ނުވާނެ.” މިޒިޔަލްގެ އަތުގައި ހިފާތަޅުވާލަމުން އިވްޔާ ބުންޏެވެ.

ލޯބިވާ އަނބިމީހާ އެވަރަށް ރޯތަންފެނި މިޒިޔަލްއަށްވެސް ރޮވުނެވެ. ފިރިހެނެއް ކަމަކު ކެއްވާނީ ވަކި ވަރަކަށް ނޫންހެއްޔެވެ؟ އިވްޔާގެ ހަށިގަނޑުގައި ބައްދާލަމުން މިޒިޔަލް ރޮމުން ދިޔައެވެ. މިޒިޔަލް ރޯންފެށުމުން އިވްޔާ ގަނޑުވިއެވެ. އޭނާގެ ދަރިފުޅު ހަމަ އޭނާ ދޫކޮށްލާފައި ދިޔައީ ހެއްޔެވެ؟

ކިތަންމެ އިރަކު ރޮއެފައި ދެމަފިރިން ހަމައަކަށް އެޅުނެވެ. ނަމަވެސް ދެމީހުންގެ ދެމެދުގައި އެއްވެސް ވާހަކައެއް ނުދެކެވުނު އިރު، ތިބީ ގަބުވެފައި. ރޮއެ ރޮއެ ވަރުބަލިވެފައި ވުމުން އިވްޔާ ދެލޯ މަރާލީ ނިދާލުމަށެވެ.

އެވަގުތު މިޒްނާވެސް އެތަނަށް އައެވެ. ލޯމެރިފައި އޮތް އިވްޔާއަށް ބަލައިލަމުން މިޒްނާ ކަޅިއަޅާލީ މިޒިޔަލްއަށެވެ.

“ކޮބާ؟ ހީވޭތަކަމެއްހެން؟ މައޭރުވެސް ބުނީމެއްނުން ތިއިވްޔާއަކަށް ކައިވެނި ކުރާނެ ކަމެއް ނެތޭ؟ ތިއިވްޔާއަކަށް ދަރިފުޅުގެވެސް އަދި މަންމަގެވެސް އުންމީދެއް ފުރިހަމައެއް ނުކޮއްދެވޭނެ. އިވްޔާ ވަރިކުރޭ. މަންމަ ދަރިފުޅާއި މިލީންގެ ކައިވެނި ހަމަ ޖައްސާނަން” އެއްވެސް ރަހުމެއްނެތި މިޒްނާ ބުންޏެވެ.

“މަންމާ! ދަރިމައި ނުވެވުން އެއީ އިވްގެ ކުށެއްތަ؟ މަންމަ ތިހެން ބުނާ އިރު ހީވަނީ އިވް ކުއްޖަކު ހޯދަން ބޭނުން ނުވާތީ އުޅޭހެން. އެކަމަކު އެހެންތަ؟ ނޫނެއްނުން؟ އިވް ވެސް ކުއްޖަކު ބޭނުންވޭ.. އިވްއަށް ކުއްޖަކު ނުލިބުން އެއީކީ އިވްގެ ކުށެއް ނޫން. ދެން އެހެން ނޫނަސް މިވަގުތު އިވްއަށް ފިރިމީހާގެ ލޯބި ކިހާ މުހިންމު ވާނެ؟ ދެންވެސް މަންމަ ތިބުނަނީ އިވް ވަރި ކުރާށޭތަ؟” މިޒިޔަލްގެ އަޑުގައި އޭރު ފުދޭވަރަކަށް ހިތް ހަމަ ނުޖެހުމުގެ އަސަރު ހުއްޓެވެ.

(ނުނިމޭ)

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.