ޒެވިއަން 25

ޔަލާން އަތުގައި ބިޑިއަޅުވައިގެން އާކިންގެ އިތުރުން 3 ފުލުހަކު ނުކުތެވެ. އެއާއި އެކު އެމީހުންގެ އިންތިޒާރުގައި ތިބި ނޫސްވެރިން އަހިސް އެމީހުން ގާތު ތަތްވެގަތީ ހަކުރުފެނިގެން ހިނިތަށް ދުއްވައިގަންނަހެންނެވެ. މަންޒަރު ބަލަން ދުރުގައި ހުރި އަލަކާއަދި އަލާޔާގެ އިތުރުން ލުބާންއަށް ޔަލާން ބަލައިވެސް ނުލިއެވެ. އެކަމުގެ ސަބަބުން އެތިން ހިތުގައިލީ ނުފިލާނޭ ކޫރެކެވެ.

“ޝަނުމްއަށް އެހެން ހެދީ ކީއްވެގެންތޯ؟” “ޝަނުމްއާއި ޔަލާންގެ މެދުގައި މައްސަލައެއް ޖެހުނީތޯ؟” “ތިމާގެ ކުއްޖަކަށް ވެހުރެ އެހެން ހަދަންވީ ކީއްވެގެންތޯ؟”

ރިޕޯޓަރުންގެ ސުވާލުތަކާއި ހުރެ ޔަލާން ހުރީ ރުޅި އަހިސްފައެވެ. ނަމަވެސް އެއްވެސް އެއްޗެކޭ ނުބުންޏެވެ. ޕޮލިސް ކާރަށް އަރުވައިގެން ޔަލާން ގޮވައިގެން ފުލުހުން ދަތުރުކުރީ ބަނދަރަށެވެ. އެމީހުންގެ އިންތިޒާރުގައި އޮތް ޕޮލިސް ލާންޗްއަށް އަރައިގެން ޔަލާން ގޮވައިގެން ދަތުރުކުރީ ކ.މާލެއަށެވެ.

“އުމުރުން 14 އަހަރުގެ ފިރިހެން ކުއްޖާއަށް ހަމަލާދިން ކުއްޖާ އަމިއްލައަށް އެކުށަށް އިއުތިރާފް ވެއްޖެއެވެ. އަޅުގަނޑުމެންނަށް ޙަބަރު ލިބުނު ގޮތުގައި ހަމަލާދިން ކުއްޖާއާއި ހަމަލާ ލިބުނު ކުއްޖާއަކީ ތިމާގެ ދެކުދިންނެވެ. ހަމަލާ ދިން ކުއްޖާ ގޮވައިގެން 3 ފުލުހުންގެ އިތުރުން އެކުއްޖާގެ މައިންބަފައިން އަދި އެކުއްޖާގެ ލޯޔަރު މާލެ ފުރައިފި ކަމަށް އަޅުގަނޑުމެންނަށް ޙަބަރު ލިބޭ. އިތުރު ތަފްސީލް އަންނަނީ…..”

ޙަބަރު ބަލަން އިން ނިލީޝާގެ ދޮން ކޯތާފަތުގައި ކަރުނަތިކިތަށް ބޮސް ދެމުންދިޔައެވެ. “ނޫން. ނޫން. ނޫން. ޔަލާން ނަހަދާނެ އެހެންނެއް. ޔަލާންއަކީ އެކަހަލަ މީހެއްނޫން. ޔަލާން އެހެނެއް ނަހަދާނެ. ތީހުސްދޮގު. ޔަލާން އެހެނެއް ނަހަދާނޭ” އިސްތަށިގަނޑުގައި ހިފާދަމަމުން ނިލީޝާ ބުންޏެވެ.

ނިލީޝާގެ ހަޅޭކުގެ އަޑަށް ނުހާ ކޮޓަރިއަށް ވަނެވެ. ލޯބިވާ ކޮއްކޮ އިން ހާލުފެނި ނުހާގެ ހިތުގައި ރިއްސާލިއެވެ. “ހުއްޓާލާ. އިންޝާ ﷲ ހުރިހާ ކަމެއްވެސް ރަނގަޅުވާނެ..” ނުހާ ނިލީޝާގެ އުނަގަނޑުގައި ފިރުމާލަމުން ބުންޏެވެ.

“މަންމާ… ޕްލީޒް ހިނގާބަ މާލެ ދާން. ކައިލީ ބޭނުން ޝަނޫގެ ހާލު ބަލަން..” ކައިލީން ކުރިމަތީގައި އިން އޭނާގެ މަންމަ ކިޔާރާ ގާތުގައި ކައިލީން ބުންޏެވެ. ޓީވީއަށް ބަލާލާފައި ކިޔާރާ ބަލައިލީ ކައިލީންގެ މޫނަށެވެ. އެވަގުތު ދެމައިންވެސް ސިހުނީ ގޭދޮރާށީގައި މީހަކު ތަޅައިގަން އަޑަށެވެ.

“ކާކުތަ މޮޔަވެގެން މިއުޅެނީ؟” ކިޔާރާއަކީ ދޮރުގައި މާބާރަށް ތަޅާނަމަ އަބަދުވެސް ރުޅިއަންނަ މީހެކެވެ. ބަރު ފިޔަވަޅު ތަކެއްގައި ގޮސް ކީޔާރާ ދޮރުހުޅުވިއެވެ. ކިޔާރާ ފަހަތުން ކައިލީންވެސް ގޮސް ދޮރު ދަށުގައި ހުއްޓުނެވެ. ކިޔާރާ ދޮރު ހުޅުވުމާއި އެކު ދޮރުމަތީގައި ހުރި ކައިލް ކިޔާރާ ފަހަތުގައި ހުރި ކައިލީން ކޮނޑުގައި ހިފާ ގާތުގައި ހުރި ފާރުގައި ތަތްކޮއްލިއެވެ.

“ކަލޭ! ކަލޭ ކީއްކުރީ ޔަލާންއަށް؟ އެއިން؟” ކައިލް ރުޅި އަހިސް ހުރެ ބުންޏެވެ. “މަތަ އަދިވެސް ކަމެއް ކޮއްގެން މިއުޅެނީ؟ އެޔަލާންއޭ މަގޭ ޝަނޫ މަރާލަން އުޅުނީ!” ކައިލީން ބުންޏެވެ. އެއާއި އެކު އަރައިގައިން ރުޅިން އަތަށް ލެވުނުހާ ބާރެއްލާފައި ކައިލީންގެ ކަންކަށިމަތީގައި ޖެހިއެވެ.

“އޭ! ކަލޭތި ކާކުތަ މަގޭ ގެދޮރަށްވަދެ މަގޭ ދަރިފުޅަށް އަނިޔާ ކުރަން؟ ހަމަ މިހާރު ނުކުމޭ މިގެއިން!” ކިޔާރާ އަމުރު ކޮއްލިއެވެ. “ކަލޭ ދަރި މިކާކުތަ މަގޭ އެކުވެރިން ހަލާކު ކުރަން އެއިން؟؟؟ ކައިލީން ކަލޭ ހަނދާން ކުރާތި. މަގޭ ބަދަލު ހިފާނަން! އަޑު އިވިއްޖެތަ؟” ކައިލް އެހެން ބުނެ ގެއިން ނުކުމެގެން ދިޔައެވެ.

މަޑު ދުވެއްޔެއްގައި އައި ކާރު މަޑުކޮއްލީ އޭ.ޑީ.ކޭ ހޮސްޕިޓަލް ކުރިމަތީގައެވެ. ކާރުން ފޭބި އަލަކާއަދި ލުބާންގެ މޫނުމަތީގައި އެއްވެސް ދިރުމެއް ނެތެވެ. ދެމީހުންގެ މޫނު މަތީގައިވެސްވީ ހިތާމައިގެ ސާލެއް އޮޅާލެވިފައެވެ. ޓެކްސީއަށް ރުފިޔާ ދައްކާފައި ދެމަފިރިން ލަސް ހިނގުމުގައި ލިފްޓްއަށް އެރިއެވެ.

އައި.ސީ.ޔޫ ކުރިމަތީގައި ތިބި އިލްޔާއަދި ޝަޔަން ފެނި އަލަކާއަދި ލުބާންއަށް އެކަކު އަނެކަކަށް ބަލައިލެވުނެވެ. ފުންނޭވާއެއް ދޫކޮށްލާފައި ދެމަފިރިން ހިނގައިގަތެވެ.

“ޔަލާންގެ ފަރާތުން އަހަރެމެން ދެމީހުން މަޢާފަށް އެދެން” ސިޓީ އުރައެއް ދިއްކޮއްލަމުން ލުބާން ބުނެލިއެވެ. ޝަޔަން އޭގައި ހިފިއެވެ. އޭގައި އޮތީ 30 ހާސް ރުފިޔާއެވެ. ގޮނޑިބަރީގައި އިން އިލްޔާ ތެދުވެ އޭގައި ހުރި ރުފިޔާތަށް ބިންމައްޗަށް އުކާލިއެވެ. އަދި ކުރިމަތީގައި ހުރި އަލަކާގެ ކަންކަށިމަތީގައި ޖެހިއެވެ.

“ހުރި ގޮތްކުޑަކަން. މަގޭ ދަރިފުޅު މަރާ ހަނގުރާމަ ކުރަމުން ދާއިރުވެސް ރުފިޔާއަށް ގަނެލަންތަ ތިއުޅެނީ އެއިން؟” އިލްޔާ އެއްސެވެ. އަދި ބިންމަތީގައި ހުރި ރުފިޔާތަށް ނަގާ އެއްކުރިއެވެ. “މިހުރިހާ ރުފިޔާތަކުން މަގޭ ޝަނުމްއަށް އަލުން ހިނގުމުގެ ނަސީބު ލިބޭނެތަ؟ އެއިން؟ އެކުއްޖާއަށް އަދި އެންމެ 14 އަހަރޭ!!” އަލަކާގެ މޫނު މައްޗަށް އިލްޔާ ރުފިޔާތަށް ޖެހިއެވެ.

“މަގޭ ގަމާރުކަން ހަމަ. މުޅި ރަށުގައި ނަންމައްޝޫރު ގާތިލް، އަހުމަދުގެ ކާފަ ދަރިފުޅު ވިއްޔަ. ހަމަ އެއްގޮތެއްނުން ވާނީ؟” އިލްޔާ ބުންޏެވެ. “އިލްޔާ!” ލުބާންއަށް އެއްޗެކޭ ނުބުނެ ނުހުރެވިގެން ގޮވާލިއެވެ. “ކިހިނެތްވީ؟ ލޯބިވާ އަނބިމީހާއަށް އެއްޗެހި ކީމަ ކަމުނުދިޔައީ؟ ވިސްނާދެން މަގޭ ދަރި އެވަގުތު ސަލާމަތްވާން ތެޅޭނެ ވަރު! ރައްކާވޭ މިތަނުން. ދެން އަހަރެން ކަލޭމެނާ ދިމާކުރާނީ ކޯޓުން!” އިލްޔާ ބުންޏެވެ. އޭރު ގިނަމީހުންތަކެއްގެ ނަޒަރު އެމީހުނަށް ހުއްޓިފައިވުމުންނާއި އެކު ލުބާން އަލަކާ އަތުގައި ހިފައިގެން ނުކުތެވެ. އޭރު އަލަކާއަށް ހުރީ ހަމަ ރަނގަޅަށްވެސް ރޮވިފައެވެ.

ޖެހިގެން އައި ދުވަހެވެ. ދުވަހަކީ ކޯޓުގެ އިއްވުން އިއްވާ ދުވަސްކަމުން އެންމެންގެ ހިތުގައިވެސްވީ ނުތަނަވަސްކަމެވެ. އޭރުވެސް ޝަނުމް ހޭނާރާތީވެ އިލްޔާ ހޮސްޕިޓަލުގައި ބައިންދާފައި ކޯޓަށް ދިޔައީ ޝަޔަން އެކަންޏެވެ.

(ނުނިމޭ)

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.