ހަތަރު އުދަރެސް

ގޭގެ މައި ދޮރުން ވަދެ ނިކުމެ ހަދާ މީހުންގެ ހަރަކާތްތައް ބަލަން ލުޔާ އިނީ ގޯތިތެރޭގައި ހުރި ޖޯލިފަތިގައެވެ. އަށް ބުރިޔަށް ހަދާފައިވަ ހ.ރިދުވަރުގޭގެ ފަސްބުރި ކުއްޔައް ދެވިފައިވާތީ އަބަދާ އަބަދު މީހުން ވަދެ ނިކުމެ ހަދާތަން އެގެއިން ފެނެއެވެ. ލުޔާ އަކީ ރާއްޖޭގައި ހުންނަ ކުއްޖެއް ނޫންކަމުން މަލޭގައި ހުންނައިރު ގިނަވަގުތު ހޭދަ ކުރަނީ އެގޭގެ ތަނަވަސް ގޯތިތެރޭގައެވެ. ލުޔާގެ މަންމަ ހައުފާ އަކީ މަމެލާމެއްޔަށާއި ރިތިކަމަށް ލޯބިކުރަ އަންހެނެއްކަމުން މުޅިގޯތިތެރެވަނީ ތަފާތު އެކިކުލަކުލައިގެ މީރުވަސްދުވަ މާމެލާމެލީގެ ގަސްތަކުން ޒީނަތްތެރި ކުރެވިފައެވެ. އަބަދުވެސް ކޮންމެވެސް ވާހަކައެއް ނުވަތަ ފޮތެއްކިޔުމުގައި ވަގުތު ހޭދަކުރަ ލުޔާގެ އަތުގައި މިއަދު އޮތީ ކޮލީން ހޫވާރގެ ލޯބީގެ ވާހަކައެކެވެ.

އިރުކޮޅެއްވަންދެން ވާހަކަފޮތަށް ގެއްލިފައި އޮތުމައްފަހު ލުޔާ ތެދުވީ އޭނާގެ ފޯނުން ފިނިފެންމަލެއްގެ ފޮޓޮއެއް ނެގުމަށެވެ. ތަފާތު އެކި ކުލައިގެ ފިނިފެންމަލުގައި އަތްލަމުން ފަހަރަކު ފޮޓޮއެނަގަމުން އޭނާދިޔައިރު ފަހަތުން މީހަކު އޭނާ ގާތަށް އައި ކަމުގެ އެއްވެސް ހިލަމެއް އޭނާއަކަށް ނުވެއެވެ.

ފަސްދީގެންހުރެ ލުޔާ މާގަސްދޮށުގައި އޭނާގެ ފޯނާ ކުޅެންހުރިއިރު އެއީ ލިއުޒާ ނޫންކަމެއް އަރީފަކަށް ނޭނގެއެވެ. ލުޔާއާއި ލިއުޒާ އަކީ އިސްކޮޅުން ގާތްގަނޑަކަށް އެއްވަރު ދެކުދިންކަމަށް ވެފައި ހެދުން އަޅަނީވެސް އެއް ސްޓައިލަކަށް ކަމުން އަރީފު ލުޔާ އާއި ގާތްވީ އެއީ ލިއުޒާ ކަމަށް ހިތައެވެ. މަޑު މަޑުން އައިސް ލުޔާގެ ކަންފަތްދޮށުގައި ‘ހޭއި’ އޭ ބުނެލުމާއެކު ސިއްސައިގެންގޮސް ލުޔާ އަރީފުއާއި ވީ ފަރާތަށް އެނބުރުނެވެ.

ކުރިމަތީގައި ހުރި އަންހެން ކުއްޖާއަކީ ލިއުޒާ ނޫންކަން އެނގުމުން އަރީފު ކުޑަކޮށް ސިހުނެވެ. އެހެންނަމަވެސް އެއީ ލިއުޒާ އާއި ތިމާގެ ކުއްޖެއްކަމަށް އެނާ ގަބޫލުކުރިއެވެ. އެހެނީ އެގޭ ގޯތިތެރޭގައިވާ ގަސްތަކުގައި އަތްލުމުގެ ހުއްދަ ގޭގައި ކުއްޔަށް އުޅޭ މީހުންނަށް ދީފައި ނޯންނާތީއެވެ.

ނުދަންނަމީހަކު އޭނާއާއި އެހާ ގާތުގައި ހުރުމުން ލުޔާ ނުތަނަވަސް ވިއެވެ. ލާނެތް ފާޑަކަށް އެ ފިރިހެންކުއްޖާ ހީލައިގެން ހުރުމުން އަނެއްކާ މީ ހަމައިގަ ހުރި މީހެއްބާވައޭ އޭނާ ހިތާހިތުން ސުވާލު ކޮށްލިއެވެ.

އެ އަންހެންކުއްޖާގެ މޫނަށް އަރާ ފައިބަމުންދިޔަ ކުލަތަކުގެ ސަބަބުން އަރީފު ގަސްތުކުރީ ކުޑަކޮށް ސަމާސާ ކޮށްލާށެވެ. އެންމެ ކުޑައިރުއްސުރެވެސް އަރީފުއަކީ ކަންކަން ކުރަން ކެރޭ ހުށިޔާރު ކުއްޖެކެވެ. އެހެންކަމުން ލުޔާ އާއި ތޮޅިލާކަށްވެސް އޭނާ ފަހެއްނުޖެހެއެވެ. ނުދަންނަ މީހެއްނަމަވެސް އަރީފު ލުޔާ އާއި ކައިރިވެލިއެވެ. އަދި ވަރައް ލާނެތްގޮތަކަށް ލުޔާގެ އަތުގައި ފިރުމާލުމަށްފަހު އޭނާގެ އަތުގައި އޮތް ފޮތް ދަމައިގަތެވެ.

ދުވަހަކުވެސް ފެނިފައި ނުވާ ނެނގޭ މީހެއްގެ ކިބައިން އެފަދަ ހަރަކަތެއް ފެނުމުން ބޭއިޚްތިޔާރުގައި ލުޔާއަސް ފަހަތައް ޖެހެވުނެވެ. އޭނާގެ ހިތް ހީވަނީ މޭކަށިގަނޑު ފަޅާލާފައި ނިކުމެދާނެ ހެންނެވެ. އަނެއްކާ މިފިރިހެނާ މިއުޅެނީ ލުޔާއަށް ކިހިނެތް ހަދަންބާއޭ އޭނާގެ ހިތައްއެރިއެވެ.

އަރީފަށް އެ އަންހެންކުއްޖާގެ މިހަރަކާތް ފެނުމުން އޭނާއާއި ސަމާސާކޮއްލާހިތް އިތުރައް ވީބޮޑެވެ. ފަހަތައް އޭނާ ނެގި ފިޔަވަޅާއެކު ދެމީހުންގެ ދެމެދުގައި އޮތް ޖާގަ ބޮޑުވެފައި ވާތީ އަރީފު ކުރިއަށް ޖެހިލިއެވެ.

މިހާރު އެދެމެދުގައި ވައިރޯޅިއަށް ދެމިލެވޭހާ ޖާގަވެސް އޮތީ ހަމަ ކިރިޔާއެވެ. ބިރުގަނެފައި ހުރިވަރުން ހަޅޭއްލަވަންވެސް ހަނދާންނެތިފައި ހުރި ލުޔާއަށް ހަމަހޭވެރިކަމެށް ލިބުނީ އޭނާގެ ކުރިމަތީގައި ހުރި ފިރިހެންކުއްޖާ ކުއްލިއަކަށް ފަހަތައްޖެހިފައި އަޑުގެ ނެތްތަނަށް ހޭން ފެށުމުންނެވެ. އޭރުވެސް އޮބިނޯންނަވަރަށް މޭގަނޑު ތެޅި ތެޅި ހުރި ލުޔާ އެ މީހާއާއި ދިމާލަށް ބަލަހައްޓައިގެން ހުރީ ވާނުވާނޭނގިފައެވެ.

މާ ބާރަށް މީހަކު ހޭ އަޑު އިވުމުން ވެގެންއުޅެނީކީތްތޯ ބަލަން އެވަގުތު ސިޓިންގ ރޫމުގައި ހުރި ލިއުޒާ ނިކުތެތެވެ. އަރީފު އަނގަމަތީ އަތް އަޅައިގެން ހޭތަން ބަލަން ތަންކޮޅެއް ދުރުގައި ލޯބޮޑުކޮއްގެން ހުރި ލުޔާ ފެނުމުން ކަންވީގޮތް ލިއުޒާއަށް ރޭކާލިޔެވެ. އަރީފުގެ ގޮތް އެނގޭތީ އޭނާ ކޮންމެވެސް ސަމާސާއެއް ކޮއްލީކަމަށް ނިންމިއެވެ.

“އަރީ ޔާއްކޮއާ ތޮޅުނީ ދޯ!؟” ލިއުޒާގެ ސުވަލައް ޖަވާބުދިނުމައްޓަކައި އަދިވެސް ހީހީ ހުރި އަރީފު ބޮލުގެ އިޝާރާތުން ނޫނެކޭ ބުންޏެވެ.
” ކޮން ދޮގެއްހަދާކަށް، މަށައް އެނގެޔޭ އަރީގެ ގޮތް.”

ލިއުޒާ އަރީފު ގާތުންލާފައިގޮސް ލުޔާގެ އަތުގައި ހިފިއެވެ. ލިއުޒާގެ ހަރަކާތްތަކައި ވާހަކަ ހުރިގޮތުން އަރީފުއަކީ އޭނާ ދަންނަ ކުއްޖެއްކަން ލުޔާއަށް އެނގުނެވެ. އަދި އެނާ ލުޔާއާއި ގާތްވީ ނުބައިނިޔަތެއްގައި ނޫންކަމާއި ހަމަ ލުޔާއަށް ޖެއްސުންކުރަންވެގެންކަންވެސް އޭނާއަށް ޔަގީންވިއެވެ. އެހެންނަމަވެސް އެމޫނަކީ ލުޔާއަށް އައު މޫނެއްކަމުން އޭނާ ލިއުޒާ އާއި ތަންކޮޅެއް ގާތްވެލާފައި އެއީ ކާކުތޯ ސުވާލުކޮށްލިއެވެ.

“އާނ، އަދި ޔާއްކޮއަކަށް އަރީ އެއް ނޭނގޭނޭދޯ! ޔާއްކޮ މީ އަރީފް، ދޮންތަގެ ބޯއިފްރެންޑް. އަރީ މީ ލުޔާ، ލިއުގެ ކޮއްކޮ. ޔާއްކޮ ކިޔަވަން ގޮސް ހުރީ ކެނެޑާގަ. މިހާރު ނިންމާފަ އެއައީ. ލިއުބުނީމެންނު ބޭރުގަ ހުންނަ ކޮއްކޮއެއް ވަރައް އަވަހައް ރާއްޖެ އެބަ އާދެޔޭ… އެއީ ޔާއްކޮގެ ވާހަކަ… ދެންމިހާރު އިންޓްރޮޑިއުސް ވެއްޖެ އެންނު، ހިނގާ އެތެރެއަށް” ލިއުޒާ ހިނގައިގަތީ އެއްއަތުން އަރީފުގެ އަތުގައި، އަނެއްއަތުން ލުޔާގެ އަތުގައި ހިފަހައްޓައިގެންހުރެ ސިޓިންގ ރޫމާ ދިމާލަށެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.