ޒީޝާ (ފަސްވަނަބައި)

ޒައިން ވާހަކަ ދައްކާ ނިމުނުއިރު ޒީޝާ އިނީ ބުނާނެ އެއްޗެއް ނޭނގިފައެވެ. ޒީޝާ އިނީ ހައިރާންކަމާއެކު ޒައިންގެ މޫނަށް ބަލަހައްޓައިގެންނެވެ. ޒައިން ދެންމެ ދެއްކި ވާހަކަ ގަބޫލުކުރަން ދަތިވެފައެވެ. “ޒީ… ހިތްހަމަ ނުޖެހުނީތަ؟.. ކޮންމެވެސް އެއްޗެއް ބުނެބަލަ..” ޒީޝާ އެއްވެސް އެއްޗެކޭ ނުބުނުމުން ޒައިން އަހާލިއެވެ. “އަހަރެން ވަކި ކީކޭ ބުނާނި ޒޭން.. އަހަރެން ދުވަހަކުވެސް ޒޭންއާ ދޭތެރޭ އެކަަހަލަ ގޮތަކަށް ނުވިސްނަން.. އަދި ހިޔެއް ނުކުރަން މިހެން ކަންތައް ވާނެކަމަކަށްވެސް.. ސްޓިލް އައި ކާންޓް ބިލީވް ޔޫ..” ޒީޝާއަށް އަދިވެސް އިނީ ގަބޫލް ނުކުރެވިފައެވެ. “އައި ނޯ ޔޫ ކާންޓް ބިލީވް މީ.. ބަޓް ޒީ.. އައި ލަވް ޔޫ ސޯ މަޗް.. ވަރަށް އިންތިޒާރު ކޮށްފިން ޒީ އަށް.. އެންޑް އައި އެމް ޓެލިން ދަ ޓްރުތް ޒީ…އިރާދުކުރެއްވިއްޔާ ދުވަހަކުވެސް ލޯބިވޭ ކިޔައިގެން އަންހެން ކުއްޖަކު ނުހައްދާނަން.. ދެން އިޓްސް އަޕްޓު ޔޫ ޓު ބިލީވް އޯ ނޮޓް…” ޒައިން ވާހަކަ ދެއްކީ ޒީޝާއަށް ގަބޫލުކުރެވޭ ފަދަ ގޮތަކަށެވެ. “މްމް..އޯކޭ.. މިވަގުތު އަދި ޖަވާބެއް ދެވޭކަށް ނެތް.. ވަގުތު ބޭނުން ތިކަމާ ދޭތެރޭ ވިސްނާލަން… ވިސްނާލާފަ ޖަވާބެއް ދޭނަން.. ” ޒައިން އަށް ބަލައިލަމުން ޒީޝާ ބުންޏެވެ. “އޯކޭ.. ޒީ ބޭނުން ވަރަކަށް ވިސްނާ.. ދެރަވާ ކަހަލަ ޖަވާބެއް ނުދޭނެކަމަށް ހީކުރަން.. ޒީ ގާތު އަހަރެން ބުނެލަން ބޭނުންވަނީ … އިފް ޔޫއާރ އާންސާރ އިސް ޔެސް.. ދުވަހަކުވެސް ޒީ އަކަށް ދެރައެއް ނުދޭނަން..ވަރަށް ލޯބި ދޭނަން.. އައި ވިލް މޭކް ޔޫ ދަ މޮސްޓް ހެޕިޔަސްޓް ގާލް އިން ދަ ވޯލްޑް.. އެހާވެސް ލޯބިވޭ.. ދެހަފްތާ ފަހުން އަހަރެން ރަށަށް ފުރަން..” ޒީޝާއަށް ޒައިން ދިނީ ފުރިހަމަ ޔަގީން ކަމެވެ. އޭރު އޯޑަރު ކުރި އެއްޗިސް ހުރީ ކާން ތައްޔާރުވެފައެވެ. އައި ނީޑް ޓައިމޭ ބުނެފައި ޒީޝާ ކާން ފެށިއެވެ. ޒީޝާ ފެށުމުން ޒައިންވެސް ފެށިއެވެ.

އެރޭ ޒީޝާއަށް ގެއަށް އާދެވުނީ އެގާރަ ޖަހަން ގާތްވެފައި ހުއްޓައެވެ. “ޒީ… ޒީގެ ޖަވާބަކަށް އަހަރެން އިންތިޒާރު ކުރާނަން” ޒީޝާ މެންގެއަށް އަރާ ހަމަވުމުން ޒައިން ބުނެލިއެވެ. ގުޑް ނައިޓްއޭ ބުނެލުމަށް ފަހު ގޭތެރެއަށް ޒީޝާ ވަދެގެންދިޔައެވެ. އޭރު ޒައިން ހުރީ ޒީޝާ ގޮސް ގެއްލެންދެން ބަލާށެވެ. އެއީ އޭނާގެ ހިތުގައި ރަނިކަން ކުރަމުންދާ ރާނީއެވެ.  ކެތްތެރި ކަމެއް ނެތި ދެން އިންތިޒާރު ކުރެވޭނީ ޒީޝާގެ ޖަވާބަކަށެވެ. ބުނަން ބޭނުންވި ވާހަކަ ބުނެވުމުން ޒައިން ހުރީ ފުދޭވަރަކަށް ހިތްހަމަ ޖެހިފައެވެ. އެހިތަށް އެއްކޮށް ހަމަޖެހުމެއް ލިބޭނީ އޭނާ އެދޭފަދަ ޖަވާބެއް ޒީޝާގެ ފަރާތުން ލިބުމުންނެވެ. ކުޑަ އިރުކޮޅެއްވަންދެން ވިސްނަން ހުރެފައި މިސްރާބުޖެހީ ގެއަށް ދިޔުމަށެވެ.

ގޭތެރެއަށް ވަދެގެން އައި ޒީޝާ ހިތްހަމަ ޖެހުނީ މީހަކު ފެންނަން ނެތުމުންނެވެ. އެހާ ލަސްކޮށްފައި ގެއަށް އައީމަ ބައްޕަ ހިތްހަމަ ނުޖެހިދާނެތީއެވެ. ހަލުވި ފިޔަވަޅުތަކެއްގައި ގޮސް ވަނީ ކޮޓަރިއަށެވެ. ކޮޓަރިއަށް ވަނުމަށްފަހު އަވަސްވެގަތީ ނިދާލުމަށެވެ. އެއީ މާދަމަ ހެނދުނު ކޮލެޖްއަށް ދާން ހޭލަން ޖެހޭނެތީއެވެ. ފާހަނައަށް ވަދެ އެއްޗިސް ބަދަލުކޮށްގެން އައިސް ނިދަން ޖައްސާލިއެވެ. އެހެން އޮންނަތާ އިރުކޮޅެއް ވީއިރުވެސް ޒީޝާގެ ލޮލަކަށް ނިންޖެއް ނައެވެ. ވާނީވެސް އެހެންތާއެވެ. ޒައިން މިރޭ ދެއްކި ވާހަކައާ މެދު މާބޮޑަށްވެސް އޭނާއަށް ވިސްނެނީއެވެ. މިއީ ޒީޝާއަށް އެފަދަ ކަމަކާ ވިސްނަން ޖެހޭ ފުރަތަމަ ފަހަރެވެ. ވިސްނިވަރަކަށް އޭނާގެ ސިކުނޑި ސުމަކަށްދިޔަ ކަހަލައެވެ.

ޒީޝާ އެކޭ އެއްފަދައިން ޒައިން އަށް ވެސް އޮތީ ނުނިދިފައެވެ. ޒީޝާ ދޭނެ ޖަވާބަކާ މެދު ވިސްނެނީއެވެ.ޒައިން އަންހެން ކުއްޖަކަށް ލޯބި ހުށައެޅި ފުރަތަމަ ރެއަކީ މިރެއެވެ. އެހެންކަމުން ޒީޝާވެގެން ދާނީ އޭނާ ހަޔާތުގައިވެސް ވަރަށް ހާއްސަ ކުއްޖެއްގެ ގޮތުގައެވެ.

އޭގެ އަނެއް ދުވަހެވެ. ޒީޝާ ތައްޔާރުވެލައިގެން އައިރު އެންމެންވެސް ސައިބޯން ތިއްބެވެ. ރޭ ރަނގަޅަށް ނިދި ނުލިބުމުގެ ސަބަބުން ޒީޝާ އިނީ ކުޑަކޮށް ބޮލުގައި ރިއްސާތިއެވެ. އެކަން ނާހިދާއަށް އެނގިގެން ސުވާލު ކުރިއެވެ. “ދަރިފުޅު މިއަަދު ބަލީތަ…؟ މާ ފާޑަކަށް ތިއިންނަނީ..؟ ޒީޝާއަށް ބަލައިލެވުނީ ނާހިދާގެ މޫނަށެވެ. “ކުޑަކޮށް ބޮލުގަ ރިއްސާތީ މިއުޅެނީ.. ބޭސް ކާލަނިކޮށް ރަނގަޅު ވެދާނެ” މަންމަ ކަންތައް ބޮޑުވެދާނެތީ ޒީޝާ އަވަހަށް ބުނެލިއެވެ. “ބޮލުގަވެސް ރިއްސާނެދޯ.. ރަނގަޅަށް ނިދި ނުލިބޭތީ.. ” ރޭ ޒީޝާ ލަހުން ގެއަށް އައުމުން ސައީދު ހުރީހިތްހަމަ ނުޖެހިފައެވެ. ރޭ ޒީޝާ ގެއަށް އައިރު ސައީދު ހުރީ  ކާގޭގައި ކަމުން ޒީޝާއަށް ނުފެނުނީއެވެ.އޭނާއާ ހެދި ބައްޕަ ހިތްހަމަ ނުޖެހިފައި ހުރުމުން ޒީޝާ ދެރަވިއެވެ. “މިއަދަށްފަހު ރޭގަނޑު ދިހައެއް ޖެހުމުގެ ކުރިން ގޭގަ ހުންނަން ޖެހޭނެ..” ސައީދު ގޮނޑިން ތެދުވީ ފަހުބަސް އިއްވާފައެވެ.

ސަމާ އަންނަންދެން ގޭޓް ކައިރީ  ޒީޝާ މަޑުކޮށްލައިގެން ހުއްޓެވެ. އޭރު ކޮންމެވެސް ވަރަކަށް ވައިޖެހެއެވެ. ތަންކޮޅެއް ދުރުން ބާރު ހިނގުމެއްގައި ސަމާ އަންނަތަން ފެނެއެވެ. “އޭ ޒީ ވަރަށް ސަޅި ބިޓެއް  ފެނިގެން މިއުޅެނީ…. ވާއު ހާދަ ހޮޓްއޭ.. ޔަގީންޒީވެސް ހިތްކިޔާނެ..” ޒީޝާގެ ކުރިމައްޗަށް ހުއްޓެމުން ސަމާ ބުނެލިއެވެ. ޒީޝާއަށް ހެވުނެވެ. “ސަމާ އަބަދުވެސް އުޅެނީ ތިވަރެއްގައެއްނު… ތިވާނީ ރަނގަޅަށް ވީއިރު މީހެއްގެ ފިރިއަކަށް..” ޒީޝާ ދިމާކޮށްލިއެވެ. “ޒީ އަށް އެނގޭނީ ދިމާކުރަން.. ވަރަށް ފޫހިވޭ..” ތުން އަނބުރާލަމުން ސަމާ ބުނެލިއެވެ.

ރޭގަނޑުގެ ވަގުތެވެ. ކައިގެން ޒީޝާ ވަނީ ކޮޓަރިއަށެވެ. ފޯނަށް މެސެޖެއް އައުމުން މެސެޖް ކިޔާލިއެވެ. “ޒީ.. ކީއްކޮށްލަނީ.. މިސްވީމަ މެސެޖެއް ކޮށްލާ ހިތްވީ” އެއީ ޒައިން ކޮށްފައި އޮތް މެސެޖެކެވެ. ކަމެއް ނުކުރަމޭ ލިޔެލާފައި ޒީޝާ މެސެޖް ކޮށްލިއެވެ.

އެރޭ ޒީޝާ ވަރަށް ރަނގަޅަށް ޒައިންއާ ދޭތެރޭގައި ވިސްނާލިއެވެ. ޒައިން އަކީ ގޯސް މީހެއް ނޫންކަން އޭނާއަށް އެނގެއެވެ. ޒީޝާ ދެކެ ލޯބިވާ ވާހަކަ އޭރު ނުބުނީ ޒީޝާގެ ކިޔެވުމަށް ހުރަސްއެޅިދާނެ ކަމަށް ވިސްނާފައޭ ޒައިން ބުނި ބުނުން ހަނދާންވުމުން އެތުންފަތްމަތީ ކުޅެލީ ހިނިތުންވުމެކެވެ. މީހަކަ ދޭތެރޭ ވިސްނޭނީ ދެން އެވަރަކަށެވެ. ކުއްޖަކާ ރައްޓެހިވާން ޒީޝާ ޖެހިލުންވެއެވެ. އެއީ ބައްޕަގެ ހަރުކަށިކަމުންނެވެ. ބައްޕަ ރުޅި އަތުވެއްޖެނަމަ ކޮންމެ ފަދަ ކަމެއްވެސް ކޮށްފާނެކަން ޒީޝާއަށް އެނގެއެވެ. އެރޭވެސް އޭނާއަށް ނިދުނީ ވަރަށް ލަހުންނެވެ. (ނުނިމޭ)