އިންސާފު ލިބޭނެބާ – 08

” ނޫން އޭނަގެ ހުރޭ ދެކުދިން.. އޭނާގެ އަނބިމީހަގެ ނަމަކީ އައިޝަތު މިލްޔާ.. އެކުއްޖާގެ ހުރޭ އެކުއްޖާއަށްވުރެ ހަ އަހަރު ބޮޑު ބޭބެއެއް.. އޭނާގެ ނަމަކީ މާވިން މުހައްމަދު.. މި ކުއްޖާގެ ނަމަކީ އައިޝަތު މިޔާ އިމްރާން.. ” ދާލިޔާ އުކައިލްއަށް ޖަވާބު ދިނެވެ.

***ޕާޓް 8***

ދާލިޔާ ކިޔައިދިން ކަންކަމާއި މެދު އެންމެންވެސް ވަރަށް ބޮޑަށް ވިސްނިއެވެ. ” މަޑުކޮށްބަލަ.. އޭނަ ބައްޕަ ގައިގަ އޭގެ ފަހުން ތަޅައިގަންތަ އެއްވެސް ގޮތަކަށް؟؟ ނޫނީ އެމީހުން އޭނަ ބައްޕައާއި ދިމާކުރިތަ އެހެންގޮތަކުން ވިޔަސް؟ ” ޒާލިކް ދާލިޔާ ކުރެން އަހައިލިއެވެ. ” އޭގެ ފަހުން އެކަހަލަ ކަމެއް ނެތް ރިޕޯޓް ކުރެވިފައެއް.. އެކުއްޖާ އަމިއްލައަށް ފިލީކަމުގައިވެސް ބަޔަކު ކިޔާ.. އަނެއްބައި މީހުން ކިޔާނީ އެކުއްޖާ ގޭންގުން ކިޑްނެޕް ކުރީކަމަށް.. އެކަމް އެހެން ހަދައިފިނަމަ އިމްރާންއަށްވެސް އެނގޭނެ.. އެކުއްޖާ ގެއްލުން ދުވަހު އިމްރާންއަށް ސްޓްރޯކެއް ޖެހުންކަމަށްވެސް ވޭ.. ” ދާލިޔާ ބުންޏެވެ.

އުކައިލް ދާލިޔާގެ ވާހަކައާއި މެދު ވިސްނާލިއެވެ. ” އެކުއްޖާ އަމިއްލައަށް ފިލި ކަމަށް ވަންޏާ އޭގެ ފަހަތުގައި ސަބަބެއްވެސް އޮންނާނެއެއްނުން؟. ދާލިޔާ ފެމެލީ ބެކްގްރައުންޑްގެ ޗެކްއެއް ހެދިންތަ؟ ފެމެލީއާ މިޔާގެ ގުޅުން ހުންނަ ގޮތް.. ” އުކައިލް ބުންޏެވެ. ދާލިޔާ ބޯޖަހައިލަމުން އޭނައަށް އެއްކުރެވުނު މައުލޫމާތު ދައްކައިލިއެވެ. ” ވެދާނެއެއްނުން މިޔާއަށް އޭނާގެ ބައްޕައަކީ ގޭންގް މީހެއްކަން އެނގިގެން ރައްޓެހިވެގެން އުޅޭ ކުއްޖައާއެކީ ފިލީ ކަމަށް.. ” އިޔާދު އޭނާގެ ހިޔާލު ފާޅު ކުރިއެވެ. ” މިޔާއަކީ އެކަހަލަ ކުއްޖެއް ނޫން.. ސްކޫލްގަވެސް ވަރަށް ޓިމިޑް ކުއްޖެއް.. ފިރެހެންކުދިންނާ އެހާ ވާހަކައެއް ނުދައްކާ.. ގުޑް ގްރޭޑްސް.. އެއްވެސް ކަހަލަ ކޮމްޕްލެއިންއެއް ނޫނީ ޑިސިޕްލިން މައްސަލައެއްވެސް ނެތް.. ” ދާލިޔާ ބުންޏެވެ.

” އެއީ އޭރު ފަނަރަ އަހަރުގެ ކުއްޖެއް އެއުމުރަކީ އައު ކަންތައް ކުރާ ހިތްވާ އުމުރެއް.. މީހުން ބުނެއުޅެއެއްނުން މަޑުން އިންނަ ގުރާ ބާރަށް ދައިގަންނާނޭ.. ” އިޔާދު ބުންޏެވެ. ޒާލިކް އިޔާދުއާ އެއްބަސް ވިޔެވެ. ” ވެލް އޭނަ ފެމިލީއިންވެސް ބުނަނީ ވަރަށް ރަނގަޅު ކުއްޖެކޭ.. ދެން އަހަރެންނަކަށްވެސް ނޭނގެދޯ.. ވެދާނެ އެ ގޭންގް ކިޑްނެޕް ކުރީކަމަށްވެސް.. މިޔާ ކިޑްނެޕްވި ފަހުން އިމްރާންއަށް ގޭންގުގެ ފަރާތުން އެއްވެސް އުނދަގުލެއް ނުވޭ.. ” ދާލިޔާ ބުންޏެވެ.

” އަހަރެން ގޭންގަށް ވަދެފައި މިޔާގެ މައުލޫމާތު ލިބޭތޯ ބަލާނަން.. ” ދާރިއަން އަޒުމާއި އެކު ބުންޏެވެ. އޭނަ ހުރީ މިޔާ އާއި މެދު ހަމްދަރުދީވެފައެވެ. ” މިޔާ ދުނިޔޭގައި ހުރިނަމަ ތިން އަހަރު ވަންދެން އެކުއްޖާ ނުލަފާ ޖަނަވާރުންގެ ވަކިތަކުގައި ތާށިވެފައި ހުރީ.. މިޔާއަށް ނަފްސާނީ ގޮތުންނާއި ޖިސްމާނީ ގޮތުން ކިހާ އަނިޔާއެއް ދޭނެ.. ” އުކައިލް މޫނުގައި އަތް އުނގުޅައިލަމުން ބުންޏެވެ. އޭނަވެސް ހުރީ ރުޅިގަދަވެފައެވެ.

މިޔާއާއި މެދު އެތަށް މަޝަވަރާއެއް ކުރުމަށްފަހު ދާރިއަން އެކަނި އެކޮޓަރީގައި ބެހެއްޓުމަށްފަހު އުކައިލްމެން ނިކުމެގެން ދިޔައެވެ. ދާރިއަން އެ ކުޑަ ކޮޓަރީގައި ހުރި އެނދުގައި އޮށޯތެވެ. އޭނާގެ ސިކުނޑިވަނީ މިޔާގެ ހިޔާލުތަކުން ފުރިފައެވެ. މިޔާ އެގޭންގުން ކިޑްނެޕް ކޮށްފިނަމަ އެ މައުސޫމް އަންހެންކުއްޖާ ކުރިމަތިލާނެ ކަންކަމާއި މެދު އޭނައަށް ވިސްނަން އޮވެވުނެވެ. ކުޑައިރުކޮޅެއްފަހުން އޭނާގެ ދެލޮލަށް ބަރުވާން ފެށިއެވެ. މަޑުމަޑުން ލޯމެރެމުންގޮސް ނިދީގެ ފުންކަނޑަށް ގެނބުނެވެ.

ނިދީގެ ފޮނިމީރުކަމުގެ ރަހަ ނުލާތާ އެތަށް އަހަރެއްވި މިޔާ އިނީ މިރޭވެސް އެ ކޮޓަރީގެ ދޮރުން ވަދެގެން އަންނާނޭ މީހަކާއި މެދު ހުށިޔާރުވެގެންނެވެ. ކަކޫ ހަށިގަނޑާއި ކައިރިކޮށްލާފައިވީއިރު، ދޮރުން ވަދެގެން އަންނަ މީހަކަށް ހަމަލާ ދިނުމަށްޓަކައި، އޭނަ އިނީ ކާއިރު ބޭނުން ކުރާފަދަ ދަގަނޑު އުލެއް ހިފައިގެންނެވެ. ދޮރަށްބަލަން ހުރި އިރު އޭނަ މޫނުން ފެނިގެންދަނީ ވަރުބަލި ކަމުގެ އަސަރެވެ. ކުއްލިއަކަށް ދޮރުގެ ތަޅަށް ތަޅުދަނޑި ވައްދާލި އަޑުއިވުމުން އޭނާ އުލަށް ބާރުކޮށްލިއެވެ. ދޮރުހުޅުވައިލުމަށްފަހު ވަދީހު އާއިއެކު ފިރެހެނަކު ވަދެގެންއައެވެ. ވަދީހު މިޔާއަށް ބަލައިލަމުން ދެލޯ އަޅައިލިއެވެ.

” އެއްގަޑި އިރު ” ވަދީހު ދެން ހުރި ފިރެހެން މީހައާއި ދިމާލަށް ބުންޏެވެ. އޭއާއިއެކު އޭނާ ބޯޖަހައިލުމަށްފަހު އެއްހާސް ރުފިޔާ ވަހީދުގެ އަތަށް ދިނެވެ. މިޔާއަށް އިންޒާރުގެ ނަޒަރަކުން ބަލައިލުމަށްފަހު އެ މީހަ މިޔާއަށް ހަދާނެގޮތެއް ހަދަން ދޫކޮށްފައި ވަދީހު ކޮޓަރިން ނިކުތެވެ. އެ މީހަ އެނދާއި ކައިރިއަށް ފިޔަވަޅުއަޅަން ފެށީ މިޔާގެ ހަށިގަނޑަށް ކަރުހިއްކައިގަނެފައިވާ ސިންގާއެއް ބަލާފަދައިން ބަލަމުންނެވެ. ” ކޮން ނަމެއްތަ ލޯބިއަށް ކިޔަނީ؟؟ މަގޭ ނަމަކީ ޒަފަރު.. މިރޭ ތި ރީތި ޕަރީގެ ހަށިގަނޑަކީ މަގޭ އެއްޗެއް.. ” ޒަފަރު މިޔާއާއި ދިމާލަށް ފިޔަވަޅުއަޅަމުން ބުންޏެވެ. އޭނަ ލައިގެން ހުރި ގަމީހުގެ ގޮށްތައް ނައްޓަން ފެށިއެވެ. އެއީ މެދު އުމުރުގެ ފިރެހެނެކެވެ. މިޔާ ހުރީ އޭނަ އުޅޭ ގޮތުންނާއި ވާހަކަ ދެއްކި ގޮތުން ފަކުރު ގަނެފައެވެ.

ޒަފަރު އޭނާގެ ހަށިގަނޑުގައި ހުރި އަންނައުނުތައް ހަށިގަނޑާއި ވަކި ކުރުމަށްފަހު ކުއްލިޔަކަށް މިޔާގެ ހަށިގަނޑާއި ދިމާލަށް ފުންމައިގަތެވެ. މިޔާ ޒަފަރުގެ ކައިރިން ސަލާމަތްވުމަށްޓަކައި އެނދުން ފައިބަން ތެޅިގަތެވެ. ނަމަވެސް ޒަފަރު އެއަށްވުރެ ހުށިޔާރެވެ. މިޔާގެ ކުޑަ ހަށިގަނޑުގައި ހިފާ އެނދު މައްޗަށް ވައްޓާލުމަށްފަހު، މިޔާގެ ހަށިގަނޑު މައްޗަށް އަރައި އެ ދޮންކަރުގައި ވަސް ގަނެ ބޮސްދޭން ފެށިއެވެ. މިޔާ ދިޔައީ އޭނަ ކައިރިން ސަލާމަތްވުމަށްޓަކައި ފެނުން ނަގައިފައި އޮތް މަހެއްހެން ތެޅެމުންނެވެ. އޭނާގެ އަތަށް ދޫކަމެއް އިހްސާސްވުމުން ވަގުތުގެ ބޭނުންކޮށް އަތުގައި އޮތް އޫ ޒަފަރުގެ ކޮނޑަށް ހަރައިލިއެވެ.

އޭނާގެ ހަށިގަނޑުން ދޫކުރަން ދެކަށް ހެރުނު ތާކަށް އޫ ހަރަމުން ދިޔައެވެ. ވަހުޝީ ކަނޑަށް ގެބެމުން ދިޔަ ޒަފަރުގެ މޭ މައްޗަށް އެރި ހަމަލާއާއެކު ހަޅޭލަވައިގަތުމަށްފަހު އޭނަ މިޔާގެ ގައިން ދޫކުރިއެވެ. އޭރު އޭނާގެ އެތަން މިތަނުން ދިޔައީ ލޭ އަންނަމުންނެވެ. މިޔާ ފުންނޭވާތަކެއްލުމަށް ފަހު ދުވެފައިގޮސް ފާހަނައަށް ވަނެވެ. ޒަފަރު ފާހަނައިގެ ދޮރުގައި ތެޅުމަށްފަހު އޭނައަށް ލިބިފައިވާ ވަގުތު ހަމަވުމުން ކޮޓަރިން ނިކުތެވެ. ޒަފަރު ކޮޓަރިން ނުކުތް އަޑުއިވުމުން މިޔާއަށް ފާހަނައިގެ ދޮރު ބުޑުގައި އިށީނދެވުނެވެ. އަނގަމަތީގައި އަތް އަޅައިގެން ރޯން ހުރިއިރު އޭނާގެ މުޅި ހަށިގަނޑު ދިޔައީ ތުރުތުރު އަޅަމުންނެވެ. ޒަފަރުގެ މުޑުދާރު އަތުގެ ފިރުމުންތަކުގެ އިހްސާސް އޭނައަށް އަދިވެސް ވަމުން ދިޔަހެން ހީވިއެވެ.

މިޔާ ގޮސް ފެންވަރަން ފެށިއެވެ. އަތުންނާއި ނިޔަފަތިން ނަޖިހެން ފިލުވަން އުޅޭފަދައިން އޭނަ ދިޔައީ ހަށިގަނޑު އުނގުޅަމުންނެވެ. އޭރު އޭނާގެ ދެލޮލުން ދިޔައީ ދޫކޮށްފައިވާ އިސްކޫރެއް ފަދައިން ކަރުނައަންނަމުންނެވެ. ހަށިގަނޑު އުނގުޅާ ވަރުބަލިވުމުން މިޔާ މުށިތައް މަތީގައި އިށީނީ ކަކޫ ހަށިގަނޑާއި ކައިރިކޮށްލަމުންނެވެ. އިރުކޮޅަކު ރުއިމަށް ފަހު ކަރުނަތަށް ފުހެން ފެށިއެވެ. އެކަރުނަތަކުން އެތާ އުޅޭ އެކަކުގެވެސް ހިތުގައި ރަހުމުގެ ކުލުނު އުފެދިގެން ނުދާނެކަން އެނގި އޭގެ ބޭނުން ނެތުމުންނެވެ. ނަމަވެސް ހިތުގައި އަޅަމުން ދިޔަ ވޭނުގެ ސަބަބުން އެކަންވީ ކުރަން ނުހަނު އުނދަގޫ ކަމަކަށްށެވެ. ނޭފަތް ދަމަމުން ތުވާލިކޮޅުގައި ކޮޓަރިން ނިކުތުމަށްފަހު ކަޅުކުލައިގެ ހޫޑިއަކާއި މަޑު ސްވެޓްޕޭންޓެއް ލިޔެވެ. އަދި މަޑުމަޑުން ކޮޓަރީގެ ކަނެއްގައި އިށީނެވެ.

އިރުކޮޅެއް ފަހެވެ. ބަރު ފިޔަވަޅުތަކެއް ކޮޓަރިއާއި ކައިރިވާ އަޑު އިވެން ފެށިއެވެ. ތަޅު އަނބުރާލުމަށް ފަހު ވަދެގެން އައި މީހާ ފެނި މިޔާގެ ހިތުގެ ތެޅުން އަވަސްވިއެވެ. ވަދީހު އައިސް މިޔާ ކުރިމަތީގައި ހުއްޓިލީ ބެލްޓެއް ހިފައިގެންނެވެ. މިޔާގެ ދެލޯކަރުނުން ފުރިގެން ދިޔައީ ދެން ކަންތައް ވާނޭ ގޮތް އެނގުމުންނެވެ. ” މިރޭވެސް ކަލޭ ގާތަށް ފޮނުވި މީހާއަށް ހަމަލާ ދިނީތި.. ކަލެޔަކަށް މިތަނަކުން ނުދެވޭނޭ ކިތަށް ފަހަރު ބުނީމަތަ މި ސިކުނޑިއަށް ވިސްނޭނީ އޭނ؟ ކަލޭ މަރާނުލާވެސް މިހުންނަނީ ކަލޭގެ ބޭނުން އަހަރެމެންނަށް ތި ހަށިގަނޑުން ނޫނަސް ކުރެވޭތީ.. އެހެން ނޫންނަމަ ތި ބޮލާއި ހަށިގަނޑު ވަކި ކުރިތާ ކިތަންމެ ދުވަހެއް.. އެކަމަކުވެސް… މިރޭ ތިކުރި ކަމެއްގެ އަދަބު ލިބޭނެ.. ” ވަދީހު އެހެންބުނެ ބެލްޓް މައްޗަށް ހިއްލައިލިއެވެ. މިޔާ ލޯމަރައި ބާރުކޮށްލީ އޭނައަށް ވަދީހުގެ އަތްދަށުން ސަލާމަތް ނުވެވޭނެކަން އެނގުމުންނެވެ.

އޭގެ އަނެއް ދުވަހެވެ. ދޮރުފޮތީގެ ފަޑުއަލި މުށިތަށް މަތީ އޮތް މިޔާއަށް ފޯރިއެވެ. އޭނާގެ ހަށިގަނޑު ދިޔައީ ތުރުތުރުއަޅަމުންނެވެ. ބުރަކަށީގައި ރޭގައި ވަދީހު ދިން އަނިޔާގެ ރަތްކަން ގަދަ ރުޅިގަދަ ނިޝާންތައްވެއެވެ. މިޔަގެ މޫނުމަތި ވަނީ ރުއިމުގެ ސަބަބުން ރަތްވެފައެވެ. އޭނާގެ ދެލޯ ދުޅަވެފައިވީއިރު ނޭފަތް ހީވަނީ ފޮޅިފައިވާ ފިނިފެން މަލެއްހެންނެވެ. ހަށިގަނޑުގައި އަޅާ ވޭނުގެ ސަބަބުން މިޔާއަށް ހަށިގަނޑަށް ހަރަކާތެއް ގެންނަންވެސް އުނދަގޫވިއެވެ. މަޑު ގިސްލުމުގެ އަޑު ވަނީ އެ ކޮޓަރީގައި ފެތުރިފައެވެ.

ދާރިއަން ދިޔައީ އެރެޔަށް ތައްޔާރުވަމުންނެވެ. މިރޭ އޭނާގެ ހަޔާތް ބަދަލުވެގެންދާނެކަން އޭނަޔަށް އެނގެއެވެ. މި މިޝެން ދިގުލައިގެން ގޮސްފިނަމަ މަސްތަކުގެ އިތުރުން އަހަރުތަކަށްވެސް ދިގުލައިގެން ހިނގައިދާނޭކަން އޭނައަށް އެނގެއެވެ. ނަމަވެސް ނުހައްގުން އަނިޔާ ލިބެމުންދާ ޒުވާނުންނާއި އެކުވެރިޔާގެ މަންމައަށް އިންސާފު ހޯދައިދިނުމަށްޓަކައި އޭނަ އެކަން ކުރާނެއެވެ. ރޭގަނޑުގެ ވަގުތު ޖެހިގެން އައީ އޭނާ އެކަމަށް އިންތިޒާރުކޮށްލަކޮށްލަ ހުއްޓައެވެ. ކުރިންވެސް އޭނަ އިން ބުރުގެ ޖޯލީގައި އިނީ އެގޭންގްގެ އިންތިޒާރުގައިއެވެ.

ކަޅުފޮއި ރެއެކެވެ. މިރޭ ހަނދުގެ ހިލަމެއް ނުވާއިރުގައި ތަރިތަކުގެ ހިލަމެއްވެސް ނުވެއެވެ. މުޅި ދުނިޔެ ކަޅު ވިލާގަނޑަކުން ބައްދާލާފައިވާ ފަދައެވެ. މާލޭގެ މަގުތަކުގައި ދުއްވާ އުޅަނދާއި ޖަހާފައިވާ ހޮޅިދަނޑިން އެޅޭ އަލި ފިޔަވައި އެހެން އައްޔެއްނެތެވެ. މީހުންތަކެއްގެ ފިޔަވަޅުގެ އަޑު އިވެންފެށިއެވެ. ދާރިއަން އޭނާގެ ހަށިގަނޑު ސީދާ ކޮށްލީ އެއީ ކޮންބަޔެއްކަން ޔަގީންވާތީއެވެ. ކުރިންރޭ އައި ހަތަރު ފިރެހެނުން އައިސް އޭނާގެ ކުރިމަތީ ހުރި ޖޯލީގައި އިށީނެވެ. ” ކޮބާ ޖަވާބަކީ؟ ” ޝިމާއު އޭނާގެ ބަރު އަޑުން ދާރިއަން ގާތު އަހައިލިއެވެ. ” އަހަރެން ގޭންގްއަށް ވަންނާނަން. ” ދާރިއަންގެ ޖަވާބުގެ އަޑުއިވި އެތާ ތިބި މީހުންގެ ތުންފަތްތައް އެއްމިޔަކަނުން ދެމިލިއެވެ. ” އެހެންވީމަ މިރޭ އެއްބަސްވުމުގައި ސޮއެ ކުރަމާ.. ” ތިހާމް ދާރިއަން އަތަށް ގަނޑެއް ލައިދެމުން ބުންޏެވެ.

ދާރިއަން އެއްބަސްވުން ކިޔައިލިއެވެ. އޭގައި އޮތީ ގޭންގްގައި ހިނގާ ކަންތަކުގެ މައުލޫމާތު ގޭންގްގައި އުޅޭ މީހުން ފިޔަވައި އެހެން މީހުންނަށް ނުދޭނެ ކަމަށް ވައުދުވާށެވެ. އަދި ގޭންގަށް ގުޅުމުން، އުޅޭނެ ތަނާއި އެހެނިހެން ޒަރޫރީ ބޭނުންތައް ގޭންގްގެ ފަރާތުން ފުއްދައިދޭނެކަމެވެ. ގޭންގަށް ހިޔާނާތްތެރިވެއްޖެނަމަ އަދަބަކީ ވޭންހުރި މަރެއް ކަމުގައެވެ. އަދި ގޭންގާއި ގުޅުމަށްފަހު ގޭންގްއިން ވަކި ނުވެވޭނެ ކަމެވެ. ގޭންގްއިން ވަކިވެވޭނީ ފުރާނައާއި ހަށިގަނޑު ދެތަން ވުމުން ކަމުގައެވެ. ނުވަތަ ވަކިވާން ބޭނުންނަމަ ވަކިކުރާނީވެސް އެހެން ކަމުގައެވެ. އެއްބަސްވުން ކިޔަމުން ދިޔަ ދާރިއަންގެ ހަށިގަނޑުން ހީބިހި ނަގައިގެން ދިޔައެވެ. އެއްބަސްވުމުގައި އޮތް ތިން ޓެސްޓް ފެނި ދާރިއަން ހަށިގަނޑަށް ފިނިގަނޑެއް އަރައިގެން ދިޔަ އިހްސާސްވިއެވެ. ހިތުގެ ވިންދު ބާރުވެލިއިރު ނޭވާ އަވަސްވެލިއެވެ. އަތުގައި މަޑު ތުރުތުރެއް އަޅައިގެން ދިޔައެވެ.

( ނުނިމޭ )

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.