އަބަދުވެސް މިހިތުގާ ވެޔޭ (19)

” މިހާރު؟ ކޮންތާކަށް ދާންވީ…” ނުހާ ކޮޓަރިއާ ދިމާލަށް ހިގައިގަންނަމުން ބުނެލިއެވެ.

” އާދެ ޑައިނަމޯއަށް އަހަރެންވެސް މިދަނީ އެތަނަށް..” އަކްރަމް މިހެން ބުނުމަށްފަހު ފޯނު ބޭއްވިއެވެ. ނުހާ އަވަސް އަވަހަށް ތައްޔާރުވެލައިގެން ބޭރަށް ނުކުމެ ކާރަށް އަރާ ޑައިނަމޯއަށްދާން ނައްޓާލިއެވެ. އަރީކާ ދައްތަ ނުހާއާ ބައްދަލު ކުރަން ބޭނުންވަނީ ކޮންކަމު ހެއްޔެވެ؟ 10 ވަރަކަށް މިނިޓް ތެރޭ ނުހާ ކާރު ޕާރކް ކޮށްލުމަށްފަހު ގޮސް ޑައިނަމޯއަށް ވަނެވެ. އަކްރަމް އިން މޭޒުކައިރިއަށް ނުހާ މަޑުކޮށްލުމަށްފަހު އަރީކާ ދައްތަ އާ ސަލާމް ކޮށްލުމަށް އަތްދިއްކޮށްލިއެވެ.

” އަރީޝާ.. ނުހާ ދޯ ނުހާ ނުދަންނަ މީހެއް މި ރާއްޖޭގަވެސް ނޫޅޭނެ..” ސަލާމްކޮށްލުމަށްފަހު ނުހާ އިށިންނަން ތަންދެއްކިއެވެ.

” ކީއްކުރަން އަރީޝާ އަހަންނާ ބައްދަލު ކުރަން ބޭނުންވީ؟” ނުހާ އަހާލިއެވެ.

” އަހަންނަށް އެގޭ އަހަރެން ކޮއްކޮއާ ހެދި ނުހާއަށް ވަރަށް އުދަގޫތަކެއް ކުރިމަތިލާން ޖެހޭކަން.. އަދި މިހާރުވެސް ކުރިމަތިވާކަން.. އަހަރެން ބޭނުން އަހަރެންގެ ކޮއްކޮގެ ފަރާތުން މާއާފަށް އެދެން..” އަރީޝާ މައާފަށް އެދެމުން ބުނެލިއެވެ.

” އެހެންވިއްޔާ ތިއާއިލާއަށް އެގިގެން ކުރާކަމެއްތައެއީ؟ ކީއްކުރަން؟ އަރީކާއަކީ އަދި ޒުވާން ކުއްޖެއް.. މީހެއްގެ ފިރިއެއް ފަހަތުން ދުވަންޖެހޭ ސަބަބެއް ކޮބަ؟އަނެއްކޮޅުން އަހަރެންމެން ދެމަފިރިންގެ ދަރިއެއްވެސް ހުރޭ ދެން ކީއްވެ..” ނުހާ ސުވާލުތަކެއް އަމުނާލިއެވެ.

” އަހަންނަކަށްވެސް ނޭގެ.. ވަރަށް ވިސްނަދެވޭތޯ އުޅެފިން.. މިއަދު އަހަރެން ނުހާ އާ ބައްދަލު ކުރަން ބޭނުންވީ އަހަރެންނަށް ކުރެވުނު ކުށަށް މައާފަށް އެދެން… މި ވާހަކަ ފަށަން ވީ ގޮތެއްވެސް އަހަންނަކަށް ނޭގެ…  އަހަރެން އަރީކާ އެދުމުގެ މަތިން ނުހާއަށް ފޯލްސް ޕްރެގްނެންސީ ރިޕޯޓެއް ތައްޔާރު ކޮށްދިނިން.. ނުހާ ބަޑުބޮޑުކަމަށް ޑޮކްޓަރު ބުނީ އަހަރެން ތައްޔާރު ކުރި ރިޕޯޓަށް ބަލާފައި..” އަރީޝާ އިސްޖަހާލައިގެން އިދެ ބުނެލިއެވެ.

” ކީކޭ… މޮޔަވީތަ؟ އިގޭތަ ތިކުރި ކަމަކުން އަހަރެން ތަހަންމަލު ކުރަން ޖެހުނު ހިތާމަ… ” ނުހާ ގާތަށް ރުޅިއައެވެ.

” އާނ.. ނުހާ އަހަރެން އެކަމާ ވަރަށް ދެރަވެ ހިތާމަ ކުރަން.. އަހަންނަކަށް ނޭގެ އަހަރެން ކުރި ކުށަށް އަހަންނަށް މައާފް ލިބޭނެ ކަމެއްވެސް.. އެކަމް އަން މީތި… އަހަރެން ގަބޫލު ކުރަން ނުހާ އަހަންނަށް މައާފް ކުރާނެ ކަމަށް..” އަރީޝާ ސިޓީއުރައަކާއި ޕެންޑްރައިވެއް ދިއްކޮށްލަމުން ބުނެލިއެވެ.

“މީ ކޯންޗެއް..” ނުހާގެ ރުޅިގަޑު އަދިވެސް މަޑެއް ނުވެއެވެ. ކޮއްކޮއާއި ދައްތަވެގެން އޭނާގެ މުޅި ދިރިއުޅުން ހަލާކު ނުކޮށްލީ ކިރިޔާއެވެ. އަރީޝާ އިތުރަށް އެއްޗެކޭ ނުބުނެ އެތަނުން ދިޔައެވެ. ނުހާ އަކްރަމްއަށް ބަލާލީ ހަދާނެގޮތް ހުސްވެގެންނެވެ،

” ތޭކްސް އަކޫ.. ތިކޮށްދިނީ ވަރަށް ބޮޑު ކަމެއް…” ނުހާ ބުނެލިއެވެ. އަދި އޭނާވެސް ގެއަށް އައުމަށް އެތަނުން ނުކުމެގެން ހިގައިގަތެވެ.

***

ނުހާ ގެއަށް އައިސް އަރީޝާދިން ސިޓީ އުރަށް ކަޑާލިއެވެ. އޭގައި އިނީ އަރީކާގެ ނަން ޖަހާފައި އިން ޕްރެގްނެންސީ ރިޕޯޓެކެވެ. ނުހާގެ ދެލޯ ބޮޑުވެގެން ދިޔައެވެ. ޝާން މިހާ ދަށު ދަރަޖައަކަށް ވެޓިދާނެކަމަކަށް ނުހާ ހިތަކަށްވެސް ނާރައެވެ. ނުހާއާ އެހާ ދުރުން ޝާން އުޅުނު ސަބަބު މިހާރު ނުހާއަށް އިގިއްޖެއެވެ. ޕެންޑްރައިވް ނަގާ ލެޕްޓޮޕަށް ޖަހާލީ ލޮލުން އަންނަމުން ދިޔަ ކަރުނަތައް ފޮހެލަމުންނެވެ. ޕެންޑްރައިވްގައި އިނީ އޯޑިއޯ ފައިލްއެކެވެ. ނުހާ ހެޑްސެޓް ޖަހާލުމަށް ފަހުއެ ފައިލް ޕްލޭ ކޮށްލިއެވެ.

• ” އަދިވެސް ރިޕޯޓް ނެހެދޭތަ.. މިހާޜު ކޮން ދުވަހެއް.. ޝާން އަހަރެން ބަޑުބޮޑުކަމުގެ ހެކި ހޯދަން ބުނެފިއްޔާ އަހަރެން ކޮންތާކުން އެނެރެނީ.. އަވަހަށް ރިޕޯޓު ތައްޔާރުކޮށްފަ ގުޅާ.. އަހަރެން ބަޑު ބޮޑު ނުންކަން ޝާންއަށް އެގިއްޖެއްޔާ އަހަންނަކާ އޭނަ ނީންނާނެ..-

އަރީކާގެ އަޑު ނުހާއަށް އިވެމުން ދިޔައެވެ. އަރީކާ މިހާ ދޮގުހަދައިގެން ޝާންއާ އިނުމުގެ މަގްސަދަކީ ކޮބާބާއެވެ. ހަމަ ލޯބިވާތީ ހެއްޔެވެ. ނުހާ ޕެންޑްރައިވްގައި އިން ފައިލް ފޯނަށް އަޅާލިއެވެ. ނުހާ އިންތިޒާރު ކުރަމުން ދިޔައީ އަރީކާއާއި ޝާން ގެއަށް އަންނާނެ އިރަކަށެވެ. މިއަދު ކޮންމެ ގޮތެއް ހަދާފައިވެސް ނުހާ އަރީކާގެ ރޭވުން ފަޅާއަރުވާލާނެއެވެ.

***

ޒާން ސްކޫލު ނިންމާލުމަށްފަހު ޔޫނުސް އާއެކު ޖޫގޯ ބޯން ޖެލީ އަށް ދިޔައީ އެކިއެކި ވާހަކައިގާ ތިބެގެންނެވެ. ޔޫނުސްއަށް ޒާންގެ ހުރިހާ އެއްޗެއް އެގޭފަދައިން ޒާންއަށްވެސް ޔޫނުސްގެ ވަރަށް ގިނަ ކަންތައްތައް އެގެއެވެ. ޖެލީ ކުރިމައްޗަށް އެރިތަނާހެން ނުހާ ޒާންއަށް ގުޅިއެވެ.

” ދަރިފުޅާ.. ކޮންތާކު؟ ކޮން އިރަކު ގެއަށް އަންނަނީ..” ނުހާ ބޭނުންވީ ޒާން ގެއަށް އަންނާނެ އިރެއް ހޯދުމަށެވެ. އަނެއްކާ ގޭތެރޭގައި މިއަދު ހިގާފާނެ ހަމަނުޖެހުމެއްވެސް ނުހާ އަކަށް ބުނާކަށް ނޭގެއެވެ. އޭނާގެ ރުޅި ވަނީ އހާވެސް ގަދަވެފައެވެ.

” މަންމާ އަޅުގަޑު ޔޫނުސް އާ އެއްކޮށް ޖޫގޯބޯން އައިސް މިހިރީ.. އަދި އެބަޖެހޭ އެސައިމެންޓެއް ނިންމަން އެހެން ކުއްޖެއް ގެއަށްވެސް ދާން… ލަސްވާނެކަންނޭގެ..” އަތުގެ އިޝާރާތުން ޔޫނުސް ކައިރީ އޯޑަރދޭން ބުނުމަށްފަހު ޒާން އަނެއް ފަރާތަށް އެބުރިލީ ނުހާގެ ރާގު އެހެން ދުވަސް ދުވަހަށް ވުރެ ތަފާތު ވުމުން ކަންބޮޑުވެގެންނެވެ.

” މަންމާ.. އިޒް އެވްރީތިންގް އޯލް ރައިޓް..” ޒާން މަޑުމަޑުން އަހާލިއެވެ. ނުހާ އާނއެކޭ ބުނުމަށްފަހު ފޯނުބޭއްވިއެވެ. ޒާންއަށް ނުހާ ހަދަނީ ދޮގުކަން އެގުނެވެ. ގެއަށް ވީހާވެސް އަވަހަށް ދާން ޒާން ހުރީ ބޭޏުންވެފައެވެ. ޔޫނުސް ކައިރިއަށް ދިއުމަށް ޒާން އެބުރިގަތް ވަގުތު އަންހެން ކުއްޖެއް ގައިގާ ޒާން ޖެހި އެކުއްޖާ ވެއްޓެން ދިޔައެވެ. ޒާން އަށް ބޭއިހްތިޔާރުގައި ހިފުނީ އެކުއްޖާ އަތުން ވެއްޓެން ދިޔަ ޖޫގޯ ތަށީގައެވެ. ކައިރީގައި ތިބި އެންމެން ޒާންއަށްބަލާލީ އަންހެން ކުއްޖާ ބިންމައްޗަށް ވެއްޓިފައި އޮތްއިރު ޒާން އެކުއްޖާ ނަގާ ނުދިނުމުންނެވެ. އަވަސް އަވަހަށް އަންހެން ކުއްޖާގެ އަތުގައި ހިފާނަގާލިއެވެ. އަދި އޭނާގެ މޫނަށް ބަލާލިއެވެ.

“އޮހޯ… ޔޫނުސް ކަލޭ ކޮން އިރަކު ބުރުގާ އެޅީ… މަނުދަންނަން ކަލޭއެއް..” އަންހެން ކުއްޖާއަށް ބަލާލަމުން ޒާން ބުނެލިއެވެ. އެވަގު އަތަށް ދެ ޖޫގޯ ތަށި ލައިގެން ޔޫނުސް އައިސް މަޑުކޮށްލުމުން ޒާންގެ ދެލޯ ބޮޑުވިއެވެ. ކައިރީގައި މިހިރަ އަންހެން ކުއްޖާ ޔޫނުސްއާ އެއްވެސް ތަފާތެއް ނެތެވެ. އަހްމަދިއްޔާ ޔުނީފޯމްގައި ހުރިއިރު އެތާ ތިބި އެންމެނަށްވެސް ޔޫނުސް އާއި އެ އަންހެން ކުއްޖާ އޮޅިދާނެއެވެ.

” ޔޫނާ.. މިތާ ކޯއްކުރަނީ..” ޔޫނުސް ޔޫނާގެ ގައިގާ ކޮއްޓާލަމުން އަހާލިއެވެ. އޭރު ޔޫނާ ހުރީ ޒާންގެ ރީތިކަމުން ގޮސް ޒާންއަށް ގެއްލިފައެވެ.

” ދޮންބޭ.. މިހާ ހޭންޑްސަމް ރައްޓެއްސެއް ހުންނަ ވާހަކަ ކީއްވެތަ ކުރިން ނުބުނީ..” ޔޫނާއަދިވެސް ހުރިގޮތަށް ހުރެ ބުނެލިއެވެ.

“ތެދެއް ޔޫނުސް ކީއްވެތަ މިހާ ރީތި ކޮއްކޮއެއް ހުންނަވާހަކަ އަހަރެން ކައިރީ ނުބުނީ…” އަތުގައި އޮތް ޖޫގޯ ތަށި ޔޫނާއަށް ދިއްކޮށްލަމުން ޒާން ބުނެލިއެވެ. ދެމީހުން ހީވީ ފުރަތަމަ ނަޒަރުން ލޯބިވެވުނު ހެންނެވެ. ޔޫނާ އަކީ ޔޫނުސްގެ ޓުވިންސް ކޮއްކޮއެވެ. ޒާން ޖޫގޯ ބޯން މަޑުކޮށްލަން ޔޫނާ ކައިރީ ބުނެލިއެވެ. ޔޫނުސް ބޮލުގައި އަތް އަޅާލީ ދެން އޭނާ އެތާގައި ހުރމުގެ ބޭނުން ކެޑިއްޖެކަން ވިސްނުމުންނެވެ.

***

ހަވީރު ވުމުން ނުހާ ބެލްކަނީގައި މަޑުކޮށްލައިގެން ހުރީ ޝާން އާއި އަރީކާ އާދޭތޯ ބަލަންށެވެ. ދެމީހުން އެއްކޮށް ހިގާފައި އަންނަތަން ނުހާއަށް ފެނުނެވެ. ސިޓިންގްރޫމަށް ވަދެ ޕެންޑްރައިވް ޓީވީއަށް ޖަހާލިއެވެ. އަދި އެދެމީހުން ގެއަށް ވަންނަންދެން ސޯފާގައި އިށީދެލިއެވެ. ޝާން ގެއަށް އެޅި ފިޔަވަޅު ފަހަތަށް ޖެހުނީ ނުހާ އެއްލި ބާލިސް ހިފުމަށެވެ. ނުހާގެ މުޅި މޫނު ވަނީ އެއްކޮށް ރަތް ވެފައެވެ. އެ ރީތި ދެލޮލުން ކަރުނަތައް ފައިބަ ފައިބާ ހުއްޓެވެ. އަރީކާވެސް ހައިރާންވެފައި ބަލަހައްޓައިގެން ހުއްޓެވެ.

” ޝާން ބައްޕައަކަށް ވަނީތަ؟ އެއީ ތެދެއްތަ އަރީކާ…” ނުހާ ސުވާލު ކޮށްލީ ދެމީހުންނަށް އެއްފަހަރާއެވެ. ޝާން އަށް ބުނާނެ އެއްޗެއްވެސް ނޭގުނެވެ. ބާލިސް ހިފައިގެން އެތެރެއަށް ވަދެ ނުހާ ގާތުގައި އިށީދެލިއެވެ.

” ދުރަށްދޭ… ތި ދެމީހުންގެ އޮންނަނީ ތިކަހަލަ ގުޅުމެއްތަ؟ އަހަރެން ކައިރީ ރައްޓެހި ކަމޭ ކިޔާ އޮޅުވާލީ..” ނުހާ އަށް ރޮވެމުން ދިޔައެވެ.

” ނުހާ ކާކު ކީކޭ ކީ؟ އަހަންރެން ބައްޕައަކަށް ވަނީޔޭ… ކާކު ބުނީ..” ޝާން ހަމޖެހިލެވޭތޯ ބެލިއެވެ.

” ނޭގޭކަމަށް ހަދާނެ ކަމެއް ނެތް.. އަރީކާ އިނީ ޝާންގެ ދަރިއަކަށް ބަލިވެނުން..” ނުހާ މިބުނެލި ޖުމްލައިން ޝާންއަށް ތެޅިގަނެވުނެވެ. އަދި އަރީކާއަށް ރުޅިވެރި ގޮތަކަށް ބަލާލިއެވެ. އަރީކާ ނޭގެއޭ ބުނާފަދަ ގޮތަކަށް ދެކޮޑު ހިއްލާލިއެވެ.

” ނުހާ… އެއީ ހުސްދޮގު… އެހެންނެއް ނުވާނެ…” ޝާން ނުހާއަށް ވިސްނަދެވޭތޯ އުޅުނެވެ.

” ދޮގޭ.. ޝާން އަހަރެން ބުނީމެއްނުން އަހަރެން ބަޑުބޮޑޭ.. ދެން ނުހާއަށް ކިޔާދީބަލަ.. ކީއްކުރަން ސިއްރު ކުރަނީ ހުރިހާ އެއްޗެއް ނުހާއަށް އެގޭ އިރު..” އަރީކާ ނުހުރެވިގެން ބުނެލިއެވެ.

” ކަލޭ މިދޭތެރެއަށް ނުވަދެ ހުރޭ.. ކަލެއާ ހެދި އަހަރެންގެ މުޅި ދިރިއުޅުން ހަލާކު ވެއްޖެ… ކަލެއާ ދިމާނުވިނަމައޭ އަހަރެން ހިތައްއަރާ…” ޝާންއަށް ހަޅޭއްލަވައިގަނެވުނެވެ. ނުހާވެސް ހައިރާންވެފައި ޝާންއަށް ބަލާލިއެވެ.

” ނުހާ އަހަރެން ލޯބިވަނީ ހަމައެކަނި ނުހާ ދެކެ.. ނުހާ ތީ އަބަދުވެސް އަހަރެންގެ ހިތުގެ ރާނީއަކީ… ނުހާ… އަހަރެން ބުނީމެއްނުން އަހަރެން ވަރަށް ބޮޑު ވާހަކައެއް ބުނަން އެބައޮތޭ…” ޝާން ވާހަކަ ދައްކަމުން ދިޔައެވެ.

” އަހަންނާ އަރީކާ ދިމާވީ މީގެ 15 އަހަރު ކުރިން މެލޭއިން.. ހަދާންވޭތަ އަރީކާ ބުނިހަދާން.. އޭނާގެ މައިންބަފައިން މިދުނިޔެ ދޫކޮށްދިޔައީ އެކްސިޑެންޓެއްގެ ސަބަބުންނޭ… ހަދާންވޭތަ… އާނ ނުހާ އެފަހަރު އަހަރެން އިން ޓެކްސީ ގޮސް އަރީކާގެ މައިންބަފައިން އިން ކާރުގައި ޖެހުނީ… އަހަންނަކަށް ނޭގޭ އެ އެކްސިޑެންޓްގަ އަރީކާ މައިންބަފައިން ނިޔާވިކަމެއް… އަހަރެން އެދުވަހު އެކްސިޑެންޓަށްފަހު ދިޔައީ އަހަރެންގެ ޓެސްޓް އޮތީމަ ޓެސްޓަ.. އަހަރެން ފިލީކީ ނުން… އަހަންނަށްވެސް އެކިވަރުގެ އަނިޔާ ލިބުނު… ޓެސްޓް ނިންމާލުމަށްފަހު ގެޔަށް ދިޔަ މަގުމަތީ އަހަންނަށް ހަބަރު ލިބުނީ އެ އެކްސިޑެންޓުގަ 2 ދިވެއްސަކާއި 1 މެލޭޝިއާ މީހަކު ނިޔާވިކަން… އަހަރެން ހިތުން ދުވަހަކުވެސް އެކަމެއް ނުފުލާނެ… އަހަރެން ހޮސްޕިޓަލަށް ދިޔައީ އެމީހުންގެ މޫނު ފެންނާނެ ކަމުގެ އުންމީދުގަ… އަހަންނަށް ފެނުނީ އަރީކާ އެދުވަހު ހޮސްޕިޓަލް ތެރޭ އޭނާގެ މަންމަ އާއި ބައްޕަ ސަލާމަތް ކޮށް ދިނުމަށް ރޮއެ އާދޭސް ކުރިތަން.. އަހަރެންގެ ހިތްވަރު އެލުނީ.. އަރިކާ ހުރި ހާލު ފެނިފަ އަހަރެން އަހަރެންގެ އަމިއްލަ ނަފްސްދެކެ ރުޅިއާދެވުނު… އަހަރެންގެ ސަބަބުން އެމީހުން މަރުވިކަމުގައި ގަބޫލު ކުރެވެން ފެށުނު… އަރިކާ ބުނީމެއްނުން އަރީކަށް އެހީތެރިކަން ފޯރުކޮށްދިން މީހެއްގެ ވާހަކަ.. އެއީ އަހަރެން.. އަހަރެން އެހެން ކަންތައް ކުރީ އަހަރެންގެ ނަފްސަށް ހަމަ ޖެހުމެއް ހޯދުމަށް.. އެކަމަކު އަހަންނަކަށް އެއްވެސް ހަމަ ޖެހުމެއް ނުލިބުނު… އަހަރެން އަހަރެންގެ އަބިމީހާއަށް ދުރުވާން ފެށިން.. އަހަންނަށް ގަބޫލު ކުރެވުނު ގޮތުގައި ނުހާ ކަހަލަ މާތް މީހަކަށް އަހަރެން ކަހަލަ ނުލަފާ މީހަކު ހައްގެއް ނުން… އަހަރެން އެހާ ވަރަށް ނުހާ ދުރު ކޮށްލިއިރުވެސް ނުހާ އަހަންނާއި ދުރަކަށް ނުދިޔަ… އަހަރެން އަރީކާއާ ރައްޓެހި ވީ އަރީކާ ކުރި އާދޭހުން..” ޝާން ވާހަކަ ކިޔާ ދެމުން ދިޔައިރު ނުހާ އަދި އަރީކާގެ ލޮލުންވެސް ކަރުނަ އައިސް އައިސް ހުއްޓެވެ. އަރީކާގެ ފަހަތުގައި ޒާން ހުރީ ދެކެވެމުން ދިޔަ ވާހަކަ އަޑުއެހުމަށް ދެލޯ ބޮޑު ކޮށްލައިގެންނެވެ. އޭރު އެތާ ޒާޏް ހުރިކަން ތިންމީހުންތެރެއިން އެކަކަށްވެސް ނޭގެއެވެ.

=ނުނިމޭ=

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.