ކުށަކާ ނުލާ 16

ހަފްތާއެއް ފަހުން އަޔާޒްގެ ހަތާވީސް ވަނަ އުފަން ދުވަސް އަންނާތީ، ނަދާ ވިސްނަމުން ދިޔައީ އަޔާޒްއަށް ދޭނެ ހަދިޔާއަކާ މެދުއެވެ. އެ ދެމެދުގައި އޮތް ގުޅުން ކޮންމެ ގޮތަކަށް އޮތް ނަމަވެސް، އެހެން އަހަރުތަކެކޭ އެއް ފަދައިން އަޔާޒްއަށް މީރު ކެއުމެއް ތައްޔާރު ކުރުމަށާ، އަޔާޒްއަށް ބޭނުން ކުރެވޭނެ ފަދަ ހަދިޔާއެއް ދިނުމަށް ނަދާ ބޭނުންވެއެވެ. ނަމަވެސް އެ އަހަރުގެ އަޔާޒްގެ އުފަންދުވަސް އެހެން އަހަރުތަކާ ތަފާތު ވާނެ ކަން ނަދާއަށް އެނގެއެވެ. ނަދާގެ ފަރާތުން އަޔާޒް އެއްޗެއް ބޭނުން ނުވުމަކީވެސް ވެދާނެ ގޮތެކެވެ. އެހެން ވިޔަސް ނަދާގެ އެދުމަކީ، އެ ދުވަހު ކިތަންމެ ކުޑަ ވަގުތުކޮޅެއް ނަމަވެސް އަޔާޒްއާ އެކީ ހޭދަކޮށްލުމެވެ. ހަމަ އެކަނި އުފަންދުވަހުގެ ތަހުނިޔާ ކިޔާލުމަށާ، ހަދިޔާ ދޭނެ ވަގުތުކޮޅެއް ނަމަވެސް އެންމެ ރަނގަޅެވެ.

ހަފްތާއެއް ވަންދެން ނަދާ ވިސްނީ އަޔާޒްއަށް ދޭނެ އެއްޗަކާ މެދުއެވެ. އެންމެ ފަހުން ގޮތެއް ނުނިންމުމުން، ގަދާ ހިތަށް އެރީ، ބާޒާރަށް ނުކުމެ ކަމުދާ އެއްޗެއް ފެނިއްޖެ ނަމަ އެ ގަންނާށެވެ.

އަޔާޒްގެ އުފަން ދުވަހަކީ ބުދަ ދުވަހެވެ. އަންގާރަ ދުވަހު ހަވީރު، ރިދާއާ އެކީ ނަދާ ބޭރަށް ނިކުމެލީ ބާޒާރުކޮށްލަން ދަނީ ކަމުގައި މެސެޖަކުން އަޔާޒް ގާތު ބުނެލާފައެވެ. އެކި ފިހާރަތައް ބަލަމުން ދިޔަ އިރު ނަދާ ހިތް ހަމަ ޖެހޭ އެއްޗަކާ ދިމާ ވީ އިރުއޮއްސެން ކައިރި ވެފައި ހުއްޓައެވެ. ރިދާ އިރުއިރުކޮޅާ ނަދާއާ ދިމާ ކުރަމުން ދިޔައެވެ. ނަދާ ބޭނުން ވާ އެއްޗެހި ގަނެވުމުން ރިދާ ގޮވައިގެން ނަދާ ސްކޫޕަށް ވަދެލީ، އެ ފަދަ ތަނަކަށް ގޮސްނުލާތާ ވަރަށް ދުވަސް ވެފައި ވާތީއެވެ.

ރިދާ ގެޔަށް ލާފައި ނަދާ އައި އިރު އަޔާޒްއާ މައިހާ ތިބީ ސައި ބޯށެވެ. މައިހާ އައި ފަހުން، ހަވީރު އަޔާޒް އޮފީހުން އަންނަ އިރު މައިހާ ގޭގައި ހުންނަ ނަމަ އަބަދުވެސް އަޔާޒްއަށް ސައި ހަދަނީ މައިހާއެވެ. ނަދާ އެކަމާ އަޅައެއް ނުލައެވެ. ނަދާ ފެނުމުން، އާދައިގެ މަތިން ސައިބޯން އައުމަށް މައިހާ ނަދާއަށް ގޮވާލިއެވެ. މައިހާއަށް ބަލާލާފައި ނަދާ ދެ ފަރާތަށް ބޯ ހަލުވާލިއެވެ.

ނަދާ ކޮތަޅު ހިފައިގެން ކޮޓަރިއަށް ވަދެ އެއްޗެހި ބަދަލު ކޮށްލައިގެން ނަމާދު ކޮށްގެން ކޮޓަރިން ނުނިކުމެ އިނީ އަޔާޒްއާ މައިހާ ބޭރުގައި ތިބުމުންނެވެ. ސައި ބޮއެގެން އަޔާޒް ކޮޓަރިއަށް ވަނުމުން ނަދާ ބޭރަށް ނިކުމެ ރޭގަނޑުގެ ކެއުމަށް އެއްޗެހި ހޫނުކޮށްލިއެވެ.

އެރޭވެސް ބާރަ ޖެހި އިރު ނަދާ އޮތީ ހޭލައެވެ. ބާރަ ޖެހުމާއެކު އެއީ އަޔާޒްގެ އުފަންދުވަހެވެ. އެހެން އަހަރުތަކުގައި ބާރަ ޖެހުމާއެކު ނަދާ އަޔާޒްއަށް އުފަން ދުވަހުގެ ތަހުނިޔާ ކިޔާފައި މެސެޖެއް ފޮނުވާލަނީ، އެ ވަގުތުގައި އަޔާޒް އެންމެ ވާހަކަ ދައްކަން ބޭނުން ވާނީ މައިހާއާ ކަން އެނގޭތީ އެ ކަމަށް ހުރަސް ނޭޅުމަށެވެ. އެރޭވެސް މެސެޖްކޮށްލަން ނަދާ ބޭނުންވިއެވެ. ނަމަވެސް އެދެމީހުންގެ ގުޅުން އޮތް ގޮތުން ނުކެރިފައި ނަދާ އޮތީއެވެ.

އެހެން ރޭރެއާ ޚިލާފަށް އެރޭ އެގާރަ ޖެހި ތަނާ އަޔާޒް ނިދަން ވަނެވެ. ބާރަ ޖެހިތަނާ އަޔާޒްގެ ފޯނަށް މެސެޖެއް އައި އަޑު ނަދާއަށް އިވުނެވެ. ނަމަވެސް އެނގޭ ކަމަށް ނުހަދާ ނަދާ އޮތީއެވެ.

އަނެއް ދުވަހު އަޔާޒް އޮފީހަށް ދިޔުމުގެ ކުރިން ތަހުނިޔާ ކިޔަން ބޭނުން ވި ނަމަވެސް، އެކަހެރި ވަގުތުކޮޅެއް ނަދާއަށް ނުލިބުނީ މައިހާ ގޭގައި ހުރުމުންނެވެ. މެންދުރުވެސް ވީ ހަމަ އެހެންނެވެ. ހަވީރު މައިހާ ޑިޔުޓީއަށް ދިޔުމުން ނަދާ ހިތް ހަމަ ޖައްސާލީ އެރޭ ގޭގައި އަޔާޒްއާ ނަދާ އެކަނި ވާނެތީއެވެ. ނަދާ ބޭނުން ވާ ފުރުސަތު އެރޭ ލިބޭނެތީއެވެ.

މައިހާ ދިޔުމުން ނަދާ ފިހާރައަށް ގޮސް އެރޭގެ ޚާއްސަ ކެއުން ތައްޔާރު ކުރުމަށް ބޭނުން ވާނެ އެއްޗެހި ގަތެވެ. އަޔާޒްއަށް އެންމެ ކަމުދާނެ ހެން ކުކުޅު ހިކިކޮށް ހަދާފައި، ތަރުކާރީ ބަތާ މުގު ރިހަ ކައްކާ، އަލުވި ކުޅިކޮށް ހިކިކޮށް ހަދާފައި، ތަރުކާރީގައި އަޔާޒްއަށް އެންމެ މީރު ސަޓަނި ހަދާފައި، ފޮނި އެއްޗަކަށް ހެދީ ޗޮކްލެޓް ޓްރައިފްލް އެކެވެ. އޭގެ އިތުރުން އަނބު ކުދިކޮށް ކޮށާފައި ފަނި ގިރީ އެއީ އަޔާޒްއަށް ވަރަށް މީރު ބުއިމަކަށް ވާތީއެވެ.

އިރު އޮއްސެން އުޅެނިކޮށް އަޔާޒް ގެޔަށް އައުމުން، ސޭންޑްވިޗްއާ ޕުޑިންގ އެކު އަޔާޒްއަށް ނަދާ ސައި ހެދިއެވެ. ސައި ބޮއެގެން އަޔާޒް އެރޭ އުޅުނީ ލެޕްޓޮޕް ހިފައިގެން އޮފީހުގެ ކޮންމެވެސް މަސައްކަތެއް ކުރާށެވެ. އެއީ ބައެއް ދުވަސްދުވަހު އަޔާޒް ކުރާ ކަމެކެވެ. އޮފީހުގެ ބައެއް މަސައްކަތް ގޭގައި ނިންމައެވެ. އަޔާޒް މަސައްކަތުގައި އިނުމުން އުނދަގޫ ކުރާކަށް ނަދާއަކަށް ނުކެރުނެވެ.

އަށެއް ޖެހުމުން ނަދާ ކާން ހެދިއެވެ. މަސައްކަތް ނިންމާލާފައި އެރޭ އަޔާޒް ނަމާދު ކުރީވެސް ގޭގައެވެ. ކާން ހަދާފައި އެހެން ފަހަރު ތަކާ ޚިލާފަށް އެރޭ ނަދާ ސިޓިންގްރޫމަގައި އިނެވެ. ކާން އިށީނދެފައި އަޔާޒް ނަދާއަށް ބަލާލިއެވެ. އަޔާޒްގެ އުފަން ދުވަހަށް ވުމުން ނަދާ ތައްޔާރު ކުރި ކެއުމެއް ކަން ވަގުތުން އަޔާޒްއަށް އެނގުނެވެ. ހިތުގެ އަޑިން އުފާ ވި ނަމަވެސް އަޔާޒްއަށް އެއްޗެއް ނުބުނެވުނެވެ. އިރުކޮޅަކު، އަޔާޒްއަށް މޫނު ނުފެންނާނެހެން ޓީވީ ބަލަން އިން ނަދާއަށް ބަލަން އިނދެފައި އަޔާޒް ތައްޓަށް ބަތް އަޅަން ފެށިއެވެ.

އެ ވަގުތު ބެލް ޖަހާލި އަޑު އިވުމުން ހިތްހަމަ ނުޖެހިފައި ހުރެ ގޮސް ނަދާ ދޮރު ހުޅުވާލިއެވެ.

“އަޔާ!” އެތެރެއަށް ވަން ގޮތަށް މައިހާ ގޮވާލިއެވެ. އަދި ބާރަށް އައިސް، ތައްޓަށް ރިހަ އަޅަން އުޅުނު އަޔާޒްގެ އަތުގައި ހިފާ ހުއްޓުވިއެވެ.

“ކިހިނެއް ވީ؟” ހައިރާން ވެފައި އަޔާޒް އަހާލިއެވެ.

“ހިނގާބަލަ ބޭރަށް ގޮސްލަން” މައިހާ ބުންޏެވެ.

“މައި، މިރެއަކު ނޫން” އަޔާޒް ބުންޏެވެ.

“ޕްލީޒް އަޔާ، ސަޕްރައިޒްއެއް އޮންނާނެ… ހިނގާބަލަ… އާނއެކޭ ބުނެބަލަ” މައިހާ އަޔާޒްގެ އަތުގައި ހިފާ ދަމާލިއެވެ.

“ކައިގެންވެސް ދެވިދާނެއެއްނު؟” ނަދާއަށް ބަލާލަމުން އަޔާޒް ބުންޏެވެ.

“އުހުނ، މިރޭ ގެއަކުން ނޫން ކާނީ. ދެން ހިނގާބަލަ ޕްލީޒް… އަހަރެން އެކަނި ދޭން އުޅޭ ސަޕްރައިޒްއެއް ނޫނޭ… ދެން ކުޑަ ކުއްޖެއް ހެން ބޮޑާ ނަހާކާ ހިނގާބަލަ” މައިހާ ތުއި ވެލަމުން ބުނެލިއެވެ.

ދޮރު ކައިރީ ހުރި ނަދާ އެ ވަގުތު ބެލްކަންޏަށް ނިކުތެވެ. މައިހާގެ އެދުމަކަށް އަޔާޒް ދެކޮޅު ނުހަދާނެ ހެން ހީވުމުންނެވެ.

“މައި…” އަޔާޒް ދެންވެސް ދެކޮޅު ހަދަން އުޅުނެވެ.

“ދެން އަޔާ… އަހަރެން ވަރަށް ކުރިންވެސް ޕްލޭން ކޮށްފީމޭ، އަޔާއަށް ސަޕްރައިޒްއެއް ދޭން ވެގެން ކުރިން ނުބުނީ. ކޮންމެ ރެއަކުވެސް ކަނީ ގޭންނެއްނު؟ މިރޭ އެކަނި ހިނގާބަލަ ބޭރަށް، ޕްލީޒް…؟” މައިހާ އަނެއްކާވެސް ބުނި އަޑު ނަދާއަށް އިވުނެވެ.

“އޯކޭ ދެން… އެކަމަކު ތަންކޮޅެއް އަވަހަށް ގެޔަށް އަންނަން ބޭނުން، މިރޭ ވަރަށް ޓަޔަޑް، އަދިވެސް ނިންމަން ގެނައި މަސައްކަތްވެސް ނުނިމޭ” އަޔާޒް އެންމެ ފަހުން އެއްބެސް ވިއެވެ.

“ޔެސް… ތެންކިއު… އަހަރެން އަންނާނަން ޗޭންޖް ކޮށްލައިގެން، ފައިވް މިނަޓްސް އިނގޭ” މައިހާ އަވަހަށް ގޮސް ކޮޓަރިއަށް ވަނެވެ.

އަޔާޒް ބެލްކަންޏާ ދިމާއަށް ބަލާލިއެވެ. ނަދާގެ ކެއުން ދޫކޮށްލާފައި ބޭރަށް ދާން ބޭނުން ނުވިޔަސް، މައިހާ ދެރަ ވެދާނެތީ މައިހާގެ އެދުމަށް ދެކޮޅު ހަދަން އަޔާޒްއަށް ނުކެރުނީއެވެ. އެހެން ނޫނަސް، އަޔާޒްގެ އުފަން ދުވަސް ކަން ހަނދާން ހުރި ނަމަވެސް ނަދާ ތަހުނިޔާވެސް ނުކިޔާ ނޫން ހެއްޔެވެ؟ ރޭން ފެށިގެން އެ ވަގުތާ ހަމަޔަށްވެސް ނަދާ އަޔާޒްއަށް މެސެޖެއްވެސް ކޮށް ނުލިއެވެ.

ނަދާ އަޔާޒްއަށް ތަހުނިޔާ ނުކިޔުމުން އަޔާޒްއަށް ހިތާހިތާ ޝަކުވާ ކުރެވުނެވެ. ނަމަވެސް އެކަމާ ވިސްނާކަށް ގިނަ އިރަކު އަޔާޒްއަކަށް ނުހުރެވުނެވެ. މައިހާ ތައްޔާރު ވެގެން ކޮޓަރިން ނިކުމެގެން އަޔާޒްގެ އަތުގައި ހިފާ ދަމަމުން ކަހަލަ ގޮތަކަށް ދޮރާ ހަމައަށް ދިޔައެވެ.

“އަޔާ، ނަދާ ކައިރީވެސް ބުނެބަލަ އަންނަން” ކުއްލިއަކަށް ހުއްޓިފައި މައިހާ ބުންޏެވެ.

“މައިގެ ޕްލޭންއެއްނު؟ މައި ބުނެބަލަ” އަޔާޒް ބުންޏެވެ.

“ދެން…” އަޔާޒްއާ ދިމާއަށް ލޯ އަޅާލަމުން މައިހާ ބެލްކަންޏަށް ނިކުތެވެ.

“ނަދާ، ހިނގާ ބޭރަށް ގޮސްލަން” މައިހާ ބުންޏެވެ.

“ނޫން، ކުޑަކޮށް ބޮލުގަ ރިއްސާތީ މިއުޅެނީ” މައިހާއަށް ބަލާލަމުން ނަދާ ދެކޮޅު ހެދިއެވެ.

“އެހާ ގިނަ އިރެއް ނުވާނެ، ގޮސްލާފަ ވަރަށް އަވަހަށް އަންނާނީ” މައިހާ އަނެއްކާވެސް އެދުނެވެ.

“ނޫން” ނަދާ ދެފަރާތަށް ބޯ ހަލުވާލިއެވެ.

“އަޔާގެ އުފަން ދުވަސް ވީމަ ސަޕްރައިޒްއެއް ދޭން މި އުޅެނީ، ނަދާވެސް ބައިވެރި ވެލަން ވާނެއެއްނު…؟” މައިހާ ލަސްލަހުން ބުނެލީ އޭރުންވެސް ނަދާ ދާން އެއްބަސް ވެދާނެ ކަމަށެވެ.

“އަޔާއަށް ސަޕްރައިޒް ދެވޭނެއެއްނު އަހަރެން ނެތަކަސް…؟” ހިތްހަމަ ނުޖެހުނު ނަމަވެސް ނަދާ ބުނީ މަޑުންނެވެ.

“އޯކޭ” މައިހާ އެންމެ ފަހުން ހުއްޓާލިއެވެ.

އަޔާޒް ކައިރިއަށް ގޮސް ދެ ފަރާތަށް ބޯ ހަލުވާލަމުން މައިހާ އަޔާޒްގެ އަތުގައި ހިފައިގެން ނިކުތެވެ. ދޮރު ލައްޕާލުމުގެ ކުރިން އަޔާޒްއަށް ބެލްކަންޏާ ދިމާއަށް ބަލާލެވުނެވެ.

ދޮރު ލެއްޕި އަޑު އިވުމުން ނަދާ ތެދުވެގެން ކޮޓަރިއަށް ވަންނަން އައިސް، ކާން ތައްޔާރު ކޮށްފައި ހުރި މޭޒުމައްޗަށް ބަލާލިއެވެ. ލޮލުން ކަރުނަ އައީ، އެ ދުވަހު ނަދާ ކުރި އެއްވެސް ކަމެއް އަޔާޒްއަށް ފާހަގަ ނުވުމުންނެވެ. ކާން އިށީނދެފައިވެސް، މައިހާ ބުނުމުން ނުކައި ބޭރަށް ދިޔައީތީއެވެ. ނަދާ އަމިއްލައަށް ކައްކަން ފެށި ފަހުން އެ ފަހަރު ނޫނީ، އަޔާޒްގެ އުފަން ދުވަހެއްގައި ނަދާގެ އަތުން ތައްޔާރު ކުރި ކެއުމެއް އަޔާޒް ނުކާ އަހަރެއް ނުދެއެވެ. އެހެން ކަމެއް ނުކުރެވުނަސް އެ ކެއުން އެއީ ނަދާ ޚާއްސަކޮށް އަޔާޒްއަށް ޓަކާ ތައްޔާރު ކުރި ކެއުމެއް ކަން އަޔާޒްއަށް ނުވިސްނެނީ ހެއްޔެވެ؟ ނޫން ނަމަ ކުރެވުނު ކައިވެންޏަށް ފަހު ނަދާގެ ފަރާތުން އެ ވަރުގެ ކަމެއްވެސް އަޔާޒްއަށް ކަމުނުދަނީ ހެއްޔެވެ؟

އަޔާޒްއަށް ޓަކާ ކަމެއް ކުރަން އުޅެވުނީތީ އަމިއްލަ ނަފްސު ދެކެވެސް ނަދާ ރުޅި އައެވެ. ލޮލުން އައި ކަރު ފޮހެމުން ނަދާ ކޮޓަރިއަށް ވަދެ އަލަމާރި ހުޅުވާ، އެތެރެ ނުފެންނަ ކަރުދާސް ކޮތަޅެއް ނެގިއެވެ. އެއަށް ބަލަން ހުރެފައި، ރިހި ކުލައިގެ ކަރުދާހުން ޕާރުސަލް ކޮށްފައި އޮތް ފޮއްޓެއް ނަގާ ކަރުދާސްތައް ނައްޓާލިއެވެ. ފޮށި ތެރޭ ހުރި އެއްޗެހި ނެގުމެއް ނެތި މުށިތައް މައްޗަށް ވައްޓާލާ، ފައިން އެރީވެސް ރޮމުން، ލޮލުން އައި ކަރުނަ ރުޅިވެރިކަމާ އެކު ފޮހެމުންނެވެ. ފޮށި ހަލާކު ވުމުން އެއާ ކަރުދާސްތަކާ އެކު ބޮނޑިކޮށްލާފައި ގޮސް ކޮޓަރީގައި ހުރި ޑަސްޓްބިންއަށް ވައްޓާލިއެވެ.

ދެންވެސް ހިތަށް ހަމަ ޖެހުމެއް ނުލިބުމުން ފޯން ނަގާ ބާރަށް ލަވަ ޖަހައިގެން ހެޑްސެޓް އަޅައިގެން އެނދުމައްޗަށް ނަދާ ވެއްޓިގަތީވެސް ރޮމުންނެވެ. އެކަކުވެސް ގޭގައި ނޫޅޭތީ ރުއިމުގެ އަޑު ސިއްރު ކުރާކަށްވެސް ނަދާ ނޫޅެއެވެ. ބަންޑުން އޮވެގެން ބާރަށް ރޮމުން ދިޔަ އިރު ހިތާހިތާ އަމިއްލަ ނަފްސަށް އެއްޗެހި ކިޔަމުން ދިޔައެވެ. އަޔާޒް ދެކެ ލޯބި ވެވުނީތީއެވެ. އަޔާޒްއަށް ޓަކާ އެކި އެކި ކަންކަން ކުރަން ހިތް އެދޭތީއެވެ. އަޔާޒް ނަދާއާ މެދު ނުރުހުން ވާކަން އެނގި، އެކަމާ ދެރަ ވެވޭތީއެވެ. އަޔާޒްގެ ލޯތްބަށް އެދެވޭތީއެވެ.

ގެއިން ނިކުތްތާ ދިހަ ވަރަކަށް މިނަޓް ފަހުން އަޔާޒް މައްޗަށް އެރީ ސައިކަލުގެ ތަޅުދަނޑި ބާއްވާފައި ދެވުމުންނެވެ. ޓެކްސީއެއްގައި ދާން އުޅެފައިވެސް އެ ގަޑީގައި ޓެކްސީއެއް ނުލިބުމުން އެންމެ ފަހުން ނިންމީ ސައިކަލުގައި ދާށެވެ. ކޮޓަރީގެ ދޮރު ކައިރީ ހުރި ކަބަޑު މަތީ އޮތް ތަޅުދަނޑި ނަގައިގެން އެނބުރިލަން އުޅެފައި އަޔާޒް ހުއްޓުނީ ކޮޓަރި ތެރެއިން އިވުނު އަޑަކުންނެވެ. ކިރިޔާ ނުލެއްޕި ހުރި ދޮރުގައި އަތް ޖައްސާލަމުން އަޔާޒް ތަންކޮޅެއް ބޮޑަށް ހުޅުވާލިއެވެ. އެއާއެކު ނަދާގެ ރުއިމުގެ އަޑު ބާރު ވިއެވެ.

ދޮރާ ދިމާއަށް ފުރަގަސް ދީގެން އެނދުގައި ބަންޑުން އޮތް ނަދާ ރޯ އަޑާ އެކު، ކަންފަތުގައި ޖަހާފައި ހުރި ހެޑްސެޓުން ލަވައިގެ އަޑުވެސް ކޮންމެވެސް ވަރަކަށް އިވެއެވެ. ބާރަށް ރޮމުން ދިޔަ ނަދާ އެ ގޮތަށް ރުއި އަޑު އޭގެ ކުރިން އަޔާޒްއަށް އިވިފައި ވަނީ އެންމެ ދުވަހަކުއެވެ. ޝާމިލްމެން ގެއިން ހުދާ ނިކުތް ދުވަހުއެވެ.

ކިތަންމެ ވަރަކަށް ރުޔަސް، ނަދާ ރޮނީ އެންމެންނަށްވެސް ސިއްރުންނެވެ. އެކުގައި ބޮޑެތި ވެގެން އައި އިރު ނަދާގެ ލޮލުން ކަރުނަ އައި ތަން އަޔާޒްއަށް ފެނިފައި ވަނީ މަދު ފަހަރަކުއެވެ. ނަމަވެސް ރޮއެރޮއެ ލޯ ރަތްވެ، ދުޅަވެފައި ހުއްޓާ ކިތަންމެ ފަހަރަކު އަޔާޒް ވަނީ ދެކެފައެވެ.

އެންމެ ފަހުން ހުދާމެން އެ ގެޔަށް އައި ދުވަހުވެސް އެ މަންޒަރު އަޔާޒްއަށް ވަނީ ފެނިފައެވެ. އެރޭ ނަދާ ފާހާނާއިން ނިކުތް އިރު، އަޔާޒްއަށް އެ މޫނު ނުދައްކަން ވެގެން އަނެއް ފަރާތަށް އެނބުރިގެން ހުރެ ކޮޓަރިން ނިކުތް އިރުވެސް ނަދާ ހުރީ ރޮއެފައި ކަން އަޔާޒްއަކަށް ސިއްރެއް ނުވެއެވެ.

ނަމަވެސް ނަދާގެ ރުއިމުން ދުވަހަކުވެސް އަސަރު ނުކުރާ ވަރަށް އެރޭ، އެ ވަގުތު އަޔާޒްއަށް އަސަރުކޮށްލިއެވެ. ހިތް ފިތިގެން އައި ފަދަ އިހުސާސެއް ކުރެވުމާއެކު އަޔާޒްއަށް މޭގައި އަތް ޖައްސާލެވުނީ ގަސްތަކާ ނުލައެވެ.

ސައިލެންޓަށް ލާފައި އޮތް ފޯން ވައިބްރޭޓް ވާން ފެށުމާއެކު އަޔާޒް ދިޔައީ ސިއްސައިގެންނެވެ. ޖީބުން ފޯން ނަގާފައި، މައިހާގެ ނަން ފެނުމުން، އެއް ފަހަރު ނަދާއަށް ބަލާލާފައިވެސް އަޔާޒް ނިކުތީ ބޭރަށެވެ.

ރެސްޓޯރެންޓެއްގައި ކޭކަކާއި އެކު، ކެއުން ތައްޔާރު ކޮށްފައި ހުރީ އަޔާޒްއަށް ކަމުދާނެ ގޮތަށެވެ. މައިހާ ރައްޓެހި ދެ ކުއްޖަކާ އެކު އަޔާޒްގެ އެންމެ ގާތް ދެ އެކުވެރިންވެސް ތިއްބެވެ. އެންމެން ވެގެން އަޔާޒްއަށް ތަހުނިޔާ ކިއެވެ. ކާން އިން އިރުވެސް އަޔާޒްގެ ހަނދާނަށް އަންނަމުން ދިޔައީ ނަދާ ރޯން އޮތް ގޮތެވެ. ކާ ހިތް ނުވެފައި، އެތަނުގައި އިންނަން އުނދަގޫ ވުމުން އަޔާޒް ބޭނުން ވީ އަވަހަށް ގެޔަށް ދާށެވެ. ނަމަވެސް މައިހާ ބޭނުންވީ ކޭކު ފަޅާފައި ދާށެވެ. އެންމެން ކިޔަން ފެށުމުން އަޔާޒް ކޭކު ފެޅިއެވެ.

ކޭކު ފޮއްޗެއް ހިފައިގެން އައިސް އަޔާޒްގެ ބެސްޓް ފްރެންޑް ހަމްދާން، ދުރުގައި ވަކިން އިން އަޔާޒް ކައިރީ އިށީނެވެ.

“އަޔާ ކިހިނެއް ހަދައިގެން ތި އުޅެނީ؟ އަހަރެން ހީކުރީ މެރީ ކުރީމަ މައިގެ ޗެޕްޓަރ ނިމުނީ ކަމަށް. އެކަމަކު ގޭގަ ވައިފް، ބޭރުގަ ގަރލް ފްރެންޑް ގެންގުޅޭ ކަހަލަ މީހަކަށްތަ އަޔާ ތި ވީ؟” ހަމްދާން ދިމާ ކޮށްލިއެވެ.

“ނޫން… އެހެންނެއް ނޫން…” އަޔާޒް ދެކޮޅު ހެދިއެވެ. ނަމަވެސް މައިހާއާ އޮތް ގުޅުން ބުނެދޭކަށް ނޭނގުނެވެ.

“ކޮންމެ ގޮތަކަށް ވިޔަސް ތީ ރަނގަޅު ގޮތެއް ނޫން އަޔާ… ރަނގަޅު ވާނީ ކޮންމެސް އެއް ގޮތަކަށް ނިންމުން… ނަދާ ދޫކޮށްލާ، އެހެން ނޫނީ މައިއާ މެރީ ކުރޭ ދެ އަނތްބަށް. ތިހެން އުޅުން އެއީ އެއް ގޮތަކަށްވެސް ރަނގަޅު ގޮތެއް ނޫން” ހަމްދާން އަޔާޒްއަށް ނަސޭހަތްތެރިވިއެވެ.

“އަހަރެން އަންނަން ބޭނުން ވެގެންނެއް ނޫން މިރޭ މި އައީކީވެސް، މައި ކުރު ނުކޮށްގެން އައީ” އަޔާޒް ބުންޏެވެ.

“ކަމެއް ވެގެން ދޯ އަޔާ އަންނަން ބޭނުން ނުވާ ތަނަކަށް އޭނައަށް އަޔާ ގެނެވޭނީ؟” ހަމްދާން ބުނެލިއެވެ.

އެއްޗެއް ނުބުނެ ދެ ފަރާތަށް ބޯ ހަލުވާލާފައި އަޔާޒް އިރުކޮޅަކު ހުއްޓެވެ.

“ދަނީ ދެން…” އަތުގައި ހުރި ތަށި މޭޒުމަތީ ބަހައްޓާފައި އަޔާޒް ބުންޏެވެ.

އެންމެންވެސް ދާން ތައްޔާރު ވިއެވެ.

“ކޭކު ހިފައިގެން ދޯ ދާނީ؟” މައިހާ އަހާލިއެވެ.

“ނޫން، މިތަނުގެ މީހުންނަށް ދީ” އަޔާޒް ދެކޮޅު ހެދިއެވެ. އެ ކޭކެ ގެޔަށް ގެންދާކަށް އަޔާޒް އެއްގޮތަކަށްވެސް ބޭނުމެއް ނޫނެވެ.

އަޔާޒް ބުނި ގޮތުން އިތުރަށް އެއްޗެއް ބުނަން މައިހާއަކަށް ނުކެރުނެވެ.

އަޔާޒްއާ މައިހާއަށް ގެޔަށް ދެވުނު އިރު ދިހައެއް ޖަހަނީއެވެ. ކާން ހަދާފައި ހުރި ގޮތަށް ކާ މޭޒުމަތި ހުއްޓެވެ. އަޔާޒް ކޮޓަރިއަށް ވަދެ ބަލާލި އިރު، އޭރު އޮތް ގޮތަށް ނަދާއަށް އޮތީ ނިދިފައެވެ. ލެޕްޓޮޕް ހިފައިގެން އަޔާޒް އަނެއްކާވެސް ބޭރަށް ނިކުތީ ކުރިން ކުރަން އިން މަސައްކަތް ނިންމާށެވެ. ނަދާއަށް ނިދިފައި އޮތުމުން އުނދަގޫ ވެދާނެތީއެވެ. އޭރު މައިހާ އުޅުނީ މޭޒުމަތީ ހުރި ތަށިތައް ނަގާ، އެއްޗެހި ހޫނު ކުރާށެވެ. އެކަން ނިންމާފައި މައިހާ އައިސް ޓީވީ ހުޅުވާލިއެވެ.

އެގާރަ ގަޑި ބައި ވުމުން އަޔާޒް ލެޕްޓޮޕް ލައްޕާލާފައި ކޮފީ ޓެބަލް މަތީ ބާއްވާލާފައި ސޯފާގައި ލެނގިލަމުން ލޯ މަރާލިއެވެ.

“ނިދި އައީތަ؟” މައިހާ އަހާލިއެވެ.

“ނިންޖަށް ވުރެ ބޮޑަށް ވަރުބަލި ވެއްޖެ. މައި ނިންޖެއް ނާދޭތަ؟” އިން ގޮތަށް އިނދެ އަޔާޒް އަހާލިއެވެ.

“ނަދާ އޮތީ ނިދާފަތަ؟” މައިހާ އެހީ އެހެން ވާހަކައެކެވެ.

“އާނ، ކިހިނެއް ވީ؟” ލޯ ހުޅުވާ މައިހާއަށް އަޔާޒް ބަލާލިއެވެ.

އެއްޗެއް ނުބުނެ އިން ތަނުން ތެދުވެގެން އައިސް މައިހާ އަޔާޒް ކައިރީ އިށީނެވެ.

“ހެޕީ ބަރތްޑޭ އަޔާ!” އަޔާޒްގެ މޫނުގައި އަތް ޖައްސާލަމުން މައިހާ ބުންޏެވެ.

“މައި…” އަޔާޒް އެއްޗެއް ބުނަން އުޅުނު ނަމަވެސް މައިހާ އަޔާޒްގެ ވާހަކަ މެދު ކަނޑާލިއެވެ.

“ކޮންމެ އަހަރަކުވެސް އަހަރެން އަޔާއަށް ވިޝް ކުރާހެން ވިޝް ކޮށްލަން ބޭނުމީ…” ދެކޮޅު ހަދާނެ ފުރުސަތެއް އަޔާޒްއަށް ނުދީ ދެ އަތުން އަޔާޒްގެ މޫނުގެ ދެ ފަރާތުގައި ހިފާލުމާއެކު މައިހާ އަޔާޒްގެ ތުންފަތުގައި ބޮސްދިނެވެ.

އަޔާޒްއަކަށް ދެކޮޅެއް ނުހެދުނެވެ. ދެއަތުން މައިހާ ގަޔާ ކައިރި ކޮށްލަމުން އަތުތެރޭގެއި މައިހާ ބޮނޑިކޮށްލިއެވެ. ނަދާއާ މެދު ހިތުގައި ހިނގަމުން ދިޔަ އޮޅުންބޮޅުންތަކެއް ފަދަ ޚިޔާލުތަކުން ދުރުވެލުމަށް، އަޔާޒް އެ ފުރުސަތުގެ ބޭނުން ކުރިއެވެ. އަޔާޒް ލައިގެން އިން ޓީޝާޓުގެ ދަށަށް ދެ އަތްތިލަ ލައްވާލަމުން މައިހާ އަޔާޒްގެ މޭގައި ފިރުމަން ފެށިއެވެ. މައިހާގެ ނަން ކިޔާލަމުން އަޔާޒް މައިހާގެ އުނަގަނޑުގައި ހިފާ އުފުލާލާފައި ގެނެސް އަޔާޒްގެ އުނގުގައި، އަޔާޒްއަށް ކުރިމަތި ވާނެހެން ބޭންދުމާއެކު މައިހާގެ ކަންފަތާ ކަރުގައި އަޔާޒްގެ ތުންފަތް ހަރަކާތް ކުރަން ފެށިއެވެ.

ކޮޓަރި ދޮރުމަތީ އެ މަންޒަރު ބަލަން ހުރި ނަދާ އެނބުރި ކޮޓަރިއަށް ވަދެ މަޑުމަޑުން ދޮރު ލައްޕާލިއެވެ. ދެރައާއި ރުޅިން ލޮލުން އައި ކަރުނަ ދެ އަތުން ފޮހެމުން ގޮސް ނަދާ އަނެއްކާވެސް އޮށޯތެވެ.

އޭގެ ދިހަ ވަރަކަށް މިނަޓް ކުރިން ނަދާއަށް ހޭލެވުމުން ފޯނުން ގަޑި ބަލާލިއެވެ. އެގާރަ ގަޑި ސާޅީހެވެ. ބޭރުން ޓީވީގެ އަޑު އިވުމުން އަޔާޒްއާ މައިހާ ގެޔަށް އައިކަން ނަދާއަށް އެނގުނެވެ. ބޭރަށް ނިކުންނަ ހިތް ނުވި ނަމަވެސް ނަދާ ނިކުތީ މޭޒުމަތީގައި ކާން ހަދާފައި ހުރި ތަށިތައް ނަގާ، އެއްޗެހި ހޫނު ކޮށްލާށެވެ. މަޑުމަޑުން ދޮރު ހުޅުވާލާފައި ސިއްރުން ކަހަލަ ގޮތަކަށް ނަދާ ނިކުތީ އެ ފަދަ މަންޒަރެއް ފެނިދާނެ ކަމަކަށް ނޫނެވެ. އަޔާޒްއާ މައިހާ ތިބި ގޮތް ފެނުމުން ނަދާގެ ފައި ބިމުގައި ތަތްވި ކަހަލައެވެ. ގަބޫލު ކުރަން ދަތިވެފައި ހުރެވުނީއެވެ. ނަމަވެސް އަޔާޒްގެ އުނގަށް މައިހާ ލީ ހިސާބުން އިތުރަށް ބަލާކަށް ނަދާއަކަށް ނުހުރެވުނެވެ.

އަޔާޒްގެ މޫނުގައި ހިފާލަމުން މައިހާ އަނެއްކާވެސް އަޔާޒްގެ ތުންފަތުގައި ބޮސްދޭން ފެށިއެވެ. މައިހާގެ އިސްތަށިގަނޑު ތެރެއަށް އަތްތިލަ މަހާލަމުން އަޔާޒް އަދިވެސް ބޮޑަށް މައިހާއާ ކައިރި ވާން އުޅުނެވެ.

ނުނިމޭ

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.