ތަޤްދީރު 10 ވަނަ ބައި

” ހިނގާބަލަ ހިގާލަން ދާން. ގޭގަ ހުރެ ފޫހިވެއްޖެ ” ވިދާން ބުނެލިއެވެ. ” ކޮންތާކަށް ހިނގަންދާން ” ޝުހާދު ބުނެލިއެވެ. ” ހިނގާ ރަސްފަންނަން ދާން ” ވިދާން ސޯފާގައި ހަމަ ޖެހިލަމުން ބުނެލިއެވެ. ” ކިހިނެއްވީ. އެ މަންޖެ މަތިން ހަނދާންވީދޯ ” ޝުހާދު ދިމާ ކުރާފާޑަކަށް ބުނެލިއެވެ. ” ކޮންމަންޖެ އެއްތަ؟ ” ވިދާން ޝުހާދަށް ބަލާލަމުން ބުނެލިއެވެ. ” ދެން ނޭންގޭ ކަމަށް ހަދާނެ ކަމެއްނެތް ” ޝުހާދު ބުނެލިއެވެ. ” ސާބަހޭ. އޭނަ ބަލާކަށް ނޫޅެން ” ވިދާން ބުނެލިއެވެ. ” އެހެންވިއްޔާ ރަސްފަންނުން ކޮންއެއްޗެއް ނުފެނި ކެއްމަދުވެގެން ތިއުޅެނީ ” ޝުހާދު ޓީވީން ޗެނަލް ބަދަލުކޮށްލަމުން ބުނެލިއެވެ. ” އެއްޗެއް ނުފެނިގެނެއް ނޫން ” ވިދާން ސޯފާ ކައިރީގައި އިން މޭޒް މައްޗަށް ފައި ދަމާލަމުން ބުނެލިއެވެ. ” މިއޮށް އަންނަނީ ދާންގެ ފޭވަރިޓް ފިލްމް ” ޝުހާދު ޗެނަލް ބަދަލުކޮށްލި ވަގުތު ހިންދީ ފިލްމް ” ލާޑްލާ ” ފެނުމުން ބުނެލިއެވެ. ” ޝުހާދަށް ކިހިނެއް އެނގެނީ ތީ އަހަރެންގެ ފޭވަރިޓް ފިލްމް ކަމެއް ” ވިދާން ޓީވީއަށް ބަލާލަމުން ބުނެލިއެވެ. ” އަހަރެންނަށް ނޭންގުން ވަރަކަށް ދާން އެނގޭނެ ދެވަނަ މީހަކު ނުހުންނާނެ ” ޝުހާދު ވިދާންއަށް ބަލާލަމުން ބުނެލިއެވެ. ” ދެން ތިއޮތީ އެނގިފަތާދޯ ” ވިދާން ބުނެލިއެވެ. ” ތީ ބޭރަށް ދާންވެގެން ލަސްވެގެން އުޅުންމީހާ ” ޝުހާދު ބުނެލިއެވެ. ” ދެން ނޫޅެން ދާކަށް ” ވިދާން ރާގު ބަދަލުކޮށްލަމުން ބުނެލިއެވެ. ” އެހެން ނުހަދާ ދެން. ހިނގާބަލަ ދާން ” ވިދާންގެ ކޮޑުގައި ހިފާލަމުން ޝުހާދު ބުނެލިއެވެ. ” ދެން މިހާރު ދާ ހިތެއް ނެތް ” ވިދާން ޝުހާދުގެ އަތް ކޮޑުމަތިން ފޮޅުވާލަމުން ބުނެލިއެވެ. ” އެނގޭ ދެން ނުދާނެ ކަން ވެސް ” ޝުހާދު ޓީވީއަށް ބަލާލަމުން ބުނެލިއެވެ. ” އަހަރެން ބުނި އިރުން ނުދިޔައީމާ، މިބުނީ ދާހިތެއް ނެތޭ ” ވިދާން ސޯފާގައި ހަމަޖެހިލަމުން ބުނެލިއެވެ. ” އެހެން ވެގެނެއްނޫން. ތި ފިލްމު ފެނުނީމާ ތިބުނީ ނުދާނަމޭ. ދެން ކޮންމެހެން އޮޅުވާލަން އުޅޭނެ ކަމެއް ނެތް ” ޝުހާދު ސޯފާއިން ތެދުވަމުން ބުނެލިއެވެ. އަދި ކޮޓަރިއާ ދިމާއަށް ޝުހާދު ހިނގައިގަތުމުން ވިދާން ބަލާލިއެވެ.

” ހަމަ ރަގަނޅަށް މިބުނީ ސީމާ، މިހާރުދެން އޭނަޔާހެދި މަގުމައްޗަށް ނިކުތުމަށް ވެސް އުދަގުލަކަށް ވެއްޖެ ” ޔާނާ ފޯން ކަންފަތުގައި ޖަހައިގެން ހުރެ ބުނެލިއެވެ.  ” ކާކާ ހެދިތަ އުދަގުލަކަށްވީ ” ސީމާ ބުނެލިއެވެ. ” ދެން ކާކާ ހެދިތަ، އަހަރެންނަށް އުދަގޫވާނީ ” ޔާނާ އައިސްއަލަމާރިން ފެންފުޅިއެއް ހިފައިގެން އައިސް ސޯފާގައި އިށީންނަމުން ބުނެލިއެވެ. ” ފަޒީލްތަ؟ ” ސީމާ ޔަގީން ނުވާ ފާޑަކަށް ބުނެލިއެވެ. ” އާނ. އޭނަގެ އުދަގުލާ ހެދި މިހާރު ނޭވާލުމަށް އުގަދޫވެއްޖެ. ދާކޮންމެ ތާކުން ފަހަތު އަޅުވާލާ ” ޔާނާ ފޯން ކަންފަތުގައި ޖައްސާ ކޮޑާލާ ފިއްތާލަމުން، ފެން ފުޅީ މަތި ނަގަމުން ބުނެލިއެވެ. ” ލޯބިވާ މީހުން އެހެން އުޅޭނީ ” ސީމާ ހީލަމުން ބުނެލިއެވެ. ” އާނ… ލޯބި ވާމީހުން އިނގިއްޔަކަށް މީހަކު ވެސް ގެންގުޅެނީ ” ކަންފަތާއި،ކޮޑާއި ދެމެދުގައި ފިއްތާލާފަ އިން ފޯން އަތުން ނަގަމުން ޔާނާ ބުނެލިއެވެ. ” އަޅާނުލާބަލަ. ފަޒީލް އެއުޅެނީ އަދިވެސް އޭނަގެ މަޅިގަ ޔާނާ ޖެއްސޭތޯ ” ސީމާ ބުނެލިއެވެ. ” ކޮންމެ ފަހަރަކު ކަށި ޖެހޭނެ ކަމަށް ހީވަންޏާ އެއީ އޭނަގެ މޮޔަކަން. އަހަރެން މީ އޭނަ ހަދާނެ އެއްޗެއް ހަދަންދެން ހުންނާނެ މީހެއްނޫން ” ޔާނާ ފެންފޮދެއް އަނގަޔަށް އަޅަމުން ބުނެލިއެވެ. ” ރަނގަޅު. ތިހެން ހުންނަން ވާނީ. އަންހެނުންނަކީ ބަލި ކަށި ބައެއްކަމަށް ހެދިގެން ތިބޭތީ މިއުޅޭ ބައެއް މީހުން ފޮނިވެގެން އުޅެނީ ” ސީމާ ބުނެލިއެވެ.

” ޔާނާ ކޮބާ އެއްކަލަ ކުއްޖާ ” ސީމާ ސުވާލުކޮށްލިއެވެ. ” ކާކު ؟ ” ޔާނާ ހައިރާންކަމާއެކު އަހާލިއެވެ. ” ދެން އެއްކަލަ ކުއްޖާއޭ ބުނީމާ ޔާނާއަށް އެނގޭނެ ކަމަށް އަހަރެން ހީކުރީ. އެކަމަކު ދެން ނޭންގެންޏާ އަޅާނުލާ ” ސީމާ ބުނެލިއެވެ. ” ދެން އެއްކަލަ ކުއްޖާއޭ ބުންޏަސް ނޭންގިދާނެ ދޯ ” ޔާނާ ސޯފާއިން ތެދުވެގެން އައިސްއަލަމާރިއާ ދިމާއަށް ހިނގައި ގަންނަމުން ބުނެލިއެވެ. ” ރަސްފަންނު ” ސީމާ ބުނެލިއެވެ. ” އޯހް… އެކުއްޖާދޯ. ނޭންގެ ވީތަނެއް. ފަހުން ނުދެކެން. އެހެން ނޫނަސް އަހަރެން އެކުއްޖާ ހޯދާކަށް ނޫޅެން ވިއްޔާ ” ޔާނާ ފެންފުޅި އައިސް އަލަމާރިއަށްލާ ދޮރު ލައްޕާލަމުން ބުނެލިއެވެ. ” ނުހޯދާ ކަމެއް ނޭންގެ. އެދުވަހުވެސް ކޮރާ ހިނގަމުން ވެސް ބަލަމުން ދިޔަ ވާހަކަ ވިއްޔާ ޔާނާ ބުނީ ” ސީމާ ހީގަންނަމުން ބުނެލިއެވެ. ” އަދި އެހެން ބަލާލިޔަސް އެ ނުވާނެދޯ އަހަރެން ހޯދަނީ ކަމަކަށް. އަހަރެން ހަމަ އެކަނި ބުނީ އެ ކުއްޖާ ރީތި ވާހަކަ ” ޔާނާ ބުނެލިއެވެ. ” ސީމާ އަހަރެން ވަގުތެއް ވީމާ ހަބަރެއް އަދި ވާނަން އިނގޭ. މިދަނީ ކޮޓަރިތެރެ ސާފުކޮށްލަން ” ޔާނާ ބުނެލިއެވެ. ” އަހަރެން އެއްޗެއް ބުނެފާނެތީދޯ އަވަހަށް ވާހަކަ ތި ބަދަލުކޮށްލަނީ ” ސީމާ ބުނެލިއެވެ. ” މިކަމުގަ ދެން މީހަކު ފޮރުވާނެ އެއްޗެއް ނެތެއްނު. ތި ވަހަކަ ދައްކަން އަހަރެން ގުޅާނަމޭ އަދި ” ޔާނާ މިހެން ބުނެ ފޯން ކަޑާލިއެވެ.

” ކޮބާ އެ ދެކުދިން ” ތައުފީގު އައިސް ކާމޭޒް ކައިރީ ހުރި ގޮޑީގައި އިށީންނަމުން ސަކީލާ ކުރެން އަހާލިއެވެ.  ” ބޭރަށް ދެމީހުން އެކުގައި ނިކުތީ ” ހެދިކާ އަޅާފައިން ތަށި ކަމޭޒް މަތީ ބަހައްޓަމުން ސަކީލާ ބުނެލިއެވެ. ” މިދުވަސްކޮޅު ނުވާނެދޯ އެމީހުން ބޭރަށް ދިޔަދީގެން. މިހާރުވެސް ކޮވިޑް ކަންތައް އެހާ ބޮޑު. އަބަދު ޓީވީތަކުން އެ ގޮވަނީ ގޭގަ ތިބެން ” ތައުފީގު ކަންބޮޑުވެގެން ސަކީލާއާ ދިމާއަށް ބުނެލިއެވެ. ” ތިބުނާ ވަރަކަށް ވެސް އެ ކުދިން ނުދޭ ބޭރަކަށް ” ސަކީލާ ބުނެލިއެވެ. ” ތައުފީގު ސައިބޯން ފަށާ. އަހަރެން އަންނާނަން ޝުހާދަށް ގުޅާލާފަ ” ސަކީލާ މިހެން ބުނެފަ ގޮސް ކޮޓަރިއަށް ވަނެވެ. ހަމަ އެވަގުތު ވިދާންއާ ޝުހާދުއައިސް ގެއަށް ވަނެވެ. ” ކީކޭ މަންމާ ” ޝުހާދު ފޯން ނަގާ ކަންފަތުގައި ޖަހާލަމުން ބުނެލިއެވެ. ” ކޮންތާކު ތިއުޅެނީ. ބައްޕަ ދަރިފުޅުމެން ގޭގަ ނެތުމުން އެކަމާ ހިތްހަމަ ނުޖެހިފަ އިނީ. އަވަހަށް ގެއަށް އާދޭ ” ސަކީލާ ބުނެލިއެވެ. ” ގޭގަ މިހުރީ މަންމާ ” ޝުހާދު ފޯން ޖީބަށް ލަމުން އައިސް ސޯފާގައި އިށީނެވެ. ވިދާން މަޑުވެސް ކޮށްނުލާ ދިޔައީ ކޮޓަރިއަށެވެ. ” ދަރިފުޅާ އާދޭ ސައިބޯން. ކޮބާ ވިދާން ” ސަކީލާ ކޮޓަރިން ނިކިމެ، ސޯފާގައި އިން ޝުހާދު ފެނުމުން ބުނެލިއެވެ. ” ދާން ކޮޓަރިއަށް ވަނީ ” ޝުހާދު ސޯފާއިން ތެދުވެގެން އަންނަމުން ބުނެލިއެވެ. ” އާދޭ ސައިބޯން ވިދާން ” ސަކީލާ ޝުހާދުގެ ކޮޓަރީ ދޮރު ހުޅުވަލިއިރު، ކުޑަ ދޮރުން ބޭރު ބަލަން ހުރި ވިދާން ފެނުމުން ސަކީލާ ބުނެލިއެވެ.

” ދަރިފުޅުމެން އެހާވަރަށް ބޭރަށް ނުދާތި ” ވިދާން އައިސް މޭޒް ކައިރީ އިށީނުމުން ތައުފީގު ބުނެލިއެވެ. ” ނުދަމޭ ބައްޕާ. ދެން އަބަދު ގޭގަ ތިބެންވީމާވެސް ވަރަށް ފޫހިވޭ. އެހެންވެ ދާން ބަލަން އިން ފިލްމު ބަލާ ނިމުނީމާ ބޭރަށް ނިކުމެލީ ” ޝުހާދު ބުނެލިއެވެ. ” ބައްޕައަށް ވެސް އެނގޭ އަބަދު ގޭގަ ތިބެންވީމާ ފޫހިވާނެކަން ވެސް. އެކަމަކު ވެސް މިކަމުން ސަލާމާތްވާނީ އެންމެން މަސައްކަތް ކުރި ވަރަކުން ” ތައުފީގު ދެތިން ހެދިކާއާ ސައިތަށި ބޮއިގެން ތެދުވަމުން ބުނެލިއެވެ. ” ވިދާން މަންމަ އަތު ހުންނާނެ ބައްޕަ ދީފަ ހުރި ރުފިޔާ. އެ ނަގާ އިނގޭ ” ތައުފީގު އަތްދޮންނަން ހުރެ ބުނެލިއެވެ. އެވަގުތު ވިދާން ބަލާލީ ޝުހާދުގެ މޫނަށެވެ. ” ބައްޕާ އަހަންނަށް ކޮބާ؟ ” ވިދާން ބަލާލުމުން ޝުހާދު ބުނެލިއެވެ. ” ހުންނާނެ ދެކުދިންނަށް ވެސް ދީފަ ” ތައުފީގު ތުވާލިން އަތް ފޮހެލަމުން ބުނެލިއެވެ. ” ހާދަ ރީތިކޮށް ބޯހަދާލައިގެން ތީނީ ” ތައުފީގު ޝުހާދު ކައިރިން ކޮޓަރިއާ ދިމާއަށް ދަމުން ޝުހާދުގެ އިސްތަށިގަނޑު ހާވާލަމުން ބުނެލިއެވެ. ” ދެން ބައްޕާ ” ޝުހާދު އެއްފަރާތަށް ބޯ ދުރުކޮށްލަމުން ބާރަށް ބުނެލުމުން ތައުފީގު ހެމުން ގޮސް ކޮޓަރިއަށް ވަނެވެ. ” މަންމަ ސައި ނުބޮންތަ؟ ” ތައުފީގު ދިޔުމުން ވިދާން ސަކީލާއަށް ބަލާލަމުން ބުނެލިއެވެ. ” މަންމަޔަށް ކާން އިށީދެވޭނީ ބައްޕަ އަށް ދުފަން ދީފަ. އެހެން ނޫނީ އިރު އިރުކޮޅާ ގޮވާނެ. ދެން ދަރިފުޅުމެން ސައިބޮއިގެން ތެދުވީމާ މަންމަވެސް ސައިބޯނަން ” ޝުހާދު ކައިގެން ތެދުވުމުން ތަށި މޭޒް މަތިން ނަގަމުން ސަކީލާ ބުނެލިއެވެ. ” ކޮބާ ދުފުމެއްވެސް ނެތްތަ؟ ” ތައުފީގު ކޮޓަރިން ނިކުންނަމުން ބުނެލިއެވެ. ” ނޫނޭ. ހުންނާނެ ތައްޔާރު ކޮށްފަ. މިއަންނަނީ ހިފައިގެން ” ސޯފާއާ ދިމާއަށް ދިޔަ ތައުފީގަށް ބަލާލަމުން ސަކީލާ ބުނެލިއެވެ.

” ބައްޕަ ކީއްކުރަންދޭ ރުފިޔާ އެއްތަ އެއީ ” ވިދާން ޝުހާދު ކުރެން އަހާލިއެވެ. ” ނޭންގެ އަހަންނަކަށް. ބައްޕަ ގާތުގަ ގޮސް އަހާބަލަ ” ޝުހާދު ބުނެލިއެވެ. ” އަހަންނަކަށް ނުކެރޭނެ އަހާކަށް ” ވިދާން އެނދުގައި ހަމަ ޖެހިލަމުން ބުނެލިއެވެ. ” އެހެން ވިއްޔާ ތިހުރިހާ ވާހަކަ އެއް ނުދައްކާ ހިފާބަލަ ” ޝުހާދު ވިދާނަށް ބަލާލަމުން ބުނެލިއެވެ. އެކަމަކު އަބަދު ބައްޕަ ވެސް އެހެން ރުފިޔާ ދޭނީ ކިހިނެއްތަ؟. އަހަރެން ވެސް މީ މިހާރު ކުޑަ ކުއްޖެއް ނޫނެއްނު. އަހަރެން ބޭނުން ޖޮބަކަށް ވެސް ދާން ” ވިދާން ކައިރީގައި އޮތް ބާލީސް ނަގާ އުނގަށްލަމުން ބުނެލިއެވެ. ” އެހެންތަ؟. ކޮންއިރަކު ދާން ބޮޑުވީ. އަހަރެން ހީކޮށްގެން މިހުންނަނީ ދާން ތި އަދިވެސް ހަމަ ކުޑަ ކުއްޖެއް ކަމަށް ” ޝުހާދު އެނދު ކައިރީ ހުރެފަ، އެނދުމައްޗަށް ބައްޑުން ވެއްޓި ގަންނަމުން ބުނެލިއެވެ. ” ހެޔޮ ކޮންމެ އެއްޗެއް ހީކުރިޔަސް. އަހަރެން މިހާރު ބޭނުން ޖޮބަކަށް ދާން. އަހަރެންގެ ވެސް އަމިއްލަ ޒިންމާތަކެއްވޭ. އަޅާ ނުލިޔަސް، ވި ހާލެއް ނުބެލިޔަސް އަދި އަހަރެންގެ މަންމަ ވެސް އެބަހުރި ” ވިދާން ބުނެލިއެވެ. ” އަސްލު ރަނގަޅު ވިސްނުމެއްތީ. ހިނގާ ތިކަމާ އުޅެން. އަހަރެން ވެސް ތިކަމާ ވިސްނާތާ މިހާރު ދުވަސް ކޮޅެއްވެއްޖެ. އަބަދަކު މަންމަޔާ ބައްޕަ ދިނީމާ ކައިގެން ވެސް ނޫޅެވޭނެއްނު ” ޝުހާދު ބުނެލިއެވެ. ” އެހެންވީމާ ކޮންތާކުން ބަލާނީ ޖޮބެއް ލިބޭތޯ ” ވިދާން އަހާލިއެވެ. ” ހިނގާ އެއާރޕޯޓުން ބަލަމާ. ލިބިއްޖެނަމަ އެއީ ވަރަށް ސަޅި ޖޮބް ހުރި ތަނެއް ” ޝުހާދު ބުނެލިއެވެ. ” އެނބަ އަންނަން ފާހާނާއަށް ވަދެފަ ” ވިދާން ބުނެލިއެވެ. ” ދެން ނުބުންޏަސް ދާންވީންނު. ނޫނީ އަހަރެން ދާންވީތަ ތަށިމަތީ ބައިންދަން ” ޝުހާދު ހީގަންނަމުން ބުނެލިއެވެ. ” އަނގައޭ ކިޔާބަލަ ” ވިދާން އެނދުން ފޭބުމަށްފަހު، އެނދުމަތީ އޮތް ބާލީސް ޝުހާދާ ދިމާއަށް އެއްލަމުން ބުނެލިއެވެ. އަދި ގޮސް ފާހާނާއަށް ވަނެވެ.

” ސަލީމާގެ ހަބަރެއް ނުވޭތަ؟ ” ސަކީލާ ބަނދިގޭގެ ކަންތައް ނިންމާލުމަށްފަހު އައިސް ތައުފީގު ކައިރީ ސޯފާގައި އިށީނުމުން ސުވާލުކޮށްލިއެވެ. ” އާނ… އެއީ ހަބަރެއް ވާނެ މީހެއްނޫން. އެއަށް ވުރެއް ބޮޑަށް އޭނަ ވިދާން ދެކެ ރުޅި އާދޭ ” ސަކީލާ ދުފާލަމުން ބުނެލިއެވެ. ” އެކަމަކު އެހެން ހަނދާކަށް ނުވާނެދޯ. ވިދާންގެ އޮތީ އެކަމުގަ ކޮށް ކުށެއް. ކުރި ކަމެއް ކުރީ ވެސް ސަލީމާދޯ ” ތައުފީގު ސަކީލާއަށް ބަލާލަމުން ބުނެލިއެވެ. ” އޭނައަށް ވެސް އެނގޭ ކުރިކަމެއް ކުރީ އޭނަކަން. އެކަމަކު އެކަމުގެ ހުރިހާ ރުޅިއެއް ފެށުނީއްސުރެއް ބާލަމުން އެދަނީ ކުށެއް ނެތް ވިދާނަށް. ހެޔޮވެސް ނުވާނެ އެހެން ހަދާކަށް ” ސަކީލާ ވެސް ކަންބޮޑުވެފާވާ ހާލު ބުނެލިއެވެ. ” ވިދާން އަމިއްލައަށް ދާން ނުބުނާހާ ހިނދަކު ވިދާން މިގެއިން ފޮނުވަނުލާތި. އެއީ ހަމަ ޝުހާދު ފަދައިން އަހަރެންގެ ދަރިއެއް ” ތައުފީގު ބުނެލިއެވެ. ” އަހަރެން ވިދާން ފޮނުވާ ނުލާނަން. ތައުފީގު ތިހެން ހުރިއްޔާ އަހަރެން ތިކަމުގަ އެއްވެސް އެއްޗެއް ނުކިޔާނަން ” ސަކީލާ ބުނެލިއެވެ.

ވިދާން ފާހާނާއިން ނިކުމެގެން އައިސް އަލަމާރީ ލޯގަނޑު ކުރިމަތީ ހުރެ ހަނށިގަނޑަށް ބަލަން ފެށިއެވެ. ” ސާބަހޭ. ރީއްޗޭ ރީއްޗޭ. ތިހާ ވަރަށް ނުބެލިޔަސް ” ޝުހާދު ވިދާނަށް ބަލާލުމަށްފަހު ބުނެލިއެވެ. ” ރީތި ތޯއެއްނޫން މިބަލަނީ ” ވިދާން ބުނެލިއެވެ. ” ދެން ކޮންއެއްޗެއް ހޯދަން އަރިއަރިއަށް ތިބަލަނީ ” ޝުހާދު ތެދުވެ އެނދުގައި އިށީދެލަމުން ބުނެލިއެވެ. ” ފަލަ ވާހެން ހީވާތި މިބަލަނީ ” ވިދާން ބުނެލިއެވެ.  ” އަޖައިބެއްތީ. ފާހާނާއަށް ވަތްތަނުން ފަލަ ވީތަ؟. ތީ ކިހިނެއްވީ ކަމެއްތަ؟ ” ޝުހާދު ދިމާކުރާ ފާޑަކަށް ބުނެލިއެވެ. ” ސާބަސް. ދެންމެފާހަގަ ވީކަމެއް ނޫން. ކުރިން ވެސް އަހަރެން ފަލަ ވާހެން ހީވޭ. ހިނގަބަލަ ފަތިހު ދުވަންދާން ” ވިދާން އައިސް އެނދުގައި  އިށީންނަމުން ބުނެލިއެވެ. ލޮކްޑައުން ގަޑި އެއީ ” ޝުހާދު ބުނެލިއެވެ. ” ފަތިހުއޭ ދޯ މިބުނީ. މެންދަމު ދޭއް ޖެހީމާދާ ވާހަކަ އެއް ނޫން މިބުނީ. ފަހެއްގެ ފަހުން ކަސްރަތަށް ދެވޭ ވާހަކަ ވެސް ބުނެފައެއްނު އޮތީ ” ވިދާން ބުނެލިއެވެ. ” އެކަމަކު އަހަރެންގެ ބޫޓެއްވެސް ނުހުންނާނެ. ދެން ކިހިނެއްދާނީ ” ޝުހާދު ބުނެލިއެވެ. ” ބައްޕަ ދެންމެގަ ބުންޏެއްނު ރުފިޔާގެ ވާހަކަ. ހިނގާ މަންމަ ގާތުގަ ބުނަން ” ވިދާން ބުނެލިއެވެ. ” މަޑުކުރޭ. އަންނާނަން މަންމަ ގާތުގަ ބުނެފަ ” މިހެން ބުނެ ޝުހާދު ކޮޓަރިން ބޭރަށް ދިޔުމަށް އެނދުން ތެދުވިއެވެ.

” ބައްޕަ ބުންޏެއްނު ރުފިޔާގެ ވާހަކަ ” ޝުހާދު ސިޓިންރޫމް ސޯފާގައި އިށީންނަމުން ބުނެލިއެވެ. ” ކިހިނެއްވީ ދެން ” ތައުފީގު ބުނެލިއެވެ. ” އެއީ ދާން އާ ދެމީހުން ފަތިހު ދުވަން ދާންވެގެން ބޫޓެއް ގަންނަން ވެގެން ” ޝުހާދު ބުނެލިއެވެ. ” ސަކީލާ ދީ ދެކުދިންނަން ރުފިޔާ ” ވަގުތުން ތައުފީގު ބުނެލުމުން ސަކީލާ ރުފިޔާ ބަލާ ކޮޓަރިއަށް ދިޔައެވެ. ” އެކަމަކު ދަރިފުޅާ ބޭރުގަ އުޅޭއިރު ވަރަށް ބަލައިގެން އުޅޭތި. އަދިވެސް ކޮވިޑް ބައްޔަށް ވާއެއް ނުވާއެއް ނޭންގޭ ” ސަކީލާ ދިޔުމުން ތައުފީގު ބުނެލިއެވެ. ” ބަލައިގެންނޭ އުޅެނީ ބައްޕާ. އެހާ ކަންބޮޑުނުވެބަލަ ” ޝުހާދު ތައުފީގަށް ބަލާލަމުން ބުނެލިއެވެ. ” ދަރިފުޅު ތިހެން ބުންޏަސް ބައްޕަ ވިސްނާނެދޯ. ބައްޕަގެ ހުރި ހަމައެކަނި ދަރިއަކީ ތި ” ތައުފީގު އޯގާތެރިކާއެކު ބުނެލިއެވެ. ” މިއޮތީ ދެހާސް ” ސަކީލާ ރުފިޔާ ގެނެސް ޝުހާދަށް ދިއްކޮށްލަމުން ބުނެލިއެވެ. ” ކުއްޖަކަށް ހާހެއްވީމާ ބޫޓް ގަނެވޭނެއްނު ” ޝުހާދު ރުފިޔާގައި ހިފުމުން ތައުފީގު ބުނެލިއެވެ. ” މާ ރީއްޗަށް ވެސް ވާނެ ” ޝުހާދު ސޯފާއިން ތެދުވަމުން ބުނެލިއެވެ. އަދި ގޮސް ކޮޓަރިއަށް ވަނެވެ.

” ހިނގާ ދާން. ވަރަށް އަސްކޮށްފިއްޔާ ގަނެވޭނީ. މިތާ ކައިރީ ހުރި ފިހާރަ އަދި ހުޅުވާފަ ހުންނާނެ ” ޝުހާދު ކޮޓަރިއަށް ވަދެ ވިދާންގެ އެއްހާސް ރުފިޔާ ދެމުން ބުނެލިއެވެ. އަދި ދެމީހުން އެކުގައި ކޮޓަރިން ބޭރަށް ނިކުތެވެ. ” ދަރިފުޅާ މިހާރުތަ ތިދަނީ ފިހާރައަށް. އެހެރަ ހައެއްޖަހާ ބޮޑުވީ މީހާރު ” ފާރުގައި ހުރި ގަޑިއަށް ބަލާލަމުން ސަކީލާ ބުނެލިއެވެ. ” މިތާ ކައިރީ ހުރި ފިހާރައަށް މިދަނީ. އަދި އެފިހާރަ ބަންދު ނުކުރާނެ ” ޝުހާދު ފައިވާނަށް އަރަމުން ބުނެލިއެވެ. ” ދަރިފުޅާ ޝުހާދު މާސްކު ކޮބާ؟ ” ތައުފީގު އަހާލިއެވެ. ” އަވަސްކުރަން ހަދައިގެން އެ ވެސް ނުލާ މިއުޅެނީ ” ޝުހާދު އަނެއްކާ ވެސް ކޮޓަރިއާ ދިމާއަށް ދަމުން ބުނެލިއެވެ. ” ދަރިފުޅުގެ މާސްކު ކޮބާ ” ވިދާންއާ ދިމާއަށް ބަލާލަމުން ތައުފީގު އަހާލިއެވެ. އެވަގުތު ވިދާން ޖީބުން މާސްކު ނަގާ ދައްކާލިއެވެ. ” މާސްކް ނަގައިގެން ބޭރުގަ ނޫޅޭތި ” ޝުހާދު ކޮޓަރިން މާސްކު ހިފައިގެން އައުމުން ސަކީލާ ބުނެލިއެވެ.

ވިދާން އާއި ޝުހާދު ފިހާރަ ދިޔުމުން ސަކީލާ އައިސް ތައުފީގު ކައިރީ ސޯފާގައި އިށީދެލިއެވެ. އެވަގުތު ސަކީލާގެ ފޯން ރިންގް ވަންފެށިއެވެ. ” ހަލޯ ” ސޯފާގެ ކުރިމަތީ ހުރި މޭޒްމަތީގައި އޮތް ފޯން ނަގާ ސަކީލާ ކަންފަތުގައި ޖައްސާ ބުނެލިއެވެ. ” ތައުފީގު ރާއްޖޭގައި އެބައުޅޭތަ ؟ ” އެކޮޅުން ވާހަކަ ދެއްކި މީހަކު ބުނެލިއެވެ. ” ތީ ކާކު ” ހައިރާންކަމާއެކު ސަކީލާ އަހާލިއެވެ. ” މީ ހުރާ އާދަނު ” އާދަނު ބުނެލިއެވެ. ” ހާދަ ދުވަހެއް ކޮށްލާފަ ތި ގުޅާލީ. އަނެއްކާ ކިހިނެއްވީ ” ސަކީލާ ހިނިތުން ވެލަމުން ސުވާލުކޮށްލިއެވެ. ” ދެން ދިރި އުޅުމުގެ ކަންތައްތައް ހުންނަ ގޮތުން ހަބަރެއް ނުވެވި ދިޔައީ. ތައުފީގު ގާތުގައި ވާހަކައެއް ދައްކާލަން މިގުޅާލީ. ތައުފީގު ރާއްޖޭގައި އެބައުޅޭތަ؟ ” އާދަނު އަނެއްކާ ވެސް އަހާލިއެވެ. ” އާނ… ޝުހާދުގެ ކިޔެވުން ނިމުމާއެކު ދަތުރު ކުރުން ހުއްޓާލާ މިހާރު މާލޭގަ ހުންނަނީ. މަޑުކޮށްލާ ތައުފީގު އަތަށް ފޯނު ދޭނަން ” ސަކީލާ ބުނެލިއެވެ. ” ކާކު ” ސަކީލާ ކަންފަތާ ފޯން ދުރު ކޮށްލުމުން ތައުފީގު ޓީވީ ބަލަން އިދެފަ އަހާލިއެވެ. ” އެއްކަލަ ހުރާ އާދަންބެ. ތައުފީގު ގާތުގައި ކޮންމެވެސް ވާހަކަ އެއް ދައްކާލަން ވެގެން ގުޅާލީޔޯ. ވާހަކަ ދައްކާބަލަ ” މިހެން ބުނެ ސަކީލާ ތައުފީގަށް ފޯން ދިއްކޮށްލިއެވެ. ” އާދަނާ… ހާދަ ދުވަހެއް ކޮށްލާ ތިގުޅާލީ. ކިހިނެއްތަ ހާލު އަހުވާލު ” ތައުފީގު ފޯން ކަންފަތުގައި ޖެއްސުމާއެކު ބުނެލިއެވެ. ” މުޅިއަކުން ހާލަތު ރަނގަޅެއް ވެސް ނޫން. އެކަމަކު އަދި އުޅެލެވޭ ވަރުވޭ ” އާދަނު ބުނެލިއެވެ. ” ކިހިނެއްވީ އަނެއްކާ ” ތައުފީގު އަހާލިއެވެ. ” އަސްލު މި ގުޅާލީ ތައުފީގު ގާތު ކަމަކުވެސް އެދޭށާއެކު ” އާދަނު ބުނެލިއެވެ. ” އަވަހަށް ބުނޭ. އަހަރެންނަށް ވާން އޮތް ކޮންމެ ކަމެއް އުފަލާއެކުގަ ކޮށްދޭނަން ” ތައުފީގު ބުނެލިއެވެ. ” ބަލި ހާލަތު ހުރި ގޮތުން ޑޮކްޓަރަށް ދައްކާލަން ވެސް ޖެހޭތީ މާލެ ގޮސް ތި ގޭގަ ހުރެވޭނެތޯ އަހާލަން ވެގެން ” އާދަނު ބުނެލިއެވެ. އެހެން އާދަނުއަށް ބުނެވުނީ ވެސް ދެތިން ފަހަރު ކެއްސާލުމަށްފަހު އެވެ. ” ތީ ދެން އާދަނު އަހާ ކަހަލަ ވާހަކައެއް ވެސް ނޫނެއްނު. އާދަނު ބޭނުން ދުވަހެއް ވަން ދެން ހަމަ އައިސް ހުންނަންވީ. އެކަމަކު ކޮވިޑްގެ މިދުވަސް ކޮޅު ވަރަށް ބަލައިގެން އުޅެންވާނީ ” ތައުފީގު ބުނެލިއެވެ. ” އެހެންވީމާ އެންމެ އަވަހަށް ފުރާ އެއްޗަކުން މާލެ ދާންނަން ” ހިތްހަމަ ޖެހިގެން ހުރި އާދަނު ބުނެލިއެވެ. ” އެންމެ ރަނގަޅު. އެކަމަކު ފުރަމުން ގުޅާލާތި. އޭރުން ބަލާ ދެވޭނީ ވެސް ” ތައުފީގު މިހެން ބުނެ ފޯން ކަނޑާލިއެވެ.

(ނުނިމޭ)

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.