ބޭވަފާތެރިޔަކީމޭ 29

މަގުމަތީގައި ހިނގަމުން ދިޔަ ނަވްޔާގެ ވަކި މަންޒިލެއް ނެތް އިރު މޫނުމަތިވެސް ވަނީ މިލާ މޯޅިވެފައެވެ. އޭނާގެ ދިރިއުޅުން މިހާރު މިވަނީ ކިހިނެތް ވެފަހެއްޔެވެ؟ އޭނާގެ އުފާވެރި ދިރިއުޅުމަށް މިޖެހުނީ ކޮންފަދަ މުސީބާތެއް ހެއްޔެވެ؟ ޔޫހާންދެކެ ލޯބިވުން އެއީ ނަވްޔާގެ ހަޔާތަށް އެޅުނު ޒަހަރެއް ބާއޭވެސް އޭނާ ހިތަށް އެރިއެވެ. އެވަގުތު ވިދާލުމަކާއި އެކު ބާރު ގުގުރީގެ އަޑު އިވުނެވެ. ވިއްސާރަ ވާން އުޅޭ ކަމުގެ އަލާމާތްތަށް ދައްކަން ފެށިއެވެ. އުޑުމަތީގައި އިން ފުރިހަމަ ހަނދުވެސް ކަޅުވިލާތަކުގެ ޝިކާރަކަށްވެ ގެއްލުނެވެ. ފިޔަވަޅު އަވަސް ކޮއްލި ނަވްޔާ ހުއްޓުނީ ކުރިމަތިން ހިޔަންޏެއް ފެނުމުންނެވެ.

ކުރިމަތީގައި ހުރީ ހިމަތޮޅި، ނަމަވެސް ދިގު ފިރިހެނެކެވެ. ހަތަރިސްފައިގައި އޭތި މީތި އަޅާފައި ހުރި އިރު ކަންފަތް ވެސް ވަނީ ތޮރުފައިފައެވެ. އޭނާގެ ހަށިގަނޑުން ސިނގިރޭޓު ވަސް ގަދައަށް ދުވަމުން ދިޔަ އިރު ހުރީ ހަމައިގަހެންވެސް ހިޔެއްނުވެއެވެ. ބަނޑުހައިވެފައިވީ ސިންގާއެއް ފަދައިން އެޒުވާނާ ނަވްޔާއާއި ކައިރިވާން ފެށިއެވެ. ޖަހާލި ބާރުގުގުރިއާއި އެކު ފަޒާގައި ނަވްޔާގެ ވޭނީ ހަޅޭކުގެ އަޑުވެސް ގުގުމާލިއެވެ.

ވިއްސާ ކޮޓަރީގައި އެލީޝާ ހޭދަކުރަމުން ދިޔަ ކޮންމެ ސިކުންތަކު ޔޫހާން އަދި އަނާޝާގެ ހިތުގައި ދިޔައީ ނުތަނަވަސްކަން އުފެދެމުންނެވެ. އެކުޑަކުޑަ ފުރާނަ އުރާލުމުގެ އުންމީދުގައި ދެމައިންވެސް ދިޔައީ އެވަގުތަށް އިންތިޒާރު ކުރަމުންނެވެ. ދެމައިންގެ ހިތުގައި އުފެދިފައިވާ ނުތަނަވަސްކަން ފިލައިދިޔައީ ވިއްސާ ކޮޓަރިން އިވުނު ތުއްތު ކުއްޖާގެ ރުއިމުގެ އަޑުންނެވެ. “އަލްހަމްދުލިއްލާހް” އަނާޝާއަށް ހިތާހިތުން ބުނެވުނެވެ. ޔޫޙާންއަށް ވެސް ހިނިތުންވެވުނެވެ.

“އަލްހަމްދުލިއްލާހް. އަންހެން ކުއްޖެއް. މަންމަގެވެސް އަދި ދަރިފުޅުގެވެސް ހާލު ވަރަށް ރަނގަޅު” ނަރުސް ކުއްޖަކު ނިކުމެލާފައި ބުނެލިއެވެ. ދެމައިންގެ ހަޔާތަށްވެސް އުފާވެރިކަމުގެ ރާޅެއް ބީއްސާލިފަދައެެވެ. އެހިތްހަމަ ޖެހުމުގެ ވަގުތުކޮޅު އިތުރަށް ފުރިހަމަ ކޮއްލަ ދިނީ އެކުޑަކުޑަ ފުރާނަ ގެނެސް ޔޫހާންގެ އަތަށް ލައިދިނުމުންނެވެ. އެކުޑަކުޑަ ފުރާނަގެ މޫނުވެސް ދޮން ކަމުންވަނީ ޖަންބުކުލަ އަރާފައެވެ. ކުޑަކުޑަ އަތްތިލައިން ޔޫހާންގެ ޝަހާދަތް އިނގިލީގައި އެކުއްޖާ ހިފާލިއެވެ. ދެލޯބޮޑުކޮއް ހުޅުވައިގެން ދޫ ނެރެލަނެރެލަ ޔޫހާންއަށް ބަލަން އޮތީ އެއީ ބައްޕަކަން އެކުއްޖާއަށް އެނގުނުފަދައިންނެވެ. އެކުއްޖާގެ އަތުގައި ފިރުމާލަމުން ޔޫހާން ވަރަށް ލޯބިން އެކުއްޖާގެ ނިތަށް ބޮސްދިނެވެ.

ކައިރީގައި ހުރި އަނާޝާވެސް ހުރީ މަޑުމަޑުން އެކުއްޖާގެ ހަށިގަނޑުގައި ފިރުމާލަ ފިރުމާލައެވެ. ހިތުގައި އުފާވެރިކަންވީ އިރުވެސް އެ މަންޒަރު ދެކުމަށް ލޯބިވާ ފިރިމާހާ ނެތުމުން ހިތުގައި ވޭންއެޅިއެވެ.

“ދަރިފުޅާ. އެލާ ވިހައިފި. އަވަހަށް އާދެބާ” އަނާޝާ ލީޝާއަށް ގުޅާ އެ އުފާވެރި ޙަބަރު ދިނެވެ. ނަމަވެސް އެޙަބަރުން ލީޝާއަކަށް އެއްވެސް އިހުސާސްއެއް ނުކުރިއެވެ. “ހޫމް” އޭ ބުނެ ލީޝާ ފޯނު ބޭއްވިއިރު މޫނު މަތިން ދިޔައީ ހަސަދަވެރިކަން ފެންނަމުންނެވެ.

“ދުރައްދޭ! ނާންނާތި އަހަރެން ކައިރިއަށް. އަހަރެން ހަޅޭ ހަލާވާނަން” އަރައިގެން ހުރި ބޫޓުގެ އުސްކޮޅު އެމީހާއާއި ދިމާކޮއް ނަވްޔާ އަމިއްލަ ނަފްސު ދިފާއު ކުރިއެވެ.

“ހެހެ ދެން ތިހާ ލޯބި ބޮޑީއެއްގެ ވެރިއެއް. ތިހާ ލޯބި ޑްރެސް… ވެލް ނޮޓް އަ ޑްރެސް ދޯ؟ ހަމަ ނައިޓީއެއް. އަޅޭ އާދެބާ ޕްލީޒް” އެއްވެސް ލަދެއް ހަޔާތެއް ނެތި އެޒުވާނާ ދިޔައީ ނަވްޔާއާއި ކައިރި ވަމުންނެވެ. ވިސްނާ ނުލާ ހުއްޓާ ނަވްޔާގެ އަތުގައި ހިފާ އޭނާ އެ ބޫޓު ހޫރާލިއެވެ. ނަވްޔާގެ ހަށިގަނޑު ގަޔާތަތްކޮއްލަން އުޅުނު އެޒުވާނާއަށް އެ ފުރުސަތު ނުލިބުނީ ޒުވާނަކު އަހިސް އޭނާ ލައިގެން ހުރި ޓީޝާޓުގައި ހިފާ ގެންގޮސް ކައިރީ ހުރި ފާރުގައި ލައްކުރުމުންނެވެ.

“ޖައިޝް؟” އޭނާގެ ގައިގައި ހިފައިގެން ރުޅިއަހިސް ރަތްވެފައި ހުރި ޖައިޝްފެނި ނަވްޔާ ހައިރާން ވިއެވެ.

“ހޫން. އެއީ ކަލޭ ބިޓުތަ؟ ދެން އެކަމް ދޯ؟ އެންމެ ރެޔަކަށް ޕްލީ-” އެޒުވާނާ ލަދު ކަނޑާލާފައި ދައްކަން ފެށިވާހަކަ ހުއްޓުނީ ޖައިޝް ގޮއްމުއްކަވާފައި އޭނާގެ މޫނު މަތީގައި ޖެހުމުންނެވެ. އެތަދު އޭނާގެ މުޅި ހަށިގަނޑަށްވެސް އެރިއެވެ.

“އެއީ މަގޭ އަންހެނުން! އަދި ބުނަން ވާހަކައެއް؟ ދެން ކަލޭ އޭނަ ގައިގައި އަތްލަން އުޅުނިއްޔާ ދެއަތް ބުރިކޮއްލާނަން! އަދި ކީއްކުރަން؟ އޭނައާއި ދިމާލަށް ބަލައިލިޔަސް ކަލޭ ދެލޯ ކޮނެލާނަން!!!” އޭނާ ކޮއްޕާލަމުން ޖައިޝް ބުނެލިއެވެ. އެޒުވާނާއަށް ވުރެ ޖައިޝް ބަލާލަން ފަލަވެފައި ގައިގައި ވަރު އެބަހުއްޓެވެ. އޭނާގެ “އީގޯ” އެއް ކަނަކަށް ލާފައި އެޒުވާނާ އަވަހަށް އެތަނުން ފިލިއެވެ. ނަވްޔާގެ ބޫޓު ކިބަ ގެނެސް އޭނާ އަތަށް ދީފައި ދުރުގައި ހުރި ސައިކަލަށް އަރާ އެރުމަށް ޖައިޝް އިށާރާތް ކުރިއެވެ. އޭރުވެސް ނަވްޔާ ހުރީ ފެނުނު މަންޒަރު ގަބޫލު ނުކުރެވިފައެވެ. ހަމަ ގައިމުވެސް މިހާދިސާއަށް ފަހު ނަވްޔާގެ ހިތުގައި ތަފާތު ވިންދެއް ޖަހާލިކަން ގައިމެވެ.

1 ގަޑި އިރާ 15 ވަރަކަށް މިނިޓް ފަހުން އެލީޝާ ގާތަށް އަނާޝާއަދި ޔޫހާންއަށް ވަދެވުނެވެ. އެލީޝާ ގާތުގައި އިރުކޮޅަކު އިނދެފައި އަނާޝާ ނުކުތީ އެދެމަފިރިންނަށް އެކަނި ވަގުތުކޮޅެއް ދިނުމައްޓަކައެެވެ.

“ލޯބި ކިހިނެތްތަ؟ އެއްވެސް ތާކަށް ތަދުވޭތަ؟” އެލީޝާ ގާތުގައި ނިދިފައި އޮތް ކުޑަ ފުރާނަގައިގައި ފިރުމާލަމުން ޔޫހާންއެއްސެވެ. “ނޫން. އެކަމަކު އޭރު ވަރަށް ތަދުވި. ނޭނގެ ބުނެދޭކަށްވެސް. އެކަމަކު ބޭބީ ރޯއަޑު އިވުނު އިރަށް ހުރިހާ ވޭނެއް ގޮއްސި ކުޑަ ހުވަދޫއަށް. ހެހެ. އެކަމަކު ވަރަށް ވަރުބަލި” އެލީޝާ ބުންޏެވެ.

“ދަރިފުޅާ.. އާދެބަލަ އަޅެ. ހޮސްޕިޓަލުގަ އެއްނުން މިރޭ ގައިމު” އަނާޝާ ލީޝާއަށް ގުޅާފައި ބުންޏެވެ. އަނާޝާ އޭރު ހުރީ ލީޝާ ނާހިސްގެން ފާޑަކަށް ރުޅިވެސް އަހިސްފައެެވެ. “ދެން މަންމާ… އަހަރެން ޑިއުޓީގައޭ!” ލީޝާ މިފަހަރުވެސް ފޯނު ކަނޑާލީ އަނާޝާ ކަންފަތް މައްޗަށެވެ.

ގެޔަށް އަހިސް ފެންވަރާ ތާޒާ ވެލައިގެން ނަވްޔާ ނުކުތެވެ. އޭރު ކޮޓަރި ސޯފާގައި ލޯމަރާލައިގެން ޖައިޝް އިނެވެ. ލައިގެން ހުރި ނިދާހެދުމުގެ ސޯޓުގައި އިން ވާގަނޑާ ކުޅެމުން ނަވްޔާ ޖައިޝްއަށް ކައިރިވެލިއެވެ. “ކި…ކިހިނެތް އެނގުނީ؟” ނަވްޔާގެ އަޑަށް ޖައިޝް ލޯހުޅުވާލިއެވެ. “އައި ވޯސް ފޮލޮވިންގ ޔޫ” ޖައިޝް ބުނެލީ އިސްޖަހާލަމުންނެވެ. ނަވްޔާގެ ހަޅޭކުގެ އަޑަށް ޖައިޝް ތައްޔާރުވެލި ފަދައެވެ. ނަމަވެސް މިފަހަރު އިވުނީ ނަވްޔާގެ ގިސްލުމުގެ އަޑެވެ. ޖައިޝް ދެލޯ ހުޅުވާ ނަވްޔާގެ މޫނަށް ބަލައިލިއެވެ.

“ކީއްވެ؟ ކީއްވެއަޅެ؟ ނަވް ޖައިޝްއާއި ދޭތެރޭގަ މިހާ އިހާނަތިކޮއް ކަން ކުރާއިރު ކީއްވެ ޖައިޝް މާ ޖެންޓަލްމެން ވެގެން ތިއުޅެނީ؟ ޖައިޝް ބުނީ ނަވްދެކެ ލޯބިވެޔޭ. ދެން ކީއްވެ ނަވް ގިލްޓް ޓްރަޕް ތިކުރަނީ؟ ޖައިޝް އައި ހޭޓް ޔޫ. އައި ޖަސްޓް ހޭޓް ޔޫ ސޯ މަޗް. ކޮންމެ ދުވަހަކު ނަވް ޖައިޝްއަށް އެއްޗެހި ކީ. ޖެއްސުން ކުރީ. އެކަމަކު.. މިރޭވެސް ޖައިޝް.. ޖައިޝްއަށް އެނގޭތަ ނަވްދެކެ ތިހާ ލޯބިވާ އިރު ނަވްމީ ކޮންކަހަލަ ކުއްޖެއްކަން؟ އައި ސްލެޕްޑް ވިތް ޔުއާރ ފްރެންޑް ޔޫހާން. ދެން ކީއްވެ؟ އައިމް ސަޗް އަ ބަޑި. ނަވްގެ ދޮންބެ ޖައިޝްއަށް ނަވް ވިއްކާލީ އެހެންވެޔޭ” ނަވްޔާ ހުރިހާ ވާހަކައެއް ކިޔައިދީ ނިންމާފައި ނޭފަތް ދަމާލަމުން ޖައިޝްގެ މޫނަށް ބަލައިލިއެވެ. ނަމަވެސް ޖައިޝްގެ މޫނު މަތިންއެއްވެސް ހައިރާންކަމެއް ނުފެނުނެވެ. ނަވްޔާ ހައިރާންވިއެވެ. ޖައިޝްގެ ޖަވާބު އިވިފައި ނަވްޔާ ވަކިން ބޮޑަށް ހައިރާންވިއެވެ.

(ނުނިމޭ)