ވިންދޭ ލޯބި ތީ އެދޭ 57

ހަރަކާތެއް ގެންނަން ނޭނގިފައި ނާއިލްއަށް ބަލަހައްޓާއިގެން ހުރި އަޝްރާއަށް ސިހުންގެނުވީ އޭނަގެ ހަށިގަނޑުގައި ނާއިލް ނުހަނު ބާރަށް ބައްދާލުމުންނެވެ. އެވަގުތު އަޝްރާއަށް ހީވީ އޭނަގެ ނޭވާވެސް އެތެރޭގައި ތާށިވީހެންނެވެ. އޭނަގެ ދެލޯ ބޮޑުވެގެން ދިޔައިރު ހިތުގެ ހިނގުންވެސް ހިނދުކޮޅަކަށް މަޑުޖެހިލިހެން ހީވިއެވެ. ވާނުވާ ނޭނގި ހަރަކާތެއްވެސް ކޮށްލަން ނޭނގިފައި އަޝްރާއަށް ދެ މިނިޓު ވީއިރުވެސް އެހެން ހުރެވުނެވެ. ” ނާއިލް… ކީއް… ކީއްތަތިކުރަނީ…” ވާނުވާ ރޭކާލި އަޝްރާ އޭނަގެ އަމިއްލަ ނަފްސު ހަމައަކަށް އަޅުވާލަމުން ނާއިލްގެ މޭގައި އަތްއަޅާ ކޮށްޕާލާ ކޮންމެވެސް ވަރެއްގެ ނުރުހުންތެރިކަމާއެކު ވާހަކަ ދެެއްކިއެވެ. ހައިރާންކަމާއި ސިހުމާއެކު ނާއިލްއަށް އަޝްރާގެ މޫނަށް ބަލައިލެވުނެވެ. ހިތުގެ ހާލު އަޝްރާގެ ކުރިމަތީގައި ހާމަކުރަން އެހާ ގާތްވެފައި ވަނިކޮށް އެފަދަ އަމަލެއް އަޝްރާގެ ފަރާތުން ފެނުމުން އޭނާ ހުރީ ހަމަ ރަނގަޅަށްވެސް ބުނަންވީ އެއްޗެެއް ނުވިސްނިފައެވެ. ”އަހަރެންނަށް އެހެން ކަންތައް ކުރެވުނީމަ ބަދަލު ހިފަނީދޯ… އަހަރެން އޭރު ބުނީމެއްނު ނާއިލް ގާތު މާބޮޑަށް އެކްސައިޓްވެފަ ހުރީމައޭ އެހެން ކަންތައް ކުރެވުނީ… ” މިފަހަރުވެސް އަޝްރާ ވާހަކަ ދެއްކީ ނުރުހުމާއެކުގައެވެ. ” އަހަރެން ހީކުރީ އަޝްރާ ގުޑްނައިޓް ހަގެއް ބޭނުންވެގެން އައީ ކަމަށް… ” މޫނު މަތީގެ އަސަރުތައް ފޮރުވާލަން މަސައްކަތްކުރަމުން ނާއިލް ބުނެލިއެވެ. ” އަހަރެން ބޭނުމެއް ނޫން ގުޑް ނައިޓެއް ހަގެއް… އަހަރެން މިއައީ ނާއިލްގެ ފޯނު ހިފައިގެން ދެވުނީމަ ފޯނު ދޭންވެގެން… އިނގިއްޖެތަ… ” ނާއިލްގެ އަތަށް ފޯނު ލައިދެމުން ނުރުހުންތެެރިކަމާއެކު އެހެން ބުނުމަށްފަހު އަޝްރާ އޭނަގެ ކޮޓަރިއަށް ދިޔުމަށް ހިނގައިގަތެވެ. ނާއިލް ހައިރާންވެފައި އަޝްރާ ދިޔަ ދިމާލަށް ބަލަން ހުއްޓެވެ. އޭނަގެ ލޯ ކުރިމަތިން އަޝްރާ ގެއްލުމުން ނާއިލް އޭނަގެ ކޮޓަރިއަށް ވަދެ ދޮރު ޖެހިއެވެ.

” ކޮންކަހަލަ ކުއްޖެއްތަ އެއީ އަޅެ… އެއްފަހަރު އައިސް ބައްދާލަފާނެ… ދެވަނަ ފަހަރަށް ރުޅި އައިއްސާނެ… އެއްފަހަރު އެދެލޮލުން ލޯބި ފެނުނިއްޔާ ދެވަނަ ސިކުންތުގަ ހީވާނީ އެދެލޮލުން ފެންނަން ހުރި ރުޅިން އަހަރެން ފިއްސާލަފާނެހެން… އައި ކާންޓް ބިލީވް އިޓް… ވިސްނަންވީ ކޯންޗެއް ކަމެއް ނޭނގެ… މިހުރިހާ ދުވަސްވީއިރުވެސް އަޝްރާގެ މިޒާޖު އަހަންނަށް ދަސްނުވަނީ ކަންނޭނގެ… އާހް… ޝީ އީޒް ޓޯޓަލީ ޑިފަރެންޓް… ” ކޮޓަރިއަށް ވަދެ ނާއިލް އަމިއްލަ ނަފްސަށް އަޑުއިވޭ ވަރަށް ކުދި ކިޔަމުން ދިޔައެވެ. އަޝްރާ އޭނަގެ ހަށިގަނޑުގައި ބައްދާލުމަށްފަހު އެމޫނުން ފެނިގެން ދިޔަ އަސަރުތަކުން ނާއިލްއަށް އަޝްރާގެ ހިތްވެސް އޭނައަށް އެދޭކަން ގަބޫލުކުރެވުނެވެ. އެހެންކަމުން އޭނާ ނިންމައިގެން ހުރީ ދެން ލިބޭ ފުރުސަތެއްގައި އޭނަގެ ހިތް އަޝްރާގެ ކުރިމަތީގައި ހުޅުވާލުމަށެވެ. އެހެނަސް ކަންތައް ހިނގާދިޔަ ގޮތުން އޭނަގެ ޚިޔާލު ބަދަލުވީއެވެ. އަޝްރާގެ ފަރާތުން ފެނުނު އަމަލުތަކުން އޭނަގެ ހިތް ދެވަނަ ވިސްނުމަކަށް ދިޔުމަށް މަޖުބޫރު ކުރުވައިފިއެވެ. ފުން ނޭވައެއް ދޫކޮށްލާ ނާއިލް އޭނަގެ ކޮޓަރިން ބޭރަށް ނިކުމެވެން ހުންނަ ބެލްކަންޏަށް ނުކުތެވެ. އެމާހައުލުން އޭނަގެ ހިތަށް ކޮންމެވެސް ވަރެއްގެ ހަމަޖެހުމެއް ލިބިގެން ދިޔައެވެ. ބެލްކަނީގައި ހުރި ޕޮޓްތަކުގައ އިންދާފައިވި މާ ގަސްތަކުގައި ފޮޅިފައިވި މާމެލާމެލިން މުޅި ތަން އެއްވަސް ކުރުވާފާވާއިރު ޖެހެމުންދިޔަ ވައި ރޯޅިތަކުން ހިތަށް ހަށިގަނޑަށް އަރާމު އިހުސާސެއް ކުރުވައެވެ. ފަނަރަ ވަރަކަށް މިނިޓު އެހިތްގައިމު މާހައުލުގައި ހޭދަކޮށްލުމަށްފަހު ނާއިލް ކޮޓަރި ތެރެއަށް ވަނީ ނިދާލުމުގެ ބޭނުމުގައެވެ.

ގެއަށް ގޮސް ތާޒާވެލައިގެން މިންހާ ނިދަން ތައްޔާރުވެލިއެވެ. އެނދުގައި އޮށޯވެ ހަމަޖެހިލިތަނާ ފޯނު ރިންގުވާން ފެށިއެވެ. ފޯނުގެ ސްކްރީނުގައިވި އިއާންގެ ނަން ފެނުމާއެކު މިންހާގެ ތުންފަތުގައިވި ހިނިތުންވުން ވަގުތުން ފުންވެގެން ދިޔައެވެ. ލަސްކުރުމެއްނެތި މިންހާ ފޯނު ނަގައި ވާހަކަ ދައްކަން ފެށިއެވެ. ދެމީހުން ފޯނު ބޭއްވީ އެތައް އިރަކު ވާހަކަ ދެއްކުމަށްފަހުއެވެ. އެކަކު އަނެކަކާ އެތައް ވަޢުދެއް ވެފައެވެ. ދިރިއުޅުމުގެ ކޮންމެ ހާލަތެއްގައިވެސް އެކަކު އަނެކަކާ އެކުވާނެ ކަމުގެ ފުރިހަމަ ޔަގީންކަން ދީފައެވެ. ހިތުގައިވި ޖަޒުބާތުތައް އެކަކު އަނެކަކާ ހިއްސާކުރެވި ލޯބިވެރިންގެ ގޮތުގައި ދެމީހުން ގުޅިގެން ދިޔުމުގެ ސަބަބުން ދެހިތަށްވެސް ލިބިފައިވަނީ ބަޔާންކުރަން ދަތި އުފަލަކާއި ހިތްހަމަޖެހުމެކެވެ. އެތައް ދުވަހެއްގެ އުއްމީދު ހާސިލްވުމުން އުފާނުވާނީ ކާކު ހެއްޔެވެ؟ މިރޭ ދެމީހުން އެކުގައި ހޭދަކުރި އެކި އެކި ފޮނި ހަނދާންތަކުން ސިކުނޑި ވަށާލާފައިވާއިރު އެފަދަ ވަގުތުކޮޅަކަށް ދެމީހުނަށްވެސް އުއްމީދުކުރެވެމުން ދިޔައެވެ. ނިދީގެ ފުން ކަނޑަށް ގެނބިގެން ދިޔައިރުވެސް ދެމީހުންގެ މޫނު މަތިންވެސް ފެންނަނީ އުފާވެރިކަމާއި ހިތްހަމަޖެހުމުގެ އަސަރުތަކެވެ.

އެނދުގައި ދެފަރާތަށް ފުރޮޅި ފުރޮޅި އޮތް އަޝްރާގެ ދެލޮލުގައި ނިދީގެ އެއްވެސް އަސަރެެއް ނުވެއެވެ. ސިކުނޑީގައި އެނބުރެމުންދިޔަ ޚިޔާލުތަކުން ނިދި ވަނީ އޭނަ އާއި ދުރުވެފައެވެ. އެންމެ ފަހުން އޭނައަށް ނާއިލް އާއިމެދު ކަންތައް ކުރެވުނު ގޮތުން އެހިތަށް އުނދަގޫ ކަމެެއް އިހުސާސްކުރެވެއެވެ. އޭރު އަމިއްލަ އިހުސާސްތައް ކޮންޓްރޯލް ކުރުމަށް އޭނައަށް ރުޅި އިސްކުރެވުނީއެވެ. އޭނަގެ އެއަމަލުން ނާއިލްގެ މޫނު މައްޗަށް ވެރިވި ކުލަވަރު ހިތަށް އެރުމާއެކު އޭނަގެ މޭގައި ރިއްސާލިއެވެ. ނާއިލްގެ މޫނުގައިވި އެޖާދުވީ އަސަރުތައް އޭނާ ދުރައްލާ ކޮށްޕާލުމާއެކު މުޅިން ފިލައިގެން ދިޔައެވެ. އެވަގުތު އެހެން ނުހެދުނުނަމައޭ އެތައް ފަހަރަކު މިހާރު ހިތަށް އެރިއެވެ. އެކި އެކި ޚިޔާލުތަކުން އޭނައަށް އުނދަގޫ ކުރަމުން ދިޔައިރު އަޝްރާއަށް ނިދުނީ އެރޭ ބާރަވެސް ޖެހިފަހުންނެވެ.

ބެލްކަނީގެ ރެއިލިން ކައިރި ހުއްޓިލައިގެން ހުރި އަލޫފްގެ މޫނު މަތީގައިވީ މާޔޫސްކަމެވެ. ސިނގިރޭޓަކަށްފަހު ސިނގިރޭޓެެއް ބޮމުން ދިޔައިރު އެއިން އޭނަގެ ސިއްޙަތަށް ގެއްލުމެއްވެދާނެ ކަމާމެދު އެއްވެސް ވަރަކަށް ވިސްނާނުލައެވެ. އޭނައަށް ވަށާއިގެން އިހުސާސްވަނީ އެކަނިވެރިކަމެވެ. އޭނަގެ މުޅި ދިރިއުޅުމަށް ވަނީ އެތައް ބަދަލުތަކެެއް ގެނުވާފައެވެ. ނަފްސުގެ ހަމަޖެހުން ގެއްލި ދިރިއުޅުން މަތިން ފޫހިވާން ފަށައިފިއެވެ. މާޒީގައި އުޅެވުނު ގޮތުގެ ސަބަބުން އެތައް ގުޅުމެއް ވަނީ ހީނަރުވެގެން ގޮސްފައެވެ. އީލާފް އާއި އޭނަގެ ގުޅުން ހީނަރުވެފާވާއިރު ޝަމްހާ އާއި އޭނަ އާއި ދެމެދުވެސް އެއްވެސް ގުޅުމެއް ނޯވެއެވެ. އޭނާ ކުރީގެ އުފާވެރި ދިރިއުޅުން ބޭނުމެވެ. އެންމެންގެ މަޢާފު ބޭނުމެވެ. ޚާއްސަކޮށް މިންހާގެ މަޢާފު ލިބުން އޭނައަށް ވަރަށް މުހިއްމެވެ. އޭނައަށް ހަގީގީ ހަމަޖެހުން ލިބޭނީ އޭރުންނެވެ. ރޭގަނޑުގެ ވަގުތުތައް އަލޫފް ގިނައިން ހޭދަކުރަނީ އެހެންނެވެ. ސިނގިރޭޓަކީ އޭނަގެ ގާތް އެކުވެރިއެއްފަދައެވެ. މިރޭވެސް އޭނާ ނިދަން ކޮޓަރިއަށް ވަނީ ދަންވަރު ދޭއްވެސް ޖެހިފަހުންނެވެ.

އައު ދުވަހަކަށް ދުނިޔެއަށް މަރުހަބާ ކިޔާ އިރުގެ ރަން ދޯދިތަކުން ދުނިޔެ އަލިކުރަމުން ދިޔައިރު އުޑު މަތީގައި ވަނީ އަޖައިބެއް ކަހަލަ ކުލަވަރެކެވެ. މަޑު އޮރެންޖު ކުލައަކުން އުޑުމަތި ފަވާާލެވިފައިވީއިރު ބަލައިލަން ނުހަނު ހިތްގައިމެވެ. ބަގީޗާ ތެރޭގައި ހުރި ބެންޗުތަކުން ބެންޗެއްގައި އިށީންދެލައިގެން އިނދެ ކޮފީ ބޮމުންދިޔަ ޝަމްހާ އިނީ ޚިޔާލަކަށް ގޮސް ގެއްލިފައެވެ. އޭނަގެ ޚިޔާލުތައް ގުޅިފައިވަނީ އަލޫފްއާއެވެ. އަދިވެސް އޭނަގެ ހިތާއި ސިކުނޑީގައި ރަސްކަންކުރަމުން ދަނީ އަލޫފްއެވެ. އެންމެ ހިތް އެދޭ ބައިވެރިޔާގެ އެހާ ގާތުގައި މަސައްކަތްކުރާއިރުވެސް އަލޫފްގެ ފަރާތުން އޭނަ އާއިމެދު ބަހައްޓާ ދުރުކަމުން ޝަމްހާގެ ހިތަށް ވަރަށް އަސަރުކުރެއެވެ. އެހެނަސް އެނޫން ގޮތެއް މިއަދަކު ނެތެވެ. އޭނަގެ ހަޔާތަށް މިހެން މެދުވެރިވީވެސް ޚުދު އޭނައަށް އެޅުނު ކަތި ފިޔަވަޅަކުންނެވެ. ހިތްދަތިކަމާއި އެކަނިވެރިކަމުގައި ދުވަސްތައް ވޭތުކުރަންޖެހުނު ނަމަވެސް ދެން އެފަދަ ކަތި ފިޔަވަޅެއް ނޭޅުމަށް ޝަމްހާ އަމިއްލަ ނަފްސަށް އެތައް ފަހަރަކު ވަޢުދުވިއެވެ. އޭނަގެ ފަރާތުން އެހެން މީހަކަށް ހިތްދަތިކަމެއް ލިބޭކަށް ފަހަރެއްގައިވެސް އޭނައަކަށް ނޭދެވޭނެއެވެ. ޚިޔާލުތަކަށް ގޮސް ގެއްލިފައި އިން ޝަމްހާ ސިހުނީ އޭނަގެ މަންމަ ގޮވާލުމުންނެވެ. ލަސްނުކޮށް ކޮފީ މަގު ހުސްކޮށްލުމަށްފަހު ޝަމްހާ ގޮސް ގެއަށްވަނެވެ.

ސިޓިން ރޫމުން ބޭރު ބަލައިލި އަޝްރާއަށް ބޭރުގައި ހަދާފައި ހުރި ހަޓުދަށުގައި ނާއިލް އިންތަން ފެނުނެވެ. އޭނާ އަވަސް ހިނގުމެއްގައި ގޮސް ކާކޮޓަރިއަށް ވަދެ ދެކޮފީ ތައްޔާރު ކޮށްލިއެވެ. އޭރު ބަދިގޭގައި ޒާހިޔާ ސައި ތައްޔާރުކުރުމުގައި އުޅެއެވެ. ކޮފީ ތައްޔާރުކޮށްގެން އަޝްރާ ކާކޮޓަރިން ނިކުމެ ބޭރަށް ދިޔުމަށް މިސްރާބުޖެހިއެވެ. ތަންކޮޅަކަށް ގޮސް ޒަހާގެ އަޑު އިވުުމުން އުސްއުފުލާލި އަޝްރާއަށް ހިނިތުންވުމެއްގައި ތިބެ ވާހަކަ ދައްކަމުންދިޔަ ނާއިލް އާއި ޒަހާ ފެނުނެވެ. ދެމީހުން މޭޒު ކައިރި އިށީންދެލައިގެން ތިބިއިރު އާވި އަރައަރާ ހުރި ދެކޮފީ މަގު މޭޒު މަތީގައި ހުއްޓެެވެ. އެމަންޒަރު ފެނި އަޝްރާއަށް ހިފަހައްޓާއިގެން ހުރި ޓްރޭއަށް ބާރުކޮށްލެވުނެވެ. އިރުކޮޅަކު އެހެން ހުރުމަށްފަހު ފަސްއެނބުރި ދާން ހިނގައިގަންތަނާ ޒަހާ އޭނައަށް ގޮވާލި އަޑު އިވުނެވެ. ޒަހާ އާއި ނާއިލް އެމީހުނާއި ބައިވެރިވުމަށް ތަކުރާރުކޮށް ބުނުމާއެކު އަޝްރާ އެދެމީހުން ގާތަށް ދިއުމަށް ހިނގައިގަތެވެ. ” އަޝްރާ… ދެކޮފީއިންތަ ވަނީ… ހެހެހެ… ” އަޝްރާ ގެނައި ޓްރޭގައި ދެމަގު ކޮފީ ހުރުމާއެކު ޒަހާއަށް އަހާލެވުނެވެ. ” ނޫން… އެއީ.. އަސްލު ނާއިލްއަށާ ގެނައީ… ޒަހާ ނާއިލްއަށް ކޮފީ ހެދިކަމެއް ނޭނގެ ކުރިންނެއް… ކާކޮޓަރިއަކަށްވެސް ނާންނަމެއްނު… ” ނާއިލްގެ މޫނަށް އެއްފަހަރު ނަޒަރު ހުއްޓާލުށްފަހު ކުޑަކޮށް އިސްޖަހައިލައިގެން އިނދެ އަޝްރާ ބުނެލިއެވެ. ” އޯހް… އަހަރެން ކޮފީ ހަދައިގެން ނިކުންތަނާ ކަންނޭނގެ އަޝްރާއަށް ތިދެވުނީ… ނާއިލް މެސެޖުކޮށްލާފަ މިނިކުންނަނީއޭ ބުނީމަ އަހަރެން ކޮފީ ރެޑީކޮށްލީ…” ހިނިތުންވެލައިގެން އިނދެ ޒަހާ ވާހަކަ ދެއްކިއެވެ. ” ހުމްމް… ވަރަށް ވަރަށް މީރު ޒަހާގެ ކޮފީ… އަޝްރާ… ޔޫ ޝުޑް ޓޭސްޓް އިޓް… ” ޒަހާ އާއި އަޝްރާއަށް ބަލައިލަމުން ނާއިލް ވާހަކަ ދެއްކިއެވެ. ” ޝުއަރ… ” ގަދަކަމުން ހިނިތުންވުމެއް ވެރިކުރުވަމުން ދަތްތަކަށް ބާރުލާފާ އަޝްރާ ބުނެލިއެވެ. އަޝްރާގެ މޫނު މައްޗަށް ވެރިވި ކުލަވަރުން ނާއިލްއަށް ހިނިގަނޑު ހިފަހައްޓާލެވުނީ ހަމަ ކިރިޔާއެވެ. އެވަގުތު އެގޭގެ ދޮރު ހުޅުވާލުމަށްފަހު އަރުޝަދު ވަނެވެ. ”އަރުޝަދު… އާދޭ އާދޭ… ރަނގަޅު ވަގުތެއްގަ ތިޔައީ… ޖޮއިން އަސް… ” އަޝްރާގެ ކައިރީގައި އިން ގޮނޑިއަށް އިޝާރާތްކުރަމުން ނާއިލް އެހެން ބުނުނާއެކު އަރުޝަދުވެސް އައިސް އެމީހުނާ ބައިވެރިވިއެވެ. އަޝްރާ އޭނާ ނާއިލްއަށް ތައްޔާރު ކުރ ކޮފީ މަގު އަރުޝަދަށް ދިއްކޮށްލިއެވެ. ހިނިތުންވެލަމުން އަރުޝަދު ކޮފީ މަގުގައި ހިފާ އެތިފޮދެއް ބޯލިއެވެ. ” ވަރަށް މީރު… ކާކު ތައްޔާރުކުރި ކޮފީއެއް… ” ފަހަރަކު މީހެއްގެ މޫނަށް ބަލައިލަމުން އަރުޝަދު ބުނެލިއެވެ. ”އަހަރެން… ކޮންމެ ދުވަހަކުވެސް އާދޭ.. އޭރުން އަރުޝަދަށް ލިބޭނެ ކޮފީ… ” ކާމިޔާބީގެ ހިނިތުންވުމެެއް ނާއިލްއަށް ހަދިޔާކުރަމުން އަޝްރާ ވާހަކަ ދެއްކިއެވެ. ނާއިލްއަށް ރައްދުގައި ބުނާނެ އެއްޗެއް ނޭނގުނެވެ. އޭނާ އަވަސް އަވަހަށް ވާހަކަ އޮޅުވާލިއެވެ.

ކޮފީ ބޮއެގެން ނިމިގެން އެންމެންވެސް ދިޔައީ އޮފީހަށް ދާން ތައްޔާރުވާށެވެ. ޒަހާވެސް މަސައްކަތް ކުރަނީ އަމިއްލަ ފަރާތެއްގެ އޮފީހެއްގައި ކަމުން އޭނަވެސް ތައްޔާރުވާން ކޮޓަރި ދާން ދިޔައެވެ. ” އަޝްރާ… މިގަމީސް އިސްތިރިކޮށްލަދީބަލަ ވަރަށް އަވަހަށް… ” ކޮޓަރިއަށް ދާން ހިނގައިގަން އަޝްރާ އާއި ނާއިލް ވާހަކަ ދެއްކިއެވެ. އޭރު ނާއިލް ހުރީ އޭނަގެ ކޮޓަރީގެ ދޮރު ހުޅުވައިގެން ގަމީސް ހިފައިގެންނެވެ. ” މިފަހަރު ކީއްވެ އަހަރެން… ޒަހާ އެހެރީނު… ޒަހާ އަހަންނަށްވުރެ މާރީތިކޮށް އިސްތިރިކޮށްލަދޭނެ… ކޮފީ ބުއީވެސް ޒަހާ ތައްޔާރު ކުރީމައެއްނު… އެހެންވީމަ ގަމީސްވެސް ލާންވާނީ ޒަހާ އިސްތިރިކުރީމަ… ” މިހެން ބުނެ އަޝްރާ ނާއިލްގެ ކޮޓަރި ހުރަސްކޮށް ދާން ހިނގައިގަތެވެ. ” ޒަހާ… މިގަމީސް އިސްތިރިކޮށްލަދީފާނަންތަ… ” އެވަގުތު ނާއިލްގެ ކޮޓަރި ދޮރު މައްޗަށް އެރި ޒަހާ ފެނި ނާއިލް ބުނެލިއެވެ. އަޝްރާގެ ފިޔަވަޅުތައް ވަގުތުން ހުއްޓުނެވެ. ” އިޓްސް އޯކޭ ޒަހާ… އަހަރެން އިސްތިރިކޮށްލާނަން… ވަރަށް ލަސްވެފައެއްނު ތިހުރީވެސްދޯ… ” ޒަހާ ގަމީހުގަ ހިފުމުގެ ކުރިން އަޝްރާ ގޮސް ނާއިލްގެ އަތުން ގަމީސް އަތުލަމުން އެހެން ބުނެ އިސްތިރިކުރަން އަވަސްވެގަތެވެ. ޒަހާ އޯކޭއޭ ބުނެ ގޮސް އޭނަގެ ކޮޓަރިއަށް ވަނެވެ. ނާއިލް އެއްމިޔަކަނުން ހީލައިގެން ހުރެ އަޝްރާއަށް ބަލަން ހުރުމަށްފަހު ފެންވަރާލުމަށް ކޮޓަރިއަށް ވަނެވެ.

ގަމީސް އިސްތިރިކޮށް ނިންމާލުމަށްފަހު އަޝްރާ ގޮސް މަޑުމަޑުން ނާއިލް ކޮޓަރި ދޮރު ހުޅުވާލިއެވެ. ކޮޓަރި ތެރެއެއް ވަށާއިގެން ނަޒަރު ހުއްޓާލުމަށްފަހު ސިއްރު ސިއްރުން މަޑު ފިޔަވަޅުތަކެއްގައި އަޝްރާ އެތެރެއަށް ވަނެވެ. ފާޚާނާއިގެ ބޮކި ދިއްލާފާ ހުރުމުން ނާއިލް އުޅެނީ ފާޚާނާގައި ކަން އޭނައަށް ޔަގީންވިއެވެ. މަޑު ފިޔަވަޅުތަކެއްގައި ގޮސް އަލަމާރީގެ ދޮރުފަތް ހުޅުވާ ގަމީސް އަލަމާރިއަށް ލިއެވެ. އަލަމާރީގެ ދޮރުފަތް ލައްޕާލުމަށްފަހު ފަސްއެނބުރުނު އަޝްރާގެ އަޑުން ތޫލި އަޑެއް އިވިގެން ދިޔައީ ޖެހޭ ނުޖެހޭހާ ކައިރީގައި ހުރި ނާއިލް ފެނިފައެވެ. އެވަގުތު ނާއިލް އަވަސް ހަރަކާތަކާއެކު އަޝްރާގެ އަނގަ މަތީގައި އަތް އެޅިއެވެ. ދެމީހުންގެ ހަތަރު ކަޅި ބައްދަލުވެގެން ދިޔަ ވަގުތު ބަސްމޮށުންތެރިކަމާއި ނުލާ އެކަކު އަނެކަކާ އެތައް ވާހަކައެއް ހިއްސާކުރިއެވެ. ނާއިލްގެ ތޫނު ނަޒަރުން އަޝްރާގެ ގައިގެ ލޯލިތައް ކޮޅަށްޖެހިގެން ދިޔައިރު މުޅި މީހާއެކީ ފިނިވެގެން ދިޔައެވެ. ހަމައެކަނި ކަޅު ކުލައިގެ ޒަމާނީ ފަޓުލޫނެެއްގައި ހުރިއިރު ނާއިލްގެ ކަސްރަތީ ހަށިގަނޑު ވަނީ ހާމައަށެވެ. ދާދި ދެންމެއަކު ފެންވަރައިގެން އައުމުގެ ސަބަބުން ނާއިލްގެ ހަށިގަނޑުން ދުވަމުންދިޔަ ޝަވަރ ޖެލް ވަހުން ސިކުނޑި ތާޒާކުރުވިއެވެ. ބޮލުގެ އިސްތަށިކޮޅު ތެތްކޮށް ހުރިއިރު ނިއްކުރި މައްޗަށް ވެއްޓިފައިވި އިސްތަށިކޮޅުތަކުން އެފިރިހެންވަންތަ މޫނަށް ފެންތިކި ތަޅަމުން ދިޔައިރު ބަލާ ފޫހިނުވާހާ ހިތްގައިމެވެ. ނާއިލްއަށް ބެލެމުން ދިޔައީ އަޝްރާގެ ބޮޑު ދެލޮލަށެވެ. އެރީތި ދެލޮލާއި އެސްފިޔަތަކުގެ ފުރިހަމަކަމުން އެދެލޮލުގެ ޖާދުލުގައި ނުޖެހި އެއްވެސް މީހަކު ނުދާނެކަން ގައިމެވެ. ނާއިލް އޭނަގެ އަތް އަޝްރާގެ އަނގަމަތިން ނަގައި އެތުނި ތުންފަތަށް ނަޒަރު ހުއްޓާލިއެވެ. މަޑުމަޑުން ނާއިލްއަށް އަޝްރާ އާއި ގާތަށް ޖެހިލެވުނެވެ. ނާއިލްގެ ހޫނު ނޭވާ އޭނަގެ މޫނަށް އެޅުމުގެ ސަބަބުން އަޝްރާއަށް ދެލޯ މަރާލެވުނެވެ. އަޝްރާގެ އެހަރަކާތުން ނާއިލްއަށް އިތުރު ހިތްވަރެއް ލިބިގެން ދިޔައެވެ. ހިނދެއް ހިނދަކަށް ނާއިލްގެ މޫނު ކައިރިވަމުން ދިޔައިރު އަޝްރާގެ ހިތުގެ ތެޅުން ބާރުވެ ނޭވާ އަވަސްވެގެން ދިޔައެވެ. އެވަގުތު ފޯނެއްގައި ހުރެ ޒަހާ ވާހަކަ ދައްކަމުން ދިޔަ އަޑަށް ދެމީހުނަށް ސިހިފާ ދުރުވެލެވުނެވެ. އަޝްރާއަށް ސިހިފައި ނާއިލްގެ ދެލޮލަށް ބަލައިލެވުނެވެ. ނާއިލްގެ ލޮލުންވެސް ސިހުން ފެނިގެން ދިޔައެވެ. އަޝްރާ އަވަސް ހިނގުމެއްގައި ކޮޓަރިނއ ނިކުމެ އޭނަގެ ކޮޓަރިއަށް މިސްރާބުޖެހިއެވެ. އޭރުވެސް ހިތުގެ ތެޅުމަކަށް ބަދަލެެއްނާދެއެވެ.

އިއާން މިންހާގެ އިންތިޒާރުގައި ކާރުގައި މަޑުކޮށްލައިގެން އިނެވެ. މާގިނަ އިރަކު އިންތިޒާރު ކުރާކަށް ނުޖެހުނެވެ. ގޭގެ ބޮޑު ދޮރު ހުޅުވާލުމަށްފަހު ބޭރަށް ނުކުން މިންހާ ފެނި އިއާންގެ ތުންފަތައް ހިނިތުންވުމެއް ވެރިވިއެވެ. ކަޅު ކުލައިގެ އަބާޔާއަކާއެކު މަޑު ޕީޗްކުލައެއްގެ ޝޯލްގައި މިންހާ ފެންނައިރު ނުހަނު ހިތްގައިމެވެ. މޫނުގައި ކޮށްފައިވި ލުއި މޭކަޕުން އިތުރު ފުރިހަމަ ކަމެއް ގެނެސްދިނެވެ. ރީތި ހިނިތުންވުމެއް ތުންފަތުގައިވީއިރު އެހިނިތުންވުމުން އިއާންގެ ހިތާ ކުޅެލައެވެ. ކަޅު ކުލައިގެ އަތްދިގު ދަބަސް އެއް އަތުގައި އަޅުވާލާފައިވާއިރު އަނެއް އަތުގައި ހުދު ކުލައިގެ ޑޮކްޓަރސް ކޯޓު އޮތެވެ. ފަރި ހިނގުމެއްގައި އައިސް މިންހާ ކާރަށް އެރިއިރުވެސް އިއާންއަށް ބަލަހައްޓާއިގެން އިނދެވުނެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.