ޝެރިން (14 ވަނަ ބައި)

ެ. އެކުދިން ހުރިހާ ކަމެއް ކުރަނީވެސް އެކޮޓަރީގަ އެވެ. އެއީ ވަރަށް ބޮޑު ކޮޓަރިއެއް ނަމަވެސް ވިއްސަކަށް ކުދިން ތިބެންޏާ އެއީ ކުޑަ ޖިފުޓިގަނޑެކޭ ވެސް ބުނެވިދާނެ އެވެ. ނިދާ އެނދެއް ނުހުރެ އެވެ. ގާތްގަނޑަކަށް އަށެއްކަ ގޮދަޑި އެހުރިހާކުދިން ހިއްސާކުރެ އެވެ. ކަނީވެސް ފެންވަރު ދެރަ ކާނާ އެވެ. ބިސްކޯދާއި ޕާނާއި، ކިރު ފަދަ ބާވަތްތަކެވެ. ޝެރިންގެ ލޮލުން ކަރުނަ ހިލުނެވެ. އޭނާ މަންމަމެން ގާތު ހުރިއިރު ކަނީ ވީހާވެސް މީރު އެއްޗެހިންނެވެ. އަގުބޮޑު ކާތަކެއްޗެވެ. އުޅުނީ ވަރަށްވެސް އުފަލުގަ އެވެ. ދުނިޔޭގެ އެހެންކަމަކަށް ފިކުރުކޮށްލެވޭ ވަރަށްވުރެން މާބޮޑު މުއްސަނދި ދުނިޔެ އެއްގަ އެވެ. ނަމަވެސް ޝެރިންގެ ލޮލުގެ ކުރިމަތީން އެފެންނަނީ ހަމަ ދުނިޔޭގައި ތިބި ކުދިންގެ ޙާލެވެ. އެކުދިންނަށް މީރުއެއްޗެއް ކެވުނީ ކޮން ޒަމާނެއްގައިބާއޭ ޝެރިންގެ ހިތަށް އެރި އެވެ.

ޝެރިން އައުމުން ޔޫކޯ އާއި މިޒޫކީ އޭނާއަށް ދެޕާން ފޮތި ދިއްކޮށްލި އެވެ. ޕާނާއިއެކު ޖޭމުކޮޅެއް، ނޫނީ ކްރަންޕީ ހުރިތޯ ހޯދާލި އިރު ފެނުނީ ހުރިހާ ކުދިންވެސް އެކުދިންގެ ކިރު ތަށީގައި ހުސް ޕާންފޮތި ޖައްސައިގެން ކާންތިބި ތަނެވެ. ޝެރިނަށް ހިންދިރުވާލެވުނެވެ. ބަނޑުހައިވެ ހާންތިވެފައި ވާތީ ހިތްވަރު ކޮށްފައި ކާންފެށީ އެވެ.

މަސައްކަތުގެ ފުރަތަމަ ދުވަސްކަމުން ޝެރިން ހަދާނުހަދާއެއް ބަލަން ޖޭޑް އައިސް ހުއްޓެވެ. މިކަމާ ޝެރިން ހިތްހަމައެއް ނުޖެހުނެވެ. ނޭނގޭ ސަބަބަކާހުރެ ޖޭޑްދެކެ އޭނާ ވަރަށް ރުޅިއާދެ އެވެ. ޖޭޑް ފެންނަ ފަށުގައި ހުރުމުން ޝެރިންގެ މަސައްކަތަށްވެސް ވަރަށް އުނދަގޫވި އެވެ. މިއަދުގެ މަސައްކަތަކީ ދޮރުފޮތި ފެހުންކަމުން ކޮންމެ ކުއްޖަކަށްހެން ފަހާފޮށްޓެއް ހަވާލުކޮށްފައިވެ އެވެ. ފުރަތަމަކޮޅުކަމުން ޝެރިނަށް އެއްވެސް ގޮތަކަށް ފަހާކަށް ނޭނގުނެވެ. އެހެންކަމުން އޭނާއަށް އެހީވެދިނުމަށް ޔޫކޯ އާއި މިޒޫކީ އުޅެ އެވެ. ކުއްލިއަކަށް ނޭނގުމުގެ ތެރޭގައި ޝެރިންގެ އަތަށް ތިނޯސް ހެރުނެވެ. އެވަގުތު ޝެރިންގެ އަނގައިން ވޭނީ އާހެއް ނިކުތެވެ. ހެރުނީ ވަރަށް ފުނަށް ކަމުން އިސާހިތަކު ލޭއަންނަން ފަށައިފި އެވެ. ވިސްނާލުމެއް ނެތި ހާސްވެފައި ހުރި މިޒޫކީ ތިނޯސް ދަމާގަތީ އެވެ. ޖޭޑަށް އެތަނަށް އާދެވުނީ އެވަގުތެވެ. ޝެރިންގެ އަތް ހަލާކުވެފައިވާތަން ފެނުމުން އަވަހަށް ޝެރިން ވަކި ކޮޓަރިއަކަށް ގެންގޮސް، ފަސްޓް އެއިޑް ބޮކްސެއް ގެނެސް ބޭސް އަޅާދިނެވެ. އެވަގުތު ޖޭޑްގެ އެ ހަރަކާތުން އޯގާވެރިކަން ޝެރިނަށް ފެނިގެންދިޔަ އެވެ.

“މިހާރު ކިހިނެތް؟” ޖޭޑް އާދައިގެ ރާގެއްގައި އެހި އެވެ.

“ރަނގަޅު.” ޝެރިންގެ ޖަވާބު ކުރެވެ. މީހަކާ ވާހަކަދައްކާ ހިތް ނުވެޔޭ އަންގާފަދަ ގޮތަކަށެވެ.

އެވަގުތު ޖޭޑް ކުރި ކަމަކުން ޝެރިން ސިއްސާލި އެވެ. ޖޭޑް ޝެރިންގެ ދަތްދޮޅީގައި ހިފާ އިސް އުފުލާލީ އެވެ. އެވަގުތު ޝެރިންގެ ދަނބު ކުލައިގެ ކަޅިރަވަ އާއި ޖޭޑްގެ ހޭޒަލް ލޮލާ ބައްދަލުވި އެވެ. ހައިރާން ކަމާއެކީ ޖޭޑް ޝެރިނާ ދިމާއަށް ބަލަމުން ދިޔައީ އަލަށް އެއްޗެއް ފެނިގެން ބަލާފަދަ ގޮތަކަށެވެ.

“ބުނަންތަ… ތިއީ ވަރަށް ތަފާތު ކުއްޖެއް. ތިލޮލުގެ އާދަޔާޚިލާފު ކުލައިންވެސް އެކަން ދޭހަ ވެއްޖެ. އެކަމަކު ބުނަން… ޝެރިން މިތަނަށް މިގެނައީ އަހަރެން ބުނެގެން… އަހަރެން ޝެރިނަށް ފާރަލާން މީހުން ފޮނުވީން… އެކަމަކު ކޮންމެ ފަހަރަކުވެސް ނާކާމިޔާބު ވެގެން އެނބުރި އަންނަން ޖެހެނީ ސެކިއުރިޓީގެ ސަބަބުން… އަހަންނަށް ޝެރިންގެ ބޭބެވެސް އެނގޭ…! ތިގޭ އެންމެންވެސް އިނގޭ! އަހަންނަށް މިކަންތައް އެނގުނީ ކިހިނެތްކަން އަދި ފަހުން އިނގޭނެ…!” ޖޭޑް ވާހަކަދެއްކި އެވެ.

ގުޑިލާންވެސް ނޭނގިފައި ހުރި ޝެރިނަށް ޖޭޑްގެ މިޖުމުލަތަކުން އިތުރު ހައިރާން ކަމެއް ލިބުނެވެ.

“އަހަރެމެން ބޭނުންވަނީ ކުޑަކުދިން… މަސައްކަތްކުރެވޭ ކަހަލަ، އަދި އެއްވެސް އާއިލާއެއް ނެތް ކުދިން… މިތަނަށް އައުމަށްފަހު އެނބުރި ދިޔުމެއް ނޯންނާނެ. އެހެންވީމަ ޝެރިންވެސް ގަދަ ނަހަދާ މަސައްކަތް ކުރިއަށް ގެންދިޔައިއްޔާ ރަނގަޅުވާނީ…”

އެދުވަހު އިރުއޮއްސިގެން ދިޔައިރުވެސް ޝެރިންގެ ސިކުނޑިއަކުން ޖޭޑް ދެއްކި ވާހަކަތަކެއް ނުފިލި އެވެ. ހަމަ ހީވަނީ ދެންމެ ދެއްކި ވާހަކަތަކެއް ހެންނެވެ. އޭނާއަކަށް ދެންކުރަންވީ ކަމެއް ނުވިސްނުނެވެ. މިހާރު އޭނާގެ އަމިއްލަ އާއިލާއާމެދު ވެސް ޝައްކު ކުރެވެން ފަށައިފި އެވެ. އޭނާ އެހެންކުދިންނާ މިވާހަކަ ހިއްސާކުރަން ބޭނުންނުވީ މިއީ ވަރަށް ބޮޑު ސިއްރެއް ފޮރުވިފައިވާ ކަމަކަށްވާތީ އެވެ.

މަސައްކަތުގައި އުޅެމުން ޝެރިނާއި، ޔޫކޯ އަދި މިޒޫކީ ވަރަށް ގިނަ ވާހަކަތައް ހިއްސާކުރި އެވެ. އެދެކުދިންނަކީ އެކުދިންގެ ގައުމުގައި އަޅާލާނެ އަހުލެއް ވަހުލެއް ނެތް ކުދިބައެއްކަން ބުނެދިނެވެ. މަގުމައްޗަށް ގިނަވުމުން، އެއްދުވަހަކު މީހަކު ބުނިބުނުމަކަށް އެކުދިން އެމީހާއާއިއެކު ދިޔައީ އެކުދިން ބަލަހައްޓަދޭނަމޭ ބުނުމުންނެވެ. ނަމަވެސް ކަން ދިމާވީ ހީކުދިފަދަ ގޮތަކަށްނޫނެވެ. ދެކުދިންވެސް އެންމެފަހުން ޗައިލްޑް ލޭބަރގެ ޝިކާރައަކަށްވެގެން ދިޔައީ އެވެ…

“ޝެރިންގެ ދަނބު ކުލައިގެ ކަޅިއެއް އިންނަނީ ކީއްވެގެންތަ؟ އަހަރެމެންނެއް ނުދެކެން ދުވަހަކުވެސް ތިކުލައެއްގެ ކަޅިއެއް…” ވާހަކައިގެ ތެރެއިން މިޒޫކީ ސުވާލު ކުރި އެވެ.

ޝެރިން އޭނާއާ ދިމާއަށް ބަލާލި އެވެ. އޭރު ޔޫކޯގެ ނަޒަރުވެސް ހުރީ ޝެރިނަށް ހުއްޓިފަ އެވެ. އަޑުއަހަން ކެތްމަދުވެފަ އެވެ.

“ހޫމް… މިކިޔާދެނީ…” ޝެރިން ފުންނޭވާއެއްލި އެވެ. އަދި ކިޔާދިނެވެ. “ސުކޫލަށް ދިޔަ ފުރަތަމަ ދުވަސްކޮޅާ، ބޭރަށް ނުކުންނަ ދުވަސްދުވަހު މީހުންގެ ސުވާލުފައްޗަށް ކުރިމަތިލާން ޖެހޭ… ބައެއް ކުލާސްކުދިން މަލާމާތްކުރާނެ… އަވިގަދަ ދުވަސްދުވަހު ކުޑައަޅައިގެން ސުކޫލަށްދާތީ… އަވިދޭ ދުވަސް ދުވަހު ޕީ.އީ. ގަޑީގަ ނުކުޅެވި، އެކަނި ދުރުގަ ހިޔާގަނޑުގަ އިންނަން ޖެހޭތީ… ދުރު ފުސްކޮށް ފެންނާތީ… އެކަމަކު ދުވަހަކުވެސް ބާކީއެއް ނުކުރާނެ… މަށަކީ ހާފް އެލްބިނޯ އެއް… އެހެންވެ މިގޮތަށް މިހުންނަނީ…”

ޝެރިންގެ ވާހަކަ ޝައުގުވެރިކަމާއެކު އަޑުއަހަން ތިބި ދެކުދިންނަށްވެސް ތިބީ މަޖާވެފަ އެވެ. ބަލާބެލުމަށް ޝެރިނަކީ އެފަދަ ކުއްޖެއްކަމެއް އެހާ ބޮޑަކަށް ނޭނގެ އެވެ. ހަމައެކަނި ހަން އޮމާންވެފައި އާދައާއި ޚިލާފަށް ހުދުކަމެވެ. އެ ކުޑަކުޑަ ދެ ލޮލުގެ ވަށައިގެން ވަނީ ވަރުގަދަ އެސްފިޔަތަކެވެ. އެ ދޮން މޫނު ވަށާލާފައިވަނީ މުށިކުލައިގެ ފަންފަން އިސްތަށިގަނޑަކުންނެވެ. ބޮޑު ތަފާތަކަށްވެސް އިނީ ލޮލުގެ ކުލައެވެ.

…………………………………………..

ދެން އައިދުވަހު ޝެރިނާއި، ޔޫކޯ އަދި މިޒޫކީއަށް ހޭލެވުނީ ހަތެއް ޖަހަން ފަސް މިނެޓަށް ވެފައި ވަނިކޮށެވެ. އިއްޔެ ބުރަކޮށް މަސައްކަތްކުރުމުން ޝެރިންވަނީ ވަރަށް ވަރުބަލިވެސް ވެފަ އެވެ. ގަޑިޖެހިދާނެތީ އަވަސްއަވަހަށް ދެތިން މިނިޓް ތެރޭ ތައްޔާރު ވެލައިގެން ހުސް ޕާސްފޮއްޗަކާއި، ފެން ތައްޓެއް ބޯލުމަށްފަހު އެހެންކުދިން ތިބި ދިމާއަށް ހިނގާގަތެވެ. އޭރު ބަރާބަރު ހަތެއްޖެހީ އެވެ. ގަޑިޖެހިއްޖެ ނަމަ ދެންވާނެ ގޮތުގެ ވަރުގަދަ އިންޒާރު ދީފައި އޮތުމުން ވަކިން ބޮޑަށް ޝެރިން ބިރުގަތެވެ.

ޖޭޑާއި، ތަނުގެ އެހެން މުއައްޒަފެއް އައުމާއެކުހެން ވަކިވަކި ކުދިންނަށް މަސައްކަތް ޖައްސަން ފަށައިފި އެވެ. އެވަގުތު އެތަނަށް ދެކުދިން އައެވެ. ގަޑިޖެހިގެން އާދެވުމުން ދެކުދިންގެ މޫނުމަތިންވެސް ފެންނަމުން ދިޔައީ ހާސްކަމާއި ކަންބޮޑުވުމެވެ. އެދެކުދިން ފެނުމާއެކު ހީވީ ހޮނުގުގުރިއެއް ޖެހިހެންނެވެ. ރުޅިއައިސް ރަތްވެފައިހުރެ ޖޭޑާ އެއްކޮށް އައި މީހާ ހަޅޭއްލަވާގަތީ އެއީ ކުޑަކުދިންކަންވެސް ނުބަލާލައެވެ.

“އަދިކިރިޔާތަ ހޭލެވުނީ…؟؟ ނޭނގޭތަ ގަޑިއަށް ފަރުވާތެރިވާން ޖެހޭނެ ކަމެއް؟ ހަމަމިހާރު މިކޮޅަށްއާދޭ!! މިފަހަރު ސަލާމަތެއް ނުވެވޭނެ އެނގޭ!”

ޝެރިން އޭނާގެ މޫނުގައި އަތްއެޅީ އެމީހާ ވަރުގަދަ ހޮޅި ގަނޑެއްކަހަލަ އެއްޗެއް ހިފައިގެން އެކުދިން ގާތަށް ލެފުންތަން ފެނިފަ އެވެ. އޭރު ޖޭޑް ހުރިގޮތަށް ހުރީ އެވެ. އެނުލަފާ މީހާ ހުއްޓުވާކަށް އޭނާ މަސައްކަތެއް ނުކުރެ އެވެ. ދެން އިވެންފެށީ އެއްޗެއްގައި ވަރަށް ބާރަށް ޖަހާއަޑާއި، ވޭނީ ރުއިންތަކުގެ އަޑެވެ. ލޯމަތިން އަތް ނަގަންނުކެރިފައިހުރި ޝެރިނަށް ހުރިތަނަށް ތިރިވެވުނެވެ. އަދި ދެލޯމަރާ ތަގުޅިކޮށް، ދެކަންފަތުގައި ދެއަތްއަޅާ ބާރުކޮށްލި އެވެ.

މީހަކު ޝެރިންގެ ބޮލުގައި އަތްބާއްވާލުމުން މަޑުމަޑުން ޝެރިން އިސްއުފުލާލި އެވެ. ދެލޮލުން ވިދަމުންދިޔަ ކަރުނަ ތަކުގެ ތެރެއިން ޔޫކޯ އާއި މިޒޫކީގެ މޫނު ޝެރިނަށް ފެނުނެވެ. އެކުދިންގެ ލޮލުގައި ކަރުނައެއް ނެތެވެ. މޫނުމައްޗަކު އަސަރެއް ނެތެވެ. ދިރުމެއް އަމުދުން ނެތެވެ. މިއީ އެކުދިން ކޮންމެ ދުވަހަކުހެން ތަޖުރިބާކުރަމުން އަންނަ ކަންތައްތަކޭ ބުނެލި އެވެ. އަދި އެތަކެއް ހިތްވަރުތަކެއް ލައިދީގެން ޝެރިން ހަމައަކަށް އަޅުވަން މަސައްކަތްކުރި އެވެ.

……………………………………….

ޝެރިން މިތާ އުޅޭތާ ހަފްތާއެއްހައި ދުވަސް އަމާންކަމާއެކު، އެއްވެސް އިތުރު ނުރައްކަލެއް ކުރިމަތިނުވެ ހިނގައްޖެ އެވެ. މިތާ އުޅޭ އެހެންމީހުން ކިތަންމެ އަނިޔާވެރި އަކަސް، ޖޭޑަކީ ވަރަށް ރަނގަޅު ކުއްޖެކެވެ. 15 އަހަރުގެ ޖޭޑް (ޖާވިން) މިހާރަކަށް އައިސް ވަރަށް ތަފާތުވާން ފަށައިފިހެން ޝެރިނަށް ހީވާންފަށައިފި އެވެ. ކުރިއަށްވުރެން ގިނައިން ކުދިންގެ މަސައްކަތް ބަލަމުން ދާކަމާއި، ޝެރިނަށް ޚާއްޞަކޮށް ދޭސަމާލުކަން އިތުރު ވާކަމެވެ. ނަމަވެސް މިހުރިހާ ކަމެއް ނޭނގޭކަމަށް ހެދިގެން ޝެރިން ހުންނަނީ ޖޭޑަށް ނަފްރަތު ކުރާތީ އެވެ. އޭނާ މިތަނުގައި އުޅެން ޖެހުމުގެ މައިގަނޑު ސަބަބަކީ ޖޭޑް ކަމަށްވާތީ އެވެ. ނަމަވެސް ޝެރިން ކަހަލަ އެންމެ ބާރަ އަހަރުގެ ކުއްޖަކަށް ކުރެވޭނީވެސް ކޮންކަމެއް ހެއްޔެވެ؟

ދެމަސްދުވަސް ފާއިތުވެގެންދިޔައީ ދެ އަހަރު ފަދައިންނެވެ. މިހާރު ޝެރިނަކީ މިތަނުގެ މަސައްކަތަށް ހޭލުންތެރިވަމުން އަންނަ ކުއްޖެކެވެ. ނަމަވެސް އެކަނިވާ ވަގުތުތަކުގައި މަންމަމެންގެ މަތިން ހަނދާންކޮށްކޮށްފައި ޝެރިން ރޮއެވެ. ބައެއް ފަހަރު އޭނާ އެހެންކުދިންނަށް ހިތްވަރުލައިދެ އެވެ. އަނެއްބައި ފަހަރު އޭނާ މާޔޫސްވެ ހިތްވަރުއެލި، އަމިއްލަ ޙާލައިގެން ރޮއިރޮއި ގޮސް ހަލާކުވެ އެވެ. މިފަދަ ވަގުތުތަކުގައި އެހެންކުދިން އޭނާއަށް ހިތްވަރުދެ އެވެ. މިހާރު އެހުރިހާ ކުދިންނަކީވެސް އެކަތި ގަނޑެކެވެ. އެއްބަނޑު އެއްބަފާ ކުދިންނަށްވުރެން ގާތްވެއްޖެ އެވެ.

…………………………………

ޝެރިން ގެއްލުނުތާ އަހަރެއް ފާއިތުވެ ހިނގައްޖެ އެވެ. މިކްޔާލްމެންގެ ޚަބަރެއް ބަލާލަމާ ހެއްޔެވެ؟

ސާދަ އަހަރުގެ ޔައިން މިހާރު ޝެރިން ހޯދުމުގެ ގުރޫޕުގައި އުޅެމުންދެ އެވެ. އެންމެފަހުން މިކްޔާލް ޔައިނާ އެއްބަސްވީ އެވެ. ސާދަ އަހަރުގައިވެސް ޔައިން ހީވަނީ ސޯޅަ ސަތާރަ އަހަރުގެ ޒުވާނެއް ހެންނެވެ. ދިގު އިސްކޮޅަކާއި ފިރިހެން ވަންތަކަން ފިސާރި އަވަހަށް ޔައިންގެ ގައިން ފާޅުވާން ފަށައިފި އެވެ. ޖަރުމަނުގެ ބަރލިން ސިޓީގައި އަތްފުނާ އަޅަމުން ކަހަލަ ގޮތަކަށް މިކްޔާލާއި ޔައިންގެ ޓީމް ހޭބޯ ނާރާ އުޅެމުން ގެންދެ އެވެ.

އަނެއްކޮޅުން ސުޖާޢުގެ އާއިލާގެ ޙާލުވެސް ދުވަހެއް ދުވަހަކަށް ދަނީ ދަށަށެވެ. ދިނާޔާވެސް މިހާރު ދުނިޔޭގައި ހުއްޓެއް ކަމަކު ހީވަނީ މަރުވެފައިވާ މައްޔިތެއް ހެންނެވެ. ކުރިން ނުހަނު ފަލަކޮށް ހުރި ހަށިގަނޑު މިހާރު މީހަކު ބިރުގަންނަ ވަރަށް ހިކެން ފަށައިފި އެވެ. ތެދުވެ އުޅެނީވެސް ހާލަކުން ފަހަރަކުންނޭ ބުންޏަސް ދޮގަކަށް ނުވާނެ އެވެ.

………………………………………

އާއަހަރެއް ފެށުނީ ކައިލާއި ނީމްގެ ކައިވެނީގެ އުފާވެރި ޙަފްލާއިންނެވެ. ކުލަގަދަ ގޮތެއްގައި ލެމަން ގްރާސް ގައި ބޭއްވި މި ޙަފްލާގައި ސުޖާޢު އާއި ދާނިޔާގެ އިތުރުން ދިނާޔާގެ މޫނުމަތިންވެސް އެތައް ޒަމާނަކަށްފަހު ހިނިތުންވުމެއް ފެނިގެންދިޔަ އެވެ. ކަނޑު ނޫކުލަ އާއި، ހުދުކުލައިން މޭޒުތަކާއި ފާރުތައް ޒީނަތްތެރި ކުރެވިފައިވާއިރު ނީމްވެސް ލައިގެން ހުރި ބޮޑު ވެޑިން ޑްރެސްވެސް ވަނީ ކައިވެނީގެ ތީމް ކުލަތަކުން ޖަރީކޮށްފަ އެވެ. ނީމްގެ ގަދަމުށިކުލައިގެ ފަށުއި އިސްތަށިގަނޑު ރާޅުބާނީކޮށް ފަހަތަށް ބޮޑު ހުޅިއެއް ޖަހާ، ކުދި މާތަކުން ޒީނަތް ކޮށްލާފައިވާއިރު ހީވަނީ ހަވައިން އައިސްފައިވާ ޗާލު ޕަރީ އެއްހެންނެވެ. ކަރުގައާއި، ކަންފަތުގައިވާ ގަދަނޫކުލައިގެ ޒޭވަރުތަކާއި، އޭނާގެ ނޫކުލައިގެ ލެންސް ލައްވާފައިވާ ދެލޮލާ ނުހަނު ގުޅެ އެވެ.

ކައިލްވެސް ވަކި ދެރައެއް ނޫނެވެ. ހުދުކުލައާއި، ނޫކުލަ އެކުލެވޭ ޓަކްސިޑޯއަކާއި، ގަދަނޫކުލައިގެ ފަޓުލޫނެއްލައިގެން ހުރިއިރު، ވަރަށް ސްމާޓެވެ. ކައިވެނީގެ ދެހޫރުޕަރީންފަދަ ކައިލާއި، ނީމަށް މެހެމާނުންތަކުގެ ނަޒަރު އިރުއިރުކޮޅަކާ ހުއްޓެނީ ދެމީހުންވެސް ގުޅޭލެއް ފުރިހަމަކަމުންނެވެ.

މުޅި ތަން ކާތަކެތީގެ މީރުވަހުން އެއްވަސް ވެފައިވާއިރު އިވޭ ލުއިލުއި މިއުޒިކްގެ އަޑާއެކު ތަށި ސަމުސާ ތަޅުވާ އަޑު އިވެމުންދެ އެވެ.

ދާނިޔާ އިރުއިރުކޮޅަކާ ނީމްމެންގެ ފޮޓޯ ނަގަމުން ގެންދެ އެވެ. މިކައިވެނި ކުރެވުނީ ދިނާޔާގެ ހިތްހަމަ ޖައްސައިދެވޭތޯ އެވެ. ޝެރިން ގެއްލުމުގެ ހިތާމަ ލުއި ކޮށްދެވޭތޯ އެވެ. މިކަން ކޮންމެވެސް ވަރަކަށް ކާމިޔާބުވެސް ވެއްޖެ އެވެ. ދިނާޔާގެ މޫނުމަތި މިއަދު އުޖާލާވެ އަލިވެފައި ވަނީ އޭނާއަށް ޅީދަރިއެއް ލިބުމުންނެވެ. ދިނާޔާ ގާތު ސަޢުދިއްޔާ އާއި، އެހެން ވަރަށް ގިނަ އަންހެނުން ތިއްބެވެ. ހުރިހާ އެންމެންވެސް ހީކޮށްގެން ތިބީ ދެން ދިނާޔާއަށް އުފާވެރިކަމެއް ލިބޭނެ ކަމަށެވެ.