ދިމްޔާ (9 ވަނަ ބައި)

އާހިލްމެންގެ ގާތު ހުރެފައި ރާކިން ލަސްހިނގުމެއްގައި ދިމްޔާގެ ގާތަށް ގޮސް މަޑުކޮށްލިއެވެ. ރާކިން މަޑުމަޑުން ދިމްޔާގެ އަތުގައި ހިފާލުމުން ދިމްޔާ ސިހިފައި ބަލާލިއެވެ. އޭރު ރާކިން ހުރީ ސީދާ ދިމްޔާގެ ދެލޮލަށް ބަލަހައްޓައިގެންނެވެ. އެހާގާތުން ރާކިންގެ މޫނު ފެނި އެތޫނުދެލޮލުގައިވި ވިދުވަރަކުން ދިމްޔާގެ ގައިން ހީބިހި ނަގައިގެން ދިޔައެވެ.
“އައި ލަވް ޔޫ ދިމް…. ވިލް ޔޫ ބީ މައި ގާރލްފުރެންޑް…؟؟ ކުއްލިއަކަށް ގެނައި ހަރަކާތަކާއެކު ދިމްޔާގެ ކުރިމައްޗަށް ތިރިވެ އަތުގައި އޮތް ރަތް ފިނިފެންމާ ދިއްކޮށްލަމުން ރާކިން ދިމްޔާއަށް ލޯބިހުށަހެޅިއެވެ. ދިމްޔާ ހުރީ ބުނާނެ އެއްޗެއް ނޭނގި ހުއްޓުންއަރާފައެވެ. ކުރިމަތިން ފެންނަމުން ދިޔަ މަންޒަރު ޤަބޫލުކުރަން ދަތިވެފައެވެ. އޭރު ދެން ތިބި މީހުންވެސް އެމީހުނަށް ބަލަހައްޓައިގެން ތިބީ ދިމްޔާ ރާކިންއަށް ދޭނެ ޖަވާބެއް އަޑުއަހާލާހިތުންނެވެ. ދިމްޔާ އަދިވެސް އެހުރިގޮތަށް ރާކިންއަށް ބަލަހައްޓައިގެން ހުރީއެވެ.
“ދިމް… އަހަންނަށް ޖަވާބެއް ދީބަލަ…” ދިމްޔާ އެގޮތަށް ހުންނަން ފެށުމުން ދިމްޔާގެ އަތަށް ފިތާލަމުން ރާކިން ބުނެލިއެވެ. ދިމްޔާއަށް ބަލާލެވުނީ ރުހާއާއި ދިމާއަށެވެ. ރުހާ ބޮލުގެ އިޝާރާތުން ރާކިންއަށް އަވަހަށް ޖަވާބެއް ދިނުމަށް އަންގާލިއެވެ.
“ދެން ޖަޒްލީއޯ….؟؟” ކުއްލިއަކަށް އިއްޔެގެ ހާދިސާ ހަނދާންވުމުން ދިމްޔާއަށް ބުނެލެވުނެވެ. ދިމްޔާ މިހެން ބުނުމުން ރާކިންއިނީ ވާނުވާ ނޭނގިފައެވެ. އާހިލްމެންނާ ދިމާއަށް ބަލާލެވުނުވަގުތު ދެމީހުން އެހެންދިމާއެއް ބަލާލާފައި ބޯކަހާލި ގޮތުން އެމީހުން ދިމްޔާގެ ގާތު ކޮންމެވެސް އެއްޗެކޭ ކީކަން ރާކިންއަށް ދެނެގަނެވުނެވެ. ޖަޒްލީވެސް ހުރީ ދިމްޔާކިޔަން އުޅޭ އެއްޗެއް ވިސްނާގަންނަން ނޭނގިފައެވެ. ރުހާއަށް ހެވެން އުޅުމުން އަނގަމަތީ އަތް އަޅާލައިގެން އިނެވެ.
“ދިމް މިވަގުތު އިތުރު ވާހަކައެއް ނުދައްކާ އަހަންނަށް ޖަވާބެއް ދީފާނަންތަ….؟؟؟ އަހަރެން ދިމް ދެކެ ވަރަށް ވަރަށް ލޯބިވޭ…. ދެން އިތުރަށް ދިމްއާއި ނުލާ އަހަންނަކަށް ނޫޅެވޭނެ… ދިމްގެ ލޯބީގެ އަވާގައި ޖެހި އަހަރެންގެ ހިތް ދީވާނާވަނީ…. އަހަންނަކަށް ހިޔެއް ނުވެ ދެން އަހަންނަކަށް ދުވަހަކުވެސް އެހެންމީހަކު ދެކެ ލޯބިވެވޭނެހެންނެއް…. ބުނެބަލަ އަހަންނާ ރައްޓެހިވާނަންތަ…؟؟؟” އަނެއްކާވެސް ދިމްޔާގެ އަތަށް ފިތާލަމުން އަނެއް އަތުގައި އޮތްމާ ދިމްޔާއަށް ދިއްކޮށްލަމުން ރާކިން ވާހަކަދެއްކިއެވެ. ރާކިން ވާހަކަ ދައްކަމުން ދިޔައިރު ދިމްޔާ ހުރީ ވަރަށް ފަރުވާތެރިކަމާއިއެކު ރާކިންގެ މޫނަށް ބަލަހައްޓައިގެންނެވެ. އެމޫނުމަތީގައިވާ އަސަރުތަކުން ރާކިން ދިމްޔާދެކެ ލޯބިވާވަރު ހާމަވާން ހުއްޓެވެ. ދިމްޔާ ދެން ބަލާލީ ޖަޒްލީއަށެވެ. ޖަޒްލީގެ މޫނަމަތީގެ ކުލަވަރުތަކުން ރާކިންއާއި އޭނާއާއި ގުޅުމެއް އޮތްހެނެއް ހިއެއް ނުވެއެވެ. ދިމްޔާވިސްނާލިއެވެ. އެއަށްފަހު ރާކިން ދިއްކޮށްފައިވާ މަލުގައި ހިފާލަމުން ބޮލުގެ އިޝާރާތުން އާނއެކޭ ބުނެލިއެވެ. އޭރު އޭނާގެ ތުންފަތަށް ވަނީ ލަދުރަކި ހިނިތުންވުމެއް ވެރިވެފައެވެ. ދިމްޔާގެ ޖަވާބާއިއެކު ރާކިންއަށް ކޮޅަށް ތެދުވެވުނު ގޮތެއްވެސް ނޭނގުނެވެ. އޭރު ދިމްޔާ ހުރީ ލަދުން އިސްޖަހާލައިގެންނެވެ.
“އަހަރެން ވަރަށް ވަރަށް އުފާވެއްޖެ…. އައިލަވް ޔޫ ދިމް… އައި ލަވް ޔޫ ސޯ މަޗް….” ދިމްޔާގެ ދަތް ދޮޅީގައި ހިފައި އުފުލާލަމުން އޭނާގެ މޫނުގައި ދެއަތުން ހިފަހައްޓާލައިގެން ހުރެ ރާކިން ވާހަކަދެއްކިއެވެ. އަދި އެއަށްފަހު ދިމްޔާ ގެނެސް އޭނާގެ މޭގައި ޖައްސާލަމުން ދެއަތުން ދިމްޔާ ވަށާލިއެވެ.
“ޔޭ…..” ކުރިމަތިން ފެންނަމުން ދިޔަ މަންޒަރުން އުނދޯލީގައި ތިބި ރުހާއާއި ޖަޒްލީ އުފަލުންގޮސް ހަޅޭލަވައިގަންނަމުން ކޮޅަށްތެދުވިއެވެ. އިދާމްއާއި އާހިލްވެސް ވީ އުފަލެއްގެ ބޮޑުކަމުން އެކަކު އަނެކެއްގެ އަތްތިލާގައި ޖަހާލިއެވެ.
ޖަޒްލީމެންގެ އަޑަށް ދިމްޔާ އަވަސް އަވަހަށް ރާކިންއާއި ދުރަށް ޖެހިލިއެވެ. އޭރު ލަދުންގޮސް ދިމްޔާގެ މޫނަށްވަނީ މަޑު ފިޔާތޮށިކުލައެއް ވެރިވެފައެވެ. ރާކިން ލާނެއްގޮތަކަށް ހީލައިގެން ދިމްޔާއަށް ބަލަން ހުއްޓެވެ. ރުހާމެން ދިމްޔާމެންގެ ގާތަށް އައިސް އެމީހުނަށް މަރުހަބާ ކިއެވެ.
“ދިމްގެ ގާތުގައި ޖަޒްލީއާއި އަހަންނޭ ކިޔައިގެން ކީކޭ ކީ….؟؟” ރާކިން އޭނާގެ ދެފަރާތުގައި ތިބި އިދާމްއާއި އާހިލްގެ ކަންފަތުގައި ހިފާލަމުން އަހާލިއެވެ.
“މި ރެކްއަށް ނޯންނާނެ ރަނގަޅަކަށް ކަމެއް ކޮށްދިނުމެއްވެސް… ދިމް ރެކް ދެކެ ލޯބިވޭތޯ ޔަގީންކޮށްލަންވެގެން އިއްޔެ ތިދެމީހުން ރައްޓެހިވީއޭ ކިޔައިގެން އަހަރެމެން ދިމް ހައްދާލީއޭ…” އިދާމްގެ ކަންފަތުން ރާކިންގެ އަތް ނައްޓުވާލަމުން ރުހާ ބުނެލިއެވެ.
“އެހެންތަ…. ދެން ކޮބާތަ ތިކުރިކަމަކުން ނުކުތް ނަތީޖާއަކީ….؟؟؟” ދިމްޔާއާއި ދިމާއަށް ލާނެއް ގޮތަކަށް ބަލާލަމުން ދެޖީބަށް އަތްޖަހާލައިގެން ހުރެ ރާކިން އަހާލިއެވެ.
“ނަތީޖާ ވަރަށް ބަރާބަރު…. ދިމްހުރީ ވަރަށް ޖޭވެފަ….” ހިނިގަނޑެއް ޖަހާލަމުން އާހިލް މިހެން ބުނުމުން ދިމްޔާ ލަދުގަތް ނަމަވެސް އާހިލްގެ އަތުގައި ވިކައިގަތެވެ.
“ދެން އެންމެން އަހަރެންގެ ލޯބި ލޯބި ދިމްއާއި ދިމާކުރާނެކަމެއް ނެތް އިނގޭ…” ދިމްޔާ އަތުގައި ހިފައި ގެނެސް ރާކިން އަނެއްކާވެސް ދިމްޔާ އޭނާގެ މޭގައި ލައްކޮށްލިއެވެ. ދިމްޔާވެސް ލަދުގެންފައިވާވަރުން ރާކިންގެ ވަރުގަދަ ހަށިގަނޑުގައި ދެއަތުން ހިފަހައްޓާލަމުން އެތަނަވަސް މޭމަތީގައި މޫނު ފޮރުވާލިއެވެ. އެދެމީހުނަށް ވަގުތުކޮޅެއް ދީފައި ރުހާމެންވެސް ތަންކޮޅެއް ދުރަށް ޖެހެލިއެވެ.

ދުވަސްތައް ހަލުވިކަމާއިއެކު ފާއިތުވަމުންދެއެވެ. ނިމިގެންދާ ކޮންމެ ދުވަހެއްވެސް ވެގެން ދިޔައީ ރާކިންއާއި ދިމްޔާގެ ދެމެދުގައިވާ ވަރުގަދަ ލޯތްބަށް އިތުރު ތާޒާކަމާއި އާރޯކަން ލިބިގެންދާ ދުވަހަކަށެވެ. ދިމްޔާއާއި ރާކިން ލޯބީގެ ގޮތުން ގުޅުން ކަމުގައިވީނަމަވެސް އެމީހުން ކިޔެވުމަށްދޭ ސަމާލުކަން އެންމެ ތަންފުކެއްވެސް ކުޑައެއް ނުވެއެވެ.

ޓެސްޓް ގާތްވެފައި ވުމާއިއެކު އާދައިގެ މަތިން މިއަދުވެސް ދިމްޔާމެން ތިބީ ޖަޒްލީމެންގޭގެ ޓެރެސްމަތީ ގްރޫޕް ސްޓަޑީ ގައެވެ. ދެގަޑިއެއްހާއިރުވަންދެން ކިޔަވަން ތިބުމަށްފަހު ރުހާއާއި އިދާމް ދުރަށް ޖެހިލުމުން ދިމްޔާއާއި ރާކިން ވެސް ދުރަށް ޖެހިލިއެވެ. މޭޒުދޮށުގައި ތިބީ ޖަޒްލީއާއި އާހިލްއެވެ. ލިބުނު ހުސްވަގުތުކޮޅުގައި ޖަޒްލީ ކިޔަން ގެންގުޅުނު ވާހަކަފޮތް ހުޅުވާލައިގެން ކިޔަމުން ދިޔައިރު ހުއްޓުމެއްނެތި މޭޒުމަތީގައި ހުރި ތަށިން ޕޮޕްކޯން ކަމުން ދިޔައެވެ. އާހިލް ހުސްގަނޑަކުން ކޯން އެއް ހަދާލުމަށްފަހު ޖަޒްލީ ފޮތަށް ގެއްލިފައި އިންދައި ތަށީގައި ހުރި ޕޮޕްކޯންތައް ކޯންއަށް އަޅާލުމަށްފަހު ހުސްތަށި ބެހެއްޓިއެވެ. ޕޮޕްކޯން ކޮޅެއް ކާލުމަށްޓަކައި ތަށްޓަށް އަތްލުމާއިއެކު އެތި ކޮޅެއްގައި އަތް ނުޖެހުމުން ޖަޒްލީ ތަށިތެރޭގައި އަތްހިންގާލިއެވެ. އަދި ފޮތުން ނަޒަރު ވަކިކޮށްލަމުން ތަށްޓާއި ދިމާއަށް ބަލާލިއެވެ. ހުސްތަށިހުރުމުން ޖަޒްލީއަށް ދެންބަލާލެވުނީ ކުރިމަތީގައ އިން އާހިލްއަށެވެ. އޭރު ޖަޒްލީގެ ކުރިމައްޗަށްވާގޮތަށް ހުރި ގޮނޑިއަށް ހަށިގަނޑުދަމާލައިގެން ހަމަޖެހިލައިގެން އާހިލް އިނީ ޕޮޕްކޯން ކާލަކާލައެވެ. ޖަޒްލީ ބަލާލުމުން ދެބުމަ ހިއްލާލުމަށްފަހު އަނގަޔަށް މަޖާ ވައްތަރެއް ޖައްސާލަމުން ހީލިއެވެ. ޖަޒްލީވެސް ދެބުމަ ގޮށްޖަހާލަމުން މޭޒުގެ ދަށުގައި އޮތް އާހިލްގެ ފައިގައި ފައިން ބޮނޑިއެއް އަޅުވާލިއެވެ. އެކަހަލަ ކަމަކަށް ނުވިސްނާ އިން އާހިލް އަނގަޔަށް ލާލާ އިން ޕޮޕްކޯންކޮޅު ވިއްސައިގެން ދިޔައެވެ.
“ކީއްތިކުރީ….؟؟؟” ވެރިފައިހުރި ޕޮޕްކޯންތަކަށް ބަލާލަމުން އާހިލް އަހާލިއެވެ.
“ކީއްވެ ތަށި އެއްކޮށް ހުސްކޮށްލީ… އެހެންވެ….” މިހެން ބުނެފައި ޖަޒްލީ އަނެއްކާވެސް ފޮތަށް ނަޒަރު ހުއްޓާލިއެވެ.
“އެމީހުން އެތިބީ އެތާ މާފޮޅުވަން…. މިތާ މިތިބީ އަހަރެމެން ދެމީހުން އެކަނި…. އަނެއްކާ ޖަޒްލީވެސް ތިފެށީ ވާހަކަ ކިޔަން…. ދެން އަހަރެން މިތާ އެކަނި އިނދެގެން ކުރާނެ ކަމެއް ނެތީމަ އެހެންނު ވާނީ….” ޖަޒްލީގެ އަތުގައި އޮތް ފޮތް ދަމައިގަންނަމުން އާހިލް ބުނެލިއެވެ.
ދުރުގައި ތިބި ރުހާމެންގެ އިތުރުން ދިމްޔާމެނަށްވެސް މިމަންޒަރު ފެނުމުން ހެވިފައި ބަލަން ތިއްބެވެ. ނަމަވެސް އާހިލްމެންނަކަށް މިކަމެއް ނޭނގޭނެއެވެ.
“ދެން މި ފޫހި ފޮތް ބާއްވާފައި ހިނގާބަލަ އަހަރެމެން ދެމީހުންވެސް މާފޮޅުވަން…. މިހާރު އަހަރެމެން ދެމީހުންނެއްނު ބާކީ މިތިބީވެސް…. ޖަޒްލީ އަހަންނާ ރައްޓެހިވާންވީއެއްނު….” ޖަޒްލީ ފޮތް އަތްލަން އުޅެން ފެށުމުން ލާނެއް ގޮތަކަށް ހީލަމުން އާހިލް މިހެން ބުނުމުން ޖަޒްލީ ދެލޯބޮޑުކޮށްލަމުން އާހިލްއަށް ބަލާލިއެވެ. އަދި ދެވަނަ ސިކުންތުގައި އާހިލްގެ ފައިތިލަމައްޗަށް ފައިންއަރާ ފިތާލިއެވެ. ވީތަދުން އާހިލްއަށް ހަޅޭލަވައިގަނެވުނެވެ. ޖަޒްލީ ކަންތައް ކުރިގޮތުން ހެމުން ހެމުން ދިމްޔާމެންނާއި ރުހާމެންވެސް އެތަނަށް އައެވެ.
“އަހަންނަށް ކުރިމަތި ލެވުނީމި ވަރަށް ނުރައްކާތެރި ކުއްޖަކާ…. ހީވަނީ އަރާކައިގަންނަން އުޅޭހެން…..” ރާކިންގެ ފުރަގަހަށް ވަންނަމުން އާހިލް މިހެން ބުނުމުން ދިމްޔާމެން ހޭންފެށިއެވެ. މޭމަތީ ދެއަތް ހުރަސްކޮށްލަމުން ޖަޒްލީ އާހިލްއަށް ލޯއަޅާލިއެވެ.
“ދެން އަހަރެން ދެކެ ރުޅިއަޔަސް ނިކަން ޖަވާބެއް ދީބަލަ….” އެހުރިގޮތަށް ހުރެ އާހިލް ބުނެލިއެވެ.
“އަހަންނެއް ނޫޅެން….” ތުން އަނބުރާލަމުން މިހެން ބުނެފައި ޖަޒްލީ ހިނގައިގަތީ އުނދޯއްޔާއި ދިމާއަށެވެ.
“އޯ މައި ގޯޑް…. ޖަޒޫ މީ ކޮންކަމެއް…..” ރުހާގެ އަޑަށް ޖަޒްލީ ފަސްއެނބުރި ބަލާލިއެވެ. އޭރު ރުހާ ހުރީ ޖަޒްލީ ކިޔަން ހުރި ފޮތް ހުޅުވައިގެން އެއަށް ބަލަހައްޓައިގެންނެވެ. މިތަން ފެނުމުން ޖަޒްލީ ދުންޖަހާފައި އައީ ފޮތާ ދިމާއަށެވެ. ނަމަވެސް އޭގެ ކުރިން އާހިލް ރުހާގެ އަތުން އެފޮތް ޖަހައިގަންނަމުން އެއަށް ބަލާލިއެވެ. އޭރު ޖަޒްލީ އައިސް އެހިސާބަށް އަރާހަމަވީއެވެ. އާހިލް ފޮތް ބެލިތަން ފެނުމުން މޫނުމަތީ އަތްއަޅަމުން އަވަސް އަވަހަށް އަނެއް ފަރާތަށް އެނބުރުނެވެ.
“އަހަހާ ހަހާ…. އަހަންނެއް ނޫޅެމޯ…. އެކަމަކު ބަލާބަލަ މިއޮތް ފޮތެއް….” އާހިލް މިހެން ބުނުމުން ދިމްޔާމެންވެސް އެފޮތް ބަލާލިއެވެ. ފޮތުގެ ނިމޭ ހިސާބުގައި އޮތް ހުސްގަނޑެއް ފުރާ އޮތީ އާހިލްގެ ނަން ލިޔެފައެވެ.
އާހިލް އޭނާއަށް ފުރަގަސްދީގެން ހުރި ޖަޒްލީގެ ކުރިމައްޗަށް އަރާ އޭނާގެ މޫނުގައި އަޅާފައި އޮތް ދެއަތް މޫނާ ދުރުކޮށްލިއެވެ.
“އަހަންނަށް މިހާރު ޖަޒްލީގެ ޖަވާބު އެނގިއްޖެ…. އަދި ވަރަށް ނުވާކަމަށް ހަދަން އެބައުޅެއެއްނު….” ޖަޒްލީގެ ކޮލުގައި ހިފައިލަމުން އާހިލް މިހެން ބުނުމުން ޖަޒްލީ އުޅުނީ އާހިލްގެ ގައިގައި ބޮނޑިއެއް އަޅާށެވެ. ނަމަވެސް ޖަޒްލީ ގެ އަތްދަށުން ރެކިގަންނަމުން އާހިލް ދުއްވައިގަތެވެ. އާހިލްގެ ފަހަތުން ޖަޒްލީވެސް ދުއްވައިގަތެވެ. ޓެރެސް ވަށާ ދުވުމަށްފަހު ވަރުބަލިވެގެން ދެމީހުން އުނދޯލީގައި އިށީނެވެ. އެންމެފަހުން ލޯބިވެރިންގެ ލިސްޓަށް އާހިލްއާއި ޖަޒްލީގެ ނަންވެސް އެރީއެވެ.
އާހިލްމެން ޖަހަމުން ދިޔަ ސަކަރާތް ބަލަން ދިމްޔާ އިނީ ހެވިފައެވެ. ރާކިން އިނީ ދިމްޔާއަށް ބަލާށެވެ. އެގޮތަށް ހިނިތުންވެލައިގެން އިންނައިރު ދިމްޔާ ނިކަން ލޯތްބެވެ. ރާކިން ދިމްޔާގެ އަތުގައި ހިފައިލަމުން މަޑުމަޑުން ފިތާލިއެވެ. ދިމްޔާ ރާކިންއަށް ބަލާލަމުން ލޮލުގެ އިޝާރާތުން ކިހިނެއްވީތޯ އަހާލިއެވެ.
“ކަމެއް ނުވެ…. ދިމް ލޯބިކަމުން ހަމަ ބެލެނީ…. ކިތަންމެ ވަރަކަށް ބެލިކަމުގައި ވިޔަސް ފޫއްސެއްނުވާނެ…..” ދިމްޔާގެ ދެލޮލަށް ލޯބިވެތި ގޮތަކަށް ބަލަހައްޓައިގެން އިނދެ ރާކިން ބުނެލިއެވެ. ގަތްލަދުން ދިމްޔާ ރާކިންގެ ކޮލުގައި އިނގިލިތައް ޖައްސާލަމުން އެހެން ދިމާއަކަށް ރާކިންގެ މޫނު އަނބުރާލިއެވެ. އަދި އެއަށްފަހު މޭޒުމަތީގައި އޮތް ފޮތެއް ހުޅުވާލަމުން އެއަށް ނަޒަރު ހުއްޓާލިއެވެ. ރާކިންއަށް ހީލަމުން ދެފަރާތަށް ބޯހޫރާލެވުނީ ރައްޓެހިވެގެން ހަމަހަށްވުރެ ގިނަދުވަސްވީއިރުވެސް ރާކިން ބަލާލުމުން ފުރަތަމަ ދުވަހެކޭ އެއްގޮތަށް މިހާރުވެސް ދިމްޔާ ލަދުން އުޅޭތީއެވެ.

ދުވަސްވަރަކީ ކިޔެވުމުގެ އެންމެ ފަހު މަރުހަލާގެ ދުވަސްވަރު ކަމުން ދިމްޔާމެން ކިޔެވުމަށް ދޭ ސަމާލުކަން އިތުރުކުރިއެވެ. ބޭރުގައި ހޭދަކުރާ ވަގުތުތައް މަދުކޮށް ފަހު އިމްތާހުނަށް ތައްޔާރުވުމަށްޓަކައި އެކުވެރިންނާއި ލޯބިވެރިންނާއިއެކު ހޭދަކުރާ ވަގުތުތައްވެސް މަދުކޮށްލިއެވެ. ކޮންމެ މީހަކުވެސް ބޭނުންވީ ފަހު އިމްތިހާނުން ފުރިހަމަ ނަތީޖާއެއް ހޯދުމަށެވެ. ކުރިމަގު އުޖާލާ އަލި މުސްތަގުބަލެއް ހޯދުމަށްޓަކައެވެ.

“އާހް… އަހަރެންގެ ބޮލުން ހީވަނީ ބައެއް މަދުވެއްޖެހެން… ހާދަ ލުއިވެއްޖޭ….” އެންމެފަހު ޓެސްޓް ނިންމާލުމަށްފަހު ކުލާހުން ނުކުންނަމުން ބޮލުގައި ހިފަހައްޓާލައިގެން ހުރެ ޖަޒްލީ ބުނެލިއެވެ. އެންމެންގެ މޫނުމަތިންވެސް ފެންނަނީ ހިތްހަމަ ޖެހުމުގެ ކުލަވަރެވެ.
“އަސްލުވެސް ދޯ… ދެން ނުޖެހޭނެ ފޮތްތައް ހިފައިގެން ކިޔަވަން އަންނާކަށްވެސް…. ހަހަހާ….” ހިނިގަނޑެއް ޖަހާލަމުން އިދާމް މިހެން ބުނުމުން އެންމެން އެކީ ހޭންފެށިއެވެ. ކޮލެޖުން ނުކުތްގޮތަށް އެމީހުން މިސްރާބު ޖަހާފައިވަނީ ޖޫގޯ ޕޮއިންޓަކާއި ދިމާއަށެވެ. މަޖީދީ މަގު ހުރިގޮތަށް އާޓިފިޝަލް ބީޗާއި ވީދިމާއަށް ފައިބައިގެން ދިޔައިރު އެންމެ ކުރިއަށް ތިބީ ޖަޒްލީއާއި އާހިލްއެވެ. ރުހާއާއި އިދާމް މެދުގައި ހުރިއިރު ރާކިން އާއި ދިމްޔާ ހުރީ އެންމެ ފަހަތުގައެވެ. ދިޔަ މަގުމަތީ ވާހަކަ ދެކެވެމުން ދިޔައީ ކިޔަވާ ނިމުމުން ދެން ކުރާނެ ކަމަކާމެދުއެވެ. އިތުރަށް ކިޔަވާނީތޯ ނޫނީ ވަޒީފާއެއް ހޯދާނީތޯއެވެ.
“އަހަރެމެން މެރީ ކުރާނީދޯ….” ދިމްޔާގެ އަތުގައި ހިފައިލަމުން ކަންފަތްދޮށުގައި ސިއްރު ސިއްރުން ރާކިން މިހެން ބުނެލުމުން ދިމްޔާ ރާކިންގެ އަތުގައި ވިކައިގަތެވެ.
“ކިހިނެއްވީ މެރީ ކުރާކަށް ބޭނުމެއް ނޫންތަ…؟؟؟” ލާނެއް ގޮތަކަށް ހަމައެހާ ސިއްރުން ރާކިން އަހާލިއެވެ. ދިމްޔާ ލަދުން އިސްޖަހާލީ ނޫނެކޭ ބުނުމުގެ ގޮތުންނެވެ. އެވަގުތުކޮޅު ކުރިމަތި ނުބަލާ ހުރެ ދިއުމުން ދިމްޔާގޮސް ޖެހުނީ ރުހާގެ ގައިގައެވެ.
“ގޮވާގޮވާ އަނގައިން ނުބުނުމުން އަހަންނަށް ހީވެއްޖޭ މިމީހުން މިއުޅެނީ އެހެން ދުނިޔެއެއްގައޭ….” ރުހާ ދިމްޔާމެންނާއި ދިމާކޮށްލިއެވެ. އޭރު އެމީހުންނަށް ތިބެވުނީ ޖޫގޯ ވިއްކާތާ ކުރިމަތީގައެވެ.
“ޕިސް ޕިސް… ރެކްވެސް ދޯ… ތީ ދެން ބޮޑުވަރު…. މީމަގުމައްޗޭ…” އާހިލްވެސް ރުހާއާއި ބައިވެރިވެގެން ރާކިންމެންނާއި ދިމާކޮށްލިއެވެ. ދިމްޔާ ލަދުން ރުހާގެ އަތުގައި ހިފާލިއެވެ.
” ކީއްތަވީ…؟؟؟ ދިމްއާއި ވާހަކަ ދައްކަން ވެއްޖާ އަހަންނަށް ނޯންނާނެ ތަނެއް ތަނެއް…” ރާކިންވެސް އަނަގައިން ދެރަނުވާންވެގެން ބުނެލިއެވެ.

އެކުވެރިންނާއިއެކު ވަގުތު ހޭދަކޮށްލުމަށްފަހު ރާކިން ގެއަށް އައިއިރު މަންމައާއި ބައްޕަގެ އިތުރުން އީމަންވެސް ސިޓިންގ ރޫމްގައި އިނެވެ. ރާކިންވެސް ގޮސް އީމަންގެ ގާތުގައި އިށީނުމާއިއެކު ޓެސްޓާއި ބެހޭގޮތުން ރާނިޔާ ސުވާލުކޮށްލުމުން ރަނގަޅުވާނެކަމުގައި ބުނެފައި ރާކިން ސޯފާގައި ލެނގިލިއެވެ.
“ރެކް އަހަރެން މިއުޅެނީ ރަށަށް ގޮސްލަން….” ރާކިންއަށް ބަލާލަމުން އީމަން ބުނެލިއެވެ. ރާކިން ހައިރާންކަމާއިއެކު އީމަން އަށް ބަލާލިއެވެ.
“ކިހިނެއްވީ؟؟؟؟ ކީއްވެ ކުއްލިއަކަށް ރަށަށް ދާން ތިއުޅެނީ….؟؟؟” ހަށިގަނޑު ތެދުކޮށްލަމުން ރާކިން އަހާލިއެވެ.
“މަންމަ ބަލިވެ އުޅޭ ވާހަކަ މިޔަދު އަމަން ގުޅާފަ ބުނި…. އެހެންވެ މަންމަ ކައިރިއަށް ގޮސްލަންކަމަށް…. ރެކްގެ ކިޔެވުންވެސް ނިމުނީނު… ހިނގާ އަހަންނާއެކީ ރަށަށް ގޮސްލަން….” އީމަން މިހެން ބުނުމުން ރީހާންވެސް އީމަންގެ ބަހަށް ތާއީދުކޮށް އެރަށަށް ގޮސްލަންވީނޫންހޭ ރާކިންގެ ގާތުގައި ބުނެލިއެވެ.
“ނޫނޭ… ބައްޕާ…. އަހަރެމެން ދެމީހުން އެއްކޮށް ގޮއްސިއްޔާ މަންމަ ދެރަވާނެ… އަހަރެން ދާނީ މަންމައާއި އެކީގައި…..” ރާނިޔާއަށް ބަލާލަމުން ހިނިތުންވެލަމުން ރާކިން މިހެން ބުނުމުން ރާނިޔާވެސް ހިނިތުންވެލިއެވެ.
“އެންމެ ރަނގަޅު…. ދަރިފުޅަށް ފެންނަގޮތެއް…. ދަރިފުޅު ދާނަން ދޯ އީމަން ފުރުވަން…. މިރޭ ނުވައެއް ޖަހާއިރަށް ލޯންޗް ނައްޓާލާނީ…. ބައްޕަ އެބަޖެހޭ ރައްޓެއްސަކާ ބައްދަލްކޮށްލަން….” ރީހާން މިހެން ބުނުމުން ދާނެ ކަމަށް ބުނެފައި އީމަންއާއި އެކު ރާކިން ހިނގައިގަތީ ބަންގި ގޮވަން ފެށުމުން މިސްކިތަށް ދިޔުމަށްޓަކައެވެ.

ހަފްތާއެއްހާ ދުވަސް ފަހެވެ. ރޭގަނޑުގެ ވަގުތު ރާކިން މިސްރާބުޖަހާފައިވަނީ ކަލާފާނު ސްކޫލާއި ދިމާއަށެވެ. ސްކޫލްގެ ގޭޓު ކުރިމައްޗަށް ސައިކަލް މަޑުކޮށްލުމަށްފަހު ދެފަރާތް ހޯދައި ބަލާލިއެވެ. އެވަގުތު ކުރިމަތީ އޮތް ގޯޅިން ލަނބާލި ދިމްޔާ ރާކިންއަށް ފެނުމުން ހިނިތުންވެލިއެވެ. ރާކިން ފަރުވާތެރިކަމާއިއެކު ދިމްޔާއަށް ބަލާލިއެވެ. ދިމްޔާ ހުރީ ރަތްކުލައިގެ ދޯބައްޓާ ހެދުމެއް ލާފައެވެ. ހެދުމުގައި ރަންކުލައިގެ އެސްތަކެއް ހަރުކޮށްފައިވާއިރު އަޅައިގެން ހުރި ދޯބައްޓާގެ ކައިރިފަށުގައިވެސް ރަންކުލައިގެ ރޭނދާފަށެއް އަޅާފައި ހުއްޓެވެ. ހެދުމުގެ އަތްކުރީގައި ރަންކުލައިގެ މިނާތަކެއް ހަރުކޮށްފައިވެއެވެ. ދިމްޔާ އެހެދުން ލާފައި ހުންނައިރު ހީވަނީ ރީތި ޕަރީއެއް ހެންނެވެ. މުށިކުލައިގެ ދިހުން އަރާ ފަން އިސްތަށިގަނޑު އޮތީ ފަހަތަށް ދޫކޮށްލާފައެވެ. ދޮންމޫނުގައިވަނީ އުޖާލާކަމެވެ. ދިމްޔާގެ ރީތިކަމަށް ރާކިންގެ ހިތާހިތުން ތައުރީފުކޮށްލެވުނެވެ.
“އައްދޭ…. ޓޮމާޓޯއެއް ކާލައިގެންތަ އައިސް ތިހުރީ….؟؟؟” ދިމްޔާ އައިސް މަޑުކޮށްލުމުން ރާކިން ދިމާކޮށްލިއެވެ.
“ރާކިން މާވަރަކަށް ބަލަނީ ކީއްވެތަ…. އަހަރެން ލަދުގަނެއޭ….” މޫނުގައި ދެއަތް އަޅާލަމުން ދިމްޔާ މިހެން ބުނުމުން ރާކިންގެ ގާތަށް ހިނިއައެވެ.
“ތިހާ ރީތި ކުއްޖަކަށް ނުބަލާ ހުރެވޭނީ ކާކަށްތަ…؟؟؟ ހަމަ ހާހަކަން އެކެއް ތީ….” ދިމްޔާގެ ދެއަތް މޫނާ ވަކިކޮށްލަމުން އޭނާގެ ކުޑަކުޑަ ނޭފަތުގައި ޝަހާދަ އިނގިލިން ޖަހާލަމުން ރާކިން ބުނެލިއެވެ.
ދިމްޔާ ސައިކަލްގެ ފަހަތަށް އެރުމުން ރާކިން ސައިކަލް ދުއްވާލިއެވެ. ކުއްލިއަކަށް ރާކިން ސައިކަލް ދުއްވާލުމުން ނުވިސްނާއިން ދިމްޔާ ގޮސް ޖެހުނީ ރާކިންގެ ބުރަކަށިގައެވެ. ރާކިން ގެ ގައިން ދުވަމުން ދިޔަ “ހޯޕް” ސެންޓުގެ މީރުވަހުން ދިމްޔާއަށް ނޭފަތް އެތެރެއަށް ދަމާލެވުނެވެ.
އަމީނީމަގު ހުރި ގޮތަށް ދުއްވާފައި ގޮސް ބޮޑުތަކުރުފާނުމަގަށް ނުކުމެ އައި.ޖީ.އެމް.އެޗް ކައރީގައި ސައިކަލް ޕާކުކޮށްލުމަށްފަހު ދިމްޔާގެ އަތުގައި ހިފައިލައިގެން ރާކިން މިސްރާބު ޖެހީ ތޮށިގަނޑާ ދިމާއަށެވެ.
“ދިމްއަށް އެނގޭތަ…؟؟؟ މީއަހަރެމެންނަށް ވަރަށް ޚާއްސަ ތަނެއްނު…. އެންމެ ފުރަތަމަ އަހަރެމެން އެކުވެރިވީވެސް މިތަނުން…. ހަނދާންވޭތަ….؟؟؟” ތޮށިމަތީ އިށީނދެ ހަމަޖެހިލަމުން ރާކިން މިހެން ބުނުމުން ދިމްޔާ ހީލަމުން ބޮލުގެ އިޝާރާތުން އާނއެކޭ ބުނެލިއެވެ. ރާކިންގެ އަތުގެ މުލައްދަނޑީގައި ހިފަހައްޓާލައިގެން ދިމްޔާ އިނީ އޭނާގެ ކޮނޑުގައި ބޯވެސް އަޅާލައިގެންނެވެ. ރެއަކީ ހަނދުވަރު ރީތި ރެއަކަށްވުމުން ހަނދުގެ ރިހިއަލި ކަނޑަށް އެޅިފައި ހުންނައިރު ނުހަނު ހިތްގައިމެވެ. ބަލާ ފޫހިނުވާނެފަދަ މަންޒަރެކެވެ.
“ދިމް…. ކީއްވެ ދިމްގެ ގެ ހުންނަތަން އަހަރެން ކައިރީ ނުބުނަން ތިއުޅެނީ…. އަބަދުވެސް އަހަރެން ޖެހެނީ އެ ސުކޫލް ދޮށަށް ދާން…..” ޝަކުވާ ކުރާ ކަހަލަ ގޮތަކަށް ރާކިން ބުނެލިއެވެ.
“އަދި ނެތެއްނު ނުބުނެވިފައެއް….” ދިމްޔާގެ ޖަވާބު ކުރެވެ. ރާކިން އިތުރަށް އެވާހަކަ ނުދެއްކީ އެވާހަކަ ދައްކައިގެން މާހައުލުގެ އުފާވެރިކަން ގެއްލުވާލަން ބޭނުންނުވާތީއެވެ.
“ދިމް ލޯމަރާލަބަލަ…” އިރުކޮޅަކު އުޑުގައިވާ ފުރިހަމަ ހަނދަށް ބަލަހައްޓައިގެން އިނުމަށްފަހު ރާކިން ބުނެލީ ދިމްޔާގެ މޫނުގައި ދެއަތުން ހިފަހައްޓާލަމުންނެވެ. ދިމްޔާ ލޯމަރާލިއެވެ. އެހާގާތުން ދިމްޔާގެ މޫނު ފެނުމުން ރާކިންގެ އެތެރެހަށީގައި ކަރަންޓްގެ ރާޅުބާންޏެއް ދުވެލިއެވެ. ނަމަވެސް ރާކިން އޭނާގެ ހިއްސުތަކުގެ މައްޗަށް ބާރު ފޯރުވަމުން ޖީންސްގެ ޖީބުން ކުޑަފޮށްޓެއް ނެގިއެވެ. އަދި އެފޮށި ހުޅުވާލުމަށްފަހު އޭގައި އިން ކެވެލިކޮޅު ނަގާ ދިމްޔާގެ އަތުގައި އަޅުވާލަދިނެވެ.
“ދެން ލޯހުޅުވާލަބަލަ….” ރާކިން މިހެން ބުނުމުން ދިމްޔާ ލޯހުޅުވާލުމަށްފަހު އަތަށް ބަލާލިއެވެ. ހިތްތަކެއް ލާފައިވާ ރިހިކެވެލިކޮޅު ފެނުމުން ދިމްޔާއަށް ހިނިތުންވެލެވުނެވެ.
“ވަރަށް ރީތި….” ރާކިންގެ މޫނަށް ބަލާލަމުން ދިމްޔާ މިހެން ބުނުމުން ރާކިން ހީލިއެވެ.
“އެހެންވީއިރު ދުވަހަކުވެސް މިކެވެލިކޮޅު ދިމްއާއި ވަކި ނުކުރައްޗޭ….” ދިމްޔާގެ ކޮލުގައި އަތުގެ ނުފުށުން ފިރުމާލަމުން ރާކިން މިހެން ބުނުމުން ދިމްޔާ ބޯޖަހާލީ އާނއެކޭ ބުނުމުގެ ގޮތުންނެވެ. އެވަގުތު ރާކިންގެ ޖީބުގައިވާ ފޯނު ރިންގްވާންފެށިއެވެ. ގުޅަނީ ރާކިންގެ މަންމައެވެ. ރާކިން ފޯން ނަގަން އުޅެނިކޮށް ފޯން ކެނޑުނީއެވެ. މަންމަގެ ނަންބަރަށް ޑައިލް ކޮށްލަމުން ރާކިން ކޮޅަށް ތެދުވެ ޖީންސްގެ ޖީބަށް އެއްއަތް ޖަހާލިއެވެ. ދިމްޔާވެސް ކޮޅަށް ތެދުވަމުން ރާކިންއަށް ބަލާލިއެވެ. އެގޮތަށް ޖީބަށް އަތްޖަހާލައިގެން ހުންނައިރު ރާކިން ހީވަނީ މޮޑެލްއެއްހެންނެވެ. ފަން އިސްތަށިގަނޑު ޖެލްލައި ކޮޅަށް ނަގާފައިވާ ވާއިރު ތުނބުޅިއާއި މަތިމަސްވަނީ ރީތި ސްޓައިލްއަކަށް ތުނިކޮށް ކޮށާފައެވެ. އޭނާގެ ތޫނު ދެލޯ ވަނީ ހަނދުވަރުގެ ރިހިއަލި އެޅިފައިވާ ކަނޑަށް އަމާޒުވެފައެވެ. ލައިގެންހުރި މަޑުނޫކުލައިގެ ގަމީސް ރާކިންއާއި ވަރަށް ގުޅެއެވެ.
“ހެލޯ… މަންމާ…” ރާކިންގެ ރީތިކަމަށް ގެއްލިފައި ހުރި ދިމްޔާ ސިހިގެންދިޔައީ ރާކިން ފޯނުން ވާހަކަ ދައްކަން ފެށުމުންނެވެ.
“ކީކޭ…..؟؟؟؟؟؟؟؟؟؟” ކުއްލިއަކަށް ރާކިން މިހެން ބުނެލުމުން ދިމްޔާ ރާކިންގެ މޫނަށް ބަލާލިއެވެ. ރާކިންގެ މޫނުމަތީގެ ކުލަވަރު ބަދަލުވެ ތުންފަތުގައިވި ހިނިތުންވުން ފަނޑުވުމުން ކޮންމެވެސް ކަމެއް ގޯސްވެއްޖެކަމަށް ދިމްޔާގެ ހަވަނަ ހިއްސު ދެނެގަތެވެ.
(ނުނިމޭ)