ހިތުގެ ވެރިޔާ (1)

ދަރިފުޅާ! ދަރިފުޅާ ކައިރާ..’ ނާހިދާާގެ އަޑަށް އަރާމުކޮށް ނިދާފައި އޮތް ކައިރާއަށް ފުންމައިގެން ތެދުވެވުނެވެ. އެވަގުތު ދޮރުމަތީގައި ހުއްޓިގެން ހުރި ރައިހާގެ ހިނިގަނޑު ފަޅައިގެން ދިޔައެވެ. ‘އަޅޭ ކައި.. ހަމަ މަންމަ ދެކެ އެހާ ބިރުގަންނަންތަ؟ މީ މަންމަ އެއް ނޫނޭ.. ހައްހައް..’ ހެމުން ހެމުން އޭނާ އެކޮޓަރިން ނިކުތެވެ. ‘ދެން ދޮންތަ މަންމަގެ އަޑުން ގޮވީމަ އެހެންވާނެއެއްނުން.. އަދި ހަމަ އެހާ ބާރަށް.. ހުނ.. ވަރަށް ފޫހި..’ ރައިހާއާއި ދިމާލަށް ހިތާހިތުން ކުދި ކިޔަމުން ކައިރާ ފާހަނައަށް ފެންވަރަން ވަނެވެ. އެހެންނަމަވެސް ދެވަނަ ސިކުންތުގައި ހަޅޭއްލަވަމުން އޭނާ ކޮޓަރިން ނުކުތެވެ. ‘އާތް މަންމާ އެތާ ބޮޑު ކުރަތްޕެތް.. މަންމާ!’ ކައިރާއަކީ އެއްވެސް ކަހަލަ ދިރޭއެއްޗެއް ފެނިއްޖެއްޔާމު އެގޮތެއް މިގޮތެއް ނުބަލާ ހަޅެއްލަވާ ތެޅިފޮޅޭ ކުއްޖެކެވެ. މަގުމައްޗެއް މިސްކިތެއް ނޯންނާނެއެވެ.

ކައިރާގެ އަޑަށް ނާހިދާާ ދުވެފައި ކަހަލަ ގޮތަކަށް އެކޮޓަރިއަށް ވަނެވެ. އޭރު ކައިރާ އޭނަގެ އެނދަށް ކޮޅަށް އަރާ ފުމެނީއެވެ. ‘ސާބަސް ހަމަ މިމަންޖެއަށް.. ދެން ކުރަތްޕެއް ފެނުނީއޭ ކިޔާފަ ތުވާލިކޮޅު ބަނދެގެން މުޅި ހިސާބު ގަނޑުގައި ދުވަންޖެހޭތަ.. އާނ އެހެންޏާ.. އުމުރުން ސޯޅަ އަހަރު ވާއިރު ވެސް ހަމަ ދިހަ އަހަރު ކުއްޖެއްހެން މީނަ އުޅެނީ..’ ދޮރުމަތީގައި މަންޒަރު ބަލަން ހުރި ޒުލޭޚާ ކައިރާއާއި ދިމާލަށް ކުދިކިޔައިގަތެވެ. އެވަގުތު ނާހިދާ ފާހަނަ ތެރެއިން ނުކުމެ އެކޮޓަރި ތެރޭގައި އިން ފިޔާތޮށި ކުލައިގެ ކުނިވަށިގަނޑު ތެރެއަށް މަރުވެފައި އޮތް ކުރަތްޕެއް ނަގާ ލިއެވެ. ‘މާމަ އެބުނީ ތެދެށް.. ދަރިފުޅުވެސް ދެން ވެއްޖެ ކޮންމެވެސް ވަރަކަށް ސޫފި އެއްޗެހި މަރަން ދަސްކުރަން.. ދެން އެވާހަކަ ބާއްވާ.. މިހާރު އެއޮށް ހަތެއް ޖަހަނީ.. ދޭ ދެން ތައްޔާރުވާން.. މަންމަ އިންޓަވަލް ތައްޔާރު ކޮއްފައި ބަހައްޓާނަން މޭޒުމަތީ..’ ނާހިދާއާއި ޒުލޭޚާ ކޮޓަރިން ނުކުތުމުން ކައިރާ ފެންވަރައިގެން ނުކުމެ، ނާހިދާ ފަތިހު އިސްތިރިކުރި އޭނާގެ ސްކޫލް ޔުނިފޯމާއި، އެއާއި އެއްކޮށް އިންނަ ކަޅު ބުރުގާ އެޅިއެވެ. ‘އޯހް.. އަދި ނަމާދުވެސް ނުކުރެވޭ.. އަޅޭ..’ ނަމާދު ނުކުރެވޭކަން ހަދާން ވުމުން އޭނާ އަވަސް އަވަހަށް ވުޟޫ ކޮށް ނަމާދަށް އެރިއެވެ.

‘މަންމާ.. ކައި ދެން ދަނީ އިނގޭ.. ނަވްރީން މިހާރު ވާނީ ސްކޫލަށް ގޮސް..’ މޭޒު މަތީ އޮތް ލަންޗްބޮކްސް ދަބަހަށް ލަމުން ކައިރާ ބުނެލިއެވެ. އަދި ގެއިން ދުވެފައި ކަހަލަ ގޮތަކަށް ނިކުމެގެން އޭނާ ދިޔައެވެ. އެވަގުތު ގޭގެ ދޮރާށި ކައިރީގައި ހުރި ސައިކަލެއްގައި އިށީދެގެން އިން އޭނާގެ ބައްޕަ ފެނުނެވެ. ލިބުނު ސިހުމާއި އެކު އޭނައަށް އަރި އަޅާލައިގެން ކަރިރީހުރި ގަހެއްގައި ބޯ ޖެހުނެވެ. ‘އައްދޯތް..’ ބޮލަށް ވީތަދުން ކައިރާއަށް ބޮލުގައި އަތް އަޅާ ގަނެވުނެވެ. ކައުސަރުއަށް މިމަންޒަރު ފެނުމާއިއެކު، ސައިކަލުން ފައިބާ ކައިރާއާއި ދިމާލަށް ހިނގައިގަތެވެ.

‘އަސްތާ ކައި ދަރިފުޅާ.. ކިހިނެތް މިވީ.. ބައްޕަ ދެކެ ހާދަ ބިރެކޭ ތިގަންނަނީ.. ހެހެހެ..’ ކައުސަރު ކައިރާގެ ބޮލުގައި ފިރުމާލަމުން ބުނެލިއެވެ. ކައިރާއަށް ލަދުން އިސްޖަހާލެވުނެވެ. ‘ބައްޕަ މިދަނީ ސްކޫލު ކައިރިއަށް… ދަރިފުޅު އަރަންވީނުން ފަހަތަށް..’ ސައިކަލު މައްޗަށް އަރާ ހަމަޖެހިލަމުން ކައުސަރު ބުބނެލިއެވެ. ‘ނޫން ކައި ގޮސްލާނަން ހިނގާލާފަ..’ ކައިރާ އޭނާގެ ބައްޕަ އާއި ދިމާލަށް ބަލާލަމުން ހިނގައިގަތެވެ.

‘އޯހް ނޯ.’ ކައިރާއަށް ގަޑި ބަލާލެވުނު އިރު ކަމަކުދާކަށް ނެތެވެ. އޭރު އަށެއް ޖަހަން ފަސް މިނެޓެވެ. އޭނާައަށް އިސްޖަހާލެވުނެވެ. ކޮންމެ ހަފުތާއެއްގެ ކޮންމެވެސް އެއްދުވަހަކު މިކަހަލަ ކަމެއް ދިމާވާނެއެވެ. ކައުސަރުގެ އެދުމަށް ފުރަގަސް ދެވުމުން ކައިރާއަށް ބޯ ހޫރައިލެވުނެވެ. އަދި ފަޔަށް ލެވުނުހާ ބާރެއް ލާފައި ދުއްވައިގަތެވެ.

ނުނިމޭ

(އަޅުގަނޑު މި ބައި މިވަގުތަށް ކުރުކޮއްލަނީއެވެ. މާ ބޮޑައް ކުރުނަމަ ވަރަށް ބޮޑަށް މަޢާފަށް އެދެން.. އިރާދަކުރެއްވިއްޔާ ދެން އަންނަ ބައި މިއަށް ވުރެން ދިގުވާނެ.. ^-^)

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.