އިންސާފު ލިބޭނެބާ – 07

” މަށަށް މިހާރު ފެންނަމުންދާ މަންޒަރުތަކުންނަމަ، ދަޔާން ތީ އަމިއްލަ ހިޔާލު ފާޅު ކުރާ ޒުވާނެއް މީހަކު އެއްޗެކޭ ބުންޏަސް މަޑުން ހުންނާނޭ މީހެއް ނޫން.. އަބަދުވެސް ފެންނަނީ ވަރަށް އެކަނި އުޅޭ ތަން.. އަހަރުންގެ ގޭންގަށް ޖޮއިން ވެއްޖެއްޔާ އެކެނިވާކަށް ނުޖެހޭނެ… ފައިސާ ހެސް ކިޔާފަ ލިބޭނެ، ހުންނާނެ ސަޅި ތަނެއްވެސް ލިބޭނެ.. އަހަރުން އަހަރުންގެ މީހުނަށް ދޯކާއެއް ނުދެން އަދި އެމީހުންނަކީ އާއިލާ ކަމަށް ބަލައިގެން އުޅެނީ.. އެހެންވީމާ ސުވާލަކީ ދަޔާން އަހަރެމެންގެ އާއިލާގެ ތެރެއަށް ވަންނާނަންހޭ؟.. ” ޝިމާއު އަހައިލިއެވެ. އޭނާގެ ލޮލުގައި ނުރައްކައުތެރި ކަމުގެ ދަޅައެއް ހުއްޓެވެ. ނަމަވެސް ދަޔާންއަށް ހިލަމެއް ނުވާނެ ފަދައިން އޭނަ ހުރީ އެކަން ހިނިތުންވުމެއްގެ ފުރަގަހުގައި ފޮރުވައިލާގެންނެވެ.

***ޕާޓް 7***

” އެއީ ކީއްކުރަން؟ ތިއީ އަބަދު ޖަލަށް ވަދެ ނިކުމެ އުޅޭ ބައެއް.. ” ދާރިއަން ބުންޏެވެ. ” ކަލޭ ކޮންމެހެން ހައްޔަރު ކުރާނެކަމުގެ ބިރުގައި އުޅޭނެ ކަމެއް ނެތް.. ކޮޕުންނަށް އަހަރެމެން ޖަލަށް އެއް ދުވަހަށްވުރެ ގިނައިންލުމަކީ ކުރެވޭނެ ކަމެއް ނޫން.. ” ތިހާމް ފޮނިވެލާފައި ދާރިއަންއަށް ރައްދު ދިނެވެ. ” އެހެންނޫނަސް ކޮޕުން އެއީ އަހަރުންނަށް ވިކިފައި ތިބޭ ބައެއް.. އަހަރުން ޖަހާ ބެރަކަށް އެމީހުން ނަށާނީ.. ” މާވިން އިތުރުކުރިއެވެ. އެމީހުންގެ ވާހަކަ ހުރި ގޮތުން ދާރިއަން ހުރީ ރުޅިގަދަވެގެން ދެކަންފަތުން ދުންއަރާ ގޮތްވެފައެވެ. ނަމަވެސް ކުޅަދާނަކަމާއިއެކު އޭނަ ގާތަށް އައި ރުޅި ހިންދާލައިގެން އޭނަ އިނެވެ.

” އަހަރެން ތި ގޭންގަށް ވަންނަން ބޭނުމިއްޔާ ކީއްކުރަންޖެހޭނީ؟.. ” ދާރިއަން ޝިމާއުއަށް ބަލައިލަމުން އަހައިލިއެވެ. ” އަހަރެމެން ދޭނަން ތިން ޓެސްޓެއް އެއިން ކާމިޔާބު ވިއްޔާ ތީ ގޭންގް މީހެއް.. ” ޝިމާއު ބުންޏެވެ. ” އެއީ ކޮން ތިން ޓެސްޓްއެއް؟ ” ދާރިއަން ޝައުގުވެރިކަމާއިއެކު އަހައިލިއެވެ. ” ފުރަތަމަ އޮންނާނެ އެއްބަސްވުމެއް އެ ކިޔާ ސޮއެ ކުރީމަ، އަހަރުންނަށް ޓެސްޓްތަކުގެ މައުލޫމާތު ދެވޭނީ. ” ޝިމާއު ސިއްރުވެރިގޮތަކަށް ބުންޏެވެ. އެއްބަސްވުމެއް އޮންނަ ވާހަކަ ބުނުމުން ދާރިއަންއަށް މީ ވަރަށް ސިއްރިއްޔާތުގައި ކުރާ ކަމެއް ކަން ދެނެގަނެވުނެވެ.

” އަހަރެން ވިސްނާލާނަން.. ” ދާރިއަން ބުންޏެވެ. އެއާއެކު ތިހާމް، ވަދީހު، މާވިން ޝިމާއުއަށް ބަލައިލިއެވެ. ޝިމާއު ދާރިއަންއަށް ބަލައިލަމުން ބޯޖަހައިލިއެވެ. ” މައްސަލައެއްނެތް.. ވިސްނާނެ ވަރަކަށް ވިސްނާ.. މާދަން ރޭ ހަމަ މިވަގުތު މިތަނަށް އަހަރުން އަންނާނަން.. އަހަރެން އުންމީދު ކުރަން އަހަރެން ހިތްހަމަޖެހޭ ކަހަލަ ޖަވާބެއް ދަޔާން ދޭނެ ކަމަށް.. މިވަގުތަށް އަހަރުން ދިޔައީ.. ” ޝިމާއު އާއިއެކު އައި ތިން ފިރެހެނުން އެތަނުން ދުރަށް ހިނގައިގަތެވެ. ދާރިއަން އިރުކޮޅާކު ޖޯލީގައި އޮވެފައި ހިނގައިގަތީ ޓީމްއާއި ބައްދަލު ކުރާށެވެ. ހިނގަމުން ދިޔައިރު އޭނަ ދިޔައީ ސިއްރުސިއްރުން ބަޔަކު އޭނައަށް ފާރަލާތޯ ބަލަމުންނެވެ. ލައިގެން ހުރި ކަޅު ހޫޑީގެ ހޫޑް ބޮލުގައި އަޅާލިއެވެ. ކުރިންވެސް ދިޔަ ހަދަން ފަށާފައިވި ގޭގެ ކުރިމަތީ ހުއްޓުމަށްފަހު އޭނަޔާ ބަޔަކު ފާރަލާތޯ ބެލުމަށްޓަކައި ދެކޮޅު ހޯދައިލިއެވެ. އޭނަ ނޫން މީހަކު އެތާ ނެތްކަން ޔަގީން ކުރުމަށްފަހު އެ ގެއަށް ވަދެ ވަޅަށް ފުންމައިލިއެވެ. ތަޅުމުގައި ފައިޖެހުމުން ލޮކް ކޯޑް ޖެހުމަށްފަހު ހުޅުވައިލިއެވެ.

އޭރު އޭނާގެ ޓީމް އެ ކުޑަ ކޮޓަރީގައި ތިއްބެވެ. އުކައިލްއަށް ބަލައިލަމުން އެނާގެ އަތަށް ރިކޯޑިން ޑިވައިސް ދާރިއަން ދިނެވެ. ” ޕްލޭން އާއި އެއްގޮތަށް މި ދަނީ.. އެމީހުން ބުނެފި އަހަރެން ކައިރީ އެމީހުނާ ޖޮއިން ކުރަން.. އަހަރެންނަށް ވިސްނަން ދުވަހެއް ދިން.. މާދަމާ ރޭ ޖަވާބެއް ދޭން ބުނި.. އެމީހުން އަހަރެން ކައިރީ ބުނި ފާޑެއްގެ ޓެސްޓްތަކެއްގެ ވާހަކަވެސް.. ” ދާރިއަން ކިޔައިދިނެވެ. ” އެމީހުން ކައިރީ ސާރ ނާހަންތަ ކޮން ޓެސްޓްތަކެއް ތޯ އެއީ؟ ” ޒާލިކް ސުވާލު ކުރިއެވެ. ” އެހިން.. އެމީހުން ބުނީ އެ ކިޔާދެވޭނީ އެއްބަސްވުމެއްގަ ސޮއެ ކުރީމަކަމަށް.. ” ދާރިއަން ބުންޏެވެ.

” އެއްބަސްވުމެއް ދޯ.. އަހަރެން އެ ގޭންގަށް އޭރު ވެއްދިއިރު ތިކަހަލަ ކަމެއް ނުކުރެ.. ގަދަކަމުން އަހަރެން ލައްވާ އެމީހުން ބޭނުންވާ ކަމެއް ވިއްޔާ ކުރީ ފުރަތަމަކޮޅު.. ” އުކައިލް ވިސްނާލަމުން ބުންޏެވެ. ” އޭގަ ބޮޑަށް އޮންނާނީ ގޭންގުގެ އުސޫލުތަކާއި އެއްޗެހި.. އެމީހުންނަށް ބޭވަފާތެރި ނުވުމަށާއި ދޯކާ ނުދިނުމަށް އަދި ގޭންގާއި ގުޅިފައި ވަކި ނުވެވޭނެ ކަމަށްށާއި ބައިވަރު އިންޒާރުތަކެއް ދެން.. ” އިޔާދު ބުންޏެވެ. ” އިޔާދު ސާރއަށް އެ ގޭންގާއި ބެހޭގޮތުން ތިހާ ވަރަށް މައުލޫމާތު އެނގެނީ ކިހިނެތް.. ކިޔާލި ގޮތުން ހީވީ އެއްބަސްވުން ފެނިގެން ކިޔާލިހެންވިއްޔަ.. ” ދާރިއަން ސަމާސާ ރާގަކަށް ބުންޏެވެ. ” އަހަ އަހަރެން މިކަމުގައި އުޅޭތާ މިހާރު ނުވަ އަހަރުވަނީ ތިކުދިންނަށްވުރެ މާ ގިނަ ދުވަސް ވެއްޖެ.. އެހެންވީމަ މިކަހަލަ ކަންކަމުގެ ތަޖުރިބާ އަހަރެންގެ ގިނައިން ހުންނާނެ.. ” އިޔާދު ކަރުކެހިލަމުން ބުންޏެވެ. ޒާލިކްއަށް އިޔާދުގެ މޫނުގައި ނުތަނަވަސްކަމުގެ އަސަރު ހުރިހެން ހީވިއެވެ.

” ކިހިނެތްވީ؟ ތިމީހުން އަހަރެންނަށް އަނެއްކާ ޝައްކު ކުރަނީތަ؟ އުކައިލް.. ދާރިއަން.. މިކަހަލަ ކަންކަމުގައި އުޅޭއިރު އެކުގައި އުޅޭ ޓީމްމޭޓުންނަށް ޝައްކު ކުރުމަކީ ވަރަށް ކަޑަ ކަމެއް.. އިތުބާރު އެއީ އަހަރެމެންގެ ތެރޭގައި އޮންނަން ޖެހޭ އެންމެ މުހިންމު އެތި.. އެޔާ ނުލާ ޓީމް ވޯކްއެއް ނުކުރާނެ.. އެކަކު އަނެކަކަށް އިނގިލި ދިއްކުރަން ވަންޏާ ސަލާމަތަކީ ކޮބާ؟ ” އިޔާދު ވިސްނާދޭ ރާގަކަށް އެންމެންނަށް ނަސޭހަތް ދިނެވެ. ” އަހަރެން އެހެން ބުނި އެއްޗެއް ނޫން އެއީކީ.. އަހަރެން ފުލީ ޓްރަސްޓް ކުރަން މިތާ ތިބި އެންމެންނަށް.. ” ދާރިއަން ބުންޏެވެ. އެންމެން ދާރިއަންގެ ވާހަކައަށް އެއްބަސްވުމުގެ ގޮތުން ބޯޖަހައިލިއެވެ.

އެއިން އެއްވެސް ވާހަކައިގަވެސް ދާލިޔާ ބައިވެރި ނުވާކަން އިހްސާސްވުމުން އުކައިލް ފަހަތަށް އެނބުރިބަލައިލިއެވެ. އޭރު ދާލިޔާ އޮތީ ކޮމްޕިޔުޓާ ބަހައްޓާފައި ހުރި މޭޒުގައި ބޯއަޅައިގެން ނިދިފައެވެ. ދާރިއަންއަށް މިތަން ފެނުމުން އެއްމިޔަކަނުން ހީލުމަށްފަހު ފިޔަވަޅުގެ އަޑުނީވޭފަދަ ގޮތަކަށް ފައިނަގަމުން ގޮސް ދާލިޔާއިން ގޮޑީގެ ފަހަތުގައި ހުއްޓުނެވެ. ދާރިއަން ކުރަން އުޅޭ ކަންތައް އެނގުމުން އުކައިލްގެ ތުންފަތް ކުޑަކޮށް ދެމިލިއެވެ. ދެންތިބި މީހުން ތިބީ ހިނިގަނޑު ހިފަހައްޓާލައިގެންނެވެ. ދާރިއަންގޮސް ދާލިޔާގެ ބަނޑުގައި ކުއްލިއަކަށް ކޮއްޓާލިއެވެ. އެއާއެކު ހީލިކަރައިގެނާއި ސިއްސައިގެން ގޮސް ދާލިޔާ ހަޅޭއްލަވައިގަތެވެ. ދަރިއަން ފެނުމުން ދާލިޔަ އޭނާގެ އިސްތަށިގަނޑުގައި ހިފައިގަތެވެ.

”  އޭތް އޭތް.. އަތްދިއްޔޯ މަގޭ އިސްތަށި.. ” ދާރިއަން ހަޅޭއްލަވައިގަތެވެ. އޭނަ އަވަސް އަވަހަށް ދާލިޔާގެ އަތް އޭނާގެ އިސްތަށިގަނޑުން ނައްޓަން އުޅެގަތެވެ. ” ދޮންބެގަނޑާ!! ” ދާލިޔާ ދާރިއަން އާއި ދިމާލަށް ލޯއަޅައިލިއެވެ. އޭނަ އަދިވެސް އިނީ ނިދި ބުރާންތީގައެވެ. ” އަހަރެމެން ދެއްކި އެއްވެސް ވާހަކައެއް ކުއްޖާފުޅަށް އަޑު އިވުނުތަ؟ ” ދާރިއަން އޭނާގެ އިސްތަށިގަނޑު ދާލިޔާގެ އަތުން ވަކިކުރަމުން އަހައިލިއެވެ. ދާލިޔާ ދެލޯމެރޭ ނުމެރޭ ހާލު އިނދެ ބޯ ހޫރައިލިއެވެ. ” ޒާލިކް މި މަންޖެއަށް ކޮފީއެއް ގެނެސްދީބަލަ.. ރޭގައި އެއްގޮތަކަށްވެސް ނިދާފަ ހުރި ވައްތަރެއް ނުޖަހަ ވިއްޔާ.. ” ދާރިއަން ޒާލިކްގެ ގާތު އެދުނެވެ. ޒާލިކް ބޯޖަހައިލުމަށްފަހު ކޮފީ ދަޅެއް ކޮޓަރީގެ ބިތުގައި ހުރި ކުޑަ ފްރިޖްއިން ނަގާފައި ދިނެވެ.

ދާލިޔާ މަޑުމަޑުން އިނދެ ކޮފީ ދަޅު ބޮމުން ދިޔައެވެ. ކުޑައިރުކޮޅެއް ފަހުން ރަނގަޅަށް ދެލޯ ހުޅުވައިލަމުން އެންމެންނާއި ދިމާލަށް ބަލައިލިއެވެ. ” ލިޔާ ރޭގަ ނިދިންތަ އެއްގޮތަކަށްވެސް؟ ” ދާރިއަން ޝައްކުގެ ރާގަކަން އަހައިލިއެވެ. ” ދެ ގަޑިއިރު.. ” އަތުން ދެ އިނގިލި ދައްކައިލަމުން ދާލިޔާ ބުންޏެވެ. އެންމެން ހައިރާންވެ ހުރެ އޭނައާއި ދިމާލަށް ބަލަން ފެށިއެވެ. ” ކީއްވެ؟؟ ” ދާރިއަން ހައިރާންވެހުރެ އަހައިލިއެވެ. ދާލިޔާ ފުންނޭވާއެއް ދޫކޮށްލިއެވެ. ” އެ ގޭންގްއާއި ބެހޭގޮތުން ކުޑަ ރީސާޗްއެއް ހަދާލީ.. ” ދާލިޔާ ކޮމްޕިޔުޓަރަށް ބަލައިލަމުން ބުންޏެވެ. އެއާއެކު ދާރިއަން ދާލިޔާގެ ނަމަށް ދަމާލަމުން ގޮވައިލިއެވެ. ” ދޮންބެއަށް ފަސޭހައަކަށްށޭ.. އަހަރެން ކުޑަކޮށް ބަލައިލީ އެމީހުންގެ ކޭސްތަށް.. ހާއްސަ ކޭސްއެއް އަހަރެންނަށް ފެނުން.. ” ދާލިޔާ ސީރިއަސް ކަންމަތީގައި ހުރެ ބުންޏެވެ. ” ކޮން ކޭސްއެއް؟؟ ” އުކައިލް އަހައިލިއެވެ.

” އަހަރެން މި މީހުންގެ ކޭސްތަށް ބަލަމުން ދިޔައިރު ފެނުން ކޭސްއެއް މީ.. މި ކުއްޖަ.. މި ކުއްޖަ މަންމަވަނީ މިކުއްޖާއަށް ފަނަރަ އަހަރުގައި މިސިންގ ކޭސްއެއް ގޮތަށް ރިޕޯޓްކޮށްފަ.. އެ ކުއްޖަ މަންމަ ބުނާ ގޮތުންނަމަ ރޭގަނޑުގެ އެކްސްޓްރާ ކްލާހަކަށް ދާން ނިކުތީ އަށެއް ޖަހާއިރު.. ނުވައެއް ޖަހާއިރު ނިމޭ ކްލާހެއް ކަމަށް އޮތީ އެކަމަކު އެރޭ ބާރަ ޖެހިއިރުވެސް މިކުއްޖާ ނާންނަ ކަމަށް ވަނީ.. މިހާރު އެކުއްޖާ ގެއްލުނުތާ ތިން އަހަރު.. މި އަހަރު އެކުއްޖާއަށް އަށާރަ ފުރޭނެ.. ”  ދާލިޔާ އެ ކުއްޖާ ކޮމްޕިޔުޓަރުން ދައްކާލަމުން ކޭސްގެ މައުލޫމާތު އެމީހުންނަށް ދިނެވެ. ފޮޓޯގަނޑުގައި ވަނީ ކުލަ އަލި އޮމާން ހަންގަނޑެއް ލިބިފައިވާ ރީތި ކުއްޖެކެވެ. ކަޅުކަން ގަދަ ސިލްކް ކޮޅެއްހައި ފަން އިސްތަށިގަނޑެކެވެ. ދިގު އެސްފިޔަތެކެއް ލިބިފައިވާ މައުސޫމު ދެލޮލެވެ.

” ގޭންގްއާއި މިކުއްޖާ ގުޅުން ހުންނަނީ ކިހިނެތް؟ ” ދާރިއަން ސުވާލުކުރިއެވެ. ” މި ކުއްޖާގެ ބައްޕައަކީ އެއާޕޯޓުން މަސްތުވާތަކެތި އެތެރެ ކުރުމުގެ މައްސަލައިގައި ހައްޔަރުކޮށްފައިވާ މީހެއް އެކަމަކު މީނަ ވަނީ ޖަލުން ނުކުމެވިފަ.. ގެސް ހޫ ދި ލޯޔާރ ދެޓް ހެލްޕްޑް ހިމް އިޒް.. ” ދާލިޔާ ކޮމްޕިޔުޓާރގެ ސްރީން އެމީހުންނަށް ފެންނަ ގޮތަށް ހަދައިލިއެވެ. އޭގައިވަނީ ފިރެހެނެއްގެ ފޮޓޯއާއި މައުލޫމާތެވެ. ތުބުޅި މަތިމަސް އެއްވަރުކޮށް ހުރި އެމީހާގެ އިސްތަށިގަނޑު ހުރީ ތުނިކޮށް ކޮށާލައިފައެވެ. ހަންގަނޑުގެ ކުލަ އެހައި އަލިއެއް ނޫނެވެ. ބަލާބެލުމަށް ހީވަނީ ތިރީހުގެ އަހަރުތައް ގުނަމުންދާ މީހެއްހެންނެވެ.

” ނަމަކީ އަހްމަދު މުނާޒު.. މީނަ މީ ބްލަޑް މާފިޔާ ގޭންގްގެ މީހެއް ހައްޔަރު ކޮށްފިއްޔާ މިނިވަންވާން އެހީވަމުން އަންނަ މީހެއް.. މީނަ އެ ކުއްޖާގެ ބައްޕަ، އިމްރާންއަށް އެހީވަމުން ދިޔައީ.. އޭގެފަހުން އިމްރާންގެ ޖޮބް ގެއްލުނީ.. ދެ ފަހަރަކަށް ގޭންގް މީހުން އޭނަ ގައިގަ ތަޅާގަތް.. އެތަން ފެނޭ އެ މަގުގައި ހުރި ސީސީޓީވީ ކެމެރާއިން.. އޭނާގެ ދަރިފުޅު ގެއްލުނީ އޭގެ ފަހުން..” ދާލިޔާ ކިޔައިދިނެވެ. ” އޭނަގެ ހުންނަ ހަމައެކަނި ދަރިފުޅު ތަ އެއީ؟ ” އުކައިލް އަހައިލިއެވެ. ” ނޫން އޭނަގެ ހުރޭ ދެކުދިން.. އޭނާގެ އަނބިމީހަގެ ނަމަކީ އައިޝަތު މިލްޔާ.. އެކުއްޖާގެ ހުރޭ އެކުއްޖާއަށްވުރެ ހަ އަހަރު ބޮޑު ބޭބެއެއް.. އޭނާގެ ނަމަކީ މާވިން މުހައްމަދު.. މި ކުއްޖާގެ ނަމަކީ އައިޝަތު މިޔާ އިމްރާން.. ” ދާލިޔާ އުކައިލްއަށް ޖަވާބު ދިނެވެ.

(ނުނިމޭ)

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.